နိုဝင်ဘာ (၂၇) သတင်းတိုပေါင်းချုပ်

ကျောက်ကြီးနှင့် သရက်ချောင်းတွင် စစ်တပ်တိုက်ခိုက်မှုကြောင့် ပြည်သူတစ်ဦး သေဆုံး၊ နေအိမ်များပျက်စီး

 နိုဝင် ၂၇

The Kaladan Post

ပဲခူးတိုင်း၊ ကျောက်ကြီးမြို့နယ်တွင် အကြမ်းဖက်စစ်တပ်က ဒရုန်းဖြင့် ဗုံးကြဲတိုက်ခိုက်မှု ကြောင့် ပြည်သူတစ်ဦး သေဆုံးခဲ့ကြောင်း KNU ဗဟိုက နိုဝင်ဘာ ၂၇ ရက်တွင် ထုတ်ပြန်သည်။ နိုဝင်ဘာ ၂၁ ရက်နေ့၌ ခမရ ၃၀၇ တပ်ရင်းက သဲဖြူရွာသစ်ကို ဒရုန်းဖြင့် ဗုံးကြဲခဲ့ရာ နေအိမ်တစ်လုံး ပျက်စီးခဲ့သည်။ နိုဝင်ဘာ ၂၂ ရက်နေ့၌ နတ်သံကွင်းမှ ဒရုန်းဖြင့် တိုက်ခိုက်ခဲ့ရာ ငါးဖမ်းနေသော နိုညာရွာသား စောလယ်ဒိုထူး ဗုံးစ ထိမှန်ပြီး သေဆုံးခဲ့သည်။ စစ်တပ်က အရပ်သားများရှိရာ နေရာများကို လက်နက်ကြီးနှင့် ဒရုန်းများဖြင့် ပစ်မှတ်ထား တိုက်ခိုက်နေသဖြင့် ပြည်သူများ စိုးရိမ်ကြောက်ရွံ့မှုဖြင့် နေထိုင်နေရကြောင်း KNU က ထောက်ပြသည်။

တနင်္သာရီတိုင်း၊ သရက်ချောင်းမြို့နယ်တွင်လည်း စစ်တပ်စစ်ကြောင်းက မင်းဒပ်ကျေးရွာကို ဝင်ရောက်မီးရှို့ခဲ့ရာ နေအိမ် ၆၁ လုံး မီးလောင်ပြာကျခဲ့ကြောင်း KNU ဗဟိုနှင့် ဒေသခံများက ပြောဆိုသည်။ နိုဝင်ဘာ ၂၃ ရက်နေ့၌ စစ်ကြောင်းက တိုက်ပွဲမဖြစ်ပွားဘဲ ရွာကို စီးနင်းပြီး နေအိမ်များကို မီးရှို့ဖျက်ဆီးခဲ့သည်။ ဒေသခံတစ်ဦးက စစ်တပ်က မင်းဒပ်ရွာကို ဝင်ရောက် စီးနင်းပြီး နေအိမ်များကို မီးရှို့ခဲ့သဖြင့် ၆၁ လုံး ပျက်စီးခဲ့ကြောင်း ပြောသည်။ ဤဖြစ်ရပ်များက စစ်တပ်၏ အရပ်သားပစ်မှတ်ထားမှုကို ထင်ရှားစေကြောင်း သုံးသပ်ရသည်။ ဒေသခံများမှာ စစ်ဘေးရှောင်ရန် အခက်အခဲများနှင့် ရင်ဆိုင်နေရကြောင်း သိရသည်။

မင်းကင်းမြို့နယ် ချင်းတွင်းမြစ်အတွင်း ရွှေမျောဖောင်များကို စစ်တပ်က လေယာဉ်ဖြင့် ဗုံးကြဲ

 

နိုဝင် ၂၇

The Kaladan Post

စစ်ကိုင်းတိုင်း၊ မင်းကင်းမြို့နယ်၊ ချင်းတွင်းမြစ်အတွင်း လောင်းပြည့်ရွာအနီး ရွှေမျောဖောင် များကို စစ်တပ်က ယနေ့ နိုဝင်ဘာ ၂၇ ရက် နံနက် ၉ နာရီခန့်တွင် လေယာဉ်ဖြင့် ဗုံးကြဲ တိုက်ခိုက်ခဲ့ကြောင်း ဒေသခံများက ပြောသည်။ ဗုံးကြဲခံရမှုကြောင့် ရွှေမျောဖောင်များ မီးလောင်ပျက်စီးခဲ့ပြီး လုပ်သားများ ထိခိုက်သေဆုံးနိုင်ကြောင်း သိရသည်။ သင်တော ကျေးရွာမှ ဒေသခံတစ်ဦးက “ရွှေမျောဖောင်တွေပေါ်ကို တိုက်လေယာဉ်နဲ့ ဗုံးကြဲချသွားတာ၊ ထိခိုက်သေဆုံးမှု ရှိနိုင်တယ်၊ ထပ်ကြဲမှာစိုးလို့ ကယ်ဆယ်ရေးမလုပ်ရဲသေးဘူး” ဟု ဆိုသည်။ သေဆုံးထိခိုက်အရေအတွက်ကို လက်ရှိ အတိအကျ မသိရသေးပေ။

ယခုလ အတွင်း မင်းကင်းမြို့နယ်အတွင်း ရွှေမျောဖောင်များကို စစ်တပ်က အကြိမ်ကြိမ် လေကြောင်းတိုက်ခိုက်နေခြင်းဖြစ်သည်။ နိုဝင်ဘာ ၂၅ ရက်က မြောက်ချွန်းရွာအနီး ရွှေမျောနေရာကို တံတားဦးလေတပ်မှ A-5 Bomber ဂျက်ဖိုက်တာဖြင့် ဗုံးကြဲခဲ့သလို နိုဝင်ဘာ ၂၂ ရက်ကလည်း လောင်းပြည့်ရွာ ရွှေမျောဖောင်များကို ဗုံးကြဲတိုက်ခိုက်ရာ လုပ်သားများ ထိခိုက်သေဆုံးခဲ့ကြောင်း သိရသည်။ ဒေသခံများက စစ်တပ်သည် အရပ်သားများ အသက်မဲ့ စားရေးလုပ်ကိုင်နေသည့် ရွှေမျောနေရာများကို ရည်ရွယ်ချက်ရှိရှိ ပစ်မှတ်ထားတိုက်ခိုက် နေခြင်းဟု စွပ်စွဲပြောဆိုနေကြသည်။

အမေရိကန်လွှတ်တော်က စစ်ကောင်စီ၏ အတုအယောင်ရွေးကောက်ပွဲကို ပြတ်ပြတ်သားသား ပယ်ချရန် တောင်းဆို

 

နိုဝင် ၂၇

The Kaladan Post

အမေရိကန်လွှတ်တော်နှစ်ရပ်လုံးမှ နိုင်ငံခြားရေးရာကော်မတီဥက္ကဋ္ဌများဖြစ်သည့် Brian Mast၊ Gregory W. Meeks၊ James E. Risch နှင့် Jeanne Shaheen တို့က တရုတ် ထောက်ပံ့မှုဖြင့် စစ်ကောင်စီ ကျင်းပရန်စီစဉ်နေသည့် ရွေးကောက်ပွဲမှာ လွတ်လပ် တရားမျှတမှု လုံးဝမရှိနိုင်ကြောင်း နိုဝင်ဘာ ၂၇ တွင် ပူးတွဲကြေညာချက်ထုတ်ပြန်ခဲ့သည်။ ယင်းရွေးကောက်ပွဲမှာ စစ်အာဏာရှင်အဖွဲ့၏ ဟန်ပြလုပ်ရပ်သာ ဖြစ်ပြီး နိုင်ငံတကာကို လှည့်ဖြားရန်နှင့် တရားဝင်မှုဖန်တီးရန် ရည်ရွယ်ခြင်းသာ ဖြစ်ကြောင်း ထောက်ပြသည်။ စစ်ကောင်စီက NLD အပါအဝင် နိုင်ငံရေးပါတီ အများအပြားကို ဖျက်သိမ်းထားပြီး ၂၀၂၀ ရွေးကောက်ပွဲတွင် တရားဝင်အနိုင်ရရှိခဲ့သည့် လွှတ်တော်အမတ်များကို အကျဉ်းချထားဆဲ သို့မဟုတ် နှိပ်စက်ညှဉ်းပမ်းထားဆဲ ဖြစ်ကြောင်း ကြေညာချက်တွင် ဖော်ပြထားသည်။ ထို့ကြောင့် သမ္မထရမ့်အစိုးရအနေဖြင့် ချို့ယွင်းနေသည့် ယင်းရွေးကောက်ပွဲနှင့် ရလဒ်များကို အမေရိကန်ပြည်ထောင်စုက ပြတ်ပြတ်သားသား ပယ်ချရမည်ဟု လွှတ်တော်အမတ်များက တိုက်တွန်းထားသည်။

သို့သော် အမေရိကန်အစိုးရက မြန်မာ့အခြေအနေ တိုးတက်လာပြီဟု ဆုံးဖြတ်ကာ နိုဝင်ဘာ ၂၅ ရက်တွင် မြန်မာနိုင်ငံသားများအတွက် ယာယီခိုလှုံခွင့် TPS ကို ရုပ်သိမ်းကြောင်း ကြေညာခဲ့သည်။ အမေရိကန်အခြေစိုက် မြန်မာ့အရေးကျွမ်းကျင်သူများက ယင်းဆုံးဖြတ်ချက် မှာ အချက်အလက်များနှင့် ကိုက်ညီခြင်းမရှိကြောင်း ဝေဖန်ထားသည်။ လက်ရှိတွင် အမေရိကန်လွှတ်တော်နှင့် အစိုးရအကြား စစ်ကောင်စီ၏ ရွေးကောက်ပွဲအပေါ် သဘောထားကွဲလွဲမှု ပေါ်ပေါက်နေကြောင်း သုံးသပ်ချက်များလည်း ထွက်ပေါ်နေသည်။

အနောက်မြောက်တိုင်းမှူး ဗိုလ်ချုပ်မျိုးမင်းထွေး လာဘစားမှုနှင့် စစ်ရှုံးမှုများကြောင့် ရာထူးမှဖယ်ရှား၊ စစ်ခုံရုံးတင်

 

နိုဝင် ၂၇

The Kaladan Post

စစ်ကိုင်းတိုင်းအခြေစိုက် အနောက်မြောက်တိုင်းစစ်ဌာနချုပ် တိုင်းမှူး ဗိုလ်ချုပ်မျိုးမင်းထွေးကို လာဘ်ပေးလာဘ်ယူမှု၊ ရွှေတူးဖော်ခွင့်နှင့် သစ်ထုတ်ခွင့်များတွင် ငွေကြေးများစွာ ရယူမှု၊ စစ်ဆင်ရေးရှုံးနိမ့်မှုများနှင့် အမိန့်မနာခံမှုများကြောင့် ရာထူးမှ ဖယ်ရှားကာ စစ်ခုံရုံးတင် ထားကြောင်း စစ်ဘက်သတင်းရင်းမြစ်များက နိုဝင်ဘာ ၂၇ တွင် အတည်ပြုသည်။ ဗန်းမောက်မြို့ သိမ်းပိုက်ခံရခြင်း၊ စစ်ကြောင်းများ ချေမှုန်းခံရခြင်းအပါအဝင် စစ်ဆင်ရေး ရှုံးနိမ့်မှုများကြောင့် နိုဝင်ဘာဒုတိယအပတ်မှစ၍ ဒုစစ်ခေါင်းဆောင် စိုးဝင်းကိုယ်တိုင် စစ်ဆေးခဲ့ခြင်းဖြစ်သည်။ နိုဝင်ဘာ ၈ ရက်နောက်ပိုင်း လူမြင်ကွင်မှ ပျောက်ကွယ်သွားခဲ့သည်။ ယခင်က လားရှိုးတိုက်ပွဲတွင် ကိုးကန့်တပ်ထံ လက်နက်ချအညံ့ခံခဲ့ဖူးသူ ဖြစ်သော်လည်း ယမန်နှစ်ကုန်ပိုင်းတွင် အနောက်မြောက်တိုင်းမှူးအဖြစ် ပြန်လည်ခန့်အပ်ခံရသူ ဖြစ်သည်။

တိုင်းမှူးအသစ်အဖြစ် ကလောစစ်ဦးစီးတက္ကသိုလ်ကျောင်းအုပ်ကြီး ဗိုလ်မှူးချုပ်ကျော်သူရ (စစ်တက္ကသိုလ် အပတ်စဉ် ၄၀) ကို ခန့်အပ်လိုက်သည်။ ဗိုလ်မှူးချုပ်ကျော်သူရသည် နိုင်ငံတော်ကာကွယ်ရေးတက္ကသိုလ်၊ အမှတ် ၇ စစ်ဆင်ရေးကွပ်ကဲမှုဌာနချုပ်မှူးနှင့် စစ်ဦးစီးတက္ကသိုလ်ကျောင်းအုပ်ကြီး တာဝန်များ ထမ်းဆောင်ခဲ့သူ ဖြစ်သည်။ CDM ဗိုလ်ကြီးဇင်ယော်က ယခုအခါ စစ်တိုင်းမှူးနေရာ အများအပြားကို စစ်တက္ကသိုလ်နှင့် စစ်ဦးစီးတက္ကသိုလ်ကျောင်းအုပ်ကြီးများက ဆက်တိုက်ရယူနေပြီး ကျောင်းအုပ်များအကြား ပြိုင်ဆိုင်မှုများ ဖြစ်ပေါ်လာနိုင်ကြောင်း သုံးသပ်သည်။

စွမ်းအင်ဒုဝန်ကြီး သန့်စင်နှင့် အရာရှိများ ဆီလာဘစားမှုကြောင့် ရာထူးမှဖယ်ရှား၊ ဖမ်းဆီးအရေးယူ

 

နိုဝင် ၂၇

The Kaladan Post

လျှပ်စစ်နှင့်စွမ်းအင်ဝန်ကြီးဌာန ဒုတိယဝန်ကြီး သန့်စင်၊ ညွှန်ချုပ်နှင့် အရာရှိအချို့ကို စက်သုံးဆီခွဲတမ်းချရာတွင် လာဘ်ငွေယူမှု၊ ကုမ္ပဏီကြီးများကို မျက်နှာသာပေးချထားပေးမှု၊ ဆီမှောင်ခိုရောင်းချမှုတို့ကြောင့် ရာထူးမှ ဖယ်ရှားကာ ဖမ်းဆီးစစ်ဆေးနေကြောင်း ဆီလုပ်ငန်းရှင်များက နိုဝင်ဘာ ၂၆ တွင် အတည်ပြုသည်။ နိုဝင်ဘာ ၂၅ ရက်တွင် စစ်ကောင်စီက ဒုဝန်ကြီး သန့်စင်ကို တာဝန်မှ ရပ်စဲကြောင်း အမိန့်ထုတ်ပြန်ခဲ့သည်။ ဆီခွဲတမ်းကို BOC ကဲ့သို့ ကုမ္ပဏီကြီးများသို့ အဆမတန်ချပေးပြီး SME ဆိုင်ငယ်များကို ခွဲတမ်းနည်းပါးစွာ ချပေးခဲ့သဖြင့် တိုင်ကြားမှုများ ပေါပေါက်လာခဲ့ခြင်းဖြစ်သည်။ ဆီလုပ်ငန်းရှင်တစ်ဦးက “ကုမ္ပဏီကြီးတွေက ခွဲတမ်းပိုရအောင် လုပ်တော့ SME ဆိုင်တွေ အကုန်ထိသွားတယ်” ဟု ဆိုသည်။

ယခုဖမ်းဆီးအရေးယူမှုကို မင်းအောင်လှိုင်ကိုယ်တိုင် တိုက်ရိုက်ကိုင်တွယ်နေကြောင်း သိရသည်။ ဆီဆိုင်ငယ်များမှာ ကိုယ်ပိုင်ငွေနဲ့ ဝယ်ယူသည့်ဆီပင်လျှင် ထောက်ခံစာ လိုအပ်နေရပြီး ကုမ္ပဏီကြီးများကိုမူ ထောက်ခံစာမလိုဘဲ လွတ်လပ်စွာ သယ်ယူခွင့်ပြုထား ကြောင်း ဆီလုပ်ငန်းရှင်များက စွပ်စွဲသည်။ မော်လမြိုင်ဆီပြတ်လပ်မှုကဲ့သို့ ဖြစ်ရပ်များတွင် လည်း ဒုဝန်ကြီးအပါအဝင် အရာရှိများ၏ လက်ချက်ပါဝင်ခဲ့ကြောင်း ဆိုသည်။ ယခုအရေးယူမှု ကြောင့် ဆီဈေးကစားမှုနှင့် မညီမျှခွဲတမ်းချထားမှုများ လျော့နည်းလာနိုင်သည်ဟု မျှော်လင့်ထားကြသည်။

စစ်တပ်ရွေးကောက်ပွဲအကြို နိုင်ငံတကာရာဇဝတ်မှုများ ကျူးလွန်နေဟု IIMM သတိပေး

 

နိုဝင် ၂၇

The Kaladan Post

ကုလသမဂ္ဂ မြန်မာနိုင်ငံဆိုင်ရာ လွတ်လပ်သောစုံစမ်းစစ်ဆေးရေးယန္တရား (IIMM) က စစ်ကောင်စီ ဒီဇင်ဘာ ၂၈ ရက်တွင် ကျင်းပရန်စီစဉ်ထားသည့် ရွေးကောက်ပွဲအကြို ကာလအတွင်း စစ်တပ်က ကြီးလေးသော နိုင်ငံတကာရာဇဝတ်မှုများ ကျူးလွန်နေကြောင်း နိုဝင်ဘာ ၂၆ ရက်တွင် သတိပေးထုတ်ပြန်သည်။ ရွေးကောက်ပွဲကို ဝေဖန်ရုံမျှဖြင့် ထောင်ဒဏ် ၂၀ နှစ်အထိ သို့မဟုတ် သေဒဏ်ချမှတ်နိုင်သည့် ဥပဒေကို အသုံးပြု၍ ကလေးများအပါအဝင် လူအများအပြားကို ဖမ်းဆီးထားကြောင်း၊ ဥပဒေလုပ်ထုံးလုပ်နည်းမရှိဘဲ ဖမ်းဆီးထောင်ချမှု များလည်း ရှိနေကြောင်း IIMM က ထောက်ပြသည်။ ရွေးကောက်ပွဲကျင်းပနိုင်ရန် နယ်မြေထိန်းချုပ်ရန်အတွက် အရပ်သားကျေးရွာများကို လေကြောင်းတိုက်ခိုက်မှုများ တိုးမြှင့်လုပ်ဆောင်နေသည်ဟုလည်း စွပ်စွဲသည်။ IIMM အကြီးအကဲ နီကိုလတ်စ်ခွန်ဂျန်က “အရပ်သားများကို ပစ်မှတ်ထားတိုက်ခိုက်ခြင်းသည် စစ်ရာဇဝတ်မှု သို့မဟုတ် လူသားမျိုးနွယ် အပေါ် ရာဇဝတ်မှုဖြစ်နိုင်သည်” ဟု ပြောသည်။

ယန္တရားက အဆိုပါရာဇဝတ်မှုများနှင့်ပတ်သက်သည့် အထောက်အထားများကို အားသွန် ခွန်စိုက်စုဆောင်းနေပြီး နိုင်ငံတကာတရားရုံးများတွင် အသုံးပြုနိုင်ရန် ပြင်ဆင်ထားကြောင်း အသိပေးသည်။ ပြည်သူများအနေဖြင့် စစ်တပ်၏ ရာဇဝတ်မှုအထောက်အထားများရှိပါက Signal နံပါတ် +41 76 691 12 08 သို့ ဘေးကင်းစွာ ဆက်သွယ်ပေးပို့နိုင်ကြောင်း IIMM က တိုက်တွန်းထားသည်။ ယန္တရားကို ၂၀၁၈ ခုနှစ်တွင် ကုလသမဂ္ဂလူ့အခွင့်အရေးကောင်စီက ဖွဲ့စည်းခဲ့ခြင်းဖြစ်ပြီး မြန်မာနိုင်ငံအတွင်း ကျူးလွန်သည့် အကြီးလေးဆုံး နိုင်ငံတကာ ရာဇဝတ်မှုများအတွက် တာဝန်ခံမှုရှိစေရန် ရည်ရွယ်ကြောင်း သိရသည်။

စစ်အာဏာသိမ်းမှုကြောင့် မြန်မာနိုင်ငံ ခေတ်သစ်ကျွန်စနစ်နှင့် လူကုန်ကူးမှု ပျော်စံရာဖြစ်လာ ဟု ဦးကျော်မိုးထွန်း သတိပေး

 

နိုဝင် ၂၇

The Kaladan Post

ကုလသမဂ္ဂဆိုင်ရာ မြန်မာအမြဲတမ်းကိုယ်စားလှယ် သံအမတ်ကြီး ဦးကျော်မိုးထွန်းက စစ်အာဏာသိမ်းမှုကြောင့် မြန်မာနိုင်ငံသည် ခေတ်သစ်ကျွန်ပြုခြင်း၊ လူကုန်ကူးမှု၊ ဆိုက်ဘာ ရာဇဝတ်မှုနှင့် နယ်စပ်ဖြတ်ကျော်ရာဇဝတ်မှုများ ပျော်စံရာရပ်ဝန်းတစ်ခု ဖြစ်လာနေကြောင်း နိုဝင်ဘာ ၂၅ ရက်က ကုလသမဂ္ဂ အထွေထွေညီလာခံ အဆင့်မြင့်အစည်းအဝေးတွင် သတိပေးပြောဆိုသည်။ စစ်အုပ်စုက တရားစီရင်ရေးယန္တရားကို ဖျက်ဆီးခဲ့သဖြင့် စနစ်တကျ လူကုန်ကူးမှုများ တဟုန်ထိုးပွားလာပြီး ကိုယ်တွင်းအင်္ဂါ တရားမဝင်ဖယ်ထုတ်ရောင်းချမှု များပင် ပေါ်ပေါက်လာကြောင်း ထောက်ပြသည်။ စစ်အာဏာရှင်စနစ်နှင့် မတရား အာဏာသိမ်းမှုမှာပင် ပြဿနာ၏ဇစ်မြစ်ဖြစ်ကြောင်း၊ ထိုစနစ်ဆိုးများ အပြီးတိုင်ချုပ်ငြိမ်းမှ သာ ပြဿနာဖြေရှင်းနိုင်မည်ဟု အလေးပေးပြောဆိုသည်။ စစ်တပ်၏ အရပ်သားဗုံးကြဲ သတ်ဖြတ်မှုနှင့် ဖိနှိပ်မှုများကြောင့် ပြည်တွင်းနေရပ်စွန့်ခွာ သန်း ၃.၆ ခန့်ရှိလာပြီး ထိုသူများမှာ အထူးသဖြင့် အမျိုးသမီးနှင့် ကလေးများ လူကုန်ကူးခံရမှု အန္တရာယ်နှင့် ရင်ဆိုင်နေရကြောင်း ဆိုသည်။

စစ်ကောင်စီ စီစဉ်နေသည့် အတုအယောင်ရွေးကောက်ပွဲသည် အကျပ်အတည်းကို ဖြေရှင်း ပေးမည်မဟုတ်ဘဲ အကြမ်းဖက်မှုနှင့် လူကုန်ကူးမှုများကို ပိုမိုတိုးပွားစေမည်ဟု သံအမတ်ကြီး က သတိပေးသည်။ အမျိုးသားညီညွတ်ရေးအစိုးရနှင့် တိုင်းရင်းသားတော်လှန်ရေး အဖွဲ့များ အနေဖြင့် အွန်လိုင်းလိမ်လည်မှုများအပါအဝင် နယ်စပ်ဖြတ်ကျော်ရာဇဝတ်မှုများကို တိုက်ဖျက်ရန် ဒေသတွင်းနှင့် နိုင်ငံတကာ အဖွဲ့အစည်းများနှင့် အပြည့်အဝ ပူးပေါင်း ဆောင်ရွက်သွားမည်ဟု ကတိပြုထားကြောင်း ထည့်သွင်းပြောဆိုသည်။ အိမ်နီးချင်းနိုင်ငံ များနှင့် နိုင်ငံတကာတို့၏ လူကုန်ကူးတိုက်ဖျက်ရေး အရေးယူဆောင်ရွက်ချက်များကို ကျေးဇူးတင်ရှိကြောင်း ဖော်ပြခဲ့သည်။

သထုံ နောင်ဘိုရွာတွင် ပြည်သူများ အတုအယောင်ရွေးကောက်ပွဲ ဆန့်ကျင်စာရွက်ကပ် လှုပ်ရှားမှုပြု

 

နိုဝင် ၂၇

The Kaladan Post

မွန်ပြည်နယ်၊ သထုံမြို့နယ်၊ နောင်ဘိုရွာအဝင်ဆိုင်းဘုတ်တွင် တော်လှန်ပြည်သူများက အကြမ်းဖက်စစ်တပ်၏ အတုအယောင်ရွေးကောက်ပွဲကို ဆန့်ကျင်ကြောင်း စာသားပါရှိသည့် စာရွက်များကို နိုဝင်ဘာ ၂၆ ရက်တွင် ကပ်လှုပ်ရှားခဲ့ကြောင်း သိရသည်။ ယင်းလှုပ်ရှားမှုသည် စစ်ကောင်စီ၏ လိမ်ညာရွေးကောက်ပွဲကို လက်မခံကြောင်း ပြည်သူလူထုက ထပ်လောင်း ဖော်ပြခြင်းဖြစ်သည်။ မွန်ပြည်နယ်အတွင်း အလားတူ ရွေးကောက်ပွဲဆန့်ကျင်ရေး လှုပ်ရှားမှုများ ဆက်လက်ပေါ်ထွက်နေဆဲဖြစ်ကြောင်း ဒေသခံများက ဆိုသည်။

 

ခင်ဦးမြို့နယ်တွင် စစ်တပ် စစ်ကြောင်းထပ်ထိုးမည်ဟု ကြောက်ရွံ့၍ ကျေးရွာ ၂၀ ကျော်မှ သောင်းချီပြည်သူ ဆက်လက်တိမ်းရှောင်

 

နိုဝင် ၂၇

The Kaladan Post

စစ်ကိုင်းတိုင်း၊ ခင်ဦးမြို့နယ်အတွင်း အကြမ်းဖက်စစ်တပ်က ထပ်မံစစ်ကြောင်းထိုးရန် ပြင်ဆင်နေ သဖြင့် ကျေးရွာ ၂၀ ကျော်မှ သောင်းနှင့်ချီသော ပြည်သူများ ဆက်လက်တိမ်းရှောင်နေရကြောင်း နိုဝင်ဘာ ၂၆ ရက်တွင် သိရသည်။ နိုဝင်ဘာ ၂၃ ရက်က မုံလှကျေးရွာအနီး တိုက်ပွဲတွင် စစ်သား ၈၀ ဝန်းကျင် သေဆုံးပြီး လက်နက် ၂၉ လက်ဆုံးရှုံးခဲ့သည့် စစ်ကြောင်းမှာ မုံလှရွာအတွင်း အင်အား ပြန်စုဖွဲ့နေကြောင်း ဒေသခံများက ဆိုသည်။ ထို့ကြောင့် မုံလှ၊ သာဝတ္ထိ၊ မြင်းကျ၊ ဥယျဉ်၊ ကျွန်းတောကြီး၊ မကျီးအုပ်၊ ယာတော်၊ သရက်ပင်စု၊ ကားဆိပ်၊ ကလုံ၊ ငါးရုံကြီး၊ ရှားတော်၊ သရက်ကုန်း၊ ကင်းပြစ်၊ ရှင်မင်းတွဲ စသည့် ခင်ဦးမြို့နယ်ရွာများအပြင် ကန့်ဘလူနှင့် ရေဦးမြို့နယ်ရွာများမှလည်း ပြည်သူများ ဆက်လက်ထွက်ပြေးတိမ်းရှောင်နေရသည်။ စစ်ရေး သတင်းရင်းမြစ်က “စစ်ခွေးတွေ မုံလှမှာ အင်အားထပ်စုနေတော့ စစ်ကြောင်းထပ်ထိုးလာနိုင် တယ်” ဟု ပြောသည်။

လက်ရှိ စစ်ဘေးရှောင်ပြည်သူများကို ခင်ဦးမြို့နယ် ပအဖ၊ ပကဖ၊ မြို့နယ်လူသားစာနာတာဝန်ခံ၊ တရားရေးဥက္ကဋ္ဌ၊ အခွန်တော်အရာရှိ၊ ဘဏ္ဍာရေး၊ သယံဇာတ၊ လျှပ်စစ်၊ စိုက်ပျိုးရေးဌာနများနှင့် ကျေးရွာပအဖ၊ ပကဖများက ထောက်ပံ့ကူညီနေကြောင်း သိရသည်။

ထိုင်းနိုင်ငံခြားရေးဝန်ကြီး၊ စစ်တပ်ရွေးကောက်ပွဲ အသိအမှတ်မပြု၊ ဒေါ်စုကို လွှတ်ပေးရန် တောင်းဆို

နိုဝင် ၂၇

The Kaladan Post

ထိုင်းနိုင်ငံခြားရေးဝန်ကြီး Sihasak Phuangketkeow က မြန်မာစစ်တပ်ကျင်းပမည့် ရွေးကောက်ပွဲသည် လွတ်လပ်မှုနှင့် ယုံကြည်စိတ်ချရမှု မရှိသဖြင့် အသိအမှတ်မပြုကြောင်း နိုဝင်ဘာ ၂၅ ရက်တွင် ထုတ်ဖော်ပြောဆိုသည်။ အသက် ၈၀ အရွယ် ဒေါ်အောင်ဆန်းစုကြည်ကို လူသားချင်းစာနာထောက်ထားမှုဖြင့် ချက်ချင်းလွှတ်ပေးရန်လည်း တောင်းဆိုခဲ့သည်။ “သူမကို လွှတ်ပေးဖို့ အချိန်တန်ပြီ” ဟု ဝန်ကြီးက အတိအလင်း ပြောကြားခဲ့သည်။ ရွေးကောက်ပွဲပြီးသည့် တိုင် အာဆီယံအနေဖြင့် မြန်မာနှင့် ပြန်လည်ထိတွေ့ဆက်ဆံရန် ခက်ခဲနေဦးမည်ဟုလည်း သတိပေးသည်။

၂၀၁၀ ခုနှစ် မပြည့်စုံခဲ့သည့် ရွေးကောက်ပွဲမှ ဒေါ်စုလွှတ်မြောက်လာပြီး နိုင်ငံရေးပြုပြင် ပြောင်းလဲ မှု စတင်ခဲ့သည်ကို ဥပမာပေးကာ ယခုရွေးကောက်ပွဲမှလည်း အလားတူ အခွင့်အရေးတစ်ခု ဖြစ်လာနိုင်သည်ဟု ဝန်ကြီးက အကြံပြုခဲ့သေးသည်။ သို့သော် လက်ရှိအခြေအနေတွင် လွတ်လပ် ပြီး ယုံကြည်ရသည့် ရွေးကောက်ပွဲ ဖြစ်လာမည်မဟုတ်ကြောင်း ထပ်လောင်းအတည်ပြုခဲ့သည်။