ဧပြီ ၁၁၊ ၂၀၂၅

 

ပြင်းထန်ငလျင်လှုပ်ခတ်မှုကြောင့် မန္တလေးနှင့် စစ်ကိုင်းအပါအဝင် မြို့တော်တော်များတွင် အဆောက်အဦများ ပြိုကျပျက်စီးခဲ့ပြီး ပြည်သူများသည် အာဏာပိုင်များ၏ အကူအညီမရဘဲ ကိုယ်ထူကိုယ်ထ ရှင်းလင်းနေရသည်ဟု ဒေသခံများက ပြောသည်။

 

ငလျင်ဒဏ်ကြောင့် ကွဲအက်ပြီး အန္တရာယ်ရှိသည့် အဆောက်အဦများကို ဖျက်သိမ်းရန် လိုအပ်ကြောင်း စစ်ကောင်စီက ထုတ်ပြန်ထားသော်လည်း လက်တွေ့တွင် ထိရောက်သည့် စစ်ဆေးမှုနှင့် အကူအညီများ မရှိသလောက်ဖြစ်နေသည်ဟု သိရပါသည်။ ပြိုကျပျက်စီးသည့် အဆောက်အဦများကို ရှင်းလင်းရန် ဒေသခံများကိုယ်တိုင် ငွေကုန်ကြေးကျခံကာ လုပ်ဆောင်နေရပြီး အချို့ဆိုလျှင် သံစသံတိုများကို သိန်း ၃၀ မှ ၅၀ ဝန်းကျင်ဖြင့် ရောင်းချကာ ရှင်းလင်းနေရသည်။ ပြိုလုမည့် အဆောက်အဦများကို ဖျက်သိမ်းရန်မှာလည်း သိန်း ၃၀၀ မှ ၅၀၀ အထိ ကုန်ကျသည်ဟု မန္တလေးမြို့ခံတစ်ဦးက ဧရာဝတီသတင်းဌာနကို ပြောဆိုထားပြီး ရှင်းလင်းရေးလုပ်ငန်းများအတွက် ဒေသခံလူမှုကူညီရေးအသင်းများက စက်ယန္တရားများဖြင့် ကူညီပေး နေသော်လည်း အုပ်ချုပ်ရေးအဖွဲ့များထံမှ ခွင့်ပြုချက်ရယူရန် လိုအပ်တယ်၊ စာတင်ခိုင်းတာတွေက ဝန်ထုပ်ဝန်ပိုးပဲ။ ဘာလုပ်ပေးမယ်ဆိုတာ တိတိကျကျ မသိရဘူး” ဟု စစ်ကိုင်းမြို့ခံတစ်ဦးကလည်း ပြောသည်ဟု သိရသည်။

 

မန္တလေးမြို့တွင် ဧပြီ ၄ ရက်မှစတင်ကာ လူမှုကူညီရေးအသင်း ၁၅ ခုခန့်က အန္တရာယ်ရှိသည့် အဆောက်အဦများကို ဖျက်သိမ်းပေးခြင်း၊ စာရွက်စာတမ်းနှင့် တန်ဖိုးကြီးပစ္စည်းများ ရှာဖွေပေးခြင်းများ ဆောင်ရွက်နေသည်။ သို့သော် အပြည့်အဝ ရှင်းလင်းပေးနိုင်ရန် အချိန်နှင့် အရင်းအမြစ်မလုံလောက်ဟု နန္ဒာမေတ္တာလူမှုကယ်ဆယ်ရေးအဖွဲ့မှ တာဝန်ရှိသူတစ်ဦးက ဆိုသည်။

 

စစ်ကောင်စီ၏ ထုတ်ပြန်ချက်အရ ငလျင်ကြောင့် လူနေအိမ် ၆ သောင်းကျော်၊ ဘုန်းကြီးကျောင်းနှင့် စာသင်တိုက် ၃,၅၁၄ ခု၊ စာသင်ကျောင်း ၂,၃၆၆ ခု၊ ဆေးရုံဆေးခန်း ၁၆၇ ခု၊ ဌာနဆိုင်ရာအဆောက်အဦ ၃,၆၇၈ လုံး၊ တံတား ၁၅၅ စင်း၊ ဘုရားစေတီပုထိုးပေါင်း ၅,၆၂၀ ဆူ ပျက်စီးခဲ့သည်ဟု ဖော်ပြသော်လည်း မြေပြင်တွင် ဒီထက်မက ဆုံးရှုံးမှု ပိုများနိုင်ပါသည်။ ဒုစစ်ခေါင်းဆောင် ဒုဗိုလ်ချုပ်မှူးကြီး စိုးဝင်းက အဆောက်အဦများ သတ်မှတ်ချက် မကိုက်ညီမှုများကို စိစစ်အရေးယူမည်ဟု ပြောထားသော်လည်း လက်တွေ့အကောင်အထည်ဖော်မှုများ မရှိသေးဟု ပြည်သူများက ဆိုသည်။

 

ဤအခက်အခဲများကြားတွင် ဒေသခံများနှင့် လူမှုအသင်းများ၏ ကြိုးပမ်းမှုဖြင့် ရှင်းလင်းရေးလုပ်ငန်းများ ဆက်လက်လုပ်ဆောင်နေသော်လည်း လုံလောက်မှုမရှိသည့်အတွက် နိုင်ငံတကာ၏ အကူအညီများ  ပိုမိုလိုအပ်နေသည်။

 

ဧရာဝတီသတင်းဌာနမှ ကောက်နုတ်ဖော်ပြသည်။