နိုဝင် (၂၁) ရက် သတင်းတိုပေါင်းချုပ်

စစ်တပ်နှင့်ကျောချင်းကပ်မှသာ အစိုးရတည်မြဲနိုင်မည်ဟု ကြံ့ဖွံ့ ဥက္ကဋ္ဌ ဦးခင်ရီ မဲဆွယ်စည်းရုံး

နိုဝင် ၂၁
The Kaladan Post
နိုဝင်ဘာ ၁၉ရက်က ရန်ကုန်မြို့တွင် ပြုလုပ်သော ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီ (ကြံ့ဖွံ့) ရွေးကောက်ပွဲကြေညာစာတမ်းရှင်းလင်းပွဲတွင် ပါတီဥက္ကဋ္ဌ ဦးခင်ရီက မဲဆွယ်စည်းရုံးရင်း တပ်မ တော်နှင့် ရင်ချင်းအပ်၊ ကျောချင်းကပ်မှသာ အစိုးရဖြစ်ပြီး နောက်နေ့မပြုတ်ကျဘဲ တည်မြဲနိုင်မည် ဟု ပြောကြားခဲ့သည်။ အခြားပါတီများကို ရွေးပါက နောက်နေ့သူပုန်က တက်စီးသွားမည် ဟုလည်း သတိပေးခဲ့ကြောင်းသိရသည်။ ထို့ပြင် ကြေညာစာတမ်းပါ ကတိကဝတ်များ မတည်ခဲ့ပါက သူ့ မျက်နှာကို လက်သီးနှင့်ထိုးရန်ပင် ခွင့်ပြုကြောင်း ဦးခင်ရီက ပြောဆိုခဲ့သည်။ အလားတူ ပျော်ဘွယ် မြို့တွင် မဲဆွယ်စည်းရုံးရင်း ပါတီအထွေထွေအတွင်းရေးမှူး၊ ဒုဗိုလ်ချုပ်ကြီးဟောင်း ဦးသောင်းအေး ကလည်း စစ်တပ်ကျင်းပမည့် ရွေးကောက်ပွဲတွင် တရားမျှတမှုမရှိဟု ဝေဖန်နေကြခြင်းမှာ မနာလို လို့ ပျက်စီးရာပျက်စီးကြောင်း ပြောနေခြင်းသာ ဖြစ်သည်ဟု တုံ့ပြန်ခဲ့သည်။ ကြံ့ဖွံ့ပါတီသည် တစ်နိုင်ငံလုံးအတိုင်းအတာဖြင့် ကိုယ်စားလှယ်လောင်း ၁,၀၀၀ ကျော် ထည့်ဝင်ယှဉ်ပြိုင်မည်ဖြစ်ပြီး ပြိုင်ဘက်မရှိဘဲ အနိုင်ရရှိထားသည့် မဲဆန္ဒနယ် ၂၈ နေရာအပြင် မကွေးတိုင်း ဂန့်ဂေါမြို့နယ်တွင် လည်း ပြိုင်ဘက်သေဆုံးသဖြင့် ထပ်မံအနိုင်ရရှိမည်ဖြစ်ကြောင်း သိရသည်။

စစ်ကြောင်းထိုး တိမ်းရှောင်ရင်း မိသားစုနှင့်ကွဲကာ လဲနေသော အဘွားအိုကို PDF ရဲဘော်များ ကယ်ဆယ်

နိုဝင် ၂၁
The Kaladan Post
စစ်ကိုင်းတိုင်း၊ ယင်းမာပင်ခရိုင်အတွင်း အကြမ်းဖက်စစ်တပ်၏ စစ်ကြောင်းထိုးဝင်ရောက်မှုကြောင့် ဒေသခံများ တိမ်းရှောင်ရစဉ် မိသားစုနှင့်ကွဲကာ အာဟာရပြတ်လပ်ကာ လဲကျနေသည့် အဘွားအို တစ်ဦးကို ယင်းမာပင်ခရိုင် အမှတ် ၁၇ တပ်ရင်း (PDF) ရဲဘော်များက တွေ့ရှိခဲ့ကြောင်းသိရသည်။ ရဲဘော်များက အဘွားအိုအား မုန့်ကျွေးခြင်း၊ ရေတိုက်ခြင်းပြုလုပ်ပြီး ကျန်းမာရေးအနေအထား ပြန်လည်ကောင်းမွန်လာသည်ကို စောင့်ကြည့်ကာ ဘေးလွတ်ရာသို့ လုံခြုံစွာ ပို့ဆောင်ပေးခဲ့ကြောင်း အဆိုပါတပ်ရင်းမှ ရဲဘော်တစ်ဦးက လူမှုကွန်ရက်စာမျက်နှာတွင် ရေးသားမျှဝေခဲ့သည်။“ကျနော်တို့ စစ်ကြောင်းကြားထဲ အမေအိုတစ်ယောက် မိသားစုနဲ့ကွဲပြီး အာဟာရပြတ်လဲနေတာတွေ့တော့ ကျနော်တို့ မုန့်တွေကျွေး၊ ရေတွေတိုက်ပြီး ဘေးကင်းရာ ပို့ဆောင်ခဲ့ရတယ်” ဟု ၎င်းက ရေးသား ထားသည်။

ကြံ့ဖွတ်ကိုယ်စားလှယ်လောင်း ဦး သက်ပုံ မဲဆွယ်ပွဲတွင် စက်ရုံဝန်ထမ်းများ စုစည်းကာ ပြည်သူများနှင့်တွေ့ဆုံဟု လိမ်ညာဝါဒဖြန့်

နိုဝင် ၂၁
The Kaladan Post
နိုဝင်ဘာလ ၁၉ ရက်က စစ်ကိုင်းမြို့တွင် ကြံ့ဖွတ်ပါတီမှ ပြည်သူ့လွှတ်တော်ကိုယ်စားလှယ်လောင်း၊ ဗိုလ်ချုပ်ကြီးဟောင်း ဦးသက်ပုံ၏ မဲဆွယ်စည်းရုံးပွဲအား ပတ္တမြား၊ စိန်ကုန်း၊ ပိုးတန်း၊ ရွာထောင်၊ သောတာပန်ရပ်ကွက်များမှ ပြည်သူများနှင့် တွေ့ဆုံခဲ့သည်ဟု ဗီဒီယိုနှင့် ဓာတ်ပုံများ လူမှုကွန်ရက် တွင် တင်ပြထားသော်လည်း အမှန်တကယ်မှာ ရွှေမင်းဝံရပ်ကွက်ရှိ ပြည့်စုံကြီးပွား ဂျက်ဖာပုံး စက်ရုံမှ ဝန်ထမ်းများကိုသာ ဖိအားပေးစုစည်းကာ ကြံ့ဖွတ်ယူနီဖောင်းဝတ်ခိုင်း၍ ရိုက်ကူးထားခြင်း ဖြစ်ကြောင်း ဒေသခံများနှင့် ပွဲတက်ခဲ့ရသည့် စက်ရုံဝန်ထမ်းများက ဖော်ထုတ်ပြောဆိုသည်။ ပြည်သူတွေဆိုတာ လိမ်ညာတာပါ စက်ရုံဝန်ထမ်းတွေကို ဖိအားပေးပြီး ကြံ့ဖွတ်ယူနီဖောင်း ဝတ်ခိုင်းဖြစ်ကြောင်း စက်ရုံဖိအားကြောင့် လုပ်ပေးရတာ ဟု စက်ရုံဝန်ထမ်းတစ်ဦးက ဆိုသည်။ စစ်ကိုင်းမြို့တွင် ကြံ့ဖွတ်ပါတီ၏ မဲဆွယ်ပွဲများသို့ ပြည်သူလူထု လုံးဝမလာရောက်သဖြင့် စက်ရုံ ဝန်ထမ်းများနှင့် ၎င်းတို့၏မိသားစုဝင်များကို အတင်းအကျပ်ဆင့်ခေါ်ကာ ပြည်သူများတက်ရောက် ဟူသော မဟုတ်မမှန် ဝါဒဖြန့်ချိမှုများ ဆက်လက်လုပ်ဆောင်နေကြောင်း ဒေသခံများက ပြောဆိုကြသည်။ စစ်တက္ကသိုလ် အပတ်စဉ် ၂၉ ကျောင်းဆင်း ဒုတိယဗိုလ်ချုပ်ကြီးဟောင်း ဦးသက်ပုံသည် မင်းအောင်လှိုင်၏ ညွှန်ကြားချက်ဖြင့် စစ်ကိုင်းမြို့နယ် ပြည်သူ့လွှတ်တော် ကိုယ်စားလှယ်လောင်းအဖြစ် ကြံ့ဖွတ်ပါတီမှ ဝင်ရောက်ယှဉ်ပြိုင်သူဖြစ်သည်။

မန္တလေး PDF ဗဟိုခေါင်းဆောင် ၂ ဦးကို တပ်ပိုင်ပစ္စည်းတရားမဲ့ ထုတ်ယူမှုဖြင့် ဖမ်းဆီး အရေးယူ

နိုဝင် ၂၁
The Kaladan Post
ပြည်သူ့ကာကွယ်ရေးတပ်မတော် (မန္တလေး) – MDY PDF က ဗဟိုဦးဆောင်ကော်မတီဝင် ၂ ဦးဖြစ် သည့် ကိုမုန်တိုင်း (စစ်ရေးဌာနကြီးမှူး) နှင့် ကိုနိုင်ကြီး (ဘဏ္ဍာရှာဖွေရေးဌာနကြီးမှူး) တို့အား တပ်ပိုင် ဘဏ္ဍာပစ္စည်းများ (ကာလတန်ဖိုးမြင့်မား သည့် ပစ္စည်းများ)ကို တပ်စည်းမျဉ်းချိုးဖောက်ကာ တရား မဝင်ထုတ်ယူသွားခဲ့သည့် ကြီးလေး သော ပြစ်မှုကျူးလွန်မှုကြောင့် ဖမ်းဆီးအရေးယူထားကြောင်း ယနေ့ (နိုဝင်ဘာ ၂၁၊ ၂၀၂၅) ထုတ်ပြန်ထားသည်။ ယခုဖြစ်စဉ်ကို ၂၀၂၅ ဩဂုတ်လ ဗဟိုကော်မတီ အစည်းအဝေးနှင့် စက်တင်ဘာလ တပ်မှူးများညီလာခံတို့တွင် အပြစ်ရှိကြောင်း ဆုံးဖြတ်ခဲ့ပြီး ပစ္စည်းများ ပြန်လည်အပ်နှံရန်နှင့် ပြစ်ဒဏ်ချမှတ်ရန် အတည်ပြုခဲ့သော်လည်း တော်လှန်ရေးအခြေ အနေနှင့် ကာယကံရှင်များ၏ မေတ္တာရပ်ခံချက်အရ ယာယီဆိုင်းငံ့ထားခဲ့ခြင်းဖြစ်သည်။ သို့သော် ယနေ့အထိ ပစ္စည်းများ ပြန်လည်အပ်နှံခြင်းမရှိသဖြင့် နိုဝင်ဘာ ၁၅ရက်နေ့မှ စတင်၍ နှစ်ဦးစလုံး၏ တပ်တာဝန်အားလုံးကို ရပ်ဆိုင်းခြင်း၊ လက်နက်ဖြုတ်သိမ်းခြင်း၊ အချုပ်ဖြင့် ထိန်းသိမ်းထားခြင်း တို့ကို ဆောင်ရွက်ထားပြီး အမှုတွဲကို ပြည်သူ့ကာကွယ်ရေးတပ်မတော် စစ်ရုံးချုပ်သို့ တင်ပြထား သည်ဟုလည်း ဖော်ပြထားသည်။ MDY PDF က ဤကိစ္စသည် သာမန်စည်းကမ်းဖောက်ဖျက်မှု မဟုတ်ဘဲ ကြီးလေးသောပြစ်မှုအဆင့်သို့ ရောက်ရှိနေပြီဖြစ်ကြောင်း၊ ကောလဟာလများ မဖြစ် ပေါ်စေရန်နှင့် တော်လှန်ရေးအကျိုးကို ထိန်းသိမ်းရန်အတွက် ပြည်သူသို့ ထုတ်ပြန်ရခြင်း ဖြစ် ကြောင်း ရှင်းလင်းတင်ပြထားပြီး ပြည်သူလူထုကို စိတ်မပျက်စေရန်လည်း တောင်းပန်ထားသည်။ တပ်ဖွဲ့အနေဖြင့် အဆင့်အတန်းမခွဲခြား၊ အပြစ်ရှိသူကို ထိုက်တန်စွာ အရေးယူသည့် “တပ်ပုံကျ၊ စစ်ပုံကျ” တပ်ဖွဲ့တရပ်ဖြစ်လာရန် ဆက်လက်ကြိုးပမ်းသွားမည်ဟုလည်း MDY PDF က ပြောဆိုသည်။

ထောင်ဒဏ် နှစ် ၂၃၀ ကျော်ချမှတ်ခံ ရဲဘော်မိုးညိုကို ထောင်ပို့ဆောင်စဉ် တော်လှန်ရေးရဲဘော်များ ကယ်ထုတ်

နိုဝင် ၂၁
The Kaladan Post
မကွေးတိုင်း၊ ချောက်မြို့နယ်မှ ပြည်သူ့ကာကွယ်ရေးတပ်မတော် (ချောက်ပကဖ)၊ Chauk Guerrilla Force၊ Chauk Special Attack Force (မကွေးခရိုင်ပကဖ တပ်ခွဲ-၅) နှင့် Tiger Fighter Force ပူးပေါင်း တပ်ဖွဲ့များက နိုဝင်ဘာ ၁၉ ရက် မနက်ပိုင်းတွင် စစ်ကောင်စီထောင်ဒဏ် နှစ် ၂၃၀ ကျော်ချ မှတ်ခံထားရသည့် မြို့ပြပြောက်ကျားရဲဘော် နက်ရှိုင်း (ခေါ်) မိုးညို ကို ချောက်ရဲစခန်းမှ ဒေါင်းနေ အကျဉ်းထောင်သို့ ပို့ဆောင်စဉ် ရေနံချောင်း-မကွေးလမ်းပိုင်း၌ ကြားဖြတ်တိုက်ခိုက်ကာ အောင်မြင် စွာ ကယ်ထုတ်နိုင်ခဲ့ကြောင်း Chauk Guerrilla Forceက ထုတ်ပြန်သည်။ ရဲဘော်မိုးညိုသည် ၂၀၂၂ ခုနှစ်တွင် ချောက်မြို့ စည်ပင်သာယာရေးကော်မတီဥက္ကဌ (မြို့တော်ဝန်) ဦးသန့်ဇင်ဦးကို ပစ်ခတ် ရှင်းလင်းခဲ့သည့်အမှုနှင့် အခြားပုဒ်မမျိုးစုံဖြင့် ထောင်ဒဏ်နှစ် ၁၇၀ နှင့် ၆၇ နှစ် စသည်ဖြင့် စုစုပေါင်း ၂၃၀ ကျော် ချမှတ်ခံထားရသူ ဖြစ်သည်။ လုံခြုံရေးကား အံစာတုံး ၁ စီးနှင့် ပျူစောထီး မက်တူးကား ၁ စီး ပါဝင်သည့် ရဲတပ်ဖွဲ့ကို တော်လှန်ရေးတပ်ဖွဲ့များက တောထဲတွင် ၄ ရက်ကြာ စောင့်ဆိုင်းပြီး ကြိုတင်စီစဉ်ထားသည့်အတိုင်း နောက်ကလိုက်ပါလာသော မက်တူးကားကို ပစ်ခတ်တိုက်ခိုက်ကာ အကျဉ်းသားကားကို ရပ်တန့်အောင် လုပ်ဆောင်ခဲ့ရာ ရဲဘော်မိုးညိုက ကိုယ်တိုင် ကားတံခါးနားတွင် ရှိနေသဖြင့် ခုန်ချပြေးကာ လွတ်မြောက်လာနိုင်ခဲ့ခြင်းဖြစ်သည်။ ကားပေါ်တွင် နိုင်ငံရေးအကျဉ်းသား ၅ ဦးပါဝင်ခဲ့သော်လည်း ကျန်လေးဦးမှာ ပြေးလွတ်ရန် မကြိုးစားခဲ့ဘဲ မကွေးထောင်သို့ ရောက်ရှိသွားခဲ့ကြောင်းသိရသည်။ ရဲဘော်မိုးညိုမှာ နဖူးတွင် ဒဏ်ရာအနည်းငယ်သာ ရရှိခဲ့ပြီး လက်ရှိ လုံခြုံသည့်နေရာသို့ ရောက်ရှိနေပြီဖြစ်ကာ တော်လှန် ရေးကို ဆက်လက်တိုက်ပွဲဝင်မည်၊ မနားပါ ဟု ရဲဘော်မိုးညိုက ပြောဆိုထားသည်။ စစ်ကောင်စီ ဘက်တွင် ထိခိုက်သေဆုံးမှုရှိသည်ဟု သိရသော်လည်း အသေးစိတ်အချက်အလက်များ မသိရသေးကြောင်းနှင့် ဖြစ်စဉ်ဖြစ်ပွားရာ ချောက်-ရေနံချောင်း အမှတ်(၃) ပြည်ထောင်စုလမ်းကို တော်လှန်ရေးတပ်ဖွဲ့များက အရေးပေါ်အခြေအနေအဖြစ် ကြေညာထားသည်။

သူဌေးကြီးများကို BGF ဌာနချုပ်သို့ ကြိုရွှေ့ပြီး ကျားဖြန့်နှိမ်နင်း လူသောင်းချီရှိရာ ၉၀၀ ခန့်သာ ဖမ်းမိ

နိုဝင် ၂၁
The Kaladan Post
နိုဝင်ဘာ ၁၈ ရက်မှ စတင်၍ မြ၀တီမြို့နယ်၊ ရွှေကုက္ကိုလ်မြို့သစ်အတွင်း စစ်ကောင်စီနှင့် ကရင်နယ် ခြားစောင့်တပ် (BGF) တို့ ပူးပေါင်းကာ အွန်လိုင်းငွေလိမ်လုပ်ငန်း (ကျားဖြန့်) နှိမ်နင်းရေး အထူးစစ် ဆင်မှုတရပ် လုပ်ဆောင်နေပြီး နိုင်ငံခြားသား ၉၀၀ ကျော် (အများစုတရုတ်နိုင်ငံသား)၊ မိုဘိုင်းဖုန်း ၂ သောင်းကျော်၊ ကွန်ပျူတာနှင့် လက်တော့ ၂,၆၀၀ ကျော်ကို ဖမ်းဆီးရမိခဲ့သည်ဟု BGF ပြောခွင့်ရှိ ဒုတိယဗိုလ်မှူးကြီး နိုင်မောင်ဇော်က နိုဝင်ဘာ ၂၀ ရက်တွင် ထိုင်းသတင်းထောက်များကို ပြောသည်။ သို့သော် ဖမ်းဆီးရမိသည့် ဖုန်းနှင့် ကွန်ပျူတာများကို ဖျက်ဆီးရန် ဒုတိယဗိုလ်ချုပ်မှူးကြီး စိုးဝင်းက အမိန့်ထုတ်ထားသည်ဟု Thai PBS သတင်ထောက်က ဖော်ပြထားသဖြင့် သက်သေဖျောက်ဖျက် ရေးလား၊ တကယ်နှိမ်နင်းရေးလား ဟူသော မေးခွန်းများ ထွက်ပေါ်နေသည်။ ဒေသခံသတင်းရင်း မြစ်များနှင့် ယခင်ကျားဖြန့်လုပ်ငန်းတွင် ပါဝင်ခဲ့သူအချို့ကမူ လူသောင်းချီရှိရာ နေရာများတွင် ရာဂဏန်းသာ ဖမ်းဆီးရမိခြင်းမှာ ဟန်ပြဖမ်းဆီးမှုသာ ဖြစ်သည်၊ အဓိကသူဌေးများကို BGF က ကြိုတင်ရွှေ့ပြောင်းပေးခဲ့သည်ဟုဆိုကြပြီး အထူးသဖြင့် KK Park မှ အရေးကြီးတရုတ်နိုင်ငံသား များကို သေ့ကတေစံပြကျေးရွာ (BGF အမှတ်-၂ ဌာနချုပ်) သို့ ရွှေ့ပြောင်းထားသည်ဟု စွပ်စွဲကြပြီး BGF ဘက်က ယင်းစွပ်စွဲချက်များကို လုံး၀ ငြင်းဆိုထားသည်။ ထို့ပြင် အာဏာသိမ်းစစ်တပ်နှင့် BGF တို့၏ လက်ရှိနှိမ်နင်းမှုမှာ အနောက်နိုင်ငံများ၏ ဖိအားနှင့် အမေရိကန် FBI ဦးဆောင်သည့် Scam Centre Strike Force (SCSF) အထူးတပ်ဖွဲ့ ဖွဲ့စည်းမှု၊ တရုတ်ဦးဆောင်သည့် မဲခေါင်-လန်ချန်း ၆ နိုင်ငံ ပူးပေါင်းတိုက်ဖျက်ရေး ကြေညာချက်များနှင့် တိုက်ဆိုင်နေသဖြင့် နိုင်ငံတကာ ဖိအားကို လျှော့ချရန် ဟန်ပြလုပ်ရပ်သာ ဖြစ်နိုင်သည်ဟု မြန်မာ့အရေး တက်ကြွလှုပ်ရှားသူများက သုံးသပ်ပြောဆိုနေကြသည်။

ကတိမတည်ရင် လက်သီးနဲ့ထိုးခွင့်ပေးမည်ဆိုသူ ခင်ရီက သုဝဏ္ဏမဲဆွယ်ပွဲအတွက် ငှားလာတဲ့ ဆင်းရဲသားတွေ နေ့စားခမပေး

နိုဝင် ၂၁
The Kaladan Post
နိုဝင်ဘာ ၁၉ ရက်က ရန်ကုန်တိုင်း၊ သင်္ဃန်းကျွန်းမြို့နယ်၊ သုဝဏ္ဏအားကစားပြိုင်ပွဲရုံ ၁ တွင် ကြံ့ဖွတ် ပါတီဥက္ကဋ္ဌ ဦးခင်ရီဦးဆောင်ကျင်းပခဲ့သည့် မဲဆွယ်စည်းရုံးပွဲသို့ လူဦးရေ ၁ သောင်းခန့်တက်ရောက် ခဲ့ရာ၊ ရွှေပြည်သာ၊ မြောက်ဥက္ကလာပအပါအဝင် မြို့အစွန်ဒေသများမှ ဝင်ငွေနည်းပြည်သူများကို နေ့စားခ ၁၅,၀၀၀ မှ ၂၀,၀၀၀ ကျပ်ပေးမည်ဟု ကတိပေးကာ ကားများဖြင့် အကြိုအပို့စီစဉ်ခေါ်ယူခဲ့ သော်လည်း ပွဲပြီးဆုံးပြီး နိုဝင်ဘာ ၂၁ ရက်အထိ နေ့စားခအပြည့်အဝ မပေးဘဲ တချို့ကို တစ်ဝက် သာ ပေးအပ်ခဲ့ပြီး အများစုမှာ လုံးဝမရရှိခဲ့ကြောင်း ပြည်သူများက ပြောဆိုကြသည်။ ကားတက်ချိန် ၅,၀၀၀ ကျပ်ပေးပြီး ကျန် ၁၅,၀၀၀ ကို ပြန်လာချိန် ထပ်ပေးမည်ဟု ပြောခဲ့သော်လည်း တချို့က တစ်ပြားမှ မရနေကြကြောင်းသိရသည်။ ထို မဲဆွယ်ပွဲတွင် ထမင်းဘူးနှင့် ကြံ့ခိုင်ရေးဝတ်စုံများမှာမူ လူတိုင်းလိုလိုရရှိခဲ့သော်လည်း ငွေကြေးကတိမှာ ဖျက်ဆီးခံခဲ့ရခြင်းဖြစ်သည်။ အဆိုပါပွဲတွင် ခင်ရီက နိုင်ငံ့ဝန်ထမ်းငယ်များ အခမဲ့ခရီးစဉ်၊ ကုန်စျေးနှုန်းထိန်းချုပ်ရေး၊ လယ်သမားကြွေးမြီလျှော့ ချရေး၊ ပြည်ပရောက်နိုင်ငံသားများ ရပိုင်ခွင့်တိုးမြှင့်ရေး၊ အလုပ်အကိုင်ဖန်တီးရေးစသည်တို့ကို ကတိကဝတ်ပြုခဲ့ပြီး ကတိမတည်ရင် လက်သီးနဲ့ထိုးခွင့်ပေးပါမည် ဟုလည်း ပြောဆိုခဲ့သေးသည်။ သို့သော် မဲဆွယ်ပွဲအတွက် ငှားရမ်းလာသည့် ဝင်ငွေနည်းပြည်သူများကိုပင် ကတိအတိုင်းငွေမပေး နိုင်ခဲ့သည့်အတွက် ပါတီအပေါ် ပြည်သူလူထုအမြင်ကို ထိခိုက်စေခဲ့သည်ဟု နိုင်ငံရေးလေ့လာသူ များက သုံးသပ်ပြောဆိုကြသည်။

ရန်ကုန်ပကဖ (၁) တပ်ဖွဲ့ အထူးတိုင်းစစ်ဌာန ကွပ်ကဲမှုအောက် Rangoon Warriors PDF တပ်ရင်းဖြင့် ပြောင်းလဲဖွဲ့စည်း

နိုဝင် ၂၁
The Kaladan Post
ရန်ကုန်တိုင်း ပြည်သူ့ကာကွယ်ရေး တပ်ဖွဲ့ (၁) တိုက်ခိုက်ရေးအဖွဲ့ကို အမျိုးသားညီညွတ်ရေး အစိုးရ (NUG) ကွပ်ကဲမှုအောက်ရှိ အထူးတိုင်းစစ်ဌာန စစ်ဒေသမှတ် ၁ ရဲ့ ကွပ်ကဲမှုအောက်တွင် “Rangoon Warriors PDF” တပ်ရင်း အဖြစ် ပြောင်းလဲဖွဲ့စည်းသွားမည်ဖြစ်ကြောင်း ယင်းတပ်ဖွဲ့က ထုတ်ပြန် ကြေညာသည်။ စစ်ရေးလိုအပ်ချက်အရ ဤပြောင်းလဲမှုကို ဆောင်ရွက်မည်ဖြစ်ပြီး စစ်ဖွဲ့စည်းမှု ဆင်းကဲစစ်ဆေးနေဆဲ ဖြစ်သော်လည်း အထူးတိုင်းစစ်ဌာန၏ ကွပ်ကဲမှုနှင့် တာဝန်များကို စတင်ထမ်းဆောင်နေပြီဟု ဆိုသည်။ ရန်ကုန်တိုင်း ပကဖ တပ်ဖွဲ့ (၁) ကို ပြီးခဲ့သော ၂၀၂၄ ခုနှစ် ဖေဖော်ဝါရီ ၅ ရက်တွင် ရန်ကုန်တိုင်း ပကဖ တိုက်ခိုက်ရေး တပ်ဖွဲ့အဖြစ် စတင်ဖွဲ့စည်းခဲ့ပြီး ပကဖ လုပ်ငန်းစဉ်များနှင့် စစ်ဆင်ရေး တာဝန်များကို ဆောင်ရွက်ခဲ့သော တပ်ဖွဲ့တစ်ခု ဖြစ်သည်။ ဤတပ်ဖွဲ့သည် မဟာမိတ် တော်လှန်ရေး အဖွဲ့အစည်း (ERO) များ၊ တော်လှန်ရေး အင်အားစု များနှင့် ပူးပေါင်းကာ တိုက်ပွဲများစွာ ပါဝင်တိုက်ခိုက်ခဲ့ပြီး ခမရ ၅၉၈ တပ်ရင်း ဌာနချုပ်သိမ်း ရယူရေး တိုက်ပွဲတွင်လည်း ပါဝင်ခဲ့ကြောင်း သိရသည်။ NUG က ပြီးခဲ့သော ဩဂုတ်လအတွင်း ကာကွယ်ရေး ဝန်ကြီးဌာန (MOD) အမှတ် ၁ စစ်ဒေသတွင် အထူးတိုင်းစစ်ဌာနကို ဖွဲ့စည်းခဲ့ပြီး မဟာမိတ် ERO တပ်များ၊ ပြည်တိုင်း ပကဖ (LPDF) များနှင့် အတူ စစ်ဆင်ရေး အရှိန်အဟုန်မြှင့် ဆောင်ရွက်သွားမည်ဟု ထုတ်ပြန်ကြေညာခဲ့သည်။ ဤပြောင်းလဲဖွဲ့စည်းမှုသည် ရန်ကုန်တိုင်း တော်လှန်ရေး စစ်ရေးလုပ်ငန်းများ ပိုမို စနစ်တကျ တိကျစွာ ဆောင်ရွက်နိုင်ရန် ရည်ရွယ်ကြောင်း ဆိုသည်။