အောက်တို (၈) သတင်းတိုပေါင်းချုပ်

ဖျာပုံတွင် ကြံ့ဖွတ်ပါတီ ခိုးဝှက်မဲဆွယ်စည်းရုံးမှု စတင်

အောက်တို ၈
The Kaladan Post

ဧရာဝတီတိုင်း ဖျာပုံမြို့နယ်တွင် ကြံ့ဖွတ်ပါတီ လွှတ်တော်ကိုယ်စားလှယ်လောင်းများက မဲဆွယ်စည်းရုံးမှု တရားဝင်မစတင်မီ ခိုးဝှက်ပုံစံဖြင့် မဲဆွယ်ရေးလုပ်ဆောင်နေကြောင်း ဒေသခံများထံမှ သိရှိရသည်။ ပါတီဝင်တွေ့ဆုံပွဲ ဟုအမည်ပေးကာ ပြည်သူများကို အုပ်ချုပ်ရေးအရာရှိများမှ အတင်းအကျပ် ဆင့်ခေါ်ပြီး အမတ်လောင်းများကို မိတ်ဆက်ကာ မဲထည့်ရေးအားစည်းရုံးနေကြသည်ဟု ဆိုသည်။ ထို့အပြင် စစ်တပ်နှင့် ပါတီဝင်များ ပူးပေါင်းကာ အုပ်ချုပ်ရေးနှင့် လုံခြုံရေးလုပ်ငန်းများကို တာဝန်ယူဆောင်ရွက်နေကြသဖြင့် အခြားပါတီများထက် ကြံ့ဖွတ်ပါတီအားသာနေသည်ဟု သိရသည်။

ဖျာပုံဒေသတွင် ပါတီဝင်ဖြစ်ပါက စစ်မှုထမ်းဆွဲခံရမှု ကင်းလွတ်နိုင်သည်ဟု ထောက်ပြောကာ ကျေးရွာများတွင် တရားမဝင်နည်းလမ်းဖြင့် ပါတီဝင်စုဆောင်းမှုများ ဖြစ်ပေါ်နေသည်။ ထို့အပြင် ကြံ့ဖွတ်ပါတီမှ မဲထည့်ပါက လမ်းခင်း၊ မီးဖွဲ့၊ ကျောင်းနှင့် ဆေးခန်းတည်ဆောက် ပေးမည်ဟု မက်လုံးပေးကာ မဲဆွယ်ရေးများ ဆက်လက်လုပ်ဆောင်နေကြောင်း ဒေသခံများမှ အတည်ပြုထားသည်။

ဘုံတိုကျေးရွာတွင် စစ်တပ်လေကြောင်းတိုက်ခိုက်မှုဖြင့် လူ ၂၂ ဦးသေဆုံး

အောက်တို ၈
The Kaladan Post

စစ်ကိုင်းတိုင်း မုံရွာနှင့် ချောင်းဦးအစပ် ဘုံတိုကျေးရွာရှိ ဆီမီးထွန်းပွဲကို အောက်တိုဘာ ၆ ရက်ညတွင် စစ်တပ်လေထီးဖြင့် ဗုံး ၂ လုံးကြဲချတိုက်ခိုက်ခဲ့ရာ လူ ၂၂ ဦး သေဆုံးခဲ့ကြောင်း သိရှိရသည်။ သေဆုံးသူများအနက်တွင် PDF အဖွဲ့ဝင် ၆ ဦးနှင့် သပိတ်ဦးဆောင်သူ ၄ ဦး ပါဝင်သွားပြီး ထိုအပြင် CDM ကျောင်းဆရာတစ်ဦးနှင့် ၂ နှစ်အရွယ်ကလေး၊ ကျောင်းသားများပါဝင်ကြောင်း ဒေသခံများက ပြောဆိုသည်။

လေကြောင်းတိုက်ခိုက်မှုကြောင့် မုံရွာနယ်မှ ပြည်သူ ၁၁ ဦးနှင့် ချောင်းဦးနယ်မှ ၁၁ ဦး စုစုပေါင်း ၂၂ ဦး သေဆုံးခဲ့ကြောင်း ချောင်းဦးဆရာတော်ကအတည်ပြုထားသည်။ သေဆုံးသူများထဲတွင် မုံရွာအမြင့်လမ်းသပိတ်ဦးဆောင် ရဲဘော် ချမ်းငြိမ်းအောင်၊ ရဲဘော် ညီညီဇော် တို့အပါအဝင် သပိတ်အင်အားစုခေါင်းဆောင်များပါဝင်ကြပြီး ယမန်နေ့တွင် ကျဆုံးသူများအား သဂြိုလ်ပူဇော်သင်္ဂြိုဟ်ပြီးစီးခဲ့ကြောင်း သိရှိရသည်။

စစ်တပ်က မြေပြင်နှင့် လေကြောင်းတိုက်ခိုက်မှုများ နှစ်ဆမြှင့်ဖို့ ဆုံးဖြတ်

အောက်တို ၈
The Kaladan Post

အကြမ်းဖက်စစ်တပ်က ပွင့်လင်းရာသီရောက်ရှိလာသဖြင့် မြေပြင်စစ်ဆင်ရေးများနှင့် လေကြောင်းတိုက်ခိုက်မှုများကို နှစ်ဆအရှိန်မြှင့်ဖို့ Joint Operations Command (JOC) အထူးအစည်းအဝေးတွင် ဆုံးဖြတ်ထားကြောင်း နေပြည်တော် စစ်ဘက်သတင်းရင်းမြစ် များထံမှ သိရသည်။ ဗိုလ်ချုပ်ကြီး ကျော်စွာလင်း ဦးဆောင်သော JOC အစည်းအဝေးအတွင်း လေကြောင်းတိုက်ခိုက်မှုများကို ယခင်ထက် နှစ်ဆတိုးမြှင့်ပြီး ရွေးကောက်ပွဲမတိုင်မီ ပြန်သိမ်းမည့် နယ်မြေများကို အမြန်ဆုံး သိမ်းပိုက်ရန် စစ်ရေးစီမံချက်များ ဆောင်ရွက်နေ ကြောင်း ဆိုသည်။

CDM ဗိုလ်ကြီး ဇင်ယော်ကလည်း စစ်တပ်အနေဖြင့် ဗုံးကြဲတိုက်ခိုက်မှုများကို တန်ဖိုးနည်း လေထီးများနှင့် ဂျိုင်ရိုကော်ပတာများ အသုံးပြုကာ လေကြောင်းအရေးသာမှုကို ချဲ့ထွင်နေ ကြောင်း ပြောသည်။ ထို့အပြင် တော်လှန်ရေးတပ်များ ထိန်းချုပ်ထားသော နယ်မြေများကို လေကြောင်းတိုက်ခိုက်ခြင်းဖြင့် ပြည်သူများကို စစ်တပ်ထိန်းချုပ်နယ်မြေများသို့ ရွှေ့ပြောင်း လာစေရန်နှင့် ရွေးကောက်ပွဲအတွက် မဲပေးသူအင်အား တိုးလာစေရန် ရည်ရွယ်မှုပါရှိကြောင်း ထုတ်ဖော်ပြောဆိုခဲ့သည်။

မိုင်းလုံမြို့နယ် မန်ဟုန်းကျေးရွာတွင် လေကြောင်းဗုံးကြဲမှုဖြင့် လူ ၉ ဦးသေဆုံး

အောက်တို ၈
The Kaladan Post

ရှမ်းမြောက်ပိုင်း မိုင်းလုံမြို့နယ် မန်ဟုန်းကျေးရွာတွင် စစ်တပ်လေယာဉ်က ပေါင် ၂၅၀ ဗုံး ၂ လုံးကြဲချတိုက်ခိုက်ခဲ့ရာ ကလေးငယ် ၁ ဦးအပါအဝင် ပြည်သူ ၉ ဦး သေဆုံးခဲ့ကြောင်း TNLA ထုတ်ပြန်သည်။ သေဆုံးသူများအနက်တွင် အသက် ၃၇ နှစ်မှ ၂ နှစ်အရွယ်အထိ အသက်အရွယ်အမျိုးမျိုးရှိပြီး ဒဏ်ရာရသူ ၃ ဦးလည်း ပါဝင်ကြောင်း သိရသည်။

ထိုအကြောင်းအပြင် ယနေ့ နံနက်ပိုင်းတွင်လည်း စစ်တပ်က နမ္မတူမြို့နယ် ပုဗ္ဗာရုံဘုန်းကြီးကျောင်းကို ဂျက်ဖိုက်တာမှ ပေါင် ၅၀၀ ဗုံးကြဲချတိုက်ခိုက်ခဲ့ပြီး ဘုန်းကြီးကျောင်းအဆောက်အဦး ပျက်စီးသွားကြောင်း သိရှိရသည်။ လတ်တလောတွင် စစ်ကောင်စီသည် သီပေါ၊ နမ္မတူနှင့် လက်လွှတ်ဆုံးရှုံးနေသည့် ဒေသများ၌ လေကြောင်းတိုက်ခိုက်မှုများ ဆက်လက် မြှင့်တင်ဆောင်ရွက်နေသည်ဟု ဒေသခံများက ပြောဆိုသည်။

ဒီပဲယင်းမြို့ပေါ်ရှိ စစ်တပ်တပ်စွဲနေရာကို တော်လှန်ရေးအဖွဲ့ဖောက်ခွဲတိုက်ခိုက်

အောက်တို ၈
The Kaladan Post

စစ်ကိုင်းတိုင်း ဒီပဲယင်းမြို့ပေါ်ရှိ စစ်တပ်တပ်စွဲနေရာအား အဖြူရောင်ပြည်သူ့ကာကွယ်ရေး အဖွဲ့က အနီးကပ်ဝင်ရောက် ဖောက်ခွဲတိုက်ခိုက်ခဲ့ကြောင်း ပြန်ကြားရေးတာဝန်ခံက ထုတ်ပြန် သည်။ အောက်တိုဘာ ၆ ရက် ညပိုင်းတွင် တော်လှန်ရေးတပ်ဖွဲ့များက မိုင်းထောင်ပြီးနောက် ည ၁၀ နာရီမှ ၁၂ နာရီအတွင်း တိုက်ခိုက်ခဲ့ကြောင်း သိရသည်။

ထိုတိုက်ခိုက်မှုအတွင်း စစ်တပ်ဘက် ထိခိုက်မှုအခြေအနေ မသိရသေးသော်လည်း တော်လှန်ရေးဘက်မှ အထိအခိုက်မရှိကြောင်း အဖွဲ့မှ ပြောကြားခဲ့သည်။ ယင်းတိုက်ခိုက်မှုကို ကျဆုံးခဲ့သော ရဲဘော်များအား ဂုဏ်ပြုသည့် အထိမ်းအမှတ်အဖြစ် ပြုလုပ်ခဲ့ခြင်းဖြစ်ပြီး၊ ဒီပဲယင်းတိုက်နယ် ၁ တိုက်ခိုက်ရေးအဖွဲ့က စစ်တပ်တပ်စွဲနေရာများကို ဆက်လက်တိုက်ခိုက် သွားမည်ဟု ထုတ်ပြန်ခဲ့သည်။

ကလေးမြို့တွင် လူထုအလံမလိပ် အသံမတိတ်သပိတ် ပြုလုပ်

အောက်တို ၈
The Kaladan Post

စစ်ကိုင်းတိုင်း ကလေးမြို့တွင် ကလေးမြို့လူထုတိုက်ပွဲဦးဆောင်ကော်မတီနှင့် ဒေသခံပြည်သူ များအဖွဲ့က အလံမလိပ် အသံမတိတ် လူထုလှုပ်ရှားမှုသပိတ် ပြုလုပ်ခဲ့ကြောင်း သိရသည်။ သပိတ်တွင် စစ်အာဏာရှင်အား ဆန့်ကျင်ကြောင်းနှင့် ပြည်သူ့အဖွဲ့အစည်းတစ်ရပ်တည်း အဖြစ် ညှိနှိုင်းသည့် သဘောထားများ ထုတ်ဖော်ပြသခဲ့ကြသည်။

ပြည်သူများက ဒေါ်အောင်ဆန်းစုကြည်နှင့် နိုင်ငံရေးအကျဉ်းသားများအားလုံး လွတ်မြောက် ရေးအတွက် ဆီမီးထွန်းညှိတောင်းဆိုကြပြီး၊ တရားမဝင်အတုယောင်ရွေးကောက်ပွဲ ဆန့်ကျင်ရေးနှင့် အဓမ္မစစ်မှုထမ်းဥပဒေ ဖျက်သိမ်းရေး တောင်းဆိုသံများကိုလည်း အတူသံပြ ခဲ့ကြောင်း သိရှိရသည်။

ပုလဲမြို့နယ်တွင် စစ်အာဏာရှင်ဆန့်ကျင်ဖယောင်းတိုင်မီးသပိတ် ပြုလုပ်

အောက်တို ၈
The Kaladan Post

စစ်ကိုင်းတိုင်း ပုလဲမြို့နယ်အတွင်း ဒေသခံပြည်သူများက စစ်အာဏာရှင်ဆန့်ကျင်ရေး ဖယောင်းတိုင်မီးသပိတ် ပြုလုပ်ခဲ့ကြောင်း သိရသည်။ သပိတ်အခမ်းအနားတွင် ပြည်သူများက ဒီမိုကရေစီအတွက် တိုက်လှန်နေသူများအား ဂုဏ်ပြုကြပြီး စစ်အာဏာရှင်ပြန်လည် ကျရှုံးရေးအတွက် ဆုတောင်းမေတ္တာပို့ခဲ့ကြသည်။

ဖယောင်းတိုင်မီးသပိတ်တွင် ဒေါ်အောင်ဆန်းစုကြည်နှင့် နိုင်ငံရေးအကျဉ်းသားများအားလုံး လွတ်မြောက်ရေးအတွက် ဆုတောင်းကြပြီး၊ ကျဆုံးသွားသော အာဇာနည်များအားလည်း အောက်မေ့တမ်းတဂုဏ်ပြုကြောင်း သိရှိရသည်။ ဒေသခံများက ညဉ့်ခင်းတိုင်အောင် ဖယောင်းမီးထွန်း၍ လှုပ်ရှားခဲ့ကြောင်း ထပ်မံသိရသည်။

ဒိုက်ဦးထောင် အမျိုးသမီးဦးစီးအရာရှိဇင်မာကြည်အောင် နိုင်ငံရေးအကျဉ်းသူများကို ညှင်းပန်းနှိပ်စက်နေ

အောက်တို ၈
The Kaladan Post

ပဲခူးတိုင်း ဒိုက်ဦးအမျိုးသမီးအကျဉ်းထောင်တွင် ဦးစီးအရာရှိ ဇင်မာကြည်အောင်က နိုင်ငံရေးအကျဉ်းသူများကို အကြောင်းမဲ့တိုက်ပိတ်ခြင်း၊ ထောင်ဝင်စာပါဆယ်များ ဖျက်သိမ်းခြင်းနှင့် အခွင့်အရေးများ ပိတ်ပင်ခြင်းစသဖြင့် ညှင်းပန်းနှိပ်စက်နေကြောင်း Justice Network For Political Prisoners (JNPP) က သိရသည်။ ထောင်အတွင်းတွင် အမျိုးသမီးအကျဉ်းသူများကို ယောက်ျားတိုက်များတွင် တိုက်ပိတ်ထားခြင်း၊ သက်တောင့်သက်သာမရှိဘဲ နေထိုင်ခိုင်းနေခြင်းတို့ ဖြစ်ပေါ်နေသည်ဟု ထပ်မံသိရသည်။

ထိုအပြင် ထောင်အတွင်းရှိ စျေးဘားများတွင် အဆမတန်စျေးတင်ရောင်းချခြင်း၊ ပါဆယ်ထဲမှ အနွေးထည်များနှင့် တစ်ကိုယ်ရည်အသုံးအဆောင်များကို ပိတ်ပင်ခြင်းများလည်း ဆောင်ရွက်နေကြောင်း သိရသည်။ ထိုကြောင့် အကျဉ်းသူများအနေနဲ့ အအေးဒဏ်ခံရခြင်း၊ ကိုယ်ခံအားနည်းပြီး ဖျားနာမှုများ ဖြစ်ပေါ်နေကြောင်း ထောင်အတွင်းမှ သတင်းရင်းမြစ်များက ဖော်ပြသည်။ JNPP အဖွဲ့မှ ထောင်အုပ်အရာရှိ ဇင်မာကြည်အောင်နှင့် တာဝန်ရှိသူများကို တာဝန်ယူအရေးယူရန် တောင်းဆိုထားကြောင်း သိရှိရသည်။

အနောက်မြောက်တိုင်းစစ်ဌာနချုပ်သို့ ရော့ကတ်တိုက်ခိုက်ခံရ၊ စစ်ဘက်အရာရှိ ၅ ဦးအပါအဝင် ၁၂ ဦး သေဆုံး

အောက်တို ၈
The Kaladan Post

မုံရွာမြို့ရှိ အနောက်မြောက်တိုင်း စစ်ဌာနချုပ် (နမခ) အတွင်းသို့ တော်လှန်ရေးတပ်ဖွဲ့များက ရော့ကတ် ၁၀ လုံးဖြင့် ပစ်ခတ်တိုက်ခိုက်ခဲ့ရာ စစ်တပ်ဘက်မှ အရာရှိ ၅ ဦးအပါအဝင် စုစုပေါင်း ၁၂ ဦး သေဆုံးခဲ့ကြောင်း သိရသည်။ ထိုတိုက်ခိုက်မှုအတွင်း စစ်သားများနှင့် တပ်မိသားစုများ ထိခိုက်ဒဏ်ရာရရှိခြင်းအပြင် ရိက္ခာဂိုဒေါင် ၂ လုံးလည်း ပြိုကျပျက်စီးခဲ့ကြောင်း အကြောင်းရင်းမြစ်များကဖော်ပြသည်။

တိုက်ခိုက်မှုကို ချင်းတွင်းရော့ကတ်ညီနောင် (Chindwin Rocket Brother – CRB) မှ ဦးဆောင်ကာ မဟာမိတ်တော်လှန်ရေးအဖွဲ့အစည်းများနှင့် ပူးပေါင်းဆောင်ရွက်ခဲ့ကြောင်း သိရသည်။ ဤတိုက်ခိုက်မှုသည် နမခစစ်ဌာနချုပ်ကို ငါးနှစ်အတွင်း ၉ ကြိမ်မြောက်အဖြစ် ဖြစ်ပွားခြင်းဖြစ်ပြီး တော်လှန်ရေးတပ်ဖွဲ့များအနေနဲ့ အထိအခိုက်မရှိဘဲ ဆုတ်ခွာနိုင်ခဲ့ကြောင်း ထပ်မံသိရှိရသည်။

ရန်ကုန်နှင့် ကရင်တွင် စစ်မှုထမ်းတပ်သားများ အလင်းဝင်ရောက်၊ မြင်းခြံတွင် ပျူစောထီး ၂ ဦး ဖမ်းမိ

အောက်တို ၈
The Kaladan Post

အောက်တိုဘာလ ၆ ရက်နေ့တွင် ရန်ကုန်နှင့် ကရင်ပြည်နယ်တို့၌ စစ်မှုထမ်း တပ်သားသစ်များ လက်နက်များ ယူဆောင်လာပြီး တော်လှန်ရေးတပ်ဖွဲ့များထံ အလင်းဝင်ရောက်ခဲ့ကြောင်း သိရသည်။ ရန်ကုန်ဗျူဟာစစ်ကြောင်း ၁ ထံသို့ တပ်သားသစ် ၂ ဦးသည် MA သေနတ်နှင့် ကျည်များဖြင့် ဝင်ရောက်ခဲ့ပြီး၊ လေးကော့ကော်တွင်လည်း တပ်မ ၂၂ မှ တပ်သားသစ် ၃ ဦးက ကော်ဘရာစစ်ကြောင်းထံ အလင်းဝင်ခဲ့ကြောင်း အသေးစိတ်ထုတ်ပြန်ထားသည်။

တစ်ဖက်တွင် မန္တလေးတိုင်း မြင်းခြံမြို့နယ်တွင် သီတာယုမွန် ဦးဆောင်သောအဖွဲ့က ပျူစောထီး ၂ ဦးအား အရှင်ဖမ်းမိခဲ့ကြောင်း ပြည်သူ့ကြယ်တစ်ပွင့် တပ်ဖွဲ့မှ အကြောင်းပြောသည်။ ဖမ်းမိသူများမှာ အောင်ပိုင်ထက်နှင့် အောင်ဖြိုးဝေ ဖြစ်ပြီး လက်ရှိတွင် ဆက်လက်စစ်ဆေးနေကြောင်း သိရသည်။ ယင်းဆောင်ရွက်မှုတွင် တော်လှန်ရေးတပ်ဖွဲ့များ အထိအခိုက်မရှိဘဲ အောင်မြင်စွာ ဆုတ်ခွာနိုင်ခဲ့ကြောင်း သိရှိရသည်။