စစ်တပ် ကာမီကာဇီ အသေခံဒရုန်း ၆ စီးဖြင့် KNU ဗဟိုဌာနချုပ်နယ်မြေကို နံနက်အမှောင်ထဲ ဗုံးကြဲတိုက်ခိုက်

 

ဒီဇင် ၁၀

The Kaladan Post

ဒီဇင်ဘာ ၁၀ ရက် နံနက် ၂:၃၀ ခန့်တွင် အကြမ်းဖက်စစ်တပ်က ကရင်ပြည်နယ်၊ KNU တပ်မဟာ(၇) နယ်မြေ၊ ဗဟိုဌာနချုပ်ရုံးနယ်မြေအတွင်းသို့ အသေခံဒရုန်း ၆ စီးဖြင့် ဆက်တိုက်ဗုံးကြဲ တိုက်ခိုက်ခဲ့ကြောင်း KNU သတင်းရင်းမြစ်များက အတည်ပြုသည်။ ဒရုန်းများကို အလင်းရောင်မထည့်ဘဲ အနိမ့်ပျံသန်းကာ လာရောက်တိုက်ခိုက်ခြင်းဖြစ်ပြီး ဒုတိယအစင်းမှာ မပေါက်ကွဲဘဲ ကျန်ရှိခဲ့သော်လည်း လူထိခိုက်ဒဏ်ရာရရှိမှု မရှိသေးကြောင်း သိရသည်။

ယခုဖြစ်စဉ်သည် ၂၀၂၅ ခုနှစ်အတွင်း KNU ဗဟိုဌာနချုပ်နယ်မြေကို စစ်တပ်က အသေခံဒရုန်းဖြင့် ဗုံးကြဲတိုက်ခိုက်ခြင်း ၄ ကြိမ်မြောက်ဖြစ်ပြီး ယခင်ဇန်နဝါရီ၊ ဇွန်လနှင့် အောက်တိုဘာလတို့ တွင်လည်း အလားတူတိုက်ခိုက်မှု အကြိမ်ကြိမ်ရှိခဲ့သည်။ အဆိုပါတိုက်ခိုက်မှုများတွင် အရပ်သားတစ်ဦး ဒဏ်ရာရရှိခဲ့ဖူးသော်လည်း ယခုတစ်ကြိမ်တွင် လူထိခိုက်မှုမရှိသေးပေ။

 

ဒေါက်တာတေဇာဆန်းကို ဖမ်းပေးရင် သိန်း ၃၀၀ နှင့် ရာထူးတစ်ဆင့်တိုး‌ပေးရန် မက်လုံးပေး၊ အသံတိတ်သပိတ်ဦးဆောင်သူ ၁၀ ဦးကို ရွေးကောက်ပွဲဥပဒေနဲ့ အမှုဖွင့်

 

ဒီဇင် ၁၀

The Kaladan Post

ဒီဇင်ဘာ ၁၀ ရက်တွင် စစ်ကောင်စီက အသံတိတ်သပိတ်လှုပ်ရှားမှုကို ဦးဆောင်သူ ဒေါက်တာတေဇာဆန်း၊ ကိုနန်းလင်း၊ ကိုခန့်ဝေဖြိုး၊ ကိုထက်မြတ်အောင်၊ မမေချီ၊ မရွှန်း အပါအဝင် ဆန္ဒပြသူ ၁၀ ဦးကို ရွေးကောက်ပွဲနှောင့်ယှက်ဟန့်တားမှု ကာကွယ်ရေးဥပဒေ ပုဒ်မ ၂၃(ခ) ဖြင့် အမှုဖွင့်လိုက်သည်။ အဆိုပါပုဒ်မအရ ပြစ်မှုထင်ရှားပါက ထောင်ဒဏ် ၅ နှစ်မှ ၁၀ နှစ်အထိ ချမှတ်ခံရနိုင်ပြီး ယခုအမှုမှာ ဒီဇင်ဘာ ၃ ရက်က မန္တလေး၊ ချမ်းအေးသာစံမြို့နယ်တွင် ရွေးကောက်ပွဲဆန့်ကျင်ဆန္ဒပြမှုကြောင့် ဖြစ်ပွားခြင်းဖြစ်သည်။

ထို့အပြင် စစ်ကောင်စီက ဒေါက်တာတေဇာဆန်းကို ဖမ်းဆီးပေးနိုင်သူတိုင်းကို ငွေကျပ်သိန်း ၃၀၀ နှင့် တစ်ဆင့်တိုး ရာထူးတိုးပေးမည်ဟု စစ်တပ်၊ ရဲ၊ ပျူစောထီး၊ ပြည်သူ့စစ်များကို မက်လုံးပေးထားကာ မန္တလေးနှင့် အမရပူရမြို့နယ်အတွင်း သတင်းပေးသူများကို သိန်း ၂၀၀ ချက်ချင်းပေးမည်ဟု လိုက်လံကြေညာနေကြောင်း သိရသည်။

 

သားအောင်ပြည့်စုံကို နိုင်ငံပိုင်ပရောဂျက်အားလုံး ချပေးထားတဲ့ မင်းအောင်လှိုင် အဂတိတိုက်ဖျက်ရေးလုပ်ဟန်ဆောင်

 

ဒီဇင် ၁၀

The Kaladan Post

ဒီဇင်ဘာ ၉ ရက် အပြည်ပြည်ဆိုင်ရာ အဂတိလိုက်စားမှုတိုက်ဖျက်ရေးနေ့အခမ်းအနားတွင် စစ်ခေါင်းဆောင် မင်းအောင်လှိုင်က အဂတိကျူးလွန်သူတိုင်းကို ကျောသားရင်သား မခွဲခြားဘဲ အရေးယူမည်ဟု ဟန်ပြောဆိုခဲ့သော်လည်း လက်တွေ့တွင် သူ့သား အောင်ပြည့်စုံ ပိုင်ဆိုင်သည့် Sky One၊ Yetagon စသည့် ကုမ္ပဏီများက တပ်မတော်ဆေးရုံကြီးများ၊ ရတနာပုံမြို့သစ်၊ ကျောက်ဖြူရေနက်ဆိပ်ကမ်း၊ ရုရှားလေယာဉ်ဂိုဒေါင်၊ လေတပ်အိမ်ရာများအပါအဝင် နိုင်ငံပိုင်ပရောဂျက်ကြီးများအားလုံးကို ပြိုင်ဘက်မရှိ လုပ်ကိုင်ခွင့်ရယူနေကြောင်း စီးပွားရေး လောက်အသိုင်းအဝိုင်းက သုံးသပ်ပြောဆိုနေကြသည်။

၂၀၂၁ အာဏာသိမ်းပြီးနောက် ၄ နှစ်တာကာလအတွင်း အောင်ပြည့်စုံ လက်ဝင်သည့် ကုမ္ပဏီများသည် နိုင်ငံပိုင်မြေ ဧကထောင်ချီ ဂရန်လွှဲပြောင်းရယူပြီး ရုရှားဆီတင်သွင်းရေး၊ လက်နက်ဝယ်ယူရေးအထိ ပါဝင်လာကာ မြန်မာနိုင်ငံတွင် အချမ်းသာဆုံး သားအဖအဖြစ် ထင်ရှားနေသော်လည်း မင်းအောင်လှိုင်က အဂတိတိုက်ဖျက်ရေးဟု ဟန်ပြဟောပြောနေခြင်း ကြောင့် ပြည်သူလူထုအတွင်း ဒေါသထွက်မှုများ ပိုမိုမြင့်တက်လျက်ရှိသည်။

ဘုတလင်-သပြေပင်လမ်းတွင် စစ်ကြောင်းကို ကြားဖြတ်ပစ်၊ စစ်သားအများအပြား ထိခိုက်ကျဆုံး၊ ကားနဲ့အလျင်သယ်ဆောင်

 

ဒီဇင် ၁၀

The Kaladan Post

ဒီဇင်ဘာ ၉ ရက် နံနက် ၁၀ နာရီ ၁၅ မိနစ်ခန့်က စစ်ကိုင်းတိုင်း၊ ဘုတလင်မြို့မှ သပြေပင်ရွာသို့ စစ်ကြောင်းထိုးလာသော အကြမ်းဖက်စစ်တပ်ကို တော်လှန်ရေးပူးပေါင်းတပ်ဖွဲ့များက ကြားဖြတ်တိုက်ခိုက်ရာ စစ်သားများ ထိခိုက်ကျဆုံးမှု များပြားခဲ့ကြောင်း ဘုတလင်မြို့နယ် ပကဖ တာဝန်ရှိသူက အတည်ပြုသည်။ ဒဏ်ရာရရှိသည့် စစ်သားများကို ကားများဖြင့် ဘုတလင်မြို့ အထိုင်စခန်းသို့ အလျင်အမြန် ပြန်သယ်ယူသွားခဲ့ရသည်။

အဆိုပါ ကြားဖြတ်တိုက်ခိုက်မှုကို ဘုတလင်မြို့နယ် တပ်ပေါင်းစုစစ်ကြောင်း၊ ညောင်ဦးခရိုင်တပ်ရင်း ၃၊ ပကဖ (BA) ဗားမားအာမီ တပ်ရင်း ၁၊ ပြည်သူ့အသံ တိုက်ခိုက်ရေးအဖွဲ့၊ ဒီပဲယင်းနှင့် ဗိုလ်တောက်တဲ့အဖွဲ့တို့က ပူးပေါင်းလုပ်ဆောင်ခဲ့ခြင်းဖြစ်ပြီး စစ်သေစာရင်းကို အတိအကျ အတည်မပြုနိုင်သေးသော်လည်း ထိခိုက်မှုမှာ များပြားကြောင်း သိရသည်။

 

ဆွီဒင်ပင်စင်ရံပုံငွေ စစ်တပ်နဲ့ဆက်နွှယ်ကုမ္ပဏီ ၄ ခုကနေ ဒေါ်လာသန်းချီ ရင်းနှီးမြှပ်နှံမှု ချက်ချင်းရုပ်သိမ်း

 

ဒီဇင် ၁၀

The Kaladan Post

ဒီဇင်ဘာ ၉ ရက်တွင် ဆွီဒင်ပင်စင်ရံပုံငွေအဖွဲ့ AP7 က မြန်မာစစ်တပ်အား လက်နက်ရောင်းချသည့် အိန္ဒိယကုမ္ပဏီ BEL နှင့် HAL၊ စစ်အုပ်စုအား ဓာတ်ငွေ့ငွေကြေးထောက်ပံ့နေသည့် ထိုင်း PTTEP နှင့် စစ်တပ်ပိုင် MPT နှင့် ပူးတွဲလုပ်ကိုင်နေသည့် ဂျပန် Sumitomo Corporation တို့တွင် ရင်းနှီးမြှပ်နှံထားသည့် ဒေါ်လာသန်းချီတန်ဖိုးရှိ ရန်ပုံငွေများကို ချက်ချင်းပြန်လည်ရုပ်သိမ်းကြောင်း ကြေညာခဲ့သည်။ အဆိုပါဆုံးဖြတ်ချက်ကို Justice For Myanmar၊ Swedish Burma Committee နှင့် Fair Finance Guide တို့က လေးနက်စွာ ကြိုဆိုခဲ့သည်။

ပြီးခဲ့သည့်နိုဝင်ဘာလက ထုတ်ပြန်ခဲ့သည့် ပူးတွဲစုံစမ်းတွေ့ရှိချက်အရ ဆွီဒင်ပြည်သူ ၆ သန်းကျော်၏ ပင်စင်ငွေပါဝင်သည့် AP7 သည် စစ်အုပ်စုအား ငွေကြေးနှင့် လက်နက်ထောက်ပံ့နေသည့် ကုမ္ပဏီ ၁၂ ခုတွင် အများဆုံးရင်းနှီးမြှပ်နှံထားခဲ့ခြင်းဖြစ်ရာ ယခုရုပ်သိမ်းမှုသည် စစ်အုပ်စု၏ အဓိကဝင်ငွေရင်းမြစ်များကို ဖြတ်တောက်ရာတွင် အရေးပါသည့် ခြေလှမ်းတစ်ရပ်အဖြစ် သုံးသပ်ခံနေရသည်။

NUG သစ်တော၊ ပတ်ဝန်းကျင်ကဏ္ဍ ဝန်ထမ်းများ အသက်အန္တရာယ်ခြိမ်းခြောက်ခံရမှုကြောင့် သယံဇာတစီမံခန့်ခွဲမှု ယာယီရပ်ဆိုင်း

 

ဒီဇင် ၁၀

The Kaladan Post

အမျိုးသားညီညွတ်ရေးအစိုးရ (NUG) သယံဇာတနှင့် သဘာဝပတ်ဝန်းကျင်ထိန်းသိမ်းရေး ဝန်ကြီးဌာနလက်အောက်ရှိ သစ်တော၊ ပတ်ဝန်းကျင်ကဏ္ဍတွင် ဝန်ထမ်းများကို အသက်အန္တရာယ်ခြိမ်းခြောက်မှု၊ ပဋိပက္ခများနှင့် အကြမ်းဖက်လုပ်ကြံမှုများ ပေါ်ပေါက်နေသဖြင့် ၂၀၂၅ ခုနှစ် ဒီဇင်ဘာ ၁ ရက်မှစ၍ သစ်နှင့်သစ်တောထွက်ပစ္စည်း စီမံခန့်ခွဲမှု၊ တရားမဝင်ထုတ်လုပ်မှု တားမြစ်ရေးနှင့် အခွန်ကောက်ခံမှုတို့ကို ယာယီရပ်ဆိုင်းကြောင်း ကြေညာလိုက်သည်။

ဝန်ကြီးဌာနက ဝန်ထမ်းများ၏ စိတ်ရုပ်လုံခြုံရေးကို ဦးစားပေးကာ ပဋိပက္ခလျှော့ချရန် ရည်ရွယ်ပြီး ရပ်ဆိုင်းမှုကို ဆုံးဖြတ်ခဲ့ခြင်းဖြစ်ကာ ယခုအခါ သစ်သယံဇာတဆိုင်ရာ နည်းပညာအကြံပေးခြင်း၊ ပတ်ဝန်းကျင်အသိပညာပေးခြင်းတို့ကိုသာ ဆက်လက်ဆောင်ရွက်မည်ဟု ဆိုသည်။ ဝန်ထမ်းများ အားလုံးသည် တော်လှန်ရေးရပ်တည်ချက်ကို ဆက်လက်ကိုင်စွဲထားကာ စစ်အာဏာရှင် အမြစ်ပြတ်အထိ ပါဝင်ဆောင်ရွက်သွားမည်ဟု ဝန်ကြီးဌာနက ထပ်လောင်း အတည်ပြုထားသည်။

ယင်းမာပင်၊ ရွှေရေကြည်သပိတ်စစ်ကြောင်း ညနေသပိတ်ထွက်၊ အတုအယောင်ရွေးကောက်ပွဲ ဆန့်ကျင်ဆန္ဒပြ

 

ဒီဇင် ၁၀

The Kaladan Post

ဒီဇင်ဘာ ၉ ရက် ညနေပိုင်းတွင် ယင်းမာပင်မြို့နယ်အတွင်း ရွှေရေကြည်သပိတ်စစ်ကြောင်းက အောင်လံလွှင့်ကာ အကြမ်းဖက်စစ်တပ်ကျင်းပရန် စီစဉ်ထားသည့် အတုအယောင်ရွေးကောက်ပွဲကို ပြင်းပြင်းထန်ထန် ဆန့်ကျင်ကန့်ကွက်သည့် ညနေသပိတ်ကို ရဲရဲဝံ့ဝံ့ ထွက်ပေါ်ဆန္ဒပြခဲ့ကြောင်း သိရသည်။

ပြည်သူများ စုစည်းပါဝင်ခဲ့သည့် ယခုသပိတ်သည် စစ်အာဏာရှင်စနစ်ကို အမြစ်ပြတ်ချေမှုန်းရန်နှင့် တရားမဲ့ ရွေးကောက်ပွဲအစီအစဉ်ကို လုံးဝပယ်ချကြောင်း ပြသနေသည့် တော်လှန်ရေးအင်အားကြီးထွားမှုတစ်ရပ်အဖြစ် တွေ့ရှိရသည်။

 

 

 

ကနီမြို့နယ် ချင်းတွင်းမြစ်ဆိပ်ကမ်း၊ ကန်ပက်လက်အနီးကို စစ်တပ် လေကြောင်းရန် ၁၂ ကြိမ်ကျော် ဗုံးကြဲ

 

ဒီဇင် ၁၀

The Kaladan Post

ဒီဇင်ဘာ ၉ ရက် မွန်းလွဲပိုင်းတွင် စစ်ကိုင်းတိုင်း၊ ကနီမြို့နယ်၊ ချင်းတွင်းမြစ်အတွင်း မုဌေါရွာ ကူတို့ဆိပ်ကမ်းကို စစ်တပ်က လေယာဉ်ဖြင့် ဗုံး ၄ လုံးကြဲချ၍ ရော့ကတ် ၂ လုံးပစ်ခတ်တိုက်ခိုက်ရာ အမျိုးသမီး ၁ ဦး ဒဏ်ရာရရှိခဲ့ကြောင်း ဒေသခံများက အတည်ပြုသည်။ အလားတူ ချင်းပြည်နယ်၊ ကန်ပက်လက်မြို့အနီး ဟိုတယ်ဇုန်ဘက်ကို တိုက်ပွဲမရှိဘဲ လေကြောင်းရန် ၈ ကြိမ်ဆက်တိုက် ဗုံးကြဲခဲ့သော်လည်း အရပ်သားထိခိုက်မှု မရှိကြောင်း သိရသည်။

ယခုလေကြောင်းတိုက်ခိုက်မှုများသည် စစ်တပ်တပ်စွဲထားခြင်းမရှိသည့် နေရာများကို ရည်ရွယ်ချက်ရှိရှိ ပစ်မှတ်ထားတိုက်ခိုက်နေခြင်းဖြစ်ပြီး ပြည်သူများအကြား ကြောက်ရွံ့ထိတ်လန့်မှုများ ဖြစ်ပေါ်စေကာ စစ်အကြမ်းဖက်မှုကို ပိုမိုထင်ရှားစေနေသည်။

 

 

NUG ဝန်ကြီးဌာန ၁၇ ခုမှ ၁၂ ခုသို့ လျှော့ချ၊ မြေပြင်စိုးမိုးနယ်မြေ ထိရောက်စီမံနိုင်ရေး ပြုပြင်ပြောင်းလဲ

 

ဒီဇင် ၁၀

The Kaladan Post

ဒီဇင်ဘာ ၉ ရက်တွင် အမျိုးသားညီညွတ်ရေးအစိုးရ (NUG) ဝန်ကြီးချုပ် မန်းဝင်းခိုင်သန်းက တော်လှန်ရေးတပ်များ သိမ်းပိုက်ထိန်းချုပ်ထားသော မြေပြင်နယ်မြေများကို လက်တွေ့ကျကျ စီမံအုပ်ချုပ်နိုင်ရန်နှင့် လူ့စွမ်းအားနှင့် ဘဏ္ဍာငွေများကို ထိရောက်စွာ အသုံးပြုနိုင်ရန် ဝန်ကြီးဌာန ၁၇ ခုမှ ၁၂ ခုသို့ လျှော့ချဖွဲ့စည်းလိုက်ကြောင်း ကြေညာခဲ့သည်။ အချို့ဌာနများကို လုပ်ပိုင်ခွင့်ထပ်တူသဖြင့် ပေါင်းစည်းခဲ့သလို လက်ရှိကာလတွင် အကောင်အထည်ဖော်ရန် ခက်ခဲသည့် ဌာနများကို ဖျက်သိမ်းခဲ့ပြီး အချို့ကို ဌာနကြီးအဖြစ် ပြောင်းလဲဆောင်ရွက်သွားမည်ဟု ရှင်းပြသည်။

ယခုပြုပြင်ပြောင်းလဲမှုသည် ပထမအဆင့်သာဖြစ်ပြီး ဒုတိယအဆင့်တွင် တိုင်းရင်းသားတော်လှန်ရေးအင်အားစုများ ပိုမိုပါဝင်နိုင်သည့် အားကောင်းသော အစိုးရဖွဲ့စည်းရန်၊ တတိယအဆင့်တွင် စစ်အုပ်စုအမြစ်ပြတ်ချေမှုန်းပြီး အသွင်ကူးပြောင်းရေးအစိုးရ တည်ထောင်ရန် ရည်ရွယ်ကြောင်း ဝန်ကြီးချုပ်က အသိပေးခဲ့သည်။ သမ္မတ ဦးဝင်းမြင့်နှင့် နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်တို့သည် နိုင်ငံတော်အကြီးအကဲများအဖြစ် ဆက်လက်ပါဝင်လျက်ရှိသည်။

ဒီဇင်ဘာ ၁၀ ရက်နေ့ ပြည်လုံးကျွတ် အသံတိတ်သပိတ် ရာနှုန်းပြည့်အောင်မြင်၊ မြို့နယ်ရာချီ လူသူကင်းမဲ့ တိတ်ဆိတ်၊ စစ်အုပ်စု အရှက်တကွဲ အတုအယောင်ရွေးကောက်ပွဲ ငြင်းပယ်ခံရ

 

ဒီဇင် ၁၀

The Kaladan Post

ဒီဇင်ဘာ ၁၀ ရက် ပြည်လုံးကျွတ် အသံတိတ်သပိတ်တွင် ရန်ကုန်၊ မန္တလေး၊ အမရပူရ၊ မုံရွာ၊ ပခုက္ကူ၊ ဖားကန့်၊ မေမြို့၊ ယင်းမာပင်၊ ဆောမြို့၊ မြဝတီ၊ ဘုရားသုံးဆူ၊ အရာတော်၊ ရေဦး၊ မိုးကုတ်၊ ဆားလင်းကြီး၊ ဒီပဲယင်း၊ ကနီ၊ ချောင်းဦး၊ မြောင်၊ ပုလဲ၊ ကလေး၊ ဘုတလင်၊ တန့်ဆည်၊ ခင်ဦး၊ ရွှေဘို၊ ဝက်လက်၊ မင်းကင်း၊ ကန့်ဘလူ၊ ကောလင်း၊ ကသာ၊ ထီးချိုင့်၊ အင်းတော်၊ ပင်လည်ဘူး၊ ဗန်းမောက် စသည့် မြို့နယ်ရာချီတွင် ပြည်သူများ ရာနှုန်းပြည့်ပါဝင်ခဲ့ပြီး လမ်းမများပေါ်တွင် လူအသွားအလာ၊ ယာဉ်အသွားအလာ လုံးဝကင်းမဲ့သွားခဲ့ကာ စျေးဆိုင်များသာ ဖွင့်ထားရုံမျှသာ ကျန်ရှိခဲ့သည်။ ရန်ကုန်တွင် ယာဉ်ကြောပိတ်ဆို့မှု ပျောက်ကွယ်သွားခဲ့ပြီး အင်းစိန်-ဆူးလေ ခရီးစဉ်ကို မိနစ် ၃၀ အတွင်း ရောက်ရှိနိုင်ခဲ့ကာ မန္တလေးတွင်လည်း ချောတိုင်တက်ပွဲ၊ ဘောလုံးပွဲများလုပ်ခိုင်း၍ သပိတ်ဖျက်ရန် ကြိုးပမ်းသော်လည်း ပြည်သူများ အိမ်တွင်းသာ နေထိုင်ခဲ့ကြသည်။

ဖားကန့်တွင် သပိတ်ရာနှုန်းပြည့်အောင်မြင်နေချိန် စစ်တပ်က မြို့တစ်မြို့လုံး ပိတ်ဆို့စစ်ဆေးနေစဉ် ဘေလီတံတားထိပ်တွင် ဗုံးပေါက်ကွဲမှု ဖြစ်ပွားပြီး စစ်သား ၂ ဦး ဒဏ်ရာရရှိခဲ့ပြီး စစ်အုပ်စုက စက်သုံးဆီရောင်း၊ ကလေးများကို မုန့်ပေး၊ ပွဲလုပ်ခိုင်း၊ နေ့လယ် ၃ နာရီအပြီး အပြင်ထွက်လျှင် ပစ်သတ်မည်ဟု ခြိမ်းခြောက်သည့်တိုင် စစ်ကိုင်းတိုင်း မြို့နယ် ၂၀ ကျော်နှင့် နိုင်ငံတဝန်း ပြည်သူများက အတုအယောင်ရွေးကောက်ပွဲကို တစ်တိုင်းပြည်လုံး ငြင်းပယ်ခဲ့ကြသည်။ ယခုသပိတ်အောင်မြင်မှုသည် စစ်အုပ်စု၏ အနောက်မြောက်တိုင်းစစ်ဌာနချုပ်ရှိရာ မုံရွာမြို့အပါအဝင် အဓိကမြို့ကြီးများတွင်ပင် ပြည်သူများ လုံးဝပါဝင်ခဲ့ခြင်းကြောင့် စစ်အုပ်စုအား အရှက်တကွဲအကွဲ ဖြစ်စေခဲ့ပြီး တော်လှန်ရေးအင်အား ပိုမိုအားကောင်းလာကြောင်း သက်သေပြလျက်ရှိသည်။