နိုဝင် (၁၃) သတင်းတိုပေါင်းချုပ်

မြန်မာပြည်သူများ တရားမျှတမှုအတွက် မင်းအောင်လှိုင်ကို ICC က ဖမ်းဝရမ်း ချက်ချင်းထုတ်ရန် သံအမတ်ကြီး တောင်းဆို

နိုဝင် ၁၃
The Kaladan Post
၂၀၂၅ ခုနှစ် နိုဝင်ဘာ ၁၁ ရက်က ကုလသမဂ္ဂ အထွေထွေညီလာခံ အစည်းအဝေး၌ မြန်မာနိုင်ငံ အမြဲတမ်း ကိုယ်စားလှယ် သံအမတ်ကြီး ဦးကျော်မိုးထွန်းက အပြည်ပြည်ဆိုင်ရာ ရာဇဝတ်တရားရုံး (ICC) တရားစွဲအရာရှိ၏ စစ်ခေါင်းဆောင် မင်းအောင်လှိုင်အတွက် ဖမ်းဝရမ်း လျှောက်ထားချက်ကို ချက်ချင်း ဆုံးဖြတ်ချမှတ်ရန် တိုက်တွန်းခဲ့သည်။ အမျိုးသားညီညွတ်ရေး အစိုးရ (NUG) က မြန်မာ နိုင်ငံတွင်း ရာဇဝတ်မှုများအပေါ် ICC ၏ စီရင်ပိုင်ခွင့်ကို အသိအမှတ်ပြုသည့် ပုဒ်မ ၁၂(၃) ကြေညာ ချက်ကိုလည်း တင်ပြခဲ့ကြောင်း ပြောဆိုခဲ့သည်။ သံအမတ်ကြီးက အကြမ်းဖက်စစ်အုပ်စုသည် စစ်ရာဇဝတ်မှုများနှင့် လူသားမျိုးနွယ်အပေါ် ကြီးလေးသော ရာဇဝတ်မှုများကို ဆက်လက်ကျူးလွန် နေကြောင်း၊ အတုအယောင် ရွေးကောက်ပွဲများဖြင့် ရာဇဝတ်မှုများကို ဖုံးကွယ်ရန် ကြိုးပမ်းနေ ကြောင်း ထောက်ပြသည်။ ကုလသမဂ္ဂ၏ မြန်မာနိုင်ငံဆိုင်ရာ လွတ်လပ်သော စုံစမ်းစစ်ဆေးရေး ယန္တရား အစီရင်ခံစာ (A/HRC/60/18) နှင့် လူ့အခွင့်အရေး အထူးအစီရင်ခံစာ (A/80/490) များတွင် ချင်း၊ ကချင်၊ ကရင်နီ၊ ကရင်၊ ရခိုင်၊ ရှမ်း၊ စစ်ကိုင်း၊ မကွေး ဒေသများရှိ အရပ်သားများအပေါ် လေကြောင်းတိုက်ခိုက်မှု၊ ညှဉ်းပန်းနှိပ်စက်မှု၊ လိင်ပိုင်းဆိုင်ရာ အကြမ်းဖက်မှုများနှင့် ဖမ်းဆီးချုပ် နှောင်မှုများလည်း ဖော်ပြထားသည်။ အာဏာသိမ်းပြီး လေးနှစ်ကျော်အတွင်း လေကြောင်း တိုက်ခိုက်မှု ၃,၇၄၄ ကြိမ်ကြောင့် လူ ၄,၁၃၅ ဦး သေဆုံးခဲ့ပြီး အဆောက်အအုံ ၁၀၀,၀၀၀ ကျော် ပျက်စီးခဲ့ကြောင်း၊ အစုလိုက်အပြုံလိုက် သတ်ဖြတ်မှု ၄၅၂ ကြိမ်ကြောင့် အရပ်သား ၄,၇၆၃ ဦး အသက်ဆုံးရှုံးခဲ့ကြောင်း တင်ပြခဲ့သည်။ သန်းနှင့်ချီသော ပြည်သူများ နေရပ်စွန့်ခွာရပြီး ကြောက်ရွံ့မှုနှင့် နေထိုင်ရသည့်အတွက် တရားမျှတမှု ရရှိရန်နှင့် ရာဇဝတ်ကျူးလွန်သူများကို တာဝန်ခံစေရန် ICC ၏ ချက်ချင်း အရေးယူမှု လိုအပ်ကြောင်း နိုင်ငံတကာကို အသိပေးခဲ့သည်။ အတုအယောင် ရွေးကောက်ပွဲကိုလည်း ပယ်ချရန် တိုက်တွန်းခဲ့သည်။

DKBA နှင့် ခေါင်းဆောင် ၄ ဦးကို ကျားဖြန့်ဆိုက်ဘာလိမ်လည်မှုအတွက် အမေရိကန်က ဒဏ်ခတ်ပိတ်ဆို့

နိုဝင် ၁၃
The Kaladan Post
နိုဝင်ဘာ ၁၂ ရက်တွင် အမေရိကန်ဘဏ္ဍာရေးဝန်ကြီးဌာနက မြန်မာနိုင်ငံ ကရင်ပြည်နယ် မြဝတီ အနီး Tai Chang Park ကျားဖြန့်စင်တာမှ အမေရိကန်နိုင်ငံသားများကို ပစ်မှတ်ထားသည့် အွန်လိုင်း ငွေလိမ်မှုများတွင် ပါဝင်ပတ်သက်မှုအတွက် ဒီမိုကရက်တစ်ကရင်အကျိုးပြုတပ်မတော် (DKBA) နှင့် ခေါင်းဆောင် စိုင်းကျော်လှ၊ စောစတီး၊ စောစိန်ဝင်း၊ စောဆန်းအောင် တို့ကို ပ၊ ထိုင်းကုမ္ပဏီ Trans Asia International Holding Group Thailand နှင့် Troth Star Company Limited၊ ထိုင်းနိုင်ငံ သား Chamu Sawang တို့ကိုပါ ဒဏ်ခတ်ပိတ်ဆို့ခဲ့သည်။ DKBA သည် လူကုန်ကူးခံရသူများကို လက်ထိပ်ခတ်၊ ရိုက်နှက်၊ လျှပ်စစ်ရှော့ခ်၊ အမှောင်ခန်းချုပ်နှောင်စသည့် ရက်စက်မှုများဖြင့် လိမ်လည်မှုများဆက်လည်ပတ်စေပြီး ဝင်ငွေများဖြင့် အန္တရာယ်ရှိ လှုပ်ရှားမှုများကို ငွေကြေး ထောက်ပံ့နေကြောင်း သိရသည်။ တရုတ်ရာဇဝတ်ကွန်ရက်များနှင့်ပါ မူးယစ်ဆေး၊ လူ၊ လက်နက်၊ တောရိုင်းတိရစ္ဆာန်မှောင်ခို၊ ငွေကြေးခဝါချမှုများတွင် ပူးပေါင်းပါဝင်နေသည်။ ၂၀၂၄ တွင် အရှေ့တောင်အာရှ ကျားဖြန့်လိမ်မှုများကြောင့် အမေရိကန်များ ဒေါ်လာ ၁၀ ဘီလီယံ ဆုံးရှုံးပြီး ယခင်နှစ်ထက် ၆၆% တိုးခဲ့ကြောင်းသိရသည်။ အမေရိကန်က FBI ပါဝင်သည့် Scam Center Strike Force ဖွဲ့စည်း၍ မြန်မာ၊ ကမ္ဘောဒီးယား၊ လာအို ကျားဖြန့်စင်တာများကို စုံစမ်း၊ တရားစွဲ၊ ပိတ်ဆို့၊ ပိုင် သိမ်း၊ ပညာပေး၊ နစ်နာသူကာကွယ်မည်။

ခင်ဦး-ကန့်ဘလူ အစပ်တွင် တပ်မ(၃၃) စစ်ကြောင်းတိုက်ခိုက်ခံ စစ်သား ၅၀ နီးပါး သေဆုံး

နိုဝင် ၁၃
The Kaladan Post
နိုဝင်ဘာ ၁၂ ရက် စစ်ကိုင်းတိုင်း ခင်ဦးနှင့် ကန့်ဘလူ မြို့နယ်အစပ်တွင် တပ်မ(၃၃) ဦးဆောင်သည့် အကြမ်းဖက်စစ်ကြောင်း ကို ရွှေဘိုခရိုင် တပ်ရင်း(၃) (ခင်ဦး)၊ ရေဦး ပကဖ (ဓူဝံ)၊ ရေဦး ပကဖ လက်ရုံးတပ်၊ ရွှေဘိုခရိုင် တပ်ရင်း(၂၅) TPC တပ်ခွဲ(၃) တို့ ပူးပေါင်း ကြားဖြတ်တိုက်ခိုက်ခဲ့ရာ စစ်ကြောင်း ပျက်ဆီးခဲ့ကြောင်း သတင်းရင်းမြစ်က ပြောဆိုသည်။ စစ်ကြောင်းမှူးအပါ စစ်သား ၅၀ နီးပါး သေဆုံး၊ စစ်သုံ့ပန်း ၁၅ ဦး ဖမ်းမိ၊ သေနတ် ၁၈ လက်နှင့် စစ်အသုံးအဆောင်များ သိမ်းဆည်းရရှိခဲ့ကြောင်းသိရသည်။ စစ်အုပ်စုသည် နိုဝင်ဘာ ၁၁ ရက်က ကန့်ဘလူ၊ ရေဦးမှ စစ်ကြောင်း ၂ ခု ခွဲ၍ ခင်ဦး အနောက်မြောက်ခြမ်း ရှားတော၊ ငါးရုံကြီး ရွာများတွင် တပ်စွဲခဲ့ရာ ငါးရုံကြီး၊ ရှားတော၊ ကျောက်တိုင်၊ ကျီစု၊ မုံလှ၊ သာဝတ္ထိ၊ မြင်းကျ၊ သရက်တော၊ ကင်းပြစ်၊ ကျွန်းတောလေး၊ ကျွန်းတောကြီး၊ မန်ကျီးအုပ်၊ ယာတော်၊ မြင်းဒေါင်း၊ သရက်ပင်ပင်စု၊ သက်သာပန်းတောင်း စသည့် ကျေးရွာ ၁၆ ရွာ စစ်ဘေးတိမ်းရှောင်နေကြသည်။ နိုဝင်ဘာ ၁၀ ညနှင့် ၁၁ နေ့လယ်တွင် ခင်ဦး အရှေ့ခြမ်း ပေါက်အိုင်ရွာကို လေကြောင်းတိုက်ခိုက်ရာ အမျိုးသမီး ၁ ဦး သေဆုံးပြီး ၂ ဦး ဒဏ်ရာရခဲ့ကြသည်။

အတုရွေးကောက်ပွဲ ဝေဖန်သူ ၇၇ ဦး စစ်ကောင်စီ ဖမ်းဆီး

နိုဝင် ၁၃
The Kaladan Post
နိုဝင်ဘာ ၁၂ ရက်တွင် နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) က စစ်ကောင်စီကျင်းပမည့် အတုအယောင်ရွေးကောက်ပွဲ ဝေဖန်သူများကို ရွေးကောက်ပွဲဥပဒေဖြင့် ဖမ်းဆီးမှု ပိုမိုလုပ်ဆောင်လာရာ ဖမ်းဆီးခံရသူ ၇၇ ဦးအထိ ရှိပြီဖြစ်ကြောင်း ထုတ်ပြန်သည်။ အမည်စာရင်း အတည်ပြုနိုင်သူ ၅၄ ဦး ရှိပြီး မြေပြင်အရေအတွက်မှာ ပိုများနိုင်သည်ဟု ထုတ်ပြန်ချက်တွင် ဖော်ပြထားသည်။ ၂၀၂၁ မင်းအောင်လှိုင် အာဏာသိမ်းမှုနောက်ပိုင်း ဖမ်းဆီးခံရသူ စုစုပေါင်း ၂၉,၉၅၅ ဦး၊ လက်ရှိ ထိန်းသိမ်းခံနေရဆဲ ၂၂,၆၃၇ ဦး၊ ထောင်ဒဏ်ချမှတ်ခံရသူ ၁၁,၃၅၆ ဦး ရှိပြီဟု ဆိုသည်။အာဏာသိမ်းပြီးနောက်ပိုင်း ဒီမိုကရေစီတက်ကြွလှုပ်ရှားသူနှင့် ပြည်သူ စုစုပေါင်း ၇,၄၅၈ ဦး သေဆုံးခဲ့ကြောင်း ဖော်ပြထားသည်။

မြိုင်မြို့နယ်တွင် စစ်တပ် လူသားဒိုင်း အရပ်သား ၃ ဦးကို ရက်စက်သတ်ဖြတ်ပြီး နေအိမ်များ မီးရှို့

နိုဝင် ၁၃
The Kaladan Postလေကြောင်း ၄ ကြိမ် တိုက်
နိုဝင်ဘာ ၁၁ ရက်က ပခုက္ကူခရိုင် မြိုင်မြို့နယ် သရက်ကန်ပျူရွာမှ ထွက်လာသော စစ်ကြောင်းသည် အရပ်သား ၈ ဦးကို လူသားဒိုင်းအဖြစ် ဖမ်းဆီး၍ စက်မှု(၂) သို့ သွားရောက်ခဲ့ကြောင်း သတင်းရင်း မြစ်က ပြောဆိုသည်။ နိုဝင်ဘာ ၁၂ ရက် မနက်တွင် ဝက်ပုတ်ရွာသို့ ဆက်လက်ထွက်ခွာရာ အသက် ၄၀ အမျိုးသမီး၊ အသက် ၅၂ အမျိုးသား အပါအဝင် ၃ ဦးကို လက်ပြန်ကြိုး၊ မျက်နှာ ဓားမွှန်း၊ ခေါင်းပစ် ရက်စက်သတ်ဖြတ်သည်ဟု ဖော်ပြထားသည်။ အလောင်း ၂ လောင်း ဘုန်းကြီးကျောင်း ရှေ့ တွေ့ရှိထားပြီး ကျန် ၁ လောင်း ရှာနေဆဲကြောင်းသိရသည်။ သေဆုံးသူများမှာ မြေပဲကောက်၊ နွားကျောင်း သာမန်အရပ်သားများဖြစ်ပြီး တော်လှန်ရေးနှင့် ပတ်သက်ခြင်း မရှိဟု သတင်းရင်း မြစ်က ဆိုသည်။ စစ်ကြောင်းက ဝက်ပုတ်ရွာ နေအိမ် ၂ လုံး မီးရှို့၊ ပါကာမော်တာဖြင့် လေကြောင်း ၄ ကြိမ် တိုက်ခိုက်ခဲ့သည်။ စစ်ကြောင်းသည် စက်မှု(၂) အတွင်း ရှိနေဆဲဖြစ်ပြီး မြိုင်အနောက် တောင်ပိုင်း ကျေးရွာ ၁၀ ရွာထက်မနည်း စစ်ဘေးတိမ်းရှောင်နေကြရသည်။

ရွေးကောက်ပွဲအနိုင်ရပါက စစ်တပ်လမ်းစဉ်ကို ထိန်းသိမ်းပြီး NLD ကို အမြစ်မည်ဟု ကြံ့ဖွတ်ပါတီ ကြေညာ

နိုဝင် ၁၃
The Kaladan Post
နေပြည်တော်၊ နိုဝင်ဘာ ၁၁ ရက် – ကြံ့ခိုင်ရေးနှင့်ဖွံ့ဖြိုးရေးပါတီ (ကြံ့ဖွတ်) ဥက္ကဋ္ဌ ခင်ရီက ပါတီဌာန ချုပ်တွင် ကျင်းပသော အောင်နိုင်ရေးအခမ်းအနားတွင် ရွေးကောက်ပွဲအနိုင်ရရှိပါက စစ်တပ်ချမှတ် ထားသည့် နိုင်ငံရေးလမ်းစဉ်နှင့် မူဝါဒများအတိုင်း ဆက်လက်အုပ်ချုပ်သွားမည်ဟု ကြေညာခဲ့သည်။ ခင်ရီက ကိုယ်စားလှယ်လောင်းများအား ရှင်းလင်းရာတွင် မြန်မာ့ဒီမိုကရေစီသည် စည်းကမ်းပြည့်ဝ သော စနစ်ဖြစ်ရမည်ဖြစ်ပြီး တပ်မတော်က ထိုစနစ်၏ စောင့်ကြပ်သူ (Guardian of Democracy) အဖြစ် ဆက်လက်ရှိနေမည်ဟု ပြောဆိုခဲ့သည်။ ပါတီတွင် စစ်တပ်အပါအဝင် ခိုင်မာသော အဖွဲ့ အစည်းများ၏ ထောက်ခံမှုရရှိထားကြောင်း၊ အုပ်ချုပ်ရေးအတွေ့အကြုံနှင့် နိုင်ငံတိုးတက်ရေး စွမ်းရည်များ ပြည့်စုံကြောင်း ထည့်သွင်းပြောကြားခဲ့သည်။ ၂၀၀၈ ဖွဲ့စည်းပုံအခြေခံဥပဒေနှင့်အညီ အုပ်ချုပ်သွားမည်ဟုလည်း ပြောဆိုသည်။ ထို့ပြင် NLD ပါတီကို ရန်သူအဖြစ်သာ သဘောထား ထားပြီး ပါတီတွင်း တင်းမာသူအုပ်စုများက NLD ကို အမြစ်ဖြတ်ရေးနှင့် တကျော့ပြန်မလာနိုင်ရေး ကိုင်စွဲထားကြောင်းနှင့် ရှင်သန်ခွင့်မပြုတော့ဘူး ဟု သတင်းရင်းမြစ်က ဆိုသည်။ ခင်ရီက ကိုယ်စား လှယ်လောင်းများအား လုံခြုံရေး သတိထားရန်နှင့် ပါတီရုံးများ လုံခြုံရေး အလေးထားရန် သတိပေး ခဲ့သည်။ ဒီဇင်ဘာ ၂၈ ရက် ရွေးကောက်ပွဲတွင် နိုင်ငံရေးပါတီ ၅၀ ကျော်မှ ကိုယ်စားလှယ်လောင်း ၅၀၀၀ ကျော် ယှဉ်ပြိုင်မည်ဖြစ်ရာ ကြံ့ဖွတ်ပါတီက အများဆုံး အမတ်လောင်း ၁၀၁၈ ဦး ပြည်သူ့လွှတ်တော် ၂၆၅၊ အမျိုးသားလွှတ်တော် ၁၅၆၊ တိုင်း/ပြည်နယ်လွှတ်တော် ၅၆၉၊ တိုင်းရင်းသားလွှတ်တော် ၂၈ စေလွှတ်မည်ဖြစ်သည်။ အခြားပါတီများတွင် တစည ပါတီ ၆၉၄ ဦး၊ PPP ၆၇၂ ဦး၊ ကျားဖြူပါတီ ၅၈၄ ဦး၊ ပြည်သူ့ပါတီ ၅၁၂ ဦး၊ တောင်သူလယ်သမားပါတီ ၄၂၈ ဦး၊ ဒေသပါတီ ၅၁ ခု၏ ကိုယ်စားလှယ် ၉၆၀ ဦးနှင့် တစ်သီးပုဂ္ဂလ ၉၅ ဦး ပါဝင်ယှဉ်ပြိုင်မည် ဖြစ်ကြောင်း သိရသည်။

မာလဲကျေးရွာ စာသင်ကျောင်း စစ်တပ်လေကြောင်းတိုက်ခိုက်ပြီး ပြည်သူ ၅ ဦး သေဆုံး

နိုဝင် ၁၃
The Kaladan Post
စဉ့်ကူး၊ နိုဝင်ဘာ ၁၃ ရက် – မန္တလေးတိုင်း စဉ့်ကူးမြို့နယ် မာလဲကျေးရွာ စာသင်ကျောင်းကို အာဏာသိမ်းစစ်ကောင်စီ စစ်တပ်မှ ယမန်နေ့ နိုဝင်ဘာလ ၁၂ ရက် ညနေ ၅ နာရီခန့်တွင် လေ ကြောင်းဗုံးကြဲ တိုက်ခိုက်ခဲ့ရာ အရပ်သား ၅ ဦး သေဆုံးပြီး ၅ ဦးထက်မနည်း ဒဏ်ရာရရှိခဲ့ကြောင်း ဒေသခံများက ပြောဆိုကြသည်။ တံတားဦး လေတပ်စခန်းမှ ထွက်ခွာလာသော စစ်ကောင်စီ၏ ဂျက်ဖိုက်တာ လေယာဉ်တစ်စီးက မာလဲကျေးရွာ စာသင်ကျောင်းကို ရည်ရွယ်ချက်ရှိရှိ ဗုံးကြဲ တိုက်ခိုက်ခဲ့ရာ ကျောင်းအဆောက်အအုံ လုံးဝ ပျက်စီးခဲ့ကာ အနီးအနားရှိ နေအိမ်အချို့လည်း ထိခိုက်ပျက်စီးခဲ့ကြောင်းသိရသည်။ ထိခိုက်သေဆုံးသူများတွင် ကလေးငယ်များနှင့် အမျိုးသမီးများ ပါဝင်ပြီး မတ္တရာမြို့နယ်အရှေ့ဘက်ခြမ်း တိုက်ပွဲများကြောင့် စစ်ဘေးရှောင်နေထိုင်နေရသော ပြည်သူများလည်း ပါဝင်ခဲ့ကြောင်း စဉ့်ကူးမြို့နယ် ပကဖ တာဝန်ရှိသူများက ပြောဆိုခဲ့သည်။ စစ်ကောင်စီက စဉ့်ကူးမြို့နယ်အတွင်း စစ်ဘေးရှောင်များနှင့် အရပ်သားပြည်သူများ နေထိုင်ရာ နေရာများကို ဦးတည်ပြီး ရည်ရွယ်ချက်ရှိရှိ လေကြောင်းတိုက်ခိုက်မှုများ ဆက်လက်လုပ်ဆောင် နေခြင်းဖြစ်ပြီး ဤတိုက်ခိုက်မှုသည် စစ်ကောင်စီ၏ အရပ်သားများအပေါ် စနစ်တကျ ဖိနှိပ်ရေး လက်နက်များထဲမှ တစ်ခုဖြစ်ကြောင်း သုံးသတ်မှုများရှိနေသည်။ ဒေသခံများက လေကြောင်းတိုက်ခိုက်မှုများကြောင့် ပြည်သူများ ထပ်မံ ရွှေ့ပြောင်း နေရမှု ပိုမို ဆိုးရွားလာကာ ကလေးများနှင့် အမျိုးသမီးများ ပညာရေး ရရှိရေး အခက်အခဲ ပိုမို များပြားလာနေကြောင်း ပြောဆိုနေကြသည်။ လက်ရှိ ဒဏ်ရာရသူများကို ဒေသတွင်း ဆေးရုံများနှင့် ဆေးဘက်ဆိုင်ရာ အဖွဲ့များမှ ကုသပေးနေပြီး ထိခိုက်ဒဏ်ရာ ပိုမို များပြားနိုင်ကြောင်း စိုးရိမ်မှုများ ရှိနေသည်။

ခပ်ချိုရွာ စစ်အုပ်စု စစ်ကြောင်း တိုက်ခိုက်ခံရပြီး စစ်ကြောင်းပြန်ဆုတ်

နိုဝင် ၁၃
The Kaladan Post
စစ်ကိုင်းတိုင်း ဝန်းသိုမြို့နယ် ခပ်ချိုကျေးရွာသို့ လမ်းပိုင်းစိုးမိုးရေးနှင့် ရွာမီးရှို့ရန် စစ်ကြောင်းထိုး လာသော အကြမ်းဖက်စစ်အုပ်စု (ခမရ ၁၂၀၊ ရဲ၊ ပျူစောထီး ပူးပေါင်း အင်အား ၁၀၀ နီးပါး) ကို ဝန်းသိုပကဖ ဦးဆောင်သည့် တော်လှန်ရေးတပ်ဖွဲ့များက ဒရုန်း၊ ၆၀ မမ လက်နက်ကြီးများဖြင့် နှစ်ရက်ဆက် ပိတ်ဆို့ တိုက်ခိုက်ရာ စစ်အုပ်စု ၃ ဦး ဒဏ်ရာရရှိပြီး နိုဝင်ဘာ ၁၁ ရက် ညပိုင်းတွင် ကျောက်တိုင်ကျေးရွာအထိ ပြန်လည်ဆုတ်ခွာသွားခဲ့ကြောင်း ဝန်းသိုမြို့နယ် ပြည်သူ့ကာကွယ်ရေး တပ်ဖွဲ့ တာဝန်ရှိသူက ပြောဆိုသည်။ နိုဝင်ဘာ ၁၀ ရက်က ဝန်းသိုမြို့ပေါ်မှ ထွက်ခွာလာသော စစ်အုပ်စုသည် ခပ်ချိုရွာကို ဝင်ရောက်စီးနင်းပြီး မီးရှို့ဖျက်ဆီးရန် ရည်ရွယ်ခဲ့သော်လည်း ကောလင်း ခရိုင် တာဝန်ခံ ညွှန်ကြားချက်အရ ဝန်းသိုပကဖ၊ ကောလင်းခရိုင်တပ်ရင်း ၄၊ မဲကြီးလက်နက်ကြီး အဖွဲ့၊ ဝန်းသိုဒရုန်းအဖွဲ့၊ ကောလင်းဒရုန်းအဖွဲ့တို့ ပူးပေါင်း၍ ဒရုန်းချ၊ လက်နက်ကြီးပစ်ခတ်မှုများဖြင့် တားဆီးခဲ့ခြင်းဖြစ်ကြောင်း သိရသည်။ စစ်အုပ်စု ဆုတ်ခွာပြီးနောက် တော်လှန်ရေးတပ်များက အခင်းနေရာ ရှင်းလင်းရာ သွေးကွက်များနှင့် စစ်အုပ်စု အင်္ကျီများ သိမ်းဆည်းရရှိခဲ့ပြီး ကျောက်တိုင်တောင်ရိုးရှိ စစ်အုပ်စု တပ်စွဲရာ နေရာကိုလည်း ဒရုန်းဖြင့် ဆက်လက် တိုက်ခိုက်ခဲ့သည်။