နိုဝင် (၁၂) သတင်းတိုပေါင်းချုပ်

TNLA ဆုတ်ခွာမည့် မိုးမိတ်ရှိ ABSDF နှင့် PDF တို့ကို စစ်ရေးကူညီမည်ဟု KIO ပြော

နိုဝင် ၁၂
The Kaladan Post
ရှမ်းပြည်နယ်မြောက်ပိုင်း၊ မိုးမိတ်မြို့နယ်တွင် တအာင်း TNLA တပ်မတော်က ဆုတ်ခွာမည်ဖြစ် သဖြင့် ယင်းနေရာတွင် ရှိနေသည့် ABSDF နှင့် PDF တပ်ဖွဲ့များကို ကချင်လွတ်လပ်ရေး တပ်မ တော် (KIA) က စစ်ရေး ကူညီဆောင်ရွက်သွားမည်ဟု KIO အဖွဲ့၏ ပြောခွင့်ရ ဗိုလ်မှူးကြီး နော်ဘူ က ပြောကြားခဲ့သည်။ ဗိုလ်မှူးကြီး နော်ဘူ၏ အဆိုအရ မိုးမိတ်မြို့နယ်တွင် KIA တပ်ရင်း ၃၄ ရှိနေပြီး ABSDF၊ PDF တပ်ဖွဲ့များနှင့် ပူးပေါင်း အခြေချ နေထိုင်နေကြောင်း၊ မိုးမိတ်မြို့နှင့် ပတ်သက် ပြီး KIA အနေဖြင့် သီးခြား စစ်ဆင်ရေး ဆောင်ရွက်ရန် မရှိသော်လည်း မဟာမိတ်များ ဖြစ်သည့် ABSDF နှင့် PDF တို့၏ စစ်ရေး လှုပ်ရှားမှုများတွင် ကူညီပံ့ပိုး သွားမည်ဖြစ်ကြောင်း ရှင်းပြခဲ့သည်။ သူက မိုးမိတ်မြို့နယ်ထဲမှာ ကျနော်တို့ KIA တပ်ရင်း ၃၄ ရှိပြီး KIA PDF တပ်ပေါင်း စု အတူတကွ အခြေချထားကြောင်း မိုးမိတ်မြို့နဲ့ပတ်သက်လို့ သီးသန့် KIA ကတော့ ဘာမှ လုပ်ဖို့မရှိသော်လည်း မဟာမိတ်များဖြစ်ကြသော ABSDF နဲ့ PDF တွေကိုတော့ KIA ကူညီတာ မျိုးရှိနိုင်တယ် ဟု ပြောကြားခဲ့သည်။ တစ်ဖက်တွင်လည်း မိုးမိတ်ခရိုင်ပြည်သူ့ကာကွယ်ရေးအဖွဲ့က ယင်းခရိုင်အတွင်း ဖြစ်ပွားနေသော အခြေအနေများကို မည်သည့် အခက်အခဲနှင့် ရင်ဆိုင်ရစေကာမူ ပြည်သူများနှင့် တစ်သားတည်း ရပ်တည်မည်ဖြစ်ကြောင်း၊ စစ်ကောင်စီ လက်အောက်သို့ မကျ ရောက်စေရန်နှင့် တော်လှန်ရေး အောင်မြင်ရန် မဟာမိတ်များနှင့် ပူးပေါင်း ဆောင်ရွက်သွားမည်ဟု ကတိပြုထားသည်။ အဆိုပါ အခြေအနေ ဖြစ်ပွားရခြင်း၏ နောက်ခံမှာ တအာင်း TNLA က အောက်တိုဘာလ ၂၉ ရက်တွင် တရုတ်နိုင်ငံ၏ ကြားဝင်စေ့စပ်မှုဖြင့် စစ်ကောင်စီနှင့် အပစ်အခတ်ရပ်စဲရေး ရရှိခဲ့ပြီး မိုးကုတ်နှင့် မိုးမိတ်မြို့များမှ ဆုတ်ခွာမည်ဟု တရားဝင် ကြေညာခဲ့ခြင်း ဖြစ်သည်။ ဤဆုတ်ခွာမှုက ဒေသတွင်း စစ်ရေး ပဋိပက္ခများကို ပိုမို ရှုပ်ထွေးစေနိုင်သော်လည်း မဟာမိတ်တပ်ဖွဲ့များက ပူးပေါင်း ဆက်လက် ဆောင်ရွက်ရန် ရှိနေသည်။

ကြံ့ဖွတ်ပါတီ ဘူးလက်လှဆွေက သူပုန်များကို ဗုံးကျဲ အမြစ်ဖြုတ်မည်ဟု ကြွေးကြော်

နိုဝင် ၁၂
The Kaladan Post
နေပြည်တော်နယ်မြေ ကြံ့ဖွတ်ပါတီ ဥက္ကဋ္ဌ အမတ်လောင်း ဘူးလက်လှဆွေ (ဦးလှဆွေ) က အာရက္ခ တပ်တော် (AA) စစ်ဦးစီးချုပ် ဗိုလ်ချုပ်ထွန်းမြတ်နိုင် ရှိနေသည့်နေရာကို ဗုံးကျဲပြီး သူပုန်မှန်သမျှကို အပြတ်ချ အမြစ်ဖြုတ်ရမည်ဖြစ်ကြောင်း နိုဝင်ဘာလ ၁၀ ရက်နေ့တွင် ၎င်း၏ လူမှုကွန်ရက်စာမျက် နှာမှတစ်ဆင့် ကြွေးကြော်ပြောဆိုခဲ့သည်။ လက်ရှိအချိန်သည် ငြိမ်းချမ်းရေးဆွေးနွေးရမည့်အချိန် မဟုတ်တော့ဘဲ စကားပြောဆိုမှုများနေပြီဖြစ်ကြောင်း၊ သူပုန်များကို ဆွေးနွေးရန်မရှိဘဲ အပြတ် ချရန်သာ ရှိကြောင်း ရှင်းရှင်းလင်းလင်း ထုတ်ဖော်ခဲ့သည်။ ဘူးလက်လှဆွေ သည် ကြံ့ဖွတ်ပါတီ၏ ဗဟိုကော်မတီဝင်ဖြစ်ပြီး နေပြည်တော်ကောင်စီ နယ်မြေ ဥက္ကဋ္ဌ အဖြစ် တာဝန်ထမ်းဆောင်နေသူ ဖြစ်ကာ ပုဗ္ဗသီရိမြို့နယ် ပြည်သူ့လွှတ်တော်ကိုယ်စားလှယ်လောင်း အဖြစ်လည်း စာရင်းသွင်းထား သည်။ ထို့အပြင် နေပြည်တော်စစ်ရုံးက ရခိုင်ပြည်နယ်နှင့် ပလက်ဝမြို့နယ်အတွင်း ဗိုလ်ချုပ် ထွန်းမြတ်နိုင်၏ တည်နေရာနှင့် AA ရုံးဌာနချုပ်ကို စုံစမ်း ဖော်ထုတ်ရန် အောက်တိုဘာလ နှောင်းပိုင်းတွင် ရခိုင်ဒေသ စစ်ရေး အစည်းအဝေးများတွင် ညွှန်ကြားခဲ့သည်ဟု နေပြည်တော် စစ်ဘက် သတင်းရင်းမြစ်များထံ ဖော်ပြခဲ့သည်။ ဤပြောဆိုချက်သည် စစ်ကောင်စီ ပံ့ပိုးသည့် ပါတီနှင့် တိုင်းရင်းသား လက်နက်ကိုင်အဖွဲ့များအကြား တင်းမာမှုကို ပိုမို မြင့်တက်စေနိုင်ပြီး၊ ငြိမ်းချမ်းရေး လုပ်ငန်းစဉ်များ ရပ်တန့်နေချိန်တွင် စစ်ရေး ပဋိပက္ခများ ပြင်းထန်လာနိုင်မည်ကို ညွှန်ပြနေသည်။

AA က ရခိုင်နယ်စပ်တိုက်ပွဲများတွင် စစ်ကောင်စီတပ်ဖွဲ့ဝင် ၇၁ ဦး ဖမ်းဆီး

နိုဝင် ၁၂
The Kaladan Post
အာရက္ခတပ်တော် (AA) က ရခိုင်ပြည်နယ်နှင့် ပဲခူး၊ မကွေး၊ ဧရာဝတီတိုင်းများ အစပ်ဒေသများ တွင် ဖြစ်ပွားနေသော တိုက်ပွဲများအတွင်း စစ်ကောင်စီတပ်ဘက်မှ အလံဖြူထောင် အလင်းဝင်သူ၊ လက်ရဖမ်းဆီးရမိသူနှင့် ထွက်ပြေးလာသူ စုစုပေါင်း ၇၁ ဦးကို ဖမ်းဆီးရရှိထားကြောင်း ယမန်နေ့ ညပိုင်းတွင် သတင်းထုတ်ပြန်ခဲ့သည်။ AA ၏ ထုတ်ပြန်ချက်အရ ရခိုင်-ပဲခူး၊ ရခိုင်-မကွေး၊ ရခိုင်-ဧရာဝတီ နယ်စပ်များတွင် စစ်ကောင်စီ၏ ထိုးစစ်များကို ခုခံစစ်နှင့် တန်ပြန်ထိုးစစ်များဖြင့် အကောင်းဆုံး တုံ့ပြန်လျက်ရှိပြီး၊ အတင်းအဓမ္မ စစ်မှုထမ်းစုဆောင်းခံရသည့် တပ်ဖွဲ့ဝင်သစ်များ သည် တိုက်ခိုက်လိုစိတ် မရှိဘဲ နေ့စဉ် ထွက်ပြေးလျက်ရှိကြောင်း၊ အချို့က အလံဖြူထောင် လက်နက်ချ အလင်းဝင်လာကြပြီး အချို့ကို တိုက်ပွဲအတွင်း လက်ရဖမ်းဆီးရမိခဲ့ကြောင်း ဖော်ပြ ထားသည်။ နိုဝင်ဘာလ ၈ ရက်မှ ၁၀ ရက်အတွင်း ပဲခူးတိုင်း ပန်းတောင်းမြို့နယ် ကပစ ၁၆ အနီး တိုက်ပွဲများတွင် စစ်တပ်ဘက်မှ ၁၆ ဦး၊ ညောင်ကျိုးကျေးရွာ လေလာတောင်ပတ်ဝန်းကျင်တွင် ၁၀ ဦး အလံဖြူထောင်၊ တပ်ပြေး၊ လက်ရဖမ်းဆီးခံရခဲ့သည်။ နိုဝင်ဘာ ၉ ရက်တွင် ခမရ ၃၆၃ မှ စစ်သား ၄ ဦး လက်ရဖမ်းဆီးခံရပြီး၊ နိုဝင်ဘာ ၈ ရက်တွင် နတ်ရေကန်ဗျူဟာကုန်း အမှတ် ၉ စစ်မြေပြင်ဆေးတပ်ရင်းမှ တပ်ကြပ် မျိုးမင်းထွန်း အလင်းဝင်ရောက်ခဲ့ AA က ပြောဆိုသည်။ အောက်တိုဘာ ၃ ရက်မှ နိုဝင်ဘာ ၇ ရက်အတွင်း ဧရာဝတီတိုင်း သာပေါင်း၊ လေးမျက်နှာမြို့နယ် များတွင် စစ်သား ၂၀ ကျော် ထွက်ပြေးလာပြီး AA ထံ ဖမ်းဆီးခံရ၊ ၂၀ ကျော် လက်နက်ချ အလင်းဝင်ခဲ့ကြောင်း သိရသည်။ ဖမ်းဆီးရမိသူနှင့် အလင်းဝင်သူ အများစုမှာ ယခုနှစ်အတွင်း အတင်းအဓမ္မ စစ်မှုထမ်း ပေါ်တာဆွဲခံရသူများဖြစ်ပြီး အချို့မှာ အသက် ၁၈ နှစ် မပြည့်သေးသူ၊ အထက်တန်း ကျောင်းသားများ ပါဝင်ကြောင်း AA က ထုတ်ဖော်ခဲ့သည်။

ABSDF ရဲဘော်များ တိုက်ပွဲမှတ်တမ်း ရုပ်သံ ထုတ်ပြန်

နိုဝင် ၁၂
The Kaladan Post
မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး (ကျောင်းသားတပ်မတော် – ABSDF) က စစ်အာဏာရှင်စနစ်ကို တွန်းလှန်တိုက်ခိုက်နေသည့် ရဲဘော်များ၏ တိုက်ပွဲ မှတ်တမ်းရုပ်သံကို Column – 2 က နိုဝင်ဘာလ ၁၂ ရက်နေ့တွင် ထုတ်ပြန်ခဲ့သည်။ ၈၈၈၈ လူထုအရေးတော်ပုံကြီးမှ ပေါက်ဖွားလာခဲ့သည့် ABSDF သည် စစ်အာဏာရှင်ချုပ်ငြိမ်းရေး အတွက် လက်နက်ကိုင် တွန်းလှန်တိုက်ခိုက်ခဲ့ခြင်း နိုဝင်ဘာ ၁ ရက်နေ့တွင် ၃၇ နှစ်ပြည့်မြောက်ခဲ့ပြီး ဖြစ်ကြောင်း သိရသည်။ အညာဒေသအခြေစိုက် တပ်ရင်းတပ်ဖွဲ့များ သည် မဟာမိတ်များနှင့် စနစ်တကျ စုဖွဲ့နိုင်လာခြင်းကြောင့် စစ်ဆင်ရေးများကို အစအဆုံး စနစ်တကျ ဆောင်ရွက်နိုင်လာ ပြီဟု ABSDF Column – 3 မှ ရဲဘော် ပြည့်ဖြိုးကျော်က ယခင်က ပြောကြားခဲ့သည်။

ရန်ကုန်တော်လှန်ညီနောင် ၄ ဖွဲ့က Money Flow လှုပ်ရှားမှုဖြင့် စစ်တပ် ရွေးကောက်ပွဲ သပိတ်မှောက်ရန် ငွေ ၁၅ သိန်း ဖြန့်ဝေ

နိုဝင် ၁၂
The Kaladan Post
ရန်ကုန်တော်လှန်ညီနောင် ၄ ဖွဲ့က စစ်ကောင်စီ၏ ရွေးကောက်ပွဲကို ဆန့်ကျင်သည့် Money Flow လှုပ်ရှားမှုအဖြစ် စက်တင်ဘာ၊ အောက်တိုဘာ နှစ်လအတွင်း ငွေကျပ် ၁၅ သိန်းဖိုး ငွေစက္ကူများ တွင် ရွေးကောက်ပွဲ ဆန့်ကျင်ရေး စာသားများ ရေးသားဖြန့်ဝေခဲ့ကြောင်း ရန်ကုန်တော်လှန်ညီနောင် ၄ ဖွဲ့က အသိပေးထုတ်ပြန် ခဲ့သည်။ Money Flow လှုပ်ရှားမှုမှာ ပြည်သူများ အသုံးပြုနေသည့် ၅၀၀ တန်မှ ၅၀၀၀ တန်အထိ ငွေစက္ကူများပေါ်တွင် “No Vote”၊ “ဖက်ဆစ်ရွေးကောက်ပွဲကို တိုက်ဖျက် ကြ”၊ “ရွေးကောက်ပွဲ အတုလုပ်လည်း တော်လှန်ရေးက ဆက်ချမယ်”၊ “သေနတ်မိုးတဲ့ ရွေးကောက် ပွဲ ပြည်သူအားလုံး ဆန့်ကျင်နွှဲ”၊ “ဖက်ဆစ်ရွေးကောက်ပွဲ ထောက်ခံသူ ပြည်သူ့ရန်သူ” စသည့် စာသားများကို ရေးသားပြီး ပြည်သူအချင်းချင်း ဖြန့်ဝေအသုံးပြုရန် ရည်ရွယ်ခြင်း ဖြစ်ကြောင်းသိရ သည်။ အဆိုပါ ငွေစက္ကူများကို ပြည်သူမှ ပြည်သူသို့ ဆက်လက် ဖြန့်ဝေအသုံးပြုခြင်းဖြင့် အတုအယောင် ရွေးကောက်ပွဲ သပိတ်မှောက်ရေးကို ပူးပေါင်းပါဝင်ရန် ရန်ကုန်တော်လှန်ညီနောင် ၄ ဖွဲ့က တိုက်တွန်းထားသည်။ စစ်ကောင်စီက ရွေးကောက်ပွဲ ဆန့်ကျင်သူများကို ဖမ်းဆီးမည်ဟု ကြေညာထားသော်လည်း အဆိုပါ အဖွဲ့များက မြေပြင်တွင် လှုပ်ရှားနိုင်သမျှ ဆက်လက် ဆောင်ရွက်သွားမည်ဟု ပြောဆိုသည်။

တိုက်ပွဲ ပြင်းထန်နေချိန် မင်းအောင်လှိုင်က ကျောက်ဖြူ အထူးစီးပွားဇုန်ကို အရှိန်မြှင့်ရန် ဖိအားပေး

နိုဝင် ၁၂
The Kaladan Post
ရခိုင်ပြည်နယ် ကျောက်ဖြူမြို့နယ်တွင် အာရက္ခတပ်တော် (AA) နှင့် စစ်ကောင်စီတပ်တို့ကြား တိုက်ပွဲများ နေ့စဉ်နီးပါး ပြင်းထန်စွာ ဖြစ်ပွားနေသော်လည်း စစ်ကောင်စီသည် ကျောက်ဖြူ အထူးစီးပွားရေးဇုန်ကို ဆက်လက် အရှိန်မြှင့် အကောင်အထည်ဖော်ရန် ဝန်ကြီးဌာနများကို ဖိအားပေးနေကြောင်း သိရသည်။ နိုဝင်ဘာလ ၁၀ ရက်နေ့က နေပြည်တော်တွင် ကျင်းပခဲ့သည့် မြန်မာအထူးစီးပွားရေးဇုန်ဆိုင်ရာ ဗဟိုလုပ်ငန်းအဖွဲ့၏ ၂၀၂၅-၂၀၂၆ ဘဏ္ဍာနှစ် ဒုတိယအကြိမ် အစည်းအဝေးတွင် ကျောက်ဖြူ အထူးစီးပွားရေးဇုန်ကို အရှိန်မြှင့် ဆောင်ရွက်ရန် ဝန်ကြီးဌာနများ ကို ညွှန်ကြားခဲ့သည်။ ဗဟိုလုပ်ငန်းအဖွဲ့ ဥက္ကဋ္ဌ ဒေါက်တာကံဇော်က ကျောက်ဖြူ ရေနက်ဆိပ်ကမ်း စီမံကိန်းကို ဥပဒေ၊ နည်းဥပဒေ၊ လုပ်ထုံးလုပ်နည်းများနှင့်အညီ ဆက်လက် ဆောင်ရွက်ရမည်ဟု ပြောကြားခဲ့ပြီး ဒုတိယဥက္ကဋ္ဌ ဦးချစ်ဆွေက သက်ဆိုင်ရာ ဝန်ကြီးဌာနများ ပိုမို တိုးမြှင့် ဆောင်ရွက် ရန် ဖိအားပေးခဲ့ကြောင်းသိရသည်။ ကျောက်ဖြူမြို့နှင့် မိုင်အနည်းငယ်အကွာရှိ စစ်ကောင်စီ၏ အမှတ် ၃၂ ရဲတပ်ရင်းအနီးတွင် တိုက်ပွဲများ နေ့စဉ်နီးပါး ဖြစ်ပွားနေပြီး နှမ်းဖဲတောင်စခန်း၊ မင်းတပ်စခန်း၊ လိပ်ခမော်တပ်စခန်းတို့ကို AA က သိမ်းပိုက်ထားကာ အမှတ် ၃၂ ရဲတပ်ရင်းကို ဆက်လက် ထိုးစစ်ဆင် တိုက်ခိုက်နေကြောင်း စစ်ရေးသတင်းရင်းမြစ်များက ဆိုသည်။

မောတောင်မြို့ တိုက်ပွဲကြောင့် မြို့လုံးကျွတ်ပြည်သူ ထောင်ချီ ထိုင်း-မြန်မာ နယ်စပ်သို့ ထွက်ပြေး

နိုဝင် ၁၂
The Kaladan Post
တနင်္သာရီမြို့နယ် မောတောင်မြို့တွင် စစ်ကောင်စီတပ်နှင့် KNU ဦးဆောင်သော တော်လှန်ရေးတပ် များကြား နိုဝင်ဘာလ ၁၀ ရက်နေ့မှ စတင်၍ တိုက်ပွဲ အပြင်းအထန် ဖြစ်ပွားနေရာ မြို့လုံးကျွတ် ထောင်ချီသော ပြည်သူများ ထိုင်း-မြန်မာ နယ်စပ် ဒန်စီခွန်ဂိတ်အနီးသို့ ထွက်ပြေးတိမ်းရှောင်နေရ ကြောင်း ဒေသခံများက ပြောဆိုသည်။ နိုဝင်ဘာ ၁၁ ရက်နှင့် ၁၂ ရက်နေ့အထိ မြို့ပေါ်အထိ တိုက်ပွဲ ဆက်လက်ဖြစ်ပွားနေပြီး ခလရ ၂၂၄ မှ လက်နက်ကြီးများ နံနက် ၆ နာရီမှ စ၍ ဆက်တိုက် ပစ်ခတ် နေကြောင်း၊ စစ်တပ်က စစ်ဘေးရှောင်များထဲမှ အမျိုးသားများကို ပေါ်တာဆွဲနေကြောင်း စစ်ဘေး ရှောင်တစ်ဦးက ဆိုသည်။ ထိုင်းအာဏာပိုင်များက ဂိတ်ကို အနည်းငယ်ဖွင့်ပေးကာ လိုအပ်ချက်များ ကူညီပေးနေသည်ဟု သိရသည်။ ယနေ့ နံနက်ပိုင်းတွင်လည်း မြို့ပေါ်နှင့် ပတ်ဝန်းကျင်တွင် လက်နက်ကြီး၊ လက်နက်ငယ်များဖြင့် အပြန်အလှန် ပစ်ခတ်မှု ရှိနေပြီး စစ်ဘေးရှောင်များတွင် စားနပ်ရိက္ခာ၊ အနွေးထည်၊ ဆေးဝါးများ အရေးတကြီး လိုအပ်နေကြောင်းသိရသည်။ စစ်တပ်က နယ်စပ်စခန်းများမှ လက်နက်ကြီး ပစ်ခတ်မှုကြောင့် ဒေသခံများ ဆက်လက် ထွက်ပြေးနေရပြီး အတုအယောင် ရွေးကောက်ပွဲ ပြုလုပ်ရန်နှင့် ပြည်သူများတွင် အကြောက်တရား ဖန်တီးရန် ရည်ရွယ်ချက်ဖြင့် လေကြောင်း ဗုံးကြဲ၊ လက်နက်ကြီး ပစ်ခတ်မှုများ မကြာခဏ ဆောင်ရွက်နေကြောင်း KNU ထုတ်ပြန်ထားသည်။

စတင်းမြို့နယ်တွင် ရွေးကောက်ပွဲ ကျင့်ပနိုင်ရေး စစ်တပ်က လုံခြုံရေးတင်းကျပ်

နိုဝင် ၁၂
The Kaladan Post
မကွေးတိုင်း မင်းဘူးခရိုင် စလင်းမြို့နယ်တွင် စစ်ကောင်စီက အတုအယောင် ရွေးကောက်ပွဲ လုံခြုံရေးအတွက် ကျေးရွာများတွင် လက်နက်ကြီး၊ လက်နက်ငယ်များနှင့် ဂျမ်မာ အထိုင်ချ တပ်စွဲ၍ အင်အားဖြည့်တင်း လုံခြုံရေး တိုးမြှင့်နေကြောင်း ဒေသတွင်း သတင်းရင်းမြစ်များက ပြောဆိုသည်။ နိုဝင်ဘာ ၁၁ ရက်နေ့ နေ့လယ်ပိုင်းတွင် ကျွဲကျောင်းကျေးရွာသို့ အင်အား ၁၀၀ ပါ စစ်ကြောင်း ဖောကား ၂ စီး၊ ဟိုက်ဂျက် ၂ စီးဖြင့် ဖြည့်တင်း၍ ရွာအဝင်အထွက် ကားနှင့် ဆိုင်ကယ် များ ပိတ်ချခဲ့သည်။ နိုဝင်ဘာ ၈ ရက်ညက တောင်ကန်ကျေးရွာကို လက်နက်ကြီး ၃ လုံး ရမ်းသမ်းပစ်ခတ်ကာ နောက်နေ့ အင်အား ၅၀ ကျော်ဖြင့် ဝင်ရောက်စီးနင်း ပစ္စည်းများ ခိုးယူပြီး ဆုတ်ခွာခဲ့သည်။ မြို့အရှေ့ ကန်ဘောင်တွင် ဖောကား ၂ စီး၊ အင်အား ၃၀ ကျော်နှင့် လက်နက်ကြီး အထိုင်ချထားပြီး သရက်ချဥ်၊ ကန်တိုင်ကွေ့ စသည့် ကျေးရွာများတွင် အင်အား ၂၀ ကျော်စီ တပ်စွဲနေကြောင်း ပြည်သူ့ညီနောင်-စလင်း တာဝန်ရှိသူက ဆိုသည်။ အလယ်တန်း ကျောင်းများကို ပိတ်ခိုင်း၍ မူလတန်း ကျောင်းများတွင် စစ်တပ်၊ ပျူစောထီး၊ ရပ်ကွက်အုပ်ချုပ်ရေးမှူး၊ ဆရာ/မများ ပါဝင်သည့် မဲကော်မတီ အစည်းအဝေးများ ပြုလုပ်နေသည်။ အောက်တိုဘာလအတွင်း လူငယ် ၂၅ ဦး ပေါ်တာဆွဲ ဖမ်းဆီးခံရပြီး ငွေပေး၍ ၉ ဦး ပြန်လွတ်ခဲ့ကာ နိုဝင်ဘာ ၁၁ ရက်တွင် မန္တလေး ပြေးဆွဲ ဘကျော်ကားဂိတ်တွင် အမျိုးသား ၈ ဦး ဖမ်းဆီးခံရသည်။ ရွေးကောက်ပွဲ ကော်မရှင်ဝင် ဦးသက်ဝေထွန်း အောက်တိုဘာလက ဖမ်းဆီးခံရပြီး စစ်ကောင်စီက PDF လက်ချက်ဟု စွပ်စွဲထားသည်။

ဒေလီရဲက “Operation Clean Sweep”ဖြင့် ဗီဇာချိုးဖောက်သူ အာဖရိကန် ၂၆၀ ဦးဖမ်းဆီး

နိုဝင် ၁၂
The Kaladan Post
ဒေလီရဲတပ်ဖွဲ့က “Operation Clean Sweep” အကြီးစားစစ်ဆင်ရေးဖြင့် ဗီဇာသက်တမ်း ကုန်ဆုံးပြီး တရားမဝင်နေထိုင်သည့် အာဖရိကနိုင်ငံသား ၂၆၀ (အမျိုးသမီး ၄၈ ဦး ပါဝင်) ကို Dwarka၊ အနောက်ပိုင်းနှင့် အပြင်ပိုင်းခရိုင်များ (Western Range) တစ်လျှောက်တွင် တစ်ပြိုင်နက် ဖမ်းဆီးခဲ့သည်။ ရဲဝန်ထမ်း ၆၀၀ ကျော်ပါဝင်သည့် အဖွဲ့ ၃၁ ဖွဲ့က စနစ်တကျ စီးနင်းခဲ့ရာ ဖမ်းဆီးရမိသူအနက် ၁၈၃ ဦးမှာ ဗီဇာကုန်ဆုံးသူများဖြစ်ပြီး တစ်ဦးတွင် မူးယစ်ဆေး၊ တစ်ဦးမှာ ဖမ်းဝရမ်းရှိသူ (NBW) ဖြစ်ကြောင်း တွေ့ရှိရသည်။ ဖမ်းဆီးခံရသူ ၁၇၅ ဦးကို FRRO နှင့် သံရုံးများပူးပေါင်း၍ နိုင်ငံပြန်ပို့ရေး စတင်ထားပြီး အမှု ၂၆ ခု မှတ်ပုံတင်ထားသည်။ စာရွက်စာတမ်းမစစ်ဆေးဘဲ အိမ်ငှားပေးသည့် အိမ်ရှင် ၂၅ ဦးကိုလည်း အရေးယူမည်ဖြစ်ကြောင်းသိရသည်။
ရဲက အိမ်ရှင်များအား Form-II ဖြင့် ငှားရမ်းသူ အချက်အလက် မဖြစ်မနေ တင်ပြရန် သတိပေးထားပြီး ချိုးဖောက်ပါက ပြင်းထန်စွာ အရေးယူမည်ဟု ဆိုသည်။ “ဒီစစ်ဆင်ရေးက တစ်ကြိမ်တည်းမဟုတ်၊ ခရိုင်အားလုံးမှာ ပုံမှန်ဆက်လက်လုပ်ဆောင်မည်” ဟု ရဲအရာရှိက ပြောဆိုကြောင်း INDIA TODAY တွင် ဖော်ပြထားသည်။

ရွှေဘိုမြို့နယ်တွင် စစ်တပ် စခန်း အနီးကပ်တိုက်ခိုက်ခံရပြီး (၄)ဦးသေဆုံး

နိုဝင် ၁၂
The Kaladan Post
စစ်ကိုင်းတိုင်း၊ ရွှေဘိုခရိုင်၊ ရွှေဘိုမြို့နယ်တောင်ဘက် ရွှေဘို-မန္တလေးလမ်းပိုင်း၊ တဂဏန်းရွာထိပ် အနီးတွင် တပ်မ(၃၃)လက်အောက်ခံ စကစအင်အား (၂၀)ခန့် ဝပ်ကျင်းချ အထိုင်ချထားသည်ကို ရွှေဘိုမြို့နယ်ပြည်သူ့ကာကွယ်ရေးအဖွဲ့(ပကဖ)၊ မြို့နယ်(PDO)တိုက်ခိုက်ရေးတပ်ဖွဲ့၊ တိုကနယ် (၁၊၂၊၃၊၅)ပကဖတပ်များ၊ ဒီပဲယင်းမြို့နယ် ဂဠုန်မင်းပကဖနှင့် နယ်မြေခံပကဖများ ပူးပေါင်းကာ ၁၀-၁၁-၂၀၂၅ ရက် ညနေ ၄:၂၀ အချိန်တွင် အနီးကပ်ဝင်ရောက်တိုက်ခိုက်ခဲ့ရာ တိုက်ပွဲ (၁)နာရီနီးပါး ကြာမြင့်ခဲ့ကြောင်း ရွှေဘိုမြို့နယ် ပြည်သူ့ကာကွယ်ရေးတပ်ဖွဲ့က ထုတ်ပြန်သည်။ စကစများ အထိနာပြီး ရှားတောရွာဘက်သို့ ထွက်ပြေးသွားခဲ့သည်ကို ဒရုန်းမှတ်တမ်းဖြင့် အတည်ပြုနိုင် ခဲ့သည်။ ထို့နောက် တဂဏန်းရွာအတွင်း နယ်မြေရှင်းလင်းရေးလုပ်ဆောင်နေစဉ် ဘုန်းကြီးကျောင်း အတွင်း ကင်းပုန်းဝပ်နေသော စကစများနှင့် ထပ်မံထိတွေ့တိုက်ပွဲ ဖြစ်ပွားခဲ့သည်။ တိုက်ပွဲအတွင်း မုဒ်ပေါက်ရှိ စကစ၊ စကမ တပ်စွဲရာမှ ၆၀မမ၊ ၈၁မမ လက်နက်ကြီးများဖြင့် အကြိမ်ကြိမ်ပစ်ခတ် တိုက်ခိုက်ခဲ့ကြောင်း သိရသည်။ ရလဒ်အနေဖြင့် စကစဘက်မှ (၄)ဦးသေဆုံးခဲ့ပြီး ပကဖရဲဘော် (၁)ဦး မြင့်မြတ်စွာကျဆုံးခဲ့ကြောင်း ရွှေဘိုမြို့နယ်ပကဖက ထုတ်ပြန်သည်။ ယခင် ၆-၁၁-၂၀၂၅ ရက်ကလည်း အဆိုပါလမ်းပိုင်းတွင် ထိတွေ့တိုက်ပွဲဖြစ်ပွားခဲ့ရာ ပကဖရဲဘော် (၇)ဦး ကျဆုံးခဲ့ကြောင်း ထုတ်ပြန်ချက်တွင် ထည့်သွင်းဖော်ပြထားသည်။