နိုဝင် (၁၅) သတင်းတိုပေါင်းချုပ်

မြန်မာနိုင်ငံတွင် စတားလင့်သုံးစွဲမှု ရက်ပိုင်းအတွင်း ၇% အောက်သို့ ကျဆင်း

နိုဝင် ၁၅
The Kaladan Post
မြန်မာနိုင်ငံတွင် စတားလင့်အင်တာနက် သုံးစွဲသူဦးရေ ရက်ပိုင်းအတွင်း သိသာစွာ ကျဆင်းခဲ့သည်။ နယ်စပ်အခြေစိုက် ကျားဖြန့်ဂိုဏ်းများက စတားလင့်ကို အသုံးပြုနေသည်ဟု စွပ်စွဲချက်များ ထွက်ပေါ်လာပြီးနောက် SpaceX က မြဝတီမြို့နယ် KK Park အပါအဝင် ဂိုဏ်းနယ်မြေများရှိ စက် ၂၅၀၀ ခန့်ကို ပိတ်ဆို့ခဲ့ကြောင်း AFP သတင်းဌာန၏ ဖော်ပြချက်အရ သိရသည်။ နှစ်ဆန်းပိုင်းတွင် စတားလင့်သည် မြန်မာ့အင်တာနက်ဈေးကွက် ၁၄% ရရှိခဲ့သော်လည်း တရားဝင်မှတ်ပုံတင်မရှိဘဲ လည်ပတ်နေသည်။ ယခု ပိတ်ဆို့မှုကြောင့် အသုံးပြုမှု စုစုပေါင်း ၇% အောက်သို့ ကျဆင်းသွား ခဲ့သည်။ SpaceX သည် အမေရိကန်လွှတ်တော် စုံစမ်းစစ်ဆေးမှုကို ဇူလိုင်လကတည်းက ရင်ဆိုင်နေရပြီး ကျားဖြန့်အရေး နိုင်ငံတကာ အာရုံစိုက်မှု မြင့်တက်လာချိန် စစ်တပ်က KK Park အဆောက်အအုံ ၁၀၀ ကျော်ကို ဖျက်ဆီးခဲ့သော်လည်း ဂြိုဟ်တုဓာတ်ပုံများအရ ဧရိယာတစ်ခုလုံး သိသာစွာ ထိခိုက်ခြင်းမရှိကြောင်း သိရသည်။

သက်သက်ခိုင် အတုရွေးကောက်ပွဲ ကိုယ်စားလှယ်လောင်းတွင် ယှဉ်ပြိုင်ခွင့် ဆုံးရှုံး

နိုဝင် ၁၅
The Kaladan Post
ရွှေနန်းတော်ရွှေဆိုင်ပိုင်ရှင်ဖြစ်ပြီး ပြည်သူ့ရှေ့ဆောင်ပါတီ(PPP) ဥက္ကဋ္ဌ ဒေါ်သက်သက်ခိုင်သည် ဘဏ်ချေးငွေ ကြွေးကျန်နှင့်ပတ်သက်ပြီး ရွေးကောက်ပွဲ ဥပဒေ ပုဒ်မ ၈(ဃ) ကို ချိုးဖောက်မှု အဖြစ်ယူဆကာ ပြည်ထောင်စုရွေးကောက်ပွဲကော်မရှင်(UEC) မှ အောက်တိုဘာ ၂၁ ရက်တွင် ကိုယ်စားလှယ်လောင်း အဖြစ် ပယ်ဖျက်ခဲ့ကြောင်း ထုတ်ပြန်ထားသည်။ ယင်းနောက် ငါးဘီလီယံကျပ် ကြွေးငွေကို ကမ္ဘောဇဘဏ်သို့ ပေးချေပြီး အသနားခံစာ တင်ခဲ့သော်လည်း နိုဝင်ဘာ ၁၄ ရက်တွင် ပယ်ချခံရပြီး ဒီဇင်ဘာ ၂၈ ရက် စစ်ရေးရွေးကောက်ပွဲတွင် ပါဝင်ယှဉ်ပြိုင်ခွင့် ဆုံးရှုံးခဲ့ကြောင်း သတင်းရင်းမြစ်က ပြောဆိုသည်။ ယင်းပယ်ချခံရမှုကို PPP မဲဆွယ်ပွဲတစ်ခုတွင် ဒေါ်သက်သက်ခိုင်ကိုယ်တိုင် ထုတ်ဖော်ပြောကြားခဲ့ပြီး ပါတီက တနိုင်ငံလုံး ကိုယ်စားလှယ်လောင်း ၆၇၂ ဦး တင်သွင်းထားသော်လည်း ဤပယ်ဖျက်မှုက ပါတီ ရှေ့ဆောင်အဖြစ် သက်ရောက်မှု ရှိနိုင်ဟု ဆိုသည်။ အောက်တိုဘာ ၂၅ ရက်တွင် UEC က စုစုပေါင်း လောင်း ၅၀၂၃ ဦးမှ ဥပဒေချိုးဖောက်မှု အဖြစ် ၈၆ ဦးကို ပယ်ဖျက်ခဲ့ခြင်းဖြစ်သည်။ စစ်အာဏာသိမ်းပြီး နောက် ဒေါ်သက်သက်ခိုင်ကို လူမှုဝန်ထမ်းကယ်ဆယ်ရေး ဝန်ကြီး နှင့် ဟိုတယ်ခရီးသွားဝန်ကြီး အဖြစ် ခန့်အပ်ခံခဲ့ရပြီး ၂၀၂၂ တွင် သီရိပျံချီဘွဲ့ ရရှိ၊ ၂၀၂၃ ဇန်နဝါရီ အနားပေး ခံခဲ့ရသည်။ ယခု ရွေးကောက်ပွဲ ပယ်ဖျက်မှုက စစ်ရေး ရွေးကောက်ပွဲ တရားမျှတမှု စိုးရိမ်မှု တိုးပွားစေနေဟု နိုင်ငံတကာ အသိုင်းအဝိုင်း ထောက်ခံချက် များက ညွှန်ပြနေသည်။

မုံရွာ-ချောင်းဦးလမ်းပိုင်း စစ်ယာဉ်တန်း မိုင်းဆွဲခံရ၊ စစ်သား ၂ ဦး သေဆုံး

နိုဝင် ၁၅
The Kaladan Post
စစ်ကိုင်းတိုင်း၊ မုံရွာမြို့နယ်၊ မုံရွာ-ချောင်းဦးလမ်းပိုင်းတွင် နိုဝင်ဘာ ၁၄ ရက် နံနက် ၈:၅၃ အချိန် ဆားလင်းမြို့နယ် ဝမ်ပေါင်ကုမ္ပဏီမှ ကြေးနီ တွဲကား ၂၃ စီးပါ ယာဉ်တန်းကို လုံခြုံရေးပေးနေသော နမခ ယာဉ် ၆ စီးကို မုံရွာမြို့နယ် ပကဖ (မိုင်းအဖွဲ့) ဦးဆောင်ပြီး Area 71 LPDF Monywa နှင့် Golden Peacock Attack Force ပူးပေါင်း မိုင်း ၂ ဖွဲ့ ရှေ့နောက်ပြိုင်ဆွဲ တိုက်ခိုက်ခဲ့ရာ စစ်သား ၂ ဦး သေဆုံး၊ ထိခိုက်ဒဏ်ရာရသူများ ရှိခဲ့ကြောင်း area 71 lpdf monywa တပ်ဖွဲ့က ထုတ်ပြန်ထားသည်။ တိုက်ခိုက်မှုအပြီး စစ်တပ်က လမ်းပေါ်တွင် ပြည်သူ့ကားများ ပိတ်ဆို့ကာ မိုင်းရှင်းလင်းရေး ဆောင်ရွက်နေပြီး မုံရွာအတွင်း လက်နက်ကြီးများဖြင့် ပစ်ခတ်ခဲ့နေကြောင်း area 71 lpdf monywa တပ်ဖွဲ့ ခေါင်းဆောင် ကိုထွန်းက ပြောဆိုသည်။ PDF တပ်ဖွဲ့ဝင်များ အထိအခိုက်မရှိ ဆုတ်ခွာနိုင်ခဲ့ ကြောင်း သိရသည်။ ရွေးကောက်ပွဲ ကာလအတွင်း စစ်တပ်၏ လုပ်ရပ်များကို ဆန့်ကျင်တိုက်ခိုက် သွားမည်ဖြစ်ကြောင်းနှင့် ပြည်သူများအနေဖြင့် PDF ထုတ်ပြန်ချက် များကို လိုက်နာကြရန်နှင့် လမ်းပိုင်းဖြတ်သန်းချိန် သတိထားရန် area 71 lpdf monywa တပ်ဖွဲ့ ခေါင်းဆောင် ကိုထွန်းက တိုက်တွန်း ပြောဆိုသည်။

မောတောင်မြို့ သိမ်းတိုက်ပွဲတွင် စစ်တပ် ၄၀ ကျော် စစ်သုံ့ပန်း အဖြစ်ဖမ်းဆီး

နိုဝင် ၁၅
The Kaladan Post
တနင်္သာရီတိုင်း၊ ထိုင်း-မြန်မာ နယ်စပ် မောတောင်မြို့ကို တော်လှန်ရေးပူးပေါင်းတပ်များက နိုဝင် ဘာ ၁၄ ရက်တွင် အပြီးသတ် သိမ်းပိုက်နိုင်ခဲ့ရာ စစ်ကောင်စီတပ်သား ၄၀ ကျော်ကို ဖမ်းဆီးရမိ ခဲ့ကြောင်း ဗမာပြည်သူ့လွတ်မြောက်ရေးတပ်တော် (BPLA) က သတင်းထုတ်ပြန်သည်။ ဖမ်းဆီး ရမိထားသည့် စစ်သုံ့ပန်းများ၏ ရုပ်သံဖိုင်ကို CDM ဗိုလ်မှူး တင်လင်းအောင်က လူမှုကွန်ရက်တွင် ယနေ့ ဖော်ပြထားသည်။ တိုက်ပွဲအတွင်း သိမ်းဆည်းရရှိခဲ့သည့် လက်နက်ခဲယမ်းများမှာ ၁၂၀ မမ လက်နက်ကြီး ၂ လက်၊ ကျည် ၁၈၇ တောင့်၊ .5 စက်သေနတ် ၁ လက်၊ ၆၀ မမ ၃ လက်၊ RPG ၂ လက်၊ ငါးကြင်းမြီး ၁ လက်၊ လက်နက်ငယ် ၃၆ လက်နှင့် အခြားခဲယမ်းများ ပါဝင်သည်။ မောတောင်မြို့ သိမ်းပိုက်မှုသည် နယ်စပ်ဒေသတွင် တော်လှန်ရေးတပ်များ၏ အင်အားတိုး တက်မှုနှင့် စည်းလုံးညီညွတ်လာမှုကို ထင်ရှားစေတယ်ဟု ပညာရှင်များက သုံးသပ်နေကြသည်။

ရေးဘီလူးတပ်ဖွဲ့ စစ်တပ်ကို အသာစီးရရှိ၊ စစ်သား ၇ ဦး သေဆုံးပြီး

နိုဝင် ၁၅
The Kaladan Post
မွန်ပြည်နယ်၊ ရေးမြို့နယ်၊ ရွာကလေးနှင့် ဝါရဟိုင်းရွာကြားတွင် နိုဝင်ဘာ ၁၄ ရက်က အကြမ်းဖက် စစ်တပ်နှင့် ရေးဘီလူးတပ်ဖွဲ့ တိုက်ပွဲဖြစ်ပွားခဲ့ရာ စစ်သား ၇ ဦး သေဆုံးပြီး အများအပြား ဒဏ်ရာရရှိခဲ့ကြောင်း ရေးဘီလူးတပ်ရင်းမှူးက ပြောကြားသည်။ တိုက်ပွဲသည် ၄၅ မိနစ်ခန့် ကြာမြင့်ခဲ့ပြီး ရေးဘီလူးတပ်ဖွဲ့က သတင်းအရ လက်ဦးမှုရရှိ၍ အသာစီးဖြင့် တိုက်ခိုက်နိုင် ခဲ့ခြင်းဖြစ်ကြောင်းသိရသည်။ ဒဏ်ရာရစစ်သားများကို အာယုတောင်သို့ ပြန်ပို့ခဲ့ရပြီး စစ်ကြောင်းသည် ရွေ့လျားမှု ရပ်တန့်ကာ အနီးတဝိုက်တောထဲတွင် ငြိမ်သက်သွားခဲ့သည်။ နိုဝင်ဘာ ၁၅ ရက် နံနက်ပိုင်းတွင် စစ်တပ်က စစ်ကြောင်းထပ်မတိုးဘဲ ပြန်ဆုတ်ခွာသွားကာ ဖမ်းဆီးထားသည့် ဒေသခံများကိုလည်း ပြန်လွှတ်ပေးခဲ့ကြောင်း ရေးဘီလူးတပ်ဖွဲ့က ပြောဆိုသည်။ ရေးမြို့နယ်တွင် စစ်တပ်က ရေးဘီလူးတပ်ဖွဲ့ကို နယ်မြေရှင်းလင်းရန် ၃ နှစ်ကျော်ကြာ ကြိုးစားနေသော်လည်း ရေးဘီလူးတပ်ဖွဲ့ကသာ အသာစီးရရှိ၍ ထိုးစစ်များကို ခုခံချေမှုန်းနိုင်ခဲ့ကြောင်း မွန်ပြည်နယ်အခြေစိုက် တော်လှန်ရေးသတင်းရင်းမြစ်များက ဆိုသည်။

မကွေးနှင့် စစ်ကိုင်းတိုင်းအတွင်း စစ်တပ်လေကြောင်း ဗုံးကျဲတိုက်ခိုက်မှု ဆက်တိုက်ဖြစ်ပွား

နိုဝင် ၁၅
The Kaladan Post
နိုဝင်ဘာ ၁၄ ရက်တွင် စစ်ကိုင်းတိုင်း ရေဦးမြို့နယ်၊ ခင်ဦးမြို့နယ်နှင့် ကန့်ဘလူမြို့နယ်အစပ်ရှိ ရွာထောင်၊ မင်းမောင်းကုန်း၊ ဂုံတန်၊ ရွာပုလဲနှင့် ကျောက်တိုင်ရွာများကို တံတား ဦးလေတပ်မှ ဂျက်ဖိုက်တာ ၃ စီးဖြင့် နိုဝင်ဘာ ၁၄ ရက်တွင် နံနက်အစောပိုင်းနှင့် ၁၀ နာရီခွဲခန့်တွင် ဗုံးကျဲ တိုက်ခိုက်ခဲ့ရာ ကျောက်တိုင် ရွာတွင် ပြည်သူ ၁ ဦး ဒဏ်ရာရရှိခဲ့ပြီး အခြားရွာများတွင် ဗုံးခိုကျင်းများဖြင့် ပုန်းရှောင်နိုင်ခဲ့သဖြင့် ထိခိုက်မှုမရှိခဲ့ဟု ရေဦးမြို့နယ် People’s Defense Comrade တာဝန်ရှိသူ ထူးခန့်ဇော် (အမေ့သား) က ပြောသည်။ ထို့ပြင် ကလေးမြို့နယ်တောင်ပိုင်း မှန်တောရွာနှင့် ပတ်ဝန်းကျင်ကို Y-12 လေယာဉ် ဖြင့် ဗုံး ၃၀ ကျော် မွန်းလွဲ ၁၂ နာရီကျော်တွင် ကျဲချခဲ့သည်။ မကွေးတိုင်း မြိုင်မြို့နယ်အနောက် တောင်ခြမ်းရှိ ကျေးရွာများကို ဂျက်ဖိုက်တာ ၁ စီးနှင့် ပခုက္ကူတပ်မ ၁၀၁ မှ စက်တပ်လေထီး ၂ စီးဖြင့် မွန်းလွဲ ၁ နာရီနှင့် ညနေ ၄ နာရီခန့်တွင် တိုက်ခိုက် ခဲ့ရာ ထိခိုက်မှုမရှိသော်လည်း ပြည်သူများ ဘေးလွတ်ရာသို့ ထွက်ပြေးနေရကြောင်း သိရသည်။
အလားတူ နိုဝင်ဘာ ၁၃ ရက် ညနေ ၆ နာရီကျော်တွင် မော်လိုက်မြို့နယ်အရှေ့ပိုင်း ကျေးရွာများကို ဒရုန်း ၁ စီးဖြင့် ဗုံး ၂၄ လုံး ကျဲချခဲ့သည်။ ထူးခန့်ဇော်က ယခုရက်ပိုင်း ကန့်ဘလူ၊ ခင်ဦး၊ ရေဦး၊ ဒီပဲယင်းနယ်များတွင် လေကြောင်းတိုက်ခိုက်မှု ခပ်စိပ်စိပ်ဖြစ်ပွားနေကြောင်း၊ ပြည်သူများ မြေပြင်နှင့် လေကြောင်းရန်ကို ကြောက်ရွံ့နေရကြောင်း၊ ဂျက်ဖိုက်တာ ၂-၃ စီးအသုံးပြု၍ တိုက်ခိုက်လာသဖြင့် လေကြောင်းသတိရှိရှိ ဗုံးခိုကျင်းများတွင် အမြန်ပုန်းရှောင်ကြရန် သတိပေးထားသည်။ ဒေသခံများအဆိုအရ ဗုံးကျဲမှုများကြောင့် ပြည်သူများ ဆက်တိုက် တိမ်းရှောင်နေရသည်။

ရေတာရှည်တွင် စစ်တပ်စစ်ကြောင်း တိုက်ခိုက်၊ စစ်သား ၂၀ သေဆုံး

နိုဝင် ၁၅
The Kaladan Post
ပဲခူးတိုင်း ရေတာရှည်မြို့နယ်အတွင်း ကရင်ချောင်းတံတားမှ အင်အား ၁၄၀ ကျော်ပါဝင်သည့် ဒတရ-၆၀၄၊ ခလရ ၂၆၊ ခမရ ၂၉၊ ခလရ ၃၉၊ စခန ၈၄၈ နှင့် ကကနက် ပူးပေါင်းစစ်ကြောင်းကို ရေတာရှည်မြို့နယ် ပြည်သူ့ကာကွယ်ရေးတပ်မတော် တပ်ရင်း ၃၅၀၄ ဦးဆောင်သည့် တော်လှန် ရေးတပ်ဖွဲ့များက ရေလွှဲကျေးရွာ တောင်ဘက် သစ်သားတံတားပေါ်တွင် အောက်တိုဘာ ၂၅ ရက် တွင် ကြားဖြတ်တိုက်ခိုက်ခဲ့ရာ ပထမတိုက်ပွဲ ၃နာရီကြာ ဖြစ်ပွားပြီး စစ်သား ၅ဦးသေဆုံးခဲ့ကြောင်း တပ်ရင်း ၃၀၅၄က ထုတ်ပြန်သည်။ စစ်တပ်ဘက်က ဂျိုင်ရိုကော်ပတာ၊ ဒရုန်း၊ လက်နက်ကြီးနှင့် လေယာဉ်ပစ်ကူများဖြင့် ပြန်လည်တိုက်ခိုက်ခဲ့ကြောင်း သိရသည်။ မွန်းလွဲ ၃ နာရီခန့်တွင် နေပြည် တော်စစ်တိုင်း PDF တပ်ရင်းများနှင့် KNU တပ်မဟာ ၂ တပ်ရင်း ၅ လက်နက်ကြီးအဖွဲ့တို့ ပူးပေါင်း ဝင်ရောက်တိုက်ခိုက်ရာ ဒုတိယတိုက်ပွဲ ၂ နာရီကြာ ဖြစ်ပွားခဲ့ပြီး စစ်သား ၁၅ ဦးသေဆုံး၊ ၅ ဦး ထပ်မံ ဒဏ်ရာရရှိခဲ့ကြောင်းသိရသည်။ တိုက်ပွဲအတွင်း နေပြည်တော်စစ်တိုင်း ရဲဘော် ၁ ဦး ကျည်ထိမှန်သတိလစ်နေချိန် တပ်ရင်း ၃၅၀၄ ရဲဘော် မိုးသီး ကယ်ထုတ်စဉ် ကျည်ထိမှန်ကာ အောက်တိုဘာ ၂၇ ရက်တွင် ကျဆုံးခဲ့သည်။ တပ်ရင်း ၃၅၀၄ သတင်းနှင့်ပြန်ကြားရေးတာဝန်ခံက “စစ်ခွေးစစ်ကြောင်း ကရင်ချောင်းတံတားမှ အနောက်ဘက်ကမ်းသို့ ပြန်ဆုတ်သွားပြီ၊ တံတားတွင် အထိုင်ချထားဆဲဖြစ်သည်” ဟု ပြောသည်။ အထိနာသွားသော စစ်ကြောင်းက ပိနွဲပင်၊ ရွေသောင်ရွာသစ်နှင့် ကဲလင်းဆိပ်ရွာများကို မီးရှို့ဖျက်ဆီးခဲ့ရာ နေအိမ် ၃၀ ကျော် ပြာကျခဲ့ကြောင်း သတင်းရင်းမြစ်က ပြောဆိုသည်။

ပဲခူးတိုင်း ဖြူးမြို့နယ် ခလရ ၅ တပ်သား လက်နက်နှင့်တကွ အလင်းဝင်

နိုဝင် ၁၅
The Kaladan Post
နိုဝင်ဘာ ၁၃ ရက်တွင် ပဲခူးတိုင်း ဖြူးမြို့နယ် ညောင်ပင်သာအနီး ခြေလျင်တပ်ရင်း ၅ (ခလရ ၅) မှ အသက် ၃၃ နှစ်အရွယ် တပ်သား တဦး မန္တလေးတိုင်းမှ ပြည်သူ့စစ်မှုထမ်းတပ်အဖြစ် စစ်တပ်ထဲ ရောက်ရှိလာသူ ဖြစ်ပြီး ကင်းပတ်ထွက်စဉ် လက်နက်နှင့်တကွ ထွက်ပြေးကာ အမျိုးသားညီညွတ် ရေးအစိုးရ လက်အောက်ခံ အမှတ် (၂) စစ်ဒေသ တောင်ပိုင်းတိုင်း တပ်ရင်း ၃၅၀၃ ထံ အလင်းဝင် ရောက်ခဲ့ကြောင်း ၃၅၀၅ တပ်ရင်း BCT တာဝန်ခံ ဦးသိန်းမြင့်က ပြောဆိုသည်။ သူအား လိုက်ပစ်ခဲ့ရာ ပြန်လည်ပစ်ခတ်ကာ လွတ်မြောက်ခဲ့ခြင်းဖြစ်ကြောင်သိရသည်။ အလင်းဝင်သူက MA-1 သေနတ် ၁ လက်၊ ကျည်ဘောက် ၄ ခု နှင့် ကျည်အချို့ ယူဆောင်လာခဲ့သည်။ တပ်ရင်း ၃၅၀၃ BCT တာဝန်ခံ ဦးသိန်းမြင့်က “သူက ကျွန်တော်တို့နှင့် ပူးပေါင်းပြီး တော်လှန်ရေးကို ဆက်လက်လုပ်ဆောင်မည်၊ ပြည်သူ့ဘက်မှ ကာကွယ်မည်ဟု ပြောထားသည်” ဟု ပြောဆိုသည်။

မိုးညိုမြို့တွင် မဲစာရင်း စစ်ဆေးရန် ဖိအားပေး မလာသူကို ဖမ်းမည်ဟု ခြိမ်းခြောက်

နိုဝင် ၁၅
The Kaladan Post
ပဲခူးတိုင်း မိုးညိုမြို့ မြို့မ ရပ်ကွက် အုပ်ချုပ်ရေးမှူး ခင်လတ်နှင့် ရွှေဥဒေါင်း ရပ်ကွက် အုပ်ချုပ်ရေးမှူး မြသန်း တို့ ဦးဆောင်ကာ ရွေးကောက်ပွဲ မဲစာရင်း စစ်ဆေးရန် တစ်အိမ်လျှင် လူ ၁ ဦး မဖြစ်မနေ လာရောက်ရမည်ဟု နိုဝင်ဘာ ၁၄ ရက်က ဖိအားပေး ခြိမ်းခြောက် ခေါ်ဆောင်နေကြောင်း ပြည်သူ များက ပြောဆိုကြသည်။ မဲစာရင်း စစ်ဆေးသူ မရှိသဖြင့် ဝါဒဖြန့်ချိရန် ရပ်ကွက်ရုံးတွင် စုဝေးလာ သူများကို ဓာတ်ပုံရိုက်ယူကာ ဒေသခံပြည်သူများ ရွေးကောက်ပွဲကို ရာနှုန်းပြည့် စိတ်ဝင်စားနေ သည်ဟု ကြွေးကြော်နေကြသည်။ မလာရောက်သူများကို စစ်တပ်ဖြင့် ဖမ်းဆီးမည်ဟု လုပ်ဆောင် နေကြောင်း ဒေသခံများက ပြောသည်။ ဒေသခံတစ်ဦးက “အုပ်ကြီးများက ဖိအားပေး ခေါ်ဆောင် သဖြင့် မဲစာရင်း သွားကြည့်ရသည်၊ ဓာတ်ပုံရိုက်ယူသွားပြီး မလာသူများကို စစ်တပ်ဖြင့် ဖမ်းမည်ဟု ခြိမ်းခြောက်နေသည်” ဟု ဆိုသည်။ ရွှေဥဒေါင်း အုပ်ချုပ်ရေးမှူး မြသန်းသည် ရပ်ကွက်အတွင်း လူငယ်များကို ပေါ်တာဆွဲ ဖမ်းဆီးရာတွင် အမည်ဆိုးဖြင့် ကျော်ကြားသူ ဖြစ်ပြီး လူငယ်များ ထွက်ပြေးတိမ်းရှောင်နေရကြောင်း သိရသည်။ ရပ်ကွက်အတွင်း စစ်မှုထမ်းကြေး ဟုဆိုကာ လစဉ် ငွေကျပ် ၃၀၀၀၀ ကောက်ခံနေကြောင်း သတင်းရင်းမြစ်က ဖော်ပြသည်။