ဇူလိုင် (၂၄) သတင်းတိုပေါင်းချုပ်

၁။ စစ်သင်္ဘောများ ပစ်ခတ်မှုကြောင့် မောင်းကုန်းကျေးရွာ နေအိမ်များ မီးလောင်
ဇူလိုင် ၂၄
The Kaladan Post
စစ်ကိုင်းတိုင်း၊ ထီးချိုင့်မြို့နယ်၊ မောင်းကုန်းကျေးရွာတွင် ဧရာဝတီမြစ်ကြောင်းအတိုင်း ဆန်တက်လာသော အကြမ်းဖက်စစ်ကောင်စီ၏ စစ်သင်္ဘောများက လက်နက်ကြီးများဖြင့် ပစ်ခတ်မှုကြောင့် နေအိမ်အချို့ မီးလောင်ပျက်စီးခဲ့ကြောင်း Tigyaing Revolution -TR အဖွဲ့မှ တာဝန်ရှိသူက ပြောကြားသည်။ ဇူလိုင် ၂၄ ရက် နံနက် ၉ နာရီ ၇ မိနစ်ခန့်တွင် စစ်သင်္ဘောများ က ပစ်ခတ်ခဲ့ပြီး အနီးရှိ ဆီဆိုင်တစ်ခုကိုလည်း ဒရုန်းဖြင့် မီးလောင်ဗုံးများ ကြဲချခဲ့သည်။ ပြည်သူထိခိုက်မှုအခြေအနေမှာ ရှုပ်ထွေးနေဆဲဖြစ်ကာ အတိအကျအချက်အလက်များ မသိရသေးဟု ၎င်းက ဆိုသည်။
ဗန်းမော်ခရိုင် ပြည်သူ့ကာကွယ်ရေးတပ်ဖွဲ့က ဧရာဝတီမြစ်ကမ်းဘေးရှိ ပြည်သူများအား သတိထားရန်နှင့် အရေးပေါ်ပြောင်းရွှေ့ကြရန် သတိပေးထုတ်ပြန်ထားသည်။ စစ်သင်္ဘောများ ဆန်တက်လာသည်နှင့်အမျှ လေကြောင်း၊ ရေကြောင်းတိုက်ခိုက်မှုများနှင့် တိုက်ပွဲများ ဖြစ်ပွားနိုင်သဖြင့် မြစ်ကမ်းနံဘေးတစ်ကြော သွားလာခြင်း၊ ပွဲလမ်းသဘင်များ ပြုလုပ်ခြင်းနှင့် လူစုလူဝေးသို့ သွားရောက်ခြင်းတို့ မပြုလုပ်ရန် တိုက်တွန်းထားသည်။ ပြည်သူများအနေဖြင့် စစ်သင်္ဘောများ ကင်းစင်ပြီးမှသာ နေရပ်သို့ သွားလာနေထိုင်ရန်နှင့် စစ်ရေးသတိထားရန် ထုတ်ပြန်ချက်တွင် ဖော်ပြထားသည်။

 

 

 

 

 

၂။ သီပေါမြို့သို့ စစ်တပ်ထိုးစစ်ဆင်မည်ဆိုသော ကောလာဟလကြောင့် ပြည်သူများ ထွက်ပြေးတိမ်းရှောင်
ဇူလိုင် ၂၄
The Kaladan Post
ရှမ်းပြည်နယ်မြောက်ပိုင်း၊ သီပေါမြို့သို့ စစ်ကောင်စီတပ်က ဝင်ရောက်တိုက်ခိုက်တော့မည်ဟု ကောလာဟလများ လူမှုကွန်ရက်နှင့် ပါးစပ်သတင်းများမှတစ်ဆင့် ဆက်တိုက်ပျံ့နှံ့နေသဖြင့် ပြည်သူအများစု မြို့မှ ထွက်ပြေးတိမ်းရှောင်နေကြောင်း သီပေါမြို့ခံများက ပြောဆိုသည်။ ဇူလိုင်လ ၁၅ ရက်တွင် စစ်တပ်က နောင်ချိုမြို့ကို ပြန်လည်သိမ်းပိုက်ပြီးနောက် သီပေါမြို့ကို ၃ ရက်အတွင်း ထိုးစစ်ဆင်မည်ဟု သတင်းများ ထွက်ပေါ်နေသည်။ စစ်တပ်၏ လေကြောင်း တိုက်ခိုက်မှုများကြောင့်လည်း မြို့ခံအများစု စစ်ဘေးရှောင်ရန် နေအိမ်များတွင် အစောင့်သာ ချန်ထားပြီး ထွက်ခွာနေကြသည်။
ဇူလိုင်လ ၂၃ ရက် နံနက် ၀၀ နာရီ ၅ မိနစ်တွင် စစ်တပ်က သီပေါမြို့ရှိ ခလရ ၂၃ တပ်ရင်းဟောင်းကို ဂျက်ဖိုက်တာဖြင့် ပေါင် ၅၀၀ ဗုံး ကြဲချတိုက်ခိုက်ခဲ့ကြောင်း TNLA က ထုတ်ပြန်သည်။ ထို့ပြင် ဇူလိုင်လ ၄၊ ၁၄၊ ၁၉ နှင့် ၂၀ ရက်များတွင်လည်း ဗုံးကြဲတိုက်ခိုက်မှုများ ပြုလုပ်ခဲ့ရာ ပြည်သူ ၂ ဦး သေဆုံးပြီး ၅ ဦး ဒဏ်ရာရရှိကာ နေအိမ် ၁၃ လုံး၊ အဆောက်အဦ ၆ လုံးနှင့် ကျောင်းဆောင်များ ပျက်စီးခဲ့သည်။ ပြည်သူများအနေဖြင့် စစ်တပ်၏ လေကြောင်းနှင့် လက်နက်ကြီးတိုက်ခိုက်မှုများကို ရှောင်ရှားရန် မန္တလေးမြို့အပါအဝင် နေရာအမျိုးမျိုးသို့ ထွက်ပြေးတိမ်းရှောင်နေကြရသည်။

 

 

 

 

၃။ စစ်ကောင်စီ၏ တော်လှန်ရေးတပ်များ သွေးကွဲစေရန် အရေးပေါ်ညွှန်ကြားချက်ထုတ်ပြန်
ဇူလိုင် ၂၄
The Kaladan Post
စစ်ကောင်စီက တော်လှန်ရေးတပ်ဖွဲ့များအကြား ယုံကြည်မှုနှင့် နားလည်မှု ကွဲပြားစေရန်၊ PDF များ အစုလိုက်အပြုံလိုက် အလင်းဝင်လာရေးအတွက် အခွင့်အရေးပေးခြင်းနှင့် လက်နက်ကိုင်စိတ်ဓာတ် ပျက်ပြားစေရန် စည်းရုံးသိမ်းသွင်းရေး အရေးပေါ်ညွှန်ကြားချက် တစ်ရပ် ထုတ်ပြန်လိုက်ကြောင်း သိရသည်။ ဇူလိုင်လ ၁၅ ရက် နံနက် ၁၁ နာရီတွင် နေပြည်တော်စစ်ရုံးတွင် ကျင်းပသော စစ်ဘက်ဆိုင်ရာ အစည်းအဝေးတွင် ဤညွှန်ကြားချက် ကို ဆွေးနွေးခဲ့သည်။ စစ်တပ်က မြို့အချို့ကို ပြန်လည်သိမ်းယူပြီးနောက် တော်လှန်ရေး တပ်များအကြား သွေးကွဲစေရန် နယ်မြေခံတပ်များက လုပ်ဆောင်ရမည်ဟု ညွှန်ကြားထား သည်။
ညွှန်ကြားချက်တွင် တော်လှန်ရေးအဖွဲ့များ၏ ခေါင်းဆောင်များကို စည်းရုံးသိမ်းသွင်းရန်နှင့် ၎င်းတို့၏ အားနည်းချက်နှင့် ပြဿနာများကို စုံစမ်းဖော်ထုတ်ကာ အသုံးချရန် ဖော်ပြထား သည်။ ရှေ့တန်းစစ်မြေပြင်နှင့် စစ်ဆင်ရေးနယ်မြေများတွင် တာဝန်ယူထားသော စစ်တပ် ခေါင်းဆောင်ငယ်များက ဤလုပ်ငန်းများကို ဆောင်ရွက်ရမည်ဖြစ်သည်။ ထို့ပြင် တော်လှန်ရေးအဖွဲ့များအကြား ပြဿနာများကို လူမှုကွန်ရက်မှတစ်ဆင့် လျင်မြန်စွာ ဖြန့်ဝေခြင်းဖြင့် သွေးကွဲစေရန် စစ်တပ်၏ ပြည်သူ့ဆက်ဆံရေးနှင့် စိတ်ဓာတ်စစ်ဆင်ရေးဌာန များက တင်ပြရန် ညွှန်ကြားထားသည်။

 

 

 

 

၄။ အုတ်ဖိုမြို့နယ် ကြို့ကိုးပင်ရွာ စစ်ကောင်စီတပ်ပျက်၍ ထွက်ပြေး
ဇူလိုင် ၂၄
The Kaladan Post
ပဲခူးတိုင်း၊ အုတ်ဖိုမြို့နယ်၊ ကြို့ကိုးပင်ရွာတွင် စစ်ကောင်စီတပ်သားများ တပ်စွဲထားရာကို တော်လှန်ရေးတပ်ဖွဲ့များက ဇူလိုင်လ ၂၃ ရက် မွန်းလွဲ ၃ နာရီခန့်တွင် ဝင်ရောက်စီးနင်း တိုက်ခိုက်ခဲ့ရာ စစ်သားများ တပ်ပျက်၍ ထွက်ပြေးသွားခဲ့ကြောင်း သာယာဝတီခရိုင် စစ်ရေးတာဝန်ခံ ရဲဘော်သစ္စာက ပြောသည်။ တိုက်ခိုက်မှုအတွင်း စစ်ကောင်စီတပ်သားများ ထိခိုက်သေဆုံးမှုရှိသော်လည်း အရေအတွက်ကို အတည်မပြုနိုင်သေးကြောင်း သိရသည်။ ဤတိုက်ခိုက်မှုသည် ကြို့ကိုးပင်ရွာကို တတိယအကြိမ်ထပ်မံတိုက်ခိုက်ခြင်းဖြစ်သည်။
အဆိုပါစီးနင်းတိုက်ခိုက်မှုကို သာယာဝတီခရိုင် ပြည်သူ့ကာကွယ်ရေးတပ်ဖွဲ့ တပ်ခွဲ ၁ ရွှေတန်းမြေ၊ တပ်ခွဲ ၃ မိုးညိုနှင့် ဇီးကုန်ပြည်သူ့ကာကွယ်ရေးအဖွဲ့တို့က ပူးပေါင်းဆောင်ရွက် ခဲ့သည်။ တိုက်ခိုက်မှုအတွင်း လက်နက်ခဲယမ်းအချို့နှင့် စစ်သားများ၏ အသုံးအဆောင် ပစ္စည်းများကို သိမ်းဆည်းရမိခဲ့ကြောင်း ရဲဘော်သစ္စာက ပြောသည်။ ထို့ပြင် ယနေ့နံနက် ပိုင်းတွင် ကြို့ကိုးပင်ရွာကို မီးရှို့နေသော စစ်ကောင်စီတပ်သားများကို ဒုတိယအကြိမ်ထပ်မံ တိုက်ခိုက်ရာ စစ်သား ၂၀ ဦးထက်မနည်း သေဆုံးခဲ့ကြောင်း သိရသည်။

 

 

 

 

 

 

၅။ လောင်းလုံးနှင့် ဘီးလင်းတွင် စစ်တပ်လက်နက်ကြီးပစ်ခတ်မှုကြောင့် ပြည်သူ ၃ ဦးသေဆုံး
ဇူလိုင် ၂၄
The Kaladan Post
တနင်္သာရီတိုင်း၊ လောင်းလုံးမြို့နယ်၊ မောင်းမကန်ရွာကို စစ်ကောင်စီတပ်က လက်နက်ကြီး ဖြင့် ပစ်ခတ်တိုက်ခိုက်မှုကြောင့် ကလေးငယ် ၁ ဦးအပါအဝင် ပြည်သူ ၂ ဦး သေဆုံးပြီး ၄ ဦး ဒဏ်ရာရရှိခဲ့ကြောင်း ဒေသတွင်းသတင်းရင်းမြစ်က ပြောသည်။ ဇူလိုင်လ ၂၃ ရက်တွင် မောင်းမကန်ရဲစခန်းမှ စစ်ကောင်စီတပ်သားများက ရွာအတွင်းသို့ လက်နက်ကြီးဖြင့် ပစ်ခတ်ခဲ့ ခြင်းဖြစ်သည်။ ဒေသခံတစ်ဦးက “မောင်းမကန်ရဲစခန်းကနေ လက်နက်ကြီးနဲ့ ရွာထဲကို ပစ်လို့ ကလေးတစ်ဦးအပါအဝင် ၂ ဦး သေဆုံးပြီး ၄ ဦး ဒဏ်ရာရတယ်” ဟု ပြောသည်။
အလားတူ မွန်ပြည်နယ်၊ ဘီးလင်းမြို့နယ်၊ အလူးအရှေ့ရွာတွင် စစ်ကောင်စီတပ်၏ လက်နက် ကြီးပစ်ခတ်မှုကြောင့် အသက် ၂၀ အရွယ် မနိုနို ဝမ်းဗိုက်တွင် ကျည်စထိမှန်ကာ သေဆုံးပြီး ၁ ဦး ဒဏ်ရာရရှိခဲ့ကြောင်း ဒေသခံများက ပြောသည်။ ဇူလိုင်လ ၂၃ ရက် မွန်းလွဲ ၁၂ နာရီခန့်တွင် အလူးအထပ်သား စက်ရုံရှေ့တွင် စစ်ကောင်စီနှင့် တော်လှန်ရေးတပ်ဖွဲ့များ ထိတွေ့တိုက်ပွဲဖြစ် ပွားပြီးနောက် စစ်တပ်က ရွာထဲသို့ လက်နက်ကြီးဖြင့် ပစ်ခတ်ခဲ့ခြင်းဖြစ်သည်။ ဒေသခံတစ် ဦးက “လက်နက်ကြီးကျလို့ မနိုနို ဝမ်းဗိုက်ထိမှန်သေဆုံးပြီး ဒဏ်ရာရသူတစ်ဦးလည်း ရှိတယ်” ဟု ပြောသည်။

 

 

 

 

 

၆။ ရွှေဘိုတွင် စစ်အာဏာရှင်ဆန့်ကျင်ရေး သပိတ်ချီတက်
ဇူလိုင် ၂၄
The Kaladan Post
စစ်ကိုင်းတိုင်း၊ ရွှေဘိုမြို့နယ်တွင် ဇူလိုင်လ ၂၃ ရက်က ကိုဖြိုးဇေယျာသော်၊ ကိုကျော်မင်းယု (ခ) ကိုဂျင်မီ၊ ကိုအောင်သူရဇော်၊ ကိုလှမျိုးအောင်တို့ စစ်ကောင်စီ၏ မတရားကြိုးပေး သတ်ဖြတ်ခြင်း ၃ နှစ်ပြည့်အထိမ်းအမှတ်နှင့် မဝတ်ရည်အောင် ထောင်တွင်းနှိပ်ဆက်ခံရ၍ ကျဆုံးခြင်းအတွက် စစ်အာဏာရှင်ဆန့်ကျင်ရေး သပိတ်စစ်ကြောင်း ချီတက်ခဲ့ကြောင်း သိရ သည်။ သပိတ်တွင် “ငါတို့မြေကြီးဖြစ်ခဲ့ရင်တောင် ကျန်ခဲ့တဲ့ငါတို့မျိုးဆက် ရွှေထီးဆောင်းရ စေမယ်” ဘန်နာစာတန်းကို ကိုင်ဆွဲခဲ့သည်။
သပိတ်စစ်ကြောင်းကို ရွှေဘိုမြို့နယ်သပိတ်အင်အားစုနှင့် ၅/အရတ အရာတော်လူထု သပိတ်တို့က စုပေါင်းလုပ်ဆောင်ခဲ့ခြင်းဖြစ်သည်။ “နိုင်တဲ့သူတရားကြေးဆိုပြီး ကျည်ဆံတွေနဲ့ သမိုင်းရေးချင်ကြသလား” စသည့် ကြွေးကြော်သံများဖြင့် ချီတက်ခဲ့ကြသည်။ ဤသပိတ်သည် စစ်ကောင်စီ၏ ဖိနှိပ်မှုများကို ဆန့်ကျင်ပြီး အာဇာနည်များကို ဂုဏ်ပြုသည့် လှုပ်ရှားမှု တစ်ခုဖြစ်ကြောင်း ဒေသခံများက ပြောသည်။

 

 

 

 

 

 

၇။ ကမ္မမြို့ပေါ်တွင် စစ်ကောင်စီတပ်သားများကို တိုက်ခိုက်ရာ ၁ ဦးသေဆုံး
ဇူလိုင် ၂၄
The Kaladan Post
မကွေးတိုင်း၊ ကမ္မမြို့ပေါ်တွင် ထမင်းထုတ်ပို့လာသော စစ်ကောင်စီတပ်သားများကို တော်လှန်ရေးတပ်ဖွဲ့များက ဇူလိုင်လ ၁၉ ရက် ညနေ ၄ နာရီခန့်တွင် ပစ်ခတ်တိုက်ခိုက်ခဲ့ရာ စစ်သား ၁ ဦး သေဆုံးပြီး ၃ ဦး ဒဏ်ရာရရှိခဲ့ကြောင်း RED GIANT အဖွဲ့မှ ဒေါင်းနီက ပြောသည်။ တိုက်ခိုက်မှုအတွင်း တော်လှန်ရေးရဲဘော်များ အထိအခိုက်မရှိ ပြန်လည်ဆုတ်ခွာနိုင်ခဲ့သည်။ ဒေါင်းနီက “စစ်ကောင်စီဘက်က ကင်းပုန်းဝပ်နေတာ ဒရုန်းဖြင့်မြင်လို့ သွားပစ်ခဲ့တာ” ဟု ဆိုသည်။
ဤတိုက်ခိုက်မှုကို RED GIANT၊ YGF လူငယ်ပျောက်ကျားတပ်ဖွဲ့၊ အလင်းတန်းပျောက်ကျား တပ်ဖွဲ့ (မြိုင်)၊ PI PDF နှင့် Tiger Warrior Force (TWF) တို့က ပူးပေါင်းဆောင်ရွက်ခဲ့သည်။ စစ်ကောင်စီတပ်သားများမှာ ၁၀ ဦးခန့်ရှိပြီး ထမင်းထုတ်ပို့ရန် လာရောက်ချိန်တွင် တိုက်ခိုက် ခံရခြင်းဖြစ်သည်။ ဤလှုပ်ရှားမှုသည် စစ်ကောင်စီ၏ လှုပ်ရှားမှုများကို ထိရောက်စွာ တုံ့ပြန် နိုင်ခဲ့ကြောင်း ဒေသခံသတင်းရင်းမြစ်များက ပြောသည်။

 

 

 

 

 

 

၈။ မြစ်ခြေမြို့တွင် စစ်တပ်ကို တိုက်ခိုက်ရာ စစ်သား ၁၅ ဦးထက်မနည်း သေဆုံး
ဇူလိုင် ၂၄
The Kaladan Post
မကွေးတိုင်း၊ ပခုက္ကူမြို့နယ်၊ မြစ်ခြေမြို့တွင် ပြည်သူ ၃ ဦးကို သတ်ဖြတ်ပြီး နေအိမ် ၂၀၀ ခန့် မီးရှို့ဖျက်ဆီးခဲ့သည့် စစ်ကောင်စီတပ်ကို တော်လှန်ရေးတပ်ဖွဲ့များက လိုက်လံတိုက်ခိုက်ရာ စစ်သား ၁၅ ဦးထက်မနည်း သေဆုံးခဲ့ကြောင်း ပခုက္ကူခရိုင် ပကဖ တပ်ခွဲ ၅ ဧရာဒေါင်းတပ်ဖွဲ့မှ ကိုရှိန်းက ပြောသည်။ ဇူလိုင်လ ၁၄ ရက် နံနက် ၉ နာရီခန့်တွင် စစ်ကား ၅ စီးနှင့် စက်လှေ ၅ စီးဖြင့် ရောက်ရှိလာသော စစ်ကောင်စီတပ်က ညောင်ပင်နှင့် နံဂါတ်ကျေးရွာများကို လက်နက်ကြီးဖြင့် ပစ်ခတ်ပြီး မီးရှို့ခဲ့သည်။
တိုက်ခိုက်မှုကို ဧရာဒေါင်းတပ်ဖွဲ့အပါအဝင် ပခုက္ကူခရိုင် ပကဖ တပ်ရင်း ၈၊ ၁၃၊ BLY ပေါက်၊ Red Giant ဗိုလ်အောင်ကျော်၊ အလင်းတန်း၊ YGF၊ Tiger Warrior Force နှင့် King Fighter တပ်ဖွဲ့တို့က ပူးပေါင်းဆောင်ရွက်ခဲ့သည်။ ဇူလိုင်လ ၁၄ ရက် ညနေ ၆ နာရီခန့်တွင် အလစ်အငိုက်တိုက်ခိုက်မှုအတွင်း ၄၅ မိနစ်ခန့် ပစ်ခတ်ခဲ့ရာ စစ်သား ၁၄ ဦးခန့် ဒဏ်ရာအပြင်းအထန်ရရှိခဲ့သည်။ ကိုရှိန်းက “အလောင်းတွေနဲ့ ဒဏ်ရာရသူတွေကို စက်လှေနဲ့ ညောင်ဦးနှင့် မိတ္တီလာဘက်သို့ သယ်သွားတယ်” ဟု ပြောသည်။ ပကဖတပ်ဖွဲ့ဝင် ၁ ဦး မစိုးရိမ်ရဒဏ်ရာရရှိခဲ့သည်။

 

 

 

 

 

၉။ ရေကြည်မြို့နယ်တွင် ဈေးသည် ၆ ဦးဖမ်းဆီးခံရပြီး နေအိမ်များ မီးရှို့ဖျက်ဆီးခံရ
ဇူလိုင် ၂၄
The Kaladan Post
ဧရာဝတီတိုင်း၊ ရေကြည်မြို့နယ်၊ ကျောက်ခဲချောင်း ကားလမ်းခွဲတွင် လမ်းဘေးဈေးသည် များကို စစ်ကောင်စီတပ်က လိုက်လံဖမ်းဆီးရာ ပြည်သူ ၆ ဦး ဖမ်းဆီးခံရပြီး ထွက်ပြေးသူ များ၏ နေအိမ်များကို မီးရှို့ဖျက်ဆီးနေကြောင်း ဒေသတွင်းသတင်းရင်းမြစ်က ပြောသည်။ ဇူလိုင်လ ၂၁ ရက်တွင် ဈေးသည်များကို ဖမ်းဆီးခဲ့ရာ အမျိုးသား ၄ ဦး ထွက်ပြေးလွတ်မြောက် ပြီး အမျိုးသမီး ၄ ဦးကို ငါးသိုင်းချောင်းရဲစခန်းသို့ ခေါ်ဆောင်သွားသည်။
ဇူလိုင်လ ၂၂ ရက် ညပိုင်းတွင် အလယ်ကျွန်းရွာမှ ဈေးသည် ကိုဝင်းအောင်၏ နေအိမ်ကို စစ်သားနှင့် ရဲများက မီးရှို့ဖျက်ဆီးပြီး ကျေးရွာနေ ပြည်သူ ၂ ဦးကို ထပ်မံဖမ်းဆီးသွားသည်။ သာပေါင်းမြို့နယ်ရှိ ဘုရားကုန်းနှင့် ကမ်းနီရဲစခန်းများမှ ရဲများက ထွက်ပြေးသူများ၏ နေအိမ်များကို ဝင်ရောက်ရှာဖွေခဲ့သည်။ ဒေသခံတစ်ဦးက “စစ်သားတွေ ဘာသတင်းတွေရပြီး လုပ်နေသလဲ အသေးစိတ်မသိရသေးဘူး” ဟု ပြောသည်။

 

 

 

 

 

 

 

၁၀။ စစ်တပ်လေယာဉ်ဖြင့် ဗုံးကြဲတိုက်ခိုက်ရာ နေအိမ်များပျက်စီး
ဇူလိုင် ၂၄
The Kaladan Post
စစ်ကိုင်းတိုင်း၊ ယင်းမာပင်မြို့နယ်၊ ထန်းတောတိုက်ရွာကို တိုက်ပွဲဖြစ်ပွားခြင်းမရှိဘဲ စစ်ကောင်စီတပ်က လေယာဉ်ဖြင့် ဗုံးကြဲတိုက်ခိုက်ခဲ့ရာ နေအိမ်များ ပျက်စီးခဲ့ကြောင်း ဒေသခံများက ပြောသည်။ ဇူလိုင်လ ၂၃ ရက် နံနက် ၁၁ နာရီ ၃၀ မိနစ်ခန့်တွင် တံတားဦးလေတပ်မှ ဂျက်ဖိုက်တာ ၁ စီးက ပေါင် ၅၀၀ နှင့် ပေါင် ၃၀၀ ဗုံးသီးများ ကြဲချခဲ့သည်။ ဒေသခံတစ်ဦးက “အကြောင်းမဲ့ ဗုံးကြဲတာကြောင့် နေအိမ်တွေ ထိခိုက်ပျက်စီးသွားတယ်” ဟု ဆိုသည်။
တိုက်ခိုက်မှုကြောင့် ပြည်သူပိုင်နေအိမ်များ ပျက်စီးခဲ့သော်လည်း ပြည်သူများ ထိခိုက်မှုမရှိခဲ့ဘဲ နွား ၁ ကောင် သေဆုံးခဲ့သည်။ ဒေသခံများမှာ တောထဲတွင် တောင်ယာလုပ်နေချိန်ဖြစ်သဖြင့် လွတ်မြောက်ခဲ့ကြသည်။ ဤတိုက်ခိုက်မှုသည် စစ်ကောင်စီ၏ အကြောင်းမဲ့ တိုက်ခိုက်မှု တစ်ခုဖြစ်ကြောင်း ဒေသခံများက ပြောသည်။

 

 

 

 

 

 

 

၁၁။ မုံရွာရေဦးဆန်ဆိုင်ဂိတ်တိုက်ခိုက်မှု စစ်အရာရှိ ၂ ဦးအပါအဝင် ၄ ဦးသေဆုံး
ဇူလိုင် ၂၄
The Kaladan Post
စစ်ကိုင်းတိုင်း၊ မုံရွာမြို့ပေါ်ရှိ ရေဦးဆန်ဆိုင်ဂိတ်ကို တော်လှန်ရေးတပ်ဖွဲ့များက ဝင်ရောက်တိုက်ခိုက်ရာ စစ်ဗိုလ် ၁ ဦး၊ ရဲအရာရှိ ၁ ဦးနှင့် စစ်သား ၂ ဦး သေဆုံးပြီး ၁ ဦး ပြင်းထန်ဒဏ်ရာရရှိခဲ့ကြောင်း Gue Gue PSF စစ်ကြောင်းမှ ဂူးဂူးက ပြောသည်။ ဇူလိုင်လ ၂၂ ရက် မွန်းလွဲ ၃ နာရီခန့်တွင် ဂိတ်ရှေ့တွင် ဖုန်းသုံးနေသည့် အရာရှိများနှင့် ဆက်ကြေး ကောက်နေသည့် စစ်သားများကို အနီးကပ်ပစ်ခတ်ခဲ့သည်။ ဂူးဂူးက “၇၉ မမ ဗုံးသီးထိမှန်သူ ၁ ဦး အပြင်းအထန်ဒဏ်ရာရတယ်” ဟု ဆိုသည်။
တိုက်ခိုက်မှုကို Gue Gue PSF၊ GUARDIAN FORCES၊ မုံရွာမြို့နယ် ပ.လ.ဖ တိုက်နယ်(၄)၊ Sagaing PDF စစ်ကြောင်း (၂)၊ Democratic Guerrilla Force (DGF) နှင့် ၅/ဖိုက်တာ အဖွဲ့တို့က ပူးပေါင်းဆောင်ရွက်ခဲ့သည်။ ပြည်သူပိုင်ကားများ ရှုပ်ထွေးနေသဖြင့် ဂိတ်အနီးတွင် မလိုအပ်ဘဲ သွားလာခြင်းမပြုရန် ဂူးဂူးက သတိပေးသည်။ အိမ်စီးကားများမှာ မှန်ချပြီး မောင်းနှင်ရန်နှင့် ညဘက် မလိုအပ်ဘဲ အပြင်မထွက်ရန် ၎င်းက တိုက်တွန်းသည်။

 

 

 

 

 

 

၁၂၊ မန္တလေးရွှေနန်းသုခရွှေဆိုင် ဓားပြတိုက်ခံရပြီး ပစ်ခတ်မှုဖြစ်ပွား
ဇူလိုင် ၂၄
The Kaladan Post
မန္တလေးတိုင်း၊ မဟာအောင်မြေမြို့နယ်၊ ၃၉ လမ်း၊ ၈၅ နှင့် ၈၆ လမ်းကြားရှိ ရွှေနန်းသုခရွှေဆိုင်ကို လက်နက်ကိုင်ဓားပြများက ဇူလိုင်လ ၂၄ ရက် ညနေ ၄ နာရီခန့်တွင် ဝင်ရောက်တိုက်ခဲ့ရာ စစ်ကောင်စီတပ်သားများနှင့် အပြန်အလှန်ပစ်ခတ်မှု ဖြစ်ပွားခဲ့ကြောင်း Voice Of Mandalay (Vomdy) မှ တာဝန်ရှိသူက ပြောသည်။ ပစ်ခတ်မှုအတွင်း အမျိုးသား ၂ ဦး ထိခိုက်ဒဏ်ရာရရှိပြီး လူနာတင်ကားများ ရောက်ရှိလာခဲ့သည်။
ဓားပြများကို ဖမ်းမိခြင်းရှိမရှိ အတည်မပြုနိုင်သေးကြောင်း ဒေသခံများက ဆိုသည်။ သေနတ်သံ ၁၀ ချက်ခန့် ကြားရပြီး စစ်ကောင်စီတပ်သားများက နေရာကို ထပ်မံရောက်ရှိလာ ကာ လမ်းများကို ပိတ်ဆို့စစ်ဆေးနေသည်။ မန္တလေးအခြေစိုက် မဏီစလ လူမှုကူညီရေး အသင်းက ပစ်ခတ်မှုကြောင့် အမျိုးသား ၂ ဦး ထိခိုက်ခဲ့ကြောင်း ဓာတ်ပုံများနှင့်တကွ အတည်ပြုထုတ်ပြန်ထားသည်။

 

 

 

 

 

 

 

၁၃။ မွန်ပြည်နယ်တွင် လေဆင်နှာမောင်းကြောင့် နေအိမ် ၁၀၀ ကျော်ပျက်စီး
ဇူလိုင် ၂၄
The Kaladan Post
မွန်ပြည်နယ်၊ ကျိုက်ထို၊ သထုံ၊ သံဖြူဇရပ်နှင့် ပေါင်မြို့နယ်များတွင် ဇူလိုင်လ ၂၄ ရက် နံနက် ၇ မှ ၈ နာရီအတွင်း လေဆင်နှာမောင်းနှင့် လေပြင်းတိုက်ခတ်မှုကြောင့် နေအိမ် ၁၀၀ ကျော် ပျက်စီးခဲ့ကြောင်း ဒေသခံများက People’s Spring သို့ ပြောသည်။ ပေါင်မြို့နယ်ရှိ ပေါင်းရပ်ကွက်နှင့် မိုးနိုင်းရပ်ကွက်၊ သထုံမြို့နယ် နောင်ကုလားအလယ်ရွာ၊ ကျိုက်ထိုမြို့နယ် မလော့ချောင်ရွာနှင့် သံဖြူဇရပ်မြို့နယ် ဝယ်ကဝါးရွာတို့တွင် ပျက်စီးမှု ဖြစ်ပွားခဲ့သည်။ ဒေသခံတစ်ဦးက “သစ်ပင်ကြီးတွေ ပြတ်ထွက်ပြီး အိမ်ခေါင်မိုးတွေ လန်သွားတယ်” ဟု ဆိုသည်။
တောင်စောင်းနှင့် အဝေးပြေးလမ်းတလျှောက် သစ်ပင်များ၊ လျှပ်စစ်တိုင်များနှင့် ဆက်သွယ်ရေးတိုင်များ လဲကျခဲ့ကြောင်း ဒေသတွင်းလူမှုကူညီရေးအဖွဲ့များက ထုတ်ပြန်သည်။ ရန်ကုန်မြို့၊ ဗိုလ်တထောင်မြို့နယ်တွင်လည်း လေဆင်နှာမောင်းကြောင့် ကွန်တိန်နာယာဉ်များ တိမ်းမှောက်ပျက်စီးခဲ့သည်။ မိုးလေဝသစောင့်ကြည့်သူ ဥာဏ်ရက်ချမ်းက “မိုင် ၄၀ လောက်နဲ့ တိုက်မယ်ဆိုတာ ဇူလိုင် ၁၈ ရက်ကတည်းက သတိပေးထားတယ်” ဟု ပြောသည်။ NUG ၏ MOHADM က မိုးကြီးနိုင်မှုနှင့် သဘာဝဘေးအန္တရာယ်များကို သတိပြုရန် ထုတ်ပြန်ထားသည်။

 

 

 

 

 

၁၄။ ရွှေဘိုမြို့နယ်တွင် သပိတ်အင်အားစုက ရွေ့လျားစာကြည့်တိုက် ပြုလုပ်
ဇူလိုင် ၂၄
The Kaladan Post
စစ်ကိုင်းတိုင်း၊ ရွှေဘိုမြို့နယ်တွင် သပိတ်အင်အားစုက ကျောင်းသားလူငယ်များနှင့် တော်လှန်ရေးပြည်သူများ စာဖတ်လေ့လာနိုင်ရန် ရည်ရွယ်ပြီး ရွေ့လျားစာကြည့်တိုက်တစ်ခု ပြုလုပ်လျက်ရှိကြောင်း သိရသည်။ စာကြည့်တိုက်တွင် စာအုပ်ပေါင်း ၁၀၀၀ ကျော်ရှိပြီး တစ်ပုံးလျှင် စာအုပ် ၁၀၀ ခန့် ထည့်သယ်ဆောင်ထားသည်။ တာဝန်ရှိသူတစ်ဦးက “လူငယ်တွေကို အရွယ်နှင့်လိုက်လျောညီထွေသော စာဖတ်မှုကို အားပေးရန် ရည်ရွယ်ပါ တယ်” ဟု ပြောသည်။
ရွှေဘိုမြို့နယ် သပိတ်အင်အားစုသည် ရွေ့လျားစာကြည့်တိုက်ကို ၂ နှစ်ခန့် လုပ်ဆောင် လာခဲ့ပြီး လက်ရှိတွင် ကျေးရွာ ၁၅ ရွာခန့်သို့ လှည့်လည်ဖြန့်ဝေထားကြောင်း သိရသည်။ ဤလှုပ်ရှားမှုသည် ဒေသခံများအကြား ပညာရေးဖြည့်ဆည်းမှုကို အားပေးရန် ရည်ရွယ် ထားကြောင်း ၎င်းတို့က ဆိုသည်။