နိုဝင် (၂၃) သတိုပေါင်းချုပ်

ညီနောင်မဟာမိတ်ထိန်းချုပ်ရာ ၁၀၅ မိုင်ကုန်သွယ်ရေးဇုန်ကို စီးပွားရေးပိတ်ဆို့မည်ဟု စစ်ကောင်စီ အမိန့်ထုတ်

နိုဝင် ၂၃
The Kaladan Post
နေပြည်တော်၊ နိုဝင်ဘာ ၂၃ စစ်ကောင်စီတပ်မတော်က ရှမ်းပြည်နယ်မြောက်ပိုင်း၊ မူဆယ် ၁၀၅ မိုင် ကုန်သွယ်ရေးဇုန်အား မြောက်ပိုင်းညီနောင်မဟာမိတ် ၃ ဖွဲ့ (MNDAA၊ TNLA၊ AA) ထိန်းချုပ်ထား သည့်အတွက် ထိုဇုန်မှ ပြည်တွင်းသို့ ဝင်ရောက်လာသော ကုန်ကားအားလုံးကို လမ်းပိုင်းတိုင်းတွင် မဖြစ်မနေ ဖမ်းဆီး၊ တားဆီး၊ အရေးယူရန် နိုဝင်ဘာလ ဒုတိယပတ်မှ စတင်၍ အထူးညွှန်ကြားချက် ထုတ်ပြန်လိုက် နေပြည်တော် သတင်းရင်းမြစ်က ပြောဆိုသည်။ စစ်ဘက်အရင်းအမြစ်က “တပ်မတော်ထိန်းချုပ်မှု မရှိသည့်၊ နိုင်ငံတော်သို့ အခွန်မဆောင်သည့် ကုန်သွယ်ရေးဂိတ်အားလုံးကို တရားမဝင်ကုန်သွယ်ရေးအဖြစ် သတ်မှတ်ပြီး ထိထိရောက်ရောက် အရေးယူမည်” ဟု ဆိုသည်။ ထို့ပြင် ယခင်က ကုန်ကားအတော်များများ လွတ်ကင်းစွာ ဖြတ်သန်းနေသည်ကို တွေ့ရှိရသဖြင့် ညွှန်ကြားချက်ကို ထပ်မံ အားဖြည့်ထုတ်ပြန်ခြင်း ဖြစ်ကြောင်း သိရသည်။ စစ်ကောင်စီဘက်က ဤကုန်သွယ်ရေးလမ်းကြောင်းမှ ရရှိသည့် ဝင်ငွေများသည် မြောက်ပိုင်းမဟာမိတ်များ၏ ဘဏ္ဍာရေးအင်အားကို တိုးမြှင့်ပေးနေပြီး တပ်မတော်ကို ဆန့်ကျင်တိုက်ခိုက်ရန် အသုံးပြုနေသည် ဟု အကြောင်းပြထားသည်။ ထို့အပြင် စစ်ကောင်စီသည် ယခုနှစ် ဩဂုတ်လက တရုတ်အစိုးရထံ ၁၀၅ မိုင်ဇုန်ကို ပြန်လည်ရရှိရေး ကူညီပေးရန် တရားဝင် တောင်းဆိုခဲ့သော်လည်း တရုတ်ဘက်မှ ယနေ့ထက်တိုင် အကြောင်းပြန်ကြားခြင်း မရှိသေးကြောင်း သိရသည်။ စက်တင်ဘာလတွင် မင်းအောင်လှိုင် တရုတ်ခရီးစဉ်အတွင်းလည်း နယ်စပ်ကုန်သွယ်ရေးဂိတ်များ ပြန်ဖွင့်နိုင်ရေးနှင့် တည်ငြိမ်ရေး ကူညီပေးရန် ထပ်မံတိုက်တွန်းခဲ့သော်လည်း ရလဒ်ထူးခြားခြင်း မတွေ့ရသေး။ တစ်ဖက်တွင်မူ မြောက်ပိုင်းညီနောင်မဟာမိတ် ၃ ဖွဲ့သည် ဇူလိုင် ၁ ရက်မှစ၍ ၁၀၅ မိုင် ကျင်းစန်းကျော်ဂိတ်တွင် ကိုယ်ပိုင်အခွန်နှုန်းထားများဖြင့် ကုန်သွယ်မှု စီမံကောက်ခံလျက် ရှိနေသည်။

ဇီးကုန်း KTV အခန်းထဲအထိ ဝင်ပစ်၊ စစ်သား-ရဲ ၇ ဦး ပွဲချင်းပြီး သေဆုံး၊ လက်နက်ခဲယမ်း သိမ်းဆည်းရမိ

နိုဝင် ၂၃
The Kaladan Post
ပဲခူးတိုင်း၊ ဇီးကုန်းမြို့ပေါ်ရှိ KTV ကာရာအိုကေဆိုင်တွင် နိုဝင်ဘာ ၂၂ ရက် ည ၁၁ နာရီဝန်းကျင်က အရက်မူးပြီး ပျော်ပါးနေသည့် စစ်ကောင်စီတပ်ဖွဲ့ဝင် (စစ်သား + ရဲ) ၇ ဦးကို တော်လှန်ရေးပူးပေါင်း တပ်များက အခန်းထဲအထိ ဝင်ရောက်ပစ်ခတ် ရှင်းလင်းခဲ့ရာ ၇ ဦးလုံး ချက်ချင်းသေဆုံးခဲ့ကြောင်း နတ်တလင်း ၃၈၀၁ တပ်ခွဲ ၃ (နတ်စစ်သည်တပ်ဖွဲ့) တပ်ခွဲမှူး ကိုအောင်က ပြောဆိုသည်။ အဆိုပါ လျှပ်တပြက်တိုက်ခိုက်မှုကို နတ်တလင်း ၃၈၀၁ တပ်ခွဲ ၃ (နတ်စစ်သည်တပ်ဖွဲ့) နှင့် ကြို့ပင်ကောက် BTZM တပ်ဖွဲ့တို့ ပူးပေါင်းလုပ်ဆောင်ခဲ့ခြင်းဖြစ်သည်။ တပ်ခွဲမှူး ကိုအောင်က “အဲဒီကောင်တွေ ညတိုင်း လာသောက်တယ်ဆိုတဲ့ သတင်းကြောင့် မစ်ရှင်ဆင်ခဲ့တာဖြစ်ပြီး ဝင်ပစ်ပြီးတာနဲ့ ခွေးကား တွေ ချက်ချင်းရောက်လာတော့ ရုပ်သံ၊ ဓာတ်ပုံ မရိုက်နိုင်ခဲ့ဘဲ လက်နက်ခဲယမ်းတွေ ကောက်ပြီး ချက်ချင်းဆုတ်ခွာခဲ့ရတယ် ဟု ဆက်လက်ပြောဆိုသည်။ အဆိုပါတိုက်ခိုက်မှုအတွင်း G3 သေနတ် ၁ လက်၊ ကျည်ဘောက် ၄ ခု၊ ကျည်တောင့် ၈၀ တောင့်၊ လက်ပစ်ဗုံး ၂ လုံး၊ ဓား ၃ လက်၊ လက်ထိပ် ၁ တို့ကို သိမ်းဆည်းရရှိခဲ့ကြသည်။ တိုက်ခိုက်ခံရပြီးနောက် စစ်ကောင်စီဘက်က ရုပ်အလောင်းများ ကို ညတွင်းချင်း လာရောက်သယ်ယူသွားခဲ့ပြီး နိုဝင်ဘာ ၂၃ ရက် မနက်ပိုင်းမှစ၍ မြို့အ၀င်အထွက် ဂိတ်များတွင် အင်အားတိုးမြှင့်ကာ ပြည်သူများကို စစ်ဆေးမှုများ ပြုလုပ်နေသော်လည်း တိုက်ခိုက် ခဲ့သည့် တော်လှန်ရေးရဲဘော်များ အားလုံး ဘေးကင်းစွာ စခန်းပြန်ရောက်ရှိနေပြီဖြစ်ကြောင်း သိရသည်။

မောတောင်မြို့သိမ်းတိုက်ပွဲတွင် စစ်တပ်အဖွဲ့ဝင် ၅၅ ဦးကျော်ဖမ်းဆီးပြီး နယ်စပ်ကုန်သွယ်ရေး ပြန်ပွင့်မည်ဟု ဒေသခံများမျှော်လင့်

နိုဝင် ၂၃
The Kaladan Post
မြန်မာ-ထိုင်းနယ်စပ်ကုန်သွယ်ရေးအရေးကြီးဆုံးမြို့ဖြစ်သော တနင်္သာရီတိုင်း မောတောင်မြို့ကို တော်လှန်ရေးပူးပေါင်းတပ်များက နိုဝင်ဘာ ၁၀ ရက်မှ စတင်၍ လေးရက်ကြာ ထိုးစစ်ဆင် တိုက်ခိုက်ခဲ့ရာ အပြည့်အဝသိမ်းပိုက်နိုင်ခဲ့ကြောင်း ပြည်သူ့လွတ်မြောက်ရေးတပ်မတော် (PLA) က နိုဝင်ဘာ ၂၂ ရက်တွင် ထုတ်ပြန်သည်။ အဆိုပါတိုက်ပွဲတွင် PLA က ဒရုန်းတပ်ဖွဲ့၊ ရန်သူ့ထောက်ပို့ လမ်းကြောင်းဖြတ်တောက်ရေး၊ ထောက်ပံ့ပို့ဆောင်ရေး စသည့် အဓိကတာဝန်များကို ထမ်းဆောင် ခဲ့ပြီး KNLA၊ KTLA၊ BPLA၊ တနင်္သာရီတိုင်း PDF နှင့် အခြားမဟာမိတ်တပ်ဖွဲ့များ ပါဝင်တိုက်ခိုက် ခဲ့ခြင်းဖြစ်သည်။တိုက်ပွဲအတွင်း အကြမ်းဖက်စစ်တပ်သုံ့ပန်း ၁၅ ဦး လက်ရဖမ်းဆီးရမိ၊ ပြည်သူ့စစ် နှင့်ရန်သူ့တပ်ဖွဲ့ဝင် ၄၀ ကျော် လက်နက်ချအညံ့ခံ၊တပ်သားအချို့ ထိုင်းနိုင်ငံဘက်သို့ ထွက်ပြေးသွား၊ လက်နက်ကြီး၊ လက်နက်ငယ်၊ ဗုံးသီး၊ ကျည်မျိုးစုံ အမြောက်အမြား သိမ်းဆည်းရရှိခဲ့ကြောင်း ထုတ်ပြန်ချက်တွင် ဖော်ပြထားသည်။ မောတောင်မြို့သည် မြန်မာ-ထိုင်းကုန်သွယ်ရေးလမ်း ကြောင်း၏ အဓိကအချက်အချာကျသော နယ်စပ်မြို့ဖြစ်ပြီး အာဏာသိမ်းပြီးနောက် စစ်တပ်က ကုန်သွယ်ရေးပိတ်ဆို့ထားသဖြင့် ကုန်စည်စီးဆင်းမှု များစွာကျဆင်းခဲ့ရာ ယခုမြို့သိမ်းပိုက်နိုင်ခြင်း ကြောင့် နယ်စပ်ကုန်သွယ်ရေးလမ်းကြောင်း ပြန်လည်ပွင့်လှစ်လာနိုင်ဖွယ် ရှိကြောင်း ဒေသခံများက မျှော်လင့်နေကြသည်။

မင်းကင်းမြို့နယ် လောင်းပြည့်ရွာအနီး ရွှေမျောလုပ်ကွက်ကို စစ်တပ်လေကြောင်း ဗုံးကြဲတိုက်ခိုက်

နိုဝင် ၂၃
The Kaladan Post
စစ်ကိုင်းတိုင်း၊ မင်းကင်းမြို့နယ်၊ လောင်းပြည့်ကျေးရွာအနီး ချင်းတွင်းမြစ်အတွင်း ရွှေမျောလုပ် ကွက်ကို အကြမ်းဖက်စစ်ကောင်စီတပ်က နိုဝင်ဘာ ၂၂ ရက် နေ့လယ်ပိုင်းတွင် ဂျက်ဖိုက်တာ လေယာဉ်ဖြင့် ၄ ကြိမ်၊ စက်တပ်လေထီးဖြင့် ၂ ကြိမ် လာရောက်ဗုံးကြဲချတိုက်ခိုက်ခဲ့ကြောင်း ဒေသခံများက ပြောဆိုကြသည်။ ဗုံးကြဲချတိုက်ခိုက်မှုကြောင့် ရွှေမျောလုပ်သားများအပါအဝင် အရပ်သားများ အများအပြား ထိခိုက်ဒဏ်ရာရရှိခဲ့ပြီး အချို့မှာ အခြေအနေဆိုးရွားနေသည်ဟု ဒေသခံများက ဆိုသည်။ ထို့ပြင် ရွှေမျောဖောင်အတော်များများ မြစ်ထဲနစ်မြုပ်ကာ မီးလောင် ပျက်စီးခဲ့ရသည်ဟု သိရသည်။

ချင်းပြည်သို့ စစ်တပ်စစ်ကြောင်း Chinland တပ်ဖွဲ့နှင့် မဟာမိတ်များတိုက်ခိုက် စစ်အုပ်စုတပ်ဖွဲ့ဝင် ၅၀ ကျော် ထပ်မံသေဆုံး

နိုဝင် ၂၃
The Kaladan Post
ချင်းပြည်နယ် ကလေး၊ ဂန့်ဂေါ၊ ဖလမ်း၊ တီးတိန်မြို့နယ်များတွင် နိုဝင်ဘာလအစောပိုင်းမှ ယနေ့ အထိ Chinland အစိုးရတပ်ဖွဲ့ စစ်ကြောင်း (၁)၊ စစ်ကြောင်း (၂) နှင့် မဟာမိတ်တော်လှန်ရေး အင်အားစုများက အကြမ်းဖက်စစ်ကောင်စီတပ်ကို ဆက်လက်ထိုးစစ်ဆင်တိုက်ခိုက်လျက်ရှိရာ စစ်အုပ်စုတပ်ဖွဲ့ဝင် ၅၀ ကျော်ကို ထပ်မံချေမှုန်းနိုင်ခဲ့ကြောင်း Chinland ကာကွယ်ရေးဝန်ကြီးဌာနက နိုဝင်ဘာ ၂၂ ရက်တွင် ထုတ်ပြန်ခဲ့သည်။ စစ်ကြောင်း (၁) သည် ကလေး-ဂန့်ဂေါကြား၌ ABSDF၊ Vakok PDF၊ KRF၊ RKDF၊ YDF စသည့်မဟာမိတ်များနှင့်အတူ တိုက်ခိုက်နေပြီး၊ စစ်ကြောင်း (၂) မှာ ဖလမ်း-ဝေဘူလ၊ တီးတိန်-ခိုင်ကမ်းကြားတွင် CNDF၊ PDF Zoland၊ KRF စသည့်အင်အားစု များနှင့် ပူးပေါင်းတိုက်ပွဲဝင်နေသည်။ ယခုတိုက်ပွဲများအတွင်း စစ်အုပ်စုဘက်မှ ဂျက်ဖိုက်တာ၊ Y-12 လေယာဉ်များနှင့် ဒရုန်းများဖြင့် အကြိမ်ပေါင်းများစွာ လေကြောင်းတိုက်ခိုက်မှုများ ပြုလုပ်ခဲ့သော် လည်း တော်လှန်ရေးတပ်များက စစ်သုံ့ပန်းများဖမ်းဆီးရမိခြင်း၊ လက်နက်ခဲယမ်းများ သိမ်းဆည်း ရမိခြင်း၊ ဒရုန်းအချို့ ပစ်ချနိုင်ခြင်းများ ရှိခဲ့သည်။ ယခင်နိုဝင်ဘာ ၁၈ ရက်ကလည်း ဗိုလ်မှူး၊ ဗိုလ်ကြီးအဆင့်အရာရှိများအပါအဝင် စစ်အုပ်စုအင်အား ၁၀၀ ခန့်ကို ချေမှုန်းနိုင်ခဲ့သေးကြောင်း သိရသည်။ လက်ရှိတွင်လည်း တိုက်ပွဲများ ပြင်းထန်နေဆဲဖြစ်ပြီး စစ်အုပ်စုဘက်က အလောင်းများ ကို တိုက်ပွဲဖြစ်ပွားရာနေရာများတွင်ပင် မြေမြှုပ်ထားလျက်ရှိကြောင်း Chinland ကာကွယ်ရေး ဝန်ကြီးဌာန ပြောရေးဆိုခွင့်ရှိသူ Salai Nai John Kim က ပြောကြားသည်။

မုံရွာမြို့နယ်၊ ရတုံ-ဘူးတောင်းကန်ကြား တောတဲကို စစ်တပ်ဂျိုင်ရိုကော်ပတာနဲ့ ဗုံးကြဲ ၃ ဦး သေဆုံး

နိုဝင် ၂၃
The Kaladan Post
စစ်ကိုင်းတိုင်း၊ မုံရွာမြို့နယ်၊ ရတုံကျေးရွာနှင့် ဘူးတောင်းကန်ကျေးရွာကြားရှိ တောတဲတစ်လုံးကို အနောက်မြောက်တိုင်းစစ်ဌာနချုပ် (နမခ) လက်အောက်ခံ ဂျိုင်ရိုကော်ပတာ ၃ စီးဖြင့် နိုဝင်ဘာ ၂၂ ရက် မနက် ၁၀ နာရီကျော်က ပထမဆုံး ၁၂၀ မမ အမြောက်ကျည် ၃ လုံး ပစ်ခတ်ပြီးနောက် ဗုံးများ ကြဲချတိုက်ခိုက်ခဲ့ရာ အရပ်သား ၃ ဦး သေဆုံးခဲ့ကြောင်း သတင်းရင်းမြစ်က ပြောဆိုသည်။ သေဆုံး သူများမှာ ဘူးတောင်းကန်ရွာခံ တူဝရီးတော်စပ်သူ ကလေး ၂ ဦးနှင့် အရွယ်ရောက်သူ ၁ ဦး ဖြစ်ပြီး မအိရွှေရည်ဖြိုး (၈ နှစ်)၊ မောင်ဟိန်းထက် (၅ နှစ်)၊ ကိုအောင်စိုးထွေး (၃၀ နှစ်) တို့ဖြစ်ကြောင်းသိရ သည်။ အဆိုပါမိသားစုသည် ၂၀၂၄ ဖေဖော်ဝါရီလက ဘူးတောင်းကန်ရွာကို စစ်တပ်က မီးရှို့ ဖျက်ဆီးခဲ့သဖြင့် နေရပ်စွန့်ခွာထွက်ပြေးကာ ယခုတောတဲတွင် စိုက်ပျိုးရေးလုပ်ကိုင်နေထိုင်ခဲ့ခြင်း ဖြစ်ကြောင်း ဒေသခံများက ပြောဆိုကြသည်။ ရုပ်အလောင်းများကို နိုဝင်ဘာ ၂၂ ရက် ညနေ ၃ နာရီခန့်တွင် ဘူးတောင်းကန်ရွာသားများက မီးသင်္ဂြိုဟ်ပေးခဲ့ကြောင်းသိရသည်။ ယခုဖြစ်ရပ်မှာ ပြီးခဲ့သည့် အောက်တိုဘာ ၆ ရက် မုံရွာ-ချောင်းဦးအစပ် ဗုံတိုရွာ ဆီမီးသပိတ်ပွဲတွင် စစ်တပ်က လေကြောင်းဗုံးကြဲခဲ့ရာ အရပ်သား ၂၀ ကျော်သေဆုံး၊ ၄၀ ကျော်ဒဏ်ရာရခဲ့သည့် ဖြစ်ရပ်နောက်ပိုင်း မုံရွာမြို့နယ်အတွင်း စစ်တပ်၏ အရပ်သားပစ်မှတ်ထားတိုက်ခိုက်မှု နောက်ထပ်တစ်ခုဖြစ် သည်။

ထိုင်ဝမ်အရေး ဂျပန်ရှင်သန်မှုခြိမ်းခြောက်ဟု ဝန်ကြီးချုပ်ပြောဆိုမှုကို လူရာမဝင် ဇော်မင်းထွန်း ရှုတ်ချ

နိုဝင် ၂၃
The Kaladan Post
စစ်တပ်ပြောခွင့်ရှိ ဇော်မင်းထွန်းက ဂျပန်ဝန်ကြီးချုပ် ဆာနာအဲ တာကာအိချိ၏ ထိုင်ဝမ်အရေးဆိုင် ရာ မှားယွင်းသော ပြောဆိုချက်များကို ရှုတ်ချကြောင်း၊ ဂျပန်ဖက်ဆစ်ဝါဒ ပြန်လည်ဖြစ်ပေါ်လာနိုင် မှုကို မြန်မာနိုင်ငံအနေဖြင့် ရှုတ်ချကြောင်း နိုဝင်ဘာ ၂၂ ရက်နေ့က ပြောဆိုခဲ့သည်။ နိုဝင်ဘာ ၇ ရက် နေ့ ဂျပန်ပါလီမန်တွင် ဝန်ကြီးချုပ် တာကာအိချိက တရုတ်က ထိုင်ဝမ်ကို စစ်ရေးဖြင့် တိုက်ခိုက် ပါက ဂျပန်နိုင်ငံ၏ ရှင်သန်မှုကို ခြိမ်းခြောက်သည့် အခြေအနေ အဖြစ် သတ်မှတ်နိုင်ကြောင်း ပြောကြားခဲ့ရာ ဂျပန်၏ လုံခြုံရေး ဥပဒေမူဘောင်အရ ထိုင်ဝမ်အရေးကို ပြည်တွင်းလုံခြုံရေးနှင့် ဆက်စပ်သည်ဟု ဆုံးဖြတ်ကာ စစ်ရေးပါဝင်မှု လမ်းကြောင်း ဖွင့်ချခဲ့ခြင်းဖြစ်ကြောင်း သိရသည်။ ဤပြောဆိုချက်က တရုတ်နိုင်ငံ တစ်နိုင်ငံတည်း မူဝါဒကို ချိုးဖောက်ပြီး ပုန်ကန်သူများကို အားပေးခြင်း ဖြစ်ကြောင်း ဇော်မင်းထွန်းက ရှုတ်ချရာ မြန်မာနိုင်ငံအနေဖြင့် တရုတ်တစ်နိုင်ငံတည်း မူဝါဒကို ခိုင်မာစွာ ထောက်ခံရပ်တည်မည်ဟု ဆိုသည်။ ဝန်ကြီးချုပ် တာကာအိချိ၏ ပြောဆိုချက် များသည် သမိုင်းအပေါ် သင်ခန်းစာ မယူထားသည့် နောင်တမရသော တာဝန်ခံမှု မရှိခြင်း ဖြစ်ကြောင်း၊ ဂျပန်တို့၏ အတိတ် အာရှတိုက်အပေါ် ကျူးလွန်ခဲ့သော ရာဇဝတ်မှုများကို မလက်ခံခြင်း ဖြစ်ကြောင်း၊ ဂျပန်ဖက်ဆစ်ဝါဒ၏ ဆိုးကျိုးများကို မြန်မာနိုင်ငံ အပါအဝင် အရှေ့တောင်အာရှ နိုင်ငံများက ခါးသီးစွာ ခံစားခဲ့ရဖူးကြောင်း ဆက်လက်ပြောဆိုရာသည်။ ထိုင်ဝမ်သည် တရုတ်ပြည်သူ့သမ္မတနိုင်ငံ၏ ခွဲခြားမရသော အစိတ်အပိုင်း ဖြစ်ပြီး ထိုင်ဝမ် အရေးသည် တရုတ်ပြည်၏ ပြည်တွင်း ရေးကိစ္စ သာဖြစ်ကာ နိုင်ငံခြားဝင်ရောက်စွက်ဖက်မှုကို မြန်မာနိုင်ငံအနေဖြင့် ရှုတ်ချကြောင်း ထပ်လောင်း ပြောဆိုခဲ့သည်။