အောက်တို (၁၇) သတင်းတိုပေါင်းချုပ်

ခလရ ၇၅ မှ စစ်မှုထမ်းတပ်သား ၇ ဦး KNLA ထံ အလင်းဝင်ရောက်

အောက်တို ၁၇
The Kaladan Post
ပဲခူးတိုင်း၊ ကျောက်ကြီးမြို့နယ်ရှိ စစ်ကောင်စီတပ်၏ ခလရ ၇၅ တပ်ရင်းမှ စစ်မှုထမ်းတပ်သားသစ် ၇ ဦးသည် အောက်တိုဘာလ ၁၅ ရက်နေ့တွင် KNLA ထံ အလင်းဝင်ရောက်ခဲ့ကြောင်း KNU က သတင်းထုတ်ပြန်သည်။ အလင်းဝင်သူများမှာ ကျော်ဇေယျ (၂၂ နှစ်)၊ သီဟနိုင် (၂၇ နှစ်)၊ အောင်မျိုးဦး (၃၆ နှစ်)၊ စည်သူဟိန်း (၂၀ နှစ်)၊ မောင်မှောက် (၂၆ နှစ်)၊ သန်းနိုင်ဦး (၃၃ နှစ်) နှင့် ရာဇာထက် (၂၄ နှစ်) တို့ဖြစ်ပြီး ၎င်းတို့သည် စစ်မှုထမ်းအပတ်စဉ် ၇၊ ၁၀ နှင့် ၁၃ မှ သင်တန်းသားများဖြစ်သည်။ ၎င်းတို့အနက် သန်းနိုင်ဦးနှင့် ရာဇာထက်တို့မှာ အရောင်းစားခံရပြီး စစ်မှုထမ်းရောက်ရှိသူများဖြစ်သည်။ လက်နက်များ ယူဆောင်လာနိုင်ခြင်းမရှိသော်လည်း ၎င်းတို့အား ကျောက်ကြီးမြို့နယ်တာဝန်ရှိသူများက နေရာထိုင်ခင်း၊ စားနပ်ရိက္ခာနှင့် အဝတ်အစားများ ထောက်ပံ့ပေးကာ ကောင်းမွန်စွာ စောင့်ရှောက်ထားသည်။ KNU က မတရားစစ်မှုထမ်းစေခိုင်းခံရသူများအား တော်လှန်ရေးတပ်ဖွဲ့များထံ အလင်းဝင်ရောက်ရန် တိုက်တွန်းထားသည်။

ဘုရားကြီးကျေးရွာတွင် လက်နက်ကြီးထိမှန်၍ သက်ကြီးမောင်နှမ ၂ ဦးသေဆုံး

အောက်တို ၁၇
The Kaladan Post
မန္တလေးတိုင်း၊ နွားထိုးကြီးမြို့နယ်၊ ဘုရားကြီးကျေးရွာတွင် အောက်တိုဘာ ၁၇ ရက် မနက် ၁ နာရီ ဝန်းကျင်က ပြင်စည်ကျေးရွာအထိုင်ချ စစ်ကောင်စီတပ်မှ ပစ်ခတ်သော လက်နက်ကြီးကျည်ထိမှန် ၍ အသက် ၈၀ အရွယ် ဒေါ်သောင်းကြည်နှင့် အသက် ၇၅ နှစ်အရွယ် ဦးလှသိန်းတို့ မောင်နှမ ၂ ဦး နေရာတွင်ပင် သေဆုံးခဲ့သည်။ ထိုဖြစ်ရပ်ကြောင့် နေအိမ် ၄ လုံး ပျက်စီးခဲ့ပြီး၊ အိမ်ခြေ ၄၀၀ ကျော် ရှိသည့် အဆိုပါကျေးရွာမှ ဒေသခံအများစု အနီးဝန်းကျင်တောတိုက်များနှင့် အခြားရွာများသို့ ထွက်ပြေးတိမ်းရှောင်ခဲ့ကြသည်။ ဒေသခံတစ်ဦးက လက်နက်ကြီး ၄ လုံးပစ်ခတ်ခဲ့ရာ တစ်လုံး မပေါက်ကွဲဘဲ၊ တစ်လုံးမှာ ကျေးရွာမြောက်ပိုင်းရှိ အိမ်ပေါ်ကျရောက်ခဲ့သည်ဟု ပြောသည်။
ထို့ပြင် အောက်တိုဘာ ၁၀ ရက်ကလည်း နွားထိုးကြီးမြို့နယ်၊ မကျီးကုန်းကျေးရွာရှိ စစ်ရှောင်များ နေထိုင်ရာ ဘုန်းကြီးကျောင်းကို စစ်ကောင်စီဘက်မှ လေကြောင်းမှ ဗုံးကြဲတိုက်ခိုက်ခဲ့ရာ ပြည်သူ ၂ ဦးသေဆုံးပြီး ၁၁ ဦး ဒဏ်ရာရရှိခဲ့သည်။

ကရင်ပြည်နယ် မြ၀တီမြို့နယ်တွင် စစ်တပ်နှင့် BGF များ စစ်ကြောင်းထိုးရန် ကြိုးပမ်းနေ

အောက်တို ၁၇
The Kaladan Post
ကရင်ပြည်နယ်၊ မြ၀တီမြို့နယ်ရှိ မင်းလက်ပံနှင့် လေးကေ့ကော်ဘက်ဘက်သို့ အင်ကြောင်းမြိုင်မှ စစ်ကောင်စီတပ်များနှင့် လက်အောက်ခံကရင်နယ်ခြားစောင့်တပ် BGF များက အလုံးအရင်း စစ်ကြောင်းထိုးလာသဖြင့် ကရင်အမျိုးသားလွတ်မြောက်ရေးတပ်မတော် KNLA နှင့် တိုက်ပွဲများ အပြင်းအထန် ဖြစ်ပွားနေကြောင်း ကရင်စစ်ရေးသတင်းရင်းမြစ်များက ပြောဆိုသည်။ ယနေ့ နံနက် ၉ နာရီမှစတင်ကာ စစ်ကြောင်းထိုးရန် ကြိုးပမ်းနေပြီး၊ မြ၀တီမြို့အခြေစိုက် ၂၇၅တပ်ရင်းက လက်နက်ကြီးများနှင့် မစ်ဇိုင်းများ ပစ်ကူပေးနေကြောင်း သိရသည်။ အင်ကြင်းမြိုင် တရုတ်ကျား ဖြန့်ရုံအနီးမှ စစ်တပ်နှင့် BGF တပ်များ စစ်ကြောင်းထိုးရန် ကြိုးပမ်းနေပြီး၊ ထိုင်းနယ်စပ်ဂိတ်များ ပိတ်ထားကာ တိုက်ပွဲပြင်းထန်မှုကြောင့် ထိုင်းဘက်သို့ လက်နက်ကြီးကျည်များ ကျရောက်နေ သည်။ စစ်တပ်က BGF ဝတ်စုံဝတ်ဆင်ကာ KNLA နှင့်တိုက်ခိုက်ရန် စစ်ကြောင်းထိုးနေပြီး၊ BGF တပ်များလည်း စစ်တပ်နှင့်ပူးပေါင်းတိုက်ခိုက်နေကြောင်း သတင်းရင်းမြစ်များက ဖော်ပြသည်။ ထို့ကြောင့် တိုက်ပွဲဖြစ်ပွားရာ နေရာများမှ ပြည်သူများ ထိုင်း-မြန်မာနယ်စပ်ရှိ သောင်ရင်းမြစ်ကမ်း ဘေးသို့ ထွက်ပြေးတိမ်းရှောင်နေရပြီး၊ နယ်စပ်ဂိတ်များ ပိတ်ဆို့ခံရမှုကြောင့် ထိုင်းဘက်သို့ လက်နက်ကြီးများ ကျည်ကျရောက်နေကာ ထိုင်းစစ်တပ်က ကင်းလှည့်နေကြောင်း သိရသည်။

ရှမ်းပြည်နယ်မြောက်ပိုင်း မိုးမိတ်နှင့် နမ္မတူမြို့များတွင် စစ်တပ်က တိုက်ပွဲမရှိဘဲ လေကြောင်းဗုံးကျဲတိုက်ခိုက်

အောက်တို ၁၇
The Kaladan Post
ရှမ်းပြည်နယ်မြောက်ပိုင်း၊ TNLA ထိန်းချုပ်ထားသည့် မိုးမိတ်မြို့တွင် အောက်တိုဘာ ၁၆ ရက် ညနေ ၆ နာရီ ၂၀ မိနစ်ခန့်က စစ်တပ်က တိုက်ပွဲဖြစ်ပွားခြင်းမရှိဘဲ တိုက်လေယာဉ်ဖြင့် ပေါင် ၅၀၀ နှင့် ၂၅၀ ဗုံးများဖြင့် ဗုံးကျဲတိုက်ခိုက်ခဲ့ရာ မိုးမိတ်မြို့ တောင်ပိုင်းရပ်ကွက်တွင် ဗုံးကျရောက်ပေါက် ကွဲခဲ့သည်။ ဤတိုက်ခိုက်မှုကြောင့် အသက် ၅၀ နှစ်အရွယ် ဒေါ်အုံရွှေ ထိခိုက်ဒဏ်ရာရရှိပြီး၊ နေအိမ် ၂ လုံးနှင့် ကား ၁ စီး ပျက်စီးခဲ့ကြောင်း ဒေသခံများထံမှ သိရသည်။
အလားတူ၊ အောက်တိုဘာ ၁၀ ရက်က မိုးမိတ်မြို့နယ် အောင်မြေရွာအနီးတွင်လည်း စစ်တပ်က တိုက်လေယာဉ်ဖြင့် ပေါင် ၂၅၀ ဗုံး ၂ လုံးနှင့် ရော့ကတ်လက်နက်ကြီး ၆ လုံးဖြင့် ဗုံးကျဲတိုက်ခိုက်ခဲ့ သည်။ ထို့ပြင် ယနေ့ နံနက် ၈ နာရီ ၁၅ မိနစ်ခန့်တွင် နမ္မတူမြို့နှင့် နမ့်ဆန်မြို့နယ် ဟိုမိန်းကျေးရွာ တို့တွင်လည်း စစ်တပ်က တိုက်လေယာဉ်ဖြင့် ဗုံးကျဲတိုက်ခိုက်ခဲ့ကြောင်း TNLA ၏ ထုတ်ပြန်ချက်အရ သိရသည်။

တအာင်းဒေသများတွင် အောက်တိုဘာလအတွင်း စစ်ကောင်စီလေကြောင်းတိုက်ခိုက်မှုကြောင့် ပြည်သူ ၂၉ ဦးသေဆုံး

အောက်တို ၁၇
The Kaladan Post
ရှမ်းပြည်နယ်မြောက်ပိုင်း၊ TNLA ထိန်းချုပ်ထားသည့် ဒေသများဖြစ်သော မိုးမိတ်၊ နမ္မတူ၊ နမ့်ဆန် အပါအဝင် မြို့ ၈ မြို့သို့ စစ်ကောင်စီက အောက်တိုဘာလအတွင်း လေကြောင်းဗုံးကျဲတိုက်ခိုက်မှု ၂၅ ကြိမ်ပြုလုပ်ခဲ့ရာ ကလေးငယ် ၇ ဦးအပါအဝင် ပြည်သူ ၂၉ ဦးသေဆုံးပြီး ကလေးငယ် ၁၁ ဦးအပါအဝင် ၃၆ ဦး ဒဏ်ရာရရှိခဲ့ကြောင်း TNLA ၏ထုတ်ပြန်ချက်အရ သိရသည်။ အောက်တိုဘာ ၁၇ ရက်တွင် နမ္မတူမြို့တွင် လေကြောင်းတိုက်ခိုက်မှုကြောင့် အမျိုးသမီး ၄ ဦး ဒဏ်ရာရရှိခဲ့ပြီး၊ နမ့်ဆန်မြို့တွင်လည်း ၃ ဦး ထိခိုက်ဒဏ်ရာရခဲ့ကြောင်းသိရသည်။
ဤတိုက်ခိုက်မှုများကြောင့် နေအိမ် ၁၀၀ ကျော်၊ စာသင်ကျောင်းနှင့် ဘုန်းကြီးကျောင်းများ ထိခိုက် ပျက်စီးခဲ့ပြီး၊ စစ်ကောင်စီ၏ လူထုကို ပစ်မှတ်ထားသည့် လေကြောင်းတိုက်ခိုက်မှုများသည် စစ်ရာ ဇဝတ်မှုများဖြစ်ကြောင်း TNLA က စွပ်စွဲထုတ်ပြန်ထားသည်။ ထို့ကြောင့် ဒေသခံပြည်သူများအနေ ဖြင့် စစ်ရေးသတိရှိရန်နှင့် လေကြောင်းရန်ကာကွယ်ရေးနည်းလမ်းများကို လိုက်နာရန် TNLA က တိုက်တွန်းထားသည်။

စစ်ကောင်စီသည် စစ်မှုထမ်းသင်တန်းကျောင်းများ တိုးချဲ့ဖွင့်လှစ်ပြီး စစ်သားစုဆောင်းမှု အရှိန်မြှင့်နေ

အောက်တို ၁၇
The Kaladan Post
မြန်မာ့စစ်ဖက်ရေးရာနှင့် လုံခြုံရေးဆိုင်ရာလေ့လာရေးအဖွဲ့ (MDSI) ၏ ထုတ်ပြန်ချက်အရ စကစ သည် ပြည်သူ့စစ်မှုထမ်းဥပဒေဖြင့် ဖမ်းဆီးစုဆောင်းထားသည့် လူငယ်များအား လက်ခံလေ့ကျင့် ပေးရန် စစ်သင်တန်းကျောင်း ၂၇ ခုအထိ ဖွင့်လှစ်ထားပြီး အရန်သင်တန်းကျောင်းများအဖြစ် ခအက၊ တကအ နှင့် ရလတ(၅၇) တို့တွင် ထပ်တိုးဖွင့်လှစ်လျက်ရှိသည်။ စစ်မှုထမ်းအပတ်စဉ် ၁၇ အထိ စခတ ၉ တပ်၊ တတက ၁၁ တပ်၊ ရကသ ၂ တပ်၊ တကန၊ ဗထူး၊ ခအက၊ တကအ နှင့် ရလတ (၅၇)တို့တွင် သင်တန်းပေးခဲ့သည်။ ရှမ်းပြည်နယ်၊ ရန်ကုန်တိုင်း၊ ဧရာဝတီတိုင်း၊ မွန်ပြည်နယ်၊ နေပြည်တော်၊ မန္တလေးတိုင်းနှင့် ပဲခူးတိုင်းရှိ သင်တန်းကျောင်း ၁၅ ခုသည် ပင်မလေ့ကျင့်ရေးနေရာ များအဖြစ် လုပ်ဆောင်နေသည်။ သို့သော် သပိတ်ကျင်းမြို့နယ်ရှိ စခတ(၂)၊ တတက(၁၃)၊ ရွှေဘိုရှိ စခတ(၈) နှင့် ကလေးတပ်နယ်ရှိ တတက(၁၃) တို့တွင် လုံခြုံရေးအခြေအနေကြောင့် သင်တန်းများ ပုံမှန်မလုပ်ဆောင်နိုင်ဘဲ ရပ်နားထားရသည်။ အောက်တိုဘာ ၁၀ ရက်ထိ အပတ်စဉ် ၁၅ ကို သင်တန်းဆင်းပြီးစီးထားပြီး၊ အပတ်စဉ် ၁၈ ကို မကြာမီ ဖွင့်လှစ်ရန် ပြင်ဆင်နေသည်။ စစ်ကောင်စီသည် စစ်မှုထမ်းတပ်သားများ သတ်မှတ်အရေအတွက်ထက် ကျော်လွန်ရရှိရန် နည်းလမ်းမျိုးစုံဖြင့် ဖမ်းဆီးစုဆောင်းနေပြီး၊ သင်တန်းကျောင်းများ ထပ်တိုးဖွင့်လှစ်ကာ အရှိန်အဟုန်ဖြင့် လေ့ကျင့်ပေးနေသည်ဟု MDSI က ဖော်ပြသည်။

အုတ်ဖိုမြို့နယ်တွင် စစ်မှုထမ်းဖမ်းဆီးစဉ် လူငယ်တစ်ဦး ထွက်ပြေးမှုကို အကြောင်းပြပြီး စစ်သားများက ပစ်ခတ်သတ်ဖြတ်

အောက်တို ၁၇
The Kaladan Post
ပဲခူးတိုင်း၊ အုတ်ဖိုမြို့နယ်ရှိ ရေဒါကျေးရွာသား ကိုအောင်နိုင်စိုး (၂၈) နှစ်ကို အောက်တိုဘာလ ၁၂ ရက်နေ့ မွန်းလွဲ ၂ နာရီ ခန့်တွင် စစ်တပ်က ပေါ်တာဆဲဖမ်းဆီးစဉ် ထွက်ပြေးခဲ့ရာ ထိုလူငယ်ကို စစ်သားများက လိုက်ပစ်ခတ်ရန် ကျည်ထိမှန်ကာ ပွဲချင်း သေဆုံးခဲ့သည်ဟု အသတ်ခံရသူ၏ မိတ်ဆွေများက ပြောဆိုကြောင်း သိရသည်။ ဖြစ်ရပ်ဖြစ်ပွားခဲ့ရာ နေရာမှာ အုတ်ဖိုမြို့နယ်၊ မအူတန်းရွာနှင့် ကြို့ကိုးပင်ရွာ အကြား ဆည်မြောင်းပေါ်ဖြစ်ပြီး စစ်တပ်က လူငယ်များကို လိုက်လံ ပေါ်တာဆွဲ ဖမ်းဆီးခဲ့ရာ ထွက်ပြေးလှုပ်ရှားမှုများကို စစ်သားများက လိုက်ပစ်ခတ်ခဲ့ကြောင်း ဆိုသည်။ သေဆုံးခဲ့သော ကိုအောင်နိုင်စိုး၏ ရုပ်အလောင်းကို စစ်တပ်က လက်ရှိချိန်ထိ သဂ္ဂရိုလ်ခွင့် မပေးသေးကြောင်း၊ ထို့ကြောင့် မိသားစု ဝင်များက ရက်လည် ဆွမ်းသွပ်ခြင်း မပြုလုပ်ရသေးကြောင်း သိရသည်။ လက်ရှိ အုတ်ဖိုမြို့နယ်တွင် စစ်မှုထမ်း အပတ်စဉ် ၁၈ အတွက် စစ်တပ်က လူငယ်များကို ပေါ်တာဆွဲ ဖမ်းဆီးမှုများ ပြုလုပ်နေရာ ခရီးသည်တင်ကားများပေါ်မှ လူငယ်များကို ဆွဲချ ဖမ်းဆီးမှုများလည်း ရှိနေကြောင်း ဒေသခံများက ပြောဆိုသည်။ ပဲခူးတိုင်း၊ ကြို့ပင်ကောက်မြို့နယ်၊ မင်းလှမြို့နယ် စသည့် မြို့နယ်အများစုတွင်လည်း အလားတူ ဖမ်းဆီးမှုများ ဆက်ရှိနေကြောင်း ဒေသပြည်သူများက ပြောဆိုကြသည်။

 

ရေဦးမြို့နယ်တွင် စစ်အုပ်စုစစ်ကြောင်း မိုင်းဆွဲတိုက်ခိုက်ခံရပြီး တပ်သားနှစ်ဦးသေဆုံးပြီး လေးဦးဒဏ်ရာရ

အောက်တို ၁၇
The Kaladan Post
စစ်ကိုင်းတိုင်း၊ ရေဦးမြို့နယ်တွင် အောက်တိုဘာ ၁၆ ရက်က ကင်းပုန်းဝပ်ရန်လာသည့် စစ်အုပ်စု စစ်ကြောင်း (တပ်သား ၁၀ ဦးခန့်) ကို တော်လှန်ရေးအင်အားစုများက မြို့အဝင်ဆိုင်းဘုတ်အနီးတွင် မိုင်းဆွဲတိုက်ခိုက်ခဲ့ရာ စစ်အုပ်စုတပ်သား ၂ ဦးသေဆုံးပြီး ၄ ဦး ဒဏ်ရာရရှိခဲ့ကြောင်း ရေဦးမြို့နယ် ပြည်သူ့ကာကွယ်ရေးအဖွဲ့ (ပကဖ) နှင့် တော်လှန်ရေးရဲဘော်များက အတည်ပြုထုတ်ပြန်သည်။ တိုက်ခိုက်မှုကြောင့် စစ်ကြောင်းစုဖွဲ့မှုပျက်ယွင်းကာ မြို့ပေါ်ရှိ စစ်အုပ်စုနှင့် ပြန်လည်ပူးပေါင်း သွားခဲ့ကြသည်။ ရေဦးမြို့နယ်တွင် စစ်အုပ်စုသည် ဒေသခံပြည်သူများကို ဖမ်းဆီးစစ်ဆေးခြင်း၊ လုံခြုံရေးတင်းကြပ်ထားခြင်းများပြုလုပ်နေပြီး ဩဂုတ်လ ၆ ရက်က ငြုပ်တုံကျေးရွာမှ လယ်သမား ၃ ဦးကို အကြောင်းမဲ့ဖမ်းဆီးခဲ့ကာ ယနေ့အထိ ပြန်လွှတ်ပေးခြင်းမရှိသေးဟု ဒေသခံများက ဆိုသည်။ ထို့ပြင် စက်တင်ဘာလတွင်လည်း စစ်အုပ်စုကင်းပုန်းများကို တိုက်ခိုက်ခဲ့ရာ တပ်သား ၅ ဦးထက်မနည်းသေဆုံးခဲ့သည်ဟု တော်လှန်ရေးအင်အားစုများက ဖော်ပြသည်။

မကွေးနှင့် စစ်ကိုင်းတိုင်းများတွင် စစ်တပ်က ကျေးရွာများစီးနင်း လူငယ်နှင့်ပြည်သူများ ပေါ်တာဆွဲဖမ်းဆီး

အောက်တို ၁၇
The Kaladan Post
မကွေးတိုင်း၊ စလင်းမြို့နယ်တွင် အောက်တိုဘာ ၁၆ ရက်က အကြမ်းဖက်စစ်တပ်က ကြက်သား ကိုင်ရွာနှင့် သေနပ်ကုန်းရွာများကို စီးနင်းပြီး လူငယ် ၅ ဦးကို ပေါ်တာဆွဲဖမ်းဆီးခဲ့ကြောင်း ပြည်သူ့ညီနောင်-စလင်း သတင်းတာဝန်ခံ ကိုပြည်သူက ပြောဆိုသည်။ ကြက်သားကိုင်ရွာတွင် ဗူးခွံကောက်နေသော သားအဖ ၃ ဦးအနက် ဖခင်ဖြစ်သူကို ဖမ်းဆီးခဲ့ပြီး၊ သေနပ်ကုန်းရွာမှ လူငယ် ၄ ဦးကိုပါ ဖမ်းဆီးကာ စလင်းမြို့ မြို့မရဲစခန်းတွင် ချုပ်နှောင်ထားသည်။ ဖမ်းဆီးခံရသူများမှာ အသက် ၂၀ ကျော်မှ ၃၅ နှစ်အရွယ် လူငယ်များဖြစ်သည်။ ထို့အတူ မကွေးတိုင်း၊ ပခုက္ကူမြို့နယ်၊ မကျီးကန်ရွာတွင် တပ်မ ၁၀၁ မှ အင်အား ၅၀ ခန့်ဖြင့် အောက်တိုဘာ ၁၆ ရက်က စီးနင်းကာ အသက် ၂၀ မှ ၄၀ ကျော်အရွယ် လူငယ် ၅ ဦးကို ဖမ်းဆီးပြီး တပ်မ ၁၀၁ သို့ ခေါ်ဆောင်သွားသည်။ ပဲခူးတိုင်း၊ ကြို့ပင်ကောက်နှင့် အုတ်ဖိုမြို့နယ်အစပ်တွင် အောက်တိုဘာ ၈ ရက်က စစ်ကြောင်းက ရေငံရွာမှ ၈ ဦး၊ သရက်တောရွာမှ ၆ ဦးနှင့် မအူတန်းရွာမှ ပြည်သူများကို ပေါ်တာဆွဲဖမ်းဆီးခဲ့သည်။ စစ်ကိုင်းတိုင်း၊ ကန့်ဘလူမြို့နယ်တွင်လည်း အောက်တိုဘာ ၁၃ ရက်က ရွှေဘိုမှ တနိုင်းဘက်သို့ သွားသော အံစာတုံးကားပေါ်မှ လူငယ် ၉ ဦးကို စံပယ်နံ့သာ ပျူစောထီးစခန်းမှ စစ်သားများက ဖမ်းဆီးခဲ့သည်။ ဤဖြစ်ရပ်များသည် အောက်တိုဘာလအတွင်း စစ်အုပ်စု၏ အကြမ်းဖက် ဖမ်းဆီး မှုများကြောင့် ဒေသခံများအကြား လုံခြုံရေးစိုးရိမ်မှု မြင့်တက်လျက်ရှိပြီး၊ စစ်မှုထမ်းစုဆောင်းရန် ရည်ရွယ်ဖမ်းဆီးမှုများအဖြစ် သံသယရှိနေသည်။

 

ရေဖြူမြို့နယ်တွင် စစ်အုပ်စုစစ်ကြောင်းထိုး ဒေသခံထောင်နှင့်ချီ ထွက်ပြေးတိမ်းရှောင်

အောက်တို ၁၇
The Kaladan Post
တနင်္သာရီတိုင်း၊ ရေဖြူမြို့နယ်တွင် အောက်တိုဘာ ၁၂ ရက်မှစတင်ကာ ယနေ့အထိ စစ်အုပ်စုတပ်ဖွဲ့ အင်အား ၂၀၀ခန့်သည် မူဒူးကျေးရွာ၊ ရလိုင်ကျေးရွာ၊ ဇာဒီကျေးရွာအပါအဝင် ရေဖြူအနောက်ဘက် ကမ်းတလျှောက် စစ်ကြောင်းထိုးဝင်ရောက်နေသဖြင့် ဒေသခံပြည်သူ ၃,၀၀၀ ခန့် ဘေးလွတ်ရာသို့ နေရပ်စွန့်ခွာ ထွက်ပြေးတိမ်းရှောင်နေရကြောင်း စစ်ဘေးရှောင်ကူညီသူများက ပြောဆိုသည်။ စစ် အုပ်စုသည် ကျေးရွာများကို တရွာဝင် တရွာထွက် စစ်ကြောင်းထိုးနေပြီး၊ အောက်တိုဘာ ၁၆ ရက် တွင် တန်းရှင်းကျေးရွာကို မြိတ်လေတပ်စခန်းမှ လေကြောင်းဖြင့် ဗုံးကြဲတိုက်ခိုက်မှုနှင့် စစ်သေနတ် များဖြင့် ပစ်ခတ်မှုများ ပြုလုပ်ခဲ့ကြောင်းသိရသည်။ လက်ရှိတွင် နှစ်ဖက်တိုက်ပွဲကြီးကြီးမားမား မဖြစ်ပေါ်သေးသော်လည်း၊ စစ်တပ်ဘက်မှ စစ်ကြောင်းထိုးမှုနှင့် လေကြောင်းတိုက်ခိုက်မှုများ ဆက်လက်လုပ်ဆောင်နေပြီး၊ တော်လှန်ရေးအင်အားစုများက ဒရုန်းဖြင့် ဗုံးကြဲတိုက်ခိုက်မှုများ ပြုလုပ်နေသည်။ ထို့ပြင်၊ စစ်အုပ်စုသည် ရွေးကောက်ပွဲမတိုင်မီ ရေဖြူမြို့နယ်အတွင်း ကျေးရွာ များကို မကြာခဏ စစ်ကြောင်းထိုးဝင်ရောက်ခြင်း၊ ဒေသခံများကို လူသားဒိုင်းအဖြစ် ဖမ်းဆီးခြင်း၊ နေအိမ်များကို မီးရှို့ဖျက်ဆီးခြင်းများ ဆက်တိုက်ကျူးလွန်နေသည်ဟု စစ်ဘေးရှောင်ကူညီသူများ က ပြောသည်။ စစ်ဘေးရှောင်ပြည်သူများ ထပ်တိုးလာနေပြီး အမိုးအကာ၊ စားနပ်ရိက္ခာနှင့် လူသားချင်းစာနာထောက်ထားမှု အကူအညီများ အလွန်လိုအပ်နေကြောင်း ၎င်းတို့က ထပ်လောင်းဖော်ပြသည်။