‌ဇွန်လ (၁၀) သတင်းတို ကဏ္ဍ

 

—————————-

၁။ မြန်မာ-ထိုင်းနယ်စပ် ပွိုင့်-၂၅၆၆ တပ်စခန်းကို တော်လှန်ရေးတပ်များ သိမ်းပိုက်

—————————————————————————

ဇွန် ၁၀

The Kaladan Post

တနင်္သာရီတိုင်း၊ ထားဝယ်မြို့နယ် မြန်မာ-ထိုင်းနယ်စပ်ရှိ စစ်ကောင်စီတပ်၏ ပွိုင့်-၂၅၆၆ တပ်စခန်းကို ကရင်အမျိုးသားလွတ်မြောက်ရေးတပ်မတော် (KNLA) ဦးဆောင်သော တော်လှန်ရေးပူးပေါင်းတပ်များက ၂၀၂၅ ခုနှစ် ဇွန်လ ၁၀ ရက်နေ့လယ်တွင် အပြီးသတ် သိမ်းပိုက်ခဲ့သည်။ အဆိုပါစခန်းကို ၁၉၉၇ ခုနှစ်ကုန်ပိုင်းတွင် စစ်တပ်က တည်ဆောက်ခဲ့ပြီး ခလရ (၂၅) အထိုင်တပ်ဖြစ်ကာ ထီးထာဗျူဟာ၏ ကွပ်ကဲမှုအောက်တွင် ရှိသည်။

ဇွန်လ ၈ ရက်တွင် စတင်တိုက်ခိုက်ခဲ့ပြီး ၃ ရက်အကြာ သိမ်းပိုက်နိုင်ခဲ့သည့် ဤစခန်း သိမ်းပွဲတွင် KNLA တပ်မဟာ (၄) ဦးဆောင်မှုဖြင့် ကရင်အမျိုးသားကာကွယ်ရေးတပ်မတော် (KNDO) တပ်ရင်း (၇)၊ Karen Drone Special Force (KDSF)၊ ထီးမိုပွာဒေသ သစ်တောဌာန၊ KNPF၊ လုံခြုံရေးတပ်ဖွဲ့၊ အမျိုးသမီးအစည်းအရုံး၊ TPLF နှင့် FFD Drone တပ်ဖွဲ့တို့ ပူးပေါင်းပါဝင်ခဲ့သည်။ KNU မြိတ်-ထားဝယ်ခရိုင်က ဤအောင်မြင်မှုကို ထုတ်ပြန်အတည်ပြု ခဲ့သည်။

၂။ မှော်ဘီလေတပ်ဌာနချုပ်ကို ဒရုန်းဖြင့် တိုက်ခိုက်မှုတွင် ဗိုလ်အပါ ၂ ဦးသေဆုံး

————————————————————————

ဇွန် ၁၀

The Kaladan Post

ရန်ကုန်တိုင်း၊ မှော်ဘီမြို့ရှိ စစ်ကောင်စီလေတပ်ဌာနချုပ်ကို ပြည်သူ့ကာကွယ်ရေးတပ်ဖွဲ့ ဝင်များက ဇွန်လ ၉ ရက် ည ၇ နာရီခန့်တွင် အသေခံဒရုန်းဖြင့် ဗုံးကြဲတိုက်ခိုက်ခဲ့ရာ ဗိုလ်မိုးဝေကျော်နှင့် တပ်သား ဖြိုးကိုကို သေဆုံးပြီး ၆ ဦး ထိခိုက်ဒဏ်ရာရရှိခဲ့ကြောင်း Civilian Military SRDF တပ်ဖွဲ့ထံမှ သိရသည်။ တိုက်ခိုက်မှုမှာ လအနည်းငယ်ကြာ ပြင်ဆင်ခဲ့ပြီး လေယာဉ်များကို ပစ်မှတ်ထားရန် ရည်ရွယ်ခဲ့သော်လည်း အဆင်မပြေသဖြင့် စစ်ကောင်စီ တပ်သားများကို ပစ်မှတ်ပြောင်းခဲ့ကြောင်းဆိုသည်။

ဤတိုက်ခိုက်မှုကို Civilian Military SRDF တပ်ဖွဲ့နှင့် ရွှေဘိုခရိုင်အမှတ် ၁၅ တပ်ရင်းတို့ ပူးပေါင်းလုပ်ဆောင်ခဲ့ပြီး ၎င်းသည် မေလ ၁၂ ရက်က ဒီပဲယင်းမြို့နယ်၊ အိုးတိန်တွင်းရွာတွင် လေကြောင်းတိုက်ခိုက်မှုကြောင့် ကလေးများ ဆုံးပါးခဲ့ရသည့်အတွက် လက်တုံ့ပြန်ခြင်းဖြစ် ကြောင်း သိရသည်။ သေဆုံးသူ ဗိုလ်မိုးဝေကျော်မှာ မြစ်ကြီးနားမှ ပြောင်းရွှေ့လာသူဖြစ်ပြီး ဖြိုးကိုကိုမှာ ရခိုင်ပြည် ရှေ့တန်း ၇၅၇ စစ်ကြောင်းမှ ပြောင်းရွှေ့လာသူဖြစ်ကာ ဤတိုက်ခိုက်မှုသည် SRDF ၏ ဒုတိယအကြိမ် မှော်ဘီလေတပ်ဌာနချုပ်တိုက်ခိုက်မှုဖြစ်သည်။

၃။ စစ်ကောင်စီစစ်ကြောင်းထိုးမှုကြောင့် ဒေသခံ ၁၀၀ ကျော် စစ်ရှောင်ထွက်ပြေး

————————————————————————

ဇွန် ၁၀

The Kaladan Post

ပဲခူးတိုင်း၊ သာယာဝတီခရိုင်၊ ကြို့ပင်ကောက်မြို့နယ်တွင် စစ်ကောင်စီတပ်များက ဇွန်လ ၉ ရက် ညနေပိုင်းမှစ၍ ကျည်စုလမ်းမှ အင်အားအလုံးအရင်းဖြင့် စစ်ကြောင်းထိုးလာခဲ့ရာ သရက်ကိုင်းကြိုးရွာအနီး ပြည်သူ့ကာကွယ်ရေးတပ်ဖွဲ့များနှင့် ည ၁၀ နာရီဝန်းကျင်တွင် ထိတွေ့တိုက်ပွဲ ဖြစ်ပွားခဲ့ကြောင်း သိရသည်။ စစ်ကောင်စီတပ်များက ကျည်စုကျေးရွာမှ လက်နက်ကြီးပစ်ကူပေးခဲ့ပြီး Hero ပြောက်ကျားတပ်ဖွဲ့၏ ဒုတပ်ခွဲမှူး ရဲဘော်ကိုမိုးသီးက စစ်ကောင်စီက ကြို့ပင်ကောက်နှင့် အုတ်ဖိုမှ ညှပ်ထိုးကာ လက်နက်ကြီးများဖြင့် နယ်မြေရှင်းလင်းပြီး စစ်ကြောင်းထိုးရန် ပြင်ဆင်နေကြောင်း ပြောကြားခဲ့သည်။

ဤစစ်ကြောင်းထိုးမှုနှင့် လက်နက်ကြီးအန္တရာယ်ကြောင့် ကြို့ပင်ကောက်မြို့နယ်ရှိ သရက်တိုက်ရွာ၊ ဒေါင်ကြီးရွာ၊ ကွင်ကြယ်ရွာတို့မှ ဒေသခံ ၁၀၀ ကျော် စစ်ရှောင်ထွက်ပြေးနေရသည်။ စစ်ကောင်စီတပ်များသည် ထွေအုပ်ရုံးတွင် စုရပ်လုပ်ပြီး သဲကုန်းစစ်ဆေးရေးဂိတ်တွင် ဖောကား ၃ စီးနှင့် ဆိုင်ကယ်များဖြင့် စုစည်းထားကာ စစ်ကြောင်းထိုးမှုကို ဆက်လက်ပြင်ဆင်နေကြောင်း ဒေသတွင်းသတင်းရင်းမြစ်များထံမှ သိရသည်။

၄။ ပစ်ချခံရ၍ တိုက်လေယာဉ်ပျက်ကျမှုကို စက်ချို့ယွင်း၍ ပျက်ကျဟု စစ်ကောင်စီက သတင်းထုတ်ပြန်

——————————————————————————

ဇွန် ၁၀

The Kaladan Post

စစ်ကိုင်းတိုင်း၊ ပုလဲမြို့နယ်၊ ကန့်ဒေါင့်ရဲစခန်းသိမ်းတိုက်ပွဲအတွင်း ဗုံးကြဲရန်လာသော အကြမ်းဖက်စစ်ကောင်စီ၏ ဂျက်ဖိုက်တာတစ်စီးကို ပြည်သူ့လွတ်မြောက်ရေးတပ်မတော် (PLA) က ဇွန်လ ၁၀ ရက် မွန်းလွဲ ၁၂ နာရီ ၁၅ မိနစ်ခန့်တွင် ပစ်ချခဲ့ကြောင်း သိရသည်။ သို့သော် စစ်ကောင်စီက ၎င်းပျက်ကျမှုကို စက်ချို့ယွင်းမှုဟု လိမ်လည်ထုတ်ပြန်ခဲ့ရာ PLA က တိုက်လေယာဉ်ပျက်ကျမှု၏ ဓာတ်ပုံများကို ဝေဝေဆာဆာ ထပ်မံထုတ်ပြန်ခဲ့သည်။

စစ်ကောင်စီသည် တိုက်လေယာဉ်နှင့် ရဟတ်ယာဉ်များ ပစ်ချခံရသည့်အခါတိုင်း စက်ချို့ယွင်း မှုဟု လိမ်လည်ထုတ်ပြန်လေ့ရှိကြောင်း သိရသည်။ ဥပမာအနေဖြင့် မေလ ၂၀ ရက်က ကချင်ပြည်နယ်၊ ဗန်းမော်မြို့သို့ စစ်ကူလာပို့သော ရဟတ်ယာဉ် ၂ စီးကို KIA က အသေခံဒရုန်းများဖြင့် ပစ်ချခဲ့သော်လည်း စစ်ကောင်စီက ၎င်းကို စက်ချို့ယွင်းမှုဟု လိမ်လည် ထုတ်ပြန်ခဲ့သည်။

၅။ စစ်တပ်လေကြောင်းဗုံးကြဲမှုကြောင့် အမျိုးသမီး ၁ ဦးသေဆုံးပြီး ပြည်သူ ၄ ဦးဒဏ်ရာရ

——————————————————————————-

ဇွန် ၁၀

The Kaladan Post

စစ်ကိုင်းတိုင်း၊ ကောလင်းမြို့နယ်၊ ကံကုန်းကျေးရွာနှင့် ဖလဲကျေးရွာတို့ကို အကြမ်းဖက်စစ်ကောင်စီတပ်က ဇွန်လ ၉ ရက် ည ၉ နာရီ ၂၀ မိနစ်တွင် ဂျက်ဖိုက်တာဖြင့် ဗုံးကြဲတိုက်ခိုက်ခဲ့ရာ အမျိုးသမီး ၁ ဦး သေဆုံးပြီး ပြည်သူ ၄ ဦး ထိခိုက်ဒဏ်ရာရရှိခဲ့ကြောင်း Kawlin Revolution – KR နှင့် ပြည်သူ့ကာကွယ်ရေးတပ်ထုတ်ပြန်ချက်များအရ သိရသည်။ ကံကုန်းကျေးရွာတွင် တိုက်ပွဲမရှိဘဲ တံတားဦးမှ တက်လာသော ဂျက်ဖိုက်တာက ဗုံးကြဲခဲ့ရာ သားအဖနှစ်ဦး ဒဏ်ရာရရှိခဲ့ပြီး သမီးဖြစ်သူ သေဆုံးကာ ဖခင်မှာ အပြင်းအထန်ဒဏ်ရာ ရခဲ့သည်။

ဖလဲကျေးရွာသို့ မြစ်ချောင်းမှ ပျံသန်းလာသော ဂျက်ဖိုက်တာက ဗုံး ၃ လုံး ကြဲချခဲ့ရာ အမျိုးသမီး ၂ ဦးနှင့် အမျိုးသား ၁ ဦး ထိခိုက်ဒဏ်ရာရရှိခဲ့ပြီး နေအိမ် ၆ လုံး ပျက်စီးဆုံးရှုံး ခဲ့ကြောင်း သိရသည်။ ဤလေကြောင်းတိုက်ခိုက်မှုများသည် တိုက်ပွဲဖြစ်ပွားခြင်း မရှိဘဲ အရပ်သားပြည်သူများကို ပစ်မှတ်ထားတိုက်ခိုက်ခဲ့ခြင်းဖြစ်ပြီး ဒဏ်ရာရသူများတွင် အပြင်းအထန်ထိခိုက်မှုများ ပါဝင်ကြောင်း ထုတ်ပြန်ချက်များတွင် ဖော်ပြထားသည်။

၆။ စစ်ကောင်စီ၏ ဟန်ပြအပစ်ရပ်ချိန်တွင် နောင်ချိုမြို့နယ်တွင်တိုက်ပွဲများပြင်းထန်

————————————————————————-

ဇွန် ၁၀

The Kaladan Post

ရှမ်းပြည်နယ်မြောက်ပိုင်း၊ နောင်ချိုမြို့နယ်တွင် အကြမ်းဖက်စစ်ကောင်စီတပ်က ဇွန်လအတွင်း ထိုးစစ်ဆင်တိုက်ခိုက်မှုများကြောင့် TNLA နှင့် တိုက်ပွဲများ ဖြစ်ပွားခဲ့ကြောင်း TNLA ၏ ထုတ်ပြန်ချက်အရ သိရသည်။ ဇွန်လ ၇ ရက်မှ ၉ ရက်အထိ ကန်ကြီးကျေးရွာ၊ ညောင်တောနှင့် ပိန္နဲကုန်းအနီးတွင် တိုက်ပွဲများ ဖြစ်ပွားခဲ့ပြီး စစ်ကောင်စီတပ်က လက်နက်ကြီး ၂၇ လုံး၊ ဒရုန်းဗုံး ၁၂ လုံးနှင့် လက်နက်ကြီး ၁၈ လုံး ပစ်ကူတိုက်ခိုက်ခဲ့သည်။

ဇွန်လ ၄ ရက်က နောင်ချိုမြို့အတွင်း လက်နက်ကြီးပစ်ခတ်မှုကြောင့် အမျိုးသား ၂ ဦး၊ အမျိုးသမီး ၂ ဦး ထိခိုက်ဒဏ်ရာရရှိခဲ့ပြီး၊ နေအိမ် ၂ လုံးနှင့် ဘုန်းကြီးကျောင်း ၁ ကျောင်း ပျက်စီးခဲ့သည်။ ဇွန်လကုန်အထိ အပစ်ရပ်ကြေညာထားသော်လည်း စစ်ကောင်စီတပ်သည် ထိုးစစ်ဆင်ခြင်း၊ စစ်အင်အားဖြည့်တင်းခြင်း၊ ဒရုန်းနှင့် လေကြောင်းတိုက်ခိုက်မှုများ ဆက်လက်လုပ်ဆောင်နေကြောင်း TNLA က ထုတ်ပြန်ထားသည်။

၇။ မင်းအောင်လှိုင်၏ နျူကလီးယားအိပ်မက်နှင့် အာဆီယံအတွက် ခြိမ်းခြောက်မှု

————————————————————————-

ဇွန် ၁၀

The Kaladan Post

မင်းအောင်လှိုင်အပါအဝင် စစ်ခေါင်းဆောင်များ၏ နျူကလီးယားလက်နက်ပိုင်ဆိုင်ရေး အိပ်မက်ကို NLD အစိုးရက ရပ်တန့်ခဲ့သော်လည်း ၂၀၂၁ အာဏာသိမ်းပြီးနောက် ရုရှားအကူ အညီဖြင့် ၎င်းအိပ်မက်ကို ပြန်လည်အကောင်အထည်ဖော်ရန် ကြိုးစားနေကြောင်း NUG ပြောရေးဆိုခွင့်ရှိသူ ဦးနေဘုန်းလတ်က ၂၀၂၅ ဇွန် ၁၀ တွင် ပြောကြားသည်။ NLD လက်ထက် ၂၀၁၆-၂၀၁၈ တွင် နျူကလီးယားဘေးအန္တရာယ်ကင်းရှင်းရေး၊ ပစ္စည်းကာကွယ်မှု၊ စမ်းသပ်မှု တားမြစ်ရေး (CTBT) နှင့် လက်နက်တားမြစ်ရေး (TPNW) စာချုပ်များကို လက်မှတ်ရေးထိုး ခဲ့သော်လည်း အာဏာသိမ်းမှုကြောင့် IAEA သဘောတူညီချက်များ ရပ်ဆိုင်းသွားခဲ့သည်။

လက်ရှိ မင်းအောင်လှိုင်က ရုရှားနှင့် ပူးပေါင်း၍ နျူကလီးယားနည်းပညာရယူရန် အရှိန်မြှင့် လုပ်ဆောင်နေပြီး ၂၀၀၇ ခုနှစ် သန်းရွှေလက်ထက်မှ စတင်ခဲ့သည့် ပူးပေါင်းဆောင်ရွက်မှုသည် ၂၀၂၂-၂၀၂၃ တွင် နားလည်မှုစာချွန်လွှာများ၊ သတင်းအချက်အလက်စင်တာဖွင့်လှစ်မှု၊ ဓာတ်ပေါင်းဖိုတည်ဆောက်ရေး လေ့လာမှုများအထိ တိုးမြှင့်လာကြောင်း NUG က ထောက်ပြ သည်။ ၎င်းက အာဆီယံနှင့် ဒေသတွင်းနိုင်ငံများ၏ တည်ငြိမ်မှုနှင့် လုံခြုံရေးကို ခြိမ်းခြောက် နိုင်သဖြင့် နိုင်ငံတကာအသိုင်းအဝိုင်းအနေဖြင့် ထိရောက်စွာ တုံ့ပြန်ဆောင်ရွက်ရန် NUG က တိုက်တွန်းသည်။

၈။ ပုလဲမြို့နယ်တွင် တိုက်လေယာဉ်တစ်စီးပစ်ချခံရ

———————————————

ဇွန် ၁၀

The Kaladan Post

စစ်ကိုင်းတိုင်း၊ ပုလဲမြို့နယ်အတွင်း ယနေ့ ဇွန်လ ၁၀ ရက် မွန်းလွဲ ၁၂ နာရီ ၁၅ မိနစ်ခန့်တွင် ပြည်သူ့လွတ်မြောက်ရေးတပ်မတော် (PLA) က စစ်ကောင်စီ၏ ဂျက်ဖိုက်တာတိုက်လေယာဉ် တစ်စီးကို ပစ်ချနိုင်ခဲ့ကြောင်း PLA ၏ ထုတ်ပြန်ချက်နှင့် တော်လှန်ရေးတပ်ဖွဲ့ဝင်တစ်ဦး၏ ပြောဆိုချက်အရ သိရသည်။ တိုက်ပွဲများပြင်းထန်နေသည့် ကန်ဒေါင့်စခန်းအနီးတဝိုက်တွင် ယင်းဖြစ်စဉ်ဖြစ်ပွားခဲ့သော်လည်း လေယာဉ်ပျက်ကျသည့်နေရာအတိအကျကို မသိရသေးပေ။ သတင်းရင်းမြစ်အချို့အရ ပစ်ချခံရသည့်လေယာဉ်သည် မှော်ဘီလေတပ်စခန်းမှ ဖြစ်နိုင် ကြောင်း ယူဆထားသော်လည်း ယင်းကို အတည်ပြုနိုင်ရန် ဆက်လက်စုံစမ်းနေကြဆဲဖြစ်သည်။

 

၉။ မှော်ဘီလေတပ်စခန်းအား အသေခံဒရုန်းဖြင့် တိုက်ခိုက်မှုတွင် ဗိုလ်မိုးဝေကျော်အပါအဝင် ၂ ဦးသေဆုံး

—————————————————————————

ဇွန် ၁၀

The Kaladan Post

ရန်ကုန်တိုင်း၊ မှော်ဘီမြို့ရှိ စစ်ကောင်စီလေတပ်စခန်းဌာနချုပ်ကို ၂၀၂၅ ခုနှစ် ဇွန်လ ၉ ရက် ည ၇ နာရီခန့်တွင် ပြည်သူ့ကာကွယ်ရေးတပ်မတော် (Civilian Military – SRDF) နှင့် ရွှေဘိုခရိုင် အမှတ် ၁၅ တပ်ရင်းတို့ ပူးပေါင်းကာ အိုးထိမ်းတွင်းရွာ စစ်ဆင်ရေးအဖြစ် Jammer ကျော်ဖြတ်နိုင်သော အဆင့်မြင့် အသေခံဒရုန်းဖြင့် ဗုံးကြဲတိုက်ခိုက်ခဲ့သည်။ တိုက်ခိုက်မှုကြောင့် လေတပ်စခန်းကင်းစင်ကို ထိမှန်ပေါက်ကွဲခဲ့ပြီး ဗိုလ်မိုးဝေကျော်နှင့် တပ်သား ဖြိုးကိုကို (ရခိုင်စစ်မြေပြင်မှ ပြောင်းရွှေ့ခံရသူ) သေဆုံးကာ စစ်ကောင်စီမိသားစု ၆ ဦး ထိခိုက်ဒဏ်ရာရရှိခဲ့သည်။ ပြည်သူများ ထိခိုက်မှုမရှိကြောင်း SRDF က အတည်ပြုထားသည်။ တိုက်ခိုက်မှုမှာ PDF တပ်ဖွဲ့ဝင်များ အထိအခိုက်မရှိ အောင်မြင်စွာ ဆုတ်ခွာနိုင်ခဲ့ပြီး စစ်ကောင်စီလော်ဘီသတင်းဌာနများ၏ ပြည်သူထိခိုက်သည်ဟူသော ဝါဒဖြန့်ချက်များကို တိုက်ခိုက်သူများက ချေပကြောင်း သိရသည်။ SRDF က အိုးထိမ်းတွင်းအတွက် နောက်ထပ်လက်တုန့်ပြန်စစ်ဆင်ရေးများ ဆက်လက်ဖော်ဆောင် မည်ဟု ပြောကြားထားသည်။

၁၀။ တပ်မ ၃၃ နှင့် တပ်မ ၉၉ တပ်မမှူးများ ရာထူးဖယ်ရှားခံရပြီး ဗိုလ်မှူးချုပ် ကျော်ဆက်မြင့်ကို ဖမ်းဆီးစစ်ဆေး

———————————————————————————

ဇွန် ၁၀

The Kaladan Post

စစ်ကောင်စီက တပ်မ ၉၉ တပ်မမှူး ဗိုလ်မှူးချုပ် တင်မောင်ကျော်နှင့် တပ်မ ၃၃ တပ်မမှူး ဗိုလ်မှူးချုပ် ကျော်ဆက်မြင့်တို့ကို ရာထူးမှ ဖယ်ရှားခဲ့သည်။ တင်မောင်ကျော်ကို စစ်ရှုံးမှုကြောင့် နေပြည်တော်သို့ ပြန်ခေါ်ကာ အရန်အင်အားအဖြစ် ပြောင်းရွှေ့ပြီး ဟားခါး အခြေစိုက် စစ်ဗျူဟာမှူး ဗိုလ်မှူးချုပ် စိုးဝင်းထွန်းကို တပ်မ ၉၉ တပ်မမှူးအဖြစ် အစားထိုး ခန့်အပ်ခဲ့သည်။ ဖားကန့်အခြေစိုက် တပ်မ ၃၃ တပ်မမှူး ကျော်ဆက်မြင့်ကို စစ်ရေးစိုးမိုးထား သည့်ပုံစံဖြင့် သတင်းမမှန်တင်ပြမှုနှင့် ကိုယ်ကျိုးရှာစီးပွားရေးလုပ်ဆောင်မှုများကြောင့် ရာထူးမှဖယ်ရှားကာ မြစ်ကြီးနားမှ နန်းတွင်းစစ်ကြောရေးတွင် အရန်အင်အားအဖြစ် ဖမ်းဆီးစစ်ဆေးနေသည်။ ၎င်း၏နေရာတွင် ဗိုလ်မှူးကြီး ကောင်းမင်းထွဋ်ကို တပ်မ ၃၃ တပ်မမှူးအသစ်အဖြစ် ခန့်အပ်ထားပြီး ၎င်းသည် လက်ရှိစစ်ကိုင်းတွင် ရှိနေကာ မကြာမီ ဖားကန့်သို့ ရောက်ရှိမည်ဖြစ်သည်။

၁၁။ စာသင်ကျောင်းအား လေကြောင်းတိုက်ခိုက်မှုကြောင့် ကလေးအပါအဝင် ၄ ဦးသေဆုံးပြီး ၃၅ ဦးထက်မနည်း ဒဏ်ရာရ

——————————————————————————

ဇွန် ၁၀

The Kaladan Post

မွန်ပြည်နယ်နှင့် ကရင်ပြည်နယ်အစပ်၊ ကျိုက်မရောနှင့် ကော့ကရိတ်မြို့နယ်အစပ်ရှိ ပန်ရပ်ကျေးရွာရှိ နေအိမ်စာသင်ကျောင်းကို ၂၀၂၅ ခုနှစ် ဇွန်လ ၉ ရက် မွန်းလွဲ ၂ နာရီခွဲတွင် စစ်ကောင်စီတပ်က တိုက်ပွဲမရှိဘဲ လေယာဉ်ဖြင့် ဗုံး ၃ လုံးကြဲချတိုက်ခိုက်ခဲ့သည်။ ယင်းတိုက်ခိုက်မှုကြောင့် ကလေးငယ် ၁ ဦး၊ အမျိုးသား ၁ ဦးနှင့် အမျိုးသမီး ၂ ဦး စုစုပေါင်း ၄ ဦး သေဆုံးခဲ့ပြီး ဒဏ်ရာရသူ ၃၅ ဦးထက်မနည်း ဆေးရုံတင်ပို့ကုသရကာ အချို့မှာ အသက်အန္တရာယ်စိုးရိမ်ရသည်။ ဒေသခံများအဆိုအရ ထွေ/အုပ်စာရေး မင်းကိုငယ်က စာသင်ကျောင်း၏ နေရာလိပ်စာနှင့် စာသင်ချိန်ကို အတိအကျသတင်းပေးခဲ့ခြင်းကြောင့် ဗုံးကြဲခံရခြင်းဖြစ်ကြောင်းသိရသည်။ ထို့အပြင် နေအိမ် ၃ လုံး ထိခိုက်ပျက်စီးခဲ့သည်။

၁၂။ သံတောင်ကြီးတွင် စစ်ကောင်စီတပ်ဖွဲ့ဝင် ၃ ဦးသေဆုံးပြီး အများအပြားဒဏ်ရာရ

—————————————————————————-

ဇွန် ၁၀

The Kaladan Post

ကရင်ပြည်နယ်၊ သံတောင်ကြီးမြို့နယ်ရှိ ၁၃ မိုင်နှင့် ကျောက်လုံးကြီးစစ်စခန်းများနှင့် စစ်ကြောင်းကို People Defense Force Thandaung အဖွဲ့က တိုက်ခိုက်ခဲ့ရာ စစ်ကောင်စီတပ်ဖွဲ့ဝင် ၃ ဦးသေဆုံးပြီး ၁၀ ဦးထိခိုက်ဒဏ်ရာရရှိခဲ့သည်။ ၂၀၂၅ ခုနှစ် ဧပြီလ ၁၃ ရက်မှ မေလ ၂၈ ရက်အတွင်း တိုက်ခိုက်မှု ၅ ကြိမ်ပြုလုပ်ခဲ့ပြီး ၆၀ မမ၊ ၄၀ မမ လက်နက်ကြီးများနှင့် စနိုက်ပါဖြင့် ပစ်ခတ်ခဲ့သည်။ တိုက်ခိုက်မှုများကို တောင်ငူခရိုင်၊ တပ်မဟာ ၂၊ တပ်ရင်း ၅ လက်အောက်ခံ MLB စစ်ကြောင်းက လုပ်ဆောင်ခဲ့ပြီး PDF တပ်ဖွဲ့ဝင်များ အထိအခိုက်မရှိ အောင်မြင်ခဲ့သည်။ PDF Thandaung အဖွဲ့က စစ်ကောင်စီကို ဆက်လက်ထိုးစစ်ဆင်တိုက်ခိုက်မည်ဖြစ်ပြီး၊ ပြည်သူများအား လုံခြုံရေးဂရုစိုက်ရန်နှင့် လူငယ်များအား စစ်မှုထမ်းပေါ်တာဆွဲခြင်းမှ ရှောင်ရှားရန် တိုက်တွန်းထားသည်။

၁၃။ ဒိုက်ဦးနှင့် ရေးမြို့မှ စစ်မှုထမ်းတပ်သားသစ် ၄ ဦး လက်နက်များနှင့်အတူ အလင်းဝင်

——————————————————————————–

ဇွန် ၁၀

The Kaladan Post

ပဲခူးတိုင်း၊ ဒိုက်ဦးမြို့နယ် ခမရ ၄၄၀ တပ်ရင်းမှ စစ်မှုထမ်းတပ်သားသစ် ၂ ဦးနှင့် မွန်ပြည်နယ်၊ ရေးမြို့နယ် ခလရ ၂၉၉ မှ တပ်သားသစ် ၂ ဦး၊ စုစုပေါင်း ၄ ဦးသည် လက်နက်ခဲယမ်းများနှင့်အတူ ပြည်သူ့ကာကွယ်ရေးတပ်မတော်ထံ အလင်းဝင်ရောက်ခဲ့ကြောင်း သိရသည်။ ဒိုက်ဦးမှ တပ်သားများသည် သေနတ် ၂ လက်နှင့် ခဲယမ်းများ ယူဆောင်လာပြီး ရေးမြို့မှ တပ်သားများက MA-1 သေနတ် ၁ လက်၊ ကျည်ဘောက် ၄ ဘောက်နှင့် ကျည် ၁၂၃ တောင့်တို့ဖြင့် အလင်းဝင်ခဲ့သည်။ ၎င်းတို့အားလုံးသည် စစ်တပ်၏ အဓမ္မပေါ်တာဆွဲဖမ်းဆီးခံရသူများဖြစ်ပြီး စစ်မှုထမ်းသင်တန်းအပတ်စဉ် ၃ နှင့် ၈ မှ ဖြစ်ကြသည်။ အလင်းဝင်သူများကို ဂုဏ်ပြုဆုငွေ ချီးမြှင့်မည်ဟု စစ်ဗျူဟာ ၂၇ နှင့် တပ်မဟာ ၁ PDF တာဝန်ခံက ပြောကြားသည်။