The Kaladan Post 

၂၀၂၅ ခုနှစ်၊ ဧပြီလ (၂၉) ရက်နေ့

ကရင်အမျိုးသားအစည်းအရုံး (KNU) က ထုတ်ပြန်သည့် နောက်ဆုံးသတင်းအရ စစ်ကောင်စီ (SAC) သည် တဖက်သတ် အပစ်အခတ်ရပ်စဲရေး ကြေညာထားသော်လည်း ကော်သူးလယ်အုပ်ချုပ်ရေးဒေသအတွင်း လူ့အခွင့်အရေးချိုးဖောက်မှု ၁၁၀ ကျော်ကို ဧပြီလ ၂ ရက်မှ ၂၂ ရက်အတွင်း ကျူးလွန်ခဲ့သည်ဟု သိရသည်။

ထိုချိုးဖောက်မှုများတွင် ဘာသာရေးအဆောက်အအုံများနှင့် အရပ်သားနေထိုင်ရာဒေသများအပေါ် လေကြောင်းတိုက်ခိုက်မှုများနှင့် အမြောက်ပစ်ခတ်မှုများ ပါဝင်ပြီး ဧပြီလ ၁၉ ရက်နေ့တွင် ဒူးသထူခရိုင်၊ ဘီးလင်းမြို့နယ်ရှိ မင်းစောကျေးရွာ ဗုဒ္ဓဘာသာဘုန်းကြီးကျောင်းအား လေကြောင်းတိုက်ခိုက်မှုကြောင့် လူသုံးဦးသေဆုံးကာ ဘုန်းကြီးများအပါအဝင် ဒဏ်ရာရရှိသူများလည်း ရှိခဲ့သည်ဟု ဖော်ပြထားသည်။

“စစ်ကောင်စီ၏ အပစ်အခတ်ရပ်စဲရေးကြေညာချက်သည် နိုင်ငံတကာနှင့် ပြည်သူလူထုများအား လှည့်ဖြားမှုသက်သက်သာဖြစ်ပြီး သိုးရေခြုံတဲ့ ဝံပုလွေကဲ့သို့ အပြစ်မဲ့ပြည်သူများကို ဆက်လက်ဒုက္ခပေးနေပါသည်” ဟု KNU ထုတ်ပြန်ချက်တွင် ဖော်ပြထားသည်ကို တွေ့ရသည်။

ထို့နောက် ဧပြီလ ၂၀ ရက်တွင် ကလူးလွီထူခရိုင်၊ လယ်ဒိုမြို့နယ်ရှိ ကေလာသစ်ဘုရားကို လေကြောင်းမှ ထပ်မံတိုက်ခိုက်ခဲ့သဖြင့် ဘုရားတည်နှင့် ဘုန်းကြီးကျောင်း၊ ဓမ္မသာလများ ပျက်စီးခဲ့ပြီး ထိုနေ့တွင်ပင် စစ်ကောင်စီ၏ ခြေလျင်တပ်ရင်း ၂၆၄ မှ ၁၂၀ မမ အမြောက်ဖြင့် ဆောထီမြို့နယ်၊ အင်းဖူးဝါးကျေးရွာသို့ ပစ်ခတ်ခဲ့ရာ ဒေသခံတစ်ဦး သေဆုံးပြီး ငါးဦး ဒဏ်ရာရရှိခဲ့သည်။

“စစ်ကောင်စီ၏ အပစ်အခတ်ရပ်စဲရေးကြေညာချက်သည် နိုင်ငံတကာနှင့် ပြည်သူလူထုများအား လှည့်ဖြားမှုသက်သက်သာဖြစ်ပြီး သိုးရေခြုံတဲ့ ဝံပုလွေကဲ့သို့ အပြစ်မဲ့ပြည်သူများကို ဆက်လက်ဒုက္ခပေးနေပါသည်”

KNU ၏ အဆိုအရ၊ ဤတိုက်ခိုက်မှုများသည် ဒေသခံပြည်သူများအကြား ကြီးမားသော ကြောက်ရွံ့မှုနှင့် စိုးရိမ်ပူပန်မှုများ ဖြစ်ပေါ်စေခဲ့ပြီး၊ မိသားစုများသည် ပဋိပက္ခများနှင့် သဘာဝဘေးအန္တရာယ်များကြားတွင် မိမိတို့ကိုယ်ကို ကာကွယ်နိုင်ရန်  နည်းလမ်းများကို အရေးပေါ်  ရှာဖွေနေရသည်ဟု ဆိုသည်။

တစ်ချိန်တည်းမှာပင် ဧပြီလ ၂၂ ရက်တွင် KNU သည် ၎င်းတို့၏ ဌာနချုပ်၌ ကမ္ဘာမြေနေ့အခမ်းအနားကို ကျင်းပခဲ့ပြီး သဘာဝအရင်းအမြစ်များ ထိန်းသိမ်းရေးနှင့် ပတ်ဝန်းကျင်ကာကွယ်ရေးတို့၏ အရေးပါမှုကို အလေးပေးပြောကြားခဲ့သည်။ “ငြိမ်းချမ်းမှုနှင့် အလှတရားအတွက် ကမ္ဘာမြေကို အတူတကွ ကာကွယ်ထိန်းသိမ်းကြပါစို့” ဟု KNU က တိုက်တွန်းခဲ့သည်။

ကရင်အမျိုးသားရဲတပ်ဖွဲ့မှ ဗိုလ်မှူးကြီး စောအဲခါလူဖိုးကလည်း မိမိတို့၏ ရဲတပ်ဖွဲ့သည် လူမှုအသိုက်အဝန်းများ၏ လုံခြုံရေးနှင့် ဥပဒေစိုးမိုးရေးအတွက် အရေးပါသော အခန်းကဏ္ဍမှ ပါဝင်နေကြောင်း ရဲတပ်ဖွဲ့၏ လုပ်ဆောင်ချက်များသည် ပြည်သူများအား လုံခြုံမှုရှိသည်ဟု ခံစားရစေပြီး ၎င်းတို့၏ ဘေးကင်းမှု ကာကွယ်ပေးသူများရှိနေကြောင်း ယုံကြည်မှုဖြစ်ပေါ်စေသည်ဟု ထုတ်ဖော်ပြောကြားခဲ့သည်။