မေလ (၁၅) သတင်းတို ကဏ္ဍ

——————————–

၁။ စလင်းမြို့နယ်တွင် စစ်ကောင်စီစစ်ကြောင်းကို စောင့်ကြိုတိုက်ခိုက်၊ တပ်သား ၃ ဦးသေဆုံး

—————————————————————————–

မေ ၁၅

The Kaladan Post

မကွေးတိုင်း၊ စလင်းမြို့နယ်၊ မြေနီကုန်းကျေးရွာအနီး မေလ ၁၂ ရက် မွန်းလွဲ ၁:၂၀ ခန့်က အင်အား ၁၅၀ ခန့်ပါ စစ်ကောင်စီစစ်ကြောင်းကို မင်းဘူးခရိုင် အမှတ်-၅ တပ်ရင်းမှ တော်လှန်ရေးရဲဘော်များက ခြင်ထောင် ကျေးရွာအနီး စောင့်ကြိုတိုက်ခိုက်ခဲ့သည်။ တိုက်ပွဲတွင် စစ်ကောင်စီတပ်သား ၃ ဦး မိုင်းထိမှန်သေဆုံးပြီး အများအပြား ဒဏ်ရာရရှိခဲ့သည်။ တော်လှန်ရေးတပ်များ ထိခိုက်မှုမရှိဘဲ ဆုတ်ခွာနိုင်ခဲ့ကြောင်း ထုတ်ပြန်ထားသည်။

စစ်ကောင်စီတပ်သည် ကျေးရွာများတွင် ပစ္စည်းယူခြင်း၊ ကြက်ငှက်ချက်စားခြင်းများ ပြုလုပ်နေသည်ဟု ဒေသခံများထံမှ သိရသည်။ မင်းဘူးခရိုင် တပ်ရင်း-၅ တာဝန်ရှိသူက ပြည်သူများအား ဘေးလွတ်ရာသို့ ရွှေ့ပြောင်းပြီး မြေပြင်နှင့် ဝေဟင်အန္တရာယ်များကို သတိထားရန်နှင့် တော်လှန်ရေးတွင် ပူးပေါင်းပါဝင်ရန် တိုက်တွန်းခဲ့သည်။

၂။ ကောလင်း၊ မင်းတပ်နှင့် ဂန့်ဂေါတွင် စကစလေကြောင်းတိုက်ခိုက်မှုကြောင့် စာသင်ကျောင်းနှင့်နေအိမ်များ ပျက်စီး

———————————————————————

မေ ၁၅

The Kaladan Post

စစ်ကိုင်းတိုင်း၊ ကောလင်းမြို့နယ်၊ ကညို့အင်းရွာတွင် မေလ ၁၄ ရက် ည ၁၀:၂၃ နာရီခန့်က စစ်ကောင်စီဂျက်ဖိုက်တာဖြင့် ဗုံး ၂ လုံး ကြဲချခဲ့ရာ ဗုံးများမပေါက်ကွဲသော်လည်း နေအိမ်တစ်လုံး ဗုံးထိမှန် ပျက်စီးခဲ့သည်။

ချင်းပြည်နယ်၊ မင်းတပ်မြို့နယ်တွင် မေလ ၁၅ ရက် နံနက် ၉:၄၀ ခန့်က စစ်ကောင်စီတိုက်လေယာဉ်က ကျေးရွာတစ်ရွာကို အကြောင်းမဲ့ ဗုံးကြဲတိုက်ခိုက်ခဲ့ခြင်းကြောင့် ထိခိုက်သေဆုံးမှုရှိကြောင်းသိရသည်။

မကွေးတိုင်း၊ ဂန့်ဂေါမြို့နယ်၊ လာပို့ကျေးရွာရှိ စာသင်ကျောင်းကို မေလ ၁၄ ရက် ည ၁၁:၂၄ ခန့်က Mig 29 လေယာဉ်ဖြင့် ဗုံးကြဲခဲ့ရာ စာသင်ကျောင်းဆောင် လုံးဝပျက်စီးခဲ့ပြီး လူထိခိုက်မှုမရှိခဲ့ဟု ဒေသခံများက ပြောသည်။

၃။ တာလယ်ဗျူဟာစခန်းကို KNU သိမ်းပိုက်၊ စစ်သား ၉ ဦးသေဆုံးပြီး ဒုတပ်ရင်းမှူး လွတ်မြောက်နေ

—————————————————————————

မေ ၁၅

The Kaladan Post

ကရင်ပြည်နယ်၊ ထိုင်း-မြန်မာနယ်စပ်အနီးရှိ တာလယ်ဗျူဟာစခန်းကို မေလ ၁၃ ရက် ည ၇ နာရီခန့်တွင် ကရင်အမျိုးသားလွတ်မြောက်ရေးတပ်မတော် (KNLA) နှင့် ကရင်အမျိုးသားကာကွယ်ရေးတပ် (KNDO) ပူးပေါင်းတပ်များက သိမ်းပိုက်ခဲ့သည်။ တိုက်ပွဲတွင် စစ်ကောင်စီတပ်မှ ဗိုလ်ကြီးအပါအဝင် စစ်သား ၉ ဦး သေဆုံးပြီး ၁၂၀ မမ လက်နက်ကြီးကျည်အပါအဝင် ခဲယမ်းများ သိမ်းဆည်းရရှိခဲ့သည်။ ခလရ ၂၄ ၏ ဒုတပ်ရင်းမှူးနှင့် တပ်ဖွဲ့ဝင်အချို့ ထွက်ပြေးလွတ်မြောက်နေပြီး KNU က လိုက်လံဖမ်းဆီးနေသည်။

၁၉၈၆ ခုနှစ်ကတည်းက စစ်ကောင်စီက တည်ဆောက်ထားသည့် ဤစခန်းသည် ဒေသခံများ၏ လွတ်လပ်စွာ လှုပ်ရှားရှာဖွေခွင့်ကို ကန့်သတ်ထားခဲ့သည်။ ယခုသိမ်းပိုက်မှုဖြင့် အနီးဝန်းကျင်ကျေးရွာများမှ ပြည်သူများ မူလအခြေအနေအတိုင်း လုပ်ကိုင်ရှာဖွေနိုင်တော့မည်ဖြစ်ကြောင်း ထုတ်ပြန်ထားသည်။

ယနေ့နံနက်ပိုင်းတွင် KNU တပ်များက နယ်စပ်အနီး ၁ ကီလိုမီတာအကွာရှိ မော်ဖိုးကေစခန်းကိုလည်း ထိုးစစ်ဆင်တိုက်ခိုက်နေပြီး ဒေသခံ ၄၁၄ ဦး ထိုင်းနိုင်ငံဘက်သို့ ထွက်ပြေးတိမ်းရှောင်နေရသည်။

စစ်ကောင်စီက တဖက်သတ်အပစ်ရပ်ကြေညာထားသော်လည်း ပြည်သူများနေထိုင်ရာ ကျေးရွာများနှင့် စာသင်ကျောင်းများကို ပစ်မှတ်ထားဗုံးကြဲတိုက်ခိုက်နေသဖြင့် တော်လှန်ရေးအဖွဲ့များက လေကြောင်းရန် ကာကွယ်ရေးနည်းများ လိုက်နာရန် တိုက်တွန်းထားသည်။

၄။ စစ်ကိုင်းနှင့်ရခိုင်တွင် စစ်ကောင်စီလေကြောင်းတိုက်ခိုက်မှု အရပ်သားများ သေဆုံးပြီး နေအိမ်များ ပျက်စီး

—————————————————————

မေ ၁၅

The Kaladan Post

စစ်ကိုင်းတိုင်း၊ ဝက်လက်နှင့်ရွှေဘိုမြို့နယ်များတွင် မေလ ၁၃ ရက် ညနေ ၄ နာရီခန့်က စစ်ကောင်စီတပ်က တိုက်ပွဲဖြစ်ပွားခြင်းမရှိဘဲ လေယာဉ်ဖြင့် ဗုံးကြဲတိုက်ခိုက်မှုကြောင့် အရပ်သား ၂ ဦး သေဆုံးပြီး ၂ ဦး ဒဏ်ရာရရှိခဲ့သည်။ ဝက်လက်မြို့နယ်၊ စခန်းသာကျေးရွာတွင် တိုက်လေယာဉ်ဖြင့် ၂ ကြိမ် တိုက်ခိုက်ခဲ့ရာ နေအိမ်များ ပျက်စီးခဲ့သည်။ ရွှေဘိုမြို့နယ်၊ ငပိအိုးကျေးရွာတွင် ပေါင် ၂၅၀ ဗုံး ၂ လုံး ကြဲချခဲ့သော်လည်း ထိခိုက်မှုမရှိခဲ့ဟု ဒေသခံများက ပြောသည်။

ရခိုင်ပြည်၊ ကျောက်တော်မြို့၊ ရွာမရပ်ကွက်တွင် မေလ ၁၄ ရက် ညနေ ၄ နာရီခန့်က စစ်ကောင်စီလေကြောင်းက ပေါင် ၅၀၀ ဗုံးဖြင့် တိုက်ခိုက်ခဲ့ရာ အမျိုးသမီး ၂ ဦးထက်မနည်း သေဆုံးပြီး ၃ ဦး ဒဏ်ရာရရှိခဲ့သည်။ ဗုံးကြဲမှုကြောင့် နေအိမ်များ ပျက်စီးခဲ့ပြီး ဒေသခံများ အထိတ်တလန့်ဖြစ်ကာ နောက်ထပ်တိုက်ခိုက်မှုများကို စိုးရိမ်နေကြသည်။ ဧပြီလတွင်လည်း ကျောက်တော်မြို့၌ ဗုံးကြဲမှုများကြောင့် သေဆုံးထိခိုက်မှုများ ဖြစ်ပွားခဲ့သည်။

စစ်ကောင်စီက မေလ ၃၁ ရက်အထိ အပစ်ရပ်ထားသည်ဟု ကြေညာထားသော်လည်း စစ်ကိုင်း၊ ရခိုင်နှင့် အခြားဒေသများတွင် နေ့စဉ် လေကြောင်းတိုက်ခိုက်မှုများ ဆက်လက်ပြုလုပ်နေပြီး အရပ်သားများထံ အကြောက်တရားဖြစ်ပေါ်စေရန် ရည်ရွယ်သည်ဟု ဒေသခံစစ်ရေးလေ့လာသူတစ်ဦးက သုံးသပ်သည်။

၅။ ၂၀၂၅ တွင် NUG အား အသွင်ကူးပြောင်းရေးအစိုးရအဖြစ် တင်မြှင့်ရန် စီစဉ်

———————————————————————–

မေ ၁၅

The Kaladan Post

အမျိုးသားညီညွတ်ရေးအစိုးရ (NUG) ၏ ဝန်ကြီး ဒေါက်တာဇော်ဝေစိုးက ၂၀၂၅ ခုနှစ်အတွင်း NUG အား နိုင်ငံရေးနှင့် စစ်ရေးအရ နောက်တစ်ဆင့်တက်ရန် အသွင်ကူးပြောင်းရေးအစိုးရအဖြစ် ဖွဲ့စည်းရန် တိုင်းရင်းသားနှင့် တော်လှန်ရေးခေါင်းဆောင်များအားလုံး သဘောတူညီထားကြောင်း ကြေညာခဲ့သည်။ “ပြည်သူမှ ပြည်သူသို့” အစီအစဉ်၌ ပြောကြားရာတွင် ၎င်းက ယာယီသမ္မတဒူဝါလရှီးလ၏ ညွှန်ကြားချက် အရ ပြည်တွင်းသို့ ပြန်လည်ရောက်ရှိခဲ့ပြီး တိုင်းရင်းသားနှင့် တော်လှန်ရေးခေါင်းဆောင်များနှင့် တွေ့ဆုံ ဆွေးနွေးခဲ့ကြောင်း ဖော်ပြခဲ့သည်။ ထိုဆွေးနွေးမှုများအရ NUG အား အသွင်ကူးပြောင်းရေးအစိုးရအဖြစ် တည်ထောင်ရန် သဘောတူညီမှု ရရှိခဲ့သည်။

ဒေါက်တာဇော်ဝေစိုးက ၂၀၂၁ နှင့် ၂၀၂၅ ခုနှစ်၏ အခြေအနေများ ကွဲပြားနေပြီး လက်ရှိတော်လှန်ရေးသည် နယ်မြေများ၊ စစ်အင်အားနှင့် လက်နက်အင်အားများ ပိုင်ဆိုင်ထားသည့်အပြင် ပြည်သူလူထု၏ ထောက်ခံမှုကိုလည်း ရရှိထားကြောင်း ပြောကြားခဲ့သည်။ ၎င်းက နောက်တစ်ဆင့်တက်ရန် တော်လှန်ရေးအင်အားစုများ စုစည်းညီညွတ်ရန် လိုအပ်ကြောင်း အလေးပေးပြောဆိုခဲ့သည်။ မြေပြင်တွင် ပြည်သူ့ကာကွယ်ရေးတပ်ဖွဲ့ (PDF) များနှင့် အာဏာဖီဆန်ရေးလှုပ်ရှားမှု (CDM) တွင် ပါဝင်သူများ တက်ကြွနေဆဲဖြစ်ပြီး ပြည်သူလူထု၏ ပါဝင်မှုလည်း ခိုင်မာနေဆဲဖြစ်သည်။ ဒေါက်တာဇော်ဝေစိုးက စိန်ခေါ်မှုများနှင့် ရန်သူ၏ ရက်စက်မှုများရှိသော်လည်း စုပေါင်းသန္နိဋ္ဌာန်ဖြင့် တော်လှန်ရေးအောင်မြင်မည်ဟု ယုံကြည်ကြောင်း ပြောကြားခဲ့သည်။

ဒေါက်တာဇော်ဝေစိုးသည် ၂၀၂၅ ခုနှစ် နှစ်ဆန်းပိုင်းတွင် ယာယီသမ္မတ၏ ညွှန်ကြားချက်အရ ပြည်ပမှ မြန်မာနိုင်ငံသို့ ပြန်လည်ရောက်ရှိခဲ့ပြီး NUG ၏ ပြုပြင်ပြောင်းလဲရေးလုပ်ငန်းစဉ်တွင် ပါဝင်ရန်နှင့် တိုင်းရင်းသားနှင့်