နိုဝင် (၂၆) သတင်းတိုပေါင်းချုပ်

ပုဏ္ဏားကျေးရွာနီး စစ်တပ်စစ်ကြောင်း တိုက်ခိုက်ခံရပြီး ၃၅ ခန့်သေဆုံး လက်နက်ခဲယမ်းများစွာ ရရှိ

နိုဝင် ၂၆
The Kaladan Post
ဝက်လက်မြို့နယ် စိုင်နိုင်ကွေ့စခန်းကုန်းမှ ထွက်လာသော စစ်တပ် ဗိုလ်ကြီး ဆန်းညွန့်ထွန်း ဦးစီး သည့် တပ်မ ၃၃ လက်အောက်ခံ ခမရ-၁၁၊ ခလရ-၄၂ နှင့် ပျူစော ထီးပူးပေါင်း အင်အား ၁၂၀ ခန့် ပါဝင်သည့် စစ်ကြောင်းသခင်း ပုဏ္ဏားကျေးရွာသို့ ဝင်ရောက်မီးရှို့ဖျက်ဆီးနေစဉ် ပြည်သူ့ကာကွယ် ရေးပူးပေါင်းတပ်ဖွဲ့များက နိုဝင်ဘာလ ၂၃ ရက်နေ့ နံနက် ၈ နာရီခန့်တွင် အပြင်းအထန် တိုက်ခိုက်ခဲ့ ရာ ညနေ ၆ နာရီ ၃၀ မိနစ်အထိ အချိန်ယူ တိုက်ပွဲဖြစ်ပွားခဲ့ကြောင်း ဝက်လက်မြို့နယ်ပကဖက ထုတ်ပြန်သည်။ တိုက်ပွဲအတွင်း အကြမ်းဖက်စစ်သား ၃၅ ဦးကျော် သေဆုံးပြီး အများအပြား ဒဏ်ရာရရှိခဲ့ကာ စစ်ကြောင်းပျက်၍ စိုင်နိုင်ကွေ့စခန်းအတွင်းသို့ ပြန်လည်ဆုတ်ခွာသွားကြောင်း သိရ သည်။ အဆိုပါတိုက်ပွဲအတွင်း MA-1 သေနတ် ၁၁ လက်၊ MA-2 သေနတ် ၃ လက်၊ MA-3 သေနတ် ၁၀ လက်၊ ငါးကြင်းမှီး-၂ လက် ၁ လက်၊ RPG ၁ လက်၊ စနိုက်ဘာ ၁ လက်၊ BA-100 (စိန်ပြောင်း) ၃ လက်၊ BA-90 (စိန်ပြောင်း) ၁ လက်၊ ဂျန်ဘာစက် ၁ လုံး၊ ကျည်ဘောက် ၁၆ ဘောက်၊ ၅.၅၆ ကျည် ၃၉၀ တောင့်၊ ၇.၆၂ ကျည် ၁၇၁၉ တောင့်၊ RPG ကျည် ၄ ဖူး၊ ပို့ကျည် ၇ လုံး၊ ကျည်ကာဦးထုပ် ၁၀ လုံး၊ လက်ကိုင်ဖုန်း ၂၈ လုံးနှင့် အီနာဂါဗုံး ၁၉ လုံး၊ လက်ပစ်ဗုံး ၇ လုံး တို့ကို သိမ်းဆည်းရရှိခဲ့သည်။ အဆိုပါ တိုက်ခိုက်မှုကို အမှတ် ၂ ရွှေဘိုခရိုင် ကွပ်ကဲရေးမှူး ဦးစီးမှုဖြင့် တပ်ရင်း ၁၊ ၂၊ ၃၊ ၄၊ ၅၊ ၁၇၊ ဝက်လက်မြို့နယ်ပကဖ၊ ဟံလင်းတိုက်နယ်ပကဖ၊ ခရိုင် Drone အဖွဲ့များနှင့် ဒေသခံပကဖများ ပူးပေါင်းဆင်နွဲခဲ့ခြင်းဖြစ်ပြီး ပြည်သူ့ကာကွယ်ရေးရဲဘော် ၃ ဦး မစိုးရိမ်ရ ဒဏ်ရာရရှိခဲ့ကြောင်းသိရသည်။ ကျွန်တော်တို့မြို့နယ်အတွင်း စစ်ရေးဖိအားလျော့ချ နိုင်ရန်နှင့် မလိုအပ်သော ကြွားဝါခြင်းမျိုး ရှောင်ရှားလိုခြင်းကြောင့် အသေးစိတ်သတင်းများကို ထုတ်ပြန်ခြင်းမပြုတော့ပါ ဟု ပြည်သူ့အစေခံတော်လှန်ရေးတပ်ဦး-ဝက်လက်မှ တာဝန်ရှိသူက ပြောသည်။

တနင်္သာရီမြို့နယ် သစ်ပင်ခြောက်အနီး စစ်တပ်စခန်းကုန်း တိုက်ခိုက်ခံရပြီး ၄ဦး သေဆုံး

နိုဝင် ၂၆
The Kaladan Post
နိုဝင်ဘာလ ၂၅ ရက် မွန်းလွဲ ၁ နာရီဝန်းကျင်က တနင်္သာရီတိုင်း၊ တနင်္သာရီမြို့နယ်၊ သစ်ပင်ခြောက် ကျေးရွာအနီးတွင် တပ်စွဲထားသည့် စစ်ကောင်စီတပ်စခန်းကုန်းကို မြိတ်ခရိုင်တပ်ရင်း-၂ နှင့် တနင်္သာရီမြို့နယ် ပြည်သူ့ကာကွယ်ရေးတပ်ဖွဲ့ (ပကဖ) တို့ ပူးပေါင်း၍ ဝင်ရောက်တိုက်ခိုက်ခဲ့ ကြောင်း သိရသည်။ တိုက်ခိုက်မှုအတွင်း စစ်ကောင်စီတပ်သား ၄ ဦး သေဆုံးခဲ့ပြီး တော်လှန်ရေး ပူးပေါင်းတပ်ဖွဲ့ဝင်များတွင် ထိခိုက်ကျဆုံးမှု မရှိဘဲ ဘေးလွတ်ရာသို့ ပြန်လည်ဆုတ်ခွာနိုင်ခဲ့သည်ဟု မြိတ်ခရိုင်တပ်ရင်း-၂ က ယနေ့ ထုတ်ပြန်သည်။

မင်းလက်ပံ ကျားဖြန့်လုပ်ငန်းမှ လွတ်လာသော နိုင်ငံခြား ၁၀၀၀ ကျော် သောင်းရင်းမြစ် ကမ်းနဖူး၌ သောင်တင်နေ

နိုဝင် ၂၆
The Kaladan Post
ကရင်ပြည်နယ်၊ မြဝတီမြို့နယ်၊ မင်းလက်ပံကျေးရွာရှိ DKBA ထိန်းချုပ်ခဲ့သော ကျားဖြန့်အလုပ်ရုံ များမှ နိုင်ငံခြားသား ၁၀၀၀ ကျော် (အများစုမှာ တရုတ်၊ ဗီယက်နမ်၊ အိန္ဒိယ စသည့် နိုင်ငံသားများ) တို့သည် နိုဝင်ဘာလ ၂၅ ရက် ညပိုင်းက ထွက်ပြေးလွတ်မြောက်ပြီး သောင်းရင်းမြစ်ကို လှေများဖြင့် ဖြတ်ကူး၍ ထိုင်းနိုင်ငံထဲသို့ ဝင်ရောက်ရန် ကြိုးစားခဲ့ကြောင်း နယ်စပ်သတင်းရင်းမြစ်များက ဆိုသည်။ သို့ရာတွင် ထိုင်းစစ်တပ်က အဆိုပါ နိုင်ငံခြားသားများကို ဝင်ခွင့်မပြု၊ တစ်ညလုံး မြစ်ကမ်းနဖူး မြန်မာဘက်ခြမ်းတွင် စောင့်ဆိုင်းနေရသည့် အခြေအနေဖြစ်နေကြောင်း သိရသည်။ ယခုဖြစ်ရပ်မှာ နိုဝင်ဘာလ ၂၁ ရက်က မင်းလက်ပံတွင် KNU/KNLA နှင့် စစ်ကောင်စီ၊ DKBA ပူးပေါင်းတပ်များ တိုက်ပွဲပြင်းထန်ဖြစ်ပွားခဲ့ပြီးနောက် ဖြစ်ပေါ်လာခြင်းဖြစ်သည်။ အဆိုပါတိုက်ပွဲ တွင် KNU က မင်းလက်ပံရှိ DKBA စခန်းကို သိမ်းပိုက်နိုင်ခဲ့ပြီး DKBA တပ်ဖွဲ့ဝင် ၂၃၀ ကျော် လက်နက်ချခဲ့ကာ၊ အထပ်ထပ်လုံခြုံရေးချထားသည့် ကျားဖြန့်အလုပ်ရုံများကို ဖော်ထုတ်တွေ့ရှိခဲ့ ခြင်းကြောင့် အလုပ်သမားများ အစုလိုက်အပြုံလိုက် ထွက်ပြေးလွတ်မြောက်လာခြင်း ဖြစ်သည်။ KNU က အဆိုပါ ကျားဖြန့်စနစ်မှ လူပေါင်းများစွာ တရားမဲ့ ချုပ်နှောင်ခံထားရသည်ကို တွေ့ရှိရပြီး နိုင်ငံတကာအဖွဲ့အစည်းများသို့ အရေးပေါ်စုံစမ်းစစ်ဆေးရန်နှင့် ကယ်ဆယ်ရေးအတွက် အကူအညီ တောင်းခံထားသည်။ လက်ရှိတွင် မြစ်ကမ်းနဖူး၌ သောင်တင်နေရသည့် နိုင်ငံခြား ၁၀၀၀ ကျော်၏ ကံကြမ္မာမှာ မရေရာသေးသလို ထိုင်းဘက်ခြမ်းမှ လူသားချင်းစာနာထောက်ထားမှု အရေးပေါ် လက်ခံမှုရှိ/မရှိကိုလည်း စောင့်ကြည့်နေရဆဲ ဖြစ်သည်။

လွိုင်ကော်ထောင်တွင်း အကျဉ်းသားများကို စစ်တပ်က အတင်းအကြပ် ကြိုတင်မဲပေးခိုင်း

နိုဝင် ၂၆
The Kaladan Post
ကရင်နီပြည်နယ်၊ လွိုင်ကော်အကျဉ်းထောင်အတွင်း ထောင်ဒဏ်ကျခံနေရသည့် အကျဉ်းသားအား လုံးနီးပါးကို စစ်ကောင်စီက ဖိအားပေးကာ ကြိုတင်မဲပေးခိုင်းနေကြောင်း ကရင်နီနိုင်ငံရေးအကျဉ်း သားများအစည်းအရုံး (KPPA) က ယနေ့ ထုတ်ပြန်သည်။ ပြီးခဲ့သည့် စက်တင်ဘာလကတည်းက စတင်ကာ ထောင်တွင်းရှိ အကျဉ်းသူ/သားများကို ကြိုတင်မဲစာရွက်များ ဖြည့်စေပြီး မဲပေးခိုင်းနေ ခြင်းဖြစ်ကြောင်း၊ မဲမပေးလျှင် အရေးယူမည်ဟု ခြိမ်းခြောက်မှုများလည်း ရှိနေကြောင်း လွတ်မြောက်လာသူများထံမှ သိရှိရသည်ဟု KPPA က ဆိုသည်။ “ထောင်ဒဏ်ကျခံနေရတဲ့ အကျဉ်းသားတွေကို မဲပေးခိုင်းလို့ မရပါဘူး။ စစ်တပ်က သူတို့ထုတ်ထားတဲ့ ရွေးကောက်ပွဲဆိုင်ရာ ဥပဒေကို သူတို့ကိုယ်တိုင် ချိုးဖောက်နေတာ ဒါဟာ နိုင်ငံသားတွေရဲ့ မဲပေးပိုင်ခွင့်ကို စော်ကားရုံတင် မကဘဲ မဲမသမာမှုတွေ ကြိုတင်ပြင်ဆင်နေတာလို့ ယူဆပါတယ် ဟု KPPA ဒုဥက္ကဋ္ဌ ထားဖိုးက ပြောဆိုသည်။ စစ်ကောင်စီသည် တက္ကသိုလ်ကျောင်းသားများကိုလည်း ကြိုတင်မဲမပေးမချင်း ကျောင်းအပ်နှံခွင့်မပေးခြင်း စသည့် နည်းလမ်းမျိုးဖြင့် ကြိုတင်မဲများကို အတင်းအကျပ်ကောက် ခံနေပြီး ယခု အကျဉ်းထောင်အတွင်းတွင်ပါ အလားတူ ဖိအားပေးမှုများ ပြုလုပ်နေခြင်းဖြစ်ကြောင်း KPPA က ထောက်ပြထားသည်။

မိမိထိန်းချုပ်နယ်မြေတွင်း မည်သည့်လက်နက်ကိုင်မဆို ဖြတ်သန်းခွင့်မရှိဟု DKBA က ကြေညာ

နိုဝင် ၂၆
The Kaladan Post
ဒီမိုကရေစီအကျိုးပြုကရင့်တပ်မတော် (DKBA) က ကရင်ပြည်နယ်၊ မြဝတီမြို့နယ်အတွင်း ၎င်းတို့ ထိန်းချုပ်ထားသည့် စုကလိ၊ ဝေါ်လေ နှင့် ဖလူးလေး ဒေသများသို့မည်သည့်လက်နက်ကိုင်အဖွဲ့စည်း ကိုမဆို ဖြတ်သန်းသွားလာခွင့် ပိတ်ပင်ကြောင်း ယနေ့ နိုဝင်ဘာ ၂၆ ရက်၊ ၂၀၂၅ တွင် ကြေညာချက် ထုတ်ပြန်သည်။ အရေးပေါ်ကိစ္စရှိပါက ကြိုတင်ခွင့်ပြုချက်ရယူရမည်ဟုလည်း ထည့်သွင်းဖော်ပြ ထားသည်။ ယခုကြေညာချက်သည် နိုဝင်ဘာ ၂၁ ရက်က မြဝတီတောင်ဘက် မင်းလက်ပံရွာ (DKBA ထိန်းချုပ်နယ်မြေ) ကို KNU/KNLA တပ်များက စီးနင်းတိုက်ခိုက်ခဲ့ပြီး DKBA တပ်ဖွဲ့ဝင် အနည်းဆုံး ၂၃၀ ဦး လက်နက်ချခဲ့ရသည့် ဖြစ်စဉ်အပြီး ရက်ပိုင်းအကြာတွင် ထွက်ပေါ်လာခြင်းဖြစ် သည်။ KNU ဘက်က ထိုနေရာတွင် ကျားဖြန့်လုပ်ငန်းခွင်များ တွေ့ရှိခဲ့သည်ဟုလည်း ထုတ်ပြန်ထား သည်။ DKBA ပြောရေးဆိုခွင့်ရှိသူ ဗိုလ်မှူးချုပ်စောစိန်ဝင်းက ဤကြေညာချက်သည် သီးခြား KNU ကိုသာ ဦးတည်ခြင်းမဟုတ်ဘဲ ယုံကြည်မှုအားနည်းချိန်တွင် ကိုယ်ပိုင်နယ်မြေကို ကာကွယ်ရန်နှင့် အချိတ်အဆက်ညှိနှိုင်းမှုဖြင့် သွားလာရေးကို စနစ်တကျထိန်းသိမ်းရန် ရည်ရွယ်ခြင်းသာဖြစ် ကြောင်း ရှင်းပြလင်း ပြောဆိုသည်။ ထိုဒေသများတွင် KNU၊ BGF၊ KTLA နှင့် စစ်တပ်တို့ပါ ရှိနေသဖြင့် စစ်ရေးနှင့် တိုက်ရိုက်မသက်ဆိုင်ဟုလည်း အလေးပေးပြောဆိုထားသည်။ ယခုအခါ စုကလိမြို့ကို KNU က မတ်လ ၂၀၂၄ တွင် သိမ်းပိုက်ထားပြီး ဝေါ်လေဗျူဟာကုန်းကိုလည်း KNU ပူးပေါင်းတပ်များက ဆက်လက်ဝိုင်းရံထားဆဲဖြစ်သည်။

TPS ဆုံးရှုံးတော့မည့် အမေရိကန်ရောက်မြန်မာများကို “ပြစ်မှုကြီးကျူးလွန်သူမှအပ သက်ညှာမည်” ဟု ဇော်မင်းထွန်းပြော

နိုဝင် ၂၆
The Kaladan Post
မြန်မာနိုင်ငံ၏ အုပ်ချုပ်ရေးနှင့် တည်ငြိမ်ရေး တိုးတက်မှုများကြောင့် အမေရိကန်ရောက် မြန်မာ နိုင်ငံသားများအတွက် ပေးထားသည့် ယာယီခိုလှုံခွင့် (Temporary Protected Status – TPS) ကို ရုပ်သိမ်းလိုက်ကြောင်း အမေရိကန်အစိုးရက ယမန်နေ့ (နိုဝင်ဘာ ၂၄ ရက်) တွင် ကြေညာခဲ့သည်။ ယင်းရုပ်သိမ်းမှုသည် ဧပြီ ၂၀၂၆ ခုနှစ် ဇန်နဝါရီ ၂၆ ရက်မှ စတင် အကျိုးသက်ရောက်မည်ဖြစ်ပြီး၊ ယခုအချိန်တွင် TPS ဖြင့် နေထိုင်ခွင့်ရရှိနေသူ မြန်မာနိုင်ငံသား ၄၀၀၀ နီးပါး ထိခိုက်လိမ့်မည်ဟု သိရသည်။ အမေရိကန် နိုင်ငံတော်လုံခြုံရေး ဝန်ကြီးဌာန (DHS) ဝန်ကြီး ခရစ်တီ နိုအန်က ထုတ်ပြန်ချက်တွင် မြန်မာနိုင်ငံ၏ အခြေအနေ တိုးတက်လာပြီး နိုင်ငံသားများ ဘေးကင်းစွာ နေရပ်သို့ ပြန်နိုင်လောက်အောင် ရှိလာခဲ့ကြောင်း ဖော်ပြထားသည်။ ထိုတိုးတက်မှုများတွင် အရေးပေါ်အခြေအနေ ပြီးဆုံးခြင်း၊ လွတ်လပ်ပြီး တရားမျှတသော ရွေးကောက်ပွဲများ စီမံကိန်း၊ အောင်မြင်သော အပစ်အခတ်ရပ်စဲရေး သဘောတူညီချက်များနှင့် ဒေသခံ အုပ်ချုပ်ရေး တိုးတက်မှု များ ပါဝင်ကာ၊ ပြည်သူ့ဝန်ဆောင်မှုနှင့် အမျိုးသားပြန်လည်သင့်မြတ်ရေး တိုးတက်လာကြောင်း ဆိုသည်။ ထို့နောက် အကြမ်းဖက်ဇော်မင်းထွန်း က ယနေ့ (နိုဝင်ဘာ ၂၅ ရက်) တွင် ထုတ်ပြန်ချက် ဖြင့် အမေရိကန်အစိုးရ၏ ကြေညာချက်ကို အပြုသဘောဆောင်သည့် ဆုံးဖြတ်ချက်အဖြစ် ကြိုဆို ကြောင်း အမေရိကန်ရောက် မြန်မာနိုင်ငံသားများကို မိခင်နိုင်ငံ ပြန်လာနိုင်ပြီဟု ဆိုကာ၊ လူသတ်မှု၊ မုဒိမ်းမှု အပါအဝင် ပြစ်မှုကြီး ကျူးလွန်သူများကို တရားဥပဒေအရ အရေးယူမည်ဖြစ်ကာ ကျန်သူ များကို အထူးသက်ညှာစွာ ဖြေလျှော့ ဆောင်ရွက်ပေးမည်ဟု ပြောဆိုသည်။မြန်မာနိုင်ငံတွင် စစ်တပ် အုပ်ချုပ်ရေး အောက်တွင် ဆက်လက်ဖြစ်ပွားနေသော ပြည်တွင်း စစ်ပွဲနှင့် လူ့အခွင့်အရေး ချိုးဖောက်မှုများကို ကန့်ကွက်သူများက အမေရိကန်အစိုးရ၏ဆုံးဖြတ်ချက်ကို ဝေဖန်နေကြပြီး၊ ပြန်လည်ပို့ချရန် အန္တရာယ်ရှိကြောင်း သတိပေးထုတ်ပြန်နေကြသည်။

မြင်းခြံ-နွားထိုးကြီးလမ်းတွင် ၄ လကြာ တိုက်ပွဲ၌ စစ်တပ် အယောက် ၁၀၀ ခန့် သေဆုံး

နိုဝင် ၂၆
The Kaladan Post
မန္တလေးတိုင်း၊ မြင်းခြံခရိုင်၊ မြင်းခြံ-နွားထိုးကြီးလမ်းပိုင်းတွင် ဇူလိုင် ၃၁ ရက်နေ့မှ စတင်ကာ ၄ လ ကျော်ကြာ ဖြစ်ပွားခဲ့သော တိုက်ပွဲများအတွင်း စစ်ကောင်စီတပ်ဘက်မှ အယောက် ၁၀၀ ခန့် ထိခိုက်သေဆုံးခဲ့ပြီး ဒရုန်းများ၊ လက်နက်ခဲယမ်းအချို့ သိမ်းဆည်းရရှိခဲ့ကြောင်း Myingyan Black Tiger (MBT) တပ်ဖွဲ့ခေါင်းဆောင် ဗိုလ်မိုက်ခဲက The Kaladan Post ပြောကြားသည်။ အဆိုပါ စစ်ဆင်ရေးကို မြင်းခြံမြို့အခြေစိုက် ခမရ (၁၅) တပ်ရင်း၊ နေပြည်တော်အထူးရဲကွန်မန်ဒိုတပ်ဖွဲ့နှင့် မြင်းခြံပျူစောထီးခေါင်းဆောင် သီတာယုမွန်တို့ ပူးပေါင်းကာ အင်အားအလုံးအရင်းဖြင့် ထိုးစစ်ဆင် လာခြင်းဖြစ်ပြီး ကျေးရွာအများအပြားကို မီးရှို့ဖျက်ဆီး၊ ပြည်သူများကို ဖမ်းဆီး နှိပ်စက်သတ်ဖြတ် ခဲ့ကြောင်း သိရသည်။ ထိုစစ်ကြောင်းကို Myingyan Black Tiger (MBT)၊ ဗိုလ်စားပြောက်ကျား တပ်၊ မြင်းခြံခရိုင်တပ်ရင်းများနှင့် အခြားတော်လှန်ရေးပူးပေါင်းတပ်ဖွဲ့များက ခုခံတိုက်ခိုက်ရာ တိုက်ပွဲငယ်ကြီး အကြိမ် ၃၀ ကျော် ဖြစ်ပွားခဲ့ကြောင်း ဗိုလ်မိုက်ခဲ့က ပြောဆိုသည်။ တော်လှန်ရေး တပ်ပေါင်းစုဘက်မှလည်း ထိခိုက်ကျဆုံးမှုအချို့ ရှိခဲ့သော်လည်း စစ်ကောင်စီတပ်ကို လမ်းပိုင်း အဆုံးထိ ပြန်လည်တွန်းလှန်တိုက်ခိုက်နိုင်ခဲ့ကြောင်းသိရသည်။ Myingyan Black Tiger (MBT) တပ်ဖွဲ့အနေဖြင့် စစ်အာဏာရှင်စနစ် အမြစ်ပြတ်ကျဆုံးရေးအတွက် တိုင်းရင်းသား EROs များ၊ တောင်တန်းနှင့် မြေပြန့်ညီနောင်တပ်ဖွဲ့များနှင့် ပူးပေါင်း၍ စစ်မျက်နှာပြင်များစွာတွင် ဆက်လက် တိုက်ပွဲဝင်သွားမည်ဟု ကြေညာထားသည်။

စစ်တပ်အတုရွေးကောက်ပွဲ ကျင်းပရင် လူကုန်ကူးဂိုဏ်း ပျော်စံရာ ပိုပွားမည်ဟု သံအမတ်ကြီး သတိပေး

နိုဝင် ၂၆
The Kaladan Post
၂၀၂၁ ဖေဖော်ဝါရီ တရားမဲ့ စစ်အာဏာသိမ်းမှုကြောင့် တရားဥပဒေစိုးမိုးရေး ပြိုလဲပျက်စီးသွားခြင်း က မြန်မာနိုင်ငံကို ခေတ်သစ်ကျွန်စနစ်၊ စနစ်တကျ လူကုန်ကူးမှု၊ ဆိုက်ဘာလိမ်လည်မှုနှင့် နယ်စပ် ဖြတ်ကျော် ရာဇဝတ်ဂိုဏ်းများ၏ အဓိက အချက်အချာကျရာ ဖြစ်လာစေခဲ့သည်ဟု နယူးယောက်၊ နိုဝင်ဘာ ၂၅ ကုလသမဂ္ဂ အထွေထွေညီလာခံ လူကုန်ကူးမှုတိုက်ဖျက်ရေး အဆင့်မြင့်အစည်းအဝေး တွင် မြန်မာအမြဲတမ်းကိုယ်စားလှယ် သံအမတ်ကြီး ဦးကျော်မိုးထွန်းက သတိပေးပြောဆိုသွား သည်။ စစ်အာဏာရှင်စနစ်နှင့် တရားမဲ့အာဏာသိမ်းမှုသည် ဤရာဇဝတ်မှုများ၏ ဇစ်မြစ်ပင် ဖြစ်ပြီး ဤစနစ်ဆိုးများ အပြီးတိုင် ချုပ်ငြိမ်းမှသာ ပြဿနာများ အမြစ်ပြတ် ဖြေရှင်းနိုင်မည် ဟု သံအမတ်ကြီးက အလေးပေး ထောက်ပြသည်။ စစ်ကောင်စီက ကိုယ်တိုင် စီစဉ်မည့် အတု အယောင်ရွေးကောက်ပွဲသည် အကျပ်အတည်းကို မည်မဟုတ်ဘဲ အကြမ်းဖက်မှုများ ပိုမိုဆိုးရွား စေပြီး လူကုန်ကူးဂိုဏ်းများ ပိုမိုပွားများလာစေမည်ဖြစ်ကြောင်း သံအမတ်ကြီးက ထပ်မံသတိပေး ခဲ့သည်။ ထို့ပြင် စစ်ကောင်စီ၏ အရပ်သားပြည်သူများအပေါ် မဆင်မခြင် လေကြောင်းတိုက်ခိုက်မှု၊ အဓမ္မတပ်သားစုဆောင်းမှု၊ လူ့အခွင့်အရေးချိုးဖောက်မှုများကြောင့် ပြည်သူ ၃.၆ သန်းကျော် နေရပ် စွန့်ခွာ ထွက်ပြေးနေရပြီး ထွက်ပြေးနေစဉ် အမျိုးသမီး၊ ကလေး၊ ရိုဟင်ဂျာနှင့် တိုင်းရင်းသားလူ နည်းစုများ လူကုန်ကူးခံရမည့် အန္တရာယ်နှင့် ရင်ဆိုင်နေရကြောင်း၊ မကြာသေးမီက ကိုယ်တွင်းအင်္ဂါ တရားမဲ့ ဖယ်ထုတ်ရောင်းချမှုများပင် ထွက်ပေါ်လာနေပြီဖြစ်ကြောင်း ထောက်ပြသည်။ သံအမတ် ကြီးက “အမျိုးသားညီညွတ်ရေးအစိုးရ (NUG) နှင့် တိုင်းရင်းသားတော်လှန်ရေးအဖွဲ့များ သည် အွန်လိုင်းလိမ်လည်မှု၊ လူကုန်ကူးမှုအပါအဝင် နယ်စပ်ဖြတ်ကျော်ရာဇဝတ်မှုများကို တိုက်ဖျက်ရန် ဒေသတွင်းနှင့် နိုင်ငံတကာ အဖွဲ့အစည်းများနှင့် အပြည့်အဝ ပူးပေါင်းဆောင်ရွက်သွား ရန် ခိုင်မာစွာ ကတိကဝတ်ပြုထားကြောင်း ကုလသမဂ္ဂအထွေထွေညီလာခံရှေ့တွင် ရဲဝံ့စွာ ကြေညာခဲ့သည်။