ဒါရိုက်တာ မိုက်တီး၊ အုန်းဒိုင်းနှင့် ကျော်ဝင်းထွဋ်တို့ကို ထောင်ဒဏ် ၇ နှစ်စီ ချမှတ်

 

နိုဝင် ၃၀

The Kaladan Post

ဒါရိုက်တာ မိုက်တီး (ခေါ်) သန်းထွန်းဇော်၊ ဟာသသရုပ်ဆောင် အုန်းဒိုင်း (ခေါ်) ဇော်မြင့်နှင့် ဇာတ်ပို့သရုပ်ဆောင် ကျော်ဝင်းထွဋ် (ခေါ်) ကျော်မင်းထွဋ်တို့ကို ရွေးကောက်ပွဲ နှောင့်ယှက် ဟန့်တားဖျက်ဆီးမှုဆိုင်ရာ ဥပဒေပုဒ်မ ၂၃(က) ဖြင့် ထောင်ဒဏ် ၇ နှစ်စီ အသီးသီး ချမှတ်ခံရသည်။ ယင်းသုံးဦးကို အောက်တိုဘာ ၂၇ ရက်တွင် ဖမ်းဆီးခဲ့ခြင်းဖြစ်ပြီး စစ်တပ် ထောက်ခံဇာတ်ကားကို ဝေဖန်မှုနှင့် ဆက်စပ်နေသည်ဟု သိရသည်။

နိုဝင်ဘာ ၂၅ ရက်တွင် အုန်းဒိုင်းအား တောင်ဒဂုံမြို့နယ်တရားရုံး၊ ၂၇ ရက်တွင် မိုက်တီးအား ရန်ကင်းမြို့နယ်တရားရုံး၊ ၂၈ ရက်တွင် ကျော်ဝင်းထွဋ်အား ဗဟန်းမြို့နယ်တရားရုံးတို့က ရုံးထုတ် တစ်ကြိမ်တည်းဖြင့် ပြစ်ဒဏ်ချမှတ်ခဲ့ခြင်းဖြစ်သည်။ တရားခံများဘက်မှ ခုခံချေပခွင့် သို့မဟုတ် ရှေ့နေငှားရမ်းခွင့် မရရှိခဲ့ကြောင်း အနုပညာနယ်ပယ်အသိုင်းအဝိုင်းထံမှ သိရသည်။

မြ၀တီတိုက်ပွဲ လက်နက်ကြီးကျည် ထိုင်းဘက်ကျ၍ မြန်မာကလေး၁ဦးအပါအဝင် ၂ဦး ဒဏ်ရာရ

 

နိုဝင် ၃၀

The Kaladan Post

ကရင်ပြည်နယ် မြ၀တီမြို့နယ်အတွင်း ဖြစ်ပွားနေသော တိုက်ပွဲများအတွင်း မြန်မာဘက်မှ ပစ်ခတ်လိုက်သည့် ၆၀ မမ လက်နက်ကြီးကျည် ၅ လုံး ယနေ့ နံနက် ၉ နာရီ ၁၂ မိနစ်ခန့်က ထိုင်းနိုင်ငံ တာ့ခ်ခရိုင် မဲဆောက်မြို့နယ်ဘက်သို့ ကျရောက်ခဲ့သည်။ အဆိုပါ ကျည်များကြောင့် နယ်စပ်တွင် နေထိုင်နေသည့် မြန်မာကလေးငယ် ၁ ဦးနှင့် ရွှေ့ပြောင်းလုပ်သား ၁ ဦး ထိခိုက်ဒဏ်ရာရရှိခဲ့ကြောင်း နယ်စပ်သတင်းရင်းမြစ်များက ပြောသည်။

မြ၀တီမြို့နယ် မင်းလက်ပံကျေးရွာအနီးတွင် စစ်တပ်နှင့် KNLA တပ်များအကြား တိုက်ပွဲ ပြင်းထန်နေဆဲဖြစ်ပြီး စစ်တပ်ဘက်က ထိုးစစ်ဆင်တိုက်ခိုက်နေခြင်းကြောင့် လက်နက်ကြီး ကျည်များ နယ်စပ်အထက်သို့ ကျရောက်ခဲ့ခြင်းဖြစ်သည်။ ယင်းနေရာများရှိ ကျားဖြန့်အလုပ်ရုံများ ကို KNU ဘက်က သိမ်းပိုက်ထားသဖြင့် စစ်တပ်က ပြန်လည်သိမ်းပိုက်ရန် အရှိန်မြှင့်ထိုးစစ်ဆင် နေခြင်းဖြစ်ကြောင်း သိရသည်။

သရုပ်ဆောင် ခန့်စည်သူ ကြူကြူလှ၏ အချစ်တော်သား ဖြစ်လာ

 

နိုဝင် ၃၀

The Kaladan Post

စစ်ခေါင်းဆောင် ဇနီး ဒေါ်ကြူကြူလှနှင့် သရုပ်ဆောင် ခန့်စည်သူတို့ အမေ-သား ဟန်ဖြင့် ရင်းနှီးစွာ ဆက်ဆံနေကြောင်း နေပြည်တော်သတင်းရင်းမြစ်များက ပြောသည်။ ခန့်စည်သူက ကြူကြူလှအား အမေဟု ခေါ်ဆိုပြီး တန်ဖိုးကြီး လက်ကိုင်အိတ်များ လက်ဆောင်ပေးလေ့ရှိသလို ကြူကြူလှကလည်း ပြည်ပခရီးမှ လက်ဆောင်များ ဝယ်ယူပေးတတ်ကြောင်း သိရသည်။

အဆိုပါ ဆက်ဆံရေးကြောင့် ခန့်စည်သူသည် စစ်တပ်ထောက်ခံ ရုပ်ရှင်များတွင် အဓိက ပါဝင်ခွင့် ရရှိသည့်အပြင် ဝန်ကြီးဌာန တင်ဒါ၊ သွင်းကုန်ပါမစ် စသည့် စီးပွားရေး အခွင့်အရေးများလည်း ရရှိနေကြောင်း၊ ၂၀၂၂ ခုနှစ်တွင် ကြူကြူလှ၏ တိုက်တွန်းချက်ဖြင့် လူမှုထူးချွန်ဆုပါ ရရှိခဲ့ကြောင်း နီးစပ်သူများထံမှ သိရသည်။

 

စစ်တပ်၏ KNU ဖျက်ဆီးရန်ကြံစည်မှုနှင့် ငွေလိမ်ဂိုဏ်းစွပ်စွဲချက်ကို KNLA ဗဟိုဌာနချုပ်သတိပေး

 

နိုဝင် ၃၀

The Kaladan Post

KNLA ဗဟိုဌာနချုပ်က နိုဝင်ဘာ ၂၉ ရက်ညက ထုတ်ပြန်သည့် ကြေညာချက်တွင် စစ်တပ်က KNU ကို ဖျက်ဆီးရန် နည်းလမ်းပေါင်းစုံဖြင့် ထောင်ချောက်ဆင်နေပြီး အွန်လိုင်းငွေလိမ်ဂိုဏ်းများနှင့် ငြိစွန်းသည်ဟု မဟုတ်မမှန် စွပ်စွဲသွပ်သွင်းနေကြောင်း သတိပေးထားသည်။ စစ်တပ်ပြောခွင့်ရှိသူ ဇော်မင်းထွန်းက DKBA/KKO ကို KNU ၏ တာဝန်ခံအဖွဲ့ဟု တမင်တကာ မှားယွင်းဖော်ပြ နေသည်မှာ KNU ကို အဆိုပါဂိုဏ်းများနှင့် ဆက်စပ်ပုံဖော်ရန် ရည်ရွယ်ချက်ရှိကြောင်း KNLA က ထောက်ပြသည်။

KNU အနေဖြင့် အွန်လိုင်းငွေလိမ်လုပ်ငန်းနှင့် မူးယစ်ဆေးဝါးကို ကရင်တမျိုးသားလုံး၏ ရန်သူဟု ရှုမြင်ထားပြီး စစ်တပ်က ရွေးကောက်ပွဲကျင်းပနိုင်ရေးနှင့် တစ်သက်လုံး အာဏာရှင်စနစ်တည်တံ့ ရေးအတွက် KNU ကို အရှိန်အဟုန်မြှင့် တိုက်ခိုက်နေခြင်းဖြစ်ကြောင်း ကြေညာချက်တွင် ဖော်ပြ ထားသည်။

ပေါင်းတည် ကျောက်ကြီးတောင်ဂိတ်ကို တိုက်ခိုက်၊ စစ်သား ၂ ဦးသေဆုံး

 

နိုဝင် ၃၀

The Kaladan Post

ပဲခူးတိုင်း ပေါင်းတည်မြို့နယ်၊ ကျောက်ကြီးတောင်ရှိ စစ်တပ်အထိုင်ဂိတ်စခန်းကို နိုဝင်ဘာ ၂၂ ရက် နံနက် ၁၀ နာရီ ၃၅ မိနစ်ခန့်က တော်လှန်ရေးတပ်ဖွဲ့များက စနိုက်ပါနှင့် လက်နက်ငယ် များဖြင့် ပစ်ခတ်တိုက်ခိုက်ခဲ့ရာ စစ်သား ၂ ဦး နေရာမှာတင် သေဆုံးခဲ့ကြောင်း သိရသည်။ သေဆုံးသွားသည့် စစ်သားအလောင်းများကို ဂိတ်စခန်းအနီးတွင် မြေမြုပ်ခဲ့ကြောင်း တော်လှန်ရေး တပ်ဖွဲ့ဘက်က အတည်ပြုသည်။

အဆိုပါ တိုက်ခိုက်မှုကို ဗျူဟာ ၂၁ လက်အောက်ခံ ရဲဘော်များနှင့် ၃၆၀၁ တပ်ရင်းတို့ ပူးပေါင်း လုပ်ဆောင်ခြင်းဖြစ်ပြီး စစ်တပ်ဘက်က လက်နက်ကြီး၊ လက်နက်ငယ်များဖြင့် ပြန်လည် ပစ်ခတ်ခဲ့သော်လည်း တော်လှန်ရေးရဲဘော်များ အထိအခိုက်မရှိ ပြန်လည်ဆုတ်ခွာနိုင်ခဲ့ကြောင်း သိရသည်။

 

နိုင်ငံပေါင်း ၉ ခုမှ လွှတ်တော်အမတ် ၁၆၃ ဦး စစ်တပ်ရွေးကောက်ပွဲကို ရှုတ်ချ

 

နိုဝင် ၃၀

The Kaladan Post

နယူးဇီလန်၊ ဂျပန်၊ ဖိလစ်ပိုင်၊ ထိုင်း၊ မလေးရှား၊ သြစတြေးလျ၊ အရှေ့တီမော၊ အင်ဒိုနီးရှားနှင့် ယူနိုက်တက်ကင်းဒမ်း စုစုပေါင်း နိုင်ငံ ၉ ခုမှ လွှတ်တော်အမတ် ၁၆၃ ဦးက မြန်မာစစ်တပ်စီစဉ် ထားသည့် ရွေးကောက်ပွဲကို အတုအယောင်အဖြစ် ရှုတ်ချလိုက်ပြီး နိုင်ငံတကာအသိုင်းအဝိုင်း အနေဖြင့် ယင်းရွေးကောက်ပွဲကို ငြင်းပယ်ရန် တောင်းဆိုလိုက်သည်။ ရွေးကောက်ပွဲမှာ လွတ်လပ်မှု၊ တရားမျှတမှု၊ တရားဝင်မှု လုံးဝမရှိသလို တရားမဝင်စစ်တပ်ကို ပြန်လည်ပုံဖော်ရန် ကြိုးပမ်းမှုသာဖြစ်ကြောင်း အမတ်များက ဆိုသည်။

ရွေးကောက်ပွဲမတိုင်ခင် စစ်တပ်က လေကြောင်းတိုက်ခိုက်မှုများ အရှိန်မြှင့်လုပ်ဆောင်နေသဖြင့် ရွေးကောက်ပွဲအပြီးတွင်လည်း တိုင်းပြည်တည်ငြိမ်အေးချမ်းမည်မဟုတ်ဘဲ အကြမ်းဖက်မှုနှင့် မတည်မငြိမ်ဖြစ်မှုများ ပိုမိုဆိုးရွားလာမည်ဖြစ်ကြောင်း လွှတ်တော်အမတ်များက သတိပေးထား သည်။

ကျောက်မဲမြို့နယ်တွင် စစ်တပ်က SSPP/SSA နယ်မြေထဲ စစ်ကြောင်းထိုး၊ တိုက်ပွဲပြင်းထန်

 

နိုဝင် ၃၀

The Kaladan Post

ရှမ်းပြည်နယ်မြောက်ပိုင်း ကျောက်မဲမြို့နယ်၊ ပုံဝိုးကျေးရွာအနီးတွင် နိုဝင်ဘာ ၂၉ ရက် မွန်းလွဲ ၁ နာရီခန့်က စစ်တပ်အင်အား ၁၀၀ ဝန်းကျင်က SSPP/SSA တပ်စခန်းရှိရာ နယ်မြေအတွင်းသို့ ထိုးစစ်ဆင်ဝင်ရောက်လာသဖြင့် တိုက်ပွဲပြင်းထန်ဖြစ်ပွားနေကြောင်း SSPP Info က ထုတ်ပြန် သည်။ စစ်တပ်ဘက်က မြေပြင်စစ်ကြောင်းနှင့် ဒရုန်းများအသုံးပြု တိုက်ခိုက်နေပြီး ညနေ ၃ နာရီဝန်းကျင်အထိ ထိတွေ့တိုက်ပွဲ ဆက်လက်ပြင်းထန်နေဆဲဖြစ်သည်။

ကျောက်မဲမြို့ပေါ်ကို စစ်တပ်က အဓိကထိန်းချုပ်ထားပြီး မြို့နယ်အတွင်း ကျေးရွာများတွင် SSPP/SSA နှင့် TNLA တပ်ဖွဲ့များလည်း ရှိနေကြောင်း ဒေသခံများက ပြောသည်။

 

 

ငါန်းဇွန် ဓာတ်တော်ရွာ စစ်တပ်စီးနင်း၊ ပြည်သူ ၃ ဦးသတ်ဖြတ်ပြီး ရွာလုံးကျွတ်မီးရှို့

 

နိုဝင် ၃၀

The Kaladan Post

မန္တလေးတိုင်း ငါန်းဇွန်မြို့နယ်၊ ဓာတ်တော်ကျေးရွာကို နိုဝင်ဘာ ၂၈ ရက် နံနက် ၈ နာရီခန့်က စစ်တပ်က တိုက်ပွဲမရှိဘဲ ဝင်ရောက်စီးနင်းခဲ့ရာ ထွက်ပြေးသည့် ပြည်သူများကို လက်နက်ကြီး၊ ဒရုန်းများဖြင့် ပစ်ခတ်သဖြင့် ၂ နှစ်အရွယ် ကလေးငယ်အပါအဝင် ပြည်သူ ၃ ဦး သေဆုံးခဲ့ကြောင်း ဒေသခံများက ပြောသည်။ စစ်တပ်က ကျေးရွာတစ်ရွာလုံးကို မီးတင်ရှို့ဖျက်ဆီးခဲ့ပြီး အိမ်ခြေအများ အပြား ပြာကျခဲ့ကာ ပြည်သူများမှာ စစ်ကြောင်းပြန်လာမည်ကို စိုးရိမ်၍ တောထဲတွင် ဆက်လက် တိမ်းရှောင်နေရသည်။

အလားတူ ကချင်ပြည်နယ် ဖားကန့်မြို့နယ်၊ မနကျေးရွာကို နိုဝင်ဘာ ၂၇ ရက် ညနေပိုင်းက စစ်တပ်က လက်နက်ကြီးဖြင့် ပစ်ခတ်ခဲ့ရာ လင်မယား ၂ ဦး ဒဏ်ရာရရှိခဲ့ပြီး တစ်ဦးမှာ အဆုတ်ထဲ သွေးထွက်နေသဖြင့် အသက်အန္တရာယ်စိုးရိမ်ရကြောင်း သိရသည်။

မြစ်ဆုံစီမံကိန်း မင်းအောင်လှိုင်ဦးဆောင်အဖွဲ့ဖွဲ့၊ တရုတ် SPICYN နှင့် ပြန်စတင်

 

နိုဝင် ၃၀

The Kaladan Post

မင်းအောင်လှိုင်က ဧရာဝတီမြစ်ဆုံ-မြစ်ညာမြစ်ဝှမ်းရေအားလျှပ်စစ်စီမံကိန်း ဦးဆောင်အဖွဲ့ကို ဩဂုတ် ၂၉ ရက်တွင် ဖွဲ့စည်းလိုက်ပြီး တရုတ်ယူနန်ပြည်နယ် SPICYN ကုမ္ပဏီနှင့်အတူ သုတေသန၊ နည်းပညာ၊ ပြည်သူ့ဆက်ဆံရေးနှင့် စီးပွားရေးလုပ်ငန်းများ ပြန်လည်စတင် ဆောင်ရွက်နေကြောင်း စစ်တပ်ပြန်တမ်းတွင် ဖော်ပြထားသည်။ အဖွဲ့တွင် လျှပ်စစ်ဝန်ကြီးဌာန ဒုဝန်ကြီးက ခေါင်းဆောင်အဖြစ်၊ ကချင်ပြည်နယ် သယံဇာတဝန်ကြီးက ဒုခေါင်းဆောင်အဖြစ် ပါဝင်ပြီး အဖွဲ့ဝင် ၁၃ ဦး ရှိသည်။

ဦးဆောင်အဖွဲ့က တရုတ်ဘက်နှင့် အစည်းအဝေး ၂ ကြိမ်ပြီးစီးထားပြီး လက်ရှိတွင် စာရွက်စာတမ်းဆိုင်ရာ လုပ်ငန်းများကို အဓိကဆောင်ရွက်နေဆဲဖြစ်ကြောင်း နေပြည်တော် သတင်းရင်းမြစ်က ပြောသည်။ ၂၀၁၁ ခုနှစ်က ဦးသိန်းစိန်အစိုးရလက်ထက် ပြည်သူ့ကန့်ကွက်မှု ကြောင့် ယာယီရပ်ဆိုင်းခဲ့ရသည့် မြစ်ဆုံစီမံကိန်းကို ယခုအခါ တရုတ်နှင့်ပူးပေါင်း ပြန်လည် အကောင်အထည်ဖော်ရန် ကြိုးပမ်းနေခြင်းဖြစ်သည်။

ပေါက်မြို့နယ်တောင်ပိုင်း စစ်တပ်ထောင်ထားသော နင်းမိုင်းကြောင့် ပြည်သူ ၆ ဦး ပြင်းထန် ဒဏ်ရာရ

 

နိုဝင် ၃၀

The Kaladan Post

မကွေးတိုင်း ပေါက်မြို့နယ်တောင်ပိုင်းတွင် တပ်မ ၉၉ စစ်ကြောင်းက နိုဝင်ဘာ ၁၉ ရက်မှစ၍ ကျေးရွာ၊ တောင်ယာ၊ ဗုံးခိုကျင်းနှင့် လမ်းကြောင်းများတွင် နင်းမိုင်းများ ထောင်ထားခဲ့ရာ ပြည်သူ ၆ ဦး မိုင်းနင်းမိပြီး ပြင်းထန်ဒဏ်ရာရရှိခဲ့ကြောင်း ဒေသခံများက ပြောသည်။ အဆိုပါအထဲတွင် နေအိမ်ပြန်ဝင်သည့် ပြည်သူ ၃ ဦး ခြေထောက်ဆုံးရှုံးခဲ့ပြီး နိုဝင်ဘာ ၂၈ ရက် နံနက်က လယ်ရိတ် ရန်သွားသည့် ပြည်သူ ၃ ဦးလည်း ဆိုင်ကယ်ဖြင့် မိုင်းနင်းမိကာ ပြင်းထန်ဒဏ်ရာရခဲ့သည်။

စစ်ကြောင်းထိုးချိန်မှစ၍ ပြည်သူ ၈ ဦးကို ဖမ်းဆီးသတ်ဖြတ်ခဲ့ပြီး အခြား ၂၀ ကျော်ကို ဖမ်းဆီးခေါ်ဆောင်သွားကြောင်း သိရှိရသည်။ ပေါက်မြို့နယ် လူသားချင်းစာနာထောက်ပံ့ရေးဌာန က စစ်ကြောင်းဝင်ရောက်ခဲ့သော နေရာများတွင် မိုင်းအန္တရာယ်ရှိနိုင်သဖြင့် သတိထားသွားလာကြ ရန် အသိပေးထားသည်။