နိုဝင် (၁၁) သတင်းတိုပေါင်းချုပ်

မင်းအောင်လှိုင်က အနုပညာရှင်များကို ခြိမ်းခြောက်ကာ ဝါဒဖြန့်သီချင်းနှင့် ဗီဒီယိုရိုက်ကူးစေ

နိုဝင် ၁၁
The Kaladan Post
အာဏာသိမ်းစစ်ကောင်စီသည် အတုအယောင်ရွေးကောက်ပွဲအတွက် အနုပညာရှင်များကို ခြိမ်းခြောက်ဖိအားပေးကာ ဝါဒဖြန့်ရေးလုပ်ငန်းများတွင် အသုံးပြုနေသည်။ သရုပ်ဆောင်များ ပြီးနောက် အဆိုတော်များဖြစ်သည့် အောင်လ၊ ဝေလ၊ ဖိုးကာ၊ ရဲရင့်အောင်၊ နီနီခင်ဇော် အပါအဝင် အဆိုတော်များစွာကို ဆိုင်းဘုတ်ကိုင်စေကာ စစ်တပ်ရေးစပ်ထားသည့် စာသားများဖြင့် ဗီဒီယိုများ ရိုက်ကူးစေပြီး နိုင်ငံပိုင်ရုပ်သံနှင့် စစ်တပ်လက်အောက်ခံ တယ်လီဂရန်ချန်နယ်များတွင် ဖြန့်ဝေနေသည်။ ထို့ပြင် “တူတူမဲသွားပေးကြစို့” သီချင်းကို မိုးယံဇွန်၊ နန်းဆုရတီစိုး စသည့် အဆိုတော်များနှင့် ထွန်းကိုကို၊ ယွန်းယွန်း စသည့် သရုပ်ဆောင်များဖြင့် ထုတ်လွှင့်နေသည်။အနုပညာအသိုင်းအဝိုင်းအရ စစ်ကောင်စီသည် ညှိနှိုင်းမှုမပြုတော့ဘဲ ပြင်းထန်စွာ ခြိမ်းခြောက်ဖိအားပေးနေသည်ဟု ဆိုသည်။ ဒီဇင်ဘာတွင် ကျင်းပရန်စီစဉ်ထားသည့် ဤရွေးကောက်ပွဲအပေါ် ပြည်သူ ၉၈% က အယုံအကြည်မရှိကြောင်း Platform for People Movement ၏ စစ်တမ်းတွင် ဖော်ပြထားပြီး၊ နိုင်ငံတကာကလည်း လက်မခံကြောင်း ထုတ်ဖော်ပြသထားသည်။

ငါန်းဇွန်တွင် စစ်တပ်ကွန်ဗော်ကို မိုင်းတိုက်ခိုက်ခံရပြီး ၄ ယောက်သေဆုံး

နိုဝင် ၁၁
The Kaladan Post
နိုဝင်ဘာ ၁၀ ရက် မနေ့မနက်ပိုင်း မန္တလေးတိုင်း ငါန်းဇွန်မြို့နယ်အတွင်း မြို့သာစခန်းမှ ကွန်ဗော်နှင့် ခြေလျင်အင်အား ၁၀၀ ကျော်ပါ အကြမ်းဖက်စစ်တပ်စစ်ကြောင်းကို Special Task Force Ngazun တပ်ဖွဲ့က ပဒေသာမိုင်း ၆ လုံး မိုင်းဆွဲတိုက်ခိုက်ခဲ့ရာ စစ်သား ၄ ယောက်သေဆုံးပြီး ၂ ယောက် ဒဏ်ရာရရှိခဲ့သည်ဟု တပ်ဖွဲ့က ထုတ်ပြန်ထားသည်။ ထိခိုက်ဒဏ်ရာရသည့်စစ်ကြောင်းသည် ကျွဲဇိမ်ရွာသို့ ရောက်ရှိပြီး ပြည်သူနေအိမ်များရှိ တန်ဖိုးရှိပစ္စည်းများ ခိုးယူကာ ပြည်သူများကို ဓားစာခံဖမ်းဆီးခဲ့ရာ မြို့သာဘက်သို့ ပြန်ထွက်ခွာချိန်တွင် လက်နက်ကြီး ၄၀ မမ ၂ လုံး ပစ်ခတ်တိုက်ခိုက်ခဲ့သည်ဟု သိရသည်။ တပ်ဖွဲ့ဝင်များ အထိအခိုက်မရှိ ပြန်လည်ဆုတ်ခွာနိုင်ခဲ့ပြီး ငါန်းဇွန်ဒေသတွင် အကြမ်းဖက်စစ်တပ်နှင့် ပြည်သူ့ကာကွယ်ရေးတပ်ဖွဲ့များအကြား ပဋိပက္ခများ ဆက်ရှိနေနေဆဲ ဖြစ်ကြောင်း Special Task Force Ngazun တပ်ဖွဲ့က ပြောဆိုသည်။

စောချစ်သူ ကိုးကွယ်ရာ ကျားဖြန့်ခေါင်းဆောင် She Zhijiang တရုတ်သို့ လွှဲပြောင်းရန် ထိုင်းဆုံးဖြတ်

နိုဝင် ၁၁
The Kaladan Post
နိုဝင်ဘာ ၁၀ ရက်တွင် ထိုင်းအယူခံတရားရုံးက မြ၀တီရှိ ရွှေကုက္ကိုလ် ကျားဖြန့်လောင်းကစားမြို့ တည်ထောင်သူဖြစ်ပြီး BGF ခေါင်းဆောင် စောချစ်သူ၏ ကိုးကွယ်ရာ ရာဇဝတ်တရားခံ She Zhijiang ကို ၉၀ ရက်အတွင်း တရုတ်သို့ လွှဲပြောင်းပေးရန် ဆုံးဖြတ်ခဲ့သည်။ She Zhijiang သည် တရုတ်ယွမ် ၂,၇၇၅ ဘီလီယံကျော် လိမ်လည်မှုဖြင့် ကာစီနိုဝက်ဘ်ဆိုက် ၂၃၉ ခု တည်ထောင်ခဲ့ သူဖြစ်ပြီး တရုတ်က အလိုရှိနေသည်။ ၂၀၂၂ ဩဂုတ်တွင် ဘန်ကောက်တွင် ဖမ်းဆီးခံခဲ့ရပြီး တရုတ်၏ ၂၀၂၂ နိုဝင်ဘာတောင်းဆိုမှုအရ လွှဲပြောင်းရန် လုပ်ငန်းစဉ်စတင်ခဲ့သည်။ ၁၉၉၃ ထိုင်း-တရုတ်တရားခံလွှဲပြောင်းစာချုပ်အရ ဤလုပ်ငန်းစဉ်ကို ဆောင်ရွက်ပြီး နှစ်နိုင်ငံ အာဏာပိုင်များ ပူးပေါင်းလုပ်ဆောင်နေသည်။ စောချစ်သူက ၂၀၂၄ ဩဂုတ် ၁၁ တွင် ရွှေကုက္ကိုလ်တွင် She Zhijiang အတွက် ဆုတောင်းပွဲကျင်းပခဲ့သည်။ ဤဆုံးဖြတ်ချက်သည် အရှေ့တောင်အာရှတွင် နိုင်ငံဖြတ်ကျော် ရာဇဝတ်မှုတိုက်ဖျက်ရေးတွင် အရေးပါသော ခြေလှမ်းဖြစ်လာနိုင်သည်။

 

စစ်ကောင်စီက KNU ခေါင်းဆောင်များကို ရွေးကောက်ပွဲ နှောင့်ယှက်မှုဖြင့် အမှုဖွင့်

နိုဝင် ၁၁
The Kaladan Post
အကြမ်းဖက်စစ်ကောင်စီက ကရင်အမျိုးသားအစည်းအရုံး (KNU) တပ်မဟာ ၁ သထုံခရိုင်ဥက္ကဋ္ဌ ပဒိုစောစိုးမြင့်အပါအဝင် ၂၂ ဦးကို ဒီဇင်ဘာလ အတုရွေးကောက်ပွဲ နှောင့်ယှက်ဟန့်တားမှုဟု စွပ်စွဲကာ သထုံမြို့နယ် သိမ်ဆိပ်ရဲစခန်းတွင် ရွေးကောက်ပွဲကာကွယ်ရေးဥပဒေ ပုဒ်မ ၂၃(ခ) ဖြင့် အမှုဖွင့်ထားသည်ဟု နိုဝင်ဘာ ၅ ရက်တွင် ထုတ်ပြန်သည်။ KNU ဒူးသထူခရိုင်က ရွေးကောက်ပွဲ တိုက်ဖျက်ရန် ကြေညာချက်ထုတ်ပြန်ခဲ့ရာ ဖြစ်ပြီး ယင်းပုဒ်မ၌ ရွေးကောက်ပွဲ ပျက်ပြားစေရန် ဟောပြောခြင်း၊ ဆန္ဒပြခြင်း စတို့ကို တားမြစ်ထားပြီး ကျူးလွန်ချက်အတွက် ထောင်ဒဏ် ၅ မှ ၁၀ နှစ်အထိ ချနိုင်သည်။ စက်တင်ဘာ ၂၄ ရက်တွင်လည်း KNU ဥက္ကဋ္ဌ ပဒိုစောကွယ်ထူးဝင်း အပါအဝင် ၁၃ ဦးနှင့် AA တပ်ဖွဲ့၊ ချင်းပြည် အဖွဲ့ဝင် ၁၇ ဦးကို အလားတူ ပုဒ်မ ၂၃(ခ) ဖြင့် အမှုဖွင့်ခဲ့သည်။ ထို့ပြင် အောက်တိုဘာ ၃၁ ရက်တွင် မကွေးတိုင်း စလင်းမြို့နယ် ရွေးကောက်ပွဲကော်မရှင်အဖွဲ့ဝင် သက်ဝေထွန်း (၁) ဦးကို PDF တပ်ဖွဲ့က ဖမ်းဆီးခဲ့ရာ နိုဝင်ဘာ ၃ ရက်တွင် ပုဒ်မ ၂၄(ခ) ဖြင့် အမှုဖွင့်ထားပြီး ကော်မရှင်ဝန်ထမ်းတာဝန်မဆောင်ရန် ဟန့်တားမှုအတွက် ထောင်ဒဏ် ၅ မှ ၁၀ နှစ်အထိ ချနိုင်သည်။ စစ်ကောင်စီ၏ ရွေးကောက်ပွဲ ဆန့်ကျင်သူများကို ပြင်းထန်စွာ ဖိနှိပ်ရန် ကြိုးပမ်းနေမှုကို ပြသသည်။

ဗန်းမောက်မြို့ပေါ်ကို စစ်ကောင်စီ Y12 လေယာဉ်ဖြင့် ဗုံးကြဲတိုက်ခိုက်

နိုဝင် ၁၁
The Kaladan Post
နိုဝင်ဘာ ၁၁ ရက် မနက် ၉ နာရီကနေ ၁၀ နာရီအထိ စစ်ကောင်စီက Y12 လေယာဉ်ဖြင့် ဗုံးကြဲတိုက်ခိုက်ခဲ့ပြီး အထိအခိုက်ပျက်စီးမှုများကို မသိရသေးဟု ဗန်းမောက်မြို့နယ် ပြည်သူ့ အုပ်ချုပ်ရေးအဖွဲ့ (ပအဖ) တာဝန်ရှိသူများက ပြောဆိုသည်။ မြေပြင်တိုက်ပွဲပြင်းထန်မှုနှင့် စစ်ကောင်စီနှင့် ဗန်းမောက်အကာအကွယ်တပ်မဟာ (SNA) အကြား ထိခိုက်မှုများကြောင့် လေကြောင်းတိုက်ခိုက်မှုများ ပြင်းထန်လာကြောင်း စစ်ရေးသတင်းရင်းမြစ်က ဖော်ပြသည်။ နိုဝင်ဘာ ၉ ရက်တိုက်ပွဲတွင် စစ်ကောင်စီနှင့် SNA သေဆုံး ထိခိုက်မှုများနှင့် အလောင်းများ ကျန်ရစ်ခဲ့ရာ နှစ်ရက်အတွင်း ဂျက်ဖိုက်တာနှင့် Y12 လေယာဉ်များဖြင့် ဗုံးကြဲခဲ့ခြင်း ဖြစ်သည်ဟု သိရသည်။ မြို့ပြန်ရရေး စစ်ကြောင်းလမ်းတလျှောက် ကျေးရွာများကို မီးရှို့ ဖျက်ဆီး၊ ပြည်သူပစ္စည်းများ ခိုးယူ၊ ဖမ်းဆီးမှုများ ရှိခဲ့ပြီး အနောက်ဘက်မှ ထိုးစစ်ဆင်လာသော စစ်ကောင်စီတပ်များတွင် အင်အား ၅၀၀ ဝန်းကျင်ရှိကာ တပ်မ(၃၃) နှင့် တပ်မ(၇၇) လက်အောက်ခံ တပ်ရင်းများ ပါဝင်နေသည်ဟု စစ်ရေးရင်းမြစ်က ဖော်ပြသည်။ တိုက်ပွဲများကြောင့် မြို့အနီး ကျေးရွာ ၂၀ ဝန်းကျင်နှင့် မြို့ပေါ် လေးရပ်ကွက်မှ ပြည်သူ ၂၀၀၀ ဝန်းကျင် ဘေးလွတ်တိမ်းရှောင်နေရပြီး အရေးပေါ်အကူညီလိုအပ်နေကာ နိုဝင်ဘာ ၉ ရက်မှ စစ်ဆင်ရေး ညမထွက်ရအမိန့်ကို ဗန်းမောက်ပကဖက်က ထုတ်ပြန်သည်။

မုံရွာတွင် စစ်ကြောင်းပြန်လာချိန် ကြားဖြတ်တိုက်ခိုက်ခံရ၍ စကစဘက် အထိနာ

နိုဝင် ၁၁
The Kaladan Post
နိုဝင်ဘာ ၁၀ ရက် မနက် ၁၀ နာရီခွဲခန့်က စစ်ကိုင်းတိုင်း၊ မုံရွာမြို့နယ်၊ သာစည်ရွာမှ ကျောက်စစ်ပုံ အမြောက်တပ်သို့ ပြန်လာသော အင်အား ၈၀ ဝန်းကျင်ရှိ စစ်ကောင်စီတပ်ဖွဲ့ကို ဒါန်းပင်တဲ၊ ကိုးပင် နှင့် ထန်းပင်လှ ရွာအနီးတွင် တော်လှန်ရေးပူးပေါင်းတပ်ဖွဲ့က ကြားဖြတ်တိုက်ခိုက်ခဲ့ရာ အပြန်အလှန်ပစ်ခတ်မှု ၁ နာရီခွဲကြာ ဖြစ်ပွားခဲ့ကြောင်း သတင်းရင်းမြစ်က ပြောဆိုသည်။ ဘုတလင်မြို့နယ် တပ်ပေါင်းစုစစ်ကြောင်း၊ မုံရွာမြို့နယ် တိုက်နယ် (၅) နှင့် မုံရွာခရိုင် တပ်ရင်း (၁၈) တို့ ပူးပေါင်းလုပ်ဆောင်ခဲ့ခြင်းဖြစ်ပြီး စစ်ကောင်စီဘက်က ထိခိုက်သေဆုံးမှု များပြားနိုင်ကြောင်း စစ်ကြောင်းမှူး ကြွက်ကလေး က ပြောသည်။ ကျောက်စစ်ပုံ အမြောက်တပ်မှ လက်နက်ကြီး ၁၀ လုံးကျော် ပစ်ကူပေးခဲ့သလို မုံရွာ နမခ မှ ပါရာမော်တာ ၂ စီးဖြင့် ဗုံးကြဲတိုက်ခိုက်ခဲ့သေးသည်။ တော်လှန်ရေးရဲဘော်အချို့ လက်နက်ကြီးနှင့် ပါရာမော်တာ တိုက်ခိုက်မှုကြောင့် ဒဏ်ရာရရှိခဲ့သော် လည်း အသက်အန္တရာယ် မစိုးရိမ်ရပေ။ စစ်ကောင်စီဘက်က သံပြားကားများဖြင့် ထိခိုက်သူများကို ခေါ်ဆောင်သွားခဲ့သည်။

၂၀၂၀ မဲလိမ်မှုကြောင့် အာဏာသိမ်းခဲ့ရ၍ ဒီမိုကရေစီ ပြန်တည်ဆောက်နေဟု ဇော်မင်းထွန်း ကြုံးဝါး

နိုဝင် ၁၁
The Kaladan Post
အာဏာသိမ်းစစ်ကောင်စီသည် လာမည့် ဒီဇင်ဘာလနှင့် ဇန်နဝါရီလအတွင်း ကျင်းပရန် စီစဉ်ထား သည့် အတုအယောင် ပါတီစုံဒီမိုကရေစီ အထွေထွေရွေးကောက်ပွဲကို မည်သူမျှ နှောင့်ယှက်ခွင့် မပေးဟု စစ်ကောင်စီ ပြောရေးဆိုခွင့်ရှိသူ ဇော်မင်းထွန်းက နိုဝင်ဘာ ၁၁ ရက်တွင် ကြုံးဝါးလိုက် သည်။ ၂၀၂၀ ရွေးကောက်ပွဲတွင် မဲစာရင်း လိမ်လည်မှုများကြောင့် အာဏာသိမ်းခဲ့ရခြင်းဖြစ် ကြောင်း၊ NLD အစိုးရနှင့် ရွေးကောက်ပွဲကော်မရှင်က ဒီမိုကရေစီစနစ်ကို ဖျက်ဆီးခဲ့သည်ဟု စွပ်စွဲပြောဆိုခဲ့ပြီး၊ ယခု ရွေးကောက်ပွဲမှာ ပြည်တွင်းရေးသက်သက်ဖြစ်ကာ နိုင်ငံတကာ ဝင်ရောက်စွက်ဖက်မှုကို လုံးဝ ခွင့်မပြုဟု ဇော်မင်းထွန်းက အလေးပေး ပြောကြားခဲ့သည်။ ရွေးကောက်ပွဲတွင် စစ်တပ်အလိုကျ နိုင်ငံရေးပါတီ ၅၇ ပါတီ၊ တစ်သီးပုဂ္ဂလ ကိုယ်စားလှယ်လောင်း ၉၅ ဦး၊ စုစုပေါင်း ၅၀၀၀ ကျော် ဝင်ရောက်ယှဉ်ပြိုင်မည်ဟု ထုတ်ပြန်ထားပြီး၊ “၂၀၂၅ ရွေးကောက်ပွဲ မုချ အောင်မြင်ရမည်” ဟု ဇော်မင်းထွန်းက ကြွေးကြော်ခဲ့သည်။
သို့သော် စစ်ကောင်စီသည် ပြည်သူများအပေါ် ဗုံးကြဲသတ်ဖြတ်မှု၊ ဖမ်းဆီးချုပ်နှောင်မှု၊ ကန့်သတ်ပိတ်ပင်မှုများကို နေ့စဥ် ကျူးလွန်နေသည်ကို မျက်ဝါးထင်ထင် တွေ့မြင်နေရသည်ဟု ပြည်သူလူထု အသံများက ထောက်ပြလျက်ရှိသည်။

ပြည်သူ့စစ်ခေါင်းဆောင် ဝင်းအောင်ကို မြေအောက်ပြောက်ကျားတပ်ဖွဲ့ ပစ်ခတ်ရှင်းလင်း

နိုဝင် ၁၁
The Kaladan Post
ပဲခူးတိုင်း အနောက်ခြမ်း၊ ကြို့ပင်ကောက်မြို့နယ် ကံကြီးအုပ်စု၊ ဂွေးဂေါင်းပင်တောရရွာနေ အသက် ၅၀ နှစ်ဝန်းကျင် ပြည်သူ့စစ်ခေါင်းဆောင် ကိုဝင်းအောင်ကို နိုဝင်ဘာ ၁၀ ရက် မနက် ၆ နာရီခန့်က သာယာဝတီခရိုင် တပ်ရင်း ၃၈၀၂ တပ်ခွဲ ၄ မြေအောက်ပြောက်ကျားတပ်ဖွဲ့ (အုတ်ဖို) က သေနတ် ဖြင့် ပစ်ခတ်ရှင်းလင်းခဲ့ကြောင်း ယနေ့ ထုတ်ပြန်သည်။ တပ်ဖွဲ့ စစ်ရေးတာဝန်ခံ ဗိုလ်တောက်တဲ့က “ကံကြီးဂွေးဂေါင်းပင်မှ ကြို့ပင်ကောက်သို့ ထွက်လာစဉ် ပတ်ကင်းနှင့် တိုးပြီး သေနတ်သုံးချက်ဖြင့် ဆော်ပစ်ခဲ့ခြင်း” ဟု ဆိုသည်။ အဆိုပါ ဝင်းအောင်သည် သူ့သားကို ကားဂိတ်ပို့ပြီး ပြန်လမ်းတွင် တွေ့ဆုံခဲ့ခြင်းဖြစ်ပြီး ဖမ်းဆီးကာ လူရှင်းရာနေရာတွင် ပစ်သတ်ခဲ့ခြင်း ဖြစ်သည်။ ကိုဝင်းအောင် သည် စစ်သင်တန်းတက်ရောက်ထားသူ ဖြစ်ပြီး တော်လှန်ရေးတပ်ဖွဲ့များ၏ အချက်အလက်များကို ထောက်လှမ်းခြင်း၊ ပြည်သူများထံ စစ်မှုထမ်းကြေး ခြိမ်းခြောက်ကောက်ခံခြင်း၊ လူငယ်များကို စစ်တပ်နှင့်အတူ ပေါ်တာဆွဲ ဖမ်းဆီးခြင်း၊ ရိုးမအတွင်း စစ်ကြောင်းထိုးရာတွင် လမ်းပြခြင်း စသည် တို့ကို ဦးဆောင်လုပ်ဆောင်နေသူ ဖြစ်ကြောင်း ထုတ်ပြန်ချက်တွင် ဖော်ပြထားသည်။ ၎င်းထံမှ ပြည်သူ့စစ်အဖွဲ့ဝင်ကတ် တစ်ခုနှင့် ဖုန်းတစ်လုံး သိမ်းဆည်းရရှိခဲ့သည်။ ဝင်းအောင်သည် ပြည်သူ့ စစ်တွင် ၂၀၂၃ ခုနှစ်ကတည်းက ပါဝင်ခဲ့ပြီး ဖမ်းဆီးချိန် တပ်ဖွဲ့ဝင်များကို ခြိမ်းခြောက်စကား ပြောဆိုခဲ့သေးကြောင်း သိရသည်။ မြေအောက်ပြောက်ကျားတပ်ဖွဲ့ (အုတ်ဖို) အနေဖြင့် စစ်တပ်များနှင့် ၎င်းတို့ ထောက်တိုင်များကို အရှိန်မြှင့် တိုက်ခိုက်သွားမည်ဖြစ်ရာ ပြည်သူများ စစ်ကောင်စီတပ်များ အနီးတွင် သွားလာနေထိုင်ခြင်း မပြုလုပ်ကြရန် အသိပေးထားသည်။

ကံတလူတိုးဂိတ်အနီး စစ်တပ်လုံခြုံရေးတပ်ဖွဲ့ စီးနင်းခံရပြီး စစ်သား ၁၀ ဦးသေဆုံး

နိုဝင် ၁၁
The Kaladan Post
စစ်ကိုင်းတိုင်း၊ မန္တလေး-မုံရွာ ကားလမ်းပေါ်ရှိ ကံတလူတိုးဂိတ်အနီး၊ ကုန်းရွာကျေးရွာထိပ် ရေမြောင်းဘောင်ပေါ် အင်အား ၂၀ ခန့်ဖြင့် လုံခြုံရေးလာယူနေသော အကြမ်းဖက်စစ်သားများကို လင်းယုန်ညီနောင် ပြောက်ကျားတပ်ဖွဲ့က သြဂုတ် ၂၃ ရက်နေ့တွင် အလစ်အငိုက် စီးနင်းတိုက်ခိုက် ခဲ့ရာ စစ်သား ၁၀ ဦး သေဆုံးခဲ့ကြောင်း ယနေ့ ထုတ်ပြန်သည်။ အဆိုပါ တိုက်ခိုက်မှုသည် စစ်ကိုင်းမြို့ တပ်မ ၃၃ မှ မုံရွာမြို့ အနောက်မြောက်တိုင်းစစ်ဌာနချုပ်သို့ အင်အားဖြည့်တင်ရန် သွားမည့် စစ်ယာဉ်တန်းအတွက် လုံခြုံရေးယူရန် ရောက်ရှိလာသော တပ်ဖွဲ့ကို ပစ်မှတ်ထားခြင်း ဖြစ်သည်။ တော်လှန်ရေးရဲဘော်များ အထိအခိုက်မရှိ ပြန်လည်ဆုတ်ခွာနိုင်ခဲ့သော်လည်း လက်နက်များ ကောက်ယူရန် ကြိုးစားချိန် ကံတလူတိုးဂိတ်မှ စစ်ကူတပ်များ ရောက်ရှိလာသဖြင့် ရပ်တန့်ခဲ့ရသည်။ အထိနာခဲ့သော အကြမ်းဖက်စစ်တပ်က လက်နက်ကြီး၊ လက်နက်ငယ်များဖြင့် ရမ်းကားပစ်ခတ်ခဲ့ပြီး ကုန်းရွာအတွင်း နေအိမ် ၂ လုံးကို မီးရှို့ဖျက်ဆီးခဲ့ကြောင်း သိရသည်။