နိုဝင် (၁၀) သတင်းတိုပေါင်းချုပ်

အတုရွေးကောက်ပွဲ ကျင့်ပနိုင်ရန်အတွက် မတ္တရာ၊ စဥ့်ကူး၊ သပိတ်ကျင်းတို့တွင် စစ်တပ်ထိုးစစ် ပြင်းထန်လာကြောင်း PDF (မန္တလေး) အသိပေး

နိုဝင် ၁၀
The Kaladan Post
အကြမ်းဖက်စစ်အုပ်စုသည် ၂၀၂၅ ဒီဇင်ဘာ၊ ၂၀၂၆ ဇန်နဝါရီတွင် တရားမဝင် အတုရွေးကောက်ပွဲ ကျင်းပရန် ကြံစည်နေပြီး ယင်းမတိုင်မီ မတ္တရာ၊ စဥ့်ကူး၊ သပိတ်ကျင်းမြို့နယ်များအပါအဝင် တော်လှန်ရေးတပ်ဖွဲ့များ ထိန်းချုပ်ထားသည့် နယ်မြေများကို သာလွန်အင်အားဖြင့် အပြင်းအထန် ထိုးစစ်ဆင် တိုက်ခိုက်လျက်ရှိကြောင်း ပြည်သူ့ကာကွယ်ရေးတပ်မတော် (မန္တလေး) က ထုတ်ပြန် သည်။ အဆိုပါ မြို့နယ်များတွင် တိုက်ပွဲများ တစ်နေ့ထက်တစ်နေ့ ပြင်းထန်လာနေသဖြင့် ဒေသခံ ပြည်သူများ ဘေးကင်းရေးအတွက် ကြိုတင်ပြင်ဆင်မှုများ လုပ်ဆောင်ထားရန် PDF (မန္တလေး) တိုက်တွန်းထားသည်။ စစ်အုပ်စု၏ ထိုးစစ်ကို အစွမ်းကုန် ခုခံကာကွယ် သွားမည်ဖြစ်ပြီး တော်လှန်ရေး အောင်ပွဲအထိ မဆုတ်မနစ် ဆက်လက်ချီတက်မည်ဟု PDF (မန္တလေး) အနေဖြင့် ပြည်သူလူထုကို ကတိပြု ပြောဆိုသည်။

စစ်ကိုင်း ဝက်မှေးရွာမှ ရဲတစ်ဦးနှင့် မြ၀တီတွင် စစ်သား ၂ ဦး လက်နက်အပြည့်အစုံဖြင့် PDF ထံ အလင်းဝင်

နိုဝင် ၁၀
The Kaladan Post
နိုဝင်ဘာ ၉ ရက် ညနေပိုင်းတွင် စစ်ကိုင်းတိုင်း ဝက်မှေးကျေးရွာအတွင်း တပ်စွဲထားသော စစ်တပ် လက်အောက်ခံ ရဲတစ်ဦး PDF ထံ အလင်းဝင်ရောက်လာခဲ့ကြောင်း သတင်းရင်းမြစ်က ပြောဆို သည်။ အဆိုပါ ရဲသည် ကျည်ထုပ်တစ်ထုပ်နှင့် ကျည်ဘောက် ၃ ခုကို ယူဆောင်လာခဲ့ပြီး သေနတ် မပါရခြင်းမှာ ယူဆောင်ရန် မလုံခြုံဟု ယူဆခဲ့ခြင်းကြောင့်ဖြစ်ဟု ၎င်းကဆိုသည်။ ယခင်က ထိုရဲ၏ ဇနီးကို PDF က ဖမ်းဆီးခဲ့ရာမှ ဆက်သွယ်မှု ရရှိခဲ့ခြင်းဖြစ်ကြောင်း ဒေသ PDF တာဝန်ရှိသူက ပြောသည်။ စစ်ကောင်စီတပ်များသည် နိုဝင်ဘာ ၁ ရက်မှ စတင်၍ ဝက်မှေးရွာတွင် တပ်စွဲထားခြင်း ဖြစ်ကြောင်းသိရသည်။ အလားတူ ကရင်ပြည်နယ် မြ၀တီမြို့နယ်၊ လေးကေ့ကော်သို့ စစ်ကြောင်း ထိုးနေသော တပ်မ ၂၂ စစ်ကြောင်းမှ စစ်သား ၂ ဦးသည် လက်နက် ၂ လက်နှင့်အတူ ထွက်ပြေး လာပြီး ကော်ဘရာစစ်ကြောင်းထံ အလင်းဝင်ခဲ့သည်။ ရွာသားများက တွေ့ရှိ၍ ကော်ဘရာထံ ပို့ဆောင်ခဲ့ခြင်းဖြစ်ကြောင်း သိရသည်။ ကော်ဘရာစစ်ကြောင်းမှ စော်ကော်က လူမှုကွန်ရက်တွင် တပ်မ ၂၂ မှ စစ်သားများ တစ်ဦးပြီးတစ်ဦး အလင်းဝင်လာနေခြင်းကို သတိပြုရန်နှင့် မို့လို့ကို့ ဦးဆောင်မှုကြောင့် အောင်မြင်မှုများ ဆက်လက်ရရှိလာမည်ဟု ရေးသားထားသည်။ အလင်းဝင်လာသော စစ်သား ၂ ဦးကို ကော်ဘရာက ကောင်းမွန်စွာ စောင့်ရှောက်ထားပြီး ဆုငွေချီးမြှင့်ကာ သွားလိုရာ နေရာသို့ ပို့ဆောင်ပေးမည်ဟု အဆိုပါတပ်ဖွဲ့က ပြောဆိုသည်။

မကွေး ပေါက်မြို့နယ် – စစ်ကြောင်းမှ ပျူစောထီး ၁ ဦး လက်နက်ခဲယမ်းများ ယူဆောင်ပြီး PDF ထံ အလင်းဝင်

နိုဝင် ၁၀
The Kaladan Post
မကွေးတိုင်း ပေါက်မြို့နယ်တောင်ပိုင်း စစ်ကြောင်းထိုးဝင်ရောက်နေသော တပ်မ ၉၉ လက်အောက် ခံ ခမရ ၁၄ (ကျောက်ဆည်) တပ်ရင်းမှ ပျူစောထီး သင်တန်းဆင်း ၁ ဦး နိုဝင်ဘာ ၉ ရက်တွင် အလင်းဝင်ရောက်ခဲ့ကြောင်း ပေါက်မြို့နယ် ပြည်သူ့ကာကွယ်ရေးတပ်ဖွဲ့ (ပကဖ) က ထုတ်ပြန် သည်။ အဆိုပါ ပျူစောထီးသည် MA-1 သေနတ် ၁ လက်၊ ကျည်ဘောက် ၃ ဘောက်၊ 5.56 ကျည် ၁၀၀ တောင့်၊ အီနာဂါ ၁ လုံး၊ လက်ပစ်ဗုံး ၁ လုံး၊ RPG ဖူး ၁ ဖူး ယူဆောင်လာခဲ့သည်။ ယခင် နိုဝင်ဘာ ၁ ရက်က အလားတူ စစ်ကြောင်းမှ ခမရ ၁၀၉ နှင့် ခမရ ၄၁၉ တပ်သား ၂ ဦး ထွက်ပြေး လာခဲ့ပြီး ပကဖက ဖမ်းဆီးရမိခဲ့ရာ RPG ၁ လက်၊ အဖူး ၄ ဖူး၊ MA4 ၁ လက်၊ 40mm အသီး ၁၂ လုံး၊ လက်ပစ်ဗုံး ၂ လုံး၊ 5.56 ကျည် ၁၀၀ တောင့်၊ G3 ကျည် ၁၉ တောင့် သိမ်းဆည်းရရှိခဲ့သည်။ တစ်ဦးမှာ ခြေထောက်နာကျန်ခဲ့ခြင်း၊ ကျန်တစ်ဦးမှာ ထွက်ပြေးလာခြင်း ပေါက်မြို့နယ်(ပကဖ) က ပြောဆိုသည်။ စစ်ကြောင်းမှာ ဆိပ်ဖြူ ကပစ ၂၂ မှ အင်အား ၃၀၀ ကျော်ပါ တပ်ရင်း ၃ ခု ပါဝင်ပြီး နိုဝင်ဘာ ပထမပတ်က စတင်ဝင်ရောက်ခဲ့ခြင်း ဖြစ်ကြောင်းသိရသည်။ ပေါက်ပကဖက ပြည်သူ ထောက်ခံမှု မရှိသော စစ်သား၊ ပျူစောထီးများ နယ်မြေခံ တော်လှန်ရေးတပ်များနှင့် ချိတ်ဆက်၍ အလင်းဝင်ရန် တိုက်တွန်းထားပြီး ဒေသတွင်း စစ်ရေးလှုပ်ရှားမှုများ အရှိန်မြှင့်ဆောင်ရွက်မည် ဖြစ်ရာ ပြည်သူများ လေကြောင်းရန်ကို သတိထားရန်နှင့် ပူးပေါင်းပါဝင်ရန် နှိုးဆော်ထားသည်။

ကျားဖြန့်ဗဟိုချက် KK Park အဆောက်အဦး ပြိုကျ မောင်းထုတ်မှုဟာ လုပ်ဇာတ်သာဖြစ်ဟု ပညာရှင်များ သုံးသပ်

နိုဝင် ၁၀
The Kaladan Post
ကရင်ပြည်နယ် မြဝတီမြို့နယ်ရှိ ကျားဖြန့်လုပ်ငန်း ဗဟိုချက်ဖြစ်သည့် KK Park အတွင်း လွန်ခဲ့တဲ့ အောက်တိုဘာလက လူများကို မောင်းထုတ်ပြီးနောက် စစ်ကောင်စီက KK Park အဆောက်အဦး များကို နေ့စဉ် ဖောက်ခွဲဖျက် ဆီးမှုများ လုပ်ဆောင်ခဲ့ရာ အဆောက်အဦ ၁၀၁ လုံး ပြိုကျပြီးဖြစ် ကြောင်း နိုင်ငံပိုင်သတင်းစာတွင် ဖော်ပြထားသည်။ KK Park အဆောက်အဦး ၁၄၈ လုံး ရှိသည့် အဆိုပါ ပါတ်တွင် တစ်ထပ်မှ ကိုးထပ်အထိ လူနေအဆောက်အဦများ၊ ဈေးဆိုင်၊ ဟိုတယ်၊ ဆေးရုံ၊ ဂိုဒေါင်၊ GYM၊ KTV၊ SPA စသည့် အဆောက်အဦများ ပါဝင်ပြီး ကျန်ရှိ ၄၇ လုံးကို ဆက်လက် ဖြိုချဖျက်ဆီးမည်ဟု ဆိုသည်။ စစ်ကောင်စီက အွန်လိုင်းလိမ်လည်မှု ကျူးလွန်သူ ပြည်ပနိုင်ငံသား ၉၀% ကျော်မှာ ထိုင်းနယ်စပ်မှ ဝင်ရောက်လာခြင်းဟု ဆိုသော်လည်း လေ့လာသူများက အနီးတဝိုက်တွင် ကျားဖြန့်စင်တာများ ဆက်ရှိနေဆဲဖြစ်ရာ နိုင်ငံတကာ ဖိအားလျော့ရန် လုပ်ဇာတ်သာ ဖြစ်သည်ဟု သုံးသပ်ကြသည်။

ရန်ကုန်တော်လှန်ရေး ခြေလှမ်းတိုင်း ရှေ့တန်းမှ ပါဝင်နေဟု NUG ဝန်ကြီးချုပ် ချီးကျူး

နိုဝင် ၁၀
The Kaladan Post
နိုဝင်ဘာ ၉ ရက်က ကျင်းပသော ရန်ကုန်လွှတ်တော် ဒသမအကြိမ်အစည်းအဝေးတွင် အမျိုးသား ညီညွတ်ရေးအစိုးရ (NUG) ပြည်ထောင်စုဝန်ကြီးချုပ် မန်းဝင်းခိုင်သန်းက ရန်ကုန်သည် နွေဦးတော် လှန်ရေး စတင်ကတည်းက စစ်အုပ်စုကို နည်းလမ်းပေါင်းစုံဖြင့် ခုခံတွန်းလှန်ခဲ့ပြီး နယ်မြေမစိုးမိုးရ သေးသော်လည်း နိုင်ငံရေးအရ အဆင်သင့်ဖြစ်အောင် ကြိုးပမ်းနေသည်ဟု ချီးကျူးပြောကြားခဲ့ သည်။ ရန်ကုန်ပြည်သူများ၏ သတ္တိ၊ တော်လှန်ရေးအင်အားစုများ၏ စွန့်လွှတ်အနစ်နာခံမှုကို လေးစားဂုဏ်ပြုကြောင်း ဖော်ပြခဲ့ပြီး ကြားကာလ အုပ်ချုပ်ရေးယန္တရားကို စနစ်တကျ ပြင်ဆင်နေမှု ကြောင့် ယခု ရန်ကုန်ဖက်ဒရယ်ယူနစ် ကြားကာလအစီအမံကို အတည်ပြုနိုင်ခဲ့ခြင်းဖြစ်သည်ဟု ဆိုသည်။ ဖက်ဒရယ်ပြည်ထောင်စု တည်ဆောက်ရေးသည် စစ်အုပ်စုကို အပြီးတိုင်ဖြုတ်ချမှ ဖြစ်နိုင်မည်ဖြစ်ရာ နိုင်ငံရေး၊ သံတမန်ရေး၊ ဘဏ္ဍာရေး၊ စစ်ရေး မျက်နှာစုံတွင် အရှိန်အဟုန်မြှင့် တိုက်ပွဲဝင်ရမည်ဟု ဝန်ကြီးချုပ်က တိုက်တွန်းခဲ့သည်။

 

တနင်္သာရီ လောင်းလုံးတွင် စစ်မှုထမ်း ၃ ဦး၊ စစ်သား ၁ ဦး လက်နက်မပါ အလင်းဝင်

နိုဝင် ၁၀
The Kaladan Post
နိုဝင်ဘာ ၅ ရက်တွင် တနင်္သာရီတိုင်း လောင်းလုံးမြို့နယ်တွင် အကြမ်းဖက်စစ်တပ်၏ ခမရ ၄၀၆ နှင့် ခမရ ၄၀၉ တပ်ရင်းများမှ စစ်မှုထမ်း တပ်သားသစ် ၃ ဦး (ကိုအောင်နိုင်ဝင်း၊ ကိုကျော်သက်၊ ကိုအောင်ဇော်မျိုး) နှင့် စစ်သား ၁ ဦး (ကိုနေဝင်းဇော်) တို့ လက်နက်မပါဘဲ လောင်းလုံး သံမဏိလိပ်ပြာ တပ်ဖွဲ့ (LL.S.B.F) နှင့် ဒေါနချေမှုန်းရေး တပ်ခွဲ ၇ (LPF) ထံ ချိတ်ဆက်ကာ အလင်းဝင်ရောက်ခဲ့ကြောင်း တပ်ဖွဲ့ က ထုတ်ပြန်သည်။ အဆိုပါ အလင်းဝင်သူ ၄ ဦးကို လက်ရှိ လုံခြုံစိတ်ချရသော နေရာသို့ ပို့ဆောင်ထားရှိပြီး လက်နက်များ မယူဆောင်လာကြောင်း သိရသည်။ တော်လှန်ရေး အရှိန်မြင့်လာနေချိန်တွင် စစ်တပ်မှ ပြည်သူနှင့် အမှန်တရားဘက်ရပ်တည်လိုသူများ ရင်ခွင်ခိုလှုံ၍ အမြန်ပူးပေါင်းရန် လောင်းလုံး သံမဏိလိပ်ပြာ တပ်ဖွဲ့ (LL.S.B.F) က တိုက်တွန်းထား သည်။

စစ်ကိုင်း ကန့်ဘလူ ကျီကျင်းရွာ နံနက်ပိုင်း စစ်တပ်နှင့်ပျူစောထီး မီးရှို့ဖျက်ဆီး

နိုဝင် ၁၀
The Kaladan Post
နိုဝင်ဘာ ၁၀ ရက် နံနက် ၈:၁၅ ခန့်တွင် စစ်ကိုင်းတိုင်း ကန့်ဘလူမြို့နယ် ကျီကျင်းရွာအထိုင်ချ တပ်စွဲ ထားသော အကြမ်းဖက်စစ်တပ်နှင့် ပျူစောထီးများက ပြည်သူပိုင်နေအိမ်များကို မီးရှို့ဖျက်ဆီးနေ ကြောင်း ကျွန်းလှ ကန့်ဘလူ တက်ကြွလှုပ်ရှားသူများအဖွဲ့ တာဝန်ရှိသူက ပြောဆိုသည်။ အဆိုပါ ရွာကို ယခင် ဩဂုတ်လအတွင်း အကြမ်းဖက် စစ်တေပ်က ၄ ရက်ဆက် မီးရှို့ခဲ့သေးသည်။ လက်ရှိ ကလေး၊ ရွှေဘို၊ ဝက်လက်၊ ကန့်ဘလူ စသည့် မြို့နယ်များတွင် ရာချီသော စစ်အင်အားဖြင့် စစ်ကြောင်းထိုး၍ ရွာများကို မီးရှို့၊ ပြည်သူများကို ဖမ်းသတ်မှုများ အရှိန်မြှင့်နေကြောင်း တော်လှန်ရေး သတင်းရင်းမြစ်များက ဆိုသည်။

ရခိုင် ဂွမြို့နယ် စစ်ရှောင် ၇၉၂၅ ဦး စားနပ်ရိက္ခာ၊ ဆေးဝါး အရေးပေါ်အကူအညီ တောင်းခံ

နိုဝင် ၁၀
The Kaladan Post
စစ်ကောင်စီကြောင့် နေရပ်မပြန်နိုင်သော စစ်ရှောင်များအပါအဝင် ပြည်သူ ၇၉၂၅ ဦး (အိမ်ထောင်စု ၁၉၈၄ စု) မှာ စားနပ်ရိက္ခာ၊ ဆေးဝါး အကူအညီ အရေးတကြီး လိုအပ်နေကြောင်း ဒီနေ့ နိုဝင်ဘာ ၁၀ ရက်တွင် ဂွမြို့နယ် စစ်ဘေးရှောင်ကူညီရေးပူးပေါင်းအဖွဲ့က ထုတ်ပြန်သည်။ ပင်လယ်မှီခို ငါးဖမ်းအလုပ်ဖြင့် အသက်မွေးနေရသော ဂွပြည်သူများမှာ စစ်ကောင်စီ စစ်သင်္ဘောများ၊ နေဗီများကြောင့် ငါးဖမ်းရှာဖွေရေး ပိုမိုခက်ခဲလာပြီး ပစ်ခတ်ဖမ်းဆီးခံရမှုများကြောင့် ကြောက်လန့်နေရကြောင်း တာဝန်ခံက ပြောဆိုသည်။ လေကြောင်း၊ ရေကြောင်း အန္တရာယ်များ ဆက်ရှိနေသဖြင့် နေရပ်မပြန်နိုင်သေးသည့် စစ်ရှောင်များနှင့် ဒေသခံများအတွက် ပြည်တွင်းပြည်ပ အလှူရှင်များထံ အကူအညီ တောင်းခံထားသည်။