နိုဝင် (၁၇) သတင်းတိုပေါင်းချုပ်

ဗန်းမောက်တွင် စစ်တပ်နှင့် SNA ပူးပေါင်းစစ်ကြောင်း တိုက်ခိုက်ခံရပြီး အသေခံဒရုန်း ၃ စင်း သိမ်းစည်းခံရ

နိုဝင် ၁၇
The Kaladan Post
စစ်ကိုင်းတိုင်း၊ ကသာခရိုင်၊ ဗန်းမောက်မြို့နယ်တွင် နိုဝင်ဘာ ၁၅ ရက် မနက်ပိုင်းက အကြမ်းဖက် စစ်တပ်က Y12 လေယာဉ်ဖြင့် ဗုံးသီး ၆၀ နီးပါး ကြဲချတိုက်ခိုက်ခဲ့ပြီး၊ စစ်တပ်လက်ဝေခံ SNA တပ်များက အသေခံဒရုန်းများအသုံးပြု၍ နတ်လစခန်းကုန်းအနီးအထိ တိုးကပ်လာရာ ထိတွေ့ တိုက်ပွဲ ဖြစ်ပွားခဲ့ကြောင်း ဗန်းမောက်မြို့နယ် ပြည်သူ့အုပ်ချုပ်ရေးအဖွဲ့က ထုတ်ပြန်သည်။ ကသာ ခရိုင်တပ်ရင်း (၄) အပါအဝင် PDF တပ်ရင်းများနှင့် ပြည်သူ့ကာကွယ်ရေးအဖွဲ့ (ပကဖ) များက ခုခံတိုက်ခိုက်ရာ စစ်အုပ်စုဘက်တွင် ထိခိုက်သေဆုံးမှုများ ရှိခဲ့ပြီး၊ အသေခံဒရုန်း ၃ စင်းကို တော်လှန်ရေးတပ်များ သိမ်းဆည်းရရှိခဲ့ကြောင်းသိရသည်။ ကသာခရိုင်တပ်ရင်း (၄) တာဝန်ရှိသူက ဒရုန်းတွေရတာဟာ မကွဲလို့ရရှိတာပါ ဟု ပြောဆိုသည်။ ဗန်းမောက်မြို့ကို အမှတ်(၁) စစ်ဒေသကွပ်ကဲမှုက စက်တင်ဘာ ၂၀ ရက်က သိမ်းပိုက်ခဲ့ပြီးနောက် SNA နှင့် စစ်တပ်က ပြန်လည်ထိုးစစ်ဆင်လာသဖြင့် တိုက်ပွဲများ ဆက်လက်ဖြစ်ပွားနေခြင်း ဖြစ်သည်။

ရေစကြိုမြို့နယ်တွင် စစ်ကော်မရှင်တပ်သား ဟိန်းထက်လင်း လက်နက်နှင့်အတူ အလင်းဝင်

နိုဝင် ၁၇
The Kaladan Post
မကွေးတိုင်း၊ ရေစကြိုမြို့နယ်တွင် နိုဝင်ဘာ ၁၅ ရက် ည ၇ နာရီလောက်က စစ်ကော်မရှင်တပ် ခလရ ၂၅၆ မှ တပ်သား ဟိန်းထက်လင်း တစ်ဦးက အရက်မူးနေသော တပ်ကြပ်ကြီး၏ MA3 သေနတ်ကို ယူဆောင်ကာ ပြည်သူ့ကာကွယ်ရေး တပ်ဖွဲ့ (ပကဖ) ထံ အလင်းဝင်ရောက်ခဲ့ရာ ဂုဏ်ပြုငွေ ကျပ်သိန်း ၅၀ ချီးမြှင့်ခံရကာ တော်လှန်ရေး တပ်ဖွဲ့နှင့်အတူ စစ်တပ်ကို ပြန်လည် တိုက်ခိုက်ရန် ဆုံးဖြတ်ခဲ့သည်ဟု ရေစကြိုမြို့နယ် ပြည်သူ့ကာကွယ်ရေးတပ်ဖွဲ့ တာဝန်ရှိသူက ပြောဆိုသည်။ လုံခြုံရေး ဂိတ်တွင် ညကင်း စောင့်ကြည့်နေချိန်က အလင်းဝင်ရောက်ခဲ့သော ဟိန်းထက်လင်းသည် တပ်ကြပ်ကြီး၏ သေနတ်ကို ယူဆောင်လာခဲ့ပြီး ပကဖ ရေစကြိုမြို့နယ် တာဝန်ရှိသူက ကျနော်တို့ဆီ ဆက်သွယ်လာတာ ၁ လ လောက်ရှိပြီဖြစ် အခု အကျိုး ကြောင်း တိုက်ဆိုင်လို့ ဆက်သွယ်ပြီး ထွက်လာတာ ဟု ဆိုသည်။ ဟိန်းထက်လင်းသည် ယခင်က စစ်ကော်မရှင်လက်အောက်တွင် တာဝန်မထမ်း ဆောင်လိုသဖြင့် ထွက်ပြေး ဖူးခဲ့သော်လည်း ချိတ်ဆက်မှု မရှိသောကြောင့် ပြန်လည် ဖမ်းဆီး ခံရပြီး အချုပ်ချ ခံခဲ့ရဖူးကြောင်း သိရသည်။ ယခုတစ်ကြိမ်တွင် နေရပ်ဇာတိကို မပြန်ဘဲ တော်လှန်ရေး တပ်ဖွဲ့နှင့် ပူးပေါင်း ဆောင်ရွက်ရန် ဆုံးဖြတ်ခဲ့သည်ဟု ပကဖ တာဝန်ရှိသူက ဆက်ပြောဆိုသည်။ ရေစကြိုမြို့နယ် ပကဖ ထံ စစ်ကော်မရှင်တပ်သားနှင့် ပျူစောထီး ပေါင်း အယောက် ၇၀ ဝန်းကျင် အလင်းဝင်ရောက်ခဲ့ ပြီဖြစ်ကာ စစ်ကောင်စီ တပ်များ၏ မတရားမှုများကြောင့် အလင်း ဝင်ရောက်မှု ဆက်လက်ရှိ နေနိုင်ဟု ဆိုပါသည်။

ပြည်သူ့ပါတီ ဦးလွင်မြင့် နွေဦးတော်လှန်ရေး ထည့်ပြောဆိုမှုဖြင့် ကော်မရှင်က အရေးယူမည်ဟု ထုတ်ပြန်

နိုဝင် ၁၇
The Kaladan Post
ကိုကိုကြီး ဦးဆောင်သော ပြည်သူ့ပါတီ (PP) မှ သင်္ဃန်းကျွန်းမြို့နယ် ပြည်သူ့လွှတ်တော် ကိုယ်စား လှယ်လောင်း ဦးလွင်မြင့်က မဲဆွယ်စည်းရုံးရေးတွင် ၂၀၂၁ စစ်အာဏာသိမ်းမှုကို အရေးတော်ပုံ၊ နွေဦးတော်လှန်ရေး ဟု သုံးနှုန်းဖော်ပြခဲ့သလို သူ့သားက ထိုတော်လှန်ရေးတွင် ပါဝင်ခဲ့ပြီး မကြာ သေးမီက ထောင်မှ လွတ်မြောက်ခဲ့ကြောင်း၊ နိုင်ငံရေးအကျဉ်းသားများကို ငွေကြေး၊ ထောင်ဝင်စာ ကူညီခဲ့ကြောင်း ပြောဆိုခဲ့သဖြင့် စစ်တပ်လက်အောက်ခံ ရွေးကောက်ပွဲကော်မရှင်က ဥပဒေနှင့် မညီဟု ဆုံးဖြတ်ကာ အရေးယူမည်ဟု ထုတ်ပြန်ခဲ့သည်။ နိုင်ငံရေးအကျဉ်းသားဟောင်း ဦးလွင်မြင့် က မဲဆွယ်ရာတွင် သူ၊ သူ့အဖေ ဦးသန်း (ကိုကိုးကျွန်းပြန်) နှင့် သူ့သား မျိုးဆက် ၃ ဆက် နိုင်ငံရေး အကျဉ်းသားများ ဖြစ်ခဲ့ကြောင်း၊ မဆလ အာဏာရှင်စနစ်မှသည် ၈၈ အရေးအခင်း၊ ၂၀၂၁ နွေဦး တော်လှန်ရေးအထိ ဆန့်ကျင်ခဲ့ကြောင်း ပြောဆိုခဲ့သည်။ “ကျနော်တို့ဟာ ပြည်သူအတွက်ကို ထောင် ပဲကျကျ တန်းပဲကျကျဆိုတဲ့ နိုင်ငံရေးအကျဉ်းသားဟောင်းတစ်ဦး ဖြစ်တယ်ဆိုတဲ့အကြောင်း၊ ကျနော်တို့ဟာ ယုံယုံကြည်ကြည်ပဲ ပြည်သူတွေအတွက် အာမခံချက် ပေးနိုင်ပါတယ်” ဟု ဦးလွင်မြင့်က ဆိုသည်။ စစ်တပ်ထောက်ခံ တယ်လီဂရန်ချန်နယ်များက ဦးလွင်မြင့်၏ မဲဆွယ်ရုပ်သံ ကို ဖော်ပြပြီးနောက် ကော်မရှင်က တရားစွဲဆိုရန် သက်ဆိုင်ရာ အဖွဲ့အစည်းများကို ညွှန်ကြားကာ ရွေးကောက်ပွဲ ဥပဒေဖြင့်ပါ ဆက်လက် အရေးယူမည်ဟု ထုတ်ပြန်ခဲ့သည်။ ပြည်သူ့ပါတီက စစ်တပ်ပြုလုပ်မည့် ၂၀၂၅ ရွေးကောက်ပွဲတွင် ကိုယ်စားလှယ်လောင်း ၅၁၂ ဦး ဝင်ရောက်ယှဉ်ပြိုင်မည် ဖြစ်သည်။

နာဂကိုယ်ပိုင်အုပ်ချုပ်ခွင့်ရဒေသ ပန်ဆောင်မြို့နယ်စပ်တွင် အိန္ဒိယ တစ်ဖက်သတ် ခြံစည်းရိုးကာ ရန် ပြင်ဆင်မှု ဒေသခံများ ကန့်ကွက်

နိုဝင် ၁၇
The Kaladan Post
နာဂကိုယ်ပိုင်အုပ်ချုပ်ခွင့်ရဒေသ၊ နမ့်ယွန်းမြို့နယ်အတွင်း ပန်ဆောင်မြို့နယ်စပ်တွင် မြန်မာ-အိန္ဒိယ နယ်စပ်ကျောက်တိုင် အမှတ် ၁၇၃ နှင့် ၁၇၂ အကြား အိန္ဒိယဘက်က နိုဝင်ဘာလ ဆန်းပိုင်းမှ စတင်၍ မြေထိုးစက်နှင့် ဘက်ဟိုးများဖြင့် ရှင်းလင်းရေး လုပ်ဆောင်ကာ ခြံစည်းရိုးကာ ရန် ပြင်ဆင်နေမှုကို ဒေသခံများက ကန့်ကွက်နေကြကြောင်း သတင်းရင်းမြစ်က ပြောဆိုသည်။ အရင်က ဒေသခံအချင်းချင်း အဆင်ပြေပြေ သွားလာနေကြတဲ့ နေရာတွေ အခု မြန်မာနိုင်ငံဘက်မှာ နိုင်ငံရေး မတည်မငြိမ် ဖြစ်နေတဲ့ အနေအထားမျိုးမှာ ခြံစည်းရိုးကာ ဖို့ မလုပ်သင့်ဟု ပန်ဆောင်မြို့ခံ တစ်ဦးက ပြောသည်။ အရပ်ဖက်အဖွဲ့များက ဆွေးနွေးနေဆဲ ဖြစ်ပြီး မကြာမီ ထုတ်ပြန်ချက်များ ထုတ်ပြန်ကာ တရားဝင် ကန့်ကွက်ဖြစ်ကြောင်း သတင်းရင်းမြစ်က ဖော်ပြသည်။ မြန်မာ-အိန္ဒိယ နယ်စပ် စုစုပေါင်း ၁၀၂၁ မိုင်ခန့် ရှိရာ တမူးမြို့နယ်တွင်လည်း မေလက အိန္ဒိယက မြန်မာနိုင်နက် အတွင်း တိုးကာ ခဲ့ရာ PDF များက တားဆီးခဲ့ရသည်။ NUG က နှစ်နိုင်ငံ နယ်ခြား ညှိနှိုင်းမှု မပြီးပြတ်မီ တစ်ဖက်သတ် ရပ်ဆိုင်းရန် တောင်းဆိုထားသော်လည်း အိန္ဒိယ အစိုးရက စစ်ကောင်စီ ကို အကာအကွယ်ပေးနေပြီး ပြည်သူဆန္ဒကို လစ်လျူရှုထားသည်ဟု နယ်စပ်ဒေသ မြန်မာများနှင့် အိန္ဒိယရောက် အရပ်ဖက်အဖွဲ့များက ရှုတ်ချထားသည်။ ယခင် ဇူလိုင် ၁၃ ရက်က နန်းယွန်းမြို့နယ် တွင် အိန္ဒိယ စစ်တပ်က ဒရုန်းဖြင့် ဗုံးကြဲခဲ့ရာ နေအိမ်များ ပျက်စီး၊ အောက်တိုဘာ ၂၀ ရက်က လဟယ်မြို့နယ် ကမ်မော်လောရီ ကျေးရွာတွင် ကလေး တစ်ဦး အပါအဝင် အရပ်သား ၂ ဦး သေဆုံး၊ ၄ ဦး ဒဏ်ရာရ ခဲ့သည်။ ထို့အပြင် စစ်တပ်က ကသည်း လက်နက်ကိုင်များကို လေရှီးမြို့ နယ် ဆွမ္မရာသို့ နိုဝင်ဘာဆန်းက ပို့ဆောင်ခဲ့ရာ ဒေသခံများ ကန့်ကွက်နေသည်။ “နာဂက ဝေးလံ ခေါင်ဖျားဒေသ ဖြစ်ပြီး သတင်းတွေ မထွက်တဲ့အခါ မြေပြင်မှာ အခြေအနေ ရှုပ်ထွေးနေတယ် ဟု ဒေသခံ လူငယ် တစ်ဦးက ဆိုသည်။

မောတောင်မြို့ကို ပြန်သိမ်းရန် စစ်တပ် လေကြောင်း၊ မြေပြင် အင်အားအပြည့်သုံး ထိုးစစ်ဆင်

နိုဝင် ၁၇
The Kaladan Post
တနင်္သာရီတိုင်း၊ တနင်္သာရီမြို့နယ်ရှိ မြန်မာ-ထိုင်းနယ်စပ်ကုန်သွယ်ရေးမြို့ မောတောင်ကို KNU တပ်မဟာ(၄) ဦးဆောင်သော တော်လှန်ရေးပူးပေါင်းတပ်ဖွဲ့များက နိုဝင်ဘာ ၁၄ ရက်နေ့တွင် အပြည့်အဝသိမ်းပိုက်ရရှိခဲ့ပြီးနောက် စစ်ကောင်စီတပ်က မြို့ကို ပြန်လည်ထိန်းချုပ်ရန် အင်အား အလုံးအရင်းဖြင့် ပြန်လည်ထိုးစစ်ဆင်လျက်ရှိကြောင်း သတင်းရင်းမြစ်က ပြောဆိုသည်။ နိုဝင်ဘာ ၁၅ ရက်နေ့မှစ၍ စစ်ကောင်စီတပ်သည် ရဟတ်ယာဉ်များဖြင့် သိန်ခွန်းအနီး သဲဖြူရွာတွင် စစ်သည် ၁၀၀ ကျော်ချထားပြီး သူးလေပလောရွာကို ဂျက်တိုက်လေယာဉ်၊ Y-12 အမျိုးအစားလေယာဉ်များ ဖြင့် တစ်နေ့လုံး အကြိမ်ရေမနည်း ဗုံးကြဲတိုက်ခိုက်ခဲ့ကြောင်း ဒေသစစ်ရေးသတင်းရင်းမြစ်များက အတည်ပြုသည်။ ဗုံးကြဲခံရမှုများကြောင့် တော်လှန်ရေးတပ်ဖွဲ့ဝင်များ ထိခိုက်ကျဆုံးမှု မရှိသေး ကြောင်းသိရသည်။ လေကြောင်းမှ စစ်ကူလာရောက်သည့် စစ်ကောင်စီတပ်သားအချို့ တော်လှန်ရေးတပ်ဖွဲ့များထံ လက်နက်ချ အလင်းဝင်မှုမျှလည်း ရှိနေသည်။ မောတောင်မြို့သည် ၁၉၉၀ ခုနှစ်တွင် စစ်တပ်က သိမ်းပိုက်ခဲ့သည့် KNU ၏ ယခင်ဌာနချုပ်နယ်မြေဖြစ်ပြီး ယခုအခါ ၃၅ နှစ်အကြာ တော်လှန်ရေးတပ်များက ပြန်လည်သိမ်းပိုက်ရရှိထားသည့် မဟာဗျူဟာမြို့တစ်ခုဖြစ် သည်။ တော်လှန်ရေးတပ်ဖွဲ့များဘက်ကလည်း မောတောင်မြို့ကို စစ်ကောင်စီ ပြန်လည်ထိန်းချုပ်ခွင့်မပေးရန် နည်းလမ်းပေါင်းစုံဖြင့် ခုခံကာကွယ်သွားမည်ဟု စစ်ရေးသတင်းရင်းမြစ်များက ဆိုသည်။

ပေါက်ခေါင်းမြို့နယ်တွင် ကင်းပတ်လာသော စစ်တပ် တိုက်ခိုက်ခံရပြီး စစ်သား ၃ ဦးသေဆုံး

နိုဝင် ၁၇
The Kaladan Post
ပဲခူးတိုင်း၊ ပေါက်ခေါင်းမြို့နယ်၊ တည်ပင်ကျေးရွာအခြေစိုက် စစ်ကောင်စီတပ်မှ ဆိုင်ကယ် ၅ စီးနှင့် ကင်းပတ်ထွက်လာသည့် စစ်သား ၉ ဦးကို တော်လှန်ရေးပူးပေါင်းတပ်ဖွဲ့များက နိုဝင်ဘာ ၇ ရက် ညနေ ၆ နာရီခန့်တွင် တညီပင်-သိုက်ချောင်းကျေးရွာကြား ကင်းပုန်းဝပ်၍ မိုင်းဆွဲ လက်နက်ငယ် များဖြင့် တိုက်ခိုက်ခဲ့ရာ စစ်ကောင်စီတပ်သား ၃ ဦးသေဆုံး၊ ၂ ဦး ဒဏ်ရာရရှိခဲ့ကြောင်း တပ်ရင်း ၃၆၀၁ က ထုတ်ပြန်သည်။ တိုက်ခိုက်မှုကို ဗျူဟာ ၂၁ ကွပ်ကဲမှုအောက်ရှိ တပ်ရင်း ၃၆၀၁၊ တပ်ခွဲ ၅ က လုပ်ဆောင်ခဲ့ခြင်းဖြစ်ပြီး ဆိုင်ကယ် ၂ စီး၊ ကျည်ဘောက် ၁ ခု၊ ခဲယမ်းအချို့ သိမ်းဆည်းရရှိခဲ့ ကြောင်းသိရသည်။ တော်လှန်ရေးရဲဘော်များ အထိအခိုက်မရှိ ဘေးလွတ်ရာသို့ ပြန်လည်ဆုတ်ခွာ နိုင်ခဲ့သည်ဟု တပ်ရင်း ၃၆၀၁ စစ်ထောက်လှမ်းရေးတာဝန်ခံ ရဲဘော် Shadow က အတည်ပြုပြောဆိုသည်။

တနင်္သာရီမြို့နယ်တွင် ခမရ ၅၅၇ တပ်သား မောင်ဇုန်း MA1 သေနတ်နှင့် အလင်းဝင်

နိုဝင် ၁၇
The Kaladan Post
တနင်္သာရီတိုင်း၊ မြိတ်ခရိုင်၊ အောက်ကင်းရွာအခြေစိုက် ခမရ ၅၅၇ တပ်ရင်းမှ တပ်သား မောင်ဇုန်း (စစ်ကိုင်းတိုင်း၊ ဟုမ္မလင်းမြို့နယ်ဇာတိ) သည် နိုဝင်ဘာ ၁၇ ရက်နေ့တွင် သမုတ်ချုံးရွာအနီး စစ်ကြောင်းထွက်စဉ် ထွက်ပြေးကာ MA1 သေနတ် ၁ လက်၊ ကျည်ဘောက် ၅ ခု၊ ကျည် ၂၂၀ တောင့်တို့နှင့်အတူ တနင်္သာရီမြို့နယ် ပြည်သူ့ကာကွယ်ရေးတပ်ဖွဲ့ (ပကဖ) ထံ အလင်းဝင်ရောက် ခဲ့ကြောင်း တပ်ဖွဲ့က ထုတ်ပြန်သည်။ တပ်သား မောင်ဇုန်းသည် ယခင်က ရှမ်းနီတပ်ဖွဲ့၏ ပေါ်တာဆွဲဖမ်းဆီးခံရပြီး စစ်ကောင်စီတပ်ထံ လွှဲပြောင်းပေးခံရကာ အတင်းအဓမ္မ စစ်သင်တန်းများ တက်ရောက်ခဲ့ရသူ ဖြစ်သည်။ အလင်းဝင်ပြီးနောက် တော်လှန်ရေးတပ်ဖွဲ့များနှင့်အတူ စစ်ကောင်စီ တပ်ကို ပြန်လည်တိုက်ခိုက်သွားမည်ဟု ဆုံးဖြတ်ထားကြောင်း တနင်္သာရီမြို့နယ် ပကဖ က ပြောဆိုသည်။ တနင်္သာရီမြို့နယ် ပကဖက အလင်းဝင်တပ်သားအား ကနဦး ငွေကျပ် သိန်း ၂၀ ချီးမြှင့်ထားပြီး ကာကွယ်ရေးဝန်ကြီးဌာန (MOD) မှ ထပ်မံချီးမြှင့်ငွေ ရရှိပါက ဆက်လက်ပေးအပ်သွားမည်ဖြစ်ကြောင်း သိရသည်။ အလားတူ စစ်မှုထမ်းဥပဒေဖြင့် အတင်းအဓမ္မ စုဆောင်းခံထားရသည့် စစ်သားများ၊ ရဲများ၊ ပြည်သူ့ဘက်ရပ်တည်လိုသူများအား တနင်္သာရီမြို့နယ် ပကဖ နှင့် မဟာမိတ်ပူးပေါင်းတပ်ဖွဲ့များထံ ဆက်သွယ်၍ အလင်းဝင်ရောက်ရန် အသိပေးတိုက်တွန်းထားသည်။

စစ်ကိုင်း-မုံရွာလမ်းပိုင်း၌ ပြည်သူငွေညှစ်ပြီးပြန်လာသော ထွေ/အုပ်စာရေးအပါအဝင် စစ်သား ၇ ဦး သေဆုံး

နိုဝင် ၁၇
The Kaladan Post
အောက်တိုဘာ ၂၈ ရက် ညပိုင်းက စစ်ကိုင်းမြို့နယ်၊ ကံတလူတိုးဂိတ်မှ ပြည်သူများထံ ဖမ်းဆီး ငွေညှစ်ယူပြီး ပြန်လာသည့် ထွေအုပ်စာရေး ကျော်ရဲလွင်နှင့် အပေါင်းအပါ စစ်သားများ စီးနင်း လာသော ကားကို စစ်ကိုင်းတက္ကသိုလ်အနီး စစ်ကိုင်း-မုံရွာလမ်းပိုင်းတွင် လင်းယုန်ညီနောင် ပြောက်ကျားတပ်ဖွဲ့က ရဲရဲဝံ့ဝံ့ ပစ်ခတ်တိုက်ခိုက်ခဲ့ရာ ထွေအုပ်စာရေး ကျော်ရဲလွင်အပါအဝင် စစ်သား ၇ ဦး အပြင်းအထန်ဒဏ်ရာရရှိပြီး အလောင်းသာကျန်ရှိခဲ့ကြောင်း တပ်ဖွဲ့က ယနေ့ (နိုဝင်ဘာ ၁၇ ရက်) ထုတ်ပြန်သည်။ တိုက်ခိုက်မှုအပြီး စစ်ကိုင်းတက္ကသိုလ်နှင့် တပ်မ၃၃ မှ တပ်ကူများ ရောက်ရှိလာသဖြင့် ရဲဘော်များက ကားအား လက်နက်ခဲယမ်းများ သိမ်းဆည်း ရှင်းလင်းပြီး စနစ်တကျ ပြန်လည်ဆုတ်ခွာနိုင်ခဲ့ကြောင်း သိရသည်။