ဇွန်လ (၃) သတင်းတို ကဏ္ဍ

 

—————————-

၁။ ဆွတ်ဘွမ်ကျေးရွာ ယမ်းဂိုဒေါင်ပေါက်ကွဲမှုတွင် လုပ်သား၂ဦးသေဆုံးကာ ၁၀ဦးဒဏ်ရာရ

——————————————————————————-

ဇွန် ၃

The Kaladan Post

ကချင်ပြည်နယ်၊ ဖားကန့်မြို့နယ်၊ မှော်စီဇာအနီး ဆွတ်ဘွမ်ကျေးရွာရှိ ကျောက်မျက်လုပ်ကွက်တွင် ၂၀၂၅ ခုနှစ်၊ ဇွန်လ ၃ ရက်၊ မွန်းလွဲ ၁:၁၅ နာရီတွင် ယမ်းဂိုဒေါင်ပေါက်ကွဲမှု ဖြစ်ပွားခဲ့ပြီး လုပ်သား ၂ ဦး သေဆုံးကာ ၁၀ ဦးခန့် ဒဏ်ရာရရှိခဲ့သည်။ ၎င်းပေါက်ကွဲမှုမှာ စစ်ကောင်စီတပ်၏ အသေခံဒရုန်းဖြင့် တိုက်ခိုက်မှု သို့မဟုတ် တပ်မကုန်းမှ လက်နက်ကြီးဖြင့် ပစ်ခတ်မှုကြောင့် ဖြစ်ပေါ်ခဲ့သည်ဟု ယူဆထားပြီး အကြောင်းအမှန်ကို အတည်မပြုနိုင်သေးပေ။ ထို့အပြင် စစ်ကောင်စီတပ်သည် ယခုနံနက် ၈:၄၅ နှင့် မေလ ၃၁ ရက်တို့တွင် လုံးခင်းကျေးရွာအုပ်စု၊ မှောင်စီဇာလုပ်ကွက်ရှိ ၁၁၁ ကုမ္ပဏီပိုင် ကားများနှင့် အဆောက်အအုံများကို မီးရှို့ဖျက်ဆီးခဲ့သည်။

၂။ စစ်ကောင်စီက PNLO ဌာနချုပ်ကို လက်နက်ကြီးဖြင့် တိုက်ခိုက်

———————————————————–

ဇွန် ၃

The Kaladan Post

အကြမ်းဖက်စစ်ကောင်စီက ဇွန်လ ၁ ရက်မှ ၃၀ ရက်ထိ အပစ်အခတ်ရပ်စဲရေးကာလ သက်တမ်းတိုးထားကြောင်း ကြေညာထားသော်လည်း ဆီဆိုင်မြို့နယ်၊ နောင်ထောင်ဒေသနှင့် မောက်မယ်မြို့နယ်၊ ကဒူးကြီးရှိ PNLO ဌာနချုပ်ကို ဇွန်လ ၁-၂ ရက်တွင် တိုက်ပွဲဖြစ်ပွားခြင်း မရှိဘဲ လက်နက်ကြီးဖြင့် ၁၀ ကြိမ်ထက်မနည်း အကြောင်းမဲ့ ပစ်ခတ်တိုက်ခိုက်ခဲ့သည်။ PNLA သတင်းနှင့်ပြန်ကြားရေးတာဝန်ရှိသူ ခွန်းရိန်းယံက စစ်ကောင်စီ၏ အပြောနှင့်အလုပ် မညီမျှမှုကို ထောက်ပြပြီး ၎င်းတို့၏ လက်အောက်ခံ PNO ပြည်သူ့စစ်အဖွဲ့မှလည်း အပစ်ရပ်သဘောတူညီချက်ကို လိုက်နာခြင်းမရှိကြောင်း ပြောကြားခဲ့သည်။

၃။ စစ်ကောင်စီလက်အောက်ခံ စစ်သားနှင့်ရဲ လက်နက်ခဲယမ်းများနှင့်အတူ အလင်းဝင်

——————————————————————————-

ဇွန် ၃

The Kaladan Post

ပဲခူးတိုင်း၊ ဒိုက်ဦးမြို့နယ်ရှိ ခမရ ၄၄၀ တပ်ရင်းမှ တပ်ကြပ်ကြီးတစ်ဦးသည် ကျည်ဆန်နှင့် လက်ပစ်ဗုံးများ ယူဆောင်ကာ ပဲခူးခရိုင် ပြည်သူ့ကာကွယ်ရေးတပ်ဖွဲ့ (ပကဖ) ထံ အလင်းဝင်ရောက်ခဲ့ပြီးဆုကြေးငွေ ၁၀ သိန်းကျပ် ချီးမြှင့်ခံရသည်။ အလားတူ ရွှေကျင်မြို့နယ်၊ ကွမ်းဆိပ်ကျေးရွာရှိ စစ်တပ်စခန်းမှ တပ်ကြပ်ကြီးတစ်ဦးလည်း ခဲယမ်းများနှင့်အတူ အလင်းဝင်ရောက်ခဲ့သည်။ ပဲခူးခရိုင် ပကဖက စစ်သား၊ ရဲနှင့် ပျူစောထီးများအား လက်နက်ခဲယမ်းများနှင့် အလင်းဝင်ရန် တိုက်တွန်းထားပြီး ထိုက်တန်သော ဆုကြေးငွေများ ပေးအပ်မည်ဟု ကတိပြုထားသည်။

ထို့အတူ မေလ ၃၁ ရက်တွင် ချင်းပြည်နယ်၊ ဟားခါးမြို့မှ ရဲတစ်ဦးသည် လက်နက်ခဲယမ်းများနှင့် Chinland Defense Force – Hakha (CDF-Hakha) ထံ အလင်းဝင်ရောက်ခဲ့သည်။ CDF-Hakha က ၎င်းအား နွေးထွေးစွာ ကြိုဆိုပြီး ငွေသားဆု ကြေးများ ချီးမြှင့်ကာ လုံခြုံရာနေရာသို့ တာဝန်ယူ ပို့ဆောင်ပေးမည်ဟု ကတိပြုထားသည်။ CDF-Hakha က စစ်ကောင်စီလက်အောက်မှ ပြည်သူ့ရင်ခွင်သို့ ပြောင်းလာလိုသူများကို အမြဲကြိုဆိုပြီး လုံခြုံမှုအတွက် တာဝန်ယူမည်ဟု ထုတ်ပြန်ထားသည်။

၄။ စစ်ကောင်စီက PSMS Application ဖြင့် နိုင်ငံရေးလှုပ်ရှားသူများနှင့် CDM စာရင်းစစ်ဆေး

————————————————————————–

ဇွန် ၃

The Kaladan Post

အကြမ်းဖက်စစ်ကောင်စီသည် ရုရှားနည်းပညာဖြင့် ဖန်တီးထားသော Person Scrutinization and Monitoring System (PSMS) Application ကို အသုံးပြု၍ နိုင်ငံရေးလှုပ်ရှားသူများ၊ CDM ဝန်ထမ်းများနှင့် စစ်ပြေး၊ ရဲပြေး စုစုပေါင်း လူ ၅ သောင်းခန့်၏ ကိုယ်ရေးအချက်အလက်များကို ကနဦးထည့်သွင်းပြီး နိုင်ငံတဝန်းရှိ လုံခြုံရေးဂိတ်များတွင် စစ်ဆေးလျက်ရှိသည်။

ဤ Application ကို စစ်တပ်၊ ရဲနှင့် လဝကများကသာ သီးသန့်အသုံးပြုနိုင်ပြီး စစ်ဆေးရေးဂိတ်များ၊ လေဆိပ်၊ ရေဆိပ်နှင့် မြို့အဝင်အထွက်ဂိတ်များတွင် တပ်ဆင်ထားသည်။ PSMS သည် မွေးသက္ကရာဇ်၊ မှတ်ပုံတင်နှင့် မိဘအမည်များကို ထည့်သွင်းစစ်ဆေးရုံဖြင့် လူတစ်ဦး၏ နိုင်ငံရေးပြစ်မှု၊ CDM သို့မဟုတ် စစ်ပြေးရဲပြေးအဖြစ် ချက်ချင်းဖော်ထုတ်နိုင်သည်။ လက်ရှိ Version 1.2 တွင် လူ ၅ သောင်းကျော်၏ အချက်အလက်များပါဝင်ပြီး နောက်ထပ်စာရင်းများထည့်သွင်းရန် Version 2 သို့ အဆင့်မြှင့် တင်နေသည်။

ဤ Application ကို စစ်ကောင်စီက တင်းကျပ်စွာ ထိန်းချုပ်ထားပြီး ၎င်းတို့အသိအမှတ်ပြုထားသည့် ဖုန်းနှင့်ကွန်ပျူတာများတွင်သာ တပ်ဆင်အသုံးပြုနိုင်ကာ လုံခြုံရေးအဆင့်မြင့်ထားသည်။ စာရင်းများကို “Black List” အမည်ပျက်စာရင်းအဖြစ် ဖိုင် ၉ ခုခွဲ၍ သိမ်းဆည်းထားကြောင်း သိရသည်။

၅။ ၁၁၁ ကုမ္ပဏီပိုင် မြေသယ်ကားနှင့် ဘက်ဟိုးကားများ စစ်ကောင်စီတပ်မှ မီးရှို့ဖျက်ဆီး

————————————————————————

ဇွန် ၃

The Kaladan Post

ကချင်ပြည်နယ်၊ ဖားကန့်မြို့နယ်၊ လုံးခင်းကျေးရွာအုပ်စု၊ မှော်စီဇာလုပ်ကွက်ရှိ ၁၁၁ ကုမ္ပဏီပိုင် မြေသယ်ကား ၂ စီးနှင့် ဘက်ဟိုးကား ၃ စီးတို့ကို စစ်ကောင်စီတပ်က ဇွန်လ ၃ ရက် နံနက် ၈:၄၅ တွင် ဝင်ရောက်မီးရှို့ဖျက်ဆီးခဲ့သည်။ ယခုမီးရှို့မှုမတိုင်မီ မေလ ၃၁ ရက်ကလည်း စစ်ကောင်စီတပ်က အဆိုပါကုမ္ပဏီအဆောင်များကို မီးရှို့ခဲ့ပြီး ယခုမှာ ဘုရားကုန်းအနီး တပ်စွဲထားသည့် တူညီသော စစ်ကြောင်းက ကားများကို ထပ်မံမီးရှို့ခဲ့ခြင်းဖြစ်သည်။ ဧပြီလမှစတင်ကာ စစ်ကောင်စီတပ်သည် ဖားကန့်သို့ အင်အား ၆၀၀ ကျော်ဖြင့် စစ်ကြောင်းထိုးခဲ့ပြီး လမ်းတစ်လျှောက် အရပ်သားပြည်သူများကို ဖမ်းဆီးသတ်ဖြတ်မှုများ ပြုလုပ်ခဲ့ကာ လုံးခင်းဒေသတွင် ပြည်သူ ၅ ဦးထက်မနည်း သတ်ဖြတ်ခံခဲ့ရသည်။ ဤလုပ်ရပ်များသည် ဒေသခံပြည်သူများအပေါ် စစ်ကောင်စီ၏ အကြမ်းဖက်မှုများကို ထင်ရှား စေသည်။

၆။ တော်လှန်ရေးတပ်များက စစ်ကောင်စီ၏ သေ့ဘောဘိုးစခန်းကို ဒရုန်းဖြင့်ဗုံးကြဲတိုက်ခိုက်

—————————————————————————

ဇွန် ၃

The Kaladan Post

ကရင်ပြည်နယ်၊ မြဝတီမြို့အနီး ထိုင်း-မြန်မာနယ်စပ်ရှိ စစ်ကောင်စီ၏ သေ့ဘောဘိုးစခန်းကို ဇွန်လ ၂ ရက်တွင် KNU ဦးဆောင်သော KNLA၊ KNDO နှင့် PDF ပါဝင်သည့် ပူးပေါင်းတပ်များက ဒရုန်းဖြင့် ဗုံးကြဲ၍ ထိုးစစ်ဆင်တိုက်ခိုက်ခဲ့သည်။ တိုက်ပွဲပြင်းထန်မှု ကြောင့် ဒေသခံ ၅၀၀ ကျော်သည် ထိုင်းနိုင်ငံဘက်သို့ စစ်ရှောင်ခဲ့ရသည်။ ထိုင်းစစ်တပ်က နယ်စပ်တစ်လျှောက် လုံခြုံရေးတိုးမြှင့်ကာ စောင့်ကြည့်နေသည်။ KNU ပူးပေါင်းတပ် များသည် နယ်စပ်ရှိ စစ်ကောင်စီစခန်းများစွာကို သိမ်းပိုက်ထားပြီး လက်ရှိတွင် သေ့ဘောဘိုး အပါအဝင် စခန်း ၅ ခုသာ စစ်ကောင်စီထိန်းချုပ်မှုအောက်တွင် ကျန်ရှိတော့သည်။ ဤတိုက်ခိုက်မှုသည် စစ်ကောင်စီအပေါ် ဖိအားတိုးမြှင့်လာစေပြီး ဒေသတွင်း တင်းမာမှုကို ပိုမိုမြင့်တက်စေသည်။

၇။ စစ်ကောင်စီက ပြည်သူ့နေအိမ်များအား မီးရှို့ဖျက်ဆီး

————————————————-

ဇွန် ၃

The Kaladan Post

ရှမ်းပြည်နယ်တောင်ပိုင်း၊ ညောင်ရွှေမြို့နယ်ရှိ ဘုရားတောင်နှင့် ရေပူကျေးရွာများသို့ စစ်ကောင်စီတပ်နှင့် PNO ပြည်သူ့စစ်အင်အား ၁၀၀၀ ခန့်ဖြင့် ဇွန်လ ၂ ရက်တွင် စစ်ကြောင်းထိုးဝင်ရောက်ခဲ့ရာ အမှတ် ၁၀၀၉ တပ်ရင်း – အင်းလေးပြည်သူ့ကာကွယ်ရေးတပ်ဖွဲ့က ခုခံတိုက်ခိုက်ခဲ့သည်။ နှစ်ဖက်ပစ်ခတ်မှုအတွင်း စစ်ကောင်စီတပ်နှင့် PNO ထိခိုက်သေဆုံးမှုရှိခဲ့သော်လည်း အတိအကျမသိရှိရပေ။ အင်အားမမျှသဖြင့် ပြည်သူ့ကာကွယ်ရေးတပ်ဖွဲ့မှ ဆုတ်ခွာခဲ့ရပြီး စစ်ကောင်စီတပ်က ရေပူနှင့် ဘုရားတောင်ကျေးရွာများရှိ နေအိမ် ၁၀ လုံးထက်မနည်းကို မီးရှို့ဖျက်ဆီးခဲ့သည်။ ပြည်သူ့ကာကွယ်ရေးတပ်ဖွဲ့က ယင်းလုပ်ရပ်ကို ပြင်းထန်စွာရှုတ်ချပြီး ပြည်သူလူထု၏ အသက်အိုးအိမ်ကာကွယ်ရန်နှင့် တော်လှန်ရေးအောင်မြင်ရန် ဆက်လက်တိုက်ပွဲဝင်သွားမည်ဟု ကတိပြုထားသည်။