အောက်တို (၁၂) သတင်းတိုပေါင်းချုပ်

စစ်တပ်ရွေးကောက်ပွဲငြင်းပယ်ရေးနှင့် နိုင်ငံရေးအကျဉ်းသားလွတ်မြောက်ရေးကို အာဆီယံသို့ တော်လှန်ရေးအဖွဲ့များတောင်းဆို

အောက်တို (၁၂)
The Kaladan Post

အမျိုးသားညီညွတ်ရေးအစိုးရ (NUG)၊ ပြည်ထောင်စုလွှတ်တော်ကိုယ်စားပြုကော်မတီ (CRPH)၊ အမျိုးသားညီညွတ်ရေးအတိုင်ပင်ခံကောင်စီ (NUCC) နှင့် တိုင်းရင်းသား တော်လှန်ရေးအဖွဲ့အစည်းများအပါအဝင် စုစုပေါင်းအဖွဲ့ ၂၀ ဖွဲ့သည် အာဆီယံအား စစ်တပ်ပြုလုပ်မည့် မည်သည့်ရွေးကောက်ပွဲမဆို ငြင်းပယ်ရန်နှင့် အသိအမှတ်မပြုရန် တောင်းဆိုကြသည်။ ထို့အပြင် ဒေါ်အောင်ဆန်းစုကြည်၊ သမ္မတဦးဝင်းမြင့်အပါအဝင် နိုင်ငံရေးအကျဉ်းသားအားလုံးကို ချက်ချင်းလွှတ်ပေးရန်လည်း တောင်းဆိုခဲ့ကြသည်။

အဖွဲ့အစည်းများက အာဆီယံဘုံသဘောတူညီချက် ၅ ချက်ကို အကောင်အထည်ဖော်ရေးတွင် စစ်တပ်၏ ပျက်ကွက်မှုများကို တာဝန်ခံစေရန်၊ အရပ်သားများအပေါ် အကြမ်းဖက်မှုများ ရပ်တန့်ရေးအတွက် အရေးယူဆောင်ရွက်ရန်နှင့် စစ်တပ်အား အာဆီယံအစည်းအဝေးများမှ ဖယ်ရှားရန် ဖိအားပေးအရေးယူစေလိုကြသည်။ ထိုအဖွဲ့များအနက် KNU၊ CNF၊ KPICT၊ KNPP/IEC စသည့် တိုင်းရင်းသားတပ်ဖွဲ့များပါဝင်ကြပြီး အာဆီယံအနေနဲ့ မြန်မာပြည်တွင် ဒီမိုကရေစီပြန်လည်ထူထောင်ရေးအတွက် တာဝန်ရှိကြောင်း အသိပေးအကြောင်းကြား ခဲ့ကြသည်။

ပလောက်မြို့ရှိ စစ်မှုထမ်းတပ်သားသစ် ၄ ဦး KNU တပ်ဖွဲ့ထံ အလင်းဝင်

အောက်တို (၁၂)
The Kaladan Post

တနင်္သာရီတိုင်း၊ ပလောက်မြို့ အခြေစိုက် အမှတ် (၁၂) တိုင်းဗဟိုလေ့ကျင့်ရေး သင်တန်းကျောင်းမှ စစ်မှုထမ်းတပ်သားသစ် ၄ ဦးသည် အောက်တိုဘာလ ၅ ရက်နှင့် ၈ ရက်နေ့တွင် တစ်သီးပွားစွာ ထွက်ပြေးပြီး ကရင်အမျိုးသားလွတ်မြောက်ရေးတပ်မတော် (K.N.L.A) တပ်မဟာ (၄) နှင့် K.N.D.O တပ်ရင်း (၇) ထံ အလင်းဝင်ရောက်ခဲ့ကြောင်း KNU မြိတ်–ထားဝယ်ခရိုင်က ထုတ်ပြန်ခဲ့သည်။ ထိုသူများသည် စစ်တပ်အဖွဲ့က အတင်းအဓမ္မ ဖမ်းဆီးအပ်နှံ၍ လေ့ကျင့်ရေးသင်တန်းများတွင် ထိုက်တန်မသောစစ်ဆင်ရေးဆောင်ရွက် စေခံရသူများဖြစ်ကြောင်း သိရသည်။

အဆိုပါ တပ်သားသစ်များသည် လက်နက်မဲ့အနေဖြင့် တော်လှန်ရေးတပ်ဖွဲ့များထံ အလင်းဝင်ခဲ့ခြင်းဖြစ်ပြီး KNU အနေဖြင့်လည်း စစ်တပ်တွင် မတရားစစ်မှုထမ်း ခိုင်းစေခံရသူများအား လက်နက်ချကာ တော်လှန်ရေးတပ်များထံ ပူးပေါင်းဝင်ရောက်ရန် တိုက်တွန်းထားသည်။ ထို့ပြင် အောက်တိုဘာလ ၁ ရက်နေ့တွင်လည်း ခလရ–၂၆၅ တပ်ရင်းမှ တပ်သားတစ်ဦး MA–1 သေနတ်တစ်လက်ကို ယူဆောင်လာပြီး K.N.L.A တပ်မဟာ (၄) နှင့် K.N.D.O တပ်ရင်း (၇) ထံသို့ အလင်းဝင်ခဲ့ကြောင်း လည်း သိရှိရသည်။

တောင်ကြီးမြို့ စိန်ပန်းရပ်ကွက်တွင် စစ်မှုထမ်းကြေးမပေးနိုင်သည့် အမျိုးသမီးကို မောင်းထုတ်ခံရ

အောက်တို (၁၂)
The Kaladan Post

ရှမ်းပြည်နယ် တောင်ကြီးမြို့ စိန်ပန်းရပ်ကွက်အတွင်း အုပ်ချုပ်ရေးမှူး သောင်းရွှေက စစ်မှုထမ်းကြေး လစဉ် ငွေကျပ် ၃၀၀၀၀ မပေးနိုင်သည့် အမျိုးသမီးတစ်ဦးအား ရပ်ကွက်ထဲမှ မောင်းထုတ်ခဲ့ကြောင်း ဒေသခံများက သိရသည်။ ထိုအမျိုးသမီးသည် ကျောင်းသူ သုံးဦး၏ မိခင်ဖြစ်ပြီး နေ့စဉ် အလုပ်လုပ်ကာ သားသမီးများကို စားဝတ်နေရေး ပြုစုနေရသူဖြစ်သော်လည်း စီးပွားရေးအခက်အခဲကြောင့် စစ်မှုထမ်းကြေးပေးရန် မဖြစ်နိုင်ခဲ့ခြင်းဖြစ်သည်။

ဒေသခံများအဆိုအရ သောင်းရွှေနှင့် ရွှေတောင်ရပ်ကွက် အုပ်ချုပ်ရေးမှူး သန်းရွှေတို့သည် စစ်မှုထမ်းအကြောင်း ပြ၍ ပြည်သူများထံမှ ငွေညှစ်နေသူများဖြစ်ကြောင်း၊ လစဉ်အိမ်တိုင်းမှ စစ်မှုထမ်းကြေး အနည်းဆုံး ၂၀,၀၀၀ ကျပ်မှ ၈၀,၀၀၀ ကျပ်အထိ ကောက်ခံနေကြသည်ဟုဆိုသည်။ ထို့အပြင် သန်းရွှေကို လက်နက်အရောင်းအဝယ်နှင့် ငွေညှစ်မှုများအတွက် စုံစမ်းရာတွင် တာဝန်မရှိဟုဆိုပြီး ပြန်လွှတ်ပေးခံရခြင်းလည်း ရှိကြောင်း သိရသည်။ တောင်ကြီးမြို့သည် လက်ရှိတွင် စစ်တပ်နှင့် ပအိုဝ်းပြည်သူ့စစ် (PNO)၊ ပျူစောထီးအဖွဲ့တို့၏ ထိန်းချုပ်မှုအောက်တွင်ရှိနေကြောင်း ဒေသခံများက ပြောဆိုကြသည်။

စလင်းမြို့နယ် ငွေတောင်ကျေးရွာမှ လူငယ် ၁၁ ဦးကို စစ်တပ် ပေါ်တာဆွဲဖမ်းဆီး

အောက်တို (၁၂)
The Kaladan Post

မကွေးတိုင်း စလင်းမြို့နယ် ဖောင်းလင်းအုပ်စု ငွေတောင်ကျေးရွာရှိ လူငယ် ၁၁ ဦးကို စစ်တပ်နှင့် ပျူစောထီးအဖွဲ့များ ပူးပေါင်း၍ စစ်မှုထမ်းအဖြစ် ပေါ်တာဆွဲဖမ်းဆီးခဲ့ကြောင်း သိရသည်။ ဖမ်းဆီးခံရသူများသည် တောထဲတွင် အလုပ်လုပ်ပြီး အိမ်ပြန်လမ်းတွင် ဖမ်းဆီးခံရသူများဖြစ်ကြောင်း ဒေသခံများက ပြောဆိုသည်။ ထိုဖမ်းဆီးခံရသူများအနက် ၇ ဦးကို တစ်ဦးလျှင် သိန်း ၅၀ မှ သိန်း ၈၀ အထိ ငွေဖြင့် ပြန်ရွေးထားပြီး လူငယ် ၃ ဦးကိုတော့ စစ်မှုထမ်းအဖြစ် ပို့ထားကြောင်း သိရသည်။

ထို့ပြင် အောက်တိုဘာလ ၇ ရက်နေ့တွင်လည်း ငွေသောင်ကျေးရွာ၌ ပျူစောထီးအဖွဲ့ အင်အား ၁၀ ဦး ဝင်ရောက်၍ လူငယ် ၇ ဦးကို ပေါ်တာဆွဲဖမ်းဆီးခဲ့ကြောင်း သိရှိရသည်။ လက်ရှိတွင် စလင်းမြို့နယ်အတွင်း လူငယ် ဆယ်ချီသည်များကို စစ်မှုထမ်းအတွက် ဖမ်းဆီးနေပြီး အောက်တိုဘာလ ၁၅ ရက်နေ့တွင် စတင်မည့် စစ်မှုထမ်းအပတ်စဉ် (၁၈) အတွက် စစ်တပ်က အတင်းအဓမ္မ ပေါ်တာဆွဲမှုများ လုပ်ဆောင်နေကြောင်း ဒေသခံများက ပြောကြသည်။

ချောင်းဦးမြို့မရဲစခန်းကို တော်လှန်ရေးတပ်များ တိုက်ခိုက် စစ်သား ၅ ဦး သေဆုံး

အောက်တို (၁၂)
The Kaladan Post

စစ်ကိုင်းတိုင်း ချောင်းဦးမြို့မရဲစခန်းအား တော်လှန်ရေးတပ်များက လက်နက်ကြီးနှင့် ဒရုန်းများဖြင့် တိုက်ခိုက်ရာ စစ်သား ၅ ဦး သေဆုံးပြီး ၁ ဦး ဒဏ်ရာရရှိခဲ့ကြောင်း CHU PDF တာဝန်ရှိသူက ထုတ်ဖော်ပြောကြားသည်။ အဆိုပါတိုက်ခိုက်မှုကို အောက်တိုဘာ ၁၀ ရက် နံနက်ပိုင်းတွင် လုပ်ဆောင်ခဲ့ပြီး ၆၀ မမ လက်နက်ကြီးမှ ဗုံးသီး ၂ လုံးပစ်ခတ်ရာ ကားဂိုဒေါင် ပျက်စီးသွားကြောင်း သိရသည်။ ထို့နောက် ဒရုန်းမှ ဗုံးသီး ၁ လုံး ထပ်မံကြဲတိုက်ခိုက်ရာ စစ်သားများ သေဆုံးမှုများ ဖြစ်ပွားခဲ့သည်။

သေဆုံးသွားသူများထဲမှ ၁ ဦးကို နမခတပ်ဌာနချုပ်သို့ သယ်ဆောင်သွားကြောင်းသတင်းရပြီး၊ ထိုသူမှာ အရာရှိတစ်ဦးဖြစ်နိုင်ကြောင်း ယူဆရသည်။ တိုက်ခိုက်စဉ် စစ်တပ်ဘက်မှ ပြန်လည်ပစ်ခတ်မှု မရှိခဲ့ကြောင်း CHU PDF မှ ပြောကြားသလို၊ ဤတိုက်ခိုက်မှုတွင် CHU PDF နှင့် BLDF တို့ ပူးပေါင်းပါဝင်ခဲ့ပြီး တော်လှန်ရေးတပ်ဖွဲ့ဝင်များ အထိအခိုက်မရှိ ပြန်လည်ဆုတ်ခွာနိုင်ခဲ့ကြောင်းလည်း သိရသည်။

ဖားကန့်မြို့နယ် မလန်းရွာအနီး တိုက်ပွဲပြင်းထန် စစ်တပ် လေကြောင်းဖြင့် ဗုံးကြဲတိုက်ခိုက်

အောက်တို (၁၂)
The Kaladan Post

ကချင်ပြည်နယ် ဖားကန့်မြို့နယ် မလန်းကျေးရွာအနီးတွင် တိုက်ပွဲပြင်းထန်နေသဖြင့် စစ်တပ်ဘက် အထိနာရှိလာရာ လေကြောင်းမှ ဗုံးကြဲတိုက်ခိုက်ခဲ့ကြောင်း KIA စစ်ရေးသတင်းရင်းမြစ်က ပြောကြားသည်။ အောက်တိုဘာ ၁၀ ရက် ညနေ ၆ နာရီခန့်တွင် ဂျက်ဖိုက်တာဖြင့် ဗုံးကြဲတိုက်ခိုက်ပြီးနောက် နံနက်ပိုင်းတွင် Y12 လေယာဉ်မှ ဗုံးသီး ၄၀ ခန့် ကျဲချတိုက်ခိုက်ခဲ့ကြောင်း သိရသည်။ ထို့အပြင် အောက်တိုဘာ ၉ ရက်နေ့တွင်လည်း ဂျက်ဖိုက်တာဖြင့် တစ်ကြိမ် ထပ်မံဗုံးကြဲတိုက်ခိုက်ခဲ့ကြောင်းလည်း ဖော်ပြသည်။

ဖားကန့်မြို့အရှေ့ဘက်ခြမ်းတွင် စစ်တပ်က စစ်ကြောင်းထိုးလာရာ KIA နှင့် KPDF တပ်ဖွဲ့များက ပူးပေါင်း၍ ဝိုင်းဝန်းပိတ်ဆို့တိုက်ခိုက်နေကြောင်း သိရသည်။ တိုက်ပွဲသည် ၆ ရက်နီးပါး ဆက်လက်ပြင်းထန်နေပြီး စစ်တပ်ဘက်အထိနာများ ရှိကြောင်း သတင်းရသည်။ ယခင်လများအတွင်းလည်း ဖားကန့်ဒေသတွင် စစ်တပ်၏ ပစ်ခတ်မှုများကြောင့် ပြည်သူ ၉၀ နီးပါး သေဆုံးပြီး ၂၇၀ ခန့် ဒဏ်ရာရရှိထားကြောင်း ဒေသခံများက ဖွင့်ဟထားသည်။

ညောင်ဦးမြို့နယ် စစ်တပ် စစ်ကြောင်းဝင် မီးရှို့ဖျက်ဆီးမှုကြောင့် ပြည်သူထောင်ချီ ထွက်ပြေးနေ

အောက်တို (၁၂)
The Kaladan Post

မန္တလေးတိုင်း၊ ညောင်ဦးမြို့နယ်အတွင်းရှိ ကန်နီပေါက်၊ ကျောက်ကန်နှင့် မန်ကျည်းတန်းကျေးရွာများကို စစ်တပ် စစ်ကြောင်းထိုးဝင်ပြီး နေအိမ်များကို မီးရှို့ဖျက်ဆီးနေကြောင်း ဒေသခံများက ဖွင့်ဟသည်။ အောက်တိုဘာ ၁၀ ရက်နေ့မှ စတင်၍ သေနတ်များ ပစ်ခတ်ကာ ကျေးရွာများသို့ ဝင်ရောက်တိုက်ခိုက်ခဲ့ပြီး ယနေ့အထိ မီးလောင်မှုဆက်လက်ဖြစ်ပွားနေကြောင်း သိရသည်။ ယခင်နေ့တွင် မန်ကျည်းတန်းရွာမှ နေအိမ်အတွင်း ပစ္စည်းများကို စစ်တပ်မှ ယူဆောင်သွားခဲ့ကြောင်းလည်း သတင်းရရှိသည်။

ယခုအခါ စစ်တပ်၏ လှည့်လည်သွားလာမှုကြောင့် ကျေးရွာ ၁၀ ရွာခန့်မှ ပြည်သူထောင်နဲ့ချီသည်များ ဘေးလွတ်ရာ သို့ ထွက်ပြေးတိမ်းရှောင်နေရကြောင်း သိရသည်။ ဒေသခံများအဆိုအရ စစ်တပ်အင်အား ရာနဲ့ချီ၍ သေနက်များပစ်ခတ်ပြီးနောက် အိမ်အတွင်း ဝင်၍ တန်ဖိုးရှိပစ္စည်းများကို ဖျက်ဆီးယူဆောင်သွားကြောင်း ဖော်ပြခဲ့သည်။ ထို့အပြင် ကျောက်ပန်းတောင်း–ညောင်ဦးလမ်းပိုင်းတွင်လည်း စစ်တပ်မှ လူငယ်များကို ပေါ်တာဆွဲဖမ်းဆီးကာ ငွေကြေးတောင်းခံနေကြောင်း ဒေသခံများက ထပ်မံပြောကြားသည်။

မုံရွာမှ ထွက်လာသော စစ်ကော်မရှင်ရေယာဉ် ၁၅ စီးကို တော်လှန်ရေးတပ်များ တိုက်ခိုက်

အောက်တို (၁၂)
The Kaladan Post

စစ်ကိုင်းတိုင်း၊ မုံရွာမြို့မှ အောက်ဘက်သို့ စုန်ဆင်းလာသော စစ်ကော်မရှင်ရေယာဉ် ၁၅ စီးအား တော်လှန်ရေးပူးပေါင်းတပ်များက တိုက်ခိုက်ခဲ့ကြောင်း Chindwin Fighter Group (CFG) မှ ဖော်ပြသည်။ အောက်တိုဘာ ၁၁ ရက် မနက်ပိုင်းတွင် ချင်းတွင်းမြစ်တစ်ဝိုက်၌ တိုက်ပွဲဖြစ်ပွားခဲ့ပြီး တော်လှန်ရေးတပ်ဖွဲ့များက လက်နက်ငယ်များဖြင့် ပစ်ခတ်တိုက်ခိုက်ခဲ့ကြောင်း သိရသည်။ ထိုအခါ စစ်တပ်ဘက်မှလည်း လက်နက်ကြီးနှင့် လက်နက်ငယ်များဖြင့် ပြန်လည်ပစ်ခတ်ကာ စက်တပ်လေထီးများဖြင့် လိုက်လံရှာဖွေမှုများ ပြုလုပ်ခဲ့ကြောင်း ဆိုသည်။

တိုက်ခိုက်မှုအတွင်း ထိခိုက်သေဆုံးမှုများ ရှိနိုင်ကြောင်း CFG တပ်ဖွဲ့က ခန့်မှန်းထားပြီး ရေယာဉ်များတွင် ကြေးနီ၊ ဆီလှောင်ကန်နှင့် စစ်အသုံးအဆောင်ပစ္စည်းများ ပါဝင်နေကြောင်း သိရသည်။ တိုက်ပွဲပြီးနောက် ရေယာဉ်များသည် အောက်ဘက်သို့ ဆက်လက်စုန်ဆင်းသွားကြောင်း၊ ဤတိုက်ခိုက်မှုကို Chindwin Fighter Group နှင့် Brave Heart Army တို့ ပူးပေါင်း ဆောင်ရွက်ခဲ့ကြောင်း ဒေသသတင်းရင်းမြစ်များက အတည်ပြုသည်။

စဉ့်ကူးမြို့နယ်တွင် ပြင်ဦးလွင်ခရိုင် ပကဖက လမ်းတစ်လမ်း ပြုပြင်ထိန်းသိမ်း

အောက်တို (၁၂)
The Kaladan Post

မန္တလေးတိုင်း၊ စဉ့်ကူးမြို့နယ်အတွင်းရှိ အများပြည်သူသုံးလမ်း တစ်လမ်းကို အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာနအောက်ရှိ ပြင်ဦးလွင်ခရိုင် ပြည်သူ့ကာကွယ်ရေးအဖွဲ့ (ပကဖ) အဖွဲ့ဝင်များက ပြုပြင်ထိန်းသိမ်းပေးခဲ့ကြောင်း အဖွဲ့မှ အောက်တိုဘာလ ၁၁ ရက်တွင် ထုတ်ပြန်သည်။ ပြင်ဦးလွင်ခရိုင် ပကဖသည် ဒေသခံပြည်သူများ၏ သက်သာရာရှိရေးအတွက် လမ်းဆောက်လုပ်ရေးနှင့် ပြုပြင်ထိန်းသိမ်းရေးများကို မကြာခဏ ဆောင်ရွက်လျက်ရှိကြောင်း သိရသည်။

အဆိုပါ လမ်းပြုပြင်မှုအတွင်းတွင် ဒေသခံပြည်သူများမှလည်း စေတနာ့ဝန်ထမ်းအဖြစ် ပါဝင်ကူညီခဲ့ကြောင်း၊ ပကဖအဖွဲ့ဝင်များသည် စစ်ကောင်စီတပ်များနှင့် တိုက်ပွဲများ ပြုလုပ်နေသော်လည်း လူထုအကျိုးပြု လုပ်ငန်းများကိုပါ အဓိက တာဝန်တစ်ရပ်အဖြစ် ထမ်းဆောင်နေကြောင်း ပြင်ဦးလွင်ခရိုင် ပကဖမှ တာဝန်ရှိသူက ပြောကြားသည်။

ပဲခူးတိုင်းစစ်ဌာနအကြီးအကဲများနှင့် ပဲခူးခရိုင် ပကဖ ရဲဘော်များ တွေ့ဆုံဆွေးနွေး

အောက်တို (၁၂)
The Kaladan Post

ပဲခူးတိုင်းစစ်ဌာန ကွပ်ကဲရေးမှူးနှင့် စစ်ဆင်ရေးမှူးတို့သည် ကရင်အမျိုးသားအစည်းအရုံး (KNU) တပ်မဟာ (၁) နယ်မြေအတွင်းရှိ တော်လှန်ရေးထိန်းချုပ်နယ်မြေတစ်နေရာ၌ ပဲခူးခရိုင် ပြည်သူ့ကာကွယ်ရေးအဖွဲ့ (ပကဖ) ရဲဘော်များနှင့် တွေ့ဆုံဆွေးနွေးခဲ့ကြောင်း ပကဖ အသံမှ အောက်တိုဘာ ၁၁ ရက်တွင် ဖော်ပြသည်။ အဆိုပါ ဆွေးနွေးပွဲတွင် တိုင်းနှင့် ခရိုင်အဆင့်မှ တာဝန်ရှိသူများ အပြန်အလှန် ဆွေးနွေးခဲ့ကြောင်း သိရသည်။

ပဲခူးတိုင်းစစ်ဌာနကွပ်ကဲရေးမှူး ရဲဘော် စံလင်း၊ စစ်ဆင်ရေးမှူး ရဲဘော် ဘီဘီ၊ နည်းဗျူဟာမှူး ရဲဘော် ရန်နိုင်၊ ထောက်လှမ်းရေးအရာရှိ ရဲဘော် စောဘီလူးနှင့် ခရိုင်ပကဖ တာဝန်ခံ ရဲဘော် ဖြိုးမောင် တို့ တက်ရောက်ဆွေးနွေးခဲ့ကြောင်း သိရသည်။ ထိုသို့ တွေ့ဆုံဆွေးနွေးမှုအတွင်းတွင် တော်လှန်ရေးတပ်ဖွဲ့များ၏ ပူးပေါင်းဆောင်ရွက်မှုနှင့် စစ်ဆင်ရေး ညှိနှိုင်းမှုများကို အဓိကအနေဖြင့် ပြောဆိုခဲ့ကြောင်း ဖော်ပြထားသည်။