ဒေါ်ဇင်မာအောင် ကိုရီးယားလွှတ်တော်တွင် စစ်ကောင်စီ အတုအယောင် ရွေးကောက်ပွဲ ပြင်းပြင်းထန်ထန် ရှုတ်ချတောင်းဆို

 

ဒီဇင် ၁၂

The Kaladan Post

အမျိုးသားညီညွတ်ရေးအစိုးရ (NUG) နိုင်ငံခြားရေးဝန်ကြီး ဒေါ်ဇင်မာအောင်က ဒီဇင်ဘာ ၁၁ ရက်တွင် တောင်ကိုရီးယား အမျိုးသားလွှတ်တော်၌ လွှတ်တော်အမတ်များနှင့် တွေ့ဆုံစဉ် မြန်မာစစ်တပ်၏ တရားမဝင် အတုအယောင်ရွေးကောက်ပွဲကို နိုင်ငံတကာက ပြစ်တင်ရှုတ်ချရန်နှင့် တောင်ကိုရီးယားနရောက် မြန်မာနိုင်ငံသားများအတွက် လူသားချင်းစာနာသော နေထိုင်ခွင့်ဗီဇာများ ဆက်လက်ထုတ်ပေးရန် ပြင်းပြင်းထန်ထန် တောင်းဆိုလိုက်သည်။ “စစ်အုပ်စု၏ ရွေးကောက်ပွဲသည် မြန်မာပြည်တွင် အပြောင်းအလဲ ယူဆောင်လာနိုင်မည် မဟုတ်ဘဲ စစ်အုပ်ချုပ်ရေးကို သက်ဆိုးရှည်စေရုံသာ ဖြစ်သည်” ဟု ၎င်းက အလေးအနက်ထား ပြောကြားခဲ့သည်။

တွေ့ဆုံပွဲသို့ ကိုရီးယား ဒီမိုကရက်တစ်ပါတီ၊ ပြန်လည်ထူထောင်ရေးပါတီ၊ အခြေခံဝင်ငွေပါတီ၊ ဆိုရှယ်ဒီမိုကရက်ပါတီတို့မှ လွှတ်တော်အမတ် ၁၀ ဦးခန့် တက်ရောက်ခဲ့ကြပြီး မြန်မာပြည်သူများ၏ ဒီမိုကရေစီတိုက်ပွဲကို ထောက်ခံကြောင်း ထုတ်ဖော်ပြောဆိုခဲ့ကြသည်။ အထူးသဖြင့် ဒီမိုကရက်တစ်ပါတီအမတ် အီယုန်ဆောန်က “ကိုရီးယားလည်း ပြီးခဲ့သည့်နှစ်က အာဏာသိမ်းမှုကို ပြည်သူနှင့်လွှတ်တော်စွမ်းအားဖြင့် နှိမ်နင်းနိုင်ခဲ့သလို မြန်မာပြည်သူများ၏ ဆက်လက်တိုက်ပွဲကို ဂုဏ်ယူမိသည်” ဟု ပြောဆိုခဲ့သည်။

ထွန်းထွန်းနောင် ကျားဖြန့်လိမ်လည်မှုကို “ကွင်းဆက်စီးပွားရေး” ဟု ခေါ်ပြီး စစ်တပ်တာဝန်လွှတ်

 

ဒီဇင် ၁၂

The Kaladan Post

အကြမ်းဖက်စစ်တပ်ခန့် ပြည်ထဲရေးဝန်ကြီး ဒုဗိုလ်ချုပ်ကြီး ထွန်းထွန်းနောင်က မြန်မာနိုင်ငံအတွင်း ကျားဖြန့်အွန်လိုင်းငွေလိမ်လည်မှုလုပ်ငန်းများကို “ကွင်းဆက်စီးပွားရေးလုပ်ငန်းများ” အဖြစ်သာ ရှုမြင်ရမည်ဟု ဒီဇင်ဘာ ၁၁ ရက်က နေပြည်တော်အစည်းအဝေးတွင် ပြောဆိုလိုက်သည်။ ထို့ပြင် ကျားဖြန့်စင်တာများရှိနေသော်လည်း အဓိကအကျိုးအမြတ်ရသူမှာ မြန်မာနိုင်ငံ မဟုတ်ဘဲ လိမ်လည်ငွေများလည်း မြန်မာဘဏ်စနစ်ထဲ မဝင်ကြောင်း၊ လူကုန်ကူးခံရသူအများစုမှာလည်း မြန်မာနိုင်ငံသား မဟုတ်ကြောင်း အလေးအနက် ဆိုသည်။

၎င်းက ကျားဖြန့်သားကောင်အများစုမှာ ထိုင်းနိုင်ငံ မဲဆောက်ဘက်မှ သောင်ရင်းမြစ်ကို တရားမဝင်ဖြတ်ကူး၍ မြဝတီသို့ ရောက်ရှိလာခြင်းဖြစ်ပြီး အဆိုပါနေရာများတွင် လိုအပ်သမျှ လျှပ်စစ်၊ အင်တာနက်၊ ဆောက်ပစ္စည်း၊ စားသောက်ကုန်များကိုပါ ထိုင်းဘက်မှတစ်ဆင့ တစ်ဆင့်သာ ရရှိအသုံးပြုကြောင်း ထုတ်ဖော်ပြောဆိုခဲ့သည်။ နယ်စပ်ဒေသအချို့တွင် တရားဥပဒေစိုးမိုးမှု ကင်းမဲ့နေသဖြင့် နိုင်ငံတကာရာဇဝတ်ဂိုဏ်းများနှင့် တိုင်းရင်းသားလက်နက်ကိုင်အဖွဲ့များ ပူးပေါင်းလုပ်ကိုင်နေခြင်းဖြစ်ကြောင်းလည်း ၎င်းက ဆိုသည်။

ဗိုလ်တင်ဝင်း BGF က ကျားဖြန့်တရုတ်သူဌေးတွေ ဒေါနတောင်ခြေကို အလျင်အမြန်ရွှေ့၊ အဆောက်အအုံအသစ် ၅၀ ကျော် နေ့ချင်းညချင်း ပေါ်လာ

 

ဒီဇင် ၁၂

The Kaladan Post

ကရင်ပြည်နယ် မြဝတီမြို့နယ် ဒေါနတောင်ခြေ သစ်ကတေ့နှင့် ဖားကလူးကျေးရွာပတ်ဝန်းကျင်တွင် စစ်တပ်လက်အောက်ခံ BGF ဗိုလ်တင်ဝင်းအဖွဲ့က ကျားဖြန့်အဆောက်အအုံအသစ်များကို ရက်ပိုင်းအတွင်း အရှိန်အဟုန်ဖြင့် ဆောက်လုပ်နေပြီး KK Park နှင့် ရွှေကုက္ကိုလ်မှ တရုတ်သူဌေးများ၊ နည်းပညာရှင်များ၊ ဆိုက်ခေါင်းဆောင်များကို အလုံးအရင်းဖြင့် ရွှေ့ပြောင်းနေရာချထားလျက်ရှိကြောင်း ကရင်စစ်ရေးသတင်းရင်းမြစ်များက အတည်ပြုသည်။ လက်ရှိတွင် အဆောက်အအုံအသစ် ၂၀ ကျော်ထပ်တိုးကာ စုစုပေါင်း ၅၀ ကျော်အထိ ရောက်ရှိနေပြီး ဆောက်လုပ်ရေးကို တရုတ်အလုပ်သမားများကပင် ဦးစီးလုပ်ကိုင်နေသည်။

ဗိုလ်တင်ဝင်းကိုယ်တိုင် ကြီးကြပ်ကာ BGF ကားများဖြင့် တရုတ်သူဌေးများကို ဖားကလူးသင်တန်းကျောင်းနှင့် ပတ်ဝန်းကျင်သို့ ခေါ်ဆောင်လာပြီး ကျားဖြန့်ရုံအသစ်များ၊ ကာရာအိုကေ၊ အနှိပ်ခန်းများပါ ဖွင့်လှစ်ပေးထားကြောင်း၊ ဆောက်ပစ္စည်းများကို စစ်တပ်ခွင့်ပြုချက်ဖြင့် ဘားအံဘက်မှ သယ်ယူနေရသဖြင့် စစ်တပ်ကိုယ်တိုင် ဤကျားဖြန့်လုပ်ငန်းများ ပြန်လည်ရပ်တည်ရေးတွင် တိုက်ရိုက်ပါဝင်ပတ်သက်နေကြောင်း သတင်းရင်းမြစ်များက ဆိုသည်။

ဖလမ်းထိုးစစ်ဆင်လာတဲ့ စစ်တပ်ကို ချင်းတပ်ပေါင်းစု ပြင်းပြင်းထန်ထန်ခုခံ၊ စစ်သား ၂၀ ကျော်သေဆုံး၊ လက်နက် ၃၀ နဲ့ သုံ့ပန်းများစွာ သိမ်း

 

ဒီဇင် ၁၂

The Kaladan Post

ချင်းပြည်နယ် ဖလမ်းမြို့သို့ ဒီဇင်ဘာ ၁၁ ရက် နံနက်က အင်အားအလုံးအရင်းနှင့် ထိုးစစ်ဆင်လာသော အကြမ်းဖက်စစ်တပ်ကို ချင်းတော်လှန်ရေးတပ်ပေါင်းစု (CB-CNA အပါအဝင်) က ညီညွတ်စွာ ခုခံတိုက်ခိုက်ရာ စစ်တပ်ဘက်မှ အနည်းဆုံး အရာရှိ၊ စစ်သား ၂၀ ကျော် သေဆုံးကာ လက်နက်ချေးအလက် ၃၀ ခန့်၊ ခဲယမ်းများစွာနှင့် စစ်သုံ့ပန်းအချို့ သိမ်းဆည်းရရှိခဲ့ကြောင်း ချင်းတော်လှန်ရေးတပ်ဖွဲ့များက အတည်ပြုသည်။ ချင်းဘက်တွင် ကျဆုံးသူ တစ်ဦးမျှ မရှိဘဲ အောင်ပွဲခံနိုင်ခဲ့သည်။

စစ်တပ်က အထိနာသဖြင့် တစ်နေ့လုံး တိုက်လေယာဉ်များဖြင့် ဗုံးကြဲတိုက်ခိုက်ခဲ့သော်လည်း ချင်းတပ်ပေါင်းစုက မြေပြင်တွင် ခိုင်မာစွာ ဆက်လက်ခုခံထားနိုင်ခဲ့ပြီး ဖလမ်းမြို့သို့ စစ်ကြောင်းအလုံးအရင်း မဝင်ရောက်နိုင်အောင် ပိတ်ဆို့ထားနိုင်ခဲ့ကြောင်း သိရသည်။

AA ကြေညာ။ မြောက်ဦးဆေးရုံ ဗုံးကြဲသတ်ဖြတ်မှုကို ကျူးလွန်သူ၊ စေခိုင်းသူ အားလုံးကို “ပြင်းထန်စွာ လက်တုံ့ပြန်မည်”

 

ဒီဇင် ၁၂

The Kaladan Post

ဒီဇင်ဘာ ၁၀ ညက မြောက်ဦးပြည်သူ့ဆေးရုံကြီးကို ဂျက်ဖိုက်တာဖြင့် ပေါင် ၅၀၀ ဗုံး ၂ လုံး တမင်ကြဲချခဲ့ရာ ဆေးရုံတစ်ခုလုံး နီးပါး ပြိုကျပျက်စီးကာ လူနာ ၃၃ ဦး (၃ လအရွယ်ကလေးငယ်ပါ) ပွဲချင်းပြီးသေဆုံး၊ လူနာ၊ ကျန်းမာရေးဝန်ထမ်း ၇၆ ဦး ဒဏ်ရာရရှိခဲ့သည့် ဖက်ဆစ်စစ်တပ်၏ ရက်စက်မှုကို အာရက္ခတပ်တော် AA က “အဆိုးဝါးဆုံး စစ်ရာဇဝတ်မှု” ဟု ဒီဇင်ဘာ ၁၁ ရက်တွင် ပြင်းပြင်းထန်ထန် ရှုတ်ချထုတ်ပြန်လိုက်သည်။

AA ထုတ်ပြန်ချက်တွင် ဤဗုံးကြဲသတ်ဖြတ်မှုတွင် တိုက်ရိုက်ကျူးလွန်သူ၊ အမိန့်ပေးစေခိုင်းသူ၊ ပါဝင်ပတ်သက်သူ အားလုံးကို ပြင်းထန်စွာ လက်တုံ့ပြန်သွားမည်ဟု ရှင်းရှင်းလင်းလင်း ကြေညာထားပြီး နိုင်ငံတကာအသိုင်းအဝိုင်းကို ဤလူသားမျိုးနွယ်အပေါ် ပြစ်မှုကြီးအတွက် အရေးယူပေးရန်လည်း တောင်းဆိုထားသည်။

လောင်းလုံး – ညင်းမော်တွင် စစ်ကြောင်းကို ကြားဖြတ်တိုက်၊ စစ်ခွေးအထိနာ၊ ဂျက်ဖိုက်တာနဲ့ ဗုံးကြဲလက်စားချေ၊ နေအိမ်များ မီးလောင်ပျက်စီး

 

ဒီဇင် ၁၂

The Kaladan Post

ဒီဇင်ဘာ ၁၁ ရက် နံနက်ပိုင်းက တနင်္သာရီတိုင်း လောင်းလုံးမြို့ပေါ်မှ ထွက်လာသော စစ်တပ်စစ်ကြောင်းကို တော်လှန်ရေးပူးပေါင်းတပ်များက ညင်းမော်ရွာအနီး ကြားဖြတ်တိုက်ခိုက်ရာ စစ်သားများ ထိခိုက်သေဆုံးမှု များပြားခဲ့ကြောင်း ဒေသစစ်ရေးသတင်းရင်းမြစ်များက အတည်ပြုသည်။ အထိနာသဖြင့် စစ်တပ်က ဂျက်ဖိုက်တာလေယာဉ်များနှင့် စစ်သင်္ဘောများ၊ ထားဝယ်အခြေစိုက်တပ်များမှ လက်နက်ကြီးများဖြင့် အကြိမ်ကြိမ် ဗုံးကြဲ၊ ပစ်ခတ်တိုက်ခိုက်ခဲ့သဖြင့် ညင်းမော်ရွာအတွင်း နေအိမ်များစွာ မီးလောင်ပျက်စီးခဲ့ရသည်။

တိုက်ပွဲသည် ညနေပိုင်းအထိ ပြင်းထန်ခဲ့ပြီး ညပိုင်းတွင်သာ ယာယီရပ်တန့်သွားသော်လည်း စစ်ကြောင်းမှာ လောင်းလုံးမြို့အနီးတဝိုက်တွင်ပင် ဆက်လက်ရှိနေဆဲဖြစ်ကာ စစ်ရေးအခြေအနေ ဆက်လက်တင်းမာနေဆဲဖြစ်သဖြင့် ဒေသခံပြည်သူများ အားလုံးနီးပါး တိမ်းရှောင်နေရဆဲ ဖြစ်သည်။

ရွှေရေကြည်သပိတ်စစ်ကြောင်း ယင်းမာပင်လမ်းပေါ် အောင်လံလွှင့်၊ စစ်တပ်အတုရွေးကောက်ပွဲကို ညနေသပိတ်နဲ့ ပြင်းပြင်းထန်ထန်ဆန့်ကျင်

 

ဒီဇင် ၁၂

The Kaladan Post

ဒီဇင်ဘာ ၁၁ ရက် ညနေပိုင်းက ယင်းမာပင်မြို့နယ်အတွင်း ရွှေရေကြည်သပိတ်စစ်ကြောင်းက အောင်လံနီလွှင့်ကာ လမ်းမထက်တွင် ချီတက်သပိတ်ဆင်နွှဲခဲ့ပြီး အကြမ်းဖက်စစ်တပ်ကျင်းပရန် ကြံစည်ထားသည့် အတုအယောင်ရွေးကောက်ပွဲကို လုံးဝလက်မခံကြောင်း အားကောင်းသည့် ဆန္ဒဖြင့် အော်ဟစ်ဆန္ဒပြခဲ့ကြောင်း ဒေသခံများက အတည်ပြုသည်။

ပြည်သူများက လက်ခုပ်တီး၊ အောင်ပွဲခံ အားပေးခဲ့သည့် ယခုညနေသပိတ်တွင် “စစ်အာဏာရှင်စနစ် အမြစ်ပြတ်ချေမှုန်း”၊ “အတုရွေးကောက်ပွဲ လုံးဝမလိုလား” စသည့် ကြွေးကြော်သံများ မြင့်တက်ခဲ့ပြီး စစ်တပ်၏ ရွေးကောက်ပွဲလိမ်လည်မှုကို ယင်းမာပင်ပြည်သူများက ရဲဝံ့စွာ ငြင်းပယ်လိုက်ကြောင်း သိရသည်။

စဉ့်ကူး – လက်ပန်လှရွာကို ဂျက်ဖိုက်တာ ၂ စီး ဗုံးကြဲ ၅ ကြိမ်၊ ပြည်သူ ၁ ဦးသေ၊ ၅ ဦးဒဏ်ရာရပြီး နေအိမ်များ မီးလောင်နေ

 

ဒီဇင် ၁၂

The Kaladan Post

ဒီဇင်ဘာ ၁၁ ရက် ညနေပိုင်းက မန္တလေးတိုင်း စဉ့်ကူးမြို့နယ် လက်ပန်လှရွာ ပြည်စိုးအောင်နှင့် ပင်လယ်ကြီးရပ်ကွက်များကို တံတားဦးလေတပ်မှ ဂျက်ဖိုက်တာ ၂ စီးက ဗုံးကြဲတိုက်ခိုက်မှု ၅ ကြိမ်အထိ ပြုလုပ်ခဲ့ရာ အပြစ်မဲ့ပြည်သူ ၁ ဦး ပွဲချင်းပြီးသေဆုံး၊ ၅ ဦး ဒဏ်ရာရရှိခဲ့ကာ နေအိမ်များစွာ မီးလောင်ပျက်စီးနေကြောင်း စဉ့်ကူးမြို့နယ် ပကဖ သတင်းတာဝန်ခံ ကိုသံမဏိက အတည်ပြုသည်။

ယခုလေကြောင်းတိုက်ခိုက်မှုသည် နိုဝင်ဘာ ၂၇ ရက်က စဉ့်ကူးမြို့နယ်အတွင်း စစ်ဘေးရှောင်စခန်းများနှင့် ကျေးရွာများကို ဗုံးကြဲခဲ့ရာ ပြည်သူ ၇ ဦးသေဆုံးခဲ့သည့် ဖြစ်စဉ်ပြီး ရက်ပိုင်းအတွင်း ဒုတိယအကြိမ်မြောက် ရက်စက်မှုဖြစ်လာခဲ့သည်။

၂၀၂၆ မှာ မြန်မာပြည်သူ ၁၂ သန်းကျော် ဆိုးဆိုးရွားရွား ဆာလောင်မွတ်သိပ်မှု ကြုံရနိုင်ဟု WFP သတိပေး

 

ဒီဇင် ၁၂

The Kaladan Post

ကမ္ဘာ့စားနပ်ရိက္ခာအစီအစဉ် (WFP) က ဒီဇင်ဘာ ၁၁ ရက်တွင် သတိပေးထုတ်ပြန်ရာ ၂၀၂၆ ခုနှစ်အတွင်း မြန်မာနိုင်ငံတွင် လူပေါင်း ၁၂ သန်းကျော်သည် လတ်တလော ဆာလောင်မွတ်သိပ်မှုကို ရင်ဆိုင်ရတော့မည်ဖြစ်ပြီး အနည်းဆုံး ၁ သန်းမှာ အသက်ကယ်ဆယ်ရေးအကူအညီ အရေးတကြီးလိုအပ်သည့် အရေးပေါ်အဆင့်သို့ ရောက်ရှိသွားနိုင်ကြောင်း ဆိုသည်။ ပဋိပက္ခပြင်းထန်လာမှု၊ စစ်ဘေးရှောင် ၄ သန်းအထိ မြင့်တက်လာနိုင်မှုတို့ကြောင့် လက်ရှိတွင်ပင် ကလေးငယ်နှင့် မိခင် ၄ သိန်းကျော် အာဟာရချို့တဲ့နေရသည့် ဝမ်းရေးအကျပ်အတည်းမှာ ပိုမိုဆိုးရွားလာတော့မည်ဟု သတိပေးထားသည်။

WFP မြန်မာဌာနေကိုယ်စားလှယ် Mr. Michael Dunford က “ဒါဟာ ကမ္ဘာပေါ်မှာ အဆိုးရွားဆုံး ဆာလောင်မွတ်သိပ်မှု အကျပ်အတည်းတွေထဲက တစ်ခုဖြစ်ပြီး ရန်ပုံငွေအနည်းဆုံး ရရှိနေတဲ့ အကျပ်အတည်းလည်း ဖြစ်နေပါတယ်” ဟု ပြောကာ လာမည့်နှစ်တွင် လူ ၁ ဒသမ ၃ သန်းကို ကူညီရန် အမေရိကန်ဒေါ်လာ ၁၂၅ သန်း အရေးတကြီး လိုအပ်နေကြောင်း နိုင်ငံတကာကို တိုက်တွန်းထားသည်။

ငါန်းဇွန် – လယ်ဝန်းကုန်းနဲ့ ညောင်ချင်းရွာမှာ စစ်ကြောင်း+တပ်စွဲရာ ဒရုန်းနဲ့ ၆၀မမ ဗုံးကြဲတိုက်၊ စစ်သား ၂ ဦးသေ၊ အများအပြား ထိခိုက်

 

ဒီဇင် ၁၂

The Kaladan Post

ဒီဇင်ဘာ ၄ ရက်နေ့က မန္တလေးတိုင်း ငါန်းဇွန်မြို့နယ်အတွင်း TGYR – Youth Guerrilla Counter Revolution -NZ နှင့် ညီနောင်မဟာမိတ် ပြောက်ကျား ၉၂၅ တပ်ဖွဲ့တို့ ပူးပေါင်းကာ ငါန်းဇွန်ကနေ အင်အား ၁၀၀ ခန့်ပါ ထွက်လာတဲ့ စစ်ကြောင်းကို လယ်ဝန်းကုန်းရွာအနီး ၆၀မမ ဗုံး ၃ လုံး၊ ဒရုန်းဗုံးများဖြင့် ကြားဖြတ်တိုက်ခိုက်ခဲ့ရာ စစ်သား အများအပြား ထိခိုက်ခဲ့ကြောင်း တာဝန်ရှိသူများက အတည်ပြုသည်။ ထို့နောက် ညောင်ချင်းရွာ စာသင်ကျောင်းအတွင်း တပ်စွဲထားသည့် စစ်သားများကိုလည်း ဒရုန်းဗုံးဖြင့် ထပ်မံတိုက်ခိုက်ခဲ့ရာ အနည်းဆုံး စစ်သား ၂ ဦး ပွဲချင်းပြီးသေဆုံးခဲ့သည်။

အထိနာသဖြင့် စစ်တပ်က မဂျီကျေးရွာအနီး တောင်ယာလုပ်နေသည့် ပြည်သူများရှိရာ နေရာကို ဒရုန်းဗုံးကြဲခဲ့သော်လည်း ပြည်သူဘက်တွင် ထိခိုက်မှုမရှိခဲ့ပေ။ တော်လှန်ရေးတပ်များ အထိအခိုက်မရှိ ပြန်ဆုတ်နိုင်ခဲ့ပြီး Fixed Wings Drone ၁ စီးသာ ဆုံးရှုံးခဲ့ကြောင်း သိရသည်။