နိုဝင် (၂၈) သတင်းတိုပေါင်းချုပ်

ပုဒ်မ ၅၀၅(က) လွတ်ငြိမ်းတွင် နိုင်ငံရေးအကျဉ်းသား အနည်းငယ်သာ လွတ်မြောက်ပြီး ၂၀၀၀၀ ကျော် ဆက်လက်ချုပ်နှောင်ခံထားရ

 

နိုဝင် ၂၈

The Kaladan Post

နိုဝင်ဘာ ၂၆ ရက်က အကြမ်းဖက်စစ်တပ်ကြေညာခဲ့သည့် ပုဒ်မ ၅၀၅(က) လွတ်ငြိမ်းချမ်းသာခွင့်တွင် နိုင်ငံရေးအကျဉ်းသား အနည်းငယ်သာလွတ်မြောက်ခဲ့ပြီး နိုင်ငံတဝန်း အကျဉ်းထောင်များအတွင်း နိုင်ငံရေးအကျဉ်းသား ၂၀,၀၀၀ ကျော် ဆက်လက်ဖမ်းဆီးချုပ်နှောင်ခံထားရကြောင်း မြန်မာနိုင်ငံလုံး ဆိုင်ရာ နိုင်ငံရေးအကျဉ်းသားများကွန်ရက် (PPNM) က ထုတ်ဖော်ပြောဆိုသည်။ အဆိုပါ လွတ်ငြိမ်းခွင့်ဖြင့် ပုဒ်မ ၅၀၅(က) တစ်ခုတည်းဖြင့် ပြစ်ဒဏ်ကျခံနေရသူ ၇၂၄ ဦးသာ လွတ်မြောက် ခဲ့ပြီး အခြားပုဒ်မများနှင့်တွဲဖက်ထားသူများကို ပြစ်ဒဏ်လျှော့ပေါ့ခြင်းသာ ပြုလုပ်ခဲ့သည်။ မန္တလေး အိုးဘိုထောင်တွင် ပုဒ်မ ၅၀၅(က) ဖြင့် ချုပ်နှောင်ခံထားရသူ ၁,၀၀၀ ကျော်ရှိသော်လည်း ၂၃၂ ဦးသာ လွတ်မြောက်ခဲ့သဖြင့် ၈၀၀ ကျော် ကျန်ရှိနေဆဲဖြစ်သည်။ အင်းစိန်ထောင်မှလည်း ၁၉၂ ဦးသာ လွတ်လာခဲ့ပြီး ဦးကြည်တိုး၊ ကိုဖိုးသား အပါအဝင် ထင်ရှားသူအချို့ ပါဝင်သည်။

PPNM ဗဟိုဦးဆောင်ကော်မတီဝင် ကိုသိုက်ထွန်းဦးက “လွတ်လာသူအများစုမှာ နိုင်ငံရေးခုတုန်း အဖြစ် အသုံးချရန် ရည်ရွယ်ထားသည့် တန်ဆာခံများသာ ဖြစ်ပြီး ဒေါ်အောင်ဆန်းစုကြည်၊ သမ္မတ ဦးဝင်းမြင့်အပါအဝင် နိုင်ငံရေးအကျဉ်းသား အမှန်တကယ် ၂၀,၀၀၀ ကျော်မှာ ဆက်လက် ချုပ်နှောင်ခံထားရဆဲဖြစ်သည်”ဟု ပြောသည်။ ထို့ကြောင့် အကြမ်းဖက်စစ်တပ်အနေဖြင့် နိုင်ငံရေး အကျဉ်းသားအားလုံးကို အမြန်ဆုံးပြန်လည်လွှတ်ပေးရန် PPNM က တောင်းဆိုထားသည်။

မြိုင်-ပေါက်နယ်မြေတွင် စစ်ကြောင်းထိုးလာသော စစ်တပ်ကို တိုက်ခိုက်၊ စစ်သား ၆ ဦးသေဆုံး၊ ရဲဘော် ၂ ဦးကျဆုံး

 

နိုဝင် ၂၈

The Kaladan Post

မကွေးတိုင်း မြိုင်နှင့် ပေါက်မြို့နယ်အတွင်း အင်အား ၃၀၀ ကျော်ဖြင့် စစ်ကြောင်းထိုးလာသော အကြမ်းဖက်စစ်တပ်ကို အညာမြေတပ်ပေါင်းစုနှင့် ပူးပေါင်းတပ်ဖွဲ့များက နိုဝင်ဘာ ၁၂ ရက်မှ ၂၆ ရက်အထိ ဆက်တိုက်လိုက်လံတိုက်ခိုက်ရာ စစ်သား ၆ ဦးသေဆုံးခဲ့ကြောင်း သိရသည်။ ထိုတိုက်ပွဲများတွင် ဝက်ပုတ်ရွာ၊ ကျွဲတွင်းရွာ၊ ဆိပ်သာရွာအနီးတို့၌ ပွဲချင်းပြီးသေဆုံးမှု ၂ ဦး၊ နောက်ဆက်တွဲသေဆုံးမှု ၄ ဦး အပါအဝင် စစ်သားနှင့် ပျူစောထီး ၁၀ ဦး ပြင်းထန်ဒဏ်ရာရရှိခဲ့သည်။ မိုင်းဆွဲတိုက်ခိုက်မှုတွင် စစ်သားတစ်ဦး၏ ခြေထောက်အပြတ်ကို တွေ့ရှိခဲ့ရသည်။ တော်လှန်ရေး တပ်ဖွဲ့ဘက်မှ ရဲဘော် ၂ ဦဦး ကျဆုံးခဲ့ပြီး ရဲဘော် ၃ ဦး မစိုးရိမ်ရဒဏ်ရာရရှိခဲ့သည်။

အကြမ်းဖက်စစ်ကြောင်းသည် နေအိမ် ၁၅ လုံးထက်မနည်း မီးရှို့ဖျက်ဆီး၊ ပြည်သူ ၂ ဦးကို သတ်ဖြတ်၊ ရွှေငွေ၊ အဖိုးတန်ပစ္စည်းများ လုယက်၊ အိမ်မွေးတိရစ္ဆာန်များကို သတ်စားခဲ့ကြောင်း သိရှိရသည်။ ယနေ့ နိုဝင်ဘာ ၂၇ ရက် ညနေ ၄ နာရီခန့်တွင် အဆိုပါစစ်ကြောင်းသည် မြိုင်မြို့နယ် အနောက်တောင်ပိုင်း သရက်ကန်ပျူရွာသို့ ဆုတ်ခွာဝင်ရောက်သွားခဲ့သည်။ အညာမြေတပ်ပေါင်းစုက “အောက်တိုဘာလ ၂၀ ရက်မှ ယနေ့အထိ ဆက်လက်တော်လှန်နေပြီး ပြည်သူများ၏ ပံ့ပိုးမှုကို တောင်းဆိုကြောင်း” ထုတ်ဖော်ပြောဆိုထားသည်။

ဖြူး-အုတ်တွင်းနယ်စပ် ပဲခူးရိုးမတွင် စစ်တပ်က ကိုယ်ဝန်ဆောင်အမျိုးသမီးများအပါအဝင် ပြည်သူ ၁၈ ဦး မုဒိမ်းကျင့်သတ်ဖြတ်

 

နိုဝင် ၂၈

The Kaladan Post

ပဲခူးတိုင်း ဖြူးနှင့် အုတ်တွင်းမြို့နယ်အစပ် ပဲခူးရိုးမတောင်တန်းရှိ ကျေးရွာများသို့ စစ်ကြောင်း ထိုးဝင်ရောက်လာသော အကြမ်းဖက်စစ်တပ်က ကိုယ်ဝန်ဆောင်အမျိုးသမီး ၂ ဦးအပါအဝင် ပြည်သူ ၁၈ ဦးကို မုဒိမ်းကျင့်ပြီး ရက်စက်စွာသတ်ဖြတ်ခဲ့ကြောင်း ပဲခူးရိုးမ PDF ဗျူဟာ ၂၂ က ထုတ်ဖော်သည်။ ဩဂုတ် ၇ ရက်က ကျီးမနိုးရွာအနီးတွင် ဝါးခုတ်နေသည့် ပြည်သူ ၁၁ ဦးကို ဖမ်းဆီးသတ်ဖြတ်ခဲ့ပြီး ကွင်းချောင်းဆည်အနီးတွင်လည်း ကရင်လူမျိုး သားအမိနှစ်ဦးကို မုဒိမ်းကျင့်သတ်ပစ်ခဲ့သည်။ နိုဝင်ဘာ ၁၅ ရက်က တပ်မ ၇၇ နှင့် အုတ်တွင်းအခြေစိုက် စစ်သားများက ၁၆ မိုင်၊ ၁၇ မိုင်၊ ၁၈ မိုင်၊ ၂၀ မိုင်ကျေးရွာများသို့ ဝင်ရောက်စီးနင်းကာ ဒရုန်းများဖြင့် ဗုံးကြဲတိုက်ခိုက်ခဲ့သဖြင့် ကျွန်းစိုက်ခင်း အတွင်း မိသားစု ၅ ဦး သေဆုံးခဲ့ရသည်။ နေအိမ်အများအပြားကိုလည်း မီးရှို့ဖျက်ဆီးခဲ့သည်။

ဤရက်စက်မှုများကြောင့် ကလေးသူငယ်နှင့် သက်ကြီးရွယ်အိုများအပါအဝင် ပြည်သူ ၁၀၀၀ ကျော် နေရပ်စွန့်ခွာထွက်ပြေးနေရပြီး ၃၇၀၁ ပဲခူးခရိုင်တပ်ရင်းက ဘေးလွတ်ရာသို့ ရွှေ့ပြောင်းကာကွယ်ပေး လျက်ရှိသည်။ ပဲခူးရိုးမ PDF ဗျူဟာ ၂၂ က စစ်ကောင်စီတပ်နှင့် ပတ်သက်ဆက်နွယ်သူများ၊ အတုအယောင်ရွေးကောက်ပွဲကို ပါဝင်လှုံ့ဆော်သူများကို ပြင်းထန်အရေးယူသွားမည်ဟု သတိပေး ထားသည်။

ယင်းမာပင်တွင် ရွှေရေကြည်သပိတ်စစ်ကြောင်း အတုအယောင်ရွေးကောက်ပွဲကို ဆန့်ကျယ်ငြင်းပယ်

 

နိုဝင် ၂၈

The Kaladan Post

ယင်းမာပင်မြို့နယ်အတွင်း ရွှေရေကြည်သပိတ်စစ်ကြောင်းက ယနေ့ နိုဝင်ဘာ ၂၇ ရက် ညနေပိုင်းတွင် အကြမ်းဖက်စစ်တပ်ကျင်းပရန် စီစဉ်ထားသည့် အတုအယောင်ရွေးကောက်ပွဲကို ပြင်းပြင်းထန်ထန် ဆန့်ကျင်ကန့့်ကွက်သည့် သပိတ်မှောက်ဆန္ဒပြပွဲ ပြုလုပ်ခဲ့ကြောင်း သိရသည်။ အောင်လံလွှင့်ထူကာ စစ်အာဏာရှင်စနစ်ကို ဆန့်ကျင်သည့် ကြွေးကြော်သံများဖြင့် လမ်းမများပေါ်ထွက် ချီတက်ဆန္ဒပြခဲ့ ခြင်းဖြစ်သည်။ ရွှေရေကြည်သပိတ်စစ်ကြောင်းက “စစ်အုပ်စိုးမှုအောက်တွင် ရွေးကောက်ပွဲဟူ၍ မရှိနိုင်”၊ “အတုအယောင်ရွေးကောက်ပွဲ လုံးဝမလိုလား” စသည့် ဆိုင်းဘုတ်များကိုင်ဆောင်ကာ ပြည်သူများအား မဲမပေးကြရန်လည်း လှုံ့ဆော်ခဲ့သည်။ ယခုဆန္ဒပြပွဲသည် စစ်ကောင်စီ၏ ရွေးကောက်ပွဲအစီအစဉ်ကို ငြင်းပယ်သည့် ပြည်သူ့ဆန္ဒကို ထပ်မံပြသခြင်းဖြစ်ကြောင်း ရွှေရေကြည်သပိတ်စစ်ကြောင်းက ထုတ်ဖော် ပြောဆိုထားသည်။

 

မုံရွာ-ချောင်းဦးလမ်းပိုင်း ဆက်ကြေးဂိတ်တိုက်၊ စစ်သား ၁ သေ ၂ ဒဏ်ရာ၊ မြိုင်တွင် စစ်သား ၁ ဦး မိုင်းနင်းမိ ခြေပြတ်

 

နိုဝင် ၂၈

The Kaladan Post

စစ်ကိုင်းတိုင်း မုံရွာမြို့နယ်၊ မုံရွာ-ချောင်းဦးလမ်းပိုင်း မြန်မာ့မဏ္ဍိုင်ဆီဆိုင်အနီးတွင် နိုဝင်ဘာ ၂၆ ရက် နံနက် ၈:၃၀ ခန့်က ဆက်ကြေးကောက်နေသော အကြမ်းဖက်စစ်သားများကို Area71 LPDF Monywa၊ Chindwin Dynamite Salingyi နှင့် Golden Peacock Attack Force တို့ ပူးပေါင်းဝင်ရောက်ပစ်ခတ်တိုက်ခိုက်ရာ စစ်သား ၁ ဦး ပွဲချင်းပြီးသေဆုံးပြီး ၂ ဦး ပြင်းထန်ဒဏ်ရာရရှိခဲ့ကြောင်း သိရသည်။ တော်လှန်ရေးရဲဘော်များ အထိ အခိုက်မရှိ ပြန်လည်ဆုတ်ခွာနိုင်ခဲ့ပြီး အဆိုပါနေရာတွင် စစ်သား အင်အား ၃၀ ခန့်အထိုင်ချ ဂိတ်ထိုင်ထား ကြောင်း သိရှိရသည်။

အလားတူ မကွေးတိုင်း မြိုင်မြို့နယ် ဝက်ပုတ်-ဆိပ်သာကျေးရွာအကြားတွင် နိုဝင်ဘာ ၂၆ ရက်က အညာမြေ တပ်ပေါင်းစု-ဇာမဏီပြောက်ကျားတပ်ဖွဲ့ ထောင်ထားသော နင်းမိုင်းကို စစ်ကြောင်းထိုးလာသည့် စစ်သားတစ်ဦး နင်းမိရာ ခြေထောက်တစ်ဖက်ပြတ်ထွက်သွားခဲ့သည်။

နောက်ဆက်တွဲ ရှင်းလင်းရေးလုပ်စဉ် ကင်းပုန်းဝတ်နေသော စစ်သားများနှင့် မီတာ ၂၀ အကွာတွင် ထိပ်တိုက် တွေ့၍ ပစ်ခတ်မှုဖြစ်ပွားခဲ့ပြီး နောနေ့နံနက်တွင် နေရာသို့ပြန်စစ်ဆေးရာ ခြေတုအစားထိုးပစ္စည်းများနှင့် ဆေးကုသထားသည့်အရာများ တွေ့ရှိခဲ့ကြောင်း သိရသည်။

ဆိုးလ်မြို့ R2P ညီလာခံတွင် NUG က မြန်မာ့လူ့အခွင့်အရေး အခြေအနေ တင်ပြဆွေးနွေး

 

နိုဝင် ၂၈

The Kaladan Post

တောင်ကိုရီးယား ဆိုးလ်မြို့တွင် နိုဝင်ဘာ ၂၅-၂၆ ရက်က ကျင်းပသည့် “Responsibility to Protect (R2P) နိုင်ငံတကာ ညီလာခံ အနှစ် ၂၀ ပြည့်” အခမ်းအနားနှင့် “မြောက်ကိုရီးယား လူ့အခွင့်အရေးနှင့် R2P” ကွန်ဖရန့်တို့တွင် အမျိုးသားညီညွတ်ရေးအစိုးရ (NUG) ကိုရီးယားဆိုင်ရာ ကိုယ်စားလှယ်ရုံးက မြန်မာနိုင်ငံ၏ လူ့အခွင့်အရေး အခြေအနေများကို တင်ပြဆွေးနွေးခဲ့သည်။

R2P အာရှကေ့စ်လေ့လာချက်ကဏ္ဍတွင် ကုလသမဂ္ဂ မြန်မာဆိုင်ရာ လူ့အခွင့်အရေးအထူးကိုယ်စားလှယ် ဟောင်း ပါမောက္ခ ရန်ဟီးလီက “Myanmar and the Responsibility to Protect” စာတမ်းနှင့် NUG ကိုယ်စားလှယ်ရုံးတာဝန်ခံ ဦးဝင်းပေါ်မောင်က “IS IT A CATASTROPHE?: The Situation of Human Rights in Myanmar Since the 2021 Military Coup” စာတမ်းတို့ကို တင်ပြခဲ့သည်။ ရိုဟင်ဂျာသက်သေခံချက် များလည်း ထည့်သွင်းဆွေးနွေးခဲ့ပြီး မေးခွန်းများကို ပြန်လည်ဖြေကြားခဲ့ကြောင်း သိရသည်။

ညီလာခံကို PSCORE နှင့် နိုင်ငံတကာ လူ့အခွင့်အရေးအဖွဲ့အစည်းများ ပူးပေါင်းကျထားပြီး ကုလသမဂ္ဂ အထွေထွေအတွင်းရေးမှူးချုပ်ဟောင်း ဘန်ကီမွန်းက အဖွင့်အမှာစကား ပြောကြားခဲ့သည်။ မြန်မာ့အရေးကို R2P မူဘောင်ဖြင့် နိုင်ငံတကာအသိုင်းအဝိုင်းက တုံ့ပြန်ဆောင်ရွက်ရန် လိုအပ်ကြောင်း ဆွေးနွေးပွဲများတွင် ထည့်သွင်းအလေးပေးခဲ့ကြောင်း သိရသည်။

ပေါင်းတလည်တွင် ကြံ့ဖွတ်ဆိုင်းဘုတ် လေတိုက်လဲသဖြင့် ဟားရယ်သူကို ရွေးကောက်ပွဲနှောင့်ယှက်မှုနဲ့ ဖမ်းဆီး

 

နိုဝင် ၂၈

The Kaladan Post

ပဲခူးတိုင်း ပေါင်းတလည်မြို့ လမ်းဆုံတွင် နိုဝင်ဘာ ၂၇ ရက် နံနက် ၁၀ နာရီခန့်က ကြံ့ဖွတ်ပါတီ မဲဆွယ်ဆိုင်းဘုတ်ကြီး လေပြင်းတိုက်၍ လဲကျသွားခဲ့သည်။ ထိုအခါ ပျူစောထီးခေါင်းဆောင် ဟောင်း ဝင်းဇော်က လာရောက်စစ်ဆေးပြီး “ဘယ်သူတွန်းလဲသလဲ” ဟု အနီးဝန်းကျင်ပြည်သူများကို လိုက်မေးခဲ့သည်။

လေတိုက်လို့သာ လဲကြောင်း ရှင်းပြသူများရှိနေသော်လည်း လမ်းဖြတ်သွားသည့် ဦးအုန်းမြင့်က “မလဲချင်ရင် လက်နဲ့ကိုင်ထားပေါ့ကွာ” ဟု စနောက်ကာ ဟားတိုက်ရယ်မောမိသွားသည်။ ထိုအသံကြားသဖြင့် ဝင်းဇော်မှာ ချက်ချင်းရဲကို ဖုန်းဆက်ခေါ်ကာ ဦးအုန်းမြင့်ကို “ရွေးကောက်ပွဲနှောင့်ယှက်မှု” စွဲချက်နှင့် ဖမ်းဆီးခိုင်းခဲ့ပြီး ရဲတပ်ဖွဲ့က ချက်ချင်းလာရောက်ဖမ်းဆီးခေါ်ဆောင်သွားခဲ့ကြောင်း သိရသည်။

ညနေပိုင်းတွင် ဝင်းဇော်ကိုကိုယ်တိုင် ဆိုင်းဘုတ်ကို ပြန်စိုက်ထူပြီး ပျူစောထီးနှင့် ရဲအချို့ကို အလှည့်ကျ အစောင့်ချထားခဲ့သည်။ ဝင်းဇော်မှာ ယခင်က ရဲတပ်ဖွဲ့မှ အလုပ်ထုတ်ခံရဖူးသူဖြစ်ပြီး ယခုအခါ အုပ်ချုပ်ရေးမှူး အဖြစ် ဆက်လက်လုပ်ကိုင်နေသူလည်းဖြစ်ကြောင်း ဒေသခံများက ဆိုသည်။

စစ်တပ်က ကျားဖြန့်ငွေလိမ်လုပ်ငန်းများကို စနစ်တကျကာကွယ်ပြီး စစ်စရိတ်အဖြစ်အသုံးပြုဟု NMSP-AD ကြေညာ

 

နိုဝင် ၂၈

The Kaladan Post

မွန်ပြည်သစ်ပါတီ-စစ်အာဏာရှင်တိုက်ဖျက်ရေး (NMSP-AD) က နိုဝင်ဘာ ၂၅ ရက်တွင် ထုတ်ပြန်ကြေညာချက် အရ အကြမ်းဖက်စစ်ကောင်စီသည် နိုင်ငံဖြတ်ကျော် အွန်လိုင်းငွေလိမ်လည်မှု (ကျားဖြန့်) နှင့် လူကုန်ကူးမှု လုပ်ငန်းများကို စနစ်တကျ အကာအကွယ်ပေးထားပြီး အဆိုပါလုပ်ငန်းများမှ ရရှိသည့် ငွေကြေးများကို လက်နက်ဝယ်ယူကာ ပြည်သူများအပေါ် အကြမ်းဖက်ရန် အသုံးပြုနေကြောင်း ဖော်ထုတ်သည်။ လက်ရှိတွင် နိုင်ငံပေါင်း ၇၇ နိုင်ငံမှ ပြည်သူများ လူကုန်ကူးခံနေရပြီး ကမ္ဘာ့နှစ်စဉ်ဆုံးရှုံးငွေ အမေရိကန်ဒေါ်လာ ၁၅ ဘီလီယံကျော်အထိ ရှိနေကြောင်း၊ ဤငွေများကို စစ်ကောင်စီက စစ်ယန္တရားတည်ဆောက်ရာတွင် အသုံးပြုနေသဖြင့် ဒေသတွင်းတည်ငြိမ်ရေးကိုပါ ခြိမ်းခြောက်နေကြောင်း NMSP-AD က ထောက်ပြသည်။

ထို့ကြောင့် NMSP-AD က နိုင်ငံဖြတ်ကျော် ဆိုက်ဘာရာဇဝတ်မှု နှိမ်နင်းရေး အလုပ်အဖွဲ့ (Working Team) ကို ဖွဲ့စည်းလိုက်ပြီး လူကုန်ကူးခံရသူများကို ကယ်ဆယ်ကူညီ၊ နိုင်ငံတကာအဖွဲ့အစည်းများနှင့် ပူးပေါင်း ဆောင်ရွက်သွားမည်ဖြစ်ကြောင်း ကြေညာထားသည်။ အမေရိကန် FBI ၏ Scam Center Strike Force၊ ထိုင်း၊ တရုတ်၊ ယူကေ၊ ကိုရီးယား၊ ဂျပန်စသည့် နိုင်ငံများ၏ ဆိုက်ဘာရာဇဝတ်နှိမ်နင်းရေးလုပ်ငန်းများကို ကြိုဆိုပြီး အပြည့်အဝ ပူးပေါင်းပါဝင်ရန် အသင့်ရှိကြောင်းလည်း အသိပေးထားသည်။ မွန်ပြည်နယ်နှင့် မြန်မာတစ်ဝန်းကို ကျားဖြန့်လုပ်ငန်းကင်းစင်သည့်ဒေသဖြစ်အောင် တည်ဆောက်သွားမည်ဖြစ်ပြီး ဤရာဇဝတ်မှု၏ ဗဟိုချက် ဖြစ်သော စစ်အာဏာရှင်စနစ်ကို တရားစီရင်နိုင်ရေး မဟာမိတ်များနှင့် လက်တွဲဆောင်ရွက်သွားမည်ဟု NMSP-AD က ကတိပြုထားသည်။

သရုပ်ဆောင်နေအောင်၊ ကြံ့ဖွတ်မဲဆွယ်ရင်း “တိုင်းပြည်မတည်ငြိမ်အောင်လုပ်သူအားလုံး သတ်ရမည်” ဟု ပြော

 

နိုဝင် ၂၈

The Kaladan Post

ကြံ့ဖွတ်ပါတီ မဲဆွယ်စည်းရုံးရေးတွင် တက်ကြွစွာပါဝင်နေသည့် သရုပ်ဆောင် နေအောင်က တိုင်းပြည်ကို မတည်ငြိမ်အောင်လုပ်သူမှန်သမျှ “အကုန်သတ်ရမည်” ဟု ပြည်တွင်းတယ်လီဂရမ်ချန်နယ်တစ်ခုတွင် ထုတ်ဖော်ပြောဆိုခဲ့သည်။ စစ်သားသားသမီးဖြစ်သဖြင့် ယူနီဖောင်းကိုချစ်ကြောင်း၊ ကြံ့ဖွတ်ပါတီသည် တပ်မတော်မှလာသည့်ပါတီဖြစ်သဖြင့် ချစ်ကြောင်း၊ ကြံ့ဖွတ်အင်္ကျီ၊ ဦးထုပ်ကို ဆန္ဒအရ ဝတ်ဆင်ခြင်းဖြစ် ကြောင်း ဆိုသည်။ “ဆဲတဲ့ကောင်တွေ သေပေါ့၊ သေကြပေါ့” ဟုလည်း ပြောဆိုခဲ့ပြီး ကြံ့ဖွတ်အာဏာရလာပါက တိုင်းပြည်တည်ငြိမ်အေးချမ်းမည်ဟု အခိုင်အမာဆိုသည်။

နေအောင်သည် ရန်ကုန်တိုင်းအတွင်း ကြံ့ဖွတ်မဲဆွယ်ပွဲတိုင်းနီးပါးတွင် ပါတီဝတ်စုံအပြည့်ဖြင့် တက်ရောက် မဲဆွယ်နေသူဖြစ်ပြီး ဆဲဆိုလာပါက ဂရုမစိုက်ကြောင်း၊ လူလူချင်းတွေ့ရန်လည်း စိန်ခေါ်ထားသည်။ ကြံ့ဖွတ် ပါတီအရင်းအမြစ်ကမူ သရုပ်ဆောင်များကို ရက်ပေါင်း ၆၀ မဲဆွယ်ကာလတစ်ခုလုံး ငှားရမ်းထားပြီး ငွေကြေး တိုက်ရိုက်ပေးချေကြောင်း၊ တိုင်းနှင့်မြို့နယ်အလိုက် ဘတ်ဂျက်ချထားကြောင်း အတည်ပြုပြောဆိုထားသည်။

ချင်းညီနောင်တပ်ဖွဲ့က တီးတိန်မြို့အဝင် စကမဂိတ်  သိမ်းပိုက်

 

နိုဝင် ၂၈

The Kaladan Post

ချင်းပြည်နယ် တီးတိန်မြို့အဝင် “ကြိုဆိုပါ၏” ဆိုင်းဘုတ်အနီးတွင် တပ်စွဲထားသော ခလရ ၂၆၉ လက်အောက် ခံ စကမ တပ်ဖွဲ့ဝင်များကို ချင်းညီနောင်တပ်ဖွဲ့က နိုဝင်ဘာ ၂၇ ရက် နံနက် ၈ နာရီမှစ၍ ထိုးစစ်ဆင် တိုက်ခိုက်ခဲ့သည်။ တိုက်ပွဲအတွင်း ချင်းညီနောင်တပ်ဖွဲ့က စကမ တပ်သားများကို တပ်စွဲရာနေရာမှ အပြီးသတ် တိုက်ထုတ်နိုင်ခဲ့ပြီး လက်နက်ခဲယမ်းအချို့ သိမ်းဆည်းရမိကာ စစ်သုံ့ပန်းအချို့ ဖမ်းဆီးရရှိခဲ့သည်။ ချင်းညီနောင်တပ်ဖွဲ့ဝင်များ အထိအခိုက်မရှိဘဲ မြို့အဝင်ဂိတ်ကို ပြန်လည်ထိန်းချုပ်နိုင်ခဲ့ကြောင်း သိရသည်။

စကမ တပ်ဖွဲ့ဝင်များသည် တီးတိန်မြို့၏ လူအဝင်အထွက်ကို ထိန်းချုပ်ရန် ကြိုးပမ်းနေခြင်းဖြစ်သော်လည်း ယခုတိုက်ပွဲအပြီး ဂိတ်တစ်ခုလုံး ချင်းညီနောင်တပ်ဖွဲ့ လက်ထဲ ပြန်လည်ရောက်ရှိသွားခဲ့သည်။ တီးတိန်မြို့ အဝင်ဂိတ်ကို ပြန်လည်သိမ်းပိုက်နိုင်ခဲ့ခြင်းဖြင့် မြို့အဝင်အထွက်လမ်းကြောင်း လုံခြုံရေးကို ချင်းညီနောင် တပ်ဖွဲ့က ထပ်မံခိုင်မာစွာ ထိန်းချုပ်ထားနိုင်ခဲ့သည်။