ဩဂုတ် (၂၂) သတင်းတိုပေါင်းချုပ်

ကြံ့ဖွတ်ပါတီ ရွေးကောက်ပွဲအနိုင်ရရန် သေချာဟု ဘူးလက်လှဆွေ ကြုံးဝါး

ဩဂုတ် ၂၂
The Kaladan Post
စစ်တပ်ကျင်းပမည့် ရွေးကောက်ပွဲတွင် ကြံ့ဖွတ်ပါတီက အနိုင်ရပြီး အစိုးရသစ်ဖွဲ့စည်း မည်ဖြစ်ကာ စစ်တပ်နှင့်ပူးပေါင်း၍ AA နှင့် MNDAA ကို အပြတ်အသတ်နှိမ်နင်းမည်ဟု ကြံ့ဖွတ်ပါတီ၏ နေပြည်တော်ပြည်ထောင်စုနယ်မြေ ဥက္ကဋ္ဌ ဘူးလက်လှဆွေက ဩဂုတ်လ ၂၀ ရက်တွင် လူမှုကွန်ရက်ဗီဒီယိုမှတစ်ဆင့် ထုတ်ဖော်ပြောဆိုခဲ့သည်။ သူက NLD မပါဝင်သဖြင့် ကြံ့ဖွတ်ပါတီ၏ အနိုင်ရမှု သေချာနေပြီး၊ အစိုးရသစ်ဖွဲ့ပြီးပါက စစ်တပ်နှင့်ပူးပေါင်း၍ သူပုန်အုပ်စုများကို နှိမ်နင်းမည်ဟု ဆိုသည်။ ထို့ပြင် UWSA ၏ အတွေ့အကြုံကို ရည်ညွှန်းကာ အမုန်းကြိတ်မည်ဟု သတိပေးခဲ့သည်။ ငြိမ်းချမ်းရေးမယူပါက AA နှင့် MNDAA ကို ပြင်းထန်စွာ တိုက်ခိုက်မည်ဟု ၎င်းက ကြုံးဝါးသည်။

ကြံ့ဖွတ်ပါတီ ဥက္ကဋ္ဌ ခင်ရီ ဦးဆောင်သော စည်းရုံးရေးခရီးစဉ်များကို နိုင်ငံတဝန်း လှည့်လည် လုပ်ဆောင်နေပြီး ကျေးရွာနှင့် ရပ်ကွက်အုပ်ချုပ်ရေးမှူးများအဖြစ် ပါတီဝင်များကို စစ်တပ်နှင့် ပူးပေါင်း၍ ခန့်အပ်လျက်ရှိသည်။ ထို့ပြင် စစ်တပ်ထောက်ခံသည့် အနုပညာရှင်များနှင့် တွေ့ဆုံ ကာ ရွေးကောက်ပွဲအောင်မြင်ရေးနှင့် ပြည်သူများ ဆန္ဒမဲပေးရေးအတွက် စည်းရုံးခိုင်းနေ ကြောင်း ပါတီသတင်းရင်းမြစ်ထံမှ သိရသည်။

မြိတ်တွင် KNDO ၏ တိုက်ခိုက်မှုကြောင့် စစ်ကား ပျက်စီးပြီး စစ်သားတစ်ဦး အလင်းဝင်

ဩဂုတ် ၂၂
The Kaladan Post
တနင်္သာရီတိုင်း၊ မြိတ်-ထားဝယ်ခရိုင်ဒေသသို့ ထိုးစစ်ဆင်လာသော စစ်တပ်စစ်ကြောင်းကို ကရင်အမျိုးသားကာကွယ်ရေးတပ် (KNDO) က တိုက်ခိုက်ခဲ့ရာ စစ်ကား ၁ စီး ပျက်စီးပြီး စစ်တပ်ဘက်မှ ဒဏ်ရာရသူများ ပြားခဲ့ကြောင်း KNDO ဌာနချုပ်က ထုတ်ပြန်သည်။ မြိတ်မြို့နယ်၊ လသာကျေးရွာအနီးတွင် KNDO တပ်ရင်း ၇၊ တပ်ခွဲ ၃ က စစ်ကြောင်းကို ကြားဖြတ်တိုက်ခိုက်ခဲ့သည်။ ဤတိုက်ခိုက်မှုကြောင့် စစ်တပ်ထိခိုက်မှု သိသာခဲ့သည်။ ထို့ပြင် စစ်သား ညီညီဇော် (အသက် ၂၀) သည် လက်နက်ခဲယမ်းများနှင့်အတူ KNDO ထံ အလင်းဝင်လာခဲ့သည်။ ၎င်းကို လူသားချင်းစာနာထောက်ထားမှုဆိုင်ရာ စည်းမျဉ်းများနှင့် အညီ စစ်ဆေးပြီး သက်ဆိုင်ရာဌာနသို့ ပို့ဆောင်မည်ဖြစ်သည်။

မြိတ်-ထားဝယ်ဒေသတွင် စစ်တပ်နှင့် တော်လှန်ရေးတပ်များအကြား တိုက်ပွဲများ မကြာခဏဖြစ်ပွားပြီး စစ်ရေးတင်းမာလျက်ရှိသည်။ ဩဂုတ်လ ၁၈-၁၉ ရက်တွင် ထားဝယ်မှ မေတ္တာမြို့သို့ စစ်ကြောင်းထိုးလာသော စစ်တပ်ကို တော်လှန်ရေးတပ်များက တိုက်ခိုက်ခဲ့ရာ စစ်သား ၂၀ ဦးကျော် သေဆုံးပြီး စစ်ကား ၈ စီး ပျက်စီးခဲ့သည်။ ဒေသတွင်းတိုက်ပွဲများသည် ဆက်လက်ပြင်းထန်နေပြီး စစ်တပ်၏ ထိုးစစ်များကို တော်လှန်ရေးတပ်များက ထိထိရောက်ရောက် ခုခံလျက်ရှိကြောင်း သတင်းရင်းမြစ်များက ဖော်ပြသည်။

 

 

KNA က စစ်တပ်ရွေးကောက်ပွဲကို နည်းလမ်းပေါင်းစုံဖြင့် ဆန့်ကျင်ရန် တိုက်တွန်း

ဩဂုတ် ၂၂
The Kaladan Post
အကြမ်းဖက်စစ်တပ်၏ ရွေးကောက်ပွဲကို နိုင်ငံရေး၊ စစ်ရေး၊ လူထုလှုပ်ရှားမှုများဖြင့် ဆန့်ကျင်တိုက်ပွဲဝင်ရန် ကယန်းအမျိုးသားတပ်မတော် (KNA) က ဩဂုတ်လ ၂၀ ရက်တွင် သဘောထားကြေညာချက်ထုတ်ပြန်ကာ တိုက်တွန်းခဲ့သည်။ KNA ၏အဆိုအရ စစ်တပ်၏ ရွေးကောက်ပွဲသည် စစ်အာဏာရှင်စနစ်သက်ဆိုးရှည်ရေးအတွက်သာ ရည်ရွယ်သည်ဟု ဖော်ပြသည်။ ၎င်းတို့က ပြည်သူလူထုနှင့် တော်လှန်ရေးအင်အားစုများအား နည်းလမ်းပေါင်းစုံဖြင့် ဆန့်ကျင်ရန် တောင်းဆိုခဲ့သည်။ ဒီမိုကရေစီစံနှုန်းများအရ ပြည်သူရွေးချယ်ထားသော ကိုယ်စားလှယ်များဖြင့်သာ ရွေးကောက်ပွဲကျင်းပပိုင်ခွင့်ရှိသည်ဟု KNA က ဆိုသည်။ စစ်ကောင်စီ၏ ရွေးကောက်ပွဲကို ပြတ်ပြတ်သားသား ဆန့်ကျင်ကြောင်း ၎င်းတို့က ကြေညာသည်။

KNA သည် ၂၀၂၄ ခုနှစ်၊ အောက်တိုဘာလ ၂၉ ရက်တွင် ကယန်းဒေသများရှိ လက်နက်ကိုင်တပ်များကို စုစည်းပြီး တပ်ရင်း ၈ ရင်းဖြင့် ဖွဲ့စည်းခဲ့သည်။ ၎င်းတို့သည် လွိုင်ကော်၊ ဒီးမော့ဆို၊ မိုးဗြဲ၊ ဖယ်ခုံစသည့် ဒေသများတွင် အကြမ်းဖက်စစ်တပ်ကို တိုက်ခိုက်ရန် ပြင်ဆင်ထားသည်။ KNA ၏ ရည်မှန်းချက်မှာ အခြေခံမူ ၉ ချက်နှင့် အမျိုးသားရည်မှန်းချက် ၅ ချက်အပေါ် အခြေခံထားပြီး၊ ပြည်သူလူထုအခြေပြု တော်လှန်ရေးကို ဦးဆောင်ရန် ဖြစ်သည်။ စစ်တပ်၏ အကြမ်းဖက်မှုကို တွန်းလှန်ရင်း ပြည်သူလူထု၏ သဘောဆန္ဒကို အကာကွယ်ပေးရန် KNA ၏ ကြိုးပမ်းမှုဖြစ်သည်။

 

 

မင်းအောင်လှိုင်၏ ရွေးကောက်ပွဲအတွက် ပြည်သူများကို မဲပေးရန် ဖိအားပေး

ဩဂုတ် ၂၂
The Kaladan Post
အကြမ်းဖက်စစ်ခေါင်းဆောင် မင်းအောင်လှိုင်က ဒီဇင်ဘာလ ၂၈ ရက်တွင် ကျင်းပမည့် ရွေးကောက်ပွဲအတွက် ပြည်သူများ မဖြစ်မနေ မဲထွက်ပေးရန် ဌာနဆိုင်ရာများသို့ နည်းလမ်း မျိုးစုံဖြင့် ဆောင်ရွက်ရန် အမိန့်ထုတ်ပြန်ခဲ့သည်။ မြို့နယ် ၁၀၂ ခုတွင် ပထမအပိုင်းအဖြစ် ရွေးကောက်ပွဲကျင်းပမည်ဖြစ်ပြီး၊ စစ်အရာရှိများက လုံခြုံရေးမှ မဲရေတွက်ခြင်းအထိ ဦးဆောင်မည်ဖြစ်သည်။ ဌာနဆိုင်ရာများနှင့် ရွေးကောက်ပွဲကော်မရှင်အဖွဲ့ခွဲများက ပူးပေါင်းဆောင်ရွက်ရန် ညွှန်ကြားထားသည်။ ရပ်ကွက်အုပ်ချုပ်ရေးအဖွဲ့များက အသက် ၁၈ နှစ်ပြည့်သူများအား ဆန္ဒမဲအစမ်းလေ့ကျင့်ပွဲများသို့ မဖြစ်မနေ တက်ရောက်ရန် ဆင့်ခေါ်နေသည်။ အသက် ၅၀ နှစ်ပြည့်သူများအတွက် ကြိုတင်မဲပေးခွင့်လည်း ပြုလုပ်ပေး ထားသည်။

ဘားအံမြို့နယ်တွင် ယနေ့ ဆန္ဒမဲအစမ်းလေ့ကျင့်ပွဲများ ကျင်းပမည်ဖြစ်ပြီး၊ ကြံ့ဖွတ်ပါတီဝင် ရာအိမ်မှူးများက ပြည်သူများအား ဖိအားပေးဆင့်ခေါ်နေသည်။ ရန်ကုန်တိုင်း၊ မရမ်းကုန်းမြို့နယ်တွင်လည်း မှတ်ပုံတင်နှင့် ကိုယ်ရေးအချက်အလက်များ ကောက်ယူ၍ မဲပေးရန် ခေါ်ယူနေသည်။ မဲပေးစက်ဖြင့် အစမ်းလေ့ကျင့်မှုများ ပြုလုပ်နေပြီး၊ မလာသူများကို ဖိအားပေးနေကြောင်း ဒေသခံများက ပြောဆိုသည်။ ဤရွေးကောက်ပွဲသည် စစ်တပ်၏ အာဏာသက်ဆိုးရှည်ရေးအတွက် ရည်ရွယ်သည်ဟု ဆန့်ကျင်သူများက ထောက်ပြသည်။

 

 

ပုလဲမြို့နယ်တွင် စစ်တပ်က ကျေးရွာများကို မီးရှို့ဖျက်ဆီးနေ

ဩဂုတ် ၂၂
The Kaladan Post
စစ်ကိုင်းတိုင်း၊ ပုလဲမြို့နယ်အတွင်း စစ်ကြောင်းထိုးနေသည့် အကြမ်းဖက်စစ်တပ်က ကျေးရွာများကို ဆက်လက်မီးရှို့ဖျက်ဆီးနေကြောင်း Beyond The Chindwin Organization (BCO) အဖွဲ့မှ တာဝန်ရှိသူတစ်ဦးက ပြောဆိုသည်။ ဩဂုတ်လ ၁၆ ရက်မှစတင်ကာ စစ်သားများနှင့် ဇီးဖြူကုန်းရွာမှ ပျူစောထီးများ ပူးပေါင်းထားသော အင်အား ၂၀၀ ခန့်ပါ စစ်ကြောင်းသည် ပုလဲမြို့နယ်သို့ ဝင်ရောက်လာခဲ့သည်။ ၎င်းတို့သည် ညောင်ပင်ဇောက်နှင့် ကွမ်းကိုင်းရွာများမှတစ်ဆင့် ငှက်ပျောတောတောင်ရွာတွင် တပ်ဆွဲကာ နေအိမ် ၅ လုံးကို မီးရှို့ဖျက်ဆီးခဲ့သည်။ ဩဂုတ်လ ၂၀ ရက်တွင် မင်းတိုင်ပင်ရွာကို ထပ်မံစီးနင်းခဲ့သည်။

ယနေ့ ဩဂုတ်လ ၂၁ ရက်ထိ စစ်ကြောင်းသည် မင်းတိုင်ပင်ရွာအတွင်း နေအိမ်များကို ဆက္လက္မီးရှို့ဖျက်ဆီးနေပြီး၊ ပျက်စီးမှု အရေအတွက်ကို အတည်မပြုနိုင်သေးကြောင်း BCO က ဆိုသည်။ ပြည်သူများသည် တကွဲတပြားထွက်ပြေးတိမ်းရှောင်နေရသည်။ စစ်တပ်က ပြည်သူပိုင်ပစ္စည်းများကို ခိုးယူပြီး မလိုအပ်သည့်ပစ္စည်းများကို ဖျက်ဆီးခဲ့သည်။ ဒေသခံများအပေါ် အကြမ်းဖက်မှုများ ဆက်လက်ဖြစ်ပွားနေပြီး စစ်ကြောင်းသည် ကျေးရွာများကို ဆက်လက်ပစ်မှတ်ထားနေသည်။

 

 

ကန့်ဘလူတွင် စစ်တပ်က ရွာသားတစ်ဦးကို ဖမ်းဆီးပစ်သတ်

ဩဂုတ် ၂၂
The Kaladan Post
စစ်ကိုင်းတိုင်း၊ ကန့်ဘလူမြို့နယ်၊ ကြခတ်အိုက်ရွာတွင် စစ်ကြောင်းထိုးနေသည့် အကြမ်းဖက်စစ်တပ်က အသက် ၅၀ နှစ်အရွယ် ဦးမောင်မောင်ကို ဖမ်းဆီးပစ်သတ်ခဲ့ကြောင်း ကျွန်းလှတက်ကြွလှုပ်ရှားသူများအဖွဲ့မှ တာဝန်ရှိသူတစ်ဦးက ပြောဆိုသည်။ ဩဂုတ်လ ၂၀ ရက် နံနက် ၆ နာရီကျော်တွင် ကိုးတောင်ဘို့စခန်းမှ အင်အား ၇၀ ခန့်ပါ စစ်ကြောင်းသည် ရွာအတွင်း ဝင်ရောက်စီးနင်းခဲ့သည်။ ဦးမောင်မောင်သည် မနက်စောစော တောထဲသွားစဉ် စစ်ကြောင်းနှင့်တိုးပြီး ကတ္တရာလမ်းဘေးတွင် သေနတ်ဖြင့် နဖူးတည့်တည့် ၂ ချက် ပစ်သတ်ခံရသည်။ စစ်ကြောင်းသည် ပြည်သူပိုင်ပစ္စည်းများကို ခိုးယူဖျက်ဆီးခဲ့သည်။

စစ်ကြောင်းဝင်ရောက်စဉ် ရွာသားများစွာ ပိတ်မိခဲ့ပြီး ဖမ်းဆီးခံရသူများလည်း ရှိခဲ့သည်။ ၎င်းတို့သည် ရွာတွင် တစ်ညတပ်စွဲပြီး ဩဂုတ်လ ၂၁ ရက် နံနက် ၂ နာရီခန့်တွင် ဖမ်းဆီးထားသူများကို ပြန်လွှတ်ပေးကာ ကိုးတောင်ဘို့စခန်းသို့ ပြန်သွားခဲ့သည်။ ဒေသခံများသည် အကြမ်းဖက်မှုကြောင့် ထွက်ပြေးတိမ်းရှောင်နေရပြီး၊ စစ်တပ်၏ ရက်စက်မှုများက ဆက်လက်ဖြစ်ပွားနေသည်။ ဤလုပ်ရပ်များသည် ပြည်သူများအပေါ် စစ်တပ်၏ အကြမ်းဖက်မှုကို ထင်ရှားစေသည်ဟု ဒေသခံများက ဆိုသည်။

 

တယ်လီနော ဒေတာပေးအပ်မှုကြောင့် သုံးစွဲသူများ ဖမ်းဆီးခံရ

ဩဂုတ် ၂၂
The Kaladan Post
တယ်လီနော (Telenor) ကုမ္ပဏီသည် ၂၀၂၁ စစ်အာဏာသိမ်းပြီးနောက် မြန်မာပြည်သူများ၏ အကဲဆတ်သော ပုဂ္ဂိုလ်ရေးအချက်အလက်များကို စစ်အုပ်စုထံ လွှဲပြောင်းပေးခဲ့သည်။ ၎င်းတို့သည် စစ်ကောင်စီ၏ ညွှန်ကြားချက်အရ ဝဘ်ဆိုဒ်များပိတ်ပင်ခြင်း၊ ဖုန်းလိုင်းများ ပိတ်ခြင်းများ ပြုလုပ်ခဲ့သည်။ ဤလုပ်ရပ်များကြောင့် နိုဘယ်ဆုရှင် ဒေါ်အောင်ဆန်းစုကြည် အပါအဝင် သုံးစွဲသူ ၅၀၀ ခန့် ဖမ်းဆီးခံရနိုင်သည်ဟု တယ်လီနော၏ စိစစ်ချက်များတွင် ဖော်ပြထားသည်။ မိုဘိုင်းသုံးစွဲသူ ၁,၃၀၀ ၏ အင်တာနက်ဒေတာများကို စစ်အုပ်စုထံ ပေးအပ်ခဲ့ပြီး ၎င်းဒေတာများဖြင့် ထောင်ဒဏ် ၃ မှ ၇ နှစ်အထိ ချမှတ်နိုင်သည်ဟု စစ်ကောင်စီက ဆိုသည်။ ဒေါ်အောင်ဆန်းစုကြည်၏ သား ကင်မ်အဲရစ်က ဤလုပ်ရပ်ကို နော်ဝေမီဒီယာ NRK တွင် ပြင်းထန်စွာ ရှုတ်ချခဲ့သည်။

တယ်လီနောက ဝန်ထမ်းများ၏ လုံခြုံရေးကို အကြောင်းပြကာ စစ်တပ်၏ တောင်းဆို ချက်များကို ငြင်းဆန်ရန် မဖြစ်နိုင်ဟု CEO Jon Omund Revhaug က ဆိုသည်။ ၎င်းတို့သည် နာမည်ကျော်များ၊ အနုပညာရှင်များ၏ ဖုန်းနံပါတ်များနှင့် ဒေတာများကို စစ်အုပ်စုထံ ပေးအပ်ခဲ့သည်။ ဤဒေတာပေါက်ကြားမှုကြောင့် ဒီမိုကရေစီလှုပ်ရှားသူများ ဖမ်းဆီးခံရပြီး ဒေါ်အောင်ဆန်းစုကြည်ကို ထောင်ဒဏ် ၃၃ နှစ်ချမှတ်ခံရသည်။ တယ်လီနော၏ လုပ်ရပ်များ သည် စစ်အုပ်စု၏ ဖိနှိပ်မှုကို အထောက်အကူဖြစ်စေခဲ့ပြီး ၂၀၂၂ တွင် ၎င်းတို့သည် ကုမ္ပဏီကို M-1 Group သို့ ရောင်းချကာ မြန်မာနိုင်ငံမှ ထွက်ခွာသွားခဲ့သည်။

 

 

မြင်းခြံတွင် စစ်ကြောင်းကို PDF တိုက်ခိုက်၊ စစ်သား ၁၀ ဦးကျော်သေဆုံး

ဩဂုတ် ၂၂
The Kaladan Post
မန္တလေးတိုင်း၊ မြင်းခြံမြို့နယ်၊ ဆုံရွာမှ ထွက်လာသော စစ်ကောင်စီစစ်ကြောင်းကို ပြည်သူ့ကာကွယ်ရေးတပ်ဖွဲ့ (PDF) များက တိုက်ခိုက်ခဲ့ရာ စစ်သား ၁၀ ဦးကျော် သေဆုံးခဲ့သည်။ ဩဂုတ်လ ၂၁ ရက် မွန်းလွဲ ၁၂:၁၅ နာရီတွင် ဆုံရွာပျူစခန်းမှ ငါန်းမြာရဲစခန်းသို့ ထော်လာဂျီနှင့် ဆိုင်ကယ်များဖြင့် ထွက်လာသော စစ်ကြောင်းကို PDF က ပြောက်ကျားတိုက်ခိုက်ခဲ့သည်။ ဤတိုက်ခိုက်မှုတွင် G3 သေနတ် ၃ လက်၊ MA-11 သေနတ် ၁ လက်၊ ကျည်ဘောက် ၃ ဘောက်နှင့် G3 ကျည် ၁၆ တောင့်ကို သိမ်းဆည်းရရှိခဲ့သည်။ မြင်းခြံခရိုင် အမှတ် ၄ နှင့် အမှတ် ၁၀ တပ်ရင်းများက ဦးဆောင်တိုက်ခိုက်ခဲ့သည်။

တိုက်ပွဲအတွင်း စစ်ကူစစ်ကြောင်းများ ရောက်ရှိလာမှုကြောင့် PDF တပ်ဖွဲ့များသည် ကျန်အလောင်းများကို ကောက်ယူချိန်မရဘဲ ဆုတ်ခွာခဲ့ရသည်။ ဤတိုက်ခိုက်မှုကို မြင်းခြံခရိုင်တပ်ရင်းများနှင့် မန္တလေးခရိုင်တပ်ရင်း ၅၊ ကျားမင်း (LPDF)၊ ငန်းနက် (LPDF)၊ မြောက်ပိုင်းသား (LPDF) နှင့် အမရပူရ (ပကဖ) တို့က ပူးပေါင်းဆောင်ရွက်ခဲ့သည်။ PDF တပ်ဖွဲ့ဝင်များ အထိအခိုက်မရှိ ဆုတ်ခွာနိုင်ခဲ့သည်။ စစ်ကောင်စီ၏ ထိုးစစ်ကို ရင်ဆိုင်ရန် ပြည်သူများအား လက်နက်ပံ့ပိုးပေးရန်နှင့် စိတ်ဓာတ်ခိုင်မာစွာ ပူးပေါင်းတိုက်ပွဲဝင်ရန် PDF က တိုက်တွန်းသည်။

 

 

စစ်တပ်လေကြောင်းတိုက်ခိုက်မှုကြောင့် ပြည်သူ ၄ ဦးသေဆုံး၊ နေအိမ်များပျက်စီး

ဩဂုတ် ၂၂
The Kaladan Post
စစ်ကိုင်းတိုင်း၊ ကောလင်းမြို့နယ် အရှေ့ခြမ်းရှိ ကျေးရွာများကို အကြမ်းဖက်စစ်တပ်က Y-12 လေယာဉ်ဖြင့် ဗုံး ၃၀ ကျော် ကြဲချတိုက်ခိုက်ခဲ့ရာ ပြည်သူ ၄ ဦး သေဆုံးပြီး ၈ ဦး ဒဏ်ရာရရှိခဲ့သည်။ ဩဂုတ်လ ၂၀ ရက် နံနက် ၆:၁၅ နာရီခန့်တွင် ဤတိုက်ခိုက်မှု ဖြစ်ပွားခဲ့ပြီး၊ အဆောက်အဦးများလည်း ထိခိုက်ပျက်စီးခဲ့သည်။ မန္တလေးတိုင်း၊ တောင်သာမြို့နယ် အရှေ့ခြမ်းရှိ ကျေးရွာများကိုလည်း စစ်တပ်က စက်တပ်လေထီးဖြင့် ဗုံး ၆ လုံး ကြဲချတိုက်ခိုက်ခဲ့သည်။ ယင်းတိုက်ခိုက်မှုသည် နံနက် ၂:၂၅ နာရီခန့်မှ စတင်ခဲ့ပြီး ပြည်သူထိခိုက်မှု မရှိခဲ့ကြောင်း ဒေသတွင်း သတင်းရင်းမြစ်များက ဆိုသည်။

ရှမ်းပြည်နယ်၊ ကျောက်မဲမြို့နယ်တွင်လည်း စစ်တပ်က ပေါင် ၂၅၀ ဗုံး ၂ လုံးနှင့် လက်နက်ကြီး ၁၁ လုံး ပစ်ခတ်တိုက်ခိုက်ခဲ့သည်။ ဩဂုတ်လ ၁၉ ရက်တွင် ပင်တိန်ရွာသို့ ဗုံး ၂ လုံးနှင့် ပင်တိန်နှင့် နောင်ပိန်ရွာအကြား လက်နက်ကြီး ၇ လုံး၊ ကျောင်းကုန်းရွာသို့ ၄ လုံး ပစ်ခတ်ခဲ့သည်။ ဤတိုက်ခိုက်မှုကြောင့် ပင်တိန်ရွာရှိ နေအိမ် ၄ လုံးနှင့် ပင်တိန်နှင့် နောင်ပိန်အကြားရှိ နေအိမ် ၂ လုံး ပျက်စီးခဲ့သည်။ TNLA ၏ ထုတ်ပြန်ချက်အရ ဤတိုက်ခိုက်မှုများသည် တိုက်ပွဲမရှိဘဲ ပြည်သူများကို ပစ်မှတ်ထားခဲ့ခြင်းဖြစ်သည်။

ကျောက်ဖြူတွင် AA နှင့် စစ်တပ်တိုက်ပွဲပြင်းထန်၊ စစ်ကောင်စီတပ် အထိနာ

ဩဂုတ် ၂၂
The Kaladan Post
ရခိုင်ပြည်နယ်၊ ကျောက်ဖြူမြို့နယ်တွင် အာရက္ခတပ်တော် (AA) နှင့် စစ်ကောင်စီတပ်တို့ကြား စစ်မျက်နှာ ၆ ခုတွင် တိုက်ပွဲများ ပြင်းထန်နေကြောင်း ဒေသသတင်းရင်းမြစ်များထံမှ သိရသည်။ ဩဂုတ်လ ဒုတိယအပတ်မှ စတင်ခဲ့သည့် တိုက်ပွဲများသည် အမှတ် ၃၂ ရဲတပ်ရင်းနှင့် ဓညဝတီရေတပ်ဌာနချုပ်အနီးတဝိုက်တွင် ဖြစ်ပွားနေသည်။ သပြုတောင်၊ လိပ်ခမော်၊ နှမ်းဖဲတောင်၊ မင်းတပ်တောင်၊ ပြင်ရှည်နှင့် စည်မော်နေရာများတွင် တိုက်ပွဲများ ပြင်းထန်နေသည်။ စစ်ကောင်စီသည် ကြည်း၊ ရေ၊ လေတပ်များဖြင့် ထိုးစစ်ဆင်နေသော်လည်း AA ၏ ပြန်လည်တိုက်ခိုက်မှုကြောင့် အထိအခိုက်များရှိနေသည်။ စစ်ကောင်စီသည် ဒရုန်းဖြင့် ဗုံးကြဲတိုက်ခိုက်မှုနှင့် စနိုက်ပါပစ်ခတ်မှုများကို အဓိကအသုံးပြုနေသည်။

လွန်ခဲ့သည့် ၁၀ ရက်ခန့်က စစ်ကောင်စီသည် AA ခြေကုပ်ယူထားသည့် စခန်း ၄ ခုကို အင်အားအလုံးအရင်းဖြင့် ထိုးစစ်ဆင်တိုက်ခိုက်ခဲ့ရာ AA က ယင်းစခန်းများကို လက်လွှတ်ခဲ့ရသည်။ AA သတင်းရင်းမြစ်တစ်ခုက စစ်ကောင်စီစစ်ကြောင်းတစ်ခုကို အထိနာသည်အထိ တိုက်ခိုက်နိုင်ခဲ့ပြီး စစ်တပ်ဘက်မှ သေဆုံးထိခိုက်မှုများဖြင့် ဆုတ်ခွာသွားသည်ဟု ဆိုသည်။ စစ်ကောင်စီထောက်ခံသည့် တယ်လီဂရမ်ချန်နယ်များက AA ၏ စခန်းများကို သိမ်းယူခဲ့ကြောင်း ဖော်ပြထားသော်လည်း AA က တရားဝင်ထုတ်ပြန်ချက်မထုတ်ပြန်သေးပေ။ ကျောက်ဖြူအပါအဝင် မကွေး၊ ပဲခူး၊ ဧရာဝတီတိုင်းများတွင်လည်း တိုက်ပွဲများ ဆက်လက်ဖြစ်ပွားနေကြောင်း AA ၏ ဩဂုတ်လ ၁၅ ရက်ထုတ်ပြန်ချက်တွင် ဖော်ပြထားသည်။