ဇူလိုင် (၂၁) သတင်းတိုပေါင်းချုပ်

၁။ ဧရာဝတီမြစ်ကြောင်းတွင် စစ်သင်္ဘောများ တိုက်ခိုက်ခံရ၍ တစ်စီးနစ်မြုပ်
ဇူလိုင် ၂၁
The Kaladan Post
ဧရာဝတီမြစ်ကြောင်းအတိုင်း မန္တလေးမှ ဆန်တက်လာသော စစ်သင်္ဘော ၁၄ စီးကို ပြည်သူ့ကာကွယ်ရေးတပ်မတော် (မန္တလေး) က တိုက်ခိုက်ခဲ့ရာ သင်္ဘော တစ်စီးနစ်မြုပ်ပြီး သုံးစီး မီးလောင်ပျက်စီးခဲ့သည်။ ဇူလိုင်လ ၁၇ ရက်တွင် မတ္တရာ၊ စဉ့်ကူး၊ သပိတ်ကျင်းမြို့နယ်များတစ်လျှောက် ဖြတ်တောက်တိုက်ခိုက်ခဲ့ခြင်းဖြစ်သည်။ လက်နက်ခဲယမ်းနှင့် ရိက္ခာတင်ဆောင်ထားသော တွဲတွန်းသင်္ဘော တစ်စီးလုံးဝနစ်မြုပ်သွားပြီး စစ်သင်္ဘော တစ်စီးနှင့် တွန်းသင်္ဘော နှစ်စီး မီးလောင်ပျက်စီးခဲ့သည်။ ဤတိုက်ခိုက်မှုကြောင့် စစ်ကောင်စီဘက်မှ ရိက္ခာနှင့် ခဲယမ်းများ ဆုံးရှုံးမှုများပြီး ထိခိုက်မှုများသည်ဟု ပြည်သူ့ကာကွယ်ရေးတပ်မတော် (မန္တလေး) မှ သတင်းနှင့်ပြန်ကြားရေးတာဝန်ရှိသူ ကိုအော်စမွန်က ပြောသည်။
စစ်သင်္ဘောအုပ်သည် အထက်သို့ ဆန်တက်ရာတွင် Y-12 လေယာဉ်များဖြင့် ဗုံးကြဲကာကွယ်ပေးထားပြီး ဂျက်ဖိုက်တာနှင့် Mi-35 များဖြင့် အကြိမ်ကြိမ် တိုက်ခိုက်နေသော်လည်း တော်လှန်ရေးရဲဘော်များက အောင်မြင်စွာ တိုက်ခိုက်နိုင်ခဲ့သည်။ မီးလောင်ပျက်စီးသော သင်္ဘောများကို ဘေးနှစ်ဖက်မှ ညှပ်ဆွဲတွဲခေါ်ကာ ဆန်တက်သွားသော်လည်း ဆက်လက်ဖြတ်တောက်တိုက်ခိုက်ရန် တော်လှန်ရေးတပ်ဖွဲ့များ ပြင်ဆင်နေသည်။ ဤတိုက်ခိုက်မှုကြောင့် စစ်ကောင်စီအနေဖြင့် ၎င်းတို့၏ ရည်မှန်းချက်သို့ ရောက်ရှိရန် မလွယ်ကူနိုင်ဟု ကိုအော်စမွန်က ထပ်လောင်းပြောကြားသည်။

 

၂။ စစ်တပ်က လက်နက်ကြီးဖြင့် ပစ်ခတ်မှု ကလေးငယ်အပါ ၄ ဦးဒဏ်ရာရပြီး ၁ ဦးဖမ်းဆီးခံရ
ဇူလိုင် ၂၁
The Kaladan Post
ပဲခူးတိုင်း၊ ညောင်လေးပင်ခရိုင်ရှိ ကျေးရွာများကို အကြမ်းဖက်စစ်ကောင်စီက လက်နက်ကြီးဖြင့် ပစ်ခတ်ခဲ့ရာ အသက် ၄ နှစ်အရွယ် ကလေးငယ်အပါအဝင် ပြည်သူ ၄ ဦး ဒဏ်ရာရရှိပြီး ၁ ဦးဖမ်းဆီးခံခဲ့ရသည်။ ဇူလိုင်လ ၁၄ ရက်တွင် မူးမြို့နယ်၊ နတ်သံကွင်းမှ စစ်တပ်က ၁၂၀ မမ လက်နက်ကြီးဖြင့် ရေလဲအနောက်ဘက်ကမ်းနှင့် အနီးကျေးရွာများသို့ ၄ လုံး ပစ်ခတ်ခဲ့သည်။ ဤပစ်ခတ်မှုကြောင့် အသက် ၄၀ နှစ်အရွယ် ဦးကြည်နိုင်၊ အသက် ၁၇ နှစ်အရွယ် မောင်ဟိန်းဇော်၊ အသက် ၄ နှစ်အရွယ် မနှင်းရတီမိုးတို့ ဒဏ်ရာရရှိခဲ့သည်။ ဇူလိုင်လ ၁၈ ရက်တွင် နတ်သံကွင်းမှ စစ်တပ်က ရေလဲကရင်ကျေးရွာနှင့် အနီးကျေးရွာများသို့ ၁၂၀ မမ လက်နက်ကြီး ၆ လုံး ထပ်မံပစ်ခတ်ခဲ့သည်။ ထို့ပြင် ခမရ-၃၀၇ တပ်ရင်းက သင်္ကန်းကုန်းကျေးရွာသို့ လက်နက်ကြီး ၁ လုံး ပစ်ခတ်ရာ အသက် ၃၆ နှစ်အရွယ် မဆောနန်းဝေ ဒဏ်ရာရရှိခဲ့သည်။
ဇူလိုင်လ ၁၆ ရက်တွင် ဆောထိမြို့နယ်၊ ဇလုပ်ကြီးအခြေစိုက် ခမရ-၅၉၈ တပ်ရင်းက ဝင်းကံကျေးရွာသို့ ၈၁ မမ လက်နက်ကြီး ၄ လုံး ပစ်ခတ်ခဲ့သည်။ ထို့ပြင် ဇူလိုင်လ ၁၈ ရက်တွင် ခမရ-၂၀ တပ်ရင်းက ဂွေးကုန်းကျေးရွာသို့ ၁၂၀ မမ လက်နက်ကြီး ၅ လုံး၊ ရင်တွင်းကုန်းနှင့် ကညင်ကျိုးကျေးရွာသို့ ၃ လုံး၊ ခလရ-၂၆၄ တပ်ရင်းက လေးအိမ်စုကျေးရွာသို့ ၁၂၀ မမ ၁ လုံး ပစ်ခတ်ခဲ့သည်။ ဇူလိုင်လ ၁၆ ရက်တွင် လယ်ဒိုမြို့နယ်၊ သစ်ဖရောင်းတန်းကျေးရွာမှ အသက် ၅၂ နှစ်အရွယ် ဦးမျိုးမင်းသိန်းကို ညောင်လေးပင်မြို့တွင် ဈေးဝယ်နေစဉ် စစ်ကောင်စီက ငှက်ပျောတောဂိတ်တွင် ဖမ်းဆီးခဲ့သည်။

 

၃။ ချောက်မြို့နယ်တွင် စစ်ကြောင်းကို တိုက်ခိုက်မှု စစ်ကောင်စီတပ်သား ၆ ဦးသေဆုံး
ဇူလိုင် ၂၁
The Kaladan Post
မကွေးတိုင်း၊ ချောက်မြို့နယ်၊ ကုန်းကြီးပျူစောထီးရွာမှ ထွက်လာသော စစ်ကောင်စီ စစ်ကြောင်းကို တော်လှန်ရေးတပ်ဖွဲ့များက တိုက်ခိုက်ရာ တပ်သား ၆ ဦးသေဆုံးပြီး ၁၅ ဦး အပြင်းအထန်ဒဏ်ရာရရှိခဲ့သည်။ ဇူလိုင်လ ၁၇ ရက်တွင် အင်အား ၆၀ ခန့်ပါ စစ်ကြောင်းကို အိုင့်ကြီးကျေးရွာအနီး ကြားဖြတ်တိုက်ခိုက်ခဲ့ခြင်းဖြစ်သည်။ တိုက်ပွဲသည် မိနစ် ၆၀ ခန့်ကြာမြင့်ခဲ့ပြီး တော်လှန်ရေးရဲဘော်များ အထိအခိုက်မရှိ ဆုတ်ခွာနိုင်ခဲ့သည်။ ဤတိုက်ခိုက် မှုကို ချောက်မြို့နယ် တော်လှန်ရေးတပ် (CRA) နှင့် မြိုင်မြို့နယ် ပြည်သူ့ကာကွယ်ရေးအဖွဲ့ (မြိုင်/ပေါက် ပကဖ) တို့က ပူးပေါင်းလုပ်ဆောင်ခဲ့သည်။ စစ်ကောင်စီတပ်သားများထဲမှ ဒဏ်ရာရသူအချို့ ထပ်မံသေဆုံးမှုများ ရှိနိုင်သည်ဟု Chauk Revolution Army မှ ပြန်ကြားရေးတာဝန်ခံက ပြောသည်။
တိုက်ခိုက်မှုအတွင်း စစ်ကောင်စီတပ်သား ၆ ဦးမှာ မျက်မြင်သေဆုံးခဲ့ကြောင်း အတည်ပြု နိုင်ခဲ့သည်။ ဒဏ်ရာရသူ ၁၅ ဦးမှာ အပြင်းအထန်ထိခိုက်ခဲ့ပြီး ၎င်းတို့၏ အခြေအနေမှာ ဆက်လက်ဆိုးရွားနိုင်သည်ဟု သိရသည်။ တော်လှန်ရေးတပ်ဖွဲ့များသည် မဟာမိတ်ပူးပေါင်း စစ်ကြောင်းအဖြစ် ထိရောက်စွာ တိုက်ခိုက်နိုင်ခဲ့ကြောင်း ပြန်ကြားရေးတာဝန်ခံက ထပ်လောင်းပြောကြားသည်။ ဤတိုက်ပွဲသည် စစ်ကောင်စီအား ထိရောက်စွာ ထိခိုက်နစ်နာ စေခဲ့ပြီး ဒေသတွင်း တော်လှန်ရေးအင်အားများ၏ ခွန်အားကို ပြသခဲ့သည်။

 

 

၄။ စစ်မှုထမ်းတပ်သားများအား နေအိမ်နှင့် ဘုန်းကြီးကျောင်းများ ဖျက်ဆီးရန် စစ်တပ်က အမိန့်ပေး
ဇူလိုင် ၂၁
The Kaladan Post
ရခိုင်ပြည်နယ်တွင် စစ်ကောင်စီက စစ်မှုထမ်းတပ်သားများအား ကျေးရွာများသို့ အတင်းဝင်ရောက်စေပြီး နေအိမ်များနှင့် ဘုန်းကြီးကျောင်းများကို ဖျက်ဆီးချွတ်ယူရန် အမိန့်ပေးနေကြောင်း အလင်းဝင်တပ်သား နိုင်ဝင်းစိုးက ဝန်ခံထွက်ဆိုသည်။ ရန်ကုန်တိုင်း၊ ကော့မှူးမြို့နယ်မှ နိုင်ဝင်းစိုးသည် ၂၀၂၅ ဇန်နဝါရီလတွင် စစ်မှုထမ်းအဖြစ် ဖမ်းဆီးခံရပြီး ရခိုင်ပြည်နယ် တပ်မ ၅၅ တွင် တာဝန်ထမ်းဆောင်ခဲ့သည်။ ၎င်းသည် အာရက္ခတပ်တော် (AA) ထံ အလင်းဝင်ရောက်ခဲ့ကြောင်း သိရသည်။ စစ်တွေမြို့၊ အမြင့်ကျွန်းတွင် ဘန်ကာတူးခြင်းနှင့် အရှေ့ကာကင်းတာဝန်ထမ်းဆောင်ရင်း စစ်တပ်က ၎င်းတို့အား နေအိမ်များနှင့် ဘုန်းကြီး ကျောင်းများ ဖျက်ဆီးရန် အမိန့်ပေးခဲ့သည်။ စစ်မှုထမ်းတပ်သားများသည် စိတ်မပါသော်လည်း အမိန့်ဖြင့် လုပ်ဆောင်ရကြောင်း ၎င်းက ဆိုသည်။
စစ်တပ်က စစ်မှုထမ်းတပ်သားများအား ဖိနှိပ်ခိုင်းစေပြီး အစားအသောက်မကောင်းမွန်စွာ ပေးကျွေးကာ မိသားစုနှင့် အဆက်အသွယ်ဖြတ်တောက်ထားသည်။ ထွက်ပြေးလိုသူများကို ပစ်ခတ်မည်ဟု ခြိမ်းခြောက်ထားပြီး AA ထံ အလင်းဝင်ပါက နှိပ်စက်သတ်ဖြတ်မည်ဟု လိမ်ညာခဲ့သည်။ သို့သော် AA ထံအလင်းဝင်ရောက်ချိန်တွင် နွေးထွေးစွာ ကြိုဆိုပြီး ကောင်းမွန် စွာ စောင့်ရှောက်ခဲ့ကြောင်း နိုင်ဝင်းစိုးက ဖြည့်စွက်ပြောသည်။ စစ်သင်တန်းကျောင်းများတွင် AA က အလင်းဝင်သူများကို ရက်စက်သည်ဟု လုပ်ကြံဓာတ်ပုံများ ပြသထားသော်လည်း အမှန်တရားမှာ ဆန့်ကျင်ဘက်ဖြစ်ကြောင်း ၎င်းက ထပ်လောင်းပြောကြားသည်။

 

၅။ အမြန်လမ်း မိုင်တိုင် ၃၁၈ တွင် ရဲကားတိုက်ခိုက်ခံရပြီးရဲ ၂ ဦးသေဆုံး
ဇူလိုင် ၂၁
The Kaladan Post
ရန်ကုန်-မန္တလေး အမြန်လမ်း မိုင်တိုင်အမှတ် ၃၁၈ တွင် ဇူလိုင် ၂၀ ရက် နံနက် ၇ နာရီ ၂၂ မိနစ်ခန့်က စစ်ကောင်စီလက်အောက်ခံ ရဲကား တစ်စီးကို တော်လှန်ရေးတပ်ဖွဲ့များက တိုက်ခိုက်ခဲ့ရာ ရဲ ၂ ဦး သေဆုံးပြီး ကားကို မီးရှို့ဖျက်ဆီးခဲ့ကြောင်း မြင်းခြံခရိုင် တပ်ရင်း (၄-၁၀) ပြောရေးဆိုခွင့်ရှိသူ ဆရာစိုးက ပြောသည်။ တိုက်ခိုက်မှုအတွင်း သေနတ် BA-94 ၂ လက်၊ ကျည်ဘောက် ၅ ခု၊ 9 mm ကျည် ၁၂၃ တောင့်နှင့် 7.62 mm ကျည် ၁၂၇ တောင့်တို့ကို သိမ်းဆည်းရမိခဲ့သည်။ တိုက်ပွဲမှာ ၄၅ မိနစ်ခန့် ကြာမြင့်ခဲ့ပြီး အမြန်လမ်းကို နံနက် ၈ နာရီမှ ၉ နာရီ ၃၀ မိနစ်အထိ ၁ နာရီခန့် ပိတ်ဆို့ခဲ့ရသည်။ ခရီးသွားပြည်သူများအနေဖြင့် မလိုအပ်ပါက အမြန်လမ်းအသုံးပြုမှု လျှော့ချရန် ဆရာစိုးက တိုက်တွန်းသည်။
တိုက်ခိုက်မှုအပြီး စစ်ကောင်စီတပ်ဖွဲ့များက မိုင်တိုင်အမှတ် ၃၁၈ သို့ ရောက်ရှိလာပြီး နယ်မြေရှင်းလင်းမှုများ ပြုလုပ်ခဲ့ကြောင်း သိရသည်။ ခရီးသွားတစ်ဦးက “တိုက်ပွဲဖြစ်ချိန်မှာ ကားတွေကို မိုးပေါ်ထောင်ပစ်ပြီး တားမြစ်ခဲ့တယ်။ ကားအစီးရေ ၁၀၀ ခန့် ရပ်ထားရပြီး စစ်ကားနဲ့ ရဲကားတွေလည်း ရောက်လာတယ်” ဟု ပြောသည်။ နွားထိုးကြီးမြို့နယ်အတွင်း တော်လှန်ရေးတပ်များသည် မိုင်တိုင် ၃၀၀ ဝန်းကျင်တွင် စစ်တပ်နှင့် မကြာခဏ တိုက်ခိုက်မှုများ ပြုလုပ်လေ့ရှိပြီး ခရီးသည်တင်ယာဉ်များကိုလည်း ရံဖန်ရံခါ စစ်ဆေးမှုများ လုပ်ဆောင်လျက်ရှိသည်။ ပြည်သူများအနေဖြင့် တိုက်ပွဲဖြစ်ပွားချိန်တွင် ဒေသတပ်ရင်းများ၏ ထုတ်ပြန်ချက်များကို လိုက်နာပြီး ခရီးသွားရန် တိုက်တွန်းထားသည်။

 

၆။ စစ်ဗိုလ်ချုပ်ကြီးများ ရွေးကောက်ပွဲမတိုင်မီ အနားယူရန် သတင်းထွက်ပေါ်
ဇူလိုင် ၂၁
The Kaladan Post
လာမည့်နှစ်ကုန်ပိုင်း ရွေးကောက်ပွဲမတိုင်မီ နေပြည်တော်တွင် စစ်ဗိုလ်ချုပ်ကြီးများအား ရာထူးတာဝန်များမှ အနားယူစေရန် စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်၏ အစီအစဉ်သတင်းများ ထွက်ပေါ်နေသည်။ ဤသတင်းကြောင့် စစ်ဗိုလ်ချုပ်များနှင့် ဆက်နွယ်သော စီးပွားရေးအသိုင်းအဝိုင်းများတွင် စိုးရိမ်ပူပန်မှုများ မြင့်တက်လျက်ရှိသည်။ ဗိုလ်ချုပ်ကြီးများဖြစ်သည့် အောင်လင်းဒွေး၊ ရဲဝင်းဦး၊ ညိုစော၊ မြထွန်းဦး၊ မောင်မောင်အေး အပါအဝင် အချို့အား အသက် ၅၆ မှ ၆၀ ကြားရှိသူများ မဖြစ်မနေ အနားယူရမည်ဟု သတင်းရင်းမြစ်များက ဆိုသည်။ မင်းအောင်လှိုင်ကိုယ်တိုင် သမ္မတရာထူးအတွက် ရည်မှန်းထားသည်ဟု သတင်းများလည်း ထွက်ပေါ်နေသည်။ မေလတွင် ၎င်းက စစ်ဘက်နှင့် အရပ်ဘက်အရာရှိများအား ရွေးကောက်ပွဲဝင်ရန် ဆန္ဒပြလုပ်ရန် ညွှန်ကြားခဲ့သည်။
ဤသတင်းများကြောင့် ဗိုလ်ချုပ်များနှင့် ဆက်နွယ်နေသော စီးပွားရေးသမားများသည် အစိုးရတင်ဒါများနှင့် စီမံကိန်းလုပ်ပိုင်ခွင့်များအတွက် စိုးရိမ်နေကြသည်။ လက်ရှိတင်ဒါများမှ ငွေကြေးရယူရေးနှင့် ခွင့်ပြုထားသော စီမံကိန်းများကို အမြန်လုပ်ဆောင်ရန် တက်သုတ်ရိုက် ဆောင်ရွက်နေကြောင်း သိရသည်။ တစ်ဖက်တွင် ဗိုလ်ချုပ်ကြီး ကျော်စွာလင်းအား မင်းအောင်လှိုင်က တပ်ချုပ်ရာထူးအတွက် ပြင်ဆင်နေပြီး စစ်ရေးတာဝန်များ ပိုမိုအပ်နှင်းလာ သည်ဟု သတင်းရင်းမြစ်များက ဆိုသည်။ ၎င်း၏ ရာထူးတိုးမြှင့်မှုသည် တပ်မတော်အတွင်း အာဏာချိန်ဆမှုအပေါ် သက်ရောက်မှုရှိနိုင်သည်ဟု သုံးသပ်ထားသည်။

 

၇။ ငါန်းဇွန်တွင် စစ်ကြောင်းမိုင်းဆွဲခံရမှု စစ်သား ၅ ဦးထက်မနည်းသေဆုံး
ဇူလိုင် ၂၁
The Kaladan Post
မန္တလေးတိုင်း၊ ငါန်းဇွန်မြို့နယ်၊ မြို့သာစက်မှုဇုန်နှင့် ဂွေးကုန်းရွာအကြား စစ်ကောင်စီ တပ်စစ်ကြောင်းကို မိုင်းဆွဲတိုက်ခိုက်ခဲ့ရာ စစ်သား ၅ ဦးထက်မနည်း သေဆုံးခဲ့ကြောင်း နဂါးနီပြောက်ကျားတပ်ဖွဲ့-မြင်းခြံမှ တာဝန်ရှိသူတစ်ဦးက ပြောကြားသည်။ ဇူလိုင်လ ၁၉ ရက် မွန်းလွဲ ၁ နာရီခန့်တွင် အင်အား ၈၀ ခန့်ပါ စစ်ကြောင်းကို ပေပါမိုင်း ၄ လုံးဖြင့် ၂ ကြိမ် မိုင်းဆွဲတိုက်ခိုက်ခဲ့သည်။ တိုက်ခိုက်မှုကြောင့် စစ်ကောင်စီတပ်သား အများအပြား ဒဏ်ရာရ ရှိခဲ့သည်။ စစ်ကြောင်းသည် ရှေ့မဆက်တိုးဘဲ ရွာသာယာဘက်သို့ ဝင်ရောက်သွားခဲ့သည်။
ဤစစ်ကြောင်းသည် ငါန်းဇွန်မြို့နယ်အတွင်း ကျေးရွာများကို မီးရှို့ဖျက်ဆီးပြီး ပြည်သူပိုင် ပစ္စည်းများကို ခိုးယူဖျက်ဆီးခဲ့ကာ ပြည်သူများကို လူသားဒိုင်းအဖြစ် အသုံးပြုခဲ့ကြောင်း သိရသည်။ တိုက်ခိုက်မှုကို မြင်းခြံတိုက်နယ် ၃ နဂါးနီပြောက်ကျားတပ်ဖွဲ့က ဦးဆောင်လုပ် ဆောင်ခဲ့ပြီး ပြည်သူ့ကာကွယ်ရေးတပ်ဖွဲ့ဝင်များ အထိအခိုက်မရှိ ပြန်လည်ဆုတ်ခွာနိုင်ခဲ့ သည်။ ပြည်သူများအနေဖြင့် စစ်ကြောင်းနှင့် ဝေးရာတွင် သွားလာနေထိုင်ရန် တိုက်တွန်းထား သည်။

 

 

 

၈။ မုံရွာ-မန္တလေးလမ်းပေါ် စစ်မှုထမ်းတပ်သား သေနတ် ၃ လက်နှင့် အလင်းဝင်
ဇူလိုင် ၂၁
The Kaladan Post
စစ်ကိုင်းတိုင်း၊ မုံရွာမြို့နယ်၊ မုံရွာ-မန္တလေးကားလမ်းမပေါ်ရှိ စစ်တပ်အထိုင်စခန်းမှ စစ်မှုထမ်းတပ်သားသစ်တစ်ဦးသည် သေနတ် ၃ လက်နှင့် ခဲယမ်းများ ယူဆောင်ကာ အလင်းဝင်ရောက်ခဲ့ကြောင်း Golden Target Force (GTF) မှ တာဝန်ရှိသူတစ်ဦးက ပြောကြားသည်။ ဇူလိုင်လ ၁၇ ရက်တွင် ပုသိမ်မြို့မှ အဆိုပါ စစ်မှုထမ်းတပ်သားသည် စစ်မှုထမ်းအပတ်စဉ် ၈ မှ ချိတ်ဆက်လာခဲ့သဖြင့် GTF နှင့် မုံရွာမြို့နယ် တိုက်နယ် ၁ ပြည်သူ့လုံခြုံရေးအဖွဲ့များက သွားရောက်ခေါ်ဆောင်ခဲ့သည်။ ၎င်းသည် MA-1 သေနတ် ၃ လက်၊ ဘောက် ၂ ဘောက်နှင့် 5.56 ကျည် ၂၀ ကို ယူဆောင်လာနိုင်ခဲ့သည်။
အလင်းဝင်တပ်သား၏ မိသားစုလုံခြုံရေးအတွက် ၎င်း၏ အမည်နှင့် ပုံအား ထုတ်ဖော်မပြဘဲ ဂုဏ်ပြုဆုငွေပေးအပ်ရန် စီစဉ်နေကြောင်း သိရသည်။ ၎င်း၏ ဆန္ဒအတိုင်း နေရေးထိုင်ရေးအတွက် စီစဉ်ဆောင်ရွက်ပေးမည်ဖြစ်သည်။ ဤလုပ်ငန်းစဉ်တွင် Brave Heart Army (BHA) နှင့် နယ်မြေခံအဖွဲ့များက ပူးပေါင်းကူညီခဲ့သည်။ GTF က စစ်ကောင်စီတပ်သားများအား အလင်းဝင်ရန် ဆက်သွယ်လာနိုင်ကြောင်း နှိုးဆော်ထားသည်။

 

 

 

၉။ စစ်ကောင်စီရွေးကောက်ပွဲတွင်ပါဝင်သူများကို အရေးယူမည်ဟု တော်လှန်ရေးတပ်များ သတိပေး
ဇူလိုင် ၂၁
The Kaladan Post
မွန်ပြည်နယ်တွင် စစ်ကောင်စီ၏ ရွေးကောက်ပွဲဆိုင်ရာ လုပ်ငန်းစဉ်များတွင် ပါဝင်သူများကို အရေးယူမည်ဖြစ်ကြောင်း မွန်ပြည်နယ်အခြေစိုက် တော်လှန်ရေးတပ်ဖွဲ့ ၃ ခုက သတိပေးထားသည်။ မွန်ပြည်နယ်တော်လှန်ရေးတပ် (MSRF)၊ ရေးပြည်သူ့ကာကွယ်ရေးတပ် (YPDF) နှင့် ဒေါနတပ်ရင်း ၂ တို့က စစ်ကောင်စီလုပ်ငန်းများတွင် ပါဝင်သူများ၏ စာရင်းရရှိထားပြီး ဆက်လက်ပါဝင်ပါက လူ့အခွင့်အရေးစံနှုန်းနှင့်အညီ အရေးယူမည်ဟု ဖော်ပြသည်။ ရေးမြို့နယ်အခြေစိုက် အထူးတိုင်းနည်းဗျူဟာ ၃၃ စစ်ဆင်ရေးမှူး စောဒါးကိုက ဤသတိပေးချက်ကို ရန်ကုန်ခေတ်သစ်သတင်းဌာနသို့ ပြောကြားခဲ့သည်။ စစ်ကောင်စီက ရေးခရိုင်တွင် အီလက်ထရောနစ်မဲပေးစက်ကိုင်သင်တန်းပေးမည်ဟု သတင်းရရှိထားသည်။
တော်လှန်ရေးတပ်ဖွဲ့များသည် စစ်ကောင်စီ၏ ရွေးကောက်ပွဲလုပ်ငန်းများကို တားဆီးသွား မည်ဖြစ်ပြီး၊ Non-CDM ဝန်ထမ်းများနှင့် အုပ်ချုပ်ရေးမှူးများအား စစ်ကောင်စီအာဏာပိုင် များနှင့် သွားလာခြင်း၊ သင်တန်းတက်ခြင်းများ မပြုလုပ်ရန် တိုက်တွန်းထားသည်။ ပြည်သူ များအနေဖြင့် မတရားသောရွေးကောက်ပွဲကို ဆန့်ကျင်ရန် လူထုလှုပ်ရှားမှုများ ဆက်လက် လုပ်ဆောင်သွားမည်ဖြစ်ကြောင်း စောဒါးကိုက ဆိုသည်။ တော်လှန်ရေးအဖွဲ့များသည် စစ်ကောင်စီ၏ လှုပ်ရှားမှုများကို အနီးကပ်စောင့်ကြည့်နေပြီး သတင်းအချက်အလက်များ စုဆောင်းထားသည်။

 

၁၀။ ဆိပ်ဖြူရဲစခန်းတိုက်ခိုက်မှု စစ်သား ၃ ဦးသေဆုံး
ဇူလိုင် ၂၁
The Kaladan Post
မကွေးတိုင်း၊ ဆိပ်ဖြူမြို့နယ်၊ လက်ဆည်ရဲစခန်းကို တော်လှန်ရေးတပ်ဖွဲ့များက ဝင်ရောက်တိုက်ခိုက်ရာ စစ်ကောင်စီတပ်သား ၃ ဦး သေဆုံးပြီး ရဲဘော် ၂ ဦး ကျဆုံးခဲ့ကြောင်း စစ်ကော်မရှင် အမှတ် ၈ စစ်ကြောင်းမှ တာဝန်ရှိသူတစ်ဦးက ပြောကြားသည်။ ဇူလိုင်လ ၁၇ ရက် နံနက်ပိုင်းတွင် အမှတ် ၈ စစ်ကြောင်း ဦးဆောင်မှုဖြင့် ရဲအင်အား ၂၅ ဦးခန့် တပ်စွဲထားသော ရဲစခန်းကို ပူးပေါင်းတပ်ဖွဲ့များက စီးနင်းတိုက်ခိုက်ခဲ့သည်။ တိုက်ပွဲအတွင်း ရဲတန်းလျား ၄ ဆောင်နှင့် ဘန်ကာ ၄ ခုကို သိမ်းပိုက်နိုင်ခဲ့သော်လည်း ခဲယမ်းနည်းပါးမှုနှင့် စစ်ကူရောက်ရှိလာမှုကြောင့် ဆုတ်ခွာခဲ့ရသည်။
တိုက်ပွဲတွင် ရဲဘော်နဂါးနှင့် ရဲဘော်စိုင်းနောင် (ခ) ထွန်းခ တို့ ကျဆုံးခဲ့ပြီး Type-81 သေနတ် ၂ လက် ဆုံးရှုံးခဲ့ရသည်။ စစ်ကောင်စီဘက်မှ မျက်မြင်သေဆုံးသူ ၃ ဦးနှင့် အပြင်းအထန် ဒဏ်ရာရသူ ၁ ဦးရှိပြီး ထိခိုက်မှု ပိုများနိုင်သည်ဟု သိရသည်။ ဤတိုက်ခိုက်မှုကို ပခုက္ကူခရိုင်တပ်ရင်း-၁၉၊ ဆိပ်ဖြူဗိုလ်မထားတပ်ဖွဲ့၊ အညာမြေတပ်ပေါင်းစုနှင့် ပြည်သူ့ လွတ်မြောက်ရေးတပ်ပေါင်းစု (PLC)၊ ပြည်သူ့တော်လှန်ရေးတပ်ဦး (PRF) တို့က ပူးပေါင်း လုပ်ဆောင်ခဲ့သည်။ အမှတ် ၈ စစ်ကြောင်းက လိုအပ်ချက်များကို သင်ယူပြီး အောင်ပွဲများ ရရှိရန် ဆက်လက်ကြိုးပမ်းမည်ဟု ပြောကြားသည်။

 

 

၁၁။ စစ်မှုထမ်းဟောင်းများအတွက် အလုပ်အကိုင်ကော်မတီဖွဲ့
ဇူလိုင် ၂၁
The Kaladan Post
စစ်ကောင်စီက ကာကွယ်ရေးဝန်ကြီး ဗိုလ်ချုပ်ကြီးမောင်မောင်အေးအား စစ်မှုထမ်းဟောင်း များ အလုပ်အကိုင်ရရှိရေး ကော်မတီဥက္ကဋ္ဌအဖြစ် ခန့်အပ်လိုက်ပြီး ပုဂ္ဂလိကစီးပွားရေးလုပ်ငန်း များကို စစ်သားဟောင်းများ ဦးစားပေးခန့်ရန် ဖိအားပေးနေသည်။ ဇူလိုင်လ ၈ ရက်တွင် အမိန့်အမှတ် ၁၀၂/၂၀၂၅ ဖြင့် အဖွဲ့ဝင် ၁၈ ဦးပါ ကော်မတီကို ဖွဲ့စည်းခဲ့ကြောင်း စစ်ကောင်စီက ထုတ်ပြန်သည်။ ကော်မတီတွင် ဝန်ကြီး၊ ဒုဝန်ကြီးများ၊ စစ်ဗိုလ်ချုပ်များနှင့် UMFCCI ဥက္ကဋ္ဌတို့ ပါဝင်သည်။ ကော်မတီသည် စစ်မှုထမ်းပြီးသူများအတွက် အလုပ်အကိုင်ရရှိရေး၊ အသက်မွေးသင်တန်းများနှင့် လက်မှတ်ထုတ်ပေးရေးတို့ကို ဆောင်ရွက်မည်ဖြစ်သည်။
စစ်ကောင်စီ၏ ဖိအားပေးမှုကြောင့် ပုဂ္ဂလိကစီးပွားရေးလုပ်ငန်းများတွင် အလုပ်သမား ရှားပါးမှုနှင့် စစ်သားဟောင်းများကို ဦးစားပေးခန့်ရမည့်အခက်အခဲများ ကြုံတွေ့နေရသည်ဟု UMFCCI မှ စီးပွားရေးသမားတစ်ဦးက ပြောကြားသည်။ အမိန့်အာဏာဖြင့် စစ်သား ဟောင်းများကို ခန့်အပ်ရမည်ဆိုပါက လုပ်ငန်းများ၏ ကျွမ်းကျင်မှုနှင့် ထိရောက်မှု ထိခိုက်နိုင်ပြီး စီးပွားရေးလုပ်ငန်းများ ပျက်စီးနိုင်သည်ဟု ၎င်းက သတိပေးသည်။ စစ်ကောင်စီက လစဉ် လူငယ် ၅၀၀၀ ကို စစ်မှုထမ်းအတွက် ခေါ်ယူပြီး ၂ နှစ်တာဝန်ထမ်းရန် သတ်မှတ်ထားသည်။

 

 

၁၂။ ရန်ကုန်-မန္တလေးလမ်းအနီး စစ်ကြောင်းတိုက်ခိုက်မှု စစ်သား ၁၀ ဦးသေဆုံး
ဇူလိုင် ၂၁
The Kaladan Post
မန္တလေးတိုင်း၊ မလှိုင်မြို့နယ်၊ ရန်ကုန်-မန္တလေးအမြန်လမ်းအနီး စစ်ကြောင်းထိုးလာသော စစ်ကောင်စီတပ္ကို တော်လှန်ရေးတပ်ဖွဲ့များက တိုက်ခိုက်ခဲ့ရာ စစ်သား ၁၀ ဦးသေဆုံးပြီး သေနတ် ၃ လက်သိမ်းဆည်းရရှိခဲ့သည်။ ဇူလိုင်လ ၁၈ ရက် မွန်းလွဲ ၃:၄၅ နာရီခန့်တွင် အောင်သာ (မြောက်) နှင့် အောင်သာ (တောင်) ရွာအနီး အင်အား ၁၀၀ ခန့်ပါ စစ်ကြောင်းကို မြင်းရှင် (မြင်းသေရွာ) တွင် ကြိုတင်နေရာယူ၍ တိုက်ခိုက်ခဲ့သည်။ တိုက်ပွဲအတွင်း စစ်သား ၂၀ ဦးကျော် ဒဏ်ရာရရှိခဲ့ပြီး G-3 သေနတ် ၂ လက်၊ MA-2 သေနတ် ၁ လက်၊ G-3 ကျည်ဘောက် ၃ ဘောက်နှင့် ကျည် ၂၀၀ ကျော်ကို သိမ်းဆည်းရမိခဲ့သည်။
တိုက်ပွဲသည် ၃ နာရီခန့်ကြာမြှင့်ခဲ့ပြီး စစ်ကောင်စီဘက်မှ Mi-35 ရဟတ်ယာဉ်ဖြင့် ၁ ကြိမ်နှင့် လက်နက်ကြီးများဖြင့် အကြိမ်ကြိမ် ပစ်ခတ်တိုက်ခိုက်ခဲ့သည်။ မိတ္ထီလာခရိုင် အမှတ် ၂ တပ်ရင်း၊ မြင်းခြံခရိုင် အမှတ် ၈ တပ်ရင်းနှင့် မိတ္ထီလာခရိုင် အမှတ် ၃ တပ်ရင်းတို့က ပူးပေါင်းလုပ်ဆောင်ခဲ့သည်။ မိတ္ထီလာခရိုင် အမှတ် ၂ တပ်ရင်းမှ တာဝန်ရှိသူက ကြိုတင်သတင်းရရှိထားသဖြင့် စောင့်ဆိုင်းတိုက်ခိုက်ခဲ့ပြီး အောင်မြင်မှုရရှိခဲ့သည်ဟု ပြောကြားသည်။

 

 

၁၃။ အုတ်ဖိုတွင် ကြံ့ဖွံ့ပါတီဝင်ရန် စည်းရုံးသူ အုပ်ချုပ်ရေးမှူးနှင့်ဇနီး ပစ်ခတ်ခံရပြီး သေဆုံး
ဇူလိုင် ၂၁
The Kaladan Post
ပဲခူးတိုင်း၊ အုတ်ဖိုမြို့၊ ကွေ့ချောင်းရပ်ကွက်အုပ်ချုပ်ရေးမှူး ရဲအောင်နှင့် ဇနီး ခင်မာရီတို့သည် ကြံ့ဖွံ့ပါတီဝင်ရန် စည်းရုံးပြီး စစ်မှုထမ်းကင်းလွတ်ခွင့်ပေးမည်ဟု လှုံ့ဆော်မှုကြောင့် ပစ်ခတ်တိုက်ခိုက်ခံရပြီး သေဆုံးခဲ့ကြောင်း သာယာဝတီခရိုင် တပ်ရင်း ၃၈၀၂ တပ်ခွဲ ၄ မြေအောက်ပြောက်ကျားတပ်ဖွဲ့-အုတ်ဖိုမှ တာဝန်ရှိသူက ပြောကြားသည်။ ဇူလိုင်လ ၂၁ ရက် နံနက် ၆ နာရီခန့်တွင် ၎င်းတို့သည် ဆိုင်ကယ်ဖြင့် ရပ်ကွက်ထိပ်လမ်းသို့ ထွက်လာစဉ် ပစ်ခတ်ခံရပြီး လင်မယား ၂ ဦးစလုံး ပွဲချင်းပြီး သေဆုံးခဲ့သည်။ ရဲအောင်ထံမှ လက်ပစ်ဗုံး ၁ လုံး၊ ဖျူး ၁ ခု၊ မိုဘ18ဘိုင်းဖုန်း ၁ လုံး၊ မှတ်ပုံတင်ကတ် 2, လုံကြမ်းကတ် ၁ ခုနှင့် ငွေသား ၈၅၀၀၀ ကျပ် သိမ်းဆည်းရရှိခဲ့သည်။.
၎င်းတို့သည် စစ်မှုထမ်းကြေးကောက်ခံခြင်း၊ လူငယ်များကို ကြံ့ဖွံ့ပါတီဝင်ရန် အတင်းအဓမ္မ စည်းရုံးခြင်းနှင့် တော်လှန်ရေးအဖွဲ့များကို စုံစမ်းထောက်လှမ်းကာ စစ်တပ်ထံ သတင်းပေး နေသူများဖြစ်သည်။ သာယာဝတီခရိုင် တပ်ရင်း ၃၈၀၂ တပ်ခွဲ ၄ မြေအောက်ပြောက်ကျား တပ်ဖွဲ့က စစ်ကောင်စီ၏ တရားမဝင်ရွေးကောက်ပွဲလုပ်ငန်းများနှင့် ဆက်စပ်သူများကို ဆက်လက်တိုက်ခိုက်သွားမည်ဟု သတိပေးထားသည်။ ပြည်သူများအနေဖြင့် စစ်ကောင်စီ၏ လှုပ်ရှားမှုများနှင့် ဝေးကွာနေထိုင်ရန် တိုက်တွန်းထားသည်။

 

 

၁၄။ ပြည်သူ့အားမာန် သပိတ်စစ်ကြောင်း စစ်အာဏာရှင်ဆန့်ကျင်ရေး ချီတက်ဆန္ဒပြ
ဇူလိုင် ၂၁
The Kaladan Post
စစ်ကိုင်းတိုင်း၊ ယင်းမာပင်မြို့နယ်တွင် ပြည်သူ့အားမာန် သပိတ်စစ်ကြောင်းက ဦးဆောင်ပြီး စစ်အာဏာရှင်ဆန့်ကျင်ရေး ချီတက်ဆန္ဒပြခဲ့ကြောင်း ယနေ့ ဇူလိုင်လ ၂၁ ရက်နေ့တွင် ပြုလုပ်ခဲ့သည်။ ဆန္ဒပြပွဲသည် ယင်းမာပင်မြို့တွင်း၌ ပြည်သူများ၏ စစ်အာဏာရှင် ဆန့်ကျင်မှုကို ထောက်ခံသည့် လှုပ်ရှားမှုတစ်ရပ်ဖြစ်ပြီး စစ်ကောင်စီ၏ အာဏာသိမ်းမှုကို ဆန့်ကျင်ကြောင်း ဖော်ပြသည်။ ဆန္ဒပြသူများသည် လမ်းများပေါ်တွင် စစ်အာဏာရှင် ဆန့်ကျင်ရေး ကြွေးကြော်သံများဖြင့် ချီတက်ခဲ့ကြသည်။ ပြည်သူ့အားမာန် သပိတ်စစ်ကြောင်း သည် ယင်းမာပင်မြို့ခံများ၏ ဦးဆောင်မှုအောက်တွင် စုစည်းပြီး လှုပ်ရှားခဲ့ခြင်းဖြစ်သည်။
ဤဆန္ဒပြပွဲတွင် ပြည်သူများသည် စစ်ကောင်စီ၏ ဖိနှိပ်မှုများကို ရှုတ်ချပြီး ဒီမိုကရေစီ ပြန်လည်ထူထောင်ရေးအတွက် တောင်းဆိုခဲ့ကြသည်။ ဆန္ဒပြသူများသည် အာဏာသိမ်းမှုကို ဆန့်ကျင်သည့် ဆိုင်းဘုတ်များကိုင်ဆောင်ကာ လွတ်လပ်မှုနှင့် တရားမျှတမှုကို ပြန်လည်ရရှိရန် ကြွေးကြော်ခဲ့ကြသည်။ ယင်းမာပင်မြို့နယ်အတွင်း စစ်တပ်နှင့် ပြည်သူများအကြား တင်းမာမှုများ မြင့်တက်နေသည့်အချိန်တွင် ဤဆန္ဒပြပွဲသည် ပြည်သူများ၏ ခုခံမှုစိတ်ဓာတ်ကို ထင်ရှားစွာ ပြသခဲ့သည်။ ပြည်သူ့အားမာန် သပိတ်စစ်ကြောင်းက စစ်အာဏာရှင်စနစ်ကို ဆက်လက်ဆန့်ကျင်သွားမည်ဟု ကတိပြုထားသည်။

 

 

၁၅။ စစ်မှုထမ်း၊ ရဲနှင့် စစ်သား ၆ ဦး လက်နက်ခဲယမ်းများနှင့် အလင်းဝင်
ဇူလိုင် ၂၁
The Kaladan Post
ကချင်ပြည်နယ်၊ ကရင်နီပြည်နှင့် တနင်္သာရီတိုင်းမှ စစ်မှုထမ်း၊ ရဲနှင့် စစ်သား ၆ ဦးသည် လက်နက်ခဲယမ်းများနှင့်အတူ တော်လှန်ရေးတပ်ဖွဲ့များထံ အလင်းဝင်ရောက်လာခဲ့ကြောင်း သိရသည်။ ဇူလိုင်လ ၂၁ ရက်တွင် ကချင်ပြည်နယ်၊ ဝိုင်းမော်မြို့မရဲစခန်းမှ ရဲဒုတပ်ကြပ် ၁ ဦးသည် မုံရွာမြို့နယ် ပြည်သူ့ကာကွယ်ရေးအဖွဲ့ (ပကဖ) ထံ လက်နက်မပါဘဲ အလင်းဝင်လာခဲ့သည်။ ၎င်းအား စစ်ရာဇဝတ်မှုများနှင့် ပတ်သက်မှုမရှိသဖြင့် သူ၏ဆန္ဒအတိုင်း ဆက်လက်စောင့်ရှောက်ထားကြောင်း မုံရွာပကဖမှ တာဝန်ရှိသူက ပြောသည်။ ဇူလိုင်လ ၁၇ ရက်တွင် ကရင်နီပြည်၊ လွိုင်ကော်မြို့နယ်ရှိ အမှတ် ၃၅၆ တပ်ရင်းမှ တပ်သား စောချစ် (ခ) ချစ်စမ်းမောင်သည် AK-47 သေနတ်၊ ကျည်ဘောက် ၂ ဘောက်၊ ကျည်ဆန် ၁၇၂ တောင့်နှင့် လက်ပစ်ဗုံး ၅ လုံးဖြင့် KNDF B-14 တပ်ရင်းထံ ခိုလှုံလာခဲ့သည်။
ထို့အတူ တနင်္သာရီတိုင်း၊ ပုလောမြို့နယ်ရှိ ခလရ ၂၈၀ တပ်ရင်းမှ စစ်မှုထမ်း တပ်သားသစ် ငြိမ်းချမ်းသည် ဇူလိုင်လ ၁၂ ရက်တွင် MA-1 သေနတ်၊ ကျည်ဘောက် ၁ ခုနှင့် လက်ပစ်ဗုံး ၁ လုံးဖြင့် ပုလောပကဖထံ အလင်းဝင်လာခဲ့သည်။ ၎င်းသည် ရွှေတောင်မြို့ဇာတိဖြစ်ပြီး စစ်မှုထမ်းသင်တန်းအပတ်စဉ် ၈ မှ သင်တန်းဆင်းဖြစ်ကာ မော်လမြိုင်တွင် အလုပ်လုပ်ရန် လာစဉ် ဖမ်းဆီးခံရသူဖြစ်သည်။ ထို့ပြင် တနင်္သာရီတိုင်း၊ မြိတ်-ထားဝယ်ခရိုင်ရှိ ခလရ ၂၆၇ နှင့် ခလရ ၁၀၃ မှ စစ်သား ၃ ဦးသည် ဇူလိုင်လ ၁၉ နှင့် ၂၀ ရက်တွင် လက်နက်ခဲယမ်းများနှင့် KNU ထံ အလင်းဝင်လာခဲ့သည်။ အလင်းဝင်သူများအား ဆုငွေနှင့် လုံခြုံရေးအစီအမံများဖြင့် စောင့်ရှောက်ထားကြောင်း သိရသည်။

 

၁၆။ မြင်းခြံ-ပုဂံ-ညောင်ဦးလမ်းတွင် စစ်ကြောင်းတိုက်ခိုက်မှု စစ်သား ၁၁ ဦးသေဆုံး
ဇူလိုင် ၂၁
The Kaladan Post
မန္တလေးတိုင်း၊ မြင်းခြံ-ပုဂံ-ညောင်ဦးလမ်းပိုင်းတွင် စစ်ကောင်စီတပ်ဖွဲ့များကို တိုက်ခိုက်ခဲ့ရာ စစ်သား ၁၁ ဦးသေဆုံးပြီး ၉ ဦး ဒဏ်ရာရရှိခဲ့ကြောင်း မြင်းခြံခရိုင်အမှတ် ၃ တပ်ရင်းမှ ဗိုလ်မူတူးက ပြောကြားသည်။ ဇူလိုင်လ ၁၉ ရက်တွင် တမိုက်သာကျေးရွာမှ Alphard ကား ၂ စီးဖြင့် ထွက်လာသော စစ်ကောင်စီတပ်သားများကို မြင်းခြံခရိုင်အမှတ် ၃ တပ်ရင်းက ကင်းပုန်းဝပ်ပြီး ပစ်ခတ်တိုက်ခိုက်ခဲ့သည်။ ဤတိုက်ခိုက်မှုတွင် စစ်အရာရှိ ၁ ဦးနှင့် တပ်သား ၂ ဦးသေဆုံးပြီး ၂ ဦး ဒဏ်ရာရရှိကာ မြင်းခြံဆေးရုံသို့ ပို့ဆောင်ခံရသည်။
ဇူလိုင်လ ၂၀ ရက် နံနက် ၈ နာရီခန့်တွင် သီတာယုမွန် ဦးဆောင်သော စစ်သားနှင့် ပြည်သူ့စစ် အင်အား ၁၅၀ ခန့်ကို မြင်းခြံခရိုင်အမှတ် ၃ တပ်ရင်း လက်ရုံးဒရုန်းတပ်ဖွဲ့က ဒရုန်း ၂ စီးဖြင့် ဗုံး ၃၀ ကြဲချတိုက်ခိုက်ခဲ့သည်။ ထို့အတူ နံနက် ၁၁ နာရီခန့်တွင် မြေပြင်တိုက်ပွဲ ထပ်မံဖြစ်ပွားပြီး စစ်ကောင်စီတပ်ဖွဲ့သည် မြင်းခြံမြို့ဘက်သို့ ပြန်ဆုတ်ခွာသွားသည်။ ဒရုန်းတစ်စီးပျက်စီးခဲ့ပြီး စစ်သား ၈ ဦးသေဆုံးကာ ၇ ဦး ဒဏ်ရာရရှိခဲ့သည်။ တိုက်ခိုက်မှုတွင် တောင်သာနှင့် မလှိုင်ပကဖ ဒရုန်းတပ်ဖွဲ့များလည်း ပူးပေါင်းပါဝင်ခဲ့သည်။

 

 

 

၁၇။ မင်းလှမြို့နယ်တွင် စစ်တပ်က ပြည်သူ ၆ ဦးဖမ်းဆီးပြီး နေအိမ်များ မီးရှို့ဖျက်ဆီး
ဇူလိုင် ၂၁
The Kaladan Post
ပဲခူးတိုင်း၊ မင်းလှမြို့နယ်တွင် စစ်ကောင်စီတပ်ဖွဲ့များက ကျေးရွာများကို ဝင်ရောက်စီးနင်းပြီး ပြည်သူ ၆ ဦးကို ပေါ်တာဆွဲဖမ်းဆီးကာ နေအိမ်များကို မီးရှို့ဖျက်ဆီးခဲ့ကြောင်း ဒေသခံပြည်သူများက ပြောကြားသည်။ ဇူလိုင်လ ၁၁ ရက် နံနက် ၈ နာရီခန့်တွင် ညောင်ပင်သာရွာသို့ စစ်တပ်က ဝင်ရောက်စီးနင်း၍ ပြည်သူများကို စာသင်ကျောင်းတွင် စုရုံးခိုင်းကာ နေအိမ်များကို မွှေနှောက်ပြီး တန်ဖိုးရှိပစ္စည်းများ ခိုးယူခဲ့သည်။ ထို့ပြင် နေအိမ်တစ်လုံးကို မီးရှို့ဖျက်ဆီးခဲ့ပြီး ညောင်ပင်သာအရှေ့ရွာမှ ကိုမိုးဒီ၊ ကိုညီညီမိုးခန့်၊ ကိုဖိုးကုလားနှင့် ကိုဝင်းထွဋ်နောင်တို့ကို ဖမ်းဆီးသွားသည်။
ဇူလိုင်လ ၁၂ ရက် မွန်းလွဲ ၃ နာရီခန့်တွင် ငလှစမ်းရွာမှ စစ်ဘေးရှောင်ပြည်သူ ကိုမင်းဇော်နှင့် ကိုစန်းမင်းအောင်တို့၏ နေအိမ်များမှ ပစ္စည်းများကို ကားဖြင့် တိုက်ယူကာ ၎င်းတို့ကို ပေါ်တာဆွဲဖမ်းဆီးခဲ့သည်။ ထို့အတူ ဇူလိုင်လ ၇ ရက် မွန်းလွဲ ၁၂ နာရီခန့်တွင် စမ်းဘုတ်ရွာမှ ဒေါ်အိန္ဒြေသူနှင့် အဒေါ်ဖြစ်သူ ဒေါ်ပိန်သေးတို့ကို မင်းလှမြို့နယ် လဝကရုံးတွင် မှတ်ပုံတင်လုပ်ပြီး ထွက်လာစဉ် စစ်တပ်က ဖမ်းဆီးခဲ့သည်။ ထို့ပြင် ဒေါ်အိန္ဒြေသူ၏ မိခင် ဒေါ်မထွေးကို လက်ပံတန်းမြို့ပေါ်တွင် ထပ်မံဖမ်းဆီးခဲ့သည်။ ဒေသခံများက စစ်တပ်၏ ဖမ်းဆီးမှုများကြောင့် ပြည်သူများ ကြောက်လန့်ပြီး ဘေးလွတ်ရာသို့ ထွက်ပြေးတိမ်းရှောင် နေရသည်ဟု ပြောကြားသည်။

 

 

၁၈။ သီပေါမြို့ပေါ် စစ်တပ်က လေကြောင်းဗုံးကြဲရာ ပြည်သူများ စစ်ဘေးရှောင်ထွက်ခွာ
ဇူလိုင် ၂၁
The Kaladan Post
ရှမ်းပြည်နယ်မြောက်ပိုင်း၊ TNLA သိမ်းပိုက်ထားသည့် သီပေါမြို့ကို စစ်ကောင်စီတပ်က လေကြောင်းဖြင့် ဗုံးကြဲတိုက်ခိုက်ခဲ့ရာ ပြည်သူအများစု စစ်ဘေးရှောင်ထွက်ခွာနေကြောင်း ဒေသခံများက ပြောကြားသည်။ ဇူလိုင်လ ၂၀ ရက် ည ၁၀:၂၀ နာရီတွင် ခလရ ၂၃ တပ်ရင်းစခန်းဟောင်းသို့ တိုက်လေယာဉ်ဖြင့် ပေါင် ၂၅၀ ဗုံး ၁ လုံး ကြဲချတိုက်ခိုက်ခဲ့သည်။ ဇူလိုင်လ ၁၉ ရက်တွင်လည်း ဂျက်ဖိုက်တာဖြင့် ပေါင် ၂၅၀ ဗုံး ၃ လုံး ကြဲချခဲ့ရာ ဇာတ်စုနှင့် ရွှေကျောင်းရပ်ကွက်များတွင် ကျရောက်ပေါက်ကွဲခဲ့သည်။ ဤဗုံးကြဲမှုကြောင့် အ.မ.က ၁ ကျောင်းဆောင်များ ပျက်စီးခဲ့သည်။
စစ်ကောင်စီတပ်သည် ဇူလိုင်လ ၄ ရက်နှင့် ၁၄ ရက်တို့တွင်လည်း သီပေါမြို့ကို ဗုံးကြဲတိုက်ခိုက်ခဲ့ရာ ပြည်သူ ၂ ဦးသေဆုံးပြီး ၅ ဦး ဒဏ်ရာရရှိကာ နေအိမ် ၁၃ လုံးနှင့် အဆောက်အဦ ၆ လုံး ပျက်စီးခဲ့သည်။ လေကြောင်းတိုက်ခိုက်မှုများနှင့် စစ်တပ်၏ ထိုးစစ်ဆင်မည်ဆိုသည့် သတင်းများကြောင့် သီပေါမြို့ခံများသည် အလုံးအရင်းဖြင့် ဘေးလွတ်ရာသို့ ထွက်ခွာနေကြသည်။ ဒေသခံတစ်ဦးက အိမ်စောင့်အနည်းငယ်သာ ကျန်ရှိတော့ပြီး အများစုမှာ စစ်ဘေးရှောင်နေကြသည်ဟု ပြောကြားသည်။

 

 

၁၉။ မန္တလေးအနီး ရွာသုံးရွာ၏ စစ်စခန်းများကို PDF သိမ်းပိုက်
ဇူလိုင် ၂၁
The Kaladan Post
မန္တလေးတိုင်း၊ မတ္တရာမြို့နယ်နှင့် ပုသိမ်ကြီးမြို့နယ်အစပ်ရှိ ထန်းပင်ကုန်း၊ သရက်ကိုင်း၊ မြကန်သာရွာများရှိ စစ်ကောင်စီတပ်စခန်းများကို ပြည်သူ့ကာကွယ်ရေးတပ်မတော် (MDY-PDF) နှင့် မဟာမိတ်တပ်ဖွဲ့များက ဇူလိုင် ၂၀ ရက်တွင် အပြီးသတ်သိမ်းပိုက်ခဲ့သည်။ တိုက်ပွဲအတွင်း ဗိုလ်ကြီးတစ်ဦးအပါအဝင် စစ်သုံ့ပန်း ၁၆ ဦးကို အရှင်ဖမ်းဆီးရမိပြီး ရန်သူ့အလောင်း ၁၅ လောင်းရရှိခဲ့သည်။ ဒရုန်းဂျမ်ဘာကားတစ်စီး၊ ဒရုန်းဆက်စပ်ပစ္စည်းများ နှင့် လက်နက်ခဲယမ်း ၅၀ ကျော်ကိုလည်း သိမ်းဆည်းရမိခဲ့သည်။
စစ်ကောင်စီဘက်က လေကြောင်းဗုံးကြဲမှုများနှင့် ပစ်ကူပေးမှုများရှိသော်လည်း စခန်းများ အားလုံးကို PDF နှင့် မတ္တရာမျိုးမှန်တပ်ဖွဲ့၊ မတ္တရာမြို့နယ် ပကဖ၊ SSTF တပ်ဖွဲ့တို့က ပူးပေါင်း တိုက်ခိုက်ခဲ့သည်။ စစ်တပ်ထံမှ ထိခိုက်ဒဏ်ရာရသူများစွာရှိပြီး အလောင်းများကို ကားငါးစီး ဖြင့် မန္တလေးသို့ ပြန်လည်သယ်ယူသွားသည်ဟု ဒေသခံများကပြောသည်။ စစ်ကောင်စီက မြကန်သာရွာမှ နောက်ဆုတ်ခဲ့ရပြီး ထီးတော်မိုးစခန်းတွင် ခံစစ်ပြင်ဆင်ထားကြောင်း သိရသည်။

 

 

 

၂၀။ BGF မှ KNA အဖြစ်ပြောင်းလဲဖွဲ့စည်းရန် မြိုင်ကြီးငူတွင် ဆွေးနွေး
ဇူလိုင် ၂၁
The Kaladan Post
ကရင်နယ်ခြားစောင့်တပ် (BGF) သည် ကရင်အမျိုးသားတပ်မတော် (KNA) အဖြစ် ပြောင်းလဲဖွဲ့စည်းရန် ကရင်ပြည်နယ်၊ မြိုင်ကြီးငူအထူးဒေသတွင် ဇူလိုင်လ ၂၀ ရက်က ဆွေးနွေးပွဲတစ်ခု ကျင်းပခဲ့ကြောင်း ဒေသတွင်းသတင်းရင်းမြစ်များထံမှ သိရသည်။ “ကရင်ပြည်နယ် ငြိမ်းချမ်းရေး၊ ဒေသတည်ငြိမ်ရေးနှင့် စည်းလုံးညီညွတ်ရေး” ခေါင်းစဉ်ဖြင့် လှိုင်းဘွဲ့မြို့နယ်တွင် ပြုလုပ်ခဲ့သည့် အဆိုပါဆွေးနွေးပွဲသို့ BGF ထိပ်ပိုင်းခေါင်းဆောင်များ၊ သံဃာတော်များ၊ ကရင်ပါတီများနှင့် ဒေသခံအုပ်ချုပ်ရေးမှူးများ တက်ရောက်ခဲ့သည်။ BGF ဥက္ကဋ္ဌ ဗိုလ်ချုပ်စောထွန်းလှိုင်နှင့် ဗိုလ်ချုပ်စောချစ်သူတို့က KNA အဖြစ် ပြောင်းလဲဖွဲ့စည်းရန် အဆိုပြုဆွေးနွေးခဲ့သည်။
BGF ၏ စစ်ရေးချုပ် ဗိုလ်မှုးချုပ်စောကြာအင်းက KNA တွင် စစ်ဒေသ ၄ ခု၊ ဗျူဟာမှူး ၉ ဦးနှင့် တပ်ရင်း ၆၀ ကျော်ပါဝင်မည်ဟု ပြောကြားခဲ့သည်။ BGF ၏ တပ်အင်အား ယခင်ထောင်ဂဏန်းမှ သောင်းဂဏန်းအထိ တိုးလာပြီး ရွှေကုက္ကိုလ်နှင့် လှိုင်းဘွဲဒေသများတွင် KNA တံဆိပ်ကို စတင်အသုံးပြုနေပြီဖြစ်သည်။ ၂၀၂၄ နှစ်ဆန်းပိုင်းကတည်းက BGF သည် စစ်တပ်ထောက်ပံ့မှုများကို ဖြတ်တောက်ပြီး သီးခြားရပ်တည်ရန် စီစဉ်ထားပြီး ကရင်လူမျိုးအချင်းချင်း မတိုက်ခိုက်တော့ဘဲ နယ်မြေကာကွယ်ရေးကို ဦးစားပေးမည်ဟု ဗိုလ်ချုပ်စောချစ်သူက ပြောကြားခဲ့သည်။