နိုဝင် (၁၈) သတင်းတိုပေါင်းချုပ်

ကျောက်ဖြူမြို့နယ်အတွင်း စစ်တပ်က အရပ်သားပစ်မှတ်ထား လေကြောင်းတိုက်ခိုက်မှုပြုလုပ်နေ

နိုဝင် ၁၈
The Kaladan Post
ကျောက်ဖြူမြို့နယ်အတွင်း နိုဝင်ဘာ ၁၇ ရက်နေ့က စစ်ကောင်စီတပ်က လေကြောင်းနှင့် အမြောက်ဆွဲ တိုက်ခိုက်မှုများ အကြိမ်ကြိမ်ဆက်တိုက် ပြုလုပ်ခဲ့သည်ဟု ရခိုင့်တပ်တော် AA က ယမန်ညနေပိုင်းတွင် ထုတ်ပြန်သည်။ မွန်းလွဲ ၁၂:၃၀ ခန့်တွင် မင်းရပ်တိုက်နယ် လိပ်တင်ကျေးရွာ စာသင်ကျောင်းကို လေကြောင်းမှ ဗုံးကျဲခဲ့ရာ ဗုံးမှာ ကျောင်းဝင်းအတွင်း ကျရောက်ပေါက်ကွဲခဲ့ပြီး အသေခံဒရုန်းဖြင့်ပါ ထပ်မံတိုက်ခိုက်ခဲ့သော်လည်း ကျောင်းသားကျောင်းသူများကို အချိန်မီ ဘေးလွတ်ရာသို့ ရွှေ့ပြောင်းနိုင်ခဲ့သဖြင့် လူထိခိုက်သေဆုံးမှု မရှိခဲ့ဘဲ ကျောင်းအဆောက်အအုံ ပျက်စီးခဲ့ကြောင်း AA က ပြောဆိုသည်။ ထို့နောက် မွန်းလွဲ ၁၂:၃၅ ခန့်တွင် ကျောက်ကလေ ကျေးရွာကို ပေါင် ၅၀၀ ဗုံး ၂ လုံး၊ ညနေ ၄:၃၀ ခန့်တွင် အမြင့်ကျွန်းတံတားအနီးသို့ Y-12 လေယာဉ်ဖြင့် ထပ်မံ ဗုံး ၆၀ ခန့် ကျဲချခဲ့ကြောင်းသိရသည်။ ည ၈:၁၇ ခန့်တွင်လည်း မင်းရပ်ရွာ၊ သံချောင်းရွာပတ်ဝန်းကျင်သို့ လေကြောင်းမှ ဗုံးကျဲခဲ့သည့်အပြင် ဇင်ချောင်းကမ်းခြေရှိ စစ်သင်္ဘော ၂ စီးက လက်နက်ကြီးများဖြင့် ပစ်ခတ်ခဲ့ရာ ယင်းတိုက်ခိုက်မှုများတွင် ထိခိုက်သေဆုံးမှု အသေးစိတ် မသိရသေးကြောင်း သတင်းရင်းမြစ်က ပြောဆိုသည်။ စစ်ကောင်စီတပ်က ကျောက်ဖြူမြို့နယ် အတွင်း ကျေးရွာများကို လေကြောင်းတိုက်ခိုက်မှု အကြိမ်ကြိမ် ပြုလုပ်လာနေသဖြင့် ပြည်သူများ လေကြောင်းရန်ကို ပိုမိုသတိထားကြရန် AA က သတိပေးထုတ်ပြန်ထားသည်။

ရွှေကုက္ကိုလ်မြို့တွင် ကျားဖြန့်သူဌေးများနှင့် အဓိကခေါင်းဆောင်များကို ညတွင်းချင်း BGF ကားများဖြင့် သယ်ထုတ်

နိုဝင် ၁၈
The Kaladan Post
ကရင်ပြည်နယ် မြ၀တီမြို့နယ် ရွှေကုက္ကိုလ်မြို့သစ်တွင် BGF ခေါင်းဆောင် နိုင်မောင်ဇော်က ကျား ဖြန့်လုပ်ငန်းများကို အပြီးတိုင် နှိမ်နင်းမည်ဟု ယမန်နေ့က ကြေညာပြီးနောက် နိုဝင်ဘာ ၁၇ ရက် ညတွင်းချင်း တရုတ်နှင့် နိုင်ငံခြားသား ကျားဖြန့်သူဌေးများ၊ ကုမ္ပဏီခေါင်းဆောင်များကို BGF က ကားများဖြင့် အလျင်အမြန် သယ်ထုတ်နေကြောင်း ကရင်စစ်ရေးသတင်းရင်းမြစ်များက ယနေ့ ဖော်ပြသည်။ ထို့အပြင် အောက်ခြေအလုပ်သမားများကို အလုပ် ၃ ရက်ပိတ် ဟု အကြောင်းပြ ထားပြီး မြို့တွင်း လူထောင်ချီ အထုပ်အပိုးဆွဲကာ နည်းလမ်းမျိုးစုံဖြင့် ထွက်ပြေးနေကြရာ လမ်းပိတ်ဆို့မှုများ၊ ကားပိတ်ဆို့မှုများဖြင့် မြို့တစ်မြို့လုံး ၀ရုန်းသုန်းကား ဖြစ်ပွားနေသည်ဟု ဆိုသည်။ရွှေကုက္ကိုလ်မြို့သစ်ကို စတင်တည်ထောင်ခဲ့သူ BGF ထိပ်တန်းခေါင်းဆောင် စောချစ်သူမှာ ယခုအခါ လူမြင်ကွင်းမှ ပျောက်ကွယ်နေပြီး အဆိုပါ ကျားဖြန့်နှိမ်နင်းရေးလုပ်ငန်းစဉ်ကို နိုင်မောင်ဇော်ကသာ ဦးစီးဆောင်ရွက်နေသည်ဟု သတင်းရင်းမြစ်များက ဆက်လက်ပြောဆိုသည်။ စောချစ်သူ၏ ဆရာ She Zhijiang ကို တရုတ်နိုင်ငံသို့ လွှဲပြောင်းပြီးနောက် စောချစ်သူ လူမြင်ကွင်း တွင် မထင်ရှားတော့ကြောင်းလည်း သိရသည်။တပ်မတော်ကလည်း ရွှေကုက္ကိုလ်အနီးဝန်းကျင်တွင် စခန်းချ နေရာယူလျက်ရှိပြီး BGF နှင့် ပူးတွဲ၍ စစ်ဆင်ရေးများ ဆင်နွှဲလျက်ရှိကြောင်း သတင်းများထွက်ပေါ်နေသည်။

ပေါ်တာဆွဲခံရသူ ၄ ဦး ကျွန်းလှထောင်ဖောက်ပြီး တော်လှန်ရေးတပ်ထံ လွတ်မြောက်

နိုဝင် ၁၈
The Kaladan Post
ကန့်ဘလူမြို့နယ်အတွင်း ပေါ်တာဆွဲခံရပြီး ကျွန်းလှအချုပ်ထောင်သို့ ပို့ဆောင်ခံခဲ့ရသည့် အမျိုး သား ၄ ဦးသည် နိုဝင်ဘာ ၁၀ ရက် ည ၁၁:၃၀ ခန့်တွင် ထောင်ဖောက်ပြေးကာ ဖိနပ်မပါဘဲ၊ ဓာတ်မီးမပါဘဲ၊ ကိုယ်ဒေသမဟုတ်သဖြင့် လမ်းမကျွမ်းကျွမ်းနှင့် ငှက်ပျောသီးမီးဖုတ်စားရင်း ၃ ညတိုင်တိုင် လျှောက်လာခဲ့ပြီး တော်လှန်ရေးတပ်ဖွဲ့များထံ အောင်မြင်စွာ ရောက်ရှိလွတ်မြောက်လာ ခဲ့ကြောင်း ကျွန်းလှတက်ကြွလှုပ်ရှားသူများအဖွဲ့က နိုဝင်ဘာ ၁၆ ရက်ညက ရုပ်သံမှတ်တမ်းနှင့် တကွ ထုတ်ပြန်သည်။ ဦးဆောင်ထွက်ပြေးသူ အသက် ၁၉ နှစ်အရွယ် လူငယ်က ရောက်တဲ့နေ့ညကတည်းက ထွက်ဖို့ ဆုံးဖြတ်ထားသဖြင့် သံဆူးကြိုးကို ဆွဲဖြတ်၊ အိမ်သာက အပြားလေးနဲ့ ပျဉ် ၃ ပြားကို ၈ ရက်တိုင် တိုက်ဖြတ်ခဲ့ရပြီး ထွက်တဲ့ညက ထမင်းပဲစား ဟု ပြောဆိုသည်။ ၎င်းတို့က ထောင်တွင်း ထမင်းဟင်းများတွင် ဆေးခတ်ထားသဖြင့် စားပြီးတိုင်း မူးဝေပျော့ခွေကာ အိပ်ပျော်နေရကြောင်း၊ အိမ်သာ၊ သောက်ရေ၊ ချိုးရေအားလုံး တစ်နေရာတည်းမှသာ ရရှိကြောင်း၊ စစ်ဗိုလ်တစ်ဦး တစ်ရက်ခြားလာကာ PDF ထံရောက်ရင် ဖမ်းပြီး သတ်မယ် ဟု ခြိမ်းခြောက်စည်းရုံးလေ့ရှိကြောင်း ဆက်လက်ပြောဆိုသည်။ လက်ရှိအချိန်ထိ ကန့်ဘလူမြို့နယ်နှင့် ရွှေဘို-မြစ်ကြီးနား ဗျူဟာလမ်းပေါ်ရှိ ဂိတ်များတွင် ပျူစောထီးခေါင်းဆောင် ဝါသဝ ဦးဆောင်သော ပေါ်တာဆွဲမှု ပြင်းထန်နေဆဲဖြစ်ရာ ဖြတ်သန်းသွားလာသူများ အထူးသတိထားကြရန် ကျွန်းလှတက်ကြွလှုပ်ရှားသူများအဖွဲ့က သတိပေးထားသည်။ ထွက်ပြေးလွတ်မြောက်လာသည့် ၄ ဦးကို မိသားစုဝင်များထံ ပြန်လည်ချိတ်ဆက်ပို့ဆောင်ပေးထားပြီးဖြစ်ကြောင်း သိရသည်။

မှော်ဘီ ကြံ့ခိုင်ရေးပါတီရုံးကို လက်ပစ်ဗုံးနဲ့ တိုက်ခိုက်စစ်သား ၂ ဦး ပြင်းထန်ဒဏ်ရာရ

နိုဝင် ၁၇
The Kaladan Post
ရန်ကုန်တိုင်း မှော်ဘီမြို့နယ်၊ ပြည်လမ်းမပေါ်ရှိ ကြံ့ခိုင်ရေးပါတီရုံးကို နိုဝင်ဘာ ၁၆ ရက် ညပိုင်းက မြို့ပြကြွက်ကွန်ယက် (Urban Rat Network) လက်အောက်ခံ ပြောက်ကျားတပ်ဖွဲ့က လက်ပစ်ဗုံး များနှင့် လက်လုပ်မိုင်းများ ပစ်သွင်းတိုက်ခိုက်ခဲ့ရာ ပါတီရုံးလုံခြုံရေးယူထားသော စစ်သား ၂ ဦး ပြင်းထန်ဒဏ်ရာရရှိခဲ့ကြောင်း မြို့ပြကြွက်ကွန်ယက် တာဝန်ရှိသူက ပြောဆိုသည်။ တိုက်ခိုက်မှု အတွင်း ဗုံးများ ပါတီရုံးအနီး စစ်သားနှင့် ပျူစောထီးများ ကင်းစောင့်နေသည့် ဂိတ်အနီးတွင် ကျရောက်ပေါက်ကွဲခဲ့ခြင်းဖြစ်ပြီး စစ်အုပ်စုဘက်က ရပ်ကွက်အတွင်း မီးရှို့ကာ သေနတ်ရမ်းပစ်ခတ် ခဲ့သော်လည်း ရဲဘော်များ ဘေးလွတ်ရာသို့ အောင်မြင်စွာ ဆုတ်ခွာနိုင်ခဲ့သည်ဟု ဆိုသည်။ အရင်က ပျူစောထီးတွေပဲ စောင့်ပေမယ့် အခုမဲဆွယ်ချိန်နီးလာတော့ စခတွေပါ စောင့်နေကြကြောင်း အနားကပ်ကျတဲ့ ၂ ယောက်ကတော့ ဒဏ်ရာပြင်းတယ် ဟု မြို့ပြကြွက်ကွန်ယက် တာဝန်ရှိသူက ပြောသည်။ ယင်းတိုက်ခိုက်မှုသည် အကြမ်းဖက်စစ်အုပ်စု၏ အတုအယောင်ရွေးကောက်ပွဲကို လုံးဝဆန့်ကျင်ကြောင်း ပြသရန်နှင့် ပြည်သူများ ပါဝင်ပူးပေါင်းခြင်း မပြုကြရန် သတိပေးခြင်း ဖြစ်ကြောင်း မြို့ပြကြွက်ကွန်ယက်က ထုတ်ဖော်ပြောဆိုထားသည်။ စစ်ခွေးတွေက ရအောင်လုပ် မှာဖြစ်သလို ကျွန်တော်တို့ကလည်း ရအောင်တားမြစ်သွားမှာဖြစ်ပြီး ယခုထက် ပိုပြင်းထန်တဲ့ တိုက်ခိုက်မှုတွေ ဆက်လက်ရှိလာဦးမယ် ဟု တာဝန်ရှိသူက ဆက်လက်သတိပေးထားသည်။

မင်းအောင်လှိုင် ဘားအံခရီးစဉ်တွင် အဆိပ်ခတ်ခံရမှာ ကြောက်လို့ ဒေသပြင်ရေစာလုံးဝမထိ

နိုဝင် ၁၇
The Kaladan Post
ကရင်ပြည်နယ် ဘားအံမြို့နှင့် မွန်ပြည်နယ် မော်လမြိုင်မြို့သို့ နိုဝင်ဘာ ၁၅-၁၆ ရက်နေ့များတွင် သွားရောက်ခဲ့သည့် အကြမ်းဖက်စစ်ခေါင်းဆောင် မင်းအောင်လှိုင်သည် သက်ဆိုင်ရာ ပြည်နယ် အစိုးရအဖွဲ့က တည်ခင်းပေးထားသော သောက်ရေ၊ ရေနွေး၊ လက်ဖက်ရည်၊ အချိုပွဲ၊ နေ့လယ်စာ စသည်တို့ကို လုံးဝ မတို့မထိဘဲ ကိုယ်ရေးအရာရှိအဖွဲ့က ကြိုတင်ပြင်ဆင်ပေးထားသည့် ကိုယ်ပိုင် ရေဘူးနှင့် အစားအသောက်များကိုသာ စားသောက်ခဲ့ကြောင်း ခရီးစဉ်အတွင်း မင်းအောင်လှိုင်နှင့် နီးကပ်တွေ့ဆုံခွင့်ရခဲ့သည့် ဌာနဆိုင်ရာ သတင်းရင်းမြစ်များက ပြောဆိုသည်။ တွေ့ဆုံပွဲများတွင် မင်းအောင်လှိုင်က အနည်းဆုံး ၁ နာရီကျော်ကြာ တစ်ဦးတည်း မရပ်မနား စကားပြောဆိုနေခဲ့ပြီး ရှေ့တင်ထားသည့် ရေ၊ လက်ဖက်ရည်၊ အချိုပွဲများကို လက်တောင်မထိကြောင်း၊ နေ့လယ်စာများ ကိုလည်း ပြည်နယ်အစိုးရအဖွဲ့ စီစဉ်ပေးသည်ကို လုံးဝမစားဘဲ ကိုယ်ရေးအရာရှိအဖွဲ့ ပြင်ဆင်ပေး သည်ကိုသာ စားသောက်ခဲ့ကြောင်း သိရသည်။ ထို့ပြင် ဘားအံခရီးစဉ်အတွင်း လုံခြုံရေးစိုးရိမ်မှုနှင့် ခရီးစဉ်သတင်းပေါက်ကြားမှုကြောင့် မူလအစီအစဉ်ဖြစ်သည့် ဘားအံတပ်နယ်တွေ့ဆုံပွဲ၊ တောင်ကလေးစစ်ဆေးရုံ သွားရောက်ရန် အစီအစဉ်များကို ဖျက်သိမ်းကာ ညအိပ်မနေဘဲ ရဟတ် ယာဉ်ဖြင့် မော်လမြိုင်သို့ ချက်ချင်းပြန်လည်ထွက်ခွာခဲ့ကြောင်း သိရှိရသည်။

ချင်းပြည်သို့ စစ်တပ် စစ်ကြောင်းတိုက်ခိုက်ခံရပြီး စစ်တပ်ဘက် ၁၀၀ နီးပါးသေဆုံး

နိုဝင် ၁၈
The Kaladan Post
ချင်းပြည်နယ်အတွင်း အကြမ်းဖက်စစ်ကောင်စီတပ်များ ထိုးဖောက်ဝင်ရန် စစ်ကြောင်းများ ထိုးလာ မှုကို ချင်းတော်လှန်ရေးတပ်များနှင့် မဟာမိတ်တော်လှန်ရေးအဖွဲ့များက ပူးပေါင်း ခုခံတိုက်ခိုက်ခဲ့ရာ တိုက်ပွဲများ ပြင်းထန်ဆက်ဖြစ်ပွားနေပြီး စစ်ကောင်စီဘက်မှ ဗိုလ်မှူး၊ ဗိုလ်ကြီး အဆင့်အရာရှိများ အပါအဝင် စစ်သားများ ၁၀၀ ဝန်းကျင် သေဆုံးခဲ့ကြောင်း ချင်းပြည် (Chinland) အစိုးရ၊ ကာကွယ်ရေးဝန်ကြီးဌာနက ထုတ်ပြန်သည်။ ချင်းအမျိုးသားတပ်မတော် (CNF) နှင့် ဒေသန္တရ ကာကွယ်ရေးတပ်ဖွဲ့များဖြင့် ဖွဲ့စည်းထားသော ချင်းလဲန်အစိုးရတပ်ဖွဲ့၏ စစ်ကြောင်း ၁ နှင့် စစ်ကြောင်း ၂ တို့က အကြမ်းဖက်စစ်ကောင်စီတပ်ကို ကလေးမြို့နယ်၊ ဂန့်ဂေါမြို့နယ်၊ ဖလမ်းမြို့နယ်နှင့် တီးတိန်မြို့နယ်တို့တွင် ပြင်းပြင်းထန်ထန် တိုက်ခိုက်ခဲ့ကြောင်း သိရသည်။ စစ်ကြောင်း ၁ က ဗမိုက်ကော့ (Vakok) PDF၊ ကျောင်းသားတပ်မတော် (ABSDF)၊ PDF ခရိုင်တပ်ရင်းများ၊ ပကဖများ၊ ယောကာကွယ်ရေးတပ်မတော် (YDF) စသည့် မဟာမိတ်အဖွဲ့များနှင့် လက်တွဲ၍ ကလေးမြို့နှင့် ဂန့်ဂေါမြို့ အကြားတွင် စစ်ကောင်စီတပ်ကို တိုက်ခိုက်နေကြပြီး စစ်ကြောင်း ၂ က ချင်းအမျိုးသားကာကွယ်ရေးတပ်မတော် (CNDF)၊ PDF ဇိုလန်း (Zoland) စသည့် မိတ်ဖက်များက ဖလမ်းမြို့နှင့် ဝေဘူလမြို့ အကြားတွင်လည်းကောင်း၊ တီးတိန်မြို့နှင့် ခိုင်ကမ်းမြို့ အကြားတွင်လည်းကောင်း စစ်ကောင်စီတပ်ကို ဆက်လက်တိုက်ခိုက်နေကြောင်း သိရသည်။ စစ်ကောင်စီက လေယာဉ်နှင့် ဒရုန်းများဖြင့် အားပြုတိုက်ခိုက်နေသော်လည်း ချင်းလဲန်အစိုးရ တပ်ဖွဲ့နှင့် မဟာမိတ်များ၏ ပြင်းထန်သော တိုက်ခိုက်မှုကြောင့် ဗိုလ်မှူး၊ ဗိုလ်ကြီး အဆင့် အရာရှိများ ပါဝင်သော အင်အား ၁၀၀ ခန့်ကို ချေမှုန်းနိုင်ခဲ့ပြီး စစ်သုံးပန်းများ ဖမ်းဆီးရမိကာ လက်နက်ခဲယမ်းများ အများအပြား သိမ်းဆည်းနိုင်ခဲ့ကြောင်း ထုတ်ပြန်ချက်တွင် ဖော်ပြထားသည်။

ဆောမြို့ပေါ် ဧည့်စာရင်းစစ်ဆေးရာမှ WY ဆေးပြား ၃၈၅ ပြားနှင့် လက်နက်များ သိမ်းဆည်းရမိ

နိုဝင် ၁၈
The kaladan Post
ဆောမြို့နယ် ပြည်သူ့အုပ်ချုပ်ရေးအဖွဲ့၊ ပြည်သူ့လုံခြုံရေးနှင့် ကာကွယ်ရေးအဖွဲ့များ ပူးပေါင်းကာ ၂၀၂၅ ခုနှစ် နိုဝင်ဘာလ ၁၆ ရက် ညနေ ၁၀ နာရီခန့်တွင် မြို့ပေါ်ရပ်ကွက်များအတွင်း ဧည့်စာရင်း စစ်ဆေးခဲ့ရာ ဇေယျာရပ်ကွက်ရှိ အိမ်ငှားနေထိုင်သူ ဦးမြင့်နိုင် (ရခိုင်ပြည်နယ်၊ မြောက်ဦးဇာတိ) ၏နေအိမ်တွင် WY ပန်းရောင်စိတ်ကြွရူးသွပ်ဆေးပြား ၃၈၅ ပြား၊ ဆေးသုံးစွဲပစ္စည်းများ၊ ဓါးမြှောင် ၂ လက်၊ ပြောက်ကျား၀တ်စုံ ၂ ထည်၊ ငွေကျပ် ၄၆ သိန်းခွဲကျော်၊ လက်ကိုင်ဖုန်း ၅ လုံး၊ ဆိုင်ကယ် ၁ စီး၊ ဖဲထုပ် ၆ ထုတ်အပါအဝင် ပစ္စည်းများစွာကို သိမ်းဆည်းရမိခဲ့ကြောင်း ယောအလင်းတန်းက ထုတ်ပြန်သည်။ ဆေးရောင်း၀ယ်ဖြန့်ချိသူ ဦးမြင့်နိုင်နှင့် အတူ ဖဲဝိုင်းကစားနေသည့် ရခိုင်အမျိုးသား ၃ ဦး၊ ပြည့်တန်ဆာလုပ်ကိုင်သူ အမျိုးသမီး ၁ ဦး စုစုပေါင်း ၅ ဦးကို ဖမ်းဆီးရမိခဲ့ပြီး မြို့နယ်ပြည်သူ့ လုံခြုံရေးအဖွဲ့က ဆက်လက်စစ်ဆေး အရေးယူလျက်ရှိကြောင်း သိရသည်။