—————————–
၁။ မင်းတပ်မြို့နယ်တွင် စစ်ကောင်စီ၏ လေကြောင်းတိုက်ခိုက်မှု ၁၈ ကြိမ်အထိ ဖြစ်ပွား
——————————————————————————
ဇွန် ၁၂
The Kaladan Post
၂၀၂၅ ခုနှစ် ဇန်နဝါရီလမှ ဇွန်လ ၁၁ ရက်အထိ ချင်းပြည်နယ်၊ မင်းတပ်မြို့နယ်တွင် အကြမ်းဖက်စစ်ကောင်စီ၏ လေကြောင်းတိုက်ခိုက်မှု ၁၈ ကြိမ်ဖြစ်ပွားခဲ့သည်။ ယင်း တိုက်ခိုက်မှုများကြောင့် သေဆုံးသူ ၁၀ ဦးနှင့် ဒဏ်ရာရသူ ၂၀ ဦးအထိ ရှိခဲ့ပြီး ဘာသာရေး၊ အစိုးရဌာန အဆောက်အဦများနှင့် ပုဂ္ဂလိကပိုင်ဆိုင်မှု စုစုပေါင်း ၁၀၀ ကျော် ထိခိုက်ပျက်စီးခဲ့ကြောင်း မင်းတပ်မြို့နယ် ပြည်သူ့အုပ်ချုပ်ရေးအဖွဲ့က ထုတ်ပြန်သည်။
၂။ TNLA ၏ အပတ်စဉ် ၆၇ စစ်ရေးသင်တန်းဆင်းပွဲတွင် သင်တန်းသား ၈၂၂ ဦးတက်ရောက်ခဲ့ပြီး ထူးချွန်သူများအား ဆုချီးမြှင့်
———————————————————————-
ဇွန် ၁၂
The Kaladan Post
တအာင်းအမျိုးသားလွတ်မြောက်ရေးတပ်မတော် (TNLA) ၏ အပတ်စဉ် ၆၇ စစ်ရေးသင်တန်း ဆင်းပွဲကို ၂၀၂၅ ခုနှစ် ဇွန်လ ၆ ရက်တွင် တအာင်းဒေသတွင် ကျင်းပခဲ့သည်။ သင်တန်းကာလ ၃ လကျော်အတွင်း အမျိုးသား ၆၅၇ ဦးနှင့် အမျိုးသမီး ၁၆၅ ဦး၊ စုစုပေါင်း ၈၂၂ ဦးကို ဘက်စုံ တိုက်ခိုက်ရေးကျွမ်းကျင်မှုများ သင်ကြားပေးခဲ့သည်။ စစ်ဦးစီးချုပ် ဗိုလ်ချုပ်တားဟိုပလန်က တအာင်းပြည်ကို ကာကွယ်ရန်၊ အမိန့်နာခံမှုနှင့် ရန်သူအပေါ် သတိထားရန် တိုက်တွန်းခဲ့ သည်။ သေနတ်ပစ်ထူးချွန်ဆု၊ သေနတ်တပ်ဆင်ဖြုတ်ထူးချွန်ဆုနှင့် အထူးတိုက်ခိုက်ရေး ထူးချွန်ဆုများကို ချီးမြှင့်ခဲ့ပြီး သင်တန်းဆင်းသူများသည် TNLA ထိန်းချုပ်မြို့နယ်များတွင် ပြည်သူလူထုကာကွယ်ရေး တာဝန်ထမ်းဆောင်မည်ဖြစ်သည်။ အခမ်းအနားသို့ ဗိုလ်ချုပ် တားဟိုပလန်၊ ဗိုလ်မှူးချုပ်တားနောရိူန်း၊ ဒုဗိုလ်မှူးကြီးတားအတီ၊ ဗိုလ်မှူးယာထွေးနှင့် ဗိုလ်မှူးတားအခယ်တို့ တက်ရောက်ခဲ့သည်။
၃။ KIA ၏ မှော်စီဇာ ကျောက်စိမ်းလုပ်ကွက် ကြားညှပ်တိုက်ခိုက်မှုတွင် စစ်ကောင်စီတပ်သား ၂၀ ကျော်သေဆုံး
———————————————————————–
ဇွန် ၁၂
The Kaladan Post
ကချင်ပြည်နယ်၊ ဖားကန့်မြို့နယ်၊ မှော်စီဇာ ကျောက်စိမ်းလုပ်ကွက်တွင် စုစည်းနေသော စစ်ကောင်စီတပ်ကို ၂၀၂၅ ခုနှစ် ဇွန်လ ၁၂ ရက် နံနက် ၉ နာရီခန့်မှစ၍ KIA နှင့် PDF ပူးပေါင်းတပ်ဖွဲ့များက ကြားညှပ်တိုက်ခိုက်ခဲ့ရာ စစ်ကောင်စီတပ်သား ၂၀ ဦးထက်မနည်း သေဆုံးပြီး ဒဏ်ရာရသူများပြားခဲ့သည်။ တိုက်ပွဲအတွင်း စစ်ကောင်စီက အရပ်သားများကို လိုက်လံပစ်ခတ်သတ်ဖြတ်ခဲ့ပြီး နံနက် ၆ နာရီခန့်တွင် မှော်စီဇာဘုရားကုန်းအနီး အရပ်သား ၃ ဦး၏ ရုပ်အလောင်းများကို တွေ့ရှိခဲ့သည်။ ဇွန်လ ၁၀ ရက်မှစတင်ခဲ့သည့် တိုက်ပွဲများတွင် စစ်ကောင်စီက မှော်စီဇာ၊ သာယာကုန်း၊ လုံးခင်းသုဿန်နှင့် ဆေးရုံအပါအဝင် လုံးခင်းကျေးရွာများကို လက်နက်ကြီးများဖြင့် ရမ်းသမ်းပစ်ခတ်ကာ ကသီမှော်ရွာထဲရှိ ပြည်သူပိုင်ပစ္စည်းများကို ဖျက်ဆီးခဲ့ကြောင်း ဒေသခံများက ပြောသည်။
၄။ သာယာဝတီထောင်တွင် နိုင်ငံရေးအကျဉ်းသား ဦးကျော်စိုး ဆေးဝါးမလုံလောက်မှုကြောင့် ကွယ်လွန်
————————————————————————-
ဇွန် ၁၂
The Kaladan Post
ပဲခူးတိုင်း၊ သာယာဝတီအကျဉ်းထောင်တွင် ထောင်ဒဏ် ၁၀ နှစ်ကျခံနေရသည့် နိုင်ငံရေးအကျဉ်းသား ဦးကျော်စိုး (ခေါ်) ဦးဇော်နှစ်သည် ဆေးဝါးစောင့်ရှောက်မှု လုံလောက်စွာမရရှိသဖြင့် နှလုံးရောဂါနှင့် သွေးတိုးရောဂါတို့ကြောင့် ၂၀၂၅ ခုနှစ် မေလ ၂၃ ရက်တွင် ကွယ်လွန်ခဲ့သည်။ ၎င်းသည် ၂၀၂၁ နိုဝင်ဘာလ ၁၀ ရက်တွင် လှည်းကူးမြို့မရဲစခန်းတွင် အကြမ်းဖက်မှုတိုက်ဖျက်ရေးဥပဒေ ပုဒ်မ ၅၀(ဈ)ဖြင့် ဖမ်းဆီးခံခဲ့ရသူဖြစ်သည်။ မြန်မာနိုင်ငံရှိ အကျဉ်းထောင်များတွင် ဆေးဝါးစောင့်ရှောက်မှု မလုံလောက်မှုကြောင့် ရောဂါများဆိုးရွားပြီး သေဆုံးမှုများ ဖြစ်ပေါ်နေပြီး ၂၀၂၅ ခုနှစ် ဇွန်လ ၁ ရက်အထိ အကျဉ်းသား ၁၀ ဦး ဆေးဝါးမလုံလောက်မှုကြောင့် သေဆုံးခဲ့ကြောင်း မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများ ကွန်ရက် (PPNM) က ထုတ်ပြန်သည်။
၅။ စစ်ကောင်စီ ယာဉ်တန်းကို မိုင်းဆွဲတိုက်ခိုက်မှုတွင် တပ်သား ၃ ဦးသေဆုံး
———————————————————————
ဇွန် ၁၂
The Kaladan Post
ပဲခူးတိုင်း၊ သဲကုန်းမြို့မှ ထွက်ခွာလာသည့် စစ်ကောင်စီတပ်သား ၅၀ ခန့်ပါ ကား ၂ စီးကို ၂၀၂၅ ခုနှစ် ဇွန်လ ၁၁ ရက် နံနက် ၁၀:၁၅ ခန့်တွင် ရုံးပင်တက်ကျေးရွာအနီး ဆည်မြောင်းရေလွှတ် ဘောင်ပေါက်တွင် တော်လှန်ရေးတပ်ဖွဲ့များက မိုင်း ၃ လုံးဖြင့် ဖိုခနောက်ဆိုင်ထောင်တွင် မိုင်းဆွဲတိုက်ခိုက်ခဲ့သည်။ ယင်းတိုက်ခိုက်မှုတွင် စစ်ကောင်စီတပ်သား ၃ ဦး နေရာတွင် သေဆုံးပြီး ၁၁ ဦး အပြင်းအထန် ဒဏ်ရာရရှိခဲ့သည်။ တိုက်ခိုက်မှုကို သဲကုန်းမြို့နယ်နှင့် ပေါင်းတည်မြို့နယ် ပြည်သူ့ကာကွယ်ရေးအဖွဲ့ (ပကဖ) များက ပူးပေါင်းဆောင်ရွက်ခဲ့ကြောင်း သိရသည်။
၆။ ပျူစောထီး အေးကျော်မြင့် ဖမ်းဆီးခံရာမှ ထွက်ပြေးပြီး ပစ်ခတ်ခံသေဆုံး
———————————————————————
ဇွန် ၁၂
The Kaladan Post
ပဲခူးတိုင်း၊ သဲကုန်းမြို့နယ်၊ တပ်ရွာနေ ပျူစောထီး အေးကျော်မြင့်ကို ပေါက်ခေါင်းမြို့နယ် ပြည်သူ့ကာကွယ်ရေးအဖွဲ့ (ပကဖ) က ၂၀၂၅ ခုနှစ် မေလ ၁၈ ရက်တွင် ဖမ်းဆီးခဲ့သည်။ ၎င်းသည် ၂၀၂၄ ဇန်နဝါရီလတွင် တပ်မ ၆၆ ၏ ပျူစောထီးသင်တန်းတက်ရောက်ခဲ့ပြီး ရွှေကြို့ပင်ရွာဂိတ်တွင် ဂိတ်စောင့်အဖြစ် လုပ်ကိုင်ကာ PDF နှင့် ပကဖ လှုပ်ရှားမှုများကို စစ်တပ်ထံ သတင်းပေးခဲ့ကြောင်း ဝန်ခံခဲ့သည်။ မေလ ၂၄ ရက် စစ်ဆေးနေစဉ် ၎င်းက လက်နက်ငယ်လုယူ၍ ထွက်ပြေးပြီး ရဲဘော်များကို ပစ်ခတ်ခဲ့သဖြင့် လိုက်လံပစ်ခတ် ဖမ်းဆီးရာ သေဆုံးခဲ့သည်။
၇။ စစ်ကောင်စီကို ပကဖ တိုက်ခိုက်ရာ စစ်သား ၄ ဦးသေဆုံးပြီး ကား ၂ စီးသိမ်းဆည်း
——————————————————————————
ဇွန် ၁၂
The Kaladan Post
ပဲခူးတိုင်း၊ ဖြူးမြို့နယ်၊ ဇေယျာဝတီမြို့ရှိ ဘူတာရုံ၊ သကြားစက်နှင့် ဆားဂွန်းဂိတ်တို့တွင် တပ်စွဲထားသော စစ်ကောင်စီတပ်ကို ဖြူးမြို့နယ် ပြည်သူ့ကာကွယ်ရေးအဖွဲ့ (ပကဖ) က ဇွန် ၁၀ ရက် ည ၉:၄၅ တွင် ဝင်ရောက်တိုက်ခိုက်ခဲ့သည်။ ပကဖ တိုက်ခိုက်ရေးအဖွဲ့က ဘူတာရုံနှင့် သကြားစက်ကို ပစ်ခတ်တိုက်ခိုက်ပြီး၊ ဒရုန်းအဖွဲ့က ဆားဂွန်းဂိတ်ကို ဗုံးကြဲတိုက်ခိုက်ခဲ့ရာ စစ်သား ၄ ဦးသေဆုံး၊ ၂ ဦး ဒဏ်ရာရပြီး အိမ်စီးကား ၂ စီးကို သိမ်းဆည်းနိုင်ခဲ့သည်။ စစ်ကောင်စီတပ်သည် ဒေသခံများထံမှ ငွေညှစ်ခြင်းနှင့် အကြမ်းဖက်လုပ်ငန်းများ ဆောင်ရွက်နေကြောင်း ပကဖက ပြောသည်။
၈။ တော်လှန်ရေးတပ်များ ဥကရစ်ထစခန်းကို ဒုတိယအကြိမ် ထိုးစစ်ဆင်တိုက်ခိုက်
————————————————————————-
ဇွန် ၁၂
The Kaladan Post
ကရင်ပြည်နယ်၊ မြဝတီမြို့အနီး မြန်မာ-ထိုင်းနယ်စပ်ရှိ စစ်ကောင်စီ၏ ဥကရစ်ထစခန်းကို တော်လှန်ရေးတပ်ဖွဲ့များက ဇွန် ၁၁၊ ၂၀၂၅ တွင် ဒုတိယအကြိမ်ထိုးစစ် ဆင်တိုက်ခိုက်နေ သည်။ KNLA၊ KNDO နှင့် PDF ပူးပေါင်းတပ်ဖွဲ့များ ပါဝင်ပြီး ၂၀၂၂ တွင် ပထမအကြိမ် ထိုးစစ်ဆင်စဉ် အချို့ကာကင်းများသိမ်းပိုက်နိုင်ခဲ့သော်လည်း စစ်ကောင်စီ၏ ပြင်းထန်ခုခံမှု ကြောင့် အပြီးသတ်မသိမ်းနိုင်ခဲ့သဖြင့် ၎င်းတို့က “သက်ရှိစည်းရိုး” အမည်ဖြင့် ဝါဒဖြန့်ရုပ်ရှင် ရိုက်ကူးခဲ့သည်။ လက်ရှိတွင် တော်လှန်ရေးတပ်များသည် ဥကရစ်ထအပါအဝင် ဘလယ်ဒို၊ ကနဲလေး၊ ရွှေအေးမြိုင်၊ ဘုရင့်နောင်၊ မော်ခီး၊ သေ့ဘောဘိုးစခန်းများကိုလည်း သိမ်းပိုက် ထားနိုင်သည်။
၉။ ပခုက္ကူတွင် ပျူစောထီးစခန်းတိုက်ခိုက်ခံရပြီး စစ်သား ၅ ဦးသေဆုံး
————————————————————-
ဇွန် ၁၂
The Kaladan Post
ဇွန် ၁၀ ရက် မနက်ပိုင်းတွင် မကွေးတိုင်း၊ ပခုက္ကူမြို့နယ်၊ အနောက်မန်ကျည်းကန် ပျူစောထီးရွာစစ်စခန်းကို အညာမြေတပ်ပေါင်းစုနှင့် ဧရာဒေါင်းတပ်ဖွဲ့ဦးဆောင်သော တော်လှန်ရေးတပ်များက တိုက်ခိုက်ခဲ့ရာ စစ်သား ၅ ဦးသေဆုံးပြီး ၂ ဦး ဒဏ်ရာရရှိခဲ့သည်။ တိုက်ပွဲတွင် ဘန်ကာ ၃ လုံးသိမ်းပိုက်နိုင်ခဲ့သော်လည်း စစ်ကူရောက်ရှိလာသဖြင့် တော်လှန်ရေးတပ်များ ဆုတ်ခွာခဲ့ရသည်။ တော်လှန်ရေးရဲဘော် ၃ ဦး ဒဏ်ရာရရှိခဲ့ပြီး ဒေသတွင်း စစ်စခန်းများကင်းစင်ရေးအတွက် ဆက်လက်တိုက်ပွဲဝင်နေကြောင်း အညာမြေတပ်ပေါင်းစုက ပြောကြားသည်။
၁၀။ KNU ဌာနချုပ်အနီး စစ်ကောင်စီ၏ အသေခံဒရုန်း ၇ စီးဖြင့် ဗုံးကြဲတိုက်ခိုက်မှု
————————————————————————-
ဇွန် ၁၂
The Kaladan Post
ကရင်ပြည်နယ်၊ KNU တပ်မဟာ ၇ နယ်မြေရှိ KNU ဗဟိုဌာနချုပ်အနီးသို့ စစ်ကောင်စီတပ်က ဇွန်လ ၁၁ ရက်ည ၁၂ နာရီဝန်းကျင်တွင် အသေခံဒရုန်း ၇ စီးဖြင့် ဗုံးကြဲတိုက်ခိုက်ခဲ့သည်။ ဒရုန်း ၅ စီးပေါက်ကွဲခဲ့သော်လည်း လူထိခိုက်မှုမရှိကြောင်း KNU သတင်းရင်းမြစ်များက ပြောဆိုသည်။ ယခုမတိုင်မီ ၂၀၂၄ အောက်တိုဘာလတွင် ဒရုန်း ၄ စီးဖြင့်နှင့် ဇန်နဝါရီလတွင် ဒရုန်း ၂ စီးဖြင့် တိုက်ခိုက်ခဲ့ဖူးပြီး ယခုမှာ ၃ ကြိမ်မြောက်ဖြစ်သည်။ ဇန်နဝါရီလတိုက်ခိုက်မှုတွင် အရပ်သားတစ်ဦး ဒဏ်ရာရရှိခဲ့သည်။
၁၁။ မင်းအောင်လှိုင်က ပညာရေးအားနည်းမှုကို အကြမ်းဖက်မှုနှင့်ဆက်စပ်ပြော
———————————————————————-
ဇွန် ၁၂
The Kaladan Post
အကြမ်းဖက်စစ်ခေါင်းဆောင် မင်းအောင်လှိုင်က မြန်မာနိုင်ငံတွင် မတည်မငြိမ်ဖြစ်မှုများနှင့် အကြမ်းဖက်မှုများသည် ပညာရေးအားနည်းသည့်ဒေသများတွင် ပိုမိုဖြစ်ပွားပြီး အတန်းပညာတတ်မြောက်မှုနှင့် သိမြင်တွေးခေါ်နိုင်မှု အားနည်းခြင်းကြောင့်ဟု ဇွန်လ ၁၁ ရက်နေ့က ပြင်ဦးလွင်မြို့ အမှတ် ၃ အခြေခံပညာအထက်တန်းကျောင်းတွင် ပြောဆိုခဲ့သည်။ ၎င်းက နိုင်ငံ့ဝန်ထမ်းများအား နိုင်ငံရေးကင်းရှင်းပြီး တာဝန်ကျေပွန်စွာ ထမ်းဆောင်ရန်လည်း တိုက်တွန်းခဲ့သည်။ မင်းအောင်လှိုင်သည် ဇွန်လ ၉ ရက်မှစ၍ ပြင်ဦးလွင်တွင် ရောက်ရှိနေထိုင်ပြီး စစ်ဆေးမှုများ လုပ်ဆောင်နေကြောင်း တပ်သတင်းရင်းမြစ်များထံမှ သိရသည်။ သို့သော် စစ်ကောင်စီတပ်သည် ပညာရေးအားနည်းသည်ဟု ၎င်းပြောဆိုသည့် ဒေသများတွင် စာသင်ကျောင်းများကို ဗုံးကြဲတိုက်ခိုက်နေပြီး နမ္မတူမြို့နယ် မန်လီကျေးရွာရှိ စာသင်ကျောင်းနှင့် ဘုန်းကြီးကျောင်းများကို ဇွန်လ ၁၂ ရက်နံနက်ပိုင်းတွင် လေကြောင်းမှ ဗုံးကြဲတိုက်ခိုက်ခဲ့သည်။
၁၂။ စစ်တပ်က လေကြောင်းမှ ဗုံးကြဲတိုက်ခိုက်ရာ ဘုန်းကြီးကျောင်းနှင့် နေအိမ်များ ပျက်စီး
—————————————————————————–
ဇွန် ၁၂
The Kaladan Post
ရှမ်းပြည်နယ်မြောက်ပိုင်း၊ နမ္မတူမြို့နယ်ရှိ TNLA ထိန်းချုပ်ထားသော မန်လီကျေးရွာကို စစ်ကောင်စီတပ်က ဇွန်လ ၁၂ ရက် နံနက်ပိုင်းတွင် လေယာဉ်ဖြင့် ဗုံး ၂ ကြိမ်ကြဲတိုက်ခိုက်ခဲ့သည်။ ပေါင် ၅၀၀ ဗုံး ၂ လုံးကြဲချမှုကြောင့် ဘုန်းကြီးကျောင်း၊ စာသင်ကျောင်းနှင့် နေအိမ်များ ထိခိုက်ပျက်စီးခဲ့သည်။ တိုက်ပွဲဖြစ်ပွားခြင်းမရှိဘဲ ပြည်သူလူထုကို ရည်ရွယ်တိုက်ခိုက်ခြင်းဖြစ်ကြောင်း TNLA က ထုတ်ပြန်သည်။ မန်လီရွာသည် ၂၀၂၃ ဒီဇင်ဘာနှင့် ၂၀၂၄ ဇန်နဝါရီတို့တွင်လည်း ဗုံးကြဲခံရဖူးပြီး စစ်တပ်၏ မီးရှို့ဖျက်ဆီးမှုများကြောင့် ဒေသခံများစွာ နယ်မြေသစ်သို့ ထွက်ခွာခဲ့ရသည်။ စစ်ကောင်စီ၏ အပစ်ရပ်ကြေညာချက်ရှိသော်လည်း လက်နက်ကြီးပစ်ခတ်မှုနှင့် လေကြောင်းတိုက်ခိုက်မှုများ ဆက်လက်လုပ်ဆောင်နေသည်။
၁၃။ ဖားကန့်မြို့နယ် မှော်စီဇာလမ်းဆုံတွင် စစ်တပ်က ပြည်သူ ၃ ဦးကို ပစ်သတ်
———————————————————————–
ဇွန် ၁၂
The Kaladan Post
ကချင်ပြည်နယ်၊ ဖားကန့်မြို့နယ်၊ မှော်စီဇာလမ်းဆုံအနီး ဇွန်လ ၁၂ ရက် နံနက် ၆ နာရီတွင် ပြည်သူ ၃ ဦး၏ အလောင်းများကို တွေ့ရှိခဲ့ပြီး ၎င်းတို့မှာ ယခင်ညက စစ်တပ်က ပစ်ခတ်သတ် ဖြတ်ခံရဖွယ်ရှိကြောင်း ဒေသခံများက ပြောဆိုသည်။ အလောင်းများတွင် သွေးများခဲနေပြီး ယင်များအုံနေသည်ဟု ဆိုသည်။ စစ်ကောင်စီတပ်သည် မေလနှောင်းပိုဗလုံးပိုင်းမှစ၍ မှော်စီဇာဘုရားကုန်းတွင် တပ်စွဲကာ ကျောက်စိမ်းတူးဖော်ရေးလုပ်ကွက်အတွင်း ကုမ္ပဏီပိုင် ကားများနှင့် အဆောက်အအုံများကို မီးရှို့ဖျက်ဆီးနေသည်ဟု ဒေသခံများက ပြောကြားသည်။
English