ဇူလိုင် (၆) သတင်းတိုကဏ္ဍ

၁။ ပခုက္ကူလေယာဉ်ကွင်း ရော့ကတ်ဖြင့် တိုက်ခိုက်မှုရာ စစ်ကောင်စီတပ်သား ၄ ဦးသေဆုံး
ဇူလိုင် ၆
The Kaladan Post
မကွေးတိုင်း၊ ပခုက္ကူမြို့ လေယာဉ်ကွင်းကို ဇူလိုင် ၅ ရက် နံနက် ၁၀:၄၈ ခန့်တွင် တော်လှန်ရေး တပ်ဖွဲ့များက ရော့ကတ် ၁၀ လုံးနှင့် ၆၀ မမ လက်နက်ကြီးများဖြင့် ပစ်ခတ်တိုက်ခိုက်ခဲ့သည်။ ရော့ကတ် ၅ လုံးသည် လေယာဉ်ကွင်းအတွင်း ကျရောက်ပေါက်ကွဲခဲ့ပြီး လေယာဉ်ပြေးလမ်း ပျက်စီးကာ စစ်ကောင်စီတပ်သား ၁၃ ဦး ထိခိုက်ဒဏ်ရာရရှိခဲ့သည်။ ထိုအထဲမှ ၄ ဦး သေဆုံးခဲ့ကြောင်း ပခုက္ကူ ပကဖ လက်နက်ကြီးတပ်ဖွဲ့ COBRA ONE မှ ဗိုလ်မြွေဟောက်က ပြောသည်။ တော်လှန်ရေးတပ်ဖွဲ့များမှာ အထိအခိုက်မရှိ အောင်မြင်စွာ ဆုတ်ခွာနိုင်ခဲ့သည်။
ဤတိုက်ခိုက်မှုသည် လေယာဉ်ကွင်းမှ Y-12 လေယာဉ်နှင့် စက်တပ်လေထီးများဖြင့် ပြည်သူများကို ဗုံးကြဲတိုက်ခိုက်မှုများနှင့် စစ်ကောင်စီ၏ အကြမ်းဖက်လုပ်ရပ်များကို တုံ့ပြန်ရန် လုပ်ဆောင်ခဲ့ခြင်းဖြစ်သည်။ တိုက်ခိုက်မှုကို COBRA ONE၊ ပခုက္ကူမြို့နယ်တပ်ရင်း ၁ ပကဖ၊ Colum 1၊ BA NYEIN GUERRILLA FORCE၊ ဧရာဒေါင်းနယ်မြေ (၁) ကာကွယ်ရေး Ploplo Young Force၊ ဒေါင်းညီနောင် (PKU)၊ Southern (YSO)၊ Yesagyo Revolution Group (YRG) နှင့် King Cobra တို့က ပူးပေါင်းဆောင်ရွက်ခဲ့သည်။ စစ်ကောင်စီဘက်မှ လက်နက်ကြီး၊ လက်နက်ငယ်များဖြင့် ပြန်လည်ပစ်ခတ်ခဲ့သော်လည်း တော်လှန်ရေးတပ်ဖွဲ့ များ ထိခိုက်မှုမရှိခဲ့ပေ။

 

 

၂။ ဖားကန့်တိုက်ပွဲပြင်းထန်ပြီးစစ်တပ်ပစ်ခတ်မှုကြောင့် ပြည်သူတစ်ဦးသေဆုံး
ဇူလိုင် ၆
The Kaladan Post
ကချင်ပြည်နယ်၊ ဖားကန့်မြို့နယ်တွင် ဇူလိုင် ၅ ရက်နေ့က စစ်ကောင်စီတပ်နှင့် KIA၊ PDF ပူးပေါင်းတပ်ဖွဲ့များအကြား တစ်နေ့လုံး တိုက်ပွဲများ ပြင်းထန်ခဲ့သည်။ မော်မောင်လယန် ကျေးရွာတွင် စစ်ကောင်စီတပ်က ရမ်းသမ်းပစ်ခတ်မှုကြောင့် ပြည်သူတစ်ဦး သေဆုံးပြီး နှစ်ဦး ထိခိုက်ဒဏ်ရာရရှိခဲ့ကြောင်း KIA စစ်ရေးသတင်းရင်းမြစ်က ပြောသည်။ ဇူလိုင် ၄ ရက်နေ့ ညနေပိုင်းတွင် စစ်ကောင်စီတပ်အင်အား ၁၀၀ ကျော်သည် တပ်မကုန်းမှ မော်မောင်လယန် ကျေးရွာသို့ စစ်ကြောင်းထိုးဝင်ရောက်ခဲ့သည်။ စစ်တပ်သည် ရပ်ကွက်ရုံး၊ စာသင်ကျောင်းနှင့် တာဝါတိုင်တစ်ဝိုက်တွင် တပ်စွဲထားသည်။
တိုက်ပွဲများသည် မော်မောင်လယန်၊ တောင်ပြို၊ ဖလခနှင့် မြောက်ဖြူကွက်သစ်ကျေးရွာ များတွင် ပြင်းထန်ခဲ့ပြီး ဒေသခံပြည်သူများ စစ်ဘေးရှောင်နေရသည်။ စစ်ကောင်စီတပ်သည် တပ်မကုန်းမှ လက်နက်ကြီးဖြင့် ပစ်ကူပေးနေသည်ဟု KIA သတင်းရင်းမြစ်က ဆိုသည်။ စစ်ကောင်စီသည် လှမောင်ကုန်းနှင့် မော်မောင်ကုန်းကဲ့သို့ အချက်အချာကျသော နယ်မြေများကို ပြန်လည်ထိန်းချုပ်ရန် ကြိုးပမ်းနေသည်ဟု ယူဆရသည်။ မေလနှောင်းပိုင်း မှစ၍ ဖားကန့်တွင် စစ်တပ်၏ ပစ်ခတ်မှုကြောင့် ပြည်သူ ၄၅ ဦးထက်မနည်း သေဆုံးခဲ့ပြီး ယခုဖြစ်ရပ်သည် ဆက်လက်ပြင်းထန်နေသည့် ပဋိပက္ခများကို ထင်ဟပ်စေသည်။

 

 

၃။ စစ်ကောင်စီက ကျောက်မဲမြို့ညသန်းခေါင်ယံ ဗုံးကြဲတိုက်ခိုက်
ဇူလိုင် ၆
The Kaladan Post
ရှမ်းပြည်နယ်မြောက်ပိုင်း၊ TNLA ထိန်းချုပ်ထားသော ကျောက်မဲမြို့အား စစ်ကောင်စီက ဇူလိုင်လ ၅ ရက် ညသန်းခေါင်ယံတွင် တိုက်လေယာဉ်ဖြင့် ဗုံးကြဲတိုက်ခိုက်ခဲ့ကြောင်း ဒေသခံများက ပြောကြားသည်။ ည ၁၂ နာရီခန့်က ခရိုင်သစ်တောဝင်းအတွင်း ဗုံးကြဲချခဲ့ရာ သစ်တောရုံး ထိခိုက်ပျက်စီးခဲ့သော်လည်း လူထိခိုက်မှုမရှိခဲ့ဟု သိရသည်။ “သစ်တောရုံးမှာ လူမနေဘူး။ ဗုံးကျဲတာကြောင့် လူထိခိုက်မှုမရှိဘူး။ ကျောက်မဲမှာ ပြည်သူတွေ စစ်ရှောင်နေကြပြီ” ဟု ဒေသခံတစ်ဦးက ပြောသည်။ ဇွန်လ ၂၇ နှင့် ၂၉ ရက်များတွင်လည်း စစ်ကောင်စီ၏ လေကြောင်းတိုက်ခိုက်မှုများကြောင့် ပြည်သူ ၅ ဦးထက်မနည်း သေဆုံးခဲ့သည်။
အလားတူ မန္တလေးတိုင်း၊ သပိတ်ကျင်းမြို့နယ်၊ ဇရပ်ကွင်းကျေးရွာသို့ ဇူလိုင်လ ၅ ရက် မွန်းလွဲ ၁၂:၄၅ နာရီခန့်က စစ်ကောင်စီက လေယာဉ်ဖြင့် ဗုံးကြဲတိုက်ခိုက်ခဲ့ရာ အမျိုးသား ၂ ဦး ထိခိုက်ဒဏ်ရာရရှိခဲ့သည်။ “နေအိမ်ပျက်စီးမှုရှိတယ်။ ဗုံးသီးက တစ်လုံးပဲ ဖြစ်မယ်။ ဒဏ်ရာရသူတွေကို ဆေးကုသပေးထားတယ်” ဟု ပြင်ဦးလွင်ခရိုင် ပြည်သူ့ကာကွယ်ရေး အဖွဲ့မှ တာဝန်ရှိသူတစ်ဦးက ပြောသည်။ သပိတ်ကျင်းမြို့နယ်တွင် စစ်ကောင်စီ၏ စစ်ကြောင်းထိုးမှုများကြောင့် ပြည်သူထောင်ချီစစ်ဘေးရှောင်နေရပြီး ရိက္ခာ၊ ဆေးဝါး လိုအပ်ချက်များ ရှိနေကြောင်း စစ်ဘေးရှောင်ကူညီသူများထံမှ သိရသည်။

 

 

၄။ ပုသိမ်-မုံရွာနှင့် အမ်း-ပဒါန်းလမ်းပိုင်းတိုက်ပွဲများတွင် စစ်သား ၂၅ ဦးထက်မနည်းသေဆုံး
ဇူလိုင် ၆
The Kaladan Post
မကွေးတိုင်း၊ အထက်မင်းလှမြို့နယ်ရှိ ပုသိမ်-မုံရွာနှင့် အမ်း-ပဒါန်းလမ်းပိုင်းများတွင် မတ်လကုန်မှ မေလကုန်အထိ ၈ ပတ်ကြာ တိုက်ပွဲများအတွင်း စစ်ကောင်စီတပ်ဖွဲ့ဝင် ၂၅ ဦးထက်မနည်း သေဆုံးပြီး ၆၃ ဦးထက်မနည်း ဒဏ်ရာရရှိခဲ့သည်။ ပြည်သူ့လွတ်လပ်ရေးအဖွဲ့ (PIO/PIA) နှင့် အထက်မင်းလှပြည်သူ့ကာကွယ်ရေးအဖွဲ့တို့က မိုင်းဆွဲတိုက်ခိုက်မှု ၂ ကြိမ်နှင့် ဖြတ်တောက်တိုက်ခိုက်မှု ၆ ကြိမ်ပြုလုပ်ခဲ့ကြောင်း သိရသည်။ “စစ်ကောင်စီတပ်က အိမ်စီးကားများ၊ ကုန်တင်ကားများဖြင့် သွားလာနေသည်။ ပြည်သူများအနေဖြင့် ဤလမ်းပိုင်းများအသုံးပြုရာတွင် တော်လှန်ရေးအဖွဲ့များနှင့် ဆက်သွယ်ရန်လိုအပ်သည်” ဟု PIO/PIA တာဝန်ရှိသူက ပြောသည်။
စစ်ကောင်စီတပ်က အဆိုပါလမ်းပိုင်းများတွင် ၁၀ ကြိမ်ထက်မနည်း စစ်ကြောင်းထိုးခဲ့ပြီး ပြည်သူ့နေအိမ် ၂ လုံးကို မီးရှို့ဖျက်ဆီးကာ ပြည်သူ ၉ ဦးကို ဖမ်းဆီးခဲ့သည်။ ထို့ပြင် စစ်တပ်၏ လေကြောင်းတိုက်ခိုက်မှုဖြင့် စာသင်ကျောင်း ၁ ကျောင်း၊ ဘုန်းကြီးကျောင်း ၁ ကျောင်းကို ဗုံးကြဲဖျက်ဆီးခဲ့သည်။ ဒရုန်းဖြင့် ၃ ကြိမ်ထက်မနည်း အရပ်သားများကို ပစ်မှတ်ထား တိုက်ခိုက်ခဲ့ရာ ပြည်သူ ၁ ဦး သေဆုံးပြီး ၅ ဦးထက်မနည်း ဒဏ်ရာရခဲ့သည်။ ပြည်သူများ အနေဖြင့် စစ်တပ်စစ်ကြောင်းသတင်းကို နားစွင့်ကာ တော်လှန်ရေးအဖွဲ့များနှင့် ချိတ်ဆက်ပြီး သွားလာရန် PIO/PIA က မေတ္တာရပ်ခံထားသည်။

 

 

၅။ စစ်မှုထမ်းတပ်သားသစ်များ စစ်ကောင်စီခြိမ်းခြောက်
ဇူလိုင် ၆
The Kaladan Post
စစ်ကောင်စီက စစ်မှုထမ်းတပ်သားသစ်များအား ထွက်ပြေးခြင်း သို့မဟုတ် လက်နက်ချ ပူးပေါင်းခြင်းများ ပြုလုပ်ပါက ၎င်းတို့၏ မိသားစုဆွေမျိုးများ၏ လူမှုစီးပွားဘဝများ ပျက်စီးမည်ဟု ခြိမ်းခြောက်ပြောဆိုခဲ့ကြောင်း စစ်မှုထမ်းတပ်သားသစ်အသိုင်းအဝိုင်းက ပြောသည်။ ဇူလိုင်လ ၄ ရက်က အပတ်စဉ် ၁၂ သင်တန်းဆင်းပွဲတွင် စစ်ကောင်စီအရာရှိများက တပ်သားသစ်များအား “ရဲရဲတိုက်၊ ရဲရဲတက်၊ ရဲရဲချေမှုန်း” ရန် တိုက်တွန်းပြီး ထွက်ပြေးပါက တစ်သက်လုံး စစ်ပြေးဘဝဖြင့် နေရမည်ဟု သတိပေးခဲ့သည်။ ထိုသို့လုပ်ဆောင်ပါက မိသားစု၏ ဂုဏ်သိက္ခာနှင့် လူမှုစီးပွားဘဝများ ထိခိုက်ပျက်စီးမည်ဟု ခြိမ်းခြောက်ခဲ့သည်။ သို့သော် တာဝန်ထမ်းဆောင်မှုကောင်းပါက နိုင်ငံတော်က အခွင့်အလမ်းများနှင့် ဘဝလုံခြုံရေးကို စီမံပေးမည်ဟု ၎င်းတို့က ပြောဆိုခဲ့သည်။
စစ်ကောင်စီက အပတ်စဉ် ၁၂ သင်တန်းဆင်းတပ်သားသစ်များအားလုံးကို တိုက်ပွဲပြင်းထန် နေသော ရခိုင်၊ ရှမ်း/မြောက်၊ ကရင်နီ၊ ကရင်၊ စစ်ကိုင်း/ချင်း၊ ကချင်စစ်ဆင်ရေးနယ်မြေများသို့ ဇူလိုင်လ ၆ ရက်မှစ၍ ဦးစားပေးစေလွှတ်မည်ဟု အသိပေးခဲ့သည်။ ဤနယ်မြေများတွင် လက်နက်ကြီးပစ်ခတ်မှု၊ လေကြောင်းတိုက်ခိုက်မှုနှင့် စစ်ကြောင်းထိုးမှုများ ပြင်းထန်စွာ ဖြစ်ပွားနေသည်။ တပ်သားသစ်များကို ရှေ့တန်းသို့သာ ဦးစားပေးပို့ဆောင်မည်ဖြစ်ပြီး မြို့ပြလုံခြုံရေးအတွက် ပို့ဆောင်မှု မရှိကြောင်း စစ်ကောင်စီအရာရှိများက အတည်ပြုခဲ့သည်။ ဖုန်းသိမ်းဆည်းမှု လတ်တလော မရှိသေးဘဲ မိသားစုနှင့် ဆက်သွယ်ခွင့်ရှိနေသေးသည်ဟု တိုက်ကြီးမြို့နယ်၊ အမှတ် ၁ တန်းမြင့်လေ့ကျင့်ရေးသင်တန်းကျောင်း(ဂျိုးဖြူ)မှ တပ်သားသစ် တစ်ဦးက ပြောသည်။

၆။ ပွာလ်ပီးစစ်စခန်းများ သိမ်းပိုက်ပြီး စစ်ကောင်စီတပ်သားများ ကလေးမြို့သို့ ဆုတ်ပြေး
ဇူလိုင် ၆
The Kaladan Post
ချင်းပြည်နယ်၊ တီးတိန်မြို့နယ်၊ ပွာလ်ပီးကျေးရွာရှိ စစ်ကောင်စီတပ်စခန်းများအားလုံးကို ချင်းတော်လှန်ရေးပူးပေါင်းတပ်ဖွဲ့များက သိမ်းပိုက်ရရှိခဲ့ပြီး စစ်ကောင်စီတပ်သားများ ကလေးမြို့သို့ ဆုတ်ခွာထွက်ပြေးသွားကြောင်း ချင်းတော်လှန်ရေးစစ်ရေးသတင်းရင်းမြစ်က ပြောသည်။ ဇူလိုင်လ ၅ ရက် နံနက် ၆ နာရီကျော်တွင် စတင်တိုက်ခိုက်ခဲ့ရာ ညနေ ၅ နာရီကျော်တွင် စခန်းများကို အပြီးသတ်သိမ်းပိုက်နိုင်ခဲ့သည်။ တိုက်ပွဲအတွင်း စစ်ကောင်စီ တပ်သားများ ထိခိုက်သေဆုံးမှု များပြားခဲ့သော်လည်း အတိအကျစာရင်းမသိရသေးကြောင်း သတင်းရင်းမြစ်က ဆိုသည်။
ယခုတိုက်ခိုက်မှုကို ချင်းတော်လှန်ရေးတပ်ဖွဲ့များက ဦးဆောင်လုပ်ဆောင်ခဲ့ပြီး လက်ရှိ နယ်မြေရှင်းလင်းရေးလုပ်ငန်းများ ဆောင်ရွက်နေသည်။ ဇွန်လ ၂၆ မှ ၂၈ ရက်အတွင်း ပွာလ်ပီးကျေးရွာရှိ ကာကင်းစခန်း ၃ ခုကိုလည်း သိမ်းပိုက်ရရှိခဲ့ပြီး စစ်သား ၁၅ ဦးကျော် သေဆုံးကာ လက်နက်ခဲယမ်းများနှင့် အရှင်ဖမ်းမိသူများ ရှိခဲ့သည်။ “ပွာလ်ပီးက နောက်ဆုံးစခန်းကို CNA ဦးဆောင်မှုနှင့် သိမ်းပိုက်နိုင်ခဲ့သည်။ စစ်ကောင်စီက ကလေးမြို့သို့ ဆုတ်သွားပြီဖြစ်သည်” ဟု သတင်းရင်းမြစ်က ပြောသည်။

 

 

၇။ မြိတ်-ထားဝယ်နှင့် မြင်းခြံတွင် စစ်ကောင်စီတပ်သား ၆ ဦး လက်နက်များနှင့် အလင်းဝင်
ဇူလိုင် ၆
The Kaladan Post
တနင်္သာရီတိုင်း၊ မြိတ်-ထားဝယ်ခရိုင်ရှိ KNLA တပ်မဟာ ၄ ထံသို့ စစ်ကောင်စီတပ်သား ၅ ဦးသည် MA-1 သေနတ် ၂ လက်၊ ကျည်ဘောက် ၇ ခုနှင့် ကျည်ဆံ ၁၉၈ တောင့်ယူဆောင်ကာ ဇူလိုင်လ ၅ ရက်တွင် အလင်းဝင်ရောက်ခဲ့ကြောင်း KNU မြိတ်-ထားဝယ်ခရိုင်က ထုတ်ပြန်သည်။ ၎င်းတပ်သားများသည် ခလရ ၁၀၃ နှင့် ခလရ ၂၆၇ တပ်ရင်းများမှ ဖြစ်သည်။ အလားတူ၊ မန္တလေးတိုင်း၊ မြင်းခြံမြို့နယ်၊ ဆီမီးခုံနယ်မြေရဲစခန်းမှ ရဲတပ်သား အောင်ကိုလတ်သည် ဇူလိုင်လ ၂ ရက်တွင် မိသားစုနှင့်အတူ ကျည် ၁၆၀ နှင့် MG(1) ဗုံးသီး ၁ လုံးယူဆောင်ကာ Myingyan Northerners Guerrilla Force (MNGF) ထံ အလင်းဝင်ခဲ့သည်။
အောင်ကိုလတ်သည် စစ်ကောင်စီ၏ အကြမ်းဖက်လုပ်ရပ်များကို စက်ဆုပ်ရွံရှာပြီး အမြင်မှန်ရလာသဖြင့် မိသားစုနှင့်အတူ အလင်းဝင်ရောက်ခဲ့ခြင်းဖြစ်သည်။ MNGF က ၎င်းအား လုံခြုံစိတ်ချရသောနေရာသို့ ပို့ဆောင်ကာ ဂုဏ်ပြုဆုငွေ ချီးမြှင့်ရန် စီစဉ်ထား ကြောင်း တာဝန်ရှိသူက ပြောသည်။ “အလင်းဝင်သူကို ဂုဏ်ပြုဆုချီးမြှင့်ဖို့ ရှိတယ်။ လောလောဆယ် ကျွန်တော်တို့ တတ်နိုင်သလောက် ချီးမြှင့်ထားတယ်” ဟု MNGF တာဝန်ရှိသူက ပြောသည်။ MNGF သည် အလင်းဝင်လိုသည့် စစ်ကောင်စီတပ်သားများအား ဆက်လက်ကူညီဆောင်ရွက်ပေးမည်ဟု နှိုးဆော်ထားသည်။

 

 

၈။ စစ်ကောင်စီ၏ အတုအယောင်ရွေးကောက်ပွဲကို လုံးဝခွင့်မပြုဟု PDF သတိပေး
ဇူလိုင် ၆
The Kaladan Post
တနင်္သာရီတိုင်း၊ ကော့သောင်းမြို့နယ်အတွင်း စစ်ကောင်စီ၏ တရားမဝင်ရွေးကောက်ပွဲကို လုံးဝခွင့်ပြုမည်မဟုတ်ကြောင်း ကော့သောင်းမြို့နယ်ပြည်သူ့ကာကွယ်ရေးအဖွဲ့ (PDF) မှ တာဝန်ရှိသူတစ်ဦးက ပြောသည်။ ၎င်းတို့သည် ၂၀၂၀ ရွေးကောက်ပွဲရလဒ်ကို တရားဝင်မှုရှိသည်ဟု သတ်မှတ်ထားပြီး စစ်ကောင်စီ၏ အတုအယောင်ရွေးကောက်ပွဲသည် ဒီမိုကရေစီကျင့်စဉ်ကို ချိုးဖောက်ကာ ပြည်သူ့အချုပ်အခြာအာဏာကို မတရားရယူရန် ကြိုးပမ်းမှုဖြစ်သည်ဟု ဆိုသည်။ “ရွေးကောက်ပွဲလုပ်ငန်းစဉ်များကို ကန့်ကွက်မည်။ လိုအပ်ပါက အပြစ်မဲ့ပြည်သူများ ထိခိုက်မှုမရှိစေဘဲ တိုက်ခိုက်ရေးလုပ်ဆောင်မည်” ဟု PDF တာဝန်ရှိသူက ပြောသည်။
ကော့သောင်းမြို့နယ်ပြည်သူများအနေဖြင့် စစ်ကောင်စီ၏ တရားမဝင်ရွေးကောက်ပွဲနှင့် ဟန်ပြငြိမ်းချမ်းရေးလုပ်ငန်းစဉ်များကို ပူးပေါင်းပါဝင်ခြင်း သို့မဟုတ် အားပေးခြင်းမပြုရန် PDF က တိုက်တွန်းနှိုးဆော်ထားသည်။ ၎င်းတို့သည် စစ်အာဏာရှင်စနစ်တည်မြဲရေးအတွက် ဆောင်ရွက်နေသည့် စစ်ကောင်စီ၏ လုပ်ရပ်များကို ပြတ်သားစွာ ဆန့်ကျင်ရန် ပြည်သူများကို တိုက်တွန်းထားသည်။ “ရွေးကောက်ပွဲကို အားပေးပါဝင်သူများကြောင့် ထိခိုက်နစ်နာမှုဖြစ်ပြီး ကျွန်ုပ်တို့ကို အပြစ်မတင်ရန် တောင်းဆိုသည်” ဟု PDF က ပြောသည်။

 

 

၉။ မြင်းခြံနှင့် ကောလင်းတွင် တိုက်ပွဲမရှိဘဲ စစ်တပ်က လေကြောင်းဖြင့် ဗုံးကြဲတိုက်ခိုက်
ဇူလိုင် ၆
The Kaladan Post
မန္တလေးတိုင်း၊ မြင်းခြံမြို့နယ်၊ ကျောက်တိုင်ရွာကို စစ်ကောင်စီတပ်က ယနေ့ နံနက် ၁ နာရီကျော်တွင် တိုက်ပွဲမရှိဘဲ လေယာဉ်ဖြင့် ဗုံး ၄ လုံးကြဲချတိုက်ခိုက်ခဲ့ကြောင်း ဒေသခံပြည်သူများက ပြောသည်။ ပြည်သူထိခိုက်မှု ရှိမရှိကို လတ်တလော အတည်ပြုနိုင်ခြင်းမရှိသေးကြောင်း ၎င်းတို့က ဆိုသည်။ “နံနက်အစောပိုင်း ဗုံး ၄ လုံးကြဲချသွားတယ်။ ထိခိုက်မှုကို အတိအကျ မသိရသေးဘူး” ဟု ဒေသခံတစ်ဦးက ပြောသည်။ စစ်ကောင်စီ၏ အကြောင်းမဲ့ လေကြောင်းတိုက်ခိုက်မှုများကြောင့် ပြည်သူများအနေဖြင့် လေကြောင်းရန်ကာကွယ်ရေးနည်းလမ်းများကို လိုက်နာရန် တော်လှန်ရေးအဖွဲ့များက တိုက်တွန်းထားသည်။
အလားတူ စစ်ကိုင်းတိုင်း၊ ကောလင်းမြို့နယ်အနောက်ခြမ်း၊ ရွာကုန်းကြီးကျေးရွာနှင့် ကောလင်းနှင့် ကျွန်းလှမြို့နယ်အစပ်တစ်နေရာကို စစ်ကောင်စီ၏ ဂျက်ဖိုက်တာတစ်စီးက နံနက် ၆ နာရီ ၃၀ မိနစ်ခန့်တွင် ဗုံးကြဲတိုက်ခိုက်ခဲ့သည်။ ထို့ပြင် နံနက် ၆ နာရီ ၃၅ မိနစ်တွင် ကျွန်းလှမြို့နယ်အစပ်သို့ ဦးတည်ပျံသန်းကာ ထပ်မံဗုံးကြဲခဲ့ကြောင်း Kawlin Revolution – KR ၏ ထုတ်ပြန်ချက်အရ သိရသည်။ ဤတိုက်ခိုက်မှုများသည် တိုက်ပွဲမရှိဘဲ အကြောင်းမဲ့ပြုလုပ်ခြင်းဖြစ်ပြီး ပြည်သူထိခိုက်မှုနှင့် အဆောက်အအုံပျက်စီးမှုများကို ဆက်လက်စုံစမ်းနေဆဲဖြစ်သည်။ ပြည်သူများအနေဖြင့် ဗုံးခိုကျင်းများကို ခိုင်မာစွာ တူးထားရန် KR က တိုက်တွန်းထားသည်။

 

၁၀။ ဖြူးမြို့နယ်တွင် စစ်မှုထမ်းတပ်သားသစ် ၂ ဦး KNLA ထံ အလင်းဝင်
ဇူလိုင် ၆
The Kaladan Post
ပဲခူးတိုင်း၊ ဖြူးမြို့နယ်တွင် စစ်ကောင်စီ၏ ပေါ်တာဆွဲဖမ်းဆီးမှုကြောင့် စစ်တပ်သို့ အဓမ္မပို့ဆောင်ခံရသည့် စစ်မှုထမ်းတပ်သားသစ် နေလင်းဦးအပါအဝင် ၂ ဦးသည် KNLA ထံ အလင်းဝင်ရောက်ခဲ့ကြောင်း သိရသည်။ နေလင်းဦးသည် အရက်သောက်နေစဉ် စစ်တပ်ကင်းနှင့်တွေ့ပြီး ခလရ ၃၀၆ သို့ ဖမ်းဆီးပို့ဆောင်ခံရပြီး စုဆောင်းရေးတပ် ၃ မှတစ်ဆင့် ပင်လောင်းစကခ ၄ တွင် ၅ လသင်တန်းတက်ကာ အောင်ဇေယျစစ်ကြောင်းသို့ ပို့ဆောင်ခံခဲ့ရသည်။ “လက်နက်မကိုင်ချင်ဘူး။ စစ်တပ်ကိုလည်း မနှစ်သက်လို့ အလင်းဝင်လာတာပါ” ဟု ၎င်းက ပြောသည်။
အလားတူ မန္တလေးတိုင်း၊ ပျော်ဘွယ်မြို့နယ်တွင် မဲပေါက်သည်ဆိုကာ အဓမ္မစစ်တပ်သို့ ပို့ဆောင်ခံရသည့် စစ်မှုထမ်းတပ်သားသစ် နောင်ဖြိုးဝေသည်လည်း တပ်မ ၅၅ လက်အောက် ခံ ခမရ ၁၁၇ မှ အောင်ဇေယျစစ်ကြောင်းသို့ ပို့ဆောင်ခံရပြီး KNLA ထံ အလင်းဝင်ခဲ့သည်။ “စစ်တပ်ရဲ့လုပ်ရပ်တွေကို မကြိုက်ဘူး။ အုပ်ချုပ်ပုံကိုလည်း မခံနိုင်လို့ အလင်းဝင်လာတာ” ဟု ၎င်းက ပြောသည်။ နှစ်ဦးစလုံး စစ်ကောင်စီ၏ အကြမ်းဖက်လုပ်ရပ်များကို စက်ဆုပ်ရွံရှာပြီး ထွက်ပြေးလွတ်မြောက်ကာ KNLA ထံ ဆက်သွယ်ဝင်ရောက်ခဲ့ခြင်းဖြစ်သည်။

 

 

၁၁။ စစ်ကောင်စီဂိတ်စခန်း မိုင်းခွဲတိုက်ခိုက်ရာ ဗိုလ်မှူးအပါအဝင် ၆ ဦးသေဆုံး
ဇူလိုင် ၆
The Kaladan Post
မကွေးတိုင်း၊ စလင်းမြို့တောင်ဘက်အထွက်ရှိ စစ်ကောင်စီဂိတ်စခန်းငယ်တစ်ခုကို ဇူလိုင်လ ၄ ရက် ည ၇ နာရီ ၃၅ မိနစ်ခန့်တွင် တော်လှန်ရေးတပ်ဖွဲ့များက အပြင်းစားမိုင်းဖြင့် ဖောက်ခွဲတိုက်ခိုက်ခဲ့ရာ ဗိုလ်မှူး မိုးဝေယံလင်း အပါအဝင် စစ်သား ၆ ဦး ပွဲချင်းပြီး သေဆုံးခဲ့ ကြောင်း ပြည်သူ့ညီနောင်-စလင်းအဖွဲ့မှ တာဝန်ရှိသူတစ်ဦးက ပြောသည်။ တိုက်ခိုက်မှု ကြောင့် စစ်သားအလောင်းများကို လူနာတင်ယာဉ်ဖြင့် စလင်းဆေးရုံသို့ တင်ဆောင်သွား သည်။ ဤတိုက်ခိုက်မှုကို စလင်းမြို့ပြ (UG)ကျားပေါက်အဖွဲ့၊ ပြည်သူ့လုံခြုံရေး(ပလဖ)၊ ဗမာ့တပ်တော်၊ ပေါက်တောင်ပိုင်းကျန်းမာရေးသူနာပြုတပ်ဖွဲ့တို့က ပူးပေါင်းလုပ်ဆောင်ခဲ့ သည်။ တော်လှန်ရေးတပ်ဖွဲ့ဝင်များ အထိအခိုက်မရှိ ဆုတ်ခွာနိုင်ခဲ့သည်။
“စလင်းမြို့တောင်အထွက်ရှိ စစ်ကောင်စီဂိတ်စခန်းကို အပြင်းစားမိုင်းဖြင့် ဖောက်ခွဲတိုက်ခိုက် ခဲ့တာဖြစ်ပါတယ်။ ဗိုလ်မှူး မိုးဝေယံလင်းအပါအဝင် စစ်သား ၆ ဦး နေရာတွင် သေဆုံးခဲ့တယ်။ စစ်သားအလောင်းများကို စလင်းဆေးရုံသို့ လူနာတင်ယာဉ်ဖြင့် သယ်ယူသွားတယ်” ဟု ပြည်သူ့ညီနောင်-စလင်းအဖွဲ့မှ တာဝန်ရှိသူက ပြောသည်။ ဤတိုက်ခိုက်မှုသည် ကြိုတင် ပြင်ဆင်မှုဖြင့် ဆောင်ရွက်ခဲ့ပြီး အင်အား ၁၅ ဦးခန့်ပါဝင်သည့် စစ်ကောင်စီတပ်ကို ပစ်မှတ်ထားခဲ့သည်။ စစ်ကောင်စီဘက်က တိုက်ခိုက်မှုနှင့်ပတ်သက်၍ တရားဝင်ထုတ်ပြန်ချက်မရှိသေးပေ။

 

 

၁၂။ စစ်ကောင်စီတပ်သား ၅၀ ကျော်သေဆုံးပြီး လက်နက်ခဲယမ်းများသိမ်းဆည်းရရှိ
ဇူလိုင် ၆
The Kaladan Post
ချင်းပြည်နယ်သို့ ချီတက်လာသော စစ်ကောင်စီတပ်စစ်ကြောင်းကို ချင်းတော်လှန်ရေး ပူးပေါင်းတပ်ဖွဲ့က ၁ လကျော်ကြာ ပိတ်ဆို့တိုက်ခိုက်ခဲ့ရာ စစ်သား ၅၀ ကျော်သေဆုံးပြီး လက်နက်ခဲယမ်းများစွာ သိမ်းဆည်းရရှိခဲ့ကြောင်း ချင်းတော်လှန်ရေးသတင်းရင်းမြစ်က ပြောသည်။ မေလ ၁၈ ရက်တွင် ကလေးမြို့မှတဆင့် ချင်းပြည်နယ်၊ တီးတိန်မြို့နယ်၊ စီယင်းဒေသ၊ မွာလ်ပီးကျေးရွာသို့ စစ်ကြောင်းထိုးလာသည့် စစ်ကောင်စီတပ်ကို ချင်းတော်လှန်ရေးတပ်ဖွဲ့က ခုခံတိုက်ခိုက်ခဲ့သည်။ စစ်ကောင်စီတပ်သည် ယင်းဒေသတွင် ခြေကုပ်ယူတပ်စွဲခဲ့သော်လည်း ဇူလိုင်လ ၅ ရက် ညနေပိုင်းတွင် အပြီးသတ်သိမ်းပိုက်ခံရပြီး ကလေးမြို့ဘက်သို့ ဆုတ်ခွာပြေးသွားသည်။
တိုက်ပွဲအတွင်း စစ်ကောင်စီတပ်သား ၅၀ ကျော်သေဆုံးခဲ့ပြီး လက်နက်ခဲယမ်း ၅၀ မှ ၆၀ ခန့်ကို သိမ်းဆည်းရရှိခဲ့ကြောင်း ချင်းတော်လှန်ရေးသတင်းရင်းမြစ်က ဆိုသည်။ “မနေ့က တစ်ရက်တည်းမှာ အလောင်း ၁၂ လောင်းတွေ့တယ်၊ ၁ လကျော်အတွင်း သေဆုံးသူ ၅၀ ကျော်ရှိမယ်။ ဒီနေ့လည်း တောထဲမှာ မိုင်းနင်းမိသူတွေနဲ့ ရွာထဲမှာ အလောင်း ၈ လောင်းလောက်ကို မြှုပ်ပေးခဲ့တယ်” ဟု ၎င်းက ပြောသည်။ ချင်းတော်လှန်ရေးတပ်ဖွဲ့မှ ၁၂ ဦးကျဆုံးခဲ့ပြီး လက်ရှိတွင် ကလေးမြို့မှ ထပ်မံစစ်ကြောင်းထိုးလာမှုကို စောင့်ကြည့်နေသည်။ စစ်ဘေးရှောင်ပြည်သူများအား မိုင်းရှင်းလင်းရေးပြီးမှ ကျေးရွာများသို့ ပြန်ဝင်ရောက်ရန် တိုက်တွန်းထားသည်။