“မဲပေးစရာမလို၊ အတုအယောင်ကို ဆန့်ကျင်၊ အနာဂတ်အမှန် တည်ဆောက်ကြ”

မြန်မာပြည်သူအပေါင်းတို့ ခင်ဗျာ …..
၂၀၂၁ ခုနှစ်၊ ဖေဖော်ဝါရီလ (၁) ရက်နေ့သည် ကျွန်ုပ်တို့နိုင်ငံ၏သမိုင်းတွင် အမည်းစက် ထင်ကျန်ရစ်စေမည့်နေ့တစ်နေ့ဖြစ်သည်ဟုဆိုလျှင် လွန်အံ့မထင်ပါ။ ထိုနေ့တွင် ပြည်သူ လူထုက လွတ်လပ်တရားမျှတစွာ ရွေးချယ်တင်မြှောက်ထားသော တရားဝင်အစိုးရကို စစ်အာဏာရှင်အဖွဲ့က အတင်းအဓမ္မဖြုတ်ချကာ အာဏာကို မတရားသိမ်းယူခဲ့သည်။ ထိုအချိန်မှစ၍ ကျွန်ုပ်တို့၏နိုင်ငံသည် အမှောင်ထုထဲသို့ နစ်မြုပ်ခဲ့ရပြီး ပြည်သူလူထု တစ်ရပ်လုံးသည် မကြုံစဖူးသော ဆင်းရဲဒုက္ခမျိုးစုံ၊ သွေးစွန်းသော အကြမ်းဖက်မှုများနှင့် ရင်ဆိုင်ခဲ့ကြရသော်လည်း နွေဦးတော်လှန်ရေး၏ ပြင်းပြသောစိတ်ဓာတ်ဖြင့် ယနေ့တိုင် အာဏာသိမ်းအဖွဲ့ကို ပြတ်ပြတ်သားသား ဆန့်ကျင်နေဆဲဖြစ်သည်။
စစ်အာဏာရှင်အဖွဲ့သည် ၎င်းတို့၏လက်ထဲသို့ အာဏာရောက်ရှိပြီးနောက် မည်သည့် လူ့အခွင့်အရေး၊ မည်သည့်တရားဥပဒေကိုမျှ အလေးမထားဘဲ ရက်စက်ကြမ်းကြုတ်မှုများကို နေ့စဉ်ရက်ဆက် ကျူးလွန်လျက်ရှိသည်။ ၎င်းတို့၏လက်ချက်ဖြင့် ကျဆုံးခဲ့ရသော အပြစ်မဲ့ ပြည်သူများမှာ ထောင်နှင့်ချီနေပြီဖြစ်ပြီး ရာဇဝတ်မှုများသည်လည်း အချိန်နှင့်အမျှ တိုးပွားလျက်ရှိသည်။ ဤသည်မှာ ကျွန်ုပ်တို့ပြည်သူလူထုအပေါ် ဆက်တိုက်ကျူးလွန် နေသော စစ်ရာဇဝတ်မှုများသာဖြစ်သည်။
 လေကြောင်းဗုံးကြဲ သတ်ဖြတ်မှုများနှင့် မီးရှို့ဖျက်ဆီးမှုများ- ငြိမ်းချမ်းစွာနေထိုင် ကြသော ကျေးရွာများ၊ မြို့ပြများ၊ စာသင်ကျောင်းများ၊ ဘာသာရေးအဆောက်အအုံ များ၊ ဆေးရုံများကိုပါမချန် နေ့စဉ်ရက်ဆက် လေကြောင်းမှ ဗုံးကြဲတိုက်ခိုက်ခြင်း၊ လက်နက်ကြီးများဖြင့် ပစ်ခတ်ခြင်း၊ မြေပြင်မှ မီးရှို့ဖျက်ဆီးခြင်းများ ပြုလုပ်လျက်ရှိရာ ကလေးသူငယ်များ၊ သက်ကြီးရွယ်အိုများအပါအဝင် အပြစ်မဲ့ပြည်သူများစွာ အသက် ဆုံးရှုံးခဲ့ရပြီး လူနေအိမ်ရာပေါင်းများစွာ ပြာပုံဘဝသို့ရောက်ခဲ့ရသည်။ ပြည်သူများစွာ အိုးမဲ့အိမ်မဲ့ ဒုက္ခသည်ဘဝသို့ ရောက်ရှိခဲ့ရသည်။ ဤလုပ်ရပ်များသည် မြန်မာပြည်သူ လူထုကို အကြောက်တရားဖြင့် ဖိနှိပ်ရန် ရည်ရွယ်သည့် အကြမ်းဖက်မှုများဖြစ်သည်။
 အတင်းအဓမ္မ ဖမ်းဆီးကာ စစ်မှုထမ်းစေမှုများ- ၎င်းတို့၏တပ်ဖွဲ့ဝင်အင်အား နည်းပါး လာသောအခါ အပြစ်မဲ့ပြည်သူများ၊ လူငယ်လူရွယ်များကို အတင်းအဓမ္မဖမ်းဆီးကာ ရှေ့တန်းစစ်မျက်နှာများသို့ ပို့ဆောင်၍ အသက်ဘေးအန္တရာယ်နှင့် ရင်ဆိုင်စေလျက် ရှိသည်။ ဤသည်မှာ လူသားမျိုးနွယ်အပေါ် ကျူးလွန်သည့် ရာဇဝတ်မှုဖြစ်ပြီး နိုင်ငံတကာဥပဒေများကို လုံးဝချိုးဖောက်ခြင်းပင်ဖြစ်သည်။ မိမိတို့၏ အာဏာ တည်မြဲရေးအတွက် တိုင်းရင်းသားညီအစ်ကို မောင်နှမများ အချင်းချင်း သတ်ဖြတ်ရန် ဖိအားပေးခြင်းသည် မည်သည့်အခါမှ လက်ခံနိုင်ဖွယ်မရှိပါ။
 မုဒိမ်းမှုကျူးလွန်ခြင်းနှင့် လုယက်သိမ်းပိုက်မှုများ- အမျိုးသမီးများနှင့် ကလေးသူငယ် များအပေါ် ရက်စက်စွာ မုဒိမ်းမှုကျူးလွန်ခြင်းများ၊ ပြည်သူများ၏ ပစ္စည်းဥစ္စာများကို လုယက်သိမ်းပိုက်ခြင်းများမှာလည်း စစ်အာဏာရှင်တို့၏လက်ချက်ဖြင့် ဖြစ်ပေါ် နေသော ကြေကွဲဖွယ်ရာ အဖြစ်ဆိုးများပင်ဖြစ်သည်။ ဤသို့သော အောက်တန်းကျ သည့် လုပ်ရပ်များသည် လူသားမဆန်သော ရာဇဝတ်မှုများဖြစ်သည်။
ယခု စစ်အာဏာရှင်အဖွဲ့က ကျင်းပရန် ကြိုးပမ်းနေသော ရွေးကောက်ပွဲဟူသည်မှာ ပြည်သူလူထု၏ဆန္ဒကို လုံးဝကိုယ်စားမပြုသော အတုအယောင်ရွေးကောက်ပွဲသာ ဖြစ်သည်။ ဤရွေးကောက်ပွဲသည် ၎င်းတို့၏မတရားအာဏာကို တရားဝင်ဖြစ်စေရန် ကြိုးပမ်းခြင်း သက်သက်သာဖြစ်ပြီး ပြည်သူလူထုအပေါ် ကျူးလွန်ခဲ့သော ရက်စက်ယုတ်မာသည့် ရာဇဝတ် မှုများကို ဖုံးကွယ်ရန်အတွက် ဖန်တီးထားခြင်းဖြစ်သည်။ ဤအတုအယောင်ရွေးကောက်ပွဲ တွင် ပါဝင်ခြင်း၊ မဲပေးခြင်းသည် စစ်အာဏာရှင်တို့၏ ရက်စက်ကြမ်းကြုတ်သော လုပ်ရပ်များ ကို ထောက်ခံခြင်းနှင့် အတူတူပင်ဖြစ်သည်။ ထို့ကြောင့် ကျွန်ုပ်တို့သည် ဤအတုအယောင် ရွေးကောက်ပွဲကို လုံးဝသပိတ်မှောက်ပြီး မဲပေးခြင်းမှ ရှောင်ကြဉ်ရမည်ဖြစ်သည်။ မဲမပေးခြင်းဖြင့် ကျွန်ုပ်တို့သည် စစ်အာဏာရှင်တို့အား “သင်တို့၏ အတုအယောင်အာဏာကို ငါတို့အသိအမှတ်မပြု” ဟု အခိုင်အမာပြသရမည်ဖြစ်ပြီး ဒီမိုကရေစီအတွက် ရပ်တည်ကြောင်း ကမ္ဘာသိကြေညာရမည်ဖြစ်သည်။ ကျွန်ုပ်တို့၏ ဆန္ဒသည် ရွေးကောက်ပွဲဟူသော အတုအယောင်အောက်တွင် မြှုပ်နှံခံရမည့်အရာ မဟုတ်ပါ။
ကျွန်ုပ်တို့အားလုံး မျှော်လင့်တောင့်တနေသည်မှာ စစ်အာဏာရှင်စနစ်ကင်းမဲ့သော၊ ဒီမိုကရေ စီအပြည့်အဝ ဖော်ဆောင်နိုင်သော၊ တန်းတူညီမျှအခွင့်အရေးများရရှိသော စစ်မှန်သော ဖက်ဒရယ်ဒီမိုကရေစီနိုင်ငံတော်ဖြစ်သည်။ ဤရည်မှန်းချက်ကို အကောင်အထည်ဖော်ရန် အတွက် ကျွန်ုပ်တို့အားလုံးသည် စည်းလုံးညီညွတ်စွာ လက်တွဲဆောင်ရွက်ရန် အထူးလိုအပ် သည်။
တော်လှန်ရေးအဖွဲ့များ စည်းလုံးညီညွတ်ခြင်း- ဒေသအသီးသီးမှ တော်လှန်ရေး အင်အားစုများအားလုံးသည် အတ္တမာနများကို ဘေးဖယ်ထား၍ ဘုံရည်မှန်းချက်တစ်ခု တည်းအောက်တွင် စည်းလုံးညီညွတ်စွာ လက်တွဲတိုက်ပွဲဝင်မှသာလျှင် စစ်အာဏာရှင် စနစ်ကို အမြစ်ပြတ်ချေမှုန်းနိုင်မည်ဖြစ်သည်။ အမျိုးသားညီညွတ်ရေးအစိုးရ (NUG) အပါအဝင်၊ ပြည်သူ့ကာကွယ်ရေးတပ်ဖွဲ့များ (PDFs)၊ တိုင်းရင်းသားလက်နက်ကိုင် အဖွဲ့အစည်းများ (EAOs)နှင့် တော်လှန်ရေးအင်အားစုအားလုံး၏ ပူးပေါင်းဆောင်ရွက် မှုသည် ကျွန်ုပ်တို့၏ အင်အားဖြစ်သည်။ ဤစည်းလုံးမှုကသာ စစ်အာဏာရှင်ကို ဒူးထောက်စေလိမ့်မည်။
ပြည်သူလူထု၏ ပူးပေါင်းပါဝင်မှု- ပြည်သူလူထုတစ်ရပ်လုံးအနေဖြင့်လည်း စစ်အာဏာရှင်ကို မည်သည့်နည်းနှင့်မျှ အားမပေးဘဲ တော်လှန်ရေးအင်အားစုများကို နည်းမျိုးစုံဖြင့် ပံ့ပိုးကူညီရမည်။ အကြမ်းဖက်စစ်တပ်၏ လုပ်ရပ်များကို ဆန့်ကျင် ကြောင်း ဆက်လက်ပြသရမည်။ CDM (အာဏာဖီဆန်ရေးလှုပ်ရှားမှု) အပါအဝင် မည်သည့်နည်းလမ်းဖြင့်မဆို ပါဝင်နိုင်သည့် နည်းလမ်းများကို ဆက်လက်ရှာဖွေကာ အတူတကွ လက်တွဲတိုက်ပွဲဝင်ရမည်။ ပြည်သူ့အင်အားသည် အကြီးမားဆုံးသော အင်အားဖြစ်သည်။
ကျွန်ုပ်တို့၏မြန်မာနိုင်ငံသည် စစ်အာဏာရှင်တို့၏လက်အောက်တွင် ဆက်လက်နစ်မြုပ် နေပါက အနာဂတ်မဲ့သောနိုင်ငံ ဖြစ်လာလိမ့်မည်။ ထို့ကြောင့် “မဲပေးစရာမလို၊ အတုအယောင် ကို ဆန့်ကျင်၊ အနာဂတ်အမှန် တည်ဆောက်ကြ” ဟူသော ဆောင်ပုဒ်အတိုင်း ကျွန်ုပ်တို့ အားလုံးသည် စစ်အာဏာရှင်စနစ်နှင့်အတူ အာဏာရှင်မှန်သမျှကို အမြစ်ပြတ်တိုက်ထုတ်ရန်၊ စစ်မှန်သော ဖက်ဒရယ်ဒီမိုကရေစီနိုင်ငံတော်သစ်ဆီသို့ ရဲရဲဝံ့ဝံ့ ချီတက်ကြရန် အချိန်တန်ပြီ ဖြစ်သည်။ ကျွန်ုပ်တို့၏ အနာဂတ်သည် ကျွန်ုပ်တို့၏လက်ထဲတွင်သာ ရှိသည်။ အတူတကွ လက်တွဲ၍ တော်လှန်ရေးပန်းတိုင်ကို အရောက်လှမ်းကြပါစို့။ အောင်ပွဲသည် ပြည်သူတို့ လက်ထဲတွင်ရှိသည်။