အောက်တို (၁၃) သတင်းတိုပေါင်းချုပ်

မိုင်းလုံနှင့်မတူပီမြို့များတွင် လေကြောင်းတိုက်ခိုက်မှုဖြစ်ပွား၊ နေအိမ်နှင့်ဘုရားကျောင်း များပျက်စီး

အောက်တို ၁၃
The Kaladan Post

ရှမ်းပြည်နယ်မြောက်ပိုင်း ကျောက်မဲမြို့နယ် မိုင်းလုံမြို့ရှိ လည်ကြီးနှင့်ပစီးကျေးရွာများကို စစ်တပ်က လေယာဉ်ဖြင့် ပေါင် ၂၅၀ ဗုံးကြဲတိုက်ခိုက်သဖြင့် နေအိမ် ၄ လုံးထိခိုက်ပျက်စီးခဲ့ကြောင်း TNLA က ထုတ်ပြန်သည်။ ထို့အပြင် အောက်တိုဘာ ၁၁ ရက်နေ့တွင်လည်း တော့ဆန်ရွာမကျေးရွာအတွင်း ပေါင် ၂၅၀ ဗုံး ၂ လုံးကြဲချရာ နေအိမ်နှင့် ဘုန်းကြီးကျောင်းဇရပ် ပျက်စီးသွားခဲ့သည်။

တစ်ဖက်တွင် ချင်းပြည်နယ် မတူပီမြို့၌လည်း အောက်တိုဘာ ၁၀ ရက်ည စစ်တပ်၏ လေကြောင်းတိုက်ခိုက်မှုကြောင့် ပြည်သူ ၁ ဦး သေဆုံးပြီး ၁၀ ဦးခန့် ဒဏ်ရာရရှိခဲ့ကြောင်း သတင်းရသည်။ တိုက်ပွဲမရှိသော်လည်း လေယာဉ်မှ ဗုံးကြဲချခြင်းဖြစ်ပြီး ဘုရားကျောင်းနှင့် မီးသတ်ရုံးအနီး နေအိမ်များ ထိခိုက်ခဲ့သည်။ စစ်တပ်က လက်ရှိတွင် မတိုင်မီ ရွေးကောက်ပွဲအတွက် ထိန်းချုပ်မှု နယ်မြေများ ပြန်လည်သိမ်းယူရေး လေကြောင်းနှင့် မြေပြင်တိုက်ခိုက်မှုများ တိုးမြှင့်ဆောင်ရွက်နေသည်ဟု သတင်းရင်းမြစ်များက ဖော်ပြသည်။

မင်းအောင်လှိုင်က စိုးဝင်းကို အဓိကအဖွဲ့အစည်းများမှ ဖယ်ထုတ်၊ ကျော်စွာလင်းနှင့် ညိုစောတို့အား တာဝန်ပိုင်းများ ပေးအပ်

အောက်တို ၁၃
The Kaladan Post

အကြမ်းဖက် စစ်ခေါင်းဆောင် မင်းအောင်လှိုင်က ဒုစစ်ခေါင်းဆောင် စိုးဝင်းကို အရေးပါသော အမျိုးသားအဆင့်ကော်မတီနှင့် ဗဟိုကော်မတီများ ၁၃ ခုခန့်မှ ဖယ်ထုတ်ပြီး ညိုစောနှင့် မင်းအောင်လှိုင်ကို ဦးဆောင်အဖြစ် ခန့်အပ်လိုက်သည်ဟု နေပြည်တော်သတင်းရင်းမြစ် များက ဖော်ပြသည်။ ယခင်က စိုးဝင်း ဥက္ကဋ္ဌဖြစ်ခဲ့သော ဘဏ္ဍာရေးနှင့် စီမံကိန်းကော်မတီ များတွင်လည်း မင်းအောင်လှိုင်နှင့် ညိုစောတို့သာ ဦးဆောင်အဖြစ် ဝင်ရောက်ထားကြသည်။

အုပ်ချုပ်ရေးအတွက် အရေးမကြီးသော အဖွဲ့များတွင်သာ စိုးဝင်းကို ဆက်လက် ထည့်သွင်းထားပြီး စစ်ဘက်ဆိုင်ရာတွင်လည်း ကြည်း၊ရေ၊လေ ညှိနှိုင်းမှု တာဝန်များကို ဒုတိယဗိုလ်ချုပ်ကြီး ကျော်စွာလင်းအား ပေးအပ်ထားသည်။ သတင်းရင်းမြစ်များအဆိုအရ စိုးဝင်း၏ စစ်ရေးနှင့် အရပ်ဘက်အာဏာများ တဖြည်းဖြည်း လျော့နည်းလာပြီး မင်းအောင်လှိုင်၏ သွယ်ဝိုက်နိုင်ငံရေး အာဏာပြန်လည်တိုးလာသည်ဟု ဆိုကြသည်။

တပ်ကုန်းမြို့နယ်တွင် မိုင်းဆွဲတိုက်ခိုက်မှုဖြစ်ပွား၊ စစ်တပ်ဘက်မှ စစ်သား ၄ ဦး သေဆုံး

အောက်တို ၁၃
The Kaladan Post

နေပြည်တော်အနီး တပ်ကုန်းမြို့နယ် ရတနာမြေကျေးရွာအနီးတွင် စစ်သားများသွားလာနေစဉ် တော်လှန်ရေးတပ်ဖွဲ့များက မိုင်းဆွဲတိုက်ခိုက်မှုဖြစ်ပွားပြီး စစ်တပ်ဘက်မှ စစ်သား ၄ ဦး သေဆုံးခဲ့ကြောင်း သိရသည်။ တိုက်ခိုက်မှုဖြစ်ပွားချိန်မှာ စက်တင်ဘာလ ၁၅ ရက်နေ့ မွန်းလွဲ ၃ နာရီ ၃၀ မိနစ်အချို့ဖြစ်ပြီး မိုင်းကွင်းအနီး၌ ဖြစ်ပွားခဲ့သည်ဟု ပြည်သူ့ကာကွယ်ရေးအဖွဲ့က ဖော်ပြသည်။

ပထမဆုံး တိုက်ခိုက်မှုတွင် စစ်သား ၁ ဦး ပွဲချင်းပြီး သေဆုံးခဲ့ပြီး ထိခိုက်ဒဏ်ရာရသူများကို သယ်ယူစဉ် လူနာတင်ကားပေါ်တွင် စစ်သား ၃ ဦး ထပ်မံ သေဆုံးခဲ့ကြောင်း သိရသည်။ ယင်းတိုက်ခိုက်မှုကို မကွေးတိုင်း မြို့သစ်မြို့နယ် ပြည်သူ့ကာကွယ်ရေးအဖွဲ့က လုပ်ဆောင်ခဲ့ခြင်းဖြစ်ပြီး တော်လှန်ရေးဘက်မှ ထိခိုက်မှုမရှိဘဲ လုံခြုံစွာ ဆုတ်ခွာနိုင်ခဲ့ကြောင်း သတင်းရသည်။

မိတ္ထီလာမြို့တွင် ရဲကားကို လက်ပစ်ဗုံးပစ်သွင်းတိုက်ခိုက်၊ ရဲ ၂ ဦး သေဆုံး

အောက်တို ၁၃
The Kaladan Post

မန္တလေးတိုင်း မိတ္ထီလာမြို့၌ ကင်းလှည့်နေသည့် ရဲကားတစ်စီးအား တော်လှန်ရေးအဖွဲ့ SATAN UG မှ လက်ပစ်ဗုံးပစ်သွင်းတိုက်ခိုက်ရာ ရဲအဖွဲ့ဝင် ၂ ဦး ပွဲချင်းပြီး သေဆုံးခဲ့ကြောင်း သိရသည်။ တိုက်ခိုက်မှုဖြစ်ပွားချိန်မှာ အောက်တိုဘာ ၁၂ ရက်နေ့ နံနက် ၁၁ နာရီခန့်ဖြစ်ပြီး ပညာရေးတက္ကသိုလ်အနီးတွင် ဖြစ်ပွားခဲ့သည်ဟု သတင်းရင်းမြစ်များက ပြောဆိုသည်။

ထိုတိုက်ခိုက်မှုအတွင်း ဒဏ်ရာရရှိသူ ရဲအဖွဲ့ဝင်အချို့ကို မိတ္ထီလာဆေးရုံသို့ ပို့ဆောင်ကာ ကုသနေကြောင်း သိရသည်။ SATAN UG အဖွဲ့မှ တာဝန်ရှိသူက တိုက်ခိုက်မှုသည် အကြိုပြင်ဆင်မှုနှင့် စောင့်ကြည့်မှု ၄ ရက်ကြာပြီးနောက် ဆောင်ရွက်ခဲ့ခြင်းဖြစ်ကြောင်း ဖော်ပြခဲ့သည်။ တော်လှန်ရေးဘက်မှ ထိခိုက်မှုမရှိဘဲ လုံခြုံစွာ ဆုတ်ခွာနိုင်ခဲ့ကြောင်းလည်း သတင်းအရ သိရသည်။

ထားဝယ်နှင့်ရေဖြူမြို့များတွင် ဒရုန်းဖြင့် ဗုံးကြဲတိုက်ခိုက်မှုများ ဆက်တိုက်ဖြစ်ပွား

အောက်တို ၁၃
The Kaladan Post

တနင်္သာရီတိုင်း ထားဝယ်မြို့နှင့် ရေဖြူမြို့များရှိ ဝန်ကြီးအိမ်ရာ၊ ခလရ ၁၀၄ တပ်ရင်းနှင့် မြို့မရဲစခန်းများကို ဒရုန်းဖြင့် ဗုံးကြဲတိုက်ခိုက်ခဲ့ကြောင်း ဒူရကစစ်ကြောင်းက ဖော်ပြသည်။ ပထမဆုံးတိုက်ခိုက်မှုမှာ အောက်တိုဘာ ၅ ရက်နေ့ မွန်းလွဲပိုင်းတွင် ရေဖြူမြို့မရဲစခန်း၌ ဖြစ်ပွားပြီး ထို့နောက် ထားဝယ်မြို့ရှိ ဝန်ကြီးအိမ်ရာတွင် တပ်စွဲစစ်သားများကိုလည်း ဒရုန်းဖြင့် ထပ်မံတိုက်ခိုက်ခဲ့သည်။

ထို့နောက် အောက်တိုဘာ ၈ ရက်နေ့တွင်လည်း လောင်းလုံးမြို့နယ်ရှိ ခလရ ၁၀၄ တပ်ရင်းအား ဒရုန်းဖြင့် ထပ်မံ ဗုံးကြဲတိုက်ခိုက်ခဲ့ကြောင်း သိရသည်။ ယင်းတိုက်ခိုက်မှုများကို ဒူရကစစ်ကြောင်းနှင့် DEF ဒရုန်းအဖွဲ့တို့ ပူးပေါင်းဆောင်ရွက်ခဲ့ခြင်းဖြစ်ပြီး စစ်တပ်ဘက် ထိခိုက်မှုအတည်ပြုချက် မရှိသေးပါ။ ဒူရကစစ်ကြောင်းကလည်း တနင်္သာရီတိုင်းအတွင်း လေကြောင်းတိုက်ခိုက်မှုများ ဖြစ်ပွားနိုင်သဖြင့် ပြည်သူများ သတိပြုနေထိုင်ရန်နှင့် တော်လှန်ရေးအဖွဲ့များကို ပူးပေါင်းကူညီပေးရန် တိုက်တွန်းလိုက်သည်။

ပေါက်၊ မြိုင်နှင့် မိုင်းလုံတွင် စစ်တပ် လေကြောင်းတိုက်ခိုက်မှုများကြောင့် နေအိမ်များ ပျက်စီး

အောက်တို ၁၃
The Kaladan Post

မကွေးတိုင်း ပေါက်မြို့နယ်နှင့် မြိုင်မြို့နယ်ရှိ ကျေးရွာများကို အကြမ်းဖက် စစ်တပ်က Gyrocopter နှင့် စက်တပ်လေထီးများဖြင့် ဗုံးကြဲတိုက်ခိုက်ရာ နေအိမ်အဆောက်အဦးများ ပျက်စီးခဲ့ကြောင်း ဒေသခံများက ပြောသည်။ အဆိုပါတိုက်ခိုက်မှုများမှာ အောက်တိုဘာ ၁၂ ရက်နေ့ နံနက်ပိုင်းတွင် ဆက်တိုက်ဖြစ်ပွားပြီး ပြည်သူထိခိုက်မှု မရှိသော်လည်း နေအိမ်အများအပြား ထိခိုက်ပျက်စီးခဲ့ကြောင်း သိရသည်။

ထို့အပြင် ရှမ်းပြည်နယ် မိုင်းလုံမြို့နယ်တွင်လည်း စစ်တပ်၏ ဂျက်ဖိုက်တာဖြင့် ဗုံးကြဲတိုက်ခိုက်မှုကြောင့် နေအိမ်နှင့် ဘုန်းတော်ကြီးကျောင်းအဆောက်အဦးများ ထိခိုက်ခဲ့သည်ဟု TNLA က ထုတ်ပြန်သည်။ စစ်တပ်သည် တအာင်းပြည်အတွင်းနှင့် တိုင်းရင်းသားဒေသများတွင် လေကြောင်းနှင့် လက်နက်ကြီးများဖြင့် ပြည်သူများအပေါ် စစ်ရာဇဝတ်မှုများ ဆက်လက်ကျူးလွန်နေကြောင်းလည်း TNLA က ရှင်းလင်းဖော်ပြခဲ့သည်။

ဧရာဝတီတိုင်းတွင် AA၊ PDF နှင့် စစ်တပ်အကြား တိုက်ပွဲများ ပြင်းထန်၊ စစ်သားများ ဒဏ်ရာရများပြား

အောက်တို ၁၃
The Kaladan Post

ဧရာဝတီတိုင်းရှိ လေးမျက်နှာ၊ အင်္ဂပူ၊ သာပေါင်း၊ ပုသိမ်နှင့် ရေကြည်မြို့နယ်များတွင် AA နှင့် PDF ပူးပေါင်းတပ်ဖွဲ့များနှင့် စစ်တပ်အကြား တိုက်ပွဲများ ပြင်းထန်လှပါသည်။ စစ်တပ်ဘက်မှ သေဆုံးသူနှင့် ဒဏ်ရာရသူများ များပြားလာသဖြင့် မဆရ ၄ စစ်ဆေးရုံနှင့် ဆေးတပ်ရင်းများတွင် ကုတင်မလုံလောက်တော့ပဲ ဆေးဝါးလည်း ပြတ်လပ်နေကြောင်း သိရသည်။

တပ်တွင်းသတင်းရင်းမြစ်များအရ ဒဏ်ရာရ စစ်သားအများအပြားကို ဆေးရုံရှေ့ ကစားကွင်းနှင့် နားနေဆောင်များတွင် ကျောပိုးအိတ်ခေါင်းအုံးစေကာ ကုသနေကြပြီး သေဆုံးသူများကို ရွှေမြင်တင် သဂြိုလ်စက်၌ တိတ်တဆိတ် သဂြိုလ်နေကြောင်း ဖော်ထုတ်ထားသည်။ AA ၏ ထုတ်ပြန်ချက်အရ ဧရာဝတီတိုင်းနှင့် ရခိုင်နယ်စပ်အတွင်း တိုက်ပွဲများ ပြင်းထန်နေဆဲဖြစ်ကြောင်းလည်း သိရှိရသည်။

မိုင်းငေါ့မြို့တွင် စစ်တပ် ထိုးစစ်ကြောင့် လမ်းပိတ်အပိတ်များဖြစ်၊ စားသောက်ကုန်နှင့် ဓာတ်ဆီ ပြတ်လပ်

အောက်တို ၁၃
The Kaladan Post

ရှမ်းပြည် မြောက်ပိုင်း မိုင်းငေါ့မြို့တွင် အကြမ်းဖက် စစ်တပ်၏ ထိုးစစ်များကြောင့် ပြည်သူများ စိုးရိမ်ကြောက်လန့်နေပြီး မြို့ထဲတွင် မအိပ်ရဲဘဲ မြို့ပြင်တွင် ထွက်အိပ်နေရကြောင်း ဒေသခံများက ပြောသည်။ လမ်းများ ပိတ်ဆို့ထားခြင်းကြောင့် စားသောက်ကုန်နှင့် ဓာတ်ဆီများ ပြတ်လပ်နေပြီး ဈေးနှုန်းများ တက်နေတာကြောင့် ဒေသပြည်သူများ အခက်တွေ့နေရကြောင်း သိရသည်။

မိုင်းငေါ့မြို့တွင် ဓာတ်ဆီ ၁၉ လီတာတစ်ပုံး၏ ဈေးနှုန်း ကျပ် ၁၃၀,၀၀၀ မှ ၁၅၀,၀၀၀ အထိ မြင့်တက်နေပြီး ခရမ်းချဉ်သီးတစ်ပိဿာလည်း ကျပ် ၈၀၀၀ ဝန်းကျင်ရှိလာကြောင်း သိရသည်။ လမ်းပိတ်မှုကြောင့် စစ်ရှောင်ပြေးရန် လမ်းကြောင်းရှည်လှပြီး နမ့်ဆန်မှ လားရှိုးသို့ ပတ်သွားရသဖြင့် ပြည်သူများ စစ်ဘေးရှောင်ရန်ပင် ခက်ခဲနေကြောင်း ဒေသခံများက ထပ်ဆင့်ပြောကြားခဲ့သည်။

ဆားလင်းကြီးမြို့မ ရဲစခန်းအား ၂ ရက်ဆက်တိုက် လက်နက်ကြီးများဖြင့် တိုက်ခိုက်မှု ဖြစ်ပွား

အောက်တို ၁၃
The Kaladan Post

စစ်ကိုင်းတိုင်း၊ ဆားလင်းကြီးမြို့ပေါ်ရှိ မြို့မရဲစခန်းကို တော်လှန်ရေး ပူးပေါင်းတပ်ဖွဲ့များက အောက်တိုဘာလ ၁၀ ရက်နှင့် ၁၁ ရက်နေ့များတွင် ဆက်လက်၍ လက်နက်ကြီး ၄၃ လုံးဖြင့် ပစ်ခတ်တိုက်ခိုက်ခဲ့ကြောင်း သိရသည်။ ယင်းတိုက်ခိုက်မှုအတွင်း စစ်တပ်ဘက်မှ ထိခိုက်မှုရှိနိုင်သော်လည်း တော်လှန်ရေးဘက်မှ အထိအခိုက်မရှိ ပြန်လည်ဆုတ်ခွာ နိုင်ခဲ့ကြောင်း ပွဲတိုင်းကျော် လက်နက်ကြီးတပ်ဖွဲ့မှ တာဝန်ရှိသူတစ်ဦးက ဖော်ပြသည်။

ဆားလင်းကြီးမြို့၌ စစ်တပ်ဘက်အင်အား ၁၅၀ ဝန်းကျင်ရှိကြောင်း ထုတ်ပြန်ထားပြီး တိုက်ခိုက်မှုအတွင်း စစ်တပ်ဘက်မှ လက်နက်ငယ်နှင့် လက်နက်ကြီးများဖြင့် ပြန်ပစ်ခဲ့ ကြောင်း သိရသည်။ ယင်းတိုက်ခိုက်မှုကို ပွဲတိုင်းကျော် လက်နက်ကြီးတပ်ဖွဲ့၊ တော်လှန် ပြောက်ကျားတပ်ဖွဲ့နှင့် ပြည်သူ့ကာကွယ်ရေးတပ်ဖွဲ့များပူးပေါင်းဖြင့် ဆောင်ရွက်ခဲ့ခြင်း ဖြစ်ကြောင်း သိရှိရသည်။

ကျဆုံးသွားသော စစ်သားမိသားစုများအား လေးထောင့်ကန်အိမ်ရာသစ်တွင် အခန်းမဲဖေါက်ပေးမည်

အောက်တို ၁၃
The Kaladan Post

အကြမ်းဖက်စစ်တပ်က တိုက်ပွဲများတွင် သေဆုံးသွားသော အရာရှိနှင့် စစ်သားများ၏ ကျန်ရစ်သူမိသားစုများကို ရန်ကုန်မြို့ ဒဂုံမြို့သစ်တောင်ပိုင်း လေးထောင့်ကန် စစ်မှုထမ်းဟောင်းအိမ်ရာသစ်တွင် အခန်းများ မဲဖေါက်ပေးမည်ဖြစ်ကြောင်း သိရသည်။ ယင်းအိမ်ရာတွင် အခန်းပေါင်း ၄၀၀၀ ခန့်ပါဝင်ပြီး ကျဆုံးသူအရာရှိများအတွက် မဲမဖေါက်ဘဲ တိုက်ခန်းရမည်ဟု သတင်းရရှိသည်။

သေဆုံးစစ်သားမိသားစုများအနက် လုပ်သက် ၁၀ နှစ်အထက်ရှိသူများ၏ မိသားစုများကိုသာ မဲဖေါက်ပေးမည်ဖြစ်ပြီး မုဆိုးမအများစု အခန်းရရှိမည်ဟု သိရသည်။ ထို့အပြင် အဆိုပါအိမ်ရာတွင် နေရောင်ခြည်စွမ်းအင်သုံး စွမ်းအင်စက်ရုံနှင့် Shopping Complex တည်ဆောက်နေကြောင်းလည်း သိရှိရသည်။