မင်းအောင်လှိုင်၊ TPS ရုပ်သိမ်းခံရသည့် မြန်မာ ၄၀၀၀ အပါအဝင် ပြည်ပရောက်မြန်မာများကို ပြန်လာရန်နှင့် မဲပေးရန် ကြိုဆိုဟု ပြော

 

နိုဝင် ၂၉

The Kaladan Post

အမေရိကန်ပြည်ထောင်စုက ယာယီခိုလှုံခွင့် (TPS) ရုပ်သိမ်းခံရမည့် မြန်မာနိုင်ငံသား ၄၀၀၀ ခန့်နှင့် ကမ္ဘာတစ်ဝန်းရှိ ပြည်ပရောက် မြန်မာနိုင်ငံသားများကို မိခင်နိုင်ငံပြန်လာရန်နှင့် ရွေးကောက်ပွဲတွင် ဆန္ဒမဲ ပေးရန် ကြိုဆိုကြောင်း ဗိုလ်ချုပ်မှူးကြီး မင်းအောင်လှိုင်က နိုဝင်ဘာ ၂၈ ရက်က ဘယ်လာရုစ်သမ္မတ အလက်ဇန္ဒား လူကာရှန်ကိုနှင့် တွေ့ဆုံစဉ် ပြောဆိုခဲ့သည်။ အမေရိကန် အမိမြေလုံခြုံရေးဝန်ကြီးဌာနက နိုဝင်ဘာ ၂၅ ရက်တွင် မြန်မာနိုင်ငံသား ၄၀၀၀ ခန့်၏ TPS ကို ရုပ်သိမ်းပြီး ရက်ပေါင်း ၆၀ အတွင်း ပြန်ပို့မည်ဟု ကြေညာထားသည်။

ဗိုလ်ချုပ်မှူးကြီး မင်းအောင်လှိုင်က ထိုသူများအပါအဝင် နိုင်ငံရေးအယူအဆ ကွဲလွဲမှုကြောင့် ဖြစ်စေ၊ အခြားအကြောင်းကြောင့်ဖြစ်စေ ပြည်ပရောက်နေသူများ မြန်မာနိုင်ငံသို့ ပြန်လည် ရောက်ရှိပါက လက်ခံမည်ဖြစ်ကာ မဲစာရင်းတွင် ပါဝင်လိုပါက မဲပေးခွင့်ရရှိအောင် ဆောင်ရွက် ပေးမည်ဟု ဆိုသည်။ သို့ရာတွင် ပြည်တွင်းတွင် ရွေးကောက်ပွဲ နှောင့်ယှက်သည်ဟုဆိုကာ စစ်ကောင်စီသည် မဲမပေးရေး လှုံ့ဆော်သူများ၊ စစ်တပ်ဝါဒဖြန့်ဇာတ်ကားများကို ဝေဖန်သူများနှင့် အနုပညာရှင်များကို ရွေးကောက်ပွဲ နှောင့်ယှက်မှု ကာကွယ်ရေးဥပဒေဖြင့် ဆက်တိုက် ဖမ်းဆီး အရေးယူနေသည်ကို တွေ့ရှိရသည်။

 

ခင်ဦးတိုက်ပွဲ၌ စစ်သား ၈၀ ဝန်းကျင်သေဆုံး၊ အလောင်းများကို စစ်တပ်က စွန့်ပစ်ထားသဖြင့် တော်လှန်ရေးတပ်များ မီးသင်္ဂြိုဟ်

 

နိုဝင် ၂၉

The Kaladan Post

စစ်ကိုင်းတိုင်း၊ ခင်ဦးမြို့နယ်၊ မုံလှကျေးရွာအနီးတွင် နိုဝင်ဘာ ၂၃ ရက်က ဖြစ်ပွားခဲ့သော တိုက်ပွဲ၌ စစ်တပ်ဘက်မှ စစ်သား ၈၀ ဝန်းကျင် သေဆုံးခဲ့ပြီး အလောင်းများကို စစ်တပ်က လာရောက်မကောက်ဘဲ စွန့်ပစ်ထားခဲ့သဖြင့် တော်လှန်ရေးအင်အားစုများက နိုဝင်ဘာ ၂၈ ရက်တွင် နယ်မြေရှင်းလင်းရေးလုပ်ငန်း ဆောင်ရွက်ရင်း မီးသင်္ဂြိုဟ်ပေးခဲ့ကြောင်း ခင်ဦးမြို့နယ် ပြည်သူ့ကာကွယ်ရေးတပ်ဖွဲ့မှ သိရသည်။ အဆိုပါတိုက်ပွဲတွင် စစ်တပ်စစ်ကြောင်းတစ်ခုလုံး ပျက်စီးခဲ့ပြီး လက်နက်ချေါင်း ၂၉ လက်အပါအဝင် ခဲယမ်းများစွာ သိမ်းဆည်းရမိခဲ့သည်။

သေဆုံးအလောင်းများမှာ လယ်ကွင်းထဲ၊ ချောင်းအတွင်း နေရာအနှံ့ ပုတ်ပွနံစော်နေသဖြင့် တော်လှန်ရေးရဲဘော်များက ဒီဇယ်၊ ဓာတ်ဆီ၊ တာယာ၊ မီးစာတုတ်များဖြင့် နေရာတွင်ပင် မီးရှို့ သင်္ဂြိုဟ်ပေးခဲ့ရခြင်းဖြစ်ကြောင်း တော်လှန်ရေးသတင်းရင်းမြစ်က ဆိုသည်။ “အလောင်းတွေ ပုတ်ပွနေတာ နံစော်လွန်းတယ်။ သူတို့စခန်းက လာမသယ်တော့ဘူး။ လူ့ဂုဏ်သိက္ခာအရ ကျွန်တော်တို့ သင်္ဂြိုဟ်ပေးတာပါ” ဟု ၎င်းက ပြောဆိုခဲ့သည်။

ရှမ်းပြည်တောင်ပိုင်း-အရှေ့ပိုင်း၌ ကျောင်းသားကျောင်းသူ ၂၅၀ ကျော်ကို ထောက်ခံစာမထုတ်ပေးဘဲ ဖိအားပေး ကြိုတင်မဲပေးခိုင်း

 

နိုဝင် ၂၉

The Kaladan Post

ရှမ်းပြည်တောင်ပိုင်း ပင်းတယ်၊ နမ့်စန်၊ ကွန်ဟိန်းနှင့် ရှမ်းအရှေ့ပိုင်း မိုင်းဆတ်မြို့နယ်များတွင် အုပ်ချုပ်ရေးမှူးများနှင့် ဆယ်အိမ်မှူး၊ ရာအိမ်မှူးများက တက္ကသိုလ်ဝင်တန်း ကျောင်းသား၊ ကျောင်းသူများကို ကျောင်းအပ်ရန်၊ အဆောင်ငှားရန်၊ အကျင့်စာရိတ္တကောင်းမွန်ကြောင်း ထောက်ခံစာထုတ်ပေးရန် ငြင်းဆိုကာ ကြိုတင်မဲပေးရန် အတင်းအကျပ် ဖိအားပေးခဲ့ကြောင်း ရှမ်းလူ့အခွင့်အရေးမဏ္ဍိုင်က ထုတ်ဖော်သည်။ နိုဝင်ဘာ ၁၇ ရက်မှ ၂၀ ရက်အတွင်း ပင်းတယ်တွင် ၉၄ ဦး၊ နမ့်စန်တွင် ၇၉ ဦး၊ ကွန်ဟိန်းတွင် ၃၆ ဦး၊ မိုင်းဆတ်တွင် ၄၇ ဦး စုစုပေါင်း ကျောင်းသား၊ ကျောင်းသူ ၂၅၆ ဦးကို ကြိုတင်မဲပေးခိုင်းခဲ့ရပြီး အများစုမှာ ပထမနှစ်တက်ရောက်မည့် မောင်မယ်သစ်လွင်များဖြစ်ကြောင်း သိရသည်။

အုပ်ချုပ်ရေးမှူးများက ကြိုတင်မဲပေးကြောင်း အထောက်အထားမပြပါက ကျောင်းအပ်ရန်၊ ရဲထောက်ခံစာ၊ အကျင့်စာရိတ္တထောက်ခံစာ၊ အဆောင်ငှားရန် ထောက်ခံစာများ ထုတ်မပေးဟု ခြိမ်းခြောက်ခဲ့သဖြင့် ဆန္ဒမပါဘဲ မဲပေးခဲ့ရခြင်းဖြစ်ကြောင်း ဖိအားခံရသည့် ကျောင်းသူတစ်ဦးက ဆိုသည်။ ရှမ်းလူ့အခွင့်အရေးမဏ္ဍိုင်က စစ်ကောင်စီ၏ ဤသို့ အတင်းအကျပ်မဲပေးခိုင်းမှုများသည် လွတ်လပ်တရားမျှတမှု လုံးဝမရှိသည့် အတုအယောင်ရွေးကောက်ပွဲဖြစ်ကြောင်း ထောက်ပြ ထားသည်။

ဗိုလ်ချုပ်ဟောင်း ကံမြင့်သန်း-ခင်မောင်သန်း လူရင်း စိန်ဝင်း စစ်တပ်အတွက် တရုတ် NORINCO လက်နက်ငွေ အဝယ်တော်ဖြစ်လာ

 

နိုဝင် ၂၉

The Kaladan Post

ပဲပို့ကုန်လုပ်ငန်းရှင် စိန်ဝင်း(ခ) စိန်ဝင်းကလေးသည် ကာကွယ်ရေးပစ္စည်းထုတ်လုပ်ရေး အရာရှိ ချုပ်ဟောင်း ဒုဗိုလ်မှူးကြီး ကံမြင့်သန်း(ယခု မအူပင်ကြံ့ဖွတ်လောင်း) နှင့် စစ်လက်နက်ဝယ်ယူရေး ညွှန်ကြားမှုဦးစီးဌာန ဗိုလ်ချုပ် ခင်မောင်သန်း တို့၏ လူယုံကိုယ်ယူ ဖြစ်လာပြီး မြန်မာ စစ်တပ်အတွက် တရုတ် NORINCO ကုမ္ပဏီထံ စစ်လက်နက်ပစ္စည်းဝယ်ယူရာတွင် ငွေကြေးပေး ချေမှုကို အဓိက ကြားခံဆောင်ရွက်ပေးနေကြောင်း စစ်ဘက်သတင်းရင်းမြစ်က ထုတ်ဖော်သည်။

အာဏာသိမ်းပြီးနောက် ပဲပို့ကုန်မှ ရရှိသော နိုင်ငံခြားငွေကို စစ်တပ်အတွက် လွှဲပြောင်းပေးရင်း ဗိုလ်ချုပ်များ၏ ယုံကြည်မှုရရှိခဲ့သည့် စိန်ဝင်းသည် ယခုအခါ NORINCO လက်နက်ဝယ်ယူရေးတွင် ငွေလဲနှုန်းအဟပေါ်မူတည်၍ ဒေါ်လာသန်းချီ အမြတ်အစွန်းရနေကြောင်း သိရသည်။

၎င်းသည် နေပြည်တော်တွင် ပိတောကစားသောက်ဆိုင်လည်း ဖွင့်ထားပြီး နီပေါနိုင်ငံသား တစ်ဦးနှင့် တွဲဖက်ကာ စစ်တပ်အတွက် တရုတ်လက်နက်တင်သွင်းခွင့်နှင့် ငွေပေးချေရေး အဓိက တာဝန်ယူလျက်ရှိကြောင်း စစ်ဘက်သတင်းရင်းမြစ်က ဆိုသည်။

မုံရွာအဝင် ရေဦးဆန်ဆိုင်ဂိတ် တိုက်ခိုက်ခံရ၊ စစ်သား ၂ ဦးသေဆုံး

 

နိုဝင် ၂၉

The Kaladan Post

စစ်ကိုင်းတိုင်း၊ မုံရွာမြို့အဝင် ရေဦးဆန်ဆိုင်ဂိတ်တွင် အထိုင်ချတပ်စွဲထားသော စစ်သားများကို တော်လှန်ရေးတပ်ဖွဲ့များက နိုဝင်ဘာ ၂၇ ရက် ညနေ ၅ နာရီ ၄၅ မိနစ်ခန့်က ဝင်ရောက်တိုက်ခိုက် ခဲ့ကြောင်း ဒေသတွင်း သတင်းရင်းမြစ်က ထုတ်ဖော်သည်။ တိုက်ပွဲသည် မိနစ် ၃၀ ခန့်ကြာမြင့်ခဲ့ပြီး စစ်တပ်ဘက်မှ စစ်သား ၂ ဦးသေဆုံးကာ အများအပြား ဒဏ်ရာရရှိခဲ့သည်။ ဂိတ်တွင် စစ်သား ၁၀ ဦးကျော် ရှိနေစဉ် တော်လှန်ရေးရဲဘော်များက ဝင်ရောက်ပစ်ခတ်ခဲ့ရာ စစ်တပ်ဘက်က စက်သေနတ်များဖြင့် ရမ်းပစ်ခဲ့သော်လည်း တော်လှန်ရေးတပ်ဖွဲ့ဝင်များ အထိအခိုက်မရှိဘဲ ပြန်လည်ဆုတ်ခွာနိုင်ခဲ့ကြောင်း သိရသည်။

“စစ်ခွေး ၂ ကောင်လောက် သေဆုံးနိုင်တယ်။ ဒဏ်ရာရတာတွေလည်း ရှိတယ်။ ကျွန်တော်တို့ ရဲဘော်တွေ အထိအခိုက်မရှိဘဲ ဆုတ်ခွာနိုင်ခဲ့ပါတယ်” ဟု ဒေသတွင်း သတင်းရင်းမြစ်က ဆိုသည်။

အဆိုပါ တိုက်ခိုက်မှုကို မည်သည့်တော်လှန်ရေးတပ်ဖွဲ့က ဆောင်ရွက်ခဲ့သည်ကို အတည်မပြုနိုင် သေးကြောင်း ၎င်းက ဆက်လက်ပြောဆိုသည်။

 

မင်းလှနှင့် မုံရွာ-မန္တလေးလမ်း၌ စစ်ကြောင်းများ တိုက်ခိုက်ခံရ၊ စစ်တပ်ဘက် ထိခိုက်သေဆုံးမှုရှိ

 

နိုဝင် ၂၉

The Kaladan Post

မကွေးတိုင်း၊ အထက်မင်းလှမြို့နယ် အရှေ့ဘက်သို့ နိုဝင်ဘာ ၂၆ ရက် နံနက်က စစ်ကြောင်းထိုးလာသော စစ်တပ်ကို မင်းတဲကြီးကျေးရွာအနီး သရက်-မင်းလှလမ်းပိုင်းတွင် ဗမာပြည်ကာကွယ်ရေးတပ် (USBA) က ထိတွေ့တိုက်ခိုက်ရာ စစ်တပ်ဘက်မှ ထိခိုက်ဒဏ်ရာရရှိခဲ့ ကြောင်း သိရသည်။ တိုက်ပွဲသည် မိနစ် ၃၀ ခန့်ကြာမြင့်ခဲ့ပြီး စစ်တပ်ဘက် ထိခိုက်သေဆုံး အရေအတွက်ကို အတည်မပြုနိုင်သေးဘဲ တော်လှန်ရေးတပ်ဖွဲ့ဝင်များ အထိအခိုက်မရှိ ဆုတ်ခွာနိုင်ခဲ့သည်။

အလားတူ စစ်ကိုင်းတိုင်း၊ ချောင်းဦးမြို့နယ် မုံရွာ-မန္တလေးအမြန်လမ်း နတ်ရေကန်ဂိတ်မှ ထွက်လာသော စစ်ကြောင်း (အင်အား ၃၀ ကျော်) ကို ရေပိုးစားဘုန်းတော်ကြီးကျောင်းအနီးတွင် Pentagram၊ ငါးထောင့်ကြယ် LPDF နှင့် နွေဦးလူငယ် LPDF ပူးပေါင်းအဖွဲ့က မိုင်းဆွဲတိုက်ခိုက် ခဲ့ရာ စစ်တပ်ဘက်မှ ထိခိုက်သေဆုံးမှုရှိခဲ့ကြောင်း သိရသည်။ မိုင်းဆွဲတိုက်ခိုက်ရာတွင် နေရာတွင် သွေးကွက်များနှင့် ယူနီဖောင်းအစုတ်များ တွေ့ရှိခဲ့သော်လည်း အတိအကျ သေဆုံးအရေအတွက် ကို ဆက်လက်စုံစမ်းနေဆဲဖြစ်ပြီး တော်လှန်ရေးရဲဘော်များ အထိအခိုက်မရှိ ဆုတ်ခွာနိုင်ခဲ့ကြောင်း တာဝန်ရှိသူများက အသီးသီးထုတ်ဖော်သည်။

ယင်းမာပင်တွင် ရွှေရေကြည်သပိတ်စစ်ကြောင်း အတုအယောင်ရွေးကောက်ပွဲ ဆန္ဒပြ

 

နိုဝင် ၂၉

The Kaladan Post

ယင်းမာပင်မြို့နယ်အတွင်း ရွှေရေကြည်သပိတ်စစ်ကြောင်းက အောင်လံလွှင့်ကာ နိုဝင်ဘာ ၂၈ ရက် ညနေပိုင်းတွင် စစ်တပ်ကျင်းပမည့် အတုအယောင်ရွေးကောက်ပွဲကို ဆန့်ကျင်သပိတ်မှောက် ခဲ့ကြောင်း သိရသည်။ ရွှေရေကြည်သပိတ်စစ်ကြောင်းဝင်းများက လမ်းများပေါ်ထွက်ကာ ဆိုင်ကယ်များဖြင့် ချီတက်ပြီး အာဏာရှင်စနစ်ပြုတ်ကျရေး၊ အတုအယောင်ရွေးကောက်ပွဲ ငြင်းပယ်ရေး ဆောင်ပုဒ်များ အော်ဟစ်ခဲ့ကြသည်။

သပိတ်စစ်ကြောင်းကို ဒေသခံပြည်သူများက လမ်းဘေးမှ လက်ခုပ်လက်ဝါးတီး အားပေးခဲ့ကြပြီး စစ်အာဏာရှင်နှင့် ၎င်း၏ အတုအယောင်ရွေးကောက်ပွဲကို ငြင်းပယ်ကြောင်း ထပ်လောင်းပြသ ခဲ့ကြကြောင်း သိရသည်။ ယင်းဆန္ဒပြပွဲသည် စစ်တပ်ထိန်းချုပ်နယ်မြေအတွင်း ရဲရဲဝံ့ဝံ့ ပေါ်ထွက် လာသည့် နောက်ဆုံး သပိတ်လှုပ်ရှားမှုတစ်ခု ဖြစ်လာခဲ့သည်။

 

တန့်ဆည် မူးတိမ်ပျူစောထီးရွာ တိုက်ခိုက်သိမ်းပိုက်၊ လက်နက် ၅ လက်အပါအဝင် စစ်ပစ္စည်းများ သိမ်းဆည်းရမိ

 

နိုဝင် ၂၉

The Kaladan Post

စစ်ကိုင်းတိုင်း၊ တန့်ဆည်မြို့နယ် မူးတိမ်ပျူစောထီးရွာကို နိုဝင်ဘာ ၂၈ ရက် နံနက် ၄ နာရီမှစတင်၍ တော်လှန်ရေးပူးပေါင်းတပ်ဖွဲ့များက ဝင်ရောက်တိုက်ခိုက်ရာ နံနက် ၈ နာရီခန့်တွင် အပြည့်အဝ သိမ်းပိုက်ရရှိခဲ့ကြောင်း ဓူဝံပြည်သူ့ကာကွယ်ရေးအဖွဲ့ (ရေဦး) က ထုတ်ပြန်သည်။ စစ်သားနှင့် ပျူစောထီးများ ထွက်ပြေးသွားခဲ့ပြီး စစ်တပ်ထံမှ လက်နက် ၅ လက်နှင့် စစ်အသုံး အဆောင်ပစ္စည်းများ သိမ်းဆည်းရရှိခဲ့သည်။ တိုက်ပွဲအတွင်း တံတားဦးလေတပ်မှ ဂျက်ဖိုက်တာ ၁ စီးက ၂ ကြိမ် လေကြောင်းတိုက်ခိုက်ခဲ့ပြီး ဟုမ္မလင်းမှ Y-12 လေယာဉ်က ဗုံးကြဲ ၁၂ ကြိမ်ခန့် ကျဲချခဲ့ကာ ကန့်ဘလူ ၆၀၀၆ တပ်မှ ဟောင်ဝှစ်ဇာများဖြင့် ပစ်ကူပေးခဲ့သော်လည်း တော်လှန်ရေးတပ်များ ရွာကို အပြည့်အဝ သိမ်းပိုက်နိုင်ခဲ့သည်။

အဆိုပါစစ်ဆင်ရေးကို ဗျူဟာ ၅၂ ပေါ်ဦးစစ်ကြောင်း၊ တန့်ဆည်ပကဖ၊ ရွှေဘိုခရိုင် တပ်ရင်း ၂၅၊ PLA၊ ဓူဝံရေဦး၊ ဝံသပါလရေဦး၊ Drone Force Taze တို့က ပူးပေါင်းလုပ်ဆောင်ခဲ့ကြောင်း သိရသည်။

နမခတိုင်းမှူးဟောင်း မျိုးမင်းထွေး ဇနီးမိသားစုပါ ဖမ်းဆီးခံရ၊ တိုင်းမှူးသစ် ကျော်သူရ တာဝန်စယူ

 

နိုဝင် ၂၉

The Kaladan Post

အနောက်မြောက်တိုင်းစစ်ဌာနချုပ် (နမခ) တိုင်းမှူးဟောင်း ဗိုလ်မှူးချုပ် မျိုးမင်းထွေးကို စစ်ဆင်ရေးကျရှုံးမှုနှင့် လာဘ်စားမှုများဖြင့် နိုဝင်ဘာ ၁၀ ရက်ဝန်းကျင်က နေပြည်တော်စစ်ရုံးက ဖမ်းဆီးစစ်ဆေးခဲ့ပြီး ဇနီးနှင့် မိသားစုဝင်များကိုပါ ယာယီထိန်းသိမ်းထားကြောင်း စစ်ဘက် သတင်းရင်းမြစ်က ထုတ်ဖော်သည်။ မူလက မုံရွာတိုင်းမှူးနေအိမ်တွင် နေထိုင်ခွင့်ပေးထားသော မိသားစုကို လာဘ်စားမှုပေါ်ပေါက်လာပြီးနောက် စစ်တပ်က ခေါ်ယူဖမ်းဆီးခဲ့ခြင်းဖြစ်သည်။

တိုင်းမှူးဟောင်း မျိုးမင်းထွေးကို ရာထူးမှဖယ်ရှားကာ စစ်ခုံရုံးတင်လိုက်ပြီး ကလောစစ်ဦးစီး တက္ကသိုလ်ကျောင်းအုပ်ကြီး ဗိုလ်မှူးချုပ် ကျော်သူရကို တိုင်းမှူးသစ်အဖြစ် ခန့်အပ်လိုက်သည်။

စစ်တက္ကသိုလ်အပတ်စဉ် ၄၀ ထွက် ဗိုလ်မှူးချုပ် ကျော်သူရသည် နိုင်ငံတော်ကာကွယ်ရေး တက္ကသိုလ်နှင့် စစ်ဆင်ရေးကွပ်ကဲမှုဌာနချုပ်များတွင် တာဝန်ထမ်းဆောင်ခဲ့သူဖြစ်ပြီး ယနေ့ မုံရွာစစ်ဆေးရုံသို့ သွားရောက်အားပေးခဲ့ကြောင်း သိရသည်။

 

ရေဖြူ ခလရ ၄၀၄ မှ စစ်မှုထမ်း ၅ ဦး လက်နက် ၅ လက်နှင့် အလင်းဝင်၊ တစ်ဦးလျှင် ဆုငွေ ၄၀ သိန်း ချီးမြှင့်

 

နိုဝင် ၂၉

The Kaladan Post

တနင်္သာရီတိုင်း၊ ရေဖြူမြို့နယ် ခလရ ၄၀၄ တပ်ရင်းမှ စစ်မှုထမ်းတပ်သားသစ် ၅ ဦးသည် နိုဝင်ဘာ ၂၇ ရက်က ရန်ကင်းတံတားကာကင်းဂိတ်မှ သေနတ် ၅ လက်နှင့် ခဲယမ်းများ ယူဆောင်ကာ Ba Htoo Army – BHA ထံ အလင်းဝင်ရောက်ခဲ့ကြောင်း သိရသည်။ အလင်းဝင်လာသည့် ရဲလွင်မိုး၊ အောင်အောင်၊ ငြိမ်းချမ်းဇော်၊ အောင်ခန့်ဇော်၊ သက်ထွန်းဝေ တို့သည် MA-1 ၃ လက်၊ MA-2 ၁ လက်၊ MA-4 ၁ လက်၊ ကျည်ဘောက် ၁၇ ခု၊ အီနာဂါဗုံး ၂ လုံး၊ 5.56 ကျည် ၁၁၆၇ တောင့်တို့နှင့်အတူ ရောက်ရှိလာခဲ့သည်။

၎င်းတို့မှာ စစ်မှုထမ်းအပတ်စဉ် ၅၊ ၈၊ ၁၁ မှ ဖြစ်ပြီး ရန်ကုန်၊ ဧရာဝတီ၊ ပဲခူး၊ ရှမ်းပြည်တို့မှ ဖြစ်ကြောင်း၊ အားလုံးမှာ ပေါ်တာဆွဲခံရသူများဖြစ်ကြောင်း BHA က ထုတ်ဖော်သည်။ အလင်းဝင်လာသည့် ၅ ဦးကို တစ်ဦးလျှင် ဆုကြေးငွေ ကျပ် ၄၀ သိန်းစီ ချီးမြှင့်ခဲ့ပြီး ၎င်းတို့၏ ဆန္ဒအတိုင်း ပြည်ပတွင် အလုပ်လုပ်ကိုင်နိုင်ရန် ကူညီစီစဉ်ပေးခဲ့ကြောင်း BHA က ကြေညာသည်။