နိုဝင် (၂၀) ရက် သတင်းတိုပေါင်းချုပ်

အတုရွေးကောက်ပွဲ ပျက်အောင်လုပ်သူများကို ပြည်သူများ အခွင့်အရေးကို ဖျက်ဆီးတာ ဖြစ်တယ်ဟု ဦးသောင်းအေး ပြောဆို

နိုဝင် ၂၀
The Kaladan Post
ပျော်ဘွယ်မြို့နယ်၊ မိုးကောင်းနှင့် နောင်ခွင်ကျေးရွာများတွင် မဲဆန္ဒရှင်ပြည်သူများစွာနှင့် တွေ့ဆုံစဉ် ကြံ့ဖွံ့ပါတီ ပြည်သူ့လွှတ်တော်ကိုယ်စားလှယ်လောင်း ဦးသောင်းအေးက ရွေးကောက်ပွဲကို ပျက်စီး အောင် ကြံစည်သူများနှင့် မဲမပေးရန် လှုံ့ဆော်သူများအား ယမန်နေ့ နိုဝင် ၁၉ရက်နေ့က ပြင်းထန်စွာ သတိပေးပြောကြားခဲ့ကြောင်း ကြံ့ဖွံ့ပါတီက ထုတ်ပြန်ထားသည်။ ဦးသောင်းအေးက အတုအယောင် ရွေးကောက်ပွဲသည် စစ်တပ်အတွက်မဟုတ်၊ ပြည်သူလူထုတစ်ရပ်လုံးအတွက်သာ ဖြစ်သည် ဟု အလေးပေးပြောကြားပြီး၊ ရွေးကောက်ပွဲကို ပျက်အောင် လုပ်သူများသည် ပြည်သူတို့၏ အခွင့်အ ရေးကို ဖျက်ဆီးရာရောက်ကြောင်း ပြောဆိုသည်။ ထို့ပြင် ရွေးကောက်ပွဲပျက်စီးအောင် ပါးစပ်ဖြင့် ပြောခြင်း၊ လက်နှင့်လုပ်ခြင်း၊ ကိုယ်စားလှယ်များကို ခြိမ်းခြောက်ခြင်း၊ ပြည်သူများကို မဲမပေးရန် လှုံ့ဆော်ခြင်းများကို ကာကွယ်ရန် ဥပဒေထုတ်ပြန်ထားပြီး အဆိုပါလုပ်ရပ်များအတွက် ပြစ်ဒဏ် အနေဖြင့် သေဒဏ်အထိ ချမှတ်နိုင်ကြောင်း ပြည်သူများကို ခြိမ်းခြောက်ပြောဆိုခဲ့သည်။ သို့သော် လည်း အမျိုးသားညီညွတ်ရေးအစိုးရ (NUG) အပါအဝင် တော်လှန်‌ရေးတပ်ဖွဲ့ဝင်တွေ အားလုံးက အာဏာသိမ်းစစ်အုပ်စု၏ အတုအယောင်ရွေးကောက် ပွဲအတွက် ပြည်သူများကို မဲထည့်ရန် ခြိမ်းခြောက်နှောင့်ယှက်သူများကို ဥပဒေနှင့်အညီ အမြဲတမ်း အရေးယူသွားမည်ဖြစ်ကြောင်း အကြိမ်ကြိမ် သတိပေးခဲ့ကြပြီး ဖမ်ဆီးအယူဆောင်ရွက်နေတာတွေလည်း ရှိကြောင်း သိရသည်။

ရွှေဘိုမြို့ပေါ်တွင် စစ်တပ်က မင်္ဂလာဆောင်မှ စျေးဆိုင်များအထိ ပေါ်တာဆွဲ ဖမ်းဆီးမှု ပြုလုပ်

နိုဝင် ၂၀
The Kaladan Post
စစ်ကိုင်းတိုင်း၊ ရွှေဘိုမြို့ပေါ်တွင် စစ်တပ်က လက်ဖက်ရည်ဆိုင်၊ စားသောက်ဆိုင်နှင့် ဈေးကြီးများ အပါအဝင် မင်္ဂလာဆောင်များတွင်ပင် ပေါ်တာဆွဲ ဖမ်းဆီးမှုများ နေ့စဉ်ပြုလုပ်နေကြောင်း ဒေသခံ ပြည်သူများက ပြောဆိုကြသည်။ ယင်းမှုများကြောင့် လူငယ်များအပြင် အသက် ၄၀ ကျော်များပါ ရှောင်တိမ်းနေရမှု ဆက်လက်ဖြစ်ပွားနေကြောင်း သိရသည်။ ယမန်နေ့ နိုဝင်ဘာ ၁၉ ရက်နံနက်ပိုင်း ဘူတာအနီး မင်္ဂလာဆောင်တစ်ခုတွင် စစ်တပ်က ဝင်ရောက်ပေါ်တာဆွဲခဲ့ရာ ပျော်ရွှင်ဖွယ် ပွဲတော် သည် ပျက်သွားခဲ့ပြီး မင်္ဂလာဆောင်ကူ လူငယ်များကို ဖမ်းဆီးခဲ့ကြောင်း ဒေသခံတစ်ဦးက ပြော ကြားခဲ့သည်။ ပေါ်တာဆွဲ ဖမ်းဆီးမှုများကို မြို့နယ်စီမံအုပ်ချုပ်ရေး အဖွဲ့ဥက္ကဋ္ဌ ကျော်နိုင်နှင့် ရွှေဘိုခရိုင်အဖွဲ့ဝင် ဒုတိယဗိုလ်မှူးကြီး သန့်ဇော်လင်း၏ ညွှန်ကြားချက်ဖြင့် လုပ်ဆောင်နေပြီး၊ ဖမ်းဆီးရရှိသူများကို မြို့နယ် ထွေ/အုပ်ရုံးတွင် ယာယီ ထိန်းသိမ်းပြီး စစ်မှုထမ်းစုဆောင်းရေး တပ်များနှင့် သင်တန်းကျောင်းများသို့ ပို့ဆောင်ကြောင်း သိရသည်။ ထို့ပြင် ရွေးကောက်ပွဲ လုံခြုံရေး တင်းကျပ်မှုကို ကာကွယ်ဖွယ်ဟု ဆိုကာ မြို့အဝင်အထွက် ဂိတ်များတွင်လည်း စစ်ဆေး ဖမ်းဆီး ငွေညှစ်မှုများ အရှိန်မြှင့် လုပ်ဆောင်နေကြောင်း ဒေသခံများက ပြောဆိုကြသည်။

ငွေလိမ်ဂိုဏ်းတိုက်ဖျက်ရေးမှာ စစ်တပ်နှင့်ပူးပေါင်းပါက ဆိုးကျိုးသာ ဖြစ်မည်ဟု KNU သတိပေး

နိုဝင် ၂၀
The Kaladan Post
နိုင်ငံဖြတ်ကျော် အွန်လိုင်းငွေလိမ်လုပ်ငန်း (ကျားဖြန့်ဂိုဏ်းများ) ကို နီးကပ်စွာ စောင့်ကြည့်နေပြီး နိုင်ငံတကာတိုက်ဖျက်ရေး ကြိုးပမ်းမှုများတွင် အပြည့်အဝ ပူးပေါင်းဆောင်ရွက်ရန် ကတိကဝတ်ပြုထားကြောင်း ကရင်အမျိုးသားအစည်းအရုံး (KNU) က ယမန်နေ့ (နိုဝင်ဘာ ၁၉ ရက်) က ကြေညာခဲ့သည်။ သို့သော် နိုင်ငံတကာအနေဖြင့် မြန်မာစစ်တပ်နှင့် ပူးပေါင်းဆောင်ရွက် ပါက ထိရောက်မှု လုံးဝမရှိသည့်အပြင် စစ်တပ်သည် ငွေလိမ်ဂိုဏ်းများမှ အကျိုးအမြတ်ရယူနေ သည့်အတွက် နိုင်ငံတကာနှင့် သံတမန်ဆက်ဆံရေး ချဲ့ထွင်ရန်၊ အုပ်ချုပ်ရေးတရားဝင်မှု ရယူရန်နှင့် ပြည်သူအပေါ် ရက်စက်မှုများ ပိုမိုကျူးလွန်ရန် အခွင့်အရေးယူမည်ဖြစ်ကြောင်း KNU က ပြင်းထန်စွာ သတိပေးထားသည်။ ရွှေကုက္ကိုလ် KK Park တွင် စစ်တပ်က ဖြိုခွင်းမည် ဟု ကြိုတင် သတင်းလွှင့်ပြီး မောင်းထုတ်ခဲ့ရာတွင်လည်း အကြီးအကဲများကို ကြိုတင်ရွှေ့ပြောင်းပေးထားပြီး အောက်ခြေဝန်ထမ်းများကိုသာ နှင်ထုတ်ခဲ့ခြင်းဖြစ်ကာ ပြဿနာအရင်းအမြစ်ကို ဖြေရှင်းခြင်းမရှိဘဲ နယ်စပ်ဒေသ မတည်မငြိမ်ဖြစ်မှုကိုသာ ပိုမိုဖြစ်ပေါ်စေခဲ့ကြောင်း KNU က ထောက်ပြခဲ့သည်။ ထို့ကြောင့် KNU အနေဖြင့် ငွေလိမ်ဂိုဏ်းနှင့် လူကုန်ကူးမှုများ တိုက်ဖျက်ရေးအတွက် အဆင့်မြင့် ခေါင်းဆောင်များ ပါဝင်သည့် အထူးအဖွဲ့ကို ဖွဲ့စည်းထားပြီး ထိုင်းနှင့် နိုင်ငံတကာအဖွဲ့အစည်းများနှင့် ချိတ်ဆက်၍ ထိထိရောက်ရောက် ဆောင်ရွက်သွားမည်ဖြစ်ကြောင်း အသိပေးထားသည်။အလားတူ နိုင်ငံတကာ သံတမန်အသိုင်းအဝိုင်းအနေဖြင့် လူကုန်ကူးခံရသူများနှင့် အမြတ်ထုတ်ခံရသူများကို ကယ်ဆယ်ကာကွယ်ရာတွင် မြန်မာ့ဒီမိုကရေစီအရေး တိုက်ပွဲဝင်နေသည့် တိုင်းရင်းသား အုပ်ချုပ်ရေးအဖွဲ့များ (အထူးသဖြင့် KNU) နှင့်သာ ပူးပေါင်းဆောင်ရွက်ကြရန်လည်း KNU က တိုက်တွန်းထားသည်။

ငါန်းဇွန်တွင် စစ်တပ် စစ်ကြောင်း ကြားဖြတ်တိုက်ခိုက်ခံရပြီး စစ်ခွေး ၁၅ ဦးထက်မနည်း သေဆုံး

နိုဝင် ၂၀
The Kaladan Post
ငါန်းဇွန်မြို့နယ်၊ မြို့သာ အထိုင်စခန်းမှ နိုဝင်ဘာ ၁၇ ရက် နံနက် ၈:၃၅ ခန့်တွင် နောင်းပင်ကျေးရွာ ဘက်သို့ စစ်ကြောင်းထိုးလာသော စစ်ကောင်စီတပ် (အင်အား ၃၀ ခန့်) ကို မြင်းခြံတိုက်နယ်(၃) နဂါးနီပြောက်ကျား ပြည်သူ့ကာကွယ်ရေးတပ်ဖွဲ့ နှင့် နယ်မြေခံ မဟာမိတ်တပ်ဖွဲ့များ ပူးပေါင်း၍ ကြားဖြတ်တိုက်ခိုက်ခဲ့ကြောင်း နဂါးနီ ပြောက်ကျားတပ်ဖွဲ့ – မြင်းခြံ မှ တာဝန်ခံ ကိုသန့်က ပြောဆို သည်။ တိုက်ပွဲအတွင်း အကြမ်းဖက်စစ်ကောင်စီတပ်ဘက်မှ စစ်သား ၁၅ ဦးထက်မနည်း သေဆုံး ပြီး ဒဏ်ရာရရှိသူများကြောင်း သိရသည်။ အဆိုပါတိုက်ပွဲတွင် တော်လှန်ရေးတပ်ဖွဲ့ဘက်မှ ရဲဘော် ၅ ဦး ကျဆုံးခဲ့ကြောင်းသိရသည်။ စစ်တပ်ဘက်က အထိခိုက်များတော့ အင်အားထပ်ဖြည့်ပြီး ပြန်လာကာ သေဆုံးသူများနှင့် ဒဏ်ရရှိသူများကို ကားနဲ့ပြန်သယ်သွားကြောင်း သိရသည်။ တိုက်ပွဲအပြီး စစ်ကောင်စီတပ်သည် အင်အားဖြည့်တင်းပြီး ပြန်လည်ရောက်ရှိလာသောကြောင့် တော်လှန်ရေးတပ်ဖွဲ့များက နည်းဗျူဟာအရ နောက်ဆုတ်ပေးခဲ့ရကြောင်း နဂါးနီ ပြောက်ကျားတပ်ဖွဲ့ – မြင်းခြံ မှ တာဝန်ခံ ကိုသန့်က ပြောဆိုသည်။

မြောက်ဥက္ကလာ အုပ်ချုပ်ရေးမှူးရုံးကို Yangon Army မိုင်းသုံးလုံးဖြင့် ဖောက်ခွဲတိုက်ခိုက်

နိုဝင် ၂၀
The Kaladan Post
ရန်ကုန်တိုင်း၊ မြောက်ဥက္ကလာပမြို့နယ်၊ ရွှေပေါက်ကံမြို့သစ် အုပ်ချုပ်ရေးမှူးရုံးကို Yangon Army (YA) နှင့် အနောက်ပိုင်းခရိုင် ပြည်သူ့ကာကွယ်ရေးတပ်မတို့ ပူးပေါင်း၍ ပြင်းအားမြင့်မိုင်း ၂ လုံး၊ လက်ပစ်ဗုံး ၁ လုံးတို့ဖြင့် ဖောက်ခွဲတိုက်ခိုက်ခဲ့ကြောင်း Yangon Army က နိုဝင်ဘာ ၁၉ ရက် ည ၉:၅၀ ခန့်တွင် တိုက်ခိုက်ခဲ့ကြောင်း ထုတ်ပြန်သည်။ အဆိုပါရုံးတွင် အုပ်ချုပ်ရေးမှူးနှင့် ပျူစောထီး အဖွဲ့ဝင်များ ရောက်ရှိနေချိန် တိုက်ခိုက်ခဲ့ခြင်းဖြစ်ပြီး အုပ်ချုပ်ရေးမှူးအပါအဝင် ပျူစောထီးများ ထိခိုက်ဒဏ်ရာရရှိခဲ့သော်လည်း အတိအကျ အရေအတွက်ကို အတည်မပြုရသေးကြောင်း သိရ သည်။ အုပ်ကြီးနဲ့ ပျူစောထီးတွေတော့ ထိဖို့နိုင်တယ် စစ်တပ်ပြုလုပ်မယ့် တရားမဲ့ရွေးကောက်ပွဲ အတွက် အစွမ်းကုန်ကူညီပေးနေလို့ အဲ့ရုံးကို တိုက်ခိုက်ခဲ့တာ ဟု Yangon Army တာဝန်ရှိသူက ပြောသည်။ စစ်ကောင်စီ၏ တရားမဲ့ရွေးကောက်ပွဲကို ပူးပေါင်းကူညီသူများ၊ စစ်တပ်နှင့်ဆက်စပ် နေသော ပစ်မှတ်များကို ဆက်လက်အပြင်းအထန် တိုက်ခိုက်သွားမည်ဟု Yangon Army က ကြေညာထားသည်။

ခင်ဦးမြို့နယ်အတွင်း စစ်တပ် စစ်ကြောင်းကြောင့် ဒေသခံ သောင်းနှင့်ချီ စစ်ရှောင်နေရပြီး အရေးပေါ်အကူညီ လိုအပ်နေ

နိုဝင် ၂၀
The Kaladan Post
စစ်ကိုင်းတိုင်း၊ ခင်ဦးမြို့နယ်အတွင်း နိုဝင်ဘာ ၁၉ ရက်က စစ်ကောင်စီတပ်ဖွဲ့ (အင်အား ၃၀၀ ဝန်း ကျင်) ခင်ဦး-ကန့်ဘလူ-ရေဦးအစပ်မှတစ်ဆင့် ဝင်ရောက်ကာ အနောက်မြောက်ခြမ်း မုံလှစံပြကျေး ရွာနှင့် ပတ်ဝန်းကျင်ရွာများသို့ ရောက်ရှိလာသဖြင့် ဒေသခံ သောင်းနှင့်ချီစစ်ဘေးတိမ်းရှောင်နေရပြီး ယနေ့အချိန်ထိ ၁၀ ရက်ကျော် ကြာမြင့်ပြီရှိကြောင်း ခင်ဦးမြို့နယ် သတင်းမှန်ပြန်ကြားရေးအဖွဲ့က ထုတ်ပြန်သည်။ စစ်ကြောင်းသည် စစ်ရှောင်များခိုလှုံရာ နေရာများကို လက်နက်ကြီးများဖြင့် ရမ်း သမ်းပစ်ခတ်နေသဖြင့် ရေဦးမြို့ဘက်မှ ပစ်ခတ်လိုက်သော လက်နက်ကြီး ၂ လုံး အင်းပတ်ကျေးရွာ အတွင်း ကျရောက်ပေါက်ကွဲကာ အရပ်သား အမျိုးသား ၃ ဦး ခေါင်း၊ ခြေထောက်၊ လက်မောင်းတို့ တွင် ဒဏ်ရာရရှိခဲ့ကြောင်းသိရသည်။ စစ်ဘေးတိမ်းရှောင်နေရသည့် ကျေးရွာများမှာ ခင်ဦးမြို့နယ် အတွင်း ကျောက်တိုင်၊ ကျီစု၊ ပင်စိမ်းကင်း၊ ငါးရုံကြီး၊ မုံလှ၊ သာဝတ္ထိ၊ မြင်းကျ၊ သရက်ကုန်း၊ ကျွန်းတောကြီး၊ ရှားတော၊ ကျွန်းတောလေး(ဥယျာဉ်) စသည့်ရွာများအပြင် ကန့်ဘလူမြို့နယ်ဘက်ရှိ ဝက်တိုး၊ အိုင်ပေါင်းချောင်၊ ယင်းတိုက် စသည့်ရွာများလည်း ပါဝင်ကြသည်။ ရက်ရှည်စစ်ရှောင် နေရသဖြင့် နေစရာ၊ စားစရာ အဆင်မပြေမှုများ ပြင်းထန်လာကာ ဆောင်းရာသီရောက်ရှိလာသည့် အတွက် ကလေးသူငယ်၊ ကိုယ်ဝန်ဆောင်မိခင်၊ သက်ကြီးရွယ်အိုများတွင် ကျန်းမာရေးပြဿနာများ များပြားလျက်ရှိပြီး ဆေးဝါး၊ ကျန်းမာရေးစောင့်ရှောက်မှု၊ စားနပ်ရိက္ခာ၊ နေရာထိုင်ခင်း စသည့် အရေးပေါ်လူသားချင်းစာနာထောက်ထားမှု အကူအညီများ အလွန်အမင်း လိုအပ်လျက်ရှိကြောင်း ခင်ဦးမြို့နယ် သတင်းမှန်ပြန်ကြားရေးအဖွဲ့က ပြောဆိုထားသည်။

ဖားကန့်မြို့ ပြည်သူများက မင်းအောင်လှိုင် တရားမဝင်ရွေးကောက်ပွဲ ဆန့်ကျင်ဆန္ဒပြ

နိုဝင် ၂၀
The Kaladan Post
ကချင်ပြည်နယ် ဖားကန့်မြို့တွင် ယနေ့ နိုဝင်ဘာ ၂၀ ရက်နေ့တွင် တရုတ်အစိုးရ အားပေးထောက်ခံ မှုဖြင့် အကြမ်းဖက်မင်းအောင်လှိုင် ဦးဆောင်ကျင်းပမည့် တရားမဝင် ရွေးကောက်ပွဲကို ဆန့်ကျင် ကန့်ကွက်ရန် ဒေသခံ ပြည်သူများ လူထုဆန္ဒပြပွဲ တစ်ရပ်ကို ယနေ့တွင်အောင်မြင်စွာ ပြုလုပ်ခဲ့ကြ ကြောင်း သတင်းရင်းမြစ်က ပြောဆိုသည်။ ဆန္ဒပြပွဲတွင် ပါဝင်ပတ်သက်သူများက “သင့်မဲဖြင့် တရားဝင် လူသတ်ခွင့်မပေးပါနဲ့”၊ “ဖက်ဆစ်ရွေးကောက်ပွဲ ခွေးထွက်ပေါက် မဲမပေးနှင့် သပိတ် မှောက်”၊ “အာဏာရှင် လုပ်တဲ့ ဒီမိုကရေစီ အပြောင်းအလဲဆိုတာ ဖာခေါင်းကလုပ်တဲ့ ပြည်တာဆာ ပပျောက်ရေးလိုပဲ ဖြစ်လိမ့်မယ်” စသည့် ဆန္ဒပြပုံစာတန်းများကို ကိုင်ဆောင်ကာ ရွေးကောက်ပွဲကို ပြတ်တောက်စွာ ဆန့်ကျင်ကန့်ကွက်ခဲ့ကြပြီး မင်းအောင်လှိုင်လက်အောက်မှ ကျင်းပမည့် ရွေးကောက်ပွဲ သည် အလိမ်အညာ ဖြစ်နေမည်ကို ထုတ်ဖော်ပြသခဲ့ကြသည်။ ဤဆန္ဒပြမှုသည် ကချင်ပြည်နယ် အတွင်း အကြမ်းဖက်စစ်ကောင်စီ ရွေးကောက်ပွဲ ကျင်းပရန် ကြိုးစားမှုကို ပြတ်တောက်စွာ ဆန့်ကျင်ရန် ဒေသခံများ၏ စိတ်ဓာတ်ကို ပြသရုံသာမက တနိုင်ငံလုံး ပြည်သူများကို တရားမဝင် အလိမ်အညာ ရွေးကောက်ပွဲကို ဆန့်ကျင်ရန် တိုက်တွန်းခဲ့ရာ နိုင်ငံတကာ အသိုင်းအဝိုင်းနှင့် ASEAN၊ UN၊ US၊ Japan တို့မှ မင်းအောင်လှိုင် ရွေးကောက်ပွဲကို အသိအမှတ်မပြုရန် တောင်းဆို ခဲ့ကြောင်း သိရှိရသည်။ မင်းအောင်လှိုင် ဦးဆောင်မည့် ၂၀၂၅ ဒီဇင်ဘာလ နှင့် ၂၀၂၆ ဇန်နဝါရီလ ကြားက ကျင်းပမည့် ရွေးကောက်ပွဲသည် လွတ်လပ်ရေး၊ တရားမျှတမှု နှင့် ပါဝင်မှု မရှိမည်ဟု Human Rights Watch က ဝေဖန်ထုတ်ဖော်ထားသလို ကချင်အပါအဝင် တိုင်းရင်းသားလက်နက် ကိုင်အဖွဲ့များကလည်း ဆန့်ကျင်ကြေညာထားပြီး နိုင်ငံတကာ အသိုင်းအဝိုင်း၏ ဆန့်ကျင်မှုကို ဖြစ်ပေါ်စေရန် ဖားကန့်ပြည်သူများ၏ ဆန္ဒပြမှုက အရေးပါသော လှုံ့ဆော်မှုတစ်ခု ဖြစ်လာခဲ့သည်။