နိုဝင် (၂၄) သတင်းတိုပေါင်းချုပ်

KNLAက မင်းလက်ပံ ကျားဖြန့်ရုံ စီးနင်းရာ DKBA ၂၀ ဖမ်းဆီးပြီး လက်နက် ၁၇၆ ပါသိမ်းဆည်း

နိုဝင် ၂၄
The Kaladan Post
ကရင်ပြည်နယ်၊ မြ၀တီမြို့နယ်၊ မင်းလက်ပံကျေးရွာရှိ DKBA (ဗိုလ်သခွားသီး ဦးဆောင်အဖွဲ့) လုံခြုံ ရေးယူပေးထားသော တရုတ်ပိုင် ကျားဖြန့် (ငွေလိမ်) အလုပ်ရုံတစ်ခုကို နိုဝင်ဘာ ၂၁ ရက်နေ့တွင် KNLA စစ်ကြောင်းက ဝင်ရောက်စီးနင်းခဲ့ရာ လက်နက်ခဲယမ်း ၁၇၆ လက်နှင့်အတူ DKBA တပ်ဖွဲ့ ဝင် ၂၀ ဦးကို အရှင်ဖမ်းဆီးရမိခဲ့ကြောင်း သတင်းရင်းမြစ်က ပြောဆိုသည်။ ဗိုလ်သခွားသီးအပါဝင် ဂိုဏ်းခေါင်းဆောင်များနှင့် တရုတ်လုပ်သားများမှာ စစ်ကောင်စီထိန်းချုပ်ထားသည့် မြ၀တီမြို့ဘက် သို့ ကြိုတင်ထွက်ပြေးတိမ်းရှောင်သွားခဲ့ကြောင်း သိရသည်။ ထိုနေ့တွင်းမှာပင် မင်းလက်ပံအနီး တဝိုက်တွင် စစ်ကောင်စီတပ်နှင့် KNLA မဟာမိတ်တပ်များအကြား ပြင်းထန်စွာ ထိတွေ့တိုက်ပွဲ ဖြစ်ပွားခဲ့ရာ စစ်ကောင်စီ၏ လက်နက်ကြီး၊ လက်နက်ငယ်ကျည်များ ထိုင်းနိုင်ငံအတွင်းသို့ ကျရောက်ခဲ့သဖြင့် နိုဝင်ဘာ ၂၂ ရက်နေ့တွင် ထိုင်းစစ်တပ်က သတိပေးပစ်ခတ်မှု ပြုလုပ်ခဲ့သည်။ နိုဝင်ဘာ ၂၄ ရက်နေ့အထိလည်း မင်းလက်ပံ သင်္ချိုင်းအနီးတွင် တိုက်ပွဲများ ဆက်လက်ပြင်းထန် နေဆဲဖြစ်ပြီး ထိုင်းဘက်သို့ ကျည်ကျရောက်မှု ဆက်လက်ရှိနေကြောင်း သတင်းရင်းမြစ်က ဆိုသည်။ တိုက်ပွဲများကြောင့် မင်းလက်ပံကျေးရွာမှ ဒေသခံပြည်သူ ၃၀၀ ကျော် သောင်ရင်းမြစ် ကမ်းဘေးသို့ ထွက်ပြေးတိမ်းရှောင်နေရကြောင်း သိရသည်။

မန္တလေး-စစ်ကိုင်း နယ်မြေမှာ PDF တွေ စစ်ကြောင်း ၃ ခု တိုက်ခိုက်ခံရပြီး စစ်သား ၇ ဦးသေဆုံး

နိုဝင် ၂၄
The Kaladan Post
နိုဝင်ဘာ ၁၈ ရက်နေ့တွင် မန္တလေးတိုင်း၊ မြို့သာမြို့နယ်၊ ထနောင်းပင်ကျေးရွာဘက်သို့ စစ်ကြောင်း ထိုးလာသော စစ်ကောင်စီတပ်ဖွဲ့ (အင်အား ၁၆၀ ခန့်) ကို Zin Yaw Ni Sniper Packing Guerrilla Forces ဦးဆောင်သည့် တော်လှန်ရေးပူးပေါင်းတပ်များက ၆၀ မမ လက်နက်ကြီးများဖြင့် ပစ်ခတ် တိုက်ခိုက်ရာ စစ်သား ၅ ဦးသေဆုံး၊ ၁၅ ဦးဒဏ်ရာရရှိခဲ့ကြောင်း သတင်းရင်းမြစ်က ပြောဆိုသည်။ စစ်ကောင်စီတပ်မှာ မြို့သာမြို့ပေါ်သို့ ပြန်ဆုတ်ခွာခဲ့စဉ် တော်လှန်ရေးတပ်ဘက်မှ ရဲဘော် ၅ ဦး ကျဆုံးခဲ့ပြီး ရဲဘော် ၂ ဦးမှာ အရှင်ဖမ်းခံရပြီး လမ်းတလျှောက် ပစ်သတ်ခံခဲ့ရကြောင်း Zin Yaw Ni Sniper packing Guerrilla forces မှ အဖွဲ့ခေါင်းဆောင် ကိုကျားသစ်က ပြောဆိုသည်။ နိုဝင်ဘာ ၂၃ ရက် နံနက် ၁၀ နာရီခန့်တွင် စစ်ကိုင်းတိုင်း၊ ခင်ဦးမြို့နယ်၊ မုံလှကျေးရွာအတွင်း ယာယီတပ်စွဲထား သော စစ်တပ်နှင့် ပျူစောထီး အင်အား ၁၀၀ ခန့်ကို ရေဦးမြို့နယ် ပြည်သူ့ကာကွယ်ရေးတပ်က ၄၅ မိနစ်ကြာ ဝင်ရောက်တိုက်ခိုက်ခဲ့ရာ စစ်တပ်ဘက်မှ ထိခိုက်သေဆုံးမှု အတိအကျ မသိရသေးသော် လည်း တော်လှန်ရေးတပ်ဖွဲ့ဝင်များ အထိအခိုက်မရှိ ပြန်ဆုတ်နိုင်ခဲ့ကြောင်း သိရသည်။ ထို့အတူ နိုဝင်ဘာ ၂၂ ရက် နံနက် ၇:၄၅ ခန့်တွင် မုံရွာမြို့နယ်၊ ချောင်းဦး-မုံရွာလမ်းပိုင်းတွင် အနောက်မြောက် တိုင်းစစ်ဌာနချုပ်မှ သံပြားကာကား ၁၁ စီးပါ စစ်ယာဉ်တန်းကို မုံရွာခရိုင် ပကဖ တပ်ရင်း ၄၊ တပ်ခွဲ ၂ ဦးဆောင်သည့် ပူးပေါင်းတပ်များက မိုင်းဆွဲတိုက်ခိုက်ရာ စစ်သား ၂ ဦး ဒဏ်ရာရရှိခဲ့ပြီး တော်လှန် ရေးတပ်ဘက်မှ အထိအခိုက်မရှိ ပြန်ဆုတ်နိုင်ခဲ့ကြောင်း မုံရွာခရိုင် ပြည်သူ့ကာကွယ်ရေး တပ်မတော် တပ်ရင်း ၄၊ တပ်ခွဲ ၂ တပ်ခွဲမှူး ကိုဝိုင်ဖိုင်က ပြောဆိုသည်။ ယခုရက်ပိုင်းအတွင်း မန္တလေး-စစ်ကိုင်းနယ် မြေတွင် တော်လှန်ရေးတပ်များ၏ စစ်ကြောင်းပိတ်ဆို့တိုက်ခိုက်မှုများ ပြင်းထန်နေဆဲဖြစ်သည်။

ပေါက်-မြိုင်နယ်စပ် ပါရာမော်တာရှာစစ်ကြောင်း ပြန်တိုက်ခံရပြီး စစ်သား ၄ ဦးသေဆုံးပြီး ၃ ဦး အလင်းဝင်

နိုဝင် ၂၄
The Kaladan Post
မကွေးတိုင်း၊ ပေါက်မြို့နယ်နှင့် မြိုင်မြို့နယ် ထိစပ်နယ်မြေ (နသတ်၊ တဲကြီး၊ ကံသစ်၊ ကမ္ဘာဖြူ၊ ကျောက်ခွက် စသည့်ရွာအနီး) တွင် ယခင်က ပျက်ကျခဲ့သော စစ်တပ် ပါရာမော်တာ ရှာဖွေရန် ထွက်လာသည့် တပ်မ(၉၉) လက်အောက်ခံ ခလရ(၄၁၈)၊ ခလရ (၄၁၉) စစ်ကြောင်းကို မြိုင်-ပကဖ၊ ပေါက်-ပကဖ၊ MGY PDF၊ YDF နှင့် မဟာမိတ်ပူးပေါင်းတပ် များက နိုဝင်ဘာ ၂၃ရက်နေ့တွင် အနီးကပ် တိုက်ခိုက်ရာ မိနစ် ၂၀ ခန့်ကြာ ပြင်းထန်စွာ ဖြစ်ပွားခဲ့ကြောင်း မြိုင်-ပကဖ က ထုတ်ပြန် သည်။ တိုက်ပွဲအတွင်း စစ်တပ်ဘက်မှ အယောက် ၄ ဦး သေဆုံး၊ ၁၀ ဦးကျော် ဒဏ်ရာ ရရှိခဲ့ပြီး လက်နက်ကြီးများဖြင့် ရမ်းသမ်းပစ်ခတ်ကာ အော်ဟစ်ငိုကြွေးသံများ ထွက်ပေါ်ခဲ့ကြောင်း သိရသည်။ ထို့ပြင် ပစအပတ်စဉ်(၁၂) တပ်သား သန့်ဇင်၊ တင်ထွန်း၊ ပစအပတ်စဉ်(၁၁) တပ်သား အောင်မိုး တို့ ၃ ဦးမှာ MA-1 သေနတ် ၃ လက်၊ ကျည်ဘောက် ၃ ခု၊ ကျည် ၈၇ တောင့်တို့နှင့်အတူ ပကဖထံ အလင်းဝင်ရောက်ခဲ့သည်။ မန္တလေးနှင့် ရှမ်းပြည်မှ ပေါ်တာဆွဲခံရပြီး စစ်တပ်ထဲ အတင်းအဓမ္မ ဖြည့်တင်းခံရသူများဖြစ်ကြောင်း အလင်းဝင်လာသည့် တပ်သားများက ပြောဆို ကြသည်။ အဆိုပါ စစ်ကြောင်းမှာ ပေါက်မြို့နယ် ရွှေဘုံသာပျူရွာနှင့် မြိုင်မြို့ စက်မှု(၂) မှ ထွက်ခွာ လာခြင်းဖြစ်ပြီး ချိုင့်ဇောက်၊ ထန်းပေါက်ကုန်း၊ ဖလံကိုင်း၊ သစ်ကြီးတော၊ ကျောက်တိုင်ခင်၊ ညောင်ဇင် စသည့်ရွာများကို မွှေနှောက်မီးရှို့၊ ပြည်သူများကို ဖမ်းဆီး သတ်ဖြတ်၊ ကြက်၊ ဝက်၊ နွားများကို ခိုးယူစားသောက်ခဲ့ကြောင်း သိရသည်။ တိုက်ပွဲအပြီး စစ်တပ်ဘက်မှ အထိနာသဖြင့် ဂျက်ဖိုက်တာများဖြင့် ပေါက်-မြိုင်ထိစပ်ကျေးရွာများကို လေကြောင်းတိုက်ခိုက်မှု ၃ ကြိမ် ပြုလုပ် ခဲ့သည်။ နိုဝင်ဘာ ၂၂ ရက်ကလည်း ဖလံကိုင်းမှ ထွက်လာသော စစ်ကြောင်းကို ကမ္ဘာဖြူရွာအနီး တွင် အကြိမ်ပေါင်းများစွာ ထိတွေ့တိုက်ခိုက်ခဲ့ရာ စစ်တပ်ဘက်မှ ထမ်းစင်များဖြင့် ဒဏ်ရာရသူများ ပို့ဆောင်နေသည်ကို တွေ့ရှိခဲ့ကြောင်း မြိုင်-ပကဖ က ပြောဆိုသည်။

 

မအူပင် ပြည်သူတွေကို နိုင်ငံရေး-စီးပွားရေး အမြင်ရှိသူကို မဲထည့်ကြဖို့ မင်းအောင်လှိုင် တိုက်တွန်း

နိုဝင် ၂၄
The Kaladan Post
ဧရာဝတီတိုင်း၊ မအူပင်မြို့သို့ သွားရောက်စဉ် အာဏာသိမ်းစစ်ခေါင်းဆောင် မင်းအောင်လှိုင်က လာ မည့် ဒီဇင်ဘာ ၂၈ ရက်တွင် ကျင်းပမည့် စစ်တပ်ရွေးကောက်ပွဲအတွက် ပြည်သူများ ဆန္ဒမဲ ထည့်ကြ ရန်နှင့် တိုင်းပြည်၊ ဒေသအကျိုး၊ တာဝန်အရေးသုံးပါးကို ကာကွယ်နိုင်သူ၊ နိုင်ငံရေး-စီးပွားရေး-ကာကွယ်ရေး အမြင်ရှိသူများကို ရွေးချယ်မဲပေးကြရန် ယမန်နေ့ နိုဝင်ဘာ ၂၃ ရက်နေ့က တိုက်တွန်း ပြောဆိုခဲ့ကြောင်းသိရသည်။ စစ်ခေါင်းဆောင်က ရွေးကောက်ပွဲမှာ လွတ်လပ်၍ တရားမျှတမည် ဖြစ်ကြောင်း၊ ကိုယ်စားလှယ်လောင်းများကို ဥပဒေနှင့်အညီ စိစစ်နေကြောင်း ထပ်မံပြောဆိုခဲ့သည်။ သို့သော် အမျိုးသားညီညွတ်ရေးအစိုးရ (NUG)၊ တိုင်းရင်းသားလက်နက်ကိုင်အဖွဲ့များနှင့် တော်လှန် ရေးအင်အားစုများက စစ်တပ်ကျင်းပမည့် ရွေးကောက်ပွဲအား လုံးဝပါဝင်ဆန့်ကျင်ကြရန်နှင့် မဲမ ပေးကြရန် အကြိမ်ကြိမ်ထုတ်ပြန်ထားပြီး ပြည်သူလူထုကိုလည်း ရရာနည်းဖြင့် ဆန့်ကျင်ကြရန် တိုက်တွန်းထားသည်။ စစ်တပ်က ရွေးကောက်ပွဲကို အဆင့် ၃ ဆင့်ခွဲ၍ ကျင်းပမည်ဖြစ်ပြီး ပထမ အဆင့်အဖြစ် ရန်ကုန်အပါအဝင် မြို့နယ်အချို့တွင် စတင်မည်ဖြစ်ကာ လက်ရှိ ကိုယ်စားလှယ် လောင်းများ မဲဆွယ်စည်းရုံးနေချိန်တွင် စစ်ခေါင်းဆောင်ကိုယ်တိုင် ဒေသအချို့သို့ ခရီးထွက်၍ ပြည်သူများကို မဲထည့်ရန် စည်းရုံးနေသည်ကို တွေ့ရှိရသည်။ ထို့ပြင် စစ်တပ်မှ ဗိုလ်ချုပ်ကြီးများ အပါအဝင် ဗိုလ်ချုပ်အဆင့်များစွာသည် စစ်တပ်ထောက်ခံ ကြံ့ဖွတ်ပါတီ (USDP) ကိုယ်စား အမတ်လောင်းအဖြစ် ဝင်ရောက်ယှဉ်ပြိုင်ကြမည်ဖြစ်ကြောင်း သိရသည်။

ကလုံရွာအနီး စစ်တပ်ပူးပေါင်း ၃၀၀ စစ်ကြောင်း တိုက်ခံရပြီး ဖွဲ့စည်းပုံပျက် သေနတ် ၇၀ ကျော် သိမ်းဆည်းခံရ

နိုဝင် ၂၄
The Kaladan Post
နိုဝင်ဘာ ၂၃ ရက် နံနက်ပိုင်းတွင် စစ်ကိုင်းတိုင်း၊ ခင်ဦးမြို့နယ်၊ မုံလှရွာအခြေစိုက် စစ်ကော်မရှင်-ပျူစောထီး (ဘုန်းကြီးဝါသဝ ဦးဆောင်အဖွဲ့ပါဝင်) ပူးပေါင်းအင်အား ၃၀၀ ခန့်ပါ စစ်ကြောင်းသည် ကလုံရွာဘက်သို့ ထိုးစစ်ဆင်လာစဉ် ကန့်ဘလူ-ခင်ဦးခရိုင် ကာကွယ်ရေးပူးပေါင်းတပ်များက ကြား ဖြတ်ပိတ်ဆို့ ပြင်းထန်စွာတိုက်ခိုက်ခဲ့ရာ စစ်ကြောင်းတစ်ခုလုံး ဖွဲ့စည်းပုံပျက်သည်အထိ အထိနာခဲ့ ကြောင်း သတင်းရင်းမြစ်က ပြောဆိုသည်။ တိုက်ပွဲတွင် စစ်ကော်မရှင်-ပျူစောထီးဘက်မှ သေဆုံး သူ များပြားခဲ့ပြီး သေနတ်အလက် ၇၀ ကျော်အပါအဝင် လက်နက်ခဲယမ်းများစွာ သိမ်းဆည်းရမိခဲ့ ကြောင်း ကာကွယ်ရေးတပ်ဖွဲ့ဝင်များက ပြောဆိုသည်။ စစ်ကြောင်းအထိနာသဖြင့် ညနေပိုင်းတွင် ဂျက်ဖိုက်တာဖြင့် လေကြောင်းပစ်ကူ ပြုလုပ်ခဲ့သော်လည်း တော်လှန်ရေးတပ်ဖွဲ့ဖက်မှ အထိအခိုက် မရှိကြောင်း သိရသည်။ နိုဝင်ဘာလဆန်းပိုင်းကတည်းက ကန့်ဘလူ-ခင်ဦးနယ်စပ်တွင် စစ်တပ်နှင့် နယ်မြေခံပျူစောထီးတပ်များ အင်အားအလုံးအရင်းဖြင့် ထိုးစစ်ဆင်နေမှုကြောင့် တိုက်ပွဲများ နေ့စဉ် နီးပါး ဖြစ်ပွားနေပြီး စစ်တပ်ဘက်မှ နယ်မြေပြန်လည်စိုးမိုးရေးနှင့် လမ်းပန်းဆက်သွယ်ရေး ထိန်းသိမ်းလိုသည့် ရည်ရွယ်ချက်ရှိကြောင်း ဒေသတွင်း စစ်ရေးသတင်းရင်းမြစ်များက သုံးသပ်ထား သည်။ ပြီးခဲ့သည့် နိုဝင်ဘာ ၁၂ ရက်ကလည်း အလားတူ စစ်ကော်မရှင်-ပျူစောထီး အင်အား ၁၀၀ ကျော်ပါ စစ်ကြောင်းကို ကာဘိုး-ယင်းတိုက်လမ်းပိုင်းတွင် ကြားဖြတ်တိုက်ခိုက်ရာ အရှင်ဖမ်း ၁၅ ဦး၊ သေဆုံး ၅၀ ဝန်းကျင်နှင့် လက်နက်အမျိုးအစား ၂၀ ကျော် သိမ်းဆည်းရမိခဲ့သေးသည်။

ကျွန်းစု ယမုံအနီး လက်နက်ခဲယမ်းတင်ကား ၂ စီး ပကဖ ဖြတ်တိုက်ခံရပြီး ပျူနှင့် ရဲ ၅ ဦးသေဆုံး

နိုဝင် ၂၄
The Kaladan Post
တနင်္သာရီတိုင်း၊ ကျွန်းစုမြို့နယ်၊ ဘုရားထွက်ကျေးရွာမှ ပဲ့တိုင်ပျူစခန်းသို့ လက်နက်ခဲယမ်းတင် ဆောင်လာသော စစ်အုပ်စု Town Ace ကား ၂ စီး (အင်အား ၁၅ ဦးဝန်းကျင်) ကို ယမုံကျေးရွာအနီး လမ်းပိုင်းတွင် နိုဝင်ဘာ ၂၃ ရက် နံနက်ပိုင်းက ကျွန်းစုမြို့နယ်ပကဖ နှင့် မြိတ်ခရိုင်ပကဖ ပူးပေါင်း တပ်များက ကြားဖြတ်တိုက်ခိုက်ခဲ့ကြောင်း ကျွန်းစုမြို့နယ် ပြည်သူ့ကာကွယ်ရေးအဖွဲ့ က ထုတ်ပြန် သည်။ ရှေ့ဆုံးကား ၁ စီးကို ပစ်ခတ်ရာ ခဲမိုင်းချောင်းထဲ ပြုတ်ကျပြီး စီးနင်းသိမ်းဆည်းနိုင်ခဲ့သည်။ နောက်ကားကို ဆက်လက်တိုက်ခိုက်ရာ ပျူစောထီး+ရဲ ၅ ဦး သေဆုံး၊ ၂ ဦး ပြင်းထန်ဒဏ်ရာရရှိခဲ့ပြီး ကျန်ရှိသည့် ကား ၁စီးမှာ ပဲ့တိုင်မရောက်ဘဲ ဘုရားထွက်သို့ ပြန်ဆုတ်သွားခဲ့ကြောင်း ကျွန်းစုမြို့နယ် ပြည်သူ့ကာကွယ်ရေးအဖွဲ့ ရဲ့ တာဝန်ရှိသူတစ်ဦးက ပြောဆိုသည်။အဆိုပါတိုက်ပွဲတွင် Town Ace ကား ၁ စီး၊ ၆၀ မမ မော်တာပြောင်း ၁ ခု၊ ကျည် ၅ လုံး၊ ၉ မမ ကျည် ၃၈ တောင့်ဖ၊ နာနတ်သီး လက်ပစ်ဗုံး ၂ လုံး၊ အူဇီကျည်ဘောက် ၂ ဘောက်၊ ဓားမြှောင် ၁ ချောင်း၊ ဖုန်း ၁ လုံး၊ ပျူယူနီဖောင်း ၁ စုံ သိမ်းဆည်းရရှိခဲ့ကြောင်း သိရသည်။ ထို့ပြင် ကားဒါရိုက်တာ ၁ ဦးနှင့် ပျူစောထီးအဖွဲ့ဝင် ဟောင်း ၁ ဦးတို့ကို အရှင်ဖမ်းဆီးရမိပြီး စစ်ဆေးအရေးယူဆောင်ရွက်လျက်ရှိကြောင်း ကျွန်းစုပကဖက ထုတ်ပြန်သည်။

NUG အမြဲတမ်းအတွင်းဝန် ဒေါ်ကြည်ပြာ နဲ့ ခင်ပွန်း တာဝန်ယာရီရပ်ဆိုင်း၊ အဂတိ-ဖိနှိပ်မှု စွပ်စွဲချက်နဲ့ စုံစမ်းစစ်ဆေး

နိုဝင် ၂၄
The Kaladan Post
အမျိုးသားညီညွတ်ရေးအစိုးရ (NUG) က ပြည်ထောင်စုဝန်ကြီးချုပ်ရုံး အမြဲတမ်းအတွင်းဝန် ဒေါ်ကြည်ပြာ နှင့် ခင်ပွန်းဖြစ်သူ ဦးညီညီမင်းတို့ကို တာဝန်မှ ယာယီရပ်ဆိုင်းထားကြောင်း ယနေ့ နိုဝင်ဘာ ၂၄ ရက်နေ့တွင် တရားဝင်ထုတ်ပြန်သည်။ ရုံးတွင်းဝန်ထမ်းများက ဒေါ်ကြည်ပြာနှင့် ခင်ပွန်းတို့အား ရာထူးဩဇာအသုံးချ ဖိနှိပ်ခြင်း၊ ငွေကြေးအလွဲသုံးစားလုပ်ခြင်း၊ အဂတိလိုက်စားမှု စသည့် စွပ်စွဲချက်များဖြင့် တိုင်ကြားထားသဖြင့် ဝန်ကြီးချုပ်ကိုယ်တိုင် နိုဝင်ဘာ ၂၂ ရက်တွင် စုံစမ်း စစ်ဆေးရေးအဖွဲ့ ဖွဲ့စည်းခဲ့ပြီး နှစ်ဖက်စလုံးကို ခေါ်ယူစစ်ဆေး၍ တွေ့ရှိချက်အရ လိုအပ်သလို အရေးယူသွားမည်ဖြစ်ကြောင်း NUG က ကြေညာသည်။ တိုင်ကြားသူဝန်ထမ်းများက “စုံစမ်းစစ်ဆေးမှုကို ဝမ်းမြောက်စွာ ကြိုဆိုပြီး အပြည့်အဝ ပူးပေါင်းပါဝင်မည်၊ တော်လှန်ရေး အောင်မြင်သည်အထိ ဆက်လက်တိုက်ပွဲဝင်သွားမည်” ဟု လူမှုကွန်ရက်တွင် တုံ့ပြန်ထားသည်။ ဒေါ်ကြည်ပြာကမူ “သေးငယ်သော ပုဂ္ဂိုလ်ရေးမကျေနပ်မှုကို အခွင့်ကောင်းယူ “စနစ်တကျ စီစဉ်ထားသည့် ပုဂ္ဂိုလ်ရေးတိုက်ခိုက်မှု” ဖြစ်ပြီး လွဲမှားသော စွပ်စွဲချက်များဖြင့် နိုင်ငံရေးသိက္ခာ ချရန် ကြိုးပမ်းခြင်းဖြစ်သည်” ဟု ငြင်းဆိုထားသည်။

ခင်ဦးမြို့နယ် မုံလှ-ပျဥ်ထောင်ပျူကြား ကြားဖြတ်တိုက်ခိုက်ခံရ၍ စစ်တပ် ၈၀ ခန့်သေဆုံး

နိုဝင် ၂၄
The Kaladan Post
နိုဝင်ဘာ ၂၃ ရက် မွန်းလွဲ ၁၂ နာရီခန့်တွင် စစ်ကိုင်းတိုင်း၊ ခင်ဦးမြို့နယ်၊ မုံလှကျေးရွာမှ ပျဥ်ထောင် ပျူစောထီးရွာသို့ အင်အား ၁၈၀ ခန့်ဖြင့် ထွက်လာသော စစ်ကောင်စီတပ် (နည်းဗျူဟာ ၃၃၂၊ ခမရ ၁၁၁ နှင့် ကန့်ဘလူပျူစောထီးများ ပါဝင်) ကို ပြည်သူ့ကာကွယ်ရေးတပ်ဖွဲ့များ (အမှတ် ၂ ရွှေဘိုခရိုင် တပ်ရင်း ၃၊ ခင်ဦးမြို့နယ်ပကဖ၊ တိုက်နယ် ၁-၅ ပကဖ၊ ပလဖ အပါအဝင်) က ပူးပေါင်းကြားဖြတ် တိုက်ခိုက်ခဲ့ရာ စစ်ကောင်စီဘက်မှ စစ်သား ၆၀ မှ ၈၀ ခန့် ကျဆုံးပြီး စစ်ကြောင်းတစ်ခုလုံး ပြုန်းတီးခဲ့ကြောင်း ပြည်သူ့ကာကွယ်ရေးအဖွဲ့ – ခင်ဦးမြို့နယ်မှ တာဝန်ရှိသူတစ်ဦးက ပြောဆိုသည်။ တိုက်ပွဲဖြစ်ပွားရာနေရာတွင် အလောင်းများစွာ လယ်ကွင်းနှင့် ကန်သင်းရိုးများအတွင်း ကျန်ရှိနေဆဲ ဖြစ်ပြီး စစ်ကောင်စီဘက်က အလောင်းများကို ပြန်လည်ကောက်ယူခြင်းမပြုဘဲ မုံလှရွာအတွင်းသို့ အထိနာစွာ ဆုတ်ခွာသွားခဲ့ကြောင်းသိရသည်။ စစ်ကောင်စီ လေကြောင်းမှ ဂျက်ဖိုက်တာ တစ်စီးနှင့် ဆူဆိုက်ဒရုန်း တစ်စီး ပါဝင်ကူညီခဲ့သော်လည်း တော်လှန်ရေးတပ်များက တိုက်ပွဲတွင်း ငါးကြင်းမှီး ၁ လက်၊ MA-1 ၁၀ လက်၊ MA-2 ၃ လက်၊ MA-3 ၃ လက်၊ MA-4 ၁ လက်၊ G-3 ၄ လက်၊ MAS Sniper ၁ လက်၊ M1 ၅ လက်နှင့် BA-100/60mm ကွန်မန်ဒိုစိန်ပြောင်း ၁ လက် အပါအဝင် ဆက်စပ် ကျည်ခွံ၊ ခဲယမ်းများ အများအပြား သိမ်းဆည်းရရှိခဲ့ကြသည်။ လက်ရှိအချိန်ထိ မုံလှရွာအတွင်း စစ်ကောင်စီတပ်စခန်းချထားဆဲဖြစ်ပြီး နယ်မြေရှင်းလင်းရေးနှင့် အတိအကျ သေဆုံးစာရင်း ထုတ်ပြန်နိုင်ရန် လေကြောင်းခြိမ်းခြောက်မှုကြောင့် ဆက်လက်ကြိုးပမ်းဆောင်ရွက်လျက် ရှိကြောင်း ပြည်သူ့ကာကွယ်ရေးအဖွဲ့ – ခင်ဦးမြို့နယ်မှ တာဝန်ရှိသူတစ်ဦးက ပြောဆိုသည်။