နိုဝင် (၁၄) သတင်းတိုပေါင်းချုပ်

စစ်တပ် ရွေးကောက်ပွဲကို ပြတ်ပြတ်သားသား ဆန့်ကျင်သပိတ်မှောက်ရန် YRF တိုက်တွန်း

နိုဝင် ၁၄
The Kaladan Post
နိုဝင်ဘာလ ၁၃ ရက် ညပိုင်းတွင် ရန်ကုန်တော်လှန်ရေးတပ်ဦး (Yangon Revolution Force – YRF) က အကြမ်းဖက်စစ်ကောင်စီသည် နိုင်ငံရေးထွက်ပေါက်ဟူ၍ ကျင်းပရန် ကြံစည်နေသည့် အတု အယောင်ရွေးကောက်ပွဲကို ရန်ကုန်မြို့နေပြည်သူများ တစ်တည်းတည်း ဆန့်ကျင်သပိတ်မှောက် ကြရန် အသည်းအသန် စည်းရုံးလှုံ့ဆော်ခဲ့ကြောင်း ထုတ်ပြန်ခဲ့သည်။ YRF ထုတ်ပြန်ချက်တွင် မင်းအောင်လှိုင်ဦးဆောင်သည့် စစ်တပ်သည် ဖွံ့ဖြိုးတိုးတက်နေသော တိုင်းပြည်ကို အတင်းအဓမ္မ အာဏာသိမ်းယူပြီး ပြည်သူလူထု၏ ဘဝကို ရည်ရွယ်ချက်ရှိရှိ ကြပ်တည်းနိမ့်ပါးအောင် ဖန်တီးထား ခြင်းဖြစ်ကြောင်း၊ ထို့ကြောင့် စစ်အုပ်စုအား နိုင်ငံရေးထွက်ပေါက်တစ်စုံတစ်ရာ လုံးဝမပေးအပ်ရန် လိုအပ်ကြောင်း အလေးပေး ပြောဆိုသည်။ စစ်ကောင်စီ ကျင်းပရန် စီစဉ်နေသည့် ရွေးကောက်ပွဲ သည် ပြည်သူလူထုအတွက် စစ်မှန်သော နိုင်ငံရေးအဖြေမဟုတ်ဘဲ၊ စစ်အာဏာရှင်စနစ် သက်ဆိုး ရှည်ရန်အတွက် စစ်ကောင်စီသာ ရည်ရွယ်ဖန်တီးထားသည့် တရားမဲ့ နိုင်ငံရေးထွက်ပေါက်တစ်ခု သာဖြစ်ကြောင်း YRF က ရဲရဲဝံ့ဝံ့ ထုတ်ဖော်ရှုတ်ချထားသည်။ ပြည်သူလူထုအပေါ် မတရားဥပဒေ များ၊ ရက်စက်ကြမ်းကြုတ်သော ဖိနှိပ်မှုမျိုးစုံဖြင့် စစ်အာဏာရှင်စနစ် ဆက်လက်တည်တံ့စေရန် ကြိုးပမ်းနေသည့် ဤ တရားမဝင်ရွေးကောက်ပွဲသည် စစ်ကောင်စီအတွက်သာ နိုင်ငံရေးထွက် ပေါက်ဖြစ်သည်”ဟု YRF က ပြတ်သားစွာ အလေးပေးပြောဆိုထားသည်။

ဦးလွင်မြင့်ရဲ့ အရေးတော်ပုံ စကားလုံးသုံးနှုန်းမှုကို စစ်တပ်ချန်နယ်များက အရည်အချင်း မပြည့်မီဟု တိုက်ခိုက်

နိုဝင် ၁၄
The Kaladan Post
ဦးကိုကိုကြီး ဦးဆောင်သည့် ပြည်သူ့ပါတီ (People’s Party) မှ သင်္ဃန်းကျွန်းမြို့နယ် ပြည်သူ့လွှတ် တော်ကိုယ်စားလှယ်လောင်း၊ နိုင်ငံရေးအကျဥ်းသားဟောင်း ဦးလွင်မြင့်သည် မဲဆွယ်စည်းရုံးပွဲ တစ်ခုတွင် ၂၀၂၁ စစ်အာဏာသိမ်းပြီးနောက် ပြည်သူလူထု၏ ဆန့်ကျင်တော်လှန်မှုကို “အရေး တော်ပုံ” ဟု သုံးနှုန်းပြောဆိုခဲ့ရာ စစ်တပ်ထောက်ခံ တယ်လီဂရမ်ချန်နယ်များက ပြင်းပြင်းထန်ထန် ဝေဖန်ရှုတ်ချလျက်ရှိသည်။ ဦးလွင်မြင့်သည် သူ့မိသားစုမျိုးဆက် သုံးဆက်ဆက်တိုင်း နိုင်ငံရေး အကျဥ်းသားဖြစ်ခဲ့ကြောင်း၊ အဖေ ဦးသန်းသည် ကိုကိုးကျွန်းပြန်တစ်ဦးအဖြစ် မဆလအာဏာရှင် စနစ်ကို တွန်းလှန်ခဲ့သူ၊ သူကိုယ်တိုင်မှာ ၈၈ ကျောင်းသားခေါင်းဆောင်တစ်ဦးအဖြစ် ထောင်ကျခဲ့ သူ၊ သားဖြစ်သူမှာလည်း ၂၀၂၁ အရေးတော်ပုံတွင် ထောင်ကျပြီး မကြာသေးမီကမှ ပြန်လွတ်လာသူ ဖြစ်ကြောင်း ဂုဏ်ယူစွာ ပြောဆိုခဲ့သည်။ ထို့ပြင် ပြည်သူ့ပါတီသည် ၁၉၈၈ ဒီမိုကရေစီအရေးတော်ပုံ ကို ဦးဆောင်ခဲ့သည့် ကျောင်းသားခေါင်းဆောင်များ စုစည်းတည်ထောင်ထားသည့် ပါတီဖြစ်ကာ ခေတ်အဆက်ဆက် တော်လှန်ရေးလမ်းကြောင်းကို အစဉ်တစိုက် လျှောက်လှမ်းလာခဲ့သည့် ပါတီဖြစ်ကြောင်း အလေးပေး ထည့်သွင်းပြောကြားခဲ့သည်။ သို့သော် စစ်တပ်ထောက်ခံချန်နယ်များ ကမူ စစ်တပ်က ၂၀၂၀ ရွေးကောက်ပွဲ မဲမသမာမှုကြောင့် အာဏာရယူခဲ့ရခြင်းဖြစ်ပြီး၊ ၂၀၂၁ ပြည်သူ လူထု၏ ဆန့်ကျင်လှုပ်ရှားမှုများကို စစ်ကောင်စီက အကြမ်းဖက်မှုဟု တရားဝင်ကြေညာထားသည် ဖြစ်ရာ၊ ထိုဖြစ်ရပ်များကို “အရေးတော်ပုံ” သို့မဟုတ် “တော်လှန်ရေး” ဟု သုံးနှုန်းခြင်းသည် ဥပဒေ နှင့်မညီညွတ်သလို လွှတ်တော်ကိုယ်စားလှယ်လောင်း အရည်အချင်းသတ်မှတ်ချက်နှင့်လည်း ကိုက်ညီမှုမရှိကြောင်း ပြင်းထန်စွာ စွပ်စွဲတိုက်ခိုက်လျက်ရှိသည်။

တရုတ်-ကချင်နယ်စပ်ဂိတ် ၇ ခု ကုန်သွယ်ရေးပြန်ဖွင့်မှု KIO နဲ့ ညှိနှိုင်းမှု လုံးဝမရှိဟု ဗိုလ်မှူးကြီး နော်ဘူ ပြော

နိုဝင် ၁၄
The Kaladan Post
အောက်တိုဘာ ၂၅ ရက်နေ့မှ စတင်၍ တရုတ်နိုင်ငံက ကချင်ပြည်နယ်နယ်စပ်ရှိ မန်ဝိုင်းကြီး၊ လွယ်ဂျယ်၊ မိုင်ဂျာယန်၊ လိုင်ဇာ၊ ကန်ပိုက်တီ၊ ပန်ဝါ နှင့် ဖီမော် စသည့် နယ်စပ်ဂိတ် ၇ ခုကို တစ်ဖက်သတ် ပြန်လည်ဖွင့်လှစ်လိုက်ပြီး ကုန်သွယ်ရေး တစ်စိတ်တစ်ပိုင်း ပြန်လည်စီးဆင်းလာပြီ ဖြစ်ကြောင်း KIO/KIA ပြောရေးဆိုခွင့်ရှိသူ ဗိုလ်မှူးကြီး နော်ဘူက ပြောဆိုသည်။ တရုတ်ဘက် ပြန်ဖွင့်တာပါ KIO/KIA နဲ့ ညှိနှိုင်းတာ လုံးဝမရှိပါဘူးဟု ဗိုလ်မှူးကြီး နော်ဘူက ပြတ်သားစွာ ရှင်းလင်းပြောကြားခဲ့သည်။ ၂၀၂၄ နှစ်ကုန်ပိုင်းတွင် KIA က တရုတ်-မြန်မာ နယ်စပ်မြို့များနှင့် ဂိတ်အချို့ကို ထိန်းချုပ်သိမ်းပိုက်ခဲ့ပြီးနောက် တရုတ်ဘက်က တစ်ဖက်သတ် ဂိတ်အားလုံးနီးပါး ပိတ်ပစ်ခဲ့ရာမှ ယခုအခါ တစ်ဖက်သတ်ပင် ပြန်ဖွင့်လှစ်လာခြင်း ဖြစ်သည်။ လက်ရှိတွင် စားနပ်ရိ က္ခာ၊ ဆေးဝါး နှင့် လူသုံးကုန်ပစ္စည်းများ တင်သွင်းခွင့်ရှိသော်လည်း တရုတ်ဘက်က ကန့်သတ်ချက် များ ဆက်လက်ချမှတ်ထားဆဲ ဖြစ်ကြောင်း KIA သတင်းရင်းမြစ်များက ဆိုသည်။

ခမရ ၄၂၇ မှ စစ်မှုထမ်းသစ် စိုးထက်ကျော် ဒရုန်းဂန်း-၁ လက်နှင့်အတူ အလင်းဝင်

နိုဝင် ၁၄
The Kaladan Post
နိုဝင်ဘာလ ၇ ရက်နေ့တွင် ကရင်နီပြည်၊ ဒီးမော့ဆိုမြို့နယ် ခမရ ၄၂၇ တပ်ရင်းမှ စစ်မှုထမ်းအပတ် စဉ် ၄ တပ်သားသစ် စိုးထက်ကျော် (မကွေးတိုင်းဇာတိ) သည် ဒရုန်းဂန်း ၁ လက်၊ ၆၀ မမ ဗုံးသီး ၂ လုံး၊ MA-11 ကျည်ဘောက် ၂ ဘောက်၊ ၅.၅၆ ကျည် ၅၀ တောင့်၊ ဆက်သွယ်ရေးစက် ၂ လုံး စသည့် လက်နက်ခဲယမ်းများ ယူဆောင်လျက် နေပြည်တော်-ပြည်သူ့ကာကွယ်ရေးအဖွဲ့ (ပကဖ) ထံ အလင်းဝင်ရောက်ခဲ့ကြောင်း တပ်ဖွဲ့က ထုတ်ပြန်သည်။ စိုးထက်ကျော်သည် မကွေးမြို့ပေါ်တွင် ဖုန်းဝယ်ရန်ထွက်ခွင့်ရစဉ် အရပ်သားအသွင် ကားပေါ်ဆွဲတင်ခံရပြီး စစ်မှုထမ်းအဖြစ် အတင်းအဓမ္မ စုဆောင်းခံခဲ့ရသူဖြစ်ကာ တောင်တွင်းကြီး စစ်မှုထမ်းလေ့ကျင့်ရေးကျောင်း အပတ်စဉ် ၇ မှ တက် ရောက်ခဲ့သူ ဖြစ်ကြောင်း နေပြည်တော်-ပြည်သူ့ကာကွယ်ရေးအဖွဲ့ တိုင်းတာဝန်ခံ ကိုနောင်ချိုက ပြောဆိုသည်။ အလင်းဝင်လာသူကို ဂုဏ်ပြုဆုငွေ ချီးမြှင့်ဖို့ ကာကွယ်ရေးဝန်ကြီးဌာနကို တင်ပြဆောင်ရွက်သွားမည် ဟု ကိုနောင်ချိုက ပြောဆိုသည်။ လက်ရှိအချိန်ထိ နေပြည်တော်-ပကဖ ထံသို့ အလင်းဝင်၊ ဘက်ပြောင်းလာသည့် စစ်ကောင်စီတပ်သား စုစုပေါင်း ၉ ဦး ရှိပြီဖြစ်ကာ စစ်တပ်အတွင်း ကျန်ရှိနေသေးသည့် တပ်သားများကို အာဏာရှင်အကျိုးစီးပွားအတွက် ဆက်လက် အသုံးချခံနေခြင်းမှ အမြန်ဆုံး လွတ်မြောက်ကာ ပြည်သူ့ဘက်သို့ ပြန်လည်ပူးပေါင်းကြရန် နေပြည်တော်-ပြည်သူ့ကာကွယ်ရေးအဖွဲ့ က တိုက်တွန်းထားသည်။

မောတောင်မြို့ တော်လှန်ရေးတပ်များ အပြည့်အဝသိမ်းပိုက် ထိုင်းနယ်စပ်သို့စစ်တပ် ထွက်ပြေး

နိုဝင် ၁၄
The Kaladan Post
နိုဝင်ဘာလ ၁၄ ရက် ယနေ့နံနက်အစောပိုင်းတွင် တနင်္သာရီတိုင်း၊ မောတောင်မြို့ကို KNLA ဦးဆောင်သည့် တော်လှန်ရေးပူးပေါင်းတပ်များက နောက်ဆုံးကျန်ရှိနေသော စစ်ကောင်စီ တပ် စခန်းကုန်းကို တိုက်ခိုက်သိမ်းပိုက်ပြီး မြို့တစ်မြို့လုံးကို အပြည့်အဝ ထိန်းချုပ်နိုင်ခဲ့ပြီဖြစ်ကြောင်း တော်လှန်ရေးသတင်းရင်းမြစ်များက ပြောဆိုသည်။ လပေါင်းများစွာ ပိတ်ဆို့ထားခဲ့သည့် မောတောင်မြို့ကို နိုဝင်ဘာလ ၁၁ ရက်နေ့မှ စတင်၍ အပြီးသတ်ထိုးစစ်ဆင်တိုက်ခိုက်ခဲ့ရာ ယနေ့နံနက်တွင် အပြီးသတ်အောင်ပွဲခံနိုင်ခဲ့ခြင်းဖြစ်ကြောင်းသိရသည်။ စစ်ကောင်စီတပ်သားများ အလံဖြူထောင်ကာ စစ်ကားကြီး ၃ စီးဖြင့် လက်နက်၊ ရိက္ခာများအပါအဝင် ထိုင်းနယ်စပ်ဘက်သို့ ထွက်ပြေးခဲ့ကြသည် ဟု သတင်းရင်းမြစ်က ပြောဆိုသည်။ ထိုင်းအာဏာပိုင်များက လက်နက်များ ကို သိမ်းဆည်းထား ပြီး တပ်သားများကိုလက်ခံ ထားသည်ဟု ဖော်ပြထားသည်။ လက်ရှိတွင် တော်လှန်ရေးတပ်များက မြို့အတွင်း နယ်မြေရှင်းလင်းရေးဆောင်ရွက်လျက်ရှိသော်လည်း စစ်ကောင်စီ၏ လေကြောင်းတိုက်ခိုက်မှု အန္တရာယ်ကြောင့် ဆက်လက်သတိထားနေရဆဲဖြစ်သည်။ တိုက်ပွဲကြောင့် မောတောင်မြို့နှင့် ပတ်ဝန်းကျင်မှ ပြည်သူ ၃၀၀၀ နီးပါးခန့် ထိုင်း-မြန်မာနယ်စပ်တွင် စစ်ဘေးရှောင်ရောက်ရှိနေပြီး သက်ကြီးရွယ်အိုများ၊ ကလေးငယ်များ၊ ကိုယ်ဝန်ဆောင်မိခင်များ အများအပြား ပါဝင်ကြသည်။

မြင်းခြံ ဆုံရွာပျူစခန်း လက်နက်ကြီးနဲ့ တိုက်ခိုက်ခံရ၊ စစ်တပ်ဘက် သေဆုံးမှုရှိ

နိုဝင် ၁၄
The Kaladan Post
မန္တလေးတိုင်း၊ မြင်းခြံမြို့နယ်၊ ဆုံရွာရှိ ပျူစောထီးကင်းစခန်းကို နိုဝင်ဘာလ ၁၀ ရက် နေ့လယ်ပိုင်း က Zin Yaw Ni Sniper Packing Guerrilla Forces လက်အောက်ခံ Zin Yaw Ni လက်နက်ကြီး တပ်ဖွဲ့က ၆၀ မမ လက်နက်ကြီးများဖြင့် တိုက်ခိုက်ခဲ့ရာ စခန်းအတွင်း တိုက်ရိုက်ထိမှန်ပြီး စစ်ကောင်စီတပ်သားများ ထိခိုက်သေဆုံးမှု ရှိခဲ့ကြောင်း အဆိုပါတပ်ဖွဲ့က ထုတ်ပြန်သည်။ တိုက်ခိုက်ခံရပြီးနောက် တပ်ကူအဖြစ်ရောက်ရှိလာသည့် စစ်ကောင်စီစစ်ကြောင်းက ဒရုန်းဖြင့် ဗုံးကြဲချခြင်းနှင့် လက်နက်ကြီး၊ လက်နက်ငယ်များဖြင့် ရမ်းသမ်းပစ်ခတ်ခဲ့သော်လည်း တိုက်ခိုက်ရေးရဲဘော်များ အထိအခိုက်မရှိ ဘေးလွတ်ရာသို့ ပြန်လည်ဆုတ်ခွာနိုင်ခဲ့ကြောင်း သိရသည်။

ရန်ကုန်-မန္တလေး အမြန်လမ်း “လေးက” ဂိတ်စခန်း တိုက်ခိုက်ခံရပြီး စစ်သား ၂ ဦး သေဆုံး

နိုဝင် ၁၄
The Kaladan Post
နေပြည်တော် တပ်ကုန်းမြို့နယ်တွင်း ရန်ကုန်-မန္တလေးအမြန်လမ်း ၂၃၉ မိုင်ရှိ “လေးက”တံတားဂိတ် စခန်းကို နိုဝင်ဘာလ ၁၁ ရက် ညပိုင်းက PDF – Tatkon Battalion 803 တပ်ဖွဲ့ဝင်များက ပြောက် ကျားဝင်ရောက်တိုက်ခိုက်ခဲ့ရာ စစ်ကောင်စီတပ်သား ၂ ဦး ကျဆုံးပြီး ဗိုလ်အဆင့်ရှိသူ ၁ ဦး ထိခိုက် ဒဏ်ရာရရှိကာ ဆေးရုံတင်ထားရကြောင်း တပ်ဖွဲ့တာဝန်ရှိသူက ပြောဆိုသည်။ နာရီဝက်ခန့်ကြာ ပစ်ခတ်မှုအတွင်း အင်အား ၁၅ ဦးခန့်သာ ရှိသည့် ဂိတ်စခန်းငယ်ကို တိုက်ခိုက်ခဲ့ခြင်းဖြစ်ပြီး တပ်ဖွဲ့ဝင်များ အထိအခိုက်မရှိ ဘေးလွတ်ရာသို့ ပြန်လည်ဆုတ်ခွာနိုင်ခဲ့ကြောင်းသိရသည်။ တိုက်ခိုက်ခံရမှုအပြီး စစ်ကောင်စီတပ်က ဂိတ်အနောက်ဘက်ကျေးရွာများသို့ စစ်ကြောင်းထိုး ဝင်ရောက်နေသဖြင့် ဒေသခံပြည်သူများ စစ်ရေးသတိဖြင့် သွားလာနေထိုင်ကြရန် တပ်ဖွဲ့က သတိပေးထားသည်။ “နေပြည်တော်တိုင်းစစ်ဌာနချုပ်တပ်များအနေဖြင့် နေပြည်တော် ပတ်ဝန်း ကျင်ကို ပြောက်ကျားတိုက်ခိုက်ရေး အမြဲကြိုးစားသွားမည် ဟု PDF – Tatkon Battalion 803 တာဝန်ရှိသူက ပြောဆိုသည်။

မင်းအောင်လှိုင်က ထောင်ချောက်အတုရွေးကောက်ပွဲကို “လမ်းကြောင်းအမှန်” ဟု ချီးကျူး

နိုဝင် ၁၄
The Kaladan Post
နေပြည်တော်၊ နိုဝင်ဘာ ၁၄၊ ၂၀၂၅ – အာဏာသိမ်းစစ်ခေါင်းဆောင် မင်းအောင်လှိုင်က ယနေ့ ကျရောက်သည့် (၁၀၅) နှစ်မြောက် အမျိုးသားအောင်ပွဲနေ့ သဝဏ်လွှာတွင် စစ်တပ်ကျင်းပမည့် အတုအယောင် ပါတီစုံဒီမိုကရေစီ ရွေးကောက်ပွဲသည် “မြန်မာနိုင်ငံ၏ လျှောက်လှမ်းရမည့် လမ်းကြောင်းအမှန်” ဖြစ်ကြောင်း ပြောဆိုလိုက်သည်။ သဝဏ်လွှာတွင် မင်းအောင်လှိုင်က “ပြည်သူလူထုတရပ်လုံး လိုလားတောင့်တသည့် ပါတီစုံဒီမိုကရေစီစနစ် အောင်မြင်စွာ လျှောက်လှမ်းနိုင်ရေးအတွက် ပါတီစုံဒီမိုကရေစီ အထွေထွေရွေးကောက်ပွဲများကို မကြာမီ စတင်ကျင်းပတော့မည် ဟု ပြောဆိုသည်။ ရွေးကောက်ပွဲလုပ်ငန်းစဥ်သည်သာ မိမိတို့ လျှောက်လှမ်းရမည့် လမ်းကြောင်းအမှန်ဖြစ်တဲ့အတွက် ပြည်သူလူထု၏ ပူးပေါင်းပါဝင်မှုဖြင့် အောင်မြင်အောင် ဝိုင်းဝန်းဆောင်ရွက်ပေးကြရန် ထည့်သွင်း ဖော်ပြထားသည်။ ထို့ပြင် စစ်တပ်က နိုင်ငံအနှံ့ စာသင်ကျောင်းများကို ရည်ရွယ်ချက်ရှိရှိ လေကြောင်းတိုက်ခိုက်မှုများ ပြုလုပ်နေသည့် ကြားမှ သဝဏ်လွှာတွင် ပညာရေးမြှင့်တင်ရေးကို အလေးထား ဖော်ပြထားရာ နိုင်ငံတစ်နိုင်ငံ တည်ငြိမ်အေးချမ်းရေးနှင့် စဥ်ဆက်မပြတ် ဖွံ့ဖြိုးတိုးတက်ရေးအတွက် ပြည်သူတစ်ဦးချင်းစီ၏ အသိပညာ အတတ်ပညာ၊ အတွေးအခေါ်၊ ဗဟုသုတပြည့်ဝစေခြင်းဖြင့် အမျိုးသားပညာရေးကို မြှင့်တင်‌ပေးရမည်ဟု ပြောဆိုသည်။ အထူးသဖြင့် ဒီမိုကရေစီစနစ်သို့ ကူးပြောင်းနေသည့် ယနေ့ကာလတွင် တိုင်းရင်းသားပြည်သူများအနေဖြင့် အရာရာကို စဥ်းစားတွေးခေါ်ကာ အမှားအမှန်ကို ခွဲခြားသိရှိပြီး နိုင်ငံနှင့်လူမျိုးကို သယ်ပိုးဆောင်ရွက်ရန် အ‌ရေးကြီးပါသည်ဟု ဆိုထားသည်။ သို့သော် အာဏာသိမ်းစစ်ကောင်စီ၏ ရွေးကောက်ပွဲအစီအစဥ်ကို တော်လှန်ရေးအင်အားစုများနှင့် ပြည်သူအများစုက တရားမဝင် ထောင်ချောက်အဖြစ် ရှုမြင်ထားပြီး ပါဝင်ရန် ငြင်းဆိုထားကြသည်။

စစ်တပ် အတုရွေးကောက်ပွဲ မကျင်းပနိုင်ရေး အစွမ်းကုန် တားဆီးမည်ဟု ဒီးမော့ဆို PDF ပြောဆို

နိုဝင် ၁၄
The Kaladan Post
ပြည်သူ့ကာကွယ်ရေးတပ် ဒီးမော့ဆို (DMO Local PDF) က စစ်ကောင်စီ၏ တရားမဝင် အတုအ ယောင် ရွေးကောက်ပွဲ မကျင်းပနိုင်ရေးအတွက် ကရင်နီပြည်နယ်အတွင်း တော်လှန်ရေးအင်အားစု များနှင့်အတူ ကိုယ်စွမ်းဉာဏ်စွမ်းရှိသမျှ တားဆီး ခုခံတိုက်ခိုက်သွားမည်ဟု ယနေ့ ထုတ်ပြန်လိုက် သည်။ စစ်ကောင်စီတပ်သည် လာမည့် ဒီဇင်ဘာ၊ ဇန်နဝါရီလများအတွင်း အတုရွေးကောက်ပွဲ ကျင်းပနိုင်ရေး အတင်းအကြပ် လုပ်ဆောင်နေပြီး တော်လှန်ရေးထိန်းချုပ်နယ်မြေများကို အင်အားအများအပြားဖြင့် ထိုးစစ်ဆင် တိုက်ခိုက်လျက်ရှိသည်။ ထို့အပြင် အရပ်သားနေအိမ်များ၊ စာသင်ကျောင်းများ၊ ဘုရားကျောင်းများနှင့် လူစည်ကားရာ နေရာများကို ရည်ရွယ်ချက်ရှိရှိ လေကြောင်းတိုက်ခိုက်မှုများ ပြုလုပ်နေကြောင်း ထုတ်ပြန်ချက်တွင် ဖော်ပြထားသည်။ DMO Local PDF က ကရင်နီပြည်နယ်အတွင်း စစ်ကောင်စီ အုပ်ချုပ်ရေးနယ်မြေ မရရှိစေရေးနှင့် ရွေးကောက်ပွဲ မကျင်းပနိုင်ရေး အခြားတော်လှန်ရေးတပ်များနှင့် ပူးပေါင်း၍ ပြင်းပြင်းထန်ထန် ဆောင်ရွက်မည်ဟု အလေးပေး ကြေညာထားသည်။ ထို့ပြင် ရွေးကောက်ပွဲအတွက် ပူးပေါင်း ပါဝင်သူများ၊ မဲဆွယ်စည်းရုံးသူများ၊ ဖိအားပေး အကြပ်ကိုင်သူများနှင့် သွေးဆောင်ဖြားယောင်း သူများကို ပြင်းပြင်းထန်ထန် အရေးယူဆောင်ရွက်မည်ဟု သတိပေးထားသည်။ နိုင်ငံအနှံ့ ပြည်သူများအနေဖြင့်လည်း အတုရွေးကောက်ပွဲတွင် ပါဝင်ခြင်း မပြုကြရန် တိုက်တွန်း နှိုးဆော်ထားသည်။

ကြံ့ဖွံ့ ဥက္ကဋ္ဌ ဦးခင်ရီ ဇေယျာသီရိတွင် မဲဆွယ်ပွဲ ကျင်းပပြီး နိုင်ရမည်ဟု ကြွေးကြော်

နိုဝင် ၁၄
The Kaladan Post
ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီ (ပြည်ခိုင်ဖြိုး) ဥက္ကဋ္ဌ ဦးခင်ရီက နိုဝင်ဘာ ၁၃ ရက် နံနက်ပိုင်းတွင် ဇေယျာသီရိမြို့နယ်၊ အောင်သာကျေးရွာ၌ မိဘပြည်သူများနှင့် တွေ့ဆုံ မဲဆွယ်ပွဲ ကျင်းပခဲ့ကြောင်း ကြံ့ဖွံ့ ပါတီက ထုတ်ပြန်သည်။ တွေ့ဆုံပွဲတွင် ဦးခင်ရီက ကိုယ်စားလှယ်လောင်း မိတ်ဆက်စကား ပြောကြားပြီး ပါတီဖြစ်တည်လာမှု သမိုင်း၊ ဖွဲ့စည်းပုံ၊ လက်ရှိဆောင်ရွက်ချက်များ၊ လာမည့် ဒီဇင်ဘာ ရွေးကောက်ပွဲ ဆက်စပ်ကိစ္စများ၊ ပါတီ ရွေးကောက်ပွဲ ကြေညာစာတမ်း၊ မဲမပျက်မကွက်ပေးရေး၊ မဲပေးပုံ နည်းစနစ်များနှင့် ပြည်ခိုင်ဖြိုးပါတီကို ရွေးချယ်သင့်သည့် အချက်များကို အကျယ်တဝင့် ရှင်းလင်း ပြောကြားခဲ့သည်ဟု ဖော်ပြထားသည်။ ထို့နောက် တက်ရောက်လာသည့် ပြည်သူများ တင်ပြသည့် ဒေသဖွံ့ဖြိုးရေး လိုအပ်ချက်များကို ပြန်လည်ဆွေးနွေးရှင်းလင်း၍ မဲပေးစက်ဖြင့် ဆန္ဒမဲ ပေးပုံကို လက်တွေ့ သရုပ်ပြခဲ့ပြီး ပွဲကို “ပြည်ခိုင်ဖြိုးပါတီ နိုင်ရမည်” ကြွေးကြော်သံများဖြင့် ရုတ်သိမ်းခဲ့ကြောင်း ကြံ့ဖွံ့ပါတီက ပြောဆိုသည်။