နိုဝင် (၂၂) ရက် သတင်းတိုပေါင်းချု်

ဝန်ကြီးဟောင်း စိုးသိန်းသား အေးချမ်း လှိုင်သာယာအရှေ့မှာ မဲမဆွယ်ရဲဘဲ လုံခြုံရေးကြောင့် ဆိုင်းဘုတ်တင်ပြီး ဓာတ်ပုံဖျက်ခိုင်း

နိုဝင် ၂၂
The Kaladan Post
စစ်ကောင်စီနှင့် နီးစပ်သူ၊ သမ္မတဟောင်းရုံးဝန်ကြီး ဦးစိုးသိန်း၏ သားဖြစ်သူ အေးချမ်းသည် ကြံ့ဖွတ် ပါတီမှ လှိုင်သာယာမြို့နယ် (အရှေ့ပိုင်း) ပြည်သူ့လွှတ်တော် ကိုယ်စားလှယ်လောင်းအဖြစ် ဝင်ပြိုင် ထားသော်လည်း လုံခြုံရေးကြောင့် ပေါ်ပေါ်တင်တင် မဲဆွယ်စည်းရုံးရဲခြင်းမရှိဘဲ ခိုးကြောင်ခိုးဝှက် လိုက်ပါနေရကြောင်း၊ မဲဆွယ်ဆိုင်းဘို့များတွင်ပင် ဓာတ်ပုံရိုက်ခွင့်မပေးဘဲ ဖျက်ခိုင်းထားကြောင်း ကြံ့ဖွတ်အရင်းအမြစ်က ဖော်ပြသည်။ ထို့ပြင် အေးချမ်းသည် အောက်ခြေပါတီဝင်များနှင့် သဟ ဇာတမဖြစ်၊ အထက်စီးဆန်သော ပြောဆိုဆက်ဆံပုံကြောင့် ပါတီတွင်းမှာပင် သဘောမကျခြင်း ခံနေရကြောင်း သိရသည်။ အေးချမ်းသည် စစ်ကောင်စီဖွဲ့စည်းထားသော သတင်းမီဒီယာကောင်စီ အတွင်းရေးမှူးအဖြစ်လည်း တာဝန်ထမ်းဆောင်နေပြီး ဖခင်ဖြစ်သူ စိုးသိန်းနှင့်အတူ စစ်အာဏာသိမ်းမှုကို ထောက်ခံအားပေးခဲ့သူများဖြစ်ကာ ပြည်သူအများအပြားကို ၅၀၅(က)၊ ၆၆(ဃ) ဖြင့် အမှုဖွင့်ကာ သိန်းထောင်ချီ လျော်ကြေးတောင်းနေသူများလည်း ဖြစ်သည်။ ယခုရွေးကောက်ပွဲတွင် ဗဟိုက ချပေးသဖြင့် အောက်ခြေက ငြင်းမရဘဲ လက်ခံရသည့် အခြေအနေကြောင့် ပါတီတွင်းပြဿနာများလည်း ပေါ်ပေါက်နေကြောင်း သတင်းရင်းမြစ်က ဆိုသည်။

ချောက်လမ်းပေါ် ဖြတ်သန်းနေသော စစ်တပ်ကား မိုင်းဆွဲတိုက်ခိုက်ခံရပြီး စစ်သား ၄ ဦး သေဆုံး

နိုဝင် ၂၂
The Kaladan Post
မကွေးတိုင်း ချောက်မြို့နယ် အမှတ် ၃ ပြည်ထောင်စုလမ်းပိုင်း (ချောက်-မြို့တီ) ပေါ်တွင် ဖြတ်သန်း နေသော စစ်ကြောင်း (ကား ၁ စီး၊ စစ်သား ၅ ဦး လိုက်ပါ) ကို တော်လှန်ရေးမဟာမိတ်တပ်ဖွဲ့များ (Tiger Fighter Force ချောက်ပကဖ စသည်) က နိုဝင်ဘာ ၁၇ ရက်နေ့တွင် မိုင်းဆွဲ ပစ်ခတ် တိုက်ခိုက်ခဲ့ရာ စစ်သား ၄ ဦး နေရာတင်သေဆုံး၊ ကားမောင်းသူ ၁ ဦး ဒဏ်ရာရရှိပြီး ပြန်ပါသွားခဲ့ကြောင်း Tiger Fighter Force က ထုတ်ပြန်သည်။ ထိုတိုက်ခိုက်မှုအတွင်း တော်လှန်ရေး ရဲဘော် ၁ ဦး လည်း မြင့်မြတ်စွာ ကျဆုံးခဲ့ပြီး စစ်ဘက်မှ လက်နက်ခဲယမ်း ရရှိခြင်း မရှိကြောင်း သိရသည်။ အလားတူ နတ်မောက်မြို့နယ်တွင်လည်း တော်လှန်ရေး တပ်ဖွဲ့များ၏ ဆက်တိုက်မှုများ ဖြစ်ပွားနေရာ၊ နိုဝင်ဘာ ၁၂ ရက်နေ့တွင် ဂွေးတောက်ကုန်းရွာ စစ်ကြောင်းကို နတ်မောက်ပကဖ က မိုင်းဆွဲတိုက်ခိုက်ခဲ့ရာ စစ်ဘက်မှ ထိခိုက်သေဆုံး ရှိသော်လည်း အရေအတွက် အတည်မပြုနိုင်ဘဲ ရဲဘော်များ အထိမဲ့အနစ်ရ ဆုတ်ခွာနိုင်ခဲ့ကြောင်း၊ ယနေ့ (နိုဝင်ဘာ ၂၁ ရက်) နံနက် ၆ နာရီ ၃၀ ခန့်တွင်လည်း မြောက်ဘက်ဂိတ်စခန်းကို ပကဖ က ဖောက်ခွဲတိုက်ခိုက်ခဲ့ရာ စစ်ဘက်မှ ထိခိုက်မှု ရှိသော်လည်း အရေအတွက် အတည်မပြု နိုင်ဘဲ ရဲဘော်များ ပြန်ဆုတ်ခွာနိုင်ခဲ့ကြောင်း People’s Defense Organization – Natmauk မှ ထုတ်ပြန်သည်။

ဘောလခဲရှေ့တန်း ခမရ-၅၃၁ တပ်သား တစ်ဦး လက်နက်နဲ့အတူ KA ထံ အလင်းဝင်

နိုဝင် ၂၂
The Kaladan Post
ကရင်နီပြည်နယ်၊ ဘောလခဲမြို့နယ်အတွင်း စစ်ကြောင်းထိုးလာနေသည့် စစ်ကောင်စီတပ်မှ ခမရ-၅၃၁ တပ်ရင်းသား တစ်ဦး လက်နက်ခဲယမ်းနှင့်အတူ နိုဝင်ဘာလ တတိယပတ်က ကရင်နီတပ်မ တော်(KA) တပ်ရင်း(၅) ထံ အလင်းဝင်လာခဲ့ကြောင်း KA တာဝန်ရှိသူက ပြောဆိုသည်။ အဆိုပါ တပ်သားမှာ ဖရူဆိုမြို့နယ်ရှိ အမှတ်(၁၄) တန်းမြင့်စစ်ရေးလေ့ကျင့်ရေးကျောင်းမှ နန်းဖဲဘက်သို့ ထိုးစစ်ဆင်လာသည့် စစ်ကြောင်းမှ ခွဲထွက်လာခြင်းဖြစ်ပြီး စစ်တပ်ထဲ သုံးနှစ်ဝန်းကျင် တာဝန် ထမ်းဆောင်ခဲ့ကြောင်း ဖွင့်ဟခဲ့သည်။ စစ်ကောင်စီတပ်သည် လွန်ခဲ့သည့် နှစ်လကျော်ကတည်းက ဖရူဆို-ဘောလခဲ လမ်းမကြီးကို ထိန်းချုပ်ရန် ကြိုးပမ်းနေသော်လည်း ထိခိုက်သေဆုံးမှု များပြား နေသဖြင့် လက်ရှိအချိန်ထိ အမှတ်(၁၄) တပ်ပတ်ဝန်းကျင်တွင်သာ ရှိနေသေးပြီး လမ်းတစ်လျှောက် ထိန်းချုပ်နိုင်ခြင်း မရှိသေးကြောင်း KA တပ်ရင်း(၅) တာဝန်ရှိသူက ဆိုသည်။ ယင်းလမ်းပိုင်းတွင် တိုက်ပွဲများ ပြင်းထန်စွာ ဖြစ်ပွားနေသဖြင့် ဖရူဆို-ထားလဲ့-နန်းဖဲ-ဘောလခဲ လမ်းမကြီးကို အသုံး မပြုရန် ကရင်နီအမျိုးသားကာကွယ်ရေးတပ်(KNDF)က ထပ်မံ သတိပေးထုတ်ပြန်ထားသည်။

မုံရွာ-မန္တလေးလမ်းပိုင်း၌ စစ်ယာဉ်တန်းကို မိုင်းဆွဲတိုက်ခိုက်ခံရပြီး စစ်သား ၅ ဦး သေဆုံး

နိုဝင် ၂၂
The Kaladan Post
စစ်ကိုင်းတိုင်း၊ မုံရွာမြို့နယ်၊ မုံရွာ-မန္တလေးလမ်းပိုင်း၊ စွမ်းရည်ထက်ဂိတ်နှင့် မြေနဲဂိတ်ကြားတွင် အနောက်မြောက်တိုင်းစစ်ဌာနချုပ်မှ ထွက်လာသော စစ်ယာဉ်တန်းကို တော်လှန်ရေးပူးပေါင်းတပ်ဖွဲ့ များက နိုဝင်ဘာလ ၂၀ ရက် နံနက် ၉:၄၅ ခန့်က အဝေးထိန်းမိုင်းများဖြင့် ဆွဲတိုက်ခိုက်ခဲ့ရာ စစ်သား ၅ ဦး ထိခိုက်သေဆုံးခဲ့ကြောင်း မုံရွာခရိုင် ပြည်သူ့ကာကွယ်ရေးတပ်မတော် တပ်ရင်း-၄၊ တပ်ခွဲ-၂ က ထုတ်ပြန်သည်။ တိုက်ခိုက်ခံရသည့် ယာဉ်တန်းမှာ မအူဂိတ်မှ ထွက်ခွာလာသော Faw ကားနှင့် ၁၂ ဘီးကားများဖြစ်ပြီး မိုင်းဆွဲခံရချိန်တွင် Faw ကားပေါ်မှ စစ်သား ၅ ဦး သေဆုံးခဲ့ခြင်းဖြစ်သည်။ တော်လှန်ရေးရဲဘော်များ အထိအခိုက်မရှိ ဘေးလွတ်ရာသို့ ပြန်လည်ဆုတ်ခွာနိုင်ခဲ့သည်။ အဆိုပါ စစ်ဆင်ရေးကို မုံရွာခရိုင် ပကဖ တပ်ရင်း-၄ (တပ်ခွဲ-၂၊ 5/Commando Force) က ဦးဆောင်ကာ တပ်ရင်း-၄ တပ်ခွဲ-၄ (5/Teacher Force)၊ တပ်ရင်း-၂၈ တပ်ခွဲ-၃ တို့နှင့် ပူးပေါင်းလုပ်ဆောင်ခဲ့ ခြင်းဖြစ်သည်။ ပြည်သူများအနေဖြင့် မုံရွာ-မန္တလေးလမ်းပိုင်းတွင် စစ်တပ်ယာဉ်တန်းများနှင့် ကပ်လျက်သွားလာခြင်း မပြုလုပ်ကြရန်လည်း မုံရွာခရိုင် ပြည်သူ့ကာကွယ်ရေး တပ်မတော်တပ်ရင်း ၄၊ တပ်ခွဲ ၂ တပ်ခွဲမှူး ကိုဝိုင်ဖိုင်က တိုက်တွန်းပြောဆိုထားသည်။

ဝရမ်းပြေးတရားခံ မင်းအောင်လှိုင်တွင် ရွေးကောက်ပွဲကျင်းပ ခွင့်အာဏာ မရှိဟု KNU ထုတ်ပြန်

နိုဝင် ၂၂
The Kaladan Post
နိုင်ငံတကာ ရာဇဝတ်တရားရုံး (ICC) က ဝရမ်းထုတ်ခံထားရသူ မင်းအောင်လှိုင်နှင့် သူ့၏စစ်တပ် တွင် ပြည်သူလူထုကို ကိုယ်စားပြုသည့် ရွေးကောက်ပွဲ ကျင်းပနိုင်သည့် မည်သည့်အခွင့်အာဏာမျှ မရှိကြောင်း ကရင်အမျိုးသားအစည်းအရုံး (KNU) က နိုဝင်ဘာ ၂၀ ရက်နေ့က တရားဝင်ထုတ်ပြန် ကြေညာ ထားသည်။ စစ်ကောင်စီ ကျင်းပမည့်ရွေးကောက်ပွဲသည် လုံးဝ အတုအယောင်၊ လွတ်လပ် မှုမရှိ၊ တရားမျှတမှုမရှိ၊ ဥပဒေကြောင်းအရ တရားမဝင်၊ ပြည်သူဆန္ဒနှင့် လုံးဝကိုက်ညီခြင်းမရှိသည့် ထောင်ချောက်ဆင် ရွေးကောက်ပွဲသာဖြစ်ကြောင်း KNU က အချက်အလက်များဖြင့် တစ်ချက်ချင်း ပြောဆိုထားသည်။ မင်းအောင်လှိုင်သည် ၂၀၂၁ ဖေဖော်ဝါရီ ၁ ရက်နေ့က အာဏာသိမ်းပြီးကတည်း က ပြည်သူများကို ရက်စက်စွာ သတ်ဖြတ်၊ လေကြောင်းတိုက်ခိုက်၊ ဘုရားကျောင်း-ကျောင်းများကို ရည်ရွယ်ချက်ရှိ ဖျက်ဆီးနေသူ ဖြစ်သည့်အပြင် ဖွဲ့စည်းပုံအခြေခံဥပဒေကို လိုသလို ချိုးဖောက်ကာ နိုင်ငံတော်သစ္စာဖောက်မှု၊ စစ်ပုန်ကန်မှု စသည်တို့ကို ကျူးလွန်ထားသူဖြစ်ကြောင်း KNU က ထောက်ပြထားသည်။ ထို့ကြောင့် ပြည်သူလူထုအားလုံးအနေဖြင့် “သမိုင်းတရားခံ မဖြစ်ဖို့ အတုအယောင်ရွေးကောက်ပွဲကို ဆန့်ကျင်စို့” ဟူသော ကြွေးကြော်သံဖြင့် စစ်ကောင်စီရဲ့ အတုအယောင်ရွေးကောက်ပွဲကို တညီတညွတ်တည်း ဆန့်ကျင်ကန့်ကွက်ကြရန် KNU က နှိုးဆော်ထားသည်။

အမေရိကန်ဖိအားကြောင့် မြန်မာစစ်တပ်က ရွှေကုက္ကိုငွေလိမ်ဂိုဏ်းများကို အလျင်အမြန်နှိမ်နင်း

နိုဝင် ၂၂
The Kaladan Post
ပြီးခဲ့သည့်အပတ်က ဗိုလ်ချုပ်မှူးကြီး မင်းအောင်လှိုင် ဘားအံမြို့သို့ သွားရောက်ပြီး နောက်တစ်ရက် တွင် စစ်တပ်အရာရှိများက ကရင်နယ်ခြားစောင့်တပ် (BGF/KNA) ခေါင်းဆောင်များနှင့် တွေ့ဆုံ ကာ ထိုင်း-မြန်မာနယ်စပ်ရှိ အွန်လိုင်းငွေလိမ်ဂိုဏ်းများကို ချက်ချင်းနှိမ်နင်းရန် ညွှန်ကြားခဲ့ကြောင်း သတင်းရင်းမြစ်က ပြောကြားခဲ့သည်။ အဆိုပါ ညွှန်ကြားချက်သည် အမေရိကန်ဘဏ္ဍာရေးဝန်ကြီး ဌာနက BGF/KNA ကို ပိတ်ဆို့အရေးယူထားပြီး မကြာသေးမီက အမေရိကန်က ဖွဲ့စည်းကြောင်း ကြေညာခဲ့သည့် “Scam Center Strike Force” (FBI နှင့် Secret Service ပါဝင်သည့် နှိမ်နင်းရေး တပ်ဖွဲ့) ကြောင့် နောက်ထပ်အရေးယူခံရမည်ကို စိုးရိမ်သောကြောင့် ဖြစ်သည်ဟု ရင်းမြစ်များက ဆိုသည်။ တွေ့ဆုံပွဲတွင် စစ်ဘက်အရာရှိတစ်ဦးက “အမေရိကန်အဖွဲ့များ နယ်စပ်ဖြတ်ကျော်စုံစမ်း လာနိုင်သည့် အန္တရာယ်ကို မလိုလားပါ၊ ဒီပြဿနာကို ကျွန်တော်တို့ကိုယ်တိုင် ဖြေရှင်းရမည်” ဟု ပြောကြားခဲ့သည်။ ထို့နောက် အင်္ဂါနေ့တွင် စစ်တပ်နှင့် KNA ပူးပေါင်းအဖွဲ့သည် မြဝတီမြို့နယ် ရွှေကုက္ကိုဒေသကို ဝင်ရောက်စီးနင်းခဲ့ရာ နိုင်ငံခြားသား ၁,၀၀၀ ကျော်ကို ဖမ်းဆီးရမိခဲ့ပြီး ကွန်ပျူတာ ၂,၆၅၃ လုံး၊ ဖုန်း ၂၁,၇၅၀ လုံး သိမ်းဆည်းရမိခဲ့သည်။ KNA ပြောခွင့်ရပုဂ္ဂိုလ် နိုင်မောင်ဇော်က စစ်ဆင်ရေးကို ၎င်းတို့တပ်ဖွဲ့က ဦးဆောင်ခဲ့ခြင်းဖြစ်ကြောင်း ပြောဆိုခဲ့သည်။ နိုင်ငံတကာကျွမ်းကျင်သူများက အမေရိကန်နှင့် တရုတ်တို့၏ ဖိအားပေးမှုကြောင့် မြန်မာစစ်အုပ်စု နှင့် နယ်ခြားစောင့်တပ်များ အလျင်အမြန် လက်တွေ့ဆောင်ရွက်လာရခြင်းဖြစ်သည်ဟု သုံးသပ်ကြ သည်။