နိုဝင် (၂၅) သတင်းတိုပေါင်းချုပ်

မော်လိုက်ခရိုင်တွင် “သိမ်းငှက်စစ်ဆင်ရေး” အတွင်း ပျူစခန်း ၈ ခုသိမ်းပိုက် စစ်သား ၁၀၀ ကျော်သေဆုံး

နိုဝင် ၂၅
The Kaladan Post
စစ်ကိုင်းတိုင်း၊ မော်လိုက်ခရိုင်အတွင်း ယခုနှစ် ဩဂုတ်လမှ နိုဝင်ဘာလ ၂၄ ရက်နေ့အထိ ဆင်နွှဲ ခဲ့သည့် “သိမ်းငှက်စစ်ဆင်ရေး” ကို မော်လိုက်တော်လှန်ရေးအင်အားစုများက အောင်မြင်စွာ အပြီးသတ်လိုက်ပြီဖြစ်ကြောင်း မော်လိုက်တော်လှန်ရေးအင်အားစုမှ တာဝန်ရှိသူတစ်ဦးက ပြောဆိုသည်။ ထိုစစ်ဆင်ရေးကာလအတွင်း ပျူစောထီးနှင့် စစ်ကောင်စီတပ်စခန်း ၈ ခုကို အပြီးသတ် သိမ်းပိုက် နိုင်ခဲ့ပြီး ကျေးရွာ ၁၇ ရွာကို စိုးမိုးထိန်းချုပ်နိုင်ခဲ့သည်။ တိုက်ပွဲများတွင် စစ်ကောင်စီတပ်သား၊ ပျူစောထီး ၁၀၀ ကျော် သေဆုံးခဲ့ကာ အများအပြား ဒဏ်ရာရရှိခဲ့သည်။ ထို့ပြင် စစ်သုံ့ပန်းများ၊ လက်နက်ခဲယမ်းများကိုလည်း အများအပြား သိမ်းဆည်းရရှိခဲ့သည်။ သိမ်းပိုက်ရရှိခဲ့သည့် စခန်းများမှာ ထော်သာရွာ၊ အော်ဇီးခုံ၊ ညောင်ဝန်း၊ နောင်ပိန်း၊ နားပင်၊ တောင်းအင်၊ ဆွန်နန်း၊ အိုးဘို၊ ထိန်သာရွာတို့ရှိ ပျူစောထီးစခန်းများ ဖြစ်သည်။ စစ်ဆင်ရေးကို ခရိုင်တပ်ရင်း ၁ မှ ၄ အထိ၊ မော်လိုက်၊ ဖောင်းပြင်မြို့နယ် ပြည်သူ့ကာကွယ်ရေးတပ်များ၊ ပြည်သူ့လုံခြုံရေးတပ်ဖွဲ့ (ပလဖ) နှင့် ခရိုင်ကွတ်ကဲရေးရုံး တိုက်ခိုက်ရေးအဖွဲ့တို့ ပူးပေါင်းဆင်နွှဲခဲ့ခြင်းဖြစ်သည်။ လက်ရှိတွင် စပါးရိတ် သိမ်းချိန်နှင့် စစ်ဘေးရှောင်ပြည်သူများ အခက်အခဲများကို ထည့်သွင်းစဉ်းစားကာ အထက်ညွှန် ကြားချက်အရ စစ်ဆင်ရေးကို ရက်အကန့်အသတ်မရှိ ယာယီရပ်တန့်ထားကြောင်း သိရသည်။

ရန်ကုန်မြို့လယ် ကျောက်တံတားရဲစခန်းကို Operation Flame ဦးဆောင်ပြီး လက်ပစ်ဗုံး ၂ လုံးဖြင့် တိုက်ခိုက်

နိုဝင် ၂၅
The Kaladan Post
နိုဝင်ဘာလ ၂၅ ရက် နံနက် ၁ နာရီခန့်က ရန်ကုန်မြို့၊ ကျောက်တံတားမြို့နယ်၊ ဆူးလေဘုရားလမ်း မပေါ်ရှိ ကျောက်တံတားရဲစခန်းအား Operation Flame ဦးဆောင်သော မြို့ပြပြောက်ကျားတပ်ဖွဲ့ ဝင်များက လက်ပစ်ဗုံး ၂ လုံးဖြင့် တိုက်ခိုက်ခဲ့ရာ ရဲစခန်းရှေ့ ကင်းတဲအနီးတွင် ကျရောက်ပေါက်ကွဲ ခဲ့ကြောင်း အဆိုပါ အဖွဲ့က ထုတ်ပြန်သည်။ တိုက်ခိုက်ရေးအဖွဲ့သည် ပွဲပြီးစ ချက်ချင်း ဘေးကင်းစွာ ပြန်လည်ဆုတ်ခွာနိုင်ခဲ့ပြီး နောက်ဆက်တွဲ ထိခိုက်မှုအခြေအနေ အသေးစိတ်မသိရသေးကြောင်း Operation Flame သတင်းနှင့်ပြန်ကြားရေးတာဝန်ခံက ပြောဆိုသည်။ အဆိုပါရဲစခန်းသည် စစ်တပ် ၏ အတုအယောင်ရွေးကောက်ပွဲကို ပူးပေါင်းကူညီဆောင်ရွက်နေသည့်အပြင် ပြည်သူများကို မတရားဖမ်းဆီး နှိပ်စက်နေသည့် စခန်းတစ်ခုဖြစ်သဖြင့် Operation Flame-“Fire Power” အထူး စစ်ဆင်ရေး၏ စစ်ရေးပစ်မှတ်အဖြစ် ရွေးချယ်တိုက်ခိုက်ခြင်းဖြစ်ကြောင်း သိရသည်။ ယခုစစ်ဆင် ရေးကို Operation Flame နှင့်အတူ အနောက်ပိုင်းခရိုင် ပြည်သူ့ကာကွယ်ရေးတပ်ဖွဲ့၊ ကြည့်မြင် တိုင်မြို့နယ် ပကဖ နှင့် လသာမြို့နယ် ပကဖတို့ ပူးပေါင်းလုပ်ဆောင်ခဲ့ခြင်းဖြစ်သည်။ စစ်တပ်၏ အတုအယောင်ရွေးကောက်ပွဲကို လုံးဝလက်မခံဘဲ ရန်ကုန် တော်လှန်ရေးအင်အားစုများနှင့်အတူ အရှိန်မြှင့်တိုက်ခိုက်သွားမည်ဟု Operation Flame က ပြောဆိုသည်။

နိုင်ငံပေါင်း ၈ နိုင်ငံသား ချုပ်နှောင်ခံရသော မြ၀တီအနီး ကျားဖြန့်စခန်းတစ်ခု KNU သိမ်းပိုက် လူပေါင်း ၂,၀၀၀ ကျော် ကယ်ဆယ်

နိုဝင် ၂၅
The Kaladan Post
ကရင်ပြည်နယ်၊ မြ၀တီမြို့နယ်၊ မင်းလက်ပံကျေးရွာအနီးတွင် နိုဝင်ဘာလ ၂၁ ရက်နေ့က KNU တပ် များနှင့် စစ်တပ်နှင့် DKBA ပူးပေါင်းတပ်များအကြား တိုက်ပွဲပြင်းထန်ဖြစ်ပွားခဲ့ရာ DKBA စခန်းကို အပြီးသတ်သိမ်းပိုက်နိုင်ခဲ့ကြောင်း KNU ကထုတ်ပြန်သည်။ ထိုစခန်းအတွင်း အထပ် ထပ်လုံခြုံရေး ၊ ဂိတ်ကြီးများပါဝင်သည့် ကြီးမားသောခြံဝင်းတစ်ခုကို ရရှိခဲ့ရာ အဆိုပါနေရာသည် နိုင်ငံဖြတ်ကျော် ကျားဖြန့်လိမ်လည်မှုကွန်ရက်၏ အဓိကဗဟိုချက်ဖြစ်ကြောင်း သိရသည်။ ခြံဝင်းအတွင်း ကွန်ကရစ် အဆောက်အအုံ ၂၀ ခန့်ရှိပြီး လိမ်လည်ရုံးများ၊ ကွန်ပျူတာနှင့် အိုင်တီ ပစ္စည်းများ အပြည့်အစုံတွေ့ ရှိခဲ့သည်။ လူပေါင်း ၂,၀၀၀ ကျော်ကို တရားမဲ့ ချုပ်နှောင်ထားကြောင်း၊ ၄ပေ×၆ပေ အခန်းငယ်များ နှင့် ညှင်းပန်းနှိပ်စက်ရန် အသုံးပြုသည့် အထူးအခန်းများ၊ သော့ခတ်ထား သော သံသေတ္တာကြီးများ အများအပြား ပါဝင်ကြောင်း KNU က ပြောဆိုသည်။ နိုဝင်ဘာလ ၂၃ ရက်မှ ၂၄ ရက်အတွင်း စစ် ဆေးခဲ့စဉ် နိုင်ငံပေါင်း ၈ နိုင်ငံကလူ ၃၉၆ ဦး၊ နောက်တစ်နေ့တွင် နောက်ထပ် ၃၄၅ ဦး၏ အထောက် အထားကို အတည်ပြုနိုင်ခဲ့ပြီး ထိုင်းနိုင်ငံသား ၆၄ ဦးကို ထိုင်းအာဏာပိုင်များထံ လွှဲပြောင်းပေးခဲ့ သည်။ ကွန်ပျူတာ၊ မိုဘိုင်းဖုန်းများ အမြောက်အမြား၊ ကုမ္ပဏီစာရွက်စာတမ်းများ (Myanmar Future Stars Co. Ltd.) များလည်း သိမ်းဆည်းရမိခဲ့သည်။ ချုပ်နှောင်ခံထားရသူများက အမေရိကန် စသည့်နိုင်ငံများကို ပစ်မှတ်ထားလိမ်လည်ရန် အတင်းအကျပ်ခိုင်းစေခံရကြောင်း၊ တစ်လလျှင် ဒေါ် လာ ၅၀၀,၀၀၀ အထိ ရရှိသူများရှိသော်လည်း အချို့က လစာလုံးဝမရဘဲ ညှင်းပန်းနှိပ်စက်ခံနေရ ကြောင်း ဖမ်းဆီးခံများက ထွက်ဆိုခဲ့ကြသည်။ ဤကျားဖြန့်ကွန်ရက်သည် နက်ရှိုင်းစွာ အမြစ်တွယ် နေသော နိုင်ငံတကာ ရာဇဝတ်ကွန်ရက်ဖြစ် ကြောင်း၊ သက်သေစုဆောင်း၊ သားကောင်ကယ်ထုတ်၊ တရားခံများကို တရားစွဲဆိုရန် KNU တစ်ခုတည်းဖြင့် မလုံလောက်ကြောင်း ထုတ်ဖော်ပြောဆိုပြီး ထိုင်းအစိုးရ၊ ကုလသမဂ္ဂ၊ နိုင်ငံတကာ ဥပဒေစိုးမိုးရေးအဖွဲ့များနှင့် အမြန်ဆုံး ပူးပေါင်းဆောင်ရွက် ရန် KNU က အရေးတကြီး အကူအညီတောင်းခံထားသည်။ လက်ရှိတွင် KNU ဒုတိယဥက္ကဋ္ဌ ဦး ဆောင်သည့် အဆင့်မြင့်ကော်မတီက မြေပြင်စစ်ဆေးရေးလုပငန်းများကို တိုက်ရိုက်ကြီးကြပ်လျက် ရှိပြီး ခြံဝင်းကို ဆက်လက်ပိတ်ဆို့ထားကာ ကယ်ဆယ်ရေးနှင့် သက်သေစုဆောင်းရေးလုပ်ငန်းများ အရှိန်မြှင့် ဆောင်ရွက်လျက်ရှိသည်။

ပေါက်မြို့နယ်တွင် စစ်ကြောင်းများ နေအိမ် ၅၀ မီးရှို့ဖျက်ဆီး ပြည်သူ ၄၀,၀၀၀ ကျော် တိမ်းရှောင်

နိုဝင် ၂၅
The Kaladan Post
မကွေးတိုင်း၊ ပေါက်မြို့နယ်တွင် နိုဝင်ဘာ ၂၄ ရက်နေ့က ကပစ ၂၄ လက်နက်စက်ရုံမှ ထွက်လာ သော အင်အား ၂၅၀ ကျော်ပါ စစ်ကြောင်းက ကျောက်မဲတောင်ကျေးရွာသို့ ဝင်ရောက်စီးနင်းပြီး နေအိမ် ၁၅ လုံးကို မီးရှို့ဖျက်ဆီးခဲ့သည်။ ယင်းဖြစ်စဉ်ကြောင့် ကျောက်မဲတောင်ရွာအပါအဝင် ကျေးရွာ ၁၁ ရွာမှ ပြည်သူ ၄,၀၀၀ ကျော် ဆောမြို့နယ်နှင့် ထီးလင်းမြို့နယ်ဘက်သို့ ၄ လကျော်ကြာ ထွက်ပြေးတိမ်းရှောင်နေရပြီး ယာယီတဲ၊ စားနပ်ရိက္ခာ၊ စောင်၊ ခြင်ထောင်များ အရေးတကြီး လိုအပ်လျက်ရှိနေကြေင်း လူသားစာနာဌာနက ထုတ်ပြန်ထားသည်။ ထို့အပြင် နိုဝင်ဘာလဆန်း ပိုင်းကတည်းက ပေါက်မြို့နယ်မြောက်ပိုင်းတွင် စစ်ကြောင်း ၄ ကြောင်းခွဲ၍ ထိုးစစ်ဆင်နေသည့် စစ်တပ်က တယ်ပင်ရွာ၌ နေအိမ် ၆ လုံး၊ ကားဂိုဒေါင်၊ စျေးဆိုင်ခန်းများနှင့် ကျောက္ကာရွာ၌ စစ်ဘေးရှောင်တဲ ၃၀ ကို မီးရှို့ဖျက်ဆီးခဲ့ကြောင်း ပြည်သူများက ပြောဆိုကြသည်။ ယင်း စစ်ဆင်ရေးကြောင့် ကျေးရွာ ၄၂ ရွာမှ ပြည်သူ ၃၅,၀၀၀ ခန့် တောတောင်အတွင်း စစ်ဘေးတိမ်း ရှောင်နေရသည်။ စစ်ကြောင်းများက လမ်းပြအဖြစ်ဖမ်းဆီးထားသူ ၂ ဦးအပါအဝင် ပြည်သူ ၈ ဦးကို သတ်ဖြတ်ခဲ့ပြီး အရပ်သား ၂၀ ကျော်ကိုလည်း ဖမ်းဆီးခေါ်ဆောင်သွားခဲ့ကြောင်း ပေါက်မြို့နယ် လူသားစာနာဌာနက ပြောဆိုသည်။

မင်းကင်းမြို့နယ် မြောက်ချွန်းရွှေမျော စစ်တပ်ကတဖန်ဗုံးကျဲ ပြည်သူထိခိုက်မှုများနိုင်

နိုဝင် ၂၅
The Kaladan Post
စစ်ကိုင်းတိုင်း၊ မင်းကင်းမြို့နယ်၊ မြောက်ချွန်းရွာအနီးရှိ ရွှေမျောကို ယနေ့ (နိုဝင်ဘာ ၂၅ ရက်) နံနက် ၉ နာရီကျော်တွင် တံတားဦးလေတပ်မှ တက်လာသော A-5 Bomber ဂျက်ဖိုက်တာလေယာဉ်က ဗုံးများချ တိုက်ခိုက်ခဲ့ရာ အရပ်သားများ ထိခိုက်သေဆုံးမှု များပြားခဲ့ကြောင်း ဒေသခံများက ပြောဆိုသည်။ “လေယာဉ်က သုံးပတ်လောက် ဝဲပြီး ရွှေမျောနေရာကို အဓိက ပစ်ချကာ အသေ အပျောက်က များနိုင်ကြောင်း အခုထိ ဘယ်သူမှ အနားမကပ်ရဲသေးဘူး၊ မ‌ပေါက်သေးတဲ့ ဗုံးတွေလည်း ကျန်နေသေးတယ်” ဟု မျက်မြင်ဒေသခံတစ်ဦးက ဆိုသည်။ ရွာဘက်သို့လည်း ဗုံးအချို့ ကျရောက်ပေါက်ကွဲခဲ့ရာ နေအိမ် ၁ လုံး ပျက်စီးခဲ့သော်လည်း ရွာတွင်း ထိခိုက်သေဆုံးမှု မရှိခဲ့ကြောင်း သိရသည်။ ယခုဖြစ်စဉ်မတိုင်မီ နိုဝင်ဘာ ၂၂ ရက်နေ့ကလည်း မင်းကင်းမြို့နယ် လောင်းပြည့်ရွှေမှော်ကို K-8W လေယာဉ် ၁ စီးနှင့် Gyrocopter ၃ စီးတို့က ၈ ကြိမ်ထက်မနည်း ဗုံးကျဲတိုက်ခိုက်ခဲ့ရာ ရွှေတူးသမား ၂ ဦး သေဆုံး၊ ၁၀ ဦးကျော် ဒဏ်ရာရရှိခဲ့ပြီး ပျောက်ဆုံးသူများ လည်း ရှိခဲ့ကြောင်း၊ ဖလက် ၁ စီးနှင့် မျောဖောင် ၁ စီးလည်း မီးလောင်နစ်မြုပ်ခဲ့ကြောင်း သိရသည်။ လက်ရှိတွင် ဗုံးကျရောက်ပေါက်ကွဲရာ နေရာများသို့ ဒေသခံများ အနီးမကပ်ဝံ့သဖြင့် အတိအကျ ထိခိုက်သေဆုံးသူ အရေအတွက်ကို အတည်ပြုနိုင်ခြင်း မရှိသေးဘဲ ပြည်သူများ ဘေးလွတ်ရာသို့ အလျင်အမြန် ထွက်ပြေးတိမ်းရှောင်နေရကြောင်း သတင်းရရှိသည်။

စစ်တပ်၏ အတုအယောင်ရွေးကောက်ပွဲ ပြင်ဆင်မှုကို ရိုဟင်ဂျာ အတိုင်ပင်ခံကောင်စီ ရှုတ်ချ

နိုဝင် ၂၅
The Kaladan Post
အာဏာသိမ်း စစ်ကောင်စီ၏ အတုအယောင်ရွေးကောက်ပွဲ က်င်းပရန် ပြင်ဆင်နေမှုကို ပြည်သူ ဆန္ဒနှင့် ဆန့်ကျင်ကာ ပြင်းထန်စွာ ကန့်ကွက်ရှုတ်ချကြောင်း ရိုဟင်ဂျာ အတိုင်ပင်ခံကောင်စီ (Rohingya Consultative Council) က နိုဝင်ဘာ ၂၄ ရက်တွင် ထုတ်ပြန်သည်။ ၂၀၁၇ ခုနှစ်တွင် ရိုဟင်ဂျာများအပေါ် လူမျိုးတုန်းသတ်ဖြတ်မှုကို ကျူးလွန်ခဲ့သည့် အကြမ်းဖက်စစ်တပ်သည် ၁၉၆၂ ခုနှစ်မှ စတင်ကာ ရိုဟင်ဂျာများ၏ မွေးရာပါအခွင့်အရေးများကို စနစ်တကျ ပယ်ဖျက်ခဲ့ပြီး၊ လက်ရှိ အချိန်ထိ ရိုဟင်ဂျာများ၏ ဖြစ်တည်မှုကို ငြင်းပယ်ကာ ပြည်သူများအကြား အထင်အမြင်လွဲမှား စေရန် ရည်ရွယ်ချက်ရှိရှိ လုပ်ဆောင်နေဆဲဖြစ်ကြောင်း အဆိုပါကောင်စီက ထောက်ပြထားသည်။ ထို့ပြင် ရိုဟင်ဂျာပြည်သူများအား အကြမ်းဖက်စစ်တပ်နှင့် မည်သည့်နည်းဖြင့်မျှ မပူးပေါင်း၊ မပတ်သက်ကြရန်နှင့် စစ်အာဏာရှင်များ၏ သွေးဆောင်ဖြားယောင်းမှုများကို သတိထားကြရန် အထူးတိုက်တွန်းထားသည်။ ယခုနှစ် မေလက စတင်ဖွဲ့စည်းခဲ့သည့် ရိုဟင်ဂျာ အတိုင်ပင်ခံကောင်စီ သည် ရိုဟင်ဂျာများ၏ မူလအခွင့်အရေး၊ သာတူညီမျှမှု၊ စစ်အာဏာရှင်စနစ် အမြစ်ပြတ်ရေးနှင့် ဖက်ဒရယ်ဒီမိုကရေစီ နိုင်ငံတော် ထူထောင်ရေးအတွက် တော်လှန်ရေးအင်အားစုများနှင့် နိုင်ငံရေးအင်အားစုများနှင့် ပူးပေါင်းဆောင်ရွက်သွားမည်ဟု ရိုဟင်ဂျာ ကောင်စီကပြောဆိုသည်။