———————————-

၁။ ထိုင်း-မြန်မာနယ်စပ်တွင်တိုက်ပွဲများကြောင့် ပြည်သူများ ထိုင်းဘက်သို့ ထွက်ပြေးတိမ်းရှောင်

—————————————————

မေ ၂၇

The Kaladan Post

ကရင်ပြည်နယ်၊ ထိုင်း-မြန်မာနယ်စပ်ရှိ သေ့ဘောဘိုး၊ ဆုံဆည်းမြိုင်၊ ဝေါလေဒေသများရှိ စစ်ကောင်စီတပ်စခန်းများကို KNLA နှင့် မဟာမိတ်တပ်ဖွဲ့များက မေလ ၂၇ ရက်နေ့မှ စတင်ထိုးစစ်ဆင်တိုက်ခိုက်နေသည်။ ဒရုန်းဗုံးကြဲမှု၊ စနိုက်ဘာပစ်ခတ်မှုနှင့် လက်နက်ကြီးပစ်ကူများဖြင့် တိုက်ပွဲများ ပြင်းထန်နေသဖြင့် ဒေသခံပြည်သူများသည် ထိုင်းနိုင်ငံဘက်ရှိ မော်လီချိုင်း၊ ဖုတ်ဖရ၊ ဆအိုကျေးရွာများသို့ သောင်ရင်းမြစ်ကူးကာ ထွက်ပြေးတိမ်းရှောင်နေကြသည်။ မေလ ၂၃ ရက်က ဘလယ်ဒိုစခန်းကို KNLA မဟာမိတ်တပ်များက သိမ်းပိုက်ပြီးနောက် စစ်ကောင်စီတပ်များကို ပိတ်ဆို့ဖြတ်တောက်ထားရာ တိုက်ပွဲများ ပိုမိုပြင်းထန်လာမည့် အခြေအနေကြောင့် ပြည်သူများ ထိုင်းဘက်သို့ ဆက်လက်ထွက်ပြေးနေသည်။ ထိုင်းစစ်တပ်က ၂၄ နာရီလုံခြုံရေးကင်းလှည့်ပြီး စစ်ရေးအသင့်အနေအထားဖြင့် ပြင်ဆင်ထားသည်။ လက်ရှိ မြဝတီ၊ ဘုရားသုံးဆူ၊ ကော့ကရိတ်၊ ကျုံဒိုး၊ ဖာပွန်၊ သံတောင်ဒေသများတွင် စစ်ကောင်စီနှင့် KNLA မဟာမိတ်တပ်များအကြား တိုက်ပွဲများ ဆက်လက်ဖြစ်ပွားနေသည်။

၂။ ပြည်သူ ၆ ဦးသေဆုံးပြီး အိမ်ခြေ ၃၀၀ နီးပါး မီးရှို့ခံရ

————————————————–

မေ ၂၇

The Kaladan Post

မကွေးတိုင်း၊ စလင်းမြို့နယ်တွင် စစ်ကောင်စီတပ်ဖွဲ့များက ပြည်သူ ၆ ဦးကို သတ်ဖြတ်ပြီး အိမ်ခြေ ၃၀၀ နီးပါးကို မီးရှို့ဖျက်ဆီးခဲ့သည်။ မေလ ၁၃ ရက်မှ ၂၄ ရက်အထိ အင်အား ၂၅၀ ခန့်ပါ စစ်ကြောင်းကို မင်းဘူးခရိုင် အမှတ် ၅ တပ်ရင်းနှင့် မဟာမိတ်တပ်ဖွဲ့များက ဒရုန်းဗုံးများ၊ ၆၀ ကွန်မန်ဒိုစိန်ပြောင်းများဖြင့် လိုက်လံချေမှုန်းတိုက်ခိုက်ခဲ့ရာ စစ်သား ၃၀ ကျော်သေဆုံးပြီး အများအပြား ဒဏ်ရာရရှိကာ လင်းဇင်းရဲစခန်းသို့ ဆုတ်ခွာသွားခဲ့သည်။ တိုက်ပွဲများအတွင်း စစ်ကောင်စီက လေကြောင်းပစ်ကူ ၂ ကြိမ်ပြုလုပ်ခဲ့သည်။ ဂွေးကုန်း၊ ငါးသန်းခေါင်း၊ စနေချောင်နှင့် အိုးသည်ကျေးရွာများမှ နေအိမ်များ မီးရှို့ဖျက်ဆီးခံရပြီး ပြည်သူ့ကာကွယ်ရေးတပ်ဖွဲ့ဝင်တစ်ဦး ကျဆုံးခဲ့သည်။ တော်လှန်ရေးတပ်ဖွဲ့များက ပြည်သူများအား သတိထားနေထိုင်ရန်နှင့် ထုတ်ပြန်ချက်များကို လိုက်နာပူးပေါင်းရန် တိုက်တွန်းထားသည်။

၃။ စလင်းမြို့နယ်အတွင်း စစ်ကောင်စီတပ်၏ အကြမ်းဖက်မှုနှင့် တော်လှန်ရေးတပ်ဖွဲ့များ၏ ခုခံတိုက်ခိုက်မှု

—————————————————————

မေ ၂၇

The Kaladan Post

၂၀၂၅ ခုနှစ် မေလ ၁၃ ရက်မှ ၂၅ ရက်အထိ မကွေးတိုင်း၊ စလင်းမြို့နယ်တွင် စစ်ကောင်စီတပ်မ (၁၀၁) နှင့် ခလရ-၂၅၅ တပ်ရင်းပါ အင်အား ၂၅၀ ခန့်ပါ စစ်ကြောင်းသည် ကျေးရွာများကို မီးရှို့ဖျက်ဆီး၊ ပြည်သူ ၆ ဦးကို သတ်ဖြတ်ပြီး ပစ္စည်းများ လုယူခဲ့သည်။ မင်းဘူးခရိုင် အမှတ် ၅ တပ်ရင်းနှင့် မဟာမိတ်တပ်ဖွဲ့များက ဒရုန်းဗုံးချမှု၊ ၆၀ မမ စိန်ပြောင်းပစ်ခတ်မှုနှင့် ထိတွေ့တိုက်ပွဲများဖြင့် ပြင်းထန်စွာ ခုခံတိုက်ခိုက်ခဲ့သည်။ မေလ ၂၄ ရက်တွင် အိုးသယ်ကျေးရွာတွင် စစ်ကောင်စီတပ်ဖွဲ့ကို တိုက်ခိုက်ရာ စစ်ကောင်စီဘက်မှ ၃၀ ခန့် ထိခိုက်သေဆုံးပြီး လင်းဇင်းဘက်သို့ ဆုတ်ခွာသွားခဲ့သည်။ ဤတိုက်ပွဲအတွင်း တော်လှန်ရေးတပ်ဖွဲ့မှ ရဲဘော်တစ်ဦး ကျဆုံးခဲ့ပြီး တပ်ရင်းက သူ၏ စွန့်လွှတ်အနစ်နာခံမှုကို ဂုဏ်ပြုခဲ့သည်။ စစ်ကောင်စီ၏ လေကြောင်းတိုက်ခိုက်မှု နှစ်ကြိမ်လည်း ပြုလုပ်ခဲ့သော်လည်း တော်လှန်ရေးတပ်ဖွဲ့များက ပြည်သူနှင့်လက်တွဲကာ ဆက်လက်တိုက်ပွဲဝင်ရန် ကတိပြုထားသည်။

၄။ လက်ပံတန်းမြို့နယ်တွင် စစ်ကောင်စီခန့် အုပ်ချုပ်ရေးမှူး ဦးချစ်မင်း သေဆုံး

————————————————–

မေ ၂၇

The Kaladan Post

ပဲခူးတိုင်း၊ သာယာဝတီခရိုင်၊ လက်ပံတန်းမြို့နယ်၊ မြေစီးကျေးရွာအုပ်စုရှိ စစ်ကောင်စီခန့် အုပ်ချုပ်ရေးမှူး ချစ်မင်းသည် ၂၀၂၅ ခုနှစ်၊ မေလ ၂၇ ရက် နံနက် ၁၁:၃၀ ခန့်တွင် ၎င်း၏နေအိမ်တွင် ရွှေတန်းမြေပြည်သူ့ကာကွယ်ရေးတပ်ဖွဲ့ (PDF) မှ တိုက်ခိုက်ခဲ့ကြောင်း နွေးဦးရောင်ခြည် မြို့ပြစစ်ဆင်ရေး၏ထုတ်ပြန်ချက်အရသိရသည်။ ၎င်းသည် အုပ်ချုပ်ရေးမှူးအဖြစ် ၈ လခန့်သာ တာဝန်ထမ်းဆောင်ခဲ့ပြီး၊ ယခင်က စစ်ကောင်စီ၏ လက်ကိုင်တုတ်အဖြစ် ဆောင်ရွက်ခဲ့သူဖြစ်သည်။ ချစ်မင်းသည် စစ်မှုထမ်းဥပဒေကို အကြောင်းပြပြီး လူငယ်များကို ဖမ်းဆီးရာတွင် ပါဝင်ခဲ့သဖြင့် သာယာဝတီခရိုင် PDF အမှတ်(၁) တိုက်ခိုက်ရေးတပ်ဖွဲ့မှ ပစ်မှတ်ထား တိုက်ခိုက်ခဲ့ခြင်းဖြစ်သည်။

 

၅။ ပဲခူးဘောနက်ကြီးအနီး စစ်ကောင်စီဂိတ်စခန်းများကို တော်လှန်ရေးတပ်များ တိုက်ခိုက်၊ စစ်သား ၆ ဦးသေဆုံး

———————————————————————–

မေ ၂၇

The Kaladan Post

ရန်ကုန်မြို့မှ မိုင် ၅၀ ကျော်အကွာ ပဲခူးမြို့နယ်၊ ဘောနက်ကြီးအနီး ရန်ကုန်-မန္တလေး အမြန်လမ်းပိုင်းရှိ စစ်ကောင်စီဂိတ်စခန်းများနှင့် စစ်ကြောင်းများကို ပဲခူးခရိုင် တပ်ရင်းအမှတ် ၃၇၀၁ (ရွှေချောင်းတပ်ခွဲ) မှ တော်လှန်ရေးတပ်ဖွဲ့များက မေလ ၁၈၊ ၂၂ နှင့် ၂၄ ရက်တို့တွင် တိုက်ခိုက်ခဲ့သည်။ တိုက်ခိုက်မှုများအတွင်း စစ်သား ၆ ဦးသေဆုံးပြီး G4၊ G3၊ G2၊ M1 ကာဘိုင်အမျိုးအစားသေနတ်များ စုစုပေါင်း ၁၆ လက်နှင့် ကျည်အမျိုးမျိုး သိမ်းဆည်းရရှိခဲ့သည်။ ဇီးတောရွာရှိ ဂိတ်ကင်းစခန်းကို မီးရှို့ဖျက်ဆီးခဲ့ပြီး တော်လှန်ရေးတပ်ဖွဲ့ဝင်များ အထိအခိုက်မရှိ ဆုတ်ခွာနိုင်ခဲ့သည်။ လက်ရှိတွင် စစ်ကောင်စီတပ်များ ထိုးစစ်ဆင်နေပြီး တော်လှန်ရေးတပ်များက ရန်ကုန်အနီးတဝိုက်တွင် ဖြန့်ကျက်ထိုးစစ်ဆင်လျက်ရှိသည်။ တပ်ဖွဲ့မှ ကျည်လိုအပ်ချက်အတွက် ပြည်သူများ၏ ပံ့ပိုးကူညီမှုကို တောင်းခံထားသည်။

 

၆။ ပေါက်ခေါင်းမြို့နယ် သိုက်ချောင်းရွာတွင် စစ်ကောင်စီတပ်တပ်ဖွဲ့ဝင် ၁ ဦးသေဆုံးပြီး ၇ ဦး ဒဏ်ရာရ

——————————————————————

မေ ၂၇

The Kaladan Post

ပဲခူးတိုင်း၊ ပေါက်ခေါင်းမြို့နယ်၊ သိုက်ချောင်းရွာကို မီးရှို့ရန်လာသော စစ်ကောင်စီတပ်ဖွဲ့ကို ပြည်သူ့ကာကွယ်ရေးတပ်မတော် (PDF) တပ်ရင်း ၃၆၀၁ နှင့် ပေါက်ခေါင်း ပကဖ တပ်ဖွဲ့များက မေလ ၂၆ ရက် နေ့လယ် ၁:၁၅ နာရီတွင် လက်နက်ကြီး၊ လက်နက်ငယ်များဖြင့် ပစ်ခတ်တိုက်ခိုက်ခဲ့သည်။ တိုက်ပွဲတွင် စစ်ကောင်စီတပ်ဖွဲ့ဝင် ၁ ဦးသေဆုံးပြီး ၇ ဦး ဒဏ်ရာရရှိခဲ့ကာ PDF တပ်ဖွဲ့ဝင်များ ထိခိုက်မှုမရှိခဲ့ပေ။ စစ်ကောင်စီတပ်သည် ထိခိုက်ဒဏ်ရာရသူများနှင့် အလောင်းများကို ည ၈:၃၀ တွင် ကားများဖြင့် တင်ဆောင်ကာ ပေါက်ခေါင်းဘက်သို့ ပြန်လည်ဆုတ်ခွာသွားသည်။ ပေါက်ခေါင်းမြို့နယ်တွင် တော်လှန်ရေးတပ်များ၏ နယ်မြေထိန်းချုပ်မှု တိုးတက်လျက်ရှိပြီး မေလအတွင်း သစ်ပုတ်စစ်စခန်းနှင့် သိမ်ကုန်းတာဝါတိုင်စခန်းများကို သိမ်းပိုက်နိုင်ခဲ့သည်။

 

၇။ ဖားကန့်မြို့အနီးသို့ စစ်ေကာင်စီတပ်များရောက်ရှိနေသောကြောင့်ဒေသဒေပြည်သူများအား ယာယီတိမ်းရှောင်ရန် KIA သတိပေး

—————————————————————————-

မေ ၂၇

The Kaladan Post

ဖားကန့်မြို့သို့ စစ်ကောင်စီတပ်ဖွဲ့များ အင်အား ၅၀၀ ခန့်ဖြင့် စစ်ကြောင်းထိုးဝင်ရောက်လာပြီး ယမ်းချက်စက်ရုံ၊ လယ်ပြင်နှင့် ဖန်ခါးကုန်းကျေးရွာအနီးတဝိုက်တွင် စစ်ရေးတင်းမာနေသည်။ KIA နှင့် တော်လှန်ရေးပူးပေါင်းတပ်များက ဒေသခံပြည်သူများအား လုံခြုံရေးအရ ယာယီတိမ်းရှောင်ရန် သတိပေးထားသည်။ စစ်ကြောင်းများသည် မေလ ၂၆ ရက်ညပိုင်းတွင် အဆိုပါနေရာများသို့ ရောက်ရှိခဲ့ပြီး တိုက်ပွဲဖြစ်ပေါ်နိုင်ခြေရှိသည်။ KIA ၏ သတင်းအရ စစ်ကောင်စီတပ်သည် ဖားကန့်မြို့အဝင်တွင် နေရာယူထားပြီး စစ်ရေးအခြေအနေ တင်းမာနေဆဲဖြစ်သည်။ ဤလှုပ်ရှားမှုသည် KIA ထိန်းချုပ်ထားသော နယ်မြေများကို ပြန်လည်သိမ်းပိုက်ရန် စစ်ကောင်စီ၏ ထိုးစစ်ဆင်မှု၏ တစ်စိတ်တစ်ပိုင်းဖြစ်သည်