နိုဝင် (၁၉) ရက် သတင်းတိုပေါင်းချုပ်

အမေရိကန်၏ ကျားဖြန့်-လိမ်လည်မှု တိုက်ဖျက်ရေးနောက်ကွယ်တွင် “လျှို့ဝှက်ရည်ရွယ်ချက်” ရှိနေသည်ဟု ဇော်မင်းထွန်း ပြောဆို

နိုဝင် ၁၉
The Kaladan Post
နိုဝင်ဘာလ ၁၉ ရက်နေ့တွင် စစ်ကောင်စီပြောရေးဆိုခွင့်ရှိသူ ဗိုလ်ချုပ်ဇော်မင်းထွန်းက စစ်တပ် ထိန်းချုပ်ထားသော သတင်းစာများမှတစ်ဆင့် အမေရိကန်ပြည်ထောင်စု၏ အွန်လိုင်းကျားဖြန့် လိမ်လည်မှုနှင့် အွန်လိုင်းလောင်းကစားတိုက်ဖျက်ရေးလှုပ်ရှားမှုများသည် မြန်မာနိုင်ငံအပေါ် “နက်နဲလျှို့ဝှက်သော ရည်ရွယ်ချက် (Hidden Agenda)” တစ်ခုခုရှိနေသည်ဟု စွပ်စွဲ ပြောဆိုလိုက် သည်။ သူသည် အမေရိကန်က Strike Force Burma အဖွဲ့ဖွဲ့ကာ မြန်မာနိုင်ငံအတွင်းရှိ ကျားဖြန့်စင် တာ ၂ခုကို စီးနင်းခဲ့ခြင်း FBI အေးဂျင့်များကို ဘန်ကောက်သို့ စေလွှတ်ကာ ထိုင်းရဲတပ်ဖွဲ့နှင့် ပူး ပေါင်းဆောင်ရွက်နေခြင်းတို့ကို ထောက်ပြပြီး ဤလုပ်ရပ်များသည် ကျားဖြန့်လိမ်လည်မှု တိုက် ဖျက်ရေးဟူသော အမည်ခံအောက်တွင် အခြားနိုင်ငံရေးရည်မှန်းချက်များ လိုက်စားနေခြင်းဖြစ် သည်ဟု အခိုင်အမာ စွပ်စွဲသည်။ ထို့အပြင် ကျားဖြန့်ဒေသများဖြစ်သည့် KK Park၊ ရွှေကုက္ကိုင်း၊ ကျောက်ခတ်တို့တွင် ရေ၊ မီး၊ ဆက်သွယ်ရေးစနစ်များမှာ ထိုင်းဘက်မှ ရရှိနေခြင်း၊ စစ်ကောင်စီက ယခင်က KK Park ကို ဖောက်ခွဲဖျက်ဆီးစဉ် အပျက်အစီးများ ထိုင်းနိုင်ငံဘက်သို့ ကျရောက်ခဲ့သည် ဟု ထိုင်းဘက်က ကန့်ကွက်ခဲ့သော်လည်း ထိုဖောက်ခွဲမှုများသည် အဆင့်မြင့်နည်းပညာသုံး ဖောက်ခွဲမှုများဖြစ်သဖြင့် အနီးဝန်းကျင်သစ်ပင်ပင် မလှုပ်ရှားခဲ့ကြောင်း၊ ထို့ကြောင့် ထိုင်းဘက်သို့ အပျက်အစီးကျရောက်စရာ အကြောင်းမရှိကြောင်း ငြင်းဆိုသည်။ ထပ်မံ၍ ကျားဖြန့်စင်တာများ တွင် လုပ်ကိုင်နေသော နိုင်ငံခြားသားအလုပ်သမား ၉၉.၅ ရာခိုင်နှုန်းမှာ ထိုင်းနိုင်ငံမှတစ်ဆင့် ဝင်ရောက်လာခြင်းဖြစ်သည်ဟုလည်း ဇော်မင်းထွန်းက ထိုင်းနိုင်ငံကို တိုက်ရိုက် အပြစ်တင်ပြော ဆိုခဲ့သည်။

လှည်းကူး – ဇရပ်ကွင်းရပ်ကွက် အုပ်ချုပ်ရေးမှူးရုံးကို ပြင်းအားမြင့်မိုင်း ၂ လုံးဖြင့် တိုက်ခိုက်ခံရ

နိုဝင် ၁၉
The Kaladan Post
နိုဝင်ဘာလ ၁၈ ရက် ညနေ ၆ နာရီ ၁၀ မိနစ်ခန့်က ရန်ကုန်တိုင်း၊ လှည်းကူးမြို့နယ်၊ ဇရပ်ကွင်း ရပ်ကွက်ရှိ အုပ်ချုပ်ရေးမှူးရုံးအား တော်လှန်ရေးပူးပေါင်းအဖွဲ့က ပြင်းအားမြင့်မိုင်း ၂ လုံးဖြင့် ဖောက်ခွဲတိုက်ခိုက်ခဲ့ကြောင်း Yangon Army ထုတ်ပြန်သည်။ ထိုရုံးသည် စစ်ကောင်စီ၏ တရားမဝင်ရွေးကောက်ပွဲ ပြုလုပ်ရန် မဲစာရင်းကောက်ယူခြင်း၊ ပြည်သူများကို ဖိအားပေး ခြိမ်းခြောက်ခြင်း၊ စစ်မှုထမ်းကြေးအတင်းကောက်ခံခြင်း၊ လူငယ်များကို ဖမ်းဆီးပြီး ငွေညှစ်ခြင်း စသည့် လုပ်ရပ်များကို ဦးဆောင်လုပ်ဆောင်နေသည့် နေရာဖြစ်သည်ဟု တိုက်ခိုက်ရေးအဖွဲ့က ထုတ်ဖော်ပြောဆိုသည်။ ဖောက်ခွဲတိုက်ခိုက်မှုကြောင့် အုပ်ချုပ်ရေးမှူး၏ နောက်လိုက်ပျူစောထီး ၂ ဦး ပြင်းထန်ဒဏ်ရာရရှိခဲ့ပြီး ကျန်ပျူစောထီးများ ထိတ်လန့်ပြေးဆောင်းခဲ့ကြကြောင်း သိရသည်။ တော်လှန်ရေးရဲဘော်များမှာ အထိအခိုက်မရှိ ဘေးလွတ်ရာသို့ ပြန်လည်ဆုတ်ခွာနိုင်ခဲ့သည်။ တိုက်ခိုက်မှုကို Yangon Army (YA) နှင့် အနောက်ပိုင်းခရိုင် ပြည်သူ့ကာကွယ်ရေးတပ်မတော် (အနောက်-ပကဖ)ဖြစ်ပြီး အဆိုပါအဖွဲ့များက ဆက်လက်၍ စစ်ကောင်စီ၏ တရားမဝင်ရွေး ကောက်ပွဲလုပ်ငန်းစဉ်တွင် ပါဝင်ကူညီသူများ၊ စစ်ကောင်စီနှင့် ဆက်နွယ်နေသော ပစ်မှတ်များကို အဓိကထား ပြင်းပြင်းထန်ထန် ထပ်မံတိုက်ခိုက်သွားမည်ဟု သတိပေးထားသည်။

ကနေဒီတောင်တပ်စခန်းကို ချင်းညီနောင် ပြန်လည်ထိန်းချုပ်သိမ်းပိုက် ခဲယမ်းများစွာ သိမ်းဆည်းရမိ

နိုဝင် ၁၉
The Kaladan Post
နိုဝင်ဘာလ ၁၈ ရက်နေ့တွင် ချင်းညီနောင်အဖွဲ့ တီးတိန် မြို့နယ်အတွင်းရှိ စစ်ရေးအရ အရေးပါလှ သော ကနေဒီတောင်တပ်စခန်းကုန်းကို ပြန်လည်ထိန်းချုပ်သိမ်းပိုက်နိုင်ခဲ့ကြောင်း PDF ဇိုလဲန်း (Zoland PDF) တပ်ဖွဲ့က တရားဝင်ထုတ်ပြန်သည်။ ယခင် အောက်တိုဘာ ၂၉ ရက်က စစ်တပ်က ရွေးကောက်ပွဲဖြစ်မြောက်ရေးအတွက် အင်အားအလုံးအရင်းဖြင့် လေကြောင်း၊ မြေပြင် ပူးပေါင်း ထိုးစစ်ဆင်လာသဖြင့် ဗျူဟာအရ ချင်းညီနောင်တပ်ဖွဲ့များက ခေတ္တဆုတ်ခွာပေးခဲ့ရခြင်း ဖြစ် ကြောင်း PDF ဇိုလဲန်းက ရှင်းလင်းသည်။ စစ်ကောင်စီတပ် ဆုတ်ခွာသွားပြီးနောက် နိုဝင်ဘာ ၁၈ ရက်တွင် ကနေဒီတောင်ကို အလွယ်တကူ ပြန်လည်ထိန်းချုပ်နိုင်ခဲ့ပြီး ခဲယမ်းလက်နက်ပစ္စည်းများ အမြောက်အမြား သိမ်းဆဆည်းရမိခဲ့သည်ဟု ဆိုသည်။ ကနေဒီတောင်စခန်းသည် ၂၀၂၃ နိုဝင်ဘာ လက PDF ဇိုလဲန်းက ပထမဆုံးအကြိမ် တိုက်ခိုက်သိမ်းပိုက်ခဲ့ဖူးသည့် နေရာဖြစ်ပြီး ချင်းပြည်နယ် မြောက်ပိုင်း၏ အမြင့်ဆုံးတောင်ထိပ်များထဲမှ တစ်ခုလည်းဖြစ်သည်။ တစ်ပြိုင်နက်တည်းမှာပင် ချင်းပြည်ကောင်စီ ကာကွယ်ရေးဌာနက နိုဝင်ဘာ ၁၈ ရက် တိုက်ပွဲသတင်းထုတ်ပြန်ချက်တွင် ဖလမ်း-ဝေဘူလ၊ တီးတိန်-ခိုင်ကမ်း၊ ကလေး-ဂန့်ဂေါ လမ်းကြောင်းများပေါ်တွင် ဖြစ်ပွားခဲ့သော တိုက်ပွဲများအတွင်း စစ်ကောင်စီဘက်မှ ဗိုလ်မှူး၊ ဗိုလ်ကြီးအဆင့်အပါအဝင် တပ်ဖွဲ့ဝင် ၁၀၀ ခန့် သေဆုံး၊ ဒဏ်ရာရရှိခဲ့ပြီး လက်နက်ခဲယမ်းများ သိမ်းဆည်းရမိခဲ့ကြောင်း ထုတ်ပြန်ထားသည်။ လက်ရှိတွင် ချင်းပြည်နယ်မြောက်ပိုင်း လမ်းကြောင်းတစ်လျှောက် တိုက်ပွဲများ ပြင်းထန်စွာ ဆက်လက်ဖြစ်ပွားနေဆဲဖြစ်ပြီး စစ်ကောင်စီတပ်များ အထိနာလျက်ရှိကြောင်း ချင်းတော်လှန်ရေး တပ်ဖွဲ့များက အသိပေးထားသည်။

ပေါက်မြို့နယ်တွင် စစ်တပ်စစ်ကြောင်း ပြည်သူ ၈ ဦးသတ်ဖြတ်ပြီး ၂၀ ကျော်ဖမ်းဆီး ကျေးရွာ

နိုဝင် ၁၉
The Kaladan Post
မကွေးတိုင်း၊ ပေါက်မြို့နယ်မြောက်ပိုင်းရှိ ကျေးရွာများသို့ နိုဝင်ဘာ ၁၆ ရက်မှ စတင်၍ စစ်ကြောင်း ၄ ကြောင်းခွဲကာ ထိုးစစ်ဆင်လာသော အကြမ်းဖက်စစ်တပ်က လမ်းပြအဖြစ် ဖမ်းဆီးခေါ်ဆောင် လာသူ ၂ ဦးအပါအဝင် ပြည်သူ ၈ ဦးကို ရက်စက်စွာ သတ်ဖြတ်ခဲ့ပြီး အရပ်သား ၂၀ ကျော်ကိုလည်း ဖမ်းဆီးခေါ်ဆောင်ထားကြောင်း ပေါက်မြို့နယ် လူသားစာနာဌာနမှ တာဝန်ရှိသူတစ်ဦးက ပြောဆို သည်။ စစ်ကြောင်းထိုးနေသည့် တပ်ရင်းများသည် ပျူစောထီးအဖွဲ့များနှင့် ပူးပေါင်းကာ ကျေးရွာ များအတွင်းကို ဝင်ရောက်စီးနင်းမီးရှို့ဖျက်ဆီးနေပြီး နိုဝင်ဘာ ၁၉ ရက်နေ့တွင် တယ်ပင်ကျေးရွာရှိ နေအိမ် ၆ လုံး၊ ကားဂိုဒေါင်နှင့် စျေးဆိုင်ခန်းများကို မီးရှို့ခဲ့သလို နိုဝင်ဘာ ၁၈ ရက်ကလည်း ကျောက္ကာရွာရှိ စစ်ဘေးရှောင်တဲ ၃၀ လုံးကို မီးရှို့ဖျက်ဆီးခဲ့သည်။ ထို့အပြင် ကပစ ၂၄ လက်နက် စက်ရုံမှ လက်နက်ကြီးများဖြင့် ရမ်းသမ်းပစ်ခတ်ခြင်းနှင့် လေကြောင်းတိုက်ခိုက်မှုများလည်း ပြုလုပ်နေသဖြင့် ကျေးရွာ ၄၂ ရွာမှ ပြည်သူ ၃၅,၀၀၀ ခန့် တောတောင်များအတွင်း စစ်ဘေးတိမ်း ရှောင်နေရသည်ဟု သိရသည်။

စစ်တပ်ရွေးကောက်ပွဲ မဲခိုင်းစေသူတွေကို ဥပဒေနှင့်အညီ အရေးယူမည်ဟု NUG ထပ်မံကြေညာ

နိုဝင် ၁၉
The Kaladan Post
အမျိုးသားညီညွတ်ရေးအစိုးရ (NUG) သည် အာဏာသိမ်းစစ်အုပ်စု၏ အတုအယောင်ရွေးကောက် ပွဲအတွက် ပြည်သူများကို မဲထည့်ရန် ခြိမ်းခြောက်နှောင့်ယှက်သူများကို ဥပဒေနှင့်အညီ အမြဲတမ်း အရေးယူသွားမည်ဖြစ်ကြောင်း NUG ပြည်ထောင်စုဝန်ကြီးချုပ်ရုံး ပြောရေးဆိုခွင့်ရှိသူ ဦးနေဘုန်း လတ်က နိုဝင်ဘာ ၁၉ ရက်တွင် ပြုလုပ်သော ပြည်သူလူထုနှင့် နိုင်ငံတကာသို့ သတင်းစကား ပြောကြားပွဲတွင် ထပ်မံပြောဆိုသည်။ စလင်းမြို့နယ် NUG စိုးမိုးနယ်မြေအတွင်း စစ်အုပ်စုလက် အောက်ခံ မြို့နယ်ရွေးကောက်ပွဲကော်မရှင်အဖွဲ့ဝင် ဦးသက်ဝေကို ပြည်သူများ၏ သတင်းပေးပို့ မှုအရ ဖမ်းဆီးရမိခဲ့ပြီး အကြမ်းဖက်တိုက်ဖျက်ရေးဥပဒေဖြင့် တရားရေးလုပ်ထုံးလုပ်နည်းများနှင့် အညီ အရေးယူဆောင်ရွက်လျက်ရှိကြောင်း ဦးနေဘုန်းလတ်က ထုတ်ဖော်ပြောဆိုသည်။ ထို့ပြင် NUG ပြည်ထဲရေးနှင့် လူဝင်မှုကြီးကြပ်ရေးဝန်ကြီးဌာနကလည်း အတုအယောင်ရွေးကောက်ပွဲနှင့် ပတ်သက်၍ မဲထည့်ရန် သို့မဟုတ် ကြိုတင်မဲပေးရန် ခြိမ်းခြောက်ခံရပါက တိုင်ကြားနိုင်ကြောင်း နိုဝင်ဘာ ၆ ရက်က ထုတ်ပြန်ထားပြီး ဖြစ်သည်။ စစ်အုပ်စုက အတုအယောင်ရွေးကောက်ပွဲကို အကြောင်းပြပြီး ပြည်သူများ၏ လွတ်လပ်စွာ ထုတ်ဖော်ပြောဆိုခွင့်၊ ရေးသားခွင့်များကို နှောင့်ယှက်ဖမ်းဆီးနေခြင်းသည် စနစ်တကျကျူးလွန်နေသော စစ်ရာဇဝတ်မှုနှင့် လူ့အခွင့်အရေး ချိုးဖောက်မှုများဖြစ်ကြောင်း NUG က နိုင်ငံတကာအသိုင်းအဝိုင်းကို ပြင်းထန်စွာ စောင့်ကြည့် အရေးယူရန်နှင့် စစ်အုပ်စု၏ အတုအယောင်ရွေးကောက်ပွဲကို လုံးဝ အသိအမှတ်မပြုကြောင်း ထပ်လောင်းတိုက်တွန်းထားခြင်းဖြစ်သည်။

ရွှေကုက္ကိုလ်ကျားဖြန့်ဂိုဏ်းကို KNU၊ DKBA၊ BGF နဲ့ ထိုင်းက ကာကွယ်ထားဟု ဇော်မဲလုံးပြော

နိုဝင် ၁၉
The Kaladan Post
မြန်မာ-ထိုင်း နယ်စပ်၊ မြဝတီအရှေ့ဘက်ခြမ်းရှိ ရွှေကုက္ကိုလ်မြို့သစ်၊ KK Park နှင့် ကျောက်ခတ်တို့ တွင် လည်ပတ်နေသော အွန်လိုင်း ငွေလိမ်လည် (ကျားဖြန့်) ဂိုဏ်းများကို ကရင်အမျိုးသားအစည်း အရုံး (KNU/KNLA)၊ ဒီမိုကရေစီအကျိုးပြုကရင်တပ်မတော် (DKBA)၊ ကရင်နယ်ခြားစောင့်တပ် (BGF) တို့က အကာအကွယ်ပေးထားသဖြင့် အမြစ်ပြတ် မပျောက်နိုင်ဟု စစ်ကောင်စီ ပြောခွင့်ရ ဗိုလ်ချုပ်ဇော်မင်းထွန်းက နိုဝင်ဘာ ၁၉ ရက်နေ့ စစ်ကောင်စီသတင်းစာထဲတွင် ထည့်သွင်း စွပ်စွဲ ပြောဆိုလိုက်သည်။ အဆိုပါ ဂိုဏ်းသုံးခုစလုံးသည် အာဏာသိမ်းပြီးနောက် ၂၀၂၁ ခုနှစ်မှစ၍ တရုတ်ရာဇဝတ်ဂိုဏ်းများနှင့် ပူးပေါင်း လည်ပတ်နေခြင်းဖြစ်ပြီး နိုင်ငံခြားသား လိမ်လည်သူ ၉၉.၅% သည် ထိုင်းနိုင်ငံဘက်မှတစ်ဆင့် ဝင်ရောက်လာကာ ရေ၊ မီး၊ အင်တာနက်၊ ကုန်စည်စီးဆင်း မှုအားလုံးကိုလည်း ထိုင်းဘက်မှ ထောက်ပံ့နေသည်ဟု စစ်ကောင်စီက အခိုင်အမာ စွပ်စွဲထားသည်။ ထို့အပြင် အမေရိကန်ဘက်က ဖွဲ့စည်းထားသော Strike Force Burma နှင့် FBI တို့က မြန်မာနိုင်ငံ အတွင်း ကျားဖြန့်စင်တာများကို စစ်ဆင်ရေးဆင်နွှဲခဲ့သည်ဟု ထုတ်ပြန်ထားသော်လည်း မြေပြင်တွင် မည်သည့်လက်တွေ့ စစ်ဆင်ရေးမျှ မတွေ့ရကြောင်း၊ ထိုင်းနိုင်ငံတွင်း ရဲတပ်ဖွဲ့နှင့် FBI ပူးပေါင်းမှု မှာလည်း “လျှို့ဝှက်ရည်ရွယ်ချက် (Hidden Agenda)” ရှိနေနိုင်သည်ဟု ဗိုလ်ချုပ်ဇော်မင်းထွန်းက ထပ်မံ စွပ်စွဲပြောဆိုသွားသည်။ စစ်ကောင်စီဘက်က လွှမ်းမိုးနိုင်သည့် နယ်မြေများတွင်မူ အွန်လိုင်း လောင်းကစားနှင့် လိမ်လည်မှုများကို အမြေလှန်ရှင်းလင်းနေပြီး ကျန်နယ်မြေများတွင် ငြိမ်းချမ်းရေး ရရှိလာပါက ဆက်လက် အမြစ်ပြတ်ပပျောက်အောင် ဆောင်ရွက်သွားမည်ဟု ဆိုထားသည်။

ခင်ဦးတွင် စစ်ဘေးရှောင်များကို စစ်တပ်က လက်နက်ကြီးပစ်ခတ် ပြည်သူ ၃ ဦး ဒဏ်ရာရရှိ

နိုဝင် ၁၉
The Kaladan Post
ခင်ဦးမြို့နယ် အနောက်မြောက်ခြမ်းနှင့် ရေဦးမြို့နယ်အစပ်တွင် အင်အား ၃၀၀ ဝန်းကျင် ခြေလျင် စစ်ကြောင်းထိုးလာသော စစ်တပ်က နိုဝင်ဘာ ၁၉ ရက် နေ့လယ်ပိုင်းမှစ၍ စစ်ဘေးတိမ်းရှောင် နေသည့် ပြည်သူများကို လက်နက်ကြီးများဖြင့် ရည်ရွယ်ချက်ရှိရှိ ပစ်ခတ်နေကြောင်း ခင်ဦးမြို့နယ် သတင်းမှန်ပြန်ကြားရေးအဖွဲ့က ထုတ်ပြန်သည်။ ရေဦးမြို့အထိုင်တပ်က ပစ်ခတ်သော လက်နက် ကြီးကျည်များသည် အင်းပတ်ကျေးရွာအတွင်း ကျရောက်ပေါက်ကွဲခဲ့ရာ အမျိုးသား ၃ ဦး ခေါင်း၊ ခြေထောက်၊ လက်မောင်းတို့တွင် ဦးခေါင်း၊ ကျည်စထိမှန်ဒဏ်ရာများ ရရှိခဲ့ပြီး လက်ရှိ ဆေးကုသမှု ခံယူကြကြောင်းသိရသည်။ မုံလှစံပြကျေးရွာသို့ ရောက်ရှိနေသော စစ်ကြောင်းကလည်း ပတ်ဝန်း ကျင်စစ်ဘေးရှောင်နေရာများကို ဆက်လက်ပစ်ခတ်နေသဖြင့် ခင်ဦး၊ ရေဦး၊ ကန့်ဘလူ နယ်စပ်ရှိ ကျေးရွာ ၂၀ ကျော်မှ ပြည်သူ သောင်းချီ ဆယ်ရက်ကျော်ကြာ တောတောင်ထဲတွင် ဖြစ်သလို တိမ်းရှောင်နေရသည်။ ရက်ရှည်စစ်ဘေးရှောင်ရသဖြင့် နေစရာ၊ စားစရာ အလွန်အမင်း ချို့တဲ့နေပြီး ဆောင်းရာသီရောက်လာသဖြင့် ကိုယ်ဝန်ဆောင်မိခင်များ၊ ကလေးငယ်များ၊ သက်ကြီးရွယ်အိုများ ကျန်းမာရေးချို့တဲ့မှု များပြားလာကာ အရေးပေါ် အကူအညီများ အလွန်လိုအပ်နေကြောင်း ခင်ဦးမြို့နယ် သတင်းမှန်ပြန်ကြားရေးအဖွဲ့က တိုက်တွန်းထားသည်။

နမခတိုင်းမှူး မျိုးမင်းထွေးနှင့် တပ်မ-၃၃ ဒုမှူး ဗိုလ်မှူးကြီး ဇင်မျိုးဦးတို့ကို အချုပ်ချစစ်ဆေး

နိုဝင် ၁၉
The Kaladan Post
စစ်ကိုင်းတိုင်း၊ မုံရွာအခြေစိုက် အနောက်မြောက်တိုင်းစစ်ဌာနချုပ် (နမခ) တိုင်းမှူး ဗိုလ်မှူးချုပ် မျိုးမင်းထွေးအား လက်ရှိ အကျယ်ချုပ်ဖြင့် ခုံရုံးဖွဲ့ စစ်ဆေးနေပြီး စစ်ကိုင်းအခြေစိုက် တပ်မ-၃၃ ဒုတိယတပ်မမှူး ဗိုလ်မှူးကြီး ဇင်မျိုးဦးကိုလည်း အချုပ်ချ စစ်ဆေးနေကြောင်း စစ်တပ်အတွင်း CDM သတင်းရင်းမြစ်က ပြောဆိုသည်။ ဗိုလ်မှူးချုပ် မျိုးမင်းထွေးသည် လားရှိုးတိုက်ပွဲတွင် ဗိုလ်ချုပ် စိုးတင့်နှင့်အတူ လက်နက်ချအညံ့ခံခဲ့သူဖြစ်ပြီး MNDAA က ပြန်လွှတ်ပေးပြီးနောက် အရေးယူမခံဘဲ တကက-၁၃ ကျောင်းအုပ်ကြီးအဖြစ် ရောက်ရှိခဲ့သလို ၂၀၂၄ ဒီဇင်ဘာ ၁၈ တွင် နမခတိုင်းမှူးအဖြစ် ဗိုလ်ချုပ်မှူးကြီး မင်းအောင်လှိုင်က တိုက်ရိုက်ခန့်အပ်ခဲ့ခြင်းဖြစ်သည်။ ယခု နှစ်ဦးလုံး အရေးယူခံရခြင်းမှာ ဟုမ္မလင်းဒေသ ရွှေလုပ်ကွက်များသို့ ကန့်သတ်ကုန်ပစ္စည်းများ လာဘ်ငွေယူပြီး တင်သွင်းခွင့်ပေးခြင်း၊ စစ်ဆေးရေးဂိတ်များတွင် ကုန်ကားများထံ ငွေကြေးတောင်း ယူခြင်း စသည့် အကျင့်ပျက်မှုများကြောင့်ဟု သတင်းရင်းမြစ်က ဆိုသည်။ ဗိုလ်မှူးကြီး ဇင်မျိုးဦးမှာ ယခင် မင်းကွန်းတိုက်ပွဲတွင် ဒဏ်ရာရရှိခဲ့ပြီး လက်ကိုင်ဖုန်းသိမ်းဆည်းခံရချိန် ရှမ်းနီပြည်သူ့စစ် (SNA) ထံ လက်နက်ငယ် ၁၅၀ ကျော်၊ လက်နက်ကြီး ၁၂ လက်နှင့် ခဲယမ်းများစွာ ရောင်းချပေးခဲ့ ကြောင်း အထောက်အထားများ ဖော်ထုတ်ခံရသူလည်း ဖြစ်သည်။ ယခုဖြစ်စဉ်သည် စစ်တပ် အတွင်း အကျင့်ပျက်မှုများနှင့် လက်နက်ရောင်းဝယ်မှုများကို အပေါ်ထပ်ခေါင်းဆောင်များက အရေးယူလာသည့် လက္ခဏာတစ်ခုဟု စစ်တပ်အတွင်းရင်းမြစ်က သုံးသပ်သည်။

မြင်းခြံ-နွားထိုးကြီးလမ်းပိုင်း စစ်တပ်တ်များကို ၂ ရက်ဆက် ဒရုန်း ဗုံးကျဲခံရပြီး ၅ ဦးသေဆုံး

နိုဝင် ၁၉
The Kaladan Post
နိုဝင်ဘာလ ၁၃ ရက်နှင့် ၁၄ ရက်နေ့များတွင် မန္တလေးတိုင်း၊ မြင်းခြံ-နွားထိုးကြီးကားလမ်းပိုင်းရှိ စစ်ကောင်စီတပ်ဖွဲ့၏ ဂိတ်စခန်းများနှင့် ရေချိုးနေသည့်နေရာများကို တော်လှန်ရေးပူးပေါင်း တပ်ဖွဲ့များက ဒရုန်း ၅ စီးဖြင့် ဗုံးကျဲတိုက်ခိုက်ခဲ့ကြောင်း Peacock Drone Team-Myaung က ထုန်ပြန်သည်။ တိုက်ခိုက်မှုအတွင်း စစ်ကောင်စီတပ်သား ၅ ဦး ပွဲချင်းပြီးသေဆုံးခဲ့ပြီး၊ ဒုတိယ နေ့တိုက်ခိုက်ရာတွင် ရေချိုးနေသည့် စစ်သားအချို့ ထိမှန်ဒဏ်ရာရရှိကာ လူနာတင်ယာဉ်များဖြင့် အရေးပေါ်ပို့ဆောင်ခံခဲ့ရကြောင်းသိရသည်။ အဆိုပါစစ်ဆင်ရေးကို Myaung Drone Force ကျားခင်စိန်၊ ထနောင်းမြေစစ်ကြောင်း၊ JUSTICE WARRIORS၊ Revolutionary Air Force၊ ဒေါင်းမင်းကြီးတပ်ဖွဲ့၊ မြင်းခြံခရိုင်တပ်ရင်း(၁၁)၊ လက်ရုံးတပ် 925 ပြောက်ကျား (ငါးဇွန်)၊ Peacock Drone Team – Myaung နှင့် အားမ်မာန်သစ်ပြောက်ကျားတပ်ဖွဲ့တို့က ပူးပေါင်းလုပ်ဆောင်ခဲ့ခြင်း ဖြစ်သည်။ တိုက်ခိုက်မှုအတွင်း ဒရုန်း ၁ စီး ဆုံးရှုံးခဲ့ရကြောင်း Peacock Drone Team – Myaung တာဝန်ရှိသူက ပြောဆိုသည်။