အောက်တို ၂၀ သတင်းတိုပေါင်းချုပ်

မြဝတီမြို့နယ်ရှိ KK Park ကို စစ်တပ်က ဝင်ရောက်စီးနင်းပြီး လူပေါင်း ၂၂၀၀ နီးပါးဖမ်းဆီး

အောက်တို ၂၀
The Kaladan Post
မြဝတီမြို့နယ်ရှိ KK Park ကို အကြမ်းဖက်စစ်တပ်က ဝင်ရောက်စီးနင်းခဲ့ရာ အမျိုးသား ၁၆၄၅ ဦး၊ အမျိုးသမီး ၄၅၅ ဦးနှင့် လုံခြုံရေးဝန်ထမ်း ၉၈ ဦး စုစုပေါင်း ၂၁၉၈ ဦးကို ဖမ်းဆီးရမိခဲ့ကြောင်း စစ်တပ်က သတင်းထုတ်ပြန်သည်။ စီးနင်းမှုတွင် အဆောက်အအုံပေါင်း ၂၂၀ ကျော်၊ Star Link စလောင်း ၃၀ နှင့် ဆက်စပ်ပစ္စည်းများ သိမ်းဆည်းရမိခဲ့သည်။ KK Park သည် ဗိုလ်မှူးကြီး စောချစ်သူ ဦးဆောင်သော ကရင်နယ်ခြားစောင့်တပ်ဖွဲ့ (BGF) ၏ ထိန်းချုပ်မှုအောက်တွင် ရှိပြီး၊ အွန်လိုင်းငွေလိမ်လည်မှုနှင့် ကျားဖြန့်လုပ်ငန်းများဖြင့် လူသိများသည်။ ကရင်စစ်ရေးသတင်းရင်း မြစ်တစ်ခုက ဤစီးနင်းမှုသည် BGF နှင့် စစ်တပ်အကြား သဘောတူညီထားသည့် ပြသမှုတစ်ခုသာ ဖြစ်နိုင်ကြောင်း ဆိုသည်။ Justice For Myanmar ၏ အစီရင်ခံစာအရ KK Park သည် တရုတ် ရာဇဝတ်ဂိုဏ်းများနှင့် စစ်တပ်လက်အောက်ခံ BGF ပူးပေါင်းလုပ်ကိုင်နေသော အွန်လိုင်းငွေလိမ် လည်မှု၏ ဗဟိုချက်ဖြစ်ပြီး၊ ၂၀၂၁ အာဏာသိမ်းပြီးနောက် အဆောက်အအုံများ အလုံးအရင်းဖြင့် တည်ဆောက်ခဲ့သည်။ USIP အစီရင်ခံစာတွင် BGF ခေါင်းဆောင်များဖြစ်သည့် စောချစ်သူ၊ ဗိုလ်မှူးတင်ဝင်းနှင့် မုတ်သုန်တို့ ကျားဖြန့်လုပ်ငန်းများတွင် ပါဝင်နေပြီး နှစ်စဉ်အမေရိကန်ဒေါ်လာ ၁၉၂ သန်းအထိ အမြတ်အစွန်းရရှိနေကြောင်း ဖော်ပြထားသည်။ စစ်တပ်က လိုအပ်သော တရားဝင်ခွင့်ပြုမိန့်များ မတွေ့ရှိသဖြင့် ဆက်လက်အရေးယူမည်ဟု ဆိုသော်လည်း၊ ဤလုပ်ငန်းများသည် စစ်တပ်နှင့် BGF ၏ ရာဇဝတ်ကွန်ရက်တွင် အဓိကအခန်းကဏ္ဍမှ ပါဝင်နေပြီး၊ လူကုန်ကူးမှု၊ အတင်းအဓမ္မခိုင်းစေမှုနှင့် နှိပ်စက်မှုများ ပါဝင်နေသည်။ ထို့ကြောင့် နိုင်ငံတကာပူးပေါင်းဆောင်ရွက်မှုဖြင့် စစ်တပ်နှင့် BGF ၏ ဘဏ္ဍာရေးနှင့် လက်နက်ရင်းမြစ်များကို ဖြတ်တောက်ရန် Justice For Myanmar နှင့် USIP က တိုက်တွန်းထားသည်။

ရခိုင်ပြည်နယ် ဂွနှင့် သံတွဲမြို့နယ်အနီး ညအချိန်ငါးဖမ်းမှု အကန့်အသတ်မရှိ ပိတ်ပင်ကြောင်း AA ထုတ်ပြန်

အောက်တို ၂၀
The Kaladan Post
ရခိုင်ပြည်နယ်အတွင်း ဂွနှင့် သံတွဲမြို့နယ်များအနီး ပင်လယ်ပြင်တွင် ညအချိန်ငါးဖမ်းမှုများကို အောက်တိုဘာ ၁၉ ရက်မှစပြီး အကန့်အသတ်မရှိ ပိတ်ပင်ကြောင်း အာရက္ခတပ်တော် (AA) က ထုတ်ပြန်ချက်တစ်ပုဒ် ထုတ်ပြန်လာသည်။ ည ၆ နာရီကနေ မနက် ၆ နာရီအထိ ငါးဖမ်းလှေများ ထွက်လှည့်မှုကို တားမြစ်ထားပြီး၊ ပြည်သူများအား နေ့အချိန်တွင်ပင် ကမ်းဝေးကို ရှောင်ကာ ကမ်းနီးတဝိုက်တွင်သာ ငါးဖမ်းရန်နှင့် စစ်သင်္ဘောများကို မြင်တွေ့လျှင် အမြန်ဆုံး ကမ်းစပ်သို့ ပြန်ရောက်ရန် တိုက်တွန်းထားသည်။ အကြမ်းဖက်စစ်တပ်က စစ်ရေးပြင်ဆင်မှုအဖြစ် အာရက္ခ တပ်တော်ထိန်းချုပ်နေသော မြို့များကို ပြန်လည်သိမ်းပိုက်ရန် စစ်တွေ၊ ကျောက်ဖြူစသည့်မြို့များ တွင် စစ်အင်အားတိုးမြှင့်နေပြီး၊ ရေကြောင်းခပ်စိပ်စိပ်ဖြင့် လှုပ်ရှားမှုများ ပြုလုပ်လာကြောင်း AA က ဆိုသည်။ ဂွနှင့် သံတွဲမြို့အနီး ပင်လယ်ပြင်တွင် စစ်သင်္ဘောများ လှုပ်ရှားမှုများ တိုးလာပြီး၊ ကင်းထောက်လေယာဉ်များဖြင့် လှည့်ပတ်ကင်းထောက်မှုများကိုလည်း ခပ်စိပ်စိပ် ပိုမိုလုပ်ဆောင် လာကြောင်း ဖော်ပြထားသည်။ ထို့ကြောင့် ငါးဖမ်းလှေများကို အကာအကွယ်ယူ၍ စစ်ရေးဆင်နွှဲရန် အခွင့်အရေး မဖြစ်ပေါ်စေရန် ဤတားမြစ်မှုကို ဆောင်ရွက်ရဟု AA က ရှင်းပြသည်။ ယခင်က စစ်ကာလ ပြည်သူများ၏ စားဝတ်နေရေး အကျပ်အတည်းများကို သက်သာစေရန် ပင်လယ်ကမ်းနီးရှိ ရေလုပ်သားများအား ငါးဖမ်းခွင့် အကန့်အသတ်မရှိ ခွင့်ပြုခဲ့သော်လည်း၊ လက်ရှိ စစ်ရေးအခြေအနေ ပြောင်းလဲလာမှုကြောင့် ကန့်သတ်လိုက်ရဟု AA က ဆိုသည်။ စစ်တပ်က ငါးဖမ်းလှေများကို လက်နက်ကြီးဖြင့် ပစ်ခတ်တိုက်ခိုက်ခြင်း၊ ရေလုပ်သားများကို ဖမ်းဆီးသတ်ဖြတ်ခြင်းများ ပြုလုပ်နေသည်ကိုလည်း ထုတ်ပြန်ချက်တွင် ထည့်သွင်း သတိပေးထားသည်။

ဝက်လက်မြို့နယ်တွင် အကြမ်းဖက်စစ်တပ် ရွာခံအမျိုးသမီး ၂ ဦး ဓားစာခံဖမ်းဆီး

အောက်တို ၂၀
The Kaladan Post
စစ်ကိုင်းတိုင်း၊ ဝက်လက်မြို့နယ်ရှိ ကျောက်ကုန်းကျေးရွာကို အကြမ်းဖက်စစ်တပ်က အောက်တို ဘာ ၁၉ ရက် မနက်ပိုင်းတွင် အင်အား ၅၀ ပါ စစ်ကြောင်းဖြင့် ပစ်ခတ်ဖောက်ထွင်းဝင်ရောက် စီးနင်းခဲ့ရာ ရွာခံ အမျိုးသမီး ၂ ဦးကို ဓားစာခံအဖြစ် ဖမ်းဆီးခဲ့သလို စစ်ရှောင်နေရသော ရွာခံများ၏ ပစ္စည်းများကိုလည်း ခိုးယူသယ်ယူ ထွက်ခွာခဲ့ကြောင်း ဒေသတွင်း သတင်းရင်းမြစ်များက ဖော်ပြ သည်။ ဤစီးနင်းမှုသည် ကျောက်ကုန်းရွာအတွက် စစ်တပ်ဝင်ရောက်မှု အ ၃ ကြိမ်မြောက်ဖြစ်ပြီး ယခင်အကြိမ်တွင် ရွာခံ အရပ်သား ၄ ဦးကို ရက်ရက်စက်စက် သတ်ဖြတ်ခဲ့ဖူးကြောင်း နွေဦး အောင်ပွဲ (တော်လှန်ရေး အင်အားစု) က ထုတ်ပြန်ဆိုသည်။ တဆက်တည်း အောက်တိုဘာ ၁၉ ရက် ညနေပိုင်းတွင် ဝက်လက်မြို့နယ် အနောက်ခြမ်း ရွာသာကြီးကျေးရွာကို မုံရွာ နမခတက် ဂျိုင်ရိုကော်ပတာ ၃ စီးဖြင့် လေကြောင်း ဗုံးကျဲ တိုက်ခိုက်ခဲ့ကြောင်း ဒေသခံ သတင်းရင်းမြစ်များက ဆိုသည်။ ဤတိုက်ခိုက်မှုများသည် ရွာသာကြီး ရွာတွင် တော်လှန်ရေး တပ်ဖွဲ့များနှင့် စစ်တပ် အကြား ထိတွေ့မှုများ ပြင်းထန်နေမှုကြောင့် နေ့စဉ် ဆက်လက်ဖြစ်ပွားနေခြင်းဖြစ်ပြီး၊ ပြည်သူများ ဘေးကင်းရေး စိုးရိမ်မှု မြင့်တက်လျက်ရှိကြောင်း သိရသည်။ ယခု အောက်တိုဘာ လအတွင်း ဝက်လက်မြို့နယ် အရှေ့ဘက်ခြမ်းတွင် စက်တင်ဘာ ၁၇ ရက်မှစပြီး အင်အား ၁၀၀ ပါ စစ်ကြောင်းက ကျေးရွာများကို တစ်လနီးပါး ထိုးစစ်ဆင်ရင်း အင်ဒေါင်း ရွာခံ အရပ်သား ၅၀ နီးပါး ကို လူသားဒိုင်း အဖြစ် ဖမ်းဆီးခဲ့သည်။ ထို့ကြောင့် အင်ဒေါင်း၊ ငါးတိုက်တောင်၊ မအိုက်တောင်၊ မင်းကုန်းလေး နှင့် ပုံအင်း တိုက်စသည့် ကျေးရွာ ၅ ရွာ လောက်မှ အရပ်သား ထောင်ချီ ထွက်ပြေး တိမ်းရှောင်နေရသည်။

တောင်သာနှင့် နွားထိုးကြီးမြို့နယ်များတွင် စစ်တပ်၏ လေကြောင်းဗုံးကျဲမှုကြောင့် ပြည်သူ ၅ ဦးသေဆုံး

အောက်တို ၂၀
The Kaladan Post
မန္တလေးတိုင်း၊ တောင်သာမြို့နယ်၊ ရုံးပင်ရွာ ဘုန်းကြီးကျောင်းအနီးကို အကြမ်းဖက်စစ်တပ်က အောက်တိုဘာလ ၁၉ ရက် မွန်းလွဲ ၃:၄၅ နာရီခန့်တွင် ဂျက်ဖိုက်တာဖြင့် ဗုံးကျဲတိုက်ခိုက်ခဲ့ရာ ပြည်သူ ၂ ဦး သေဆုံးပြီး ၂ ဦး ထိခိုက်ဒဏ်ရာရရှိကာ နေအိမ်များ ပျက်စီးခဲ့ကြောင်း ဒေသခံ ပြည်သူများက ပြောဆိုကြသည်။ ထို့အတူ အောက်တိုဘာလ ၁၉ ရက် နံနက် ၆ နာရီခန့်တွင် နွားထိုးကြီးမြို့နယ်၊ ပဲချက်ကျေးရွာကို စစ်တပ်က စက်တပ်လေထီး ၃ စီးဖြင့် ဗုံးကျဲတိုက်ခိုက်ခဲ့ရာ ဦးကျော်နိုင် (အသက် ၅၅)၊ ဦးခင်မောင်ဝင်း (အသက် ၅၇)၊ ဒေါ်ခင်သန်းနု နှင့် ဒေါ်ခင်တင့် (အသက် ၉၁) တို့ သေဆုံးခဲ့ကြောင်း သိရသည်။ စစ်တပ်၏ ကျေးရွာများအပေါ် လေကြောင်းတိုက်ခိုက်မှုများ ကြောင့် အရပ်သားများ ထိခိုက်သေဆုံးမှုနှင့် နေအိမ်ပျက်စီးမှုများ ဆက်လက်ဖြစ်ပေါ်နေပြီး၊ ဒေသတွင်း တော်လှန်ရေးအဖွဲ့များက ပြည်သူများအား လေကြောင်းအန္တရာယ် သတိပေးချက်များ ကို လိုက်နာရန် နှိုးဆော်ထားသည်။ ဤတိုက်ခိုက်မှုများသည် ပြည်သူများ၏ ဘေးကင်းရေးကို ဆိုးရွားစွာ ထိခိုက်စေပြီး စစ်ရှောင်မှုများ ပိုမိုဖြစ်ပေါ်စေနေကြောင်း ဒေသခံများက ပြောဆိုသည်။

 

စစ်တပ်လေကြောင်းတိုက်ခိုက်မှုကြောင့် TNLA ထိန်းချုပ်နယ်မြေများတွင် သံဃာနှင့် ပြည်သူ ၁၉ ဦး သေဆုံး

အောက်တို ၂၀
The Kaladan Post
အကြမ်းဖက်စစ်တပ်က အောက်တိုဘာ ၁ ရက်မှ ၁၈ ရက်အတွင်း တအာင်းတပ်မတော် (TNLA) ထိန်းချုပ်နယ်မြေများဖြစ်သည့် မန်တုံ၊ ကျောက်မဲ၊ သီပေါ၊ မိုင်းငေါ့၊ မိုင်းလုံ၊ နမ့်ဆန်၊ နမ့်တူ၊ မိုးမိတ်နှင့် မိုးကုတ်မြို့များကို လေကြောင်းဗုံးကျဲတိုက်ခိုက်မှု ၂၈ ကြိမ် ပြုလုပ်ခဲ့ရာ သံဃာတော် များနှင့် ပြည်သူ ၁၉ ဦး သေဆုံးခဲ့ကြောင်း TNLA က အောက်တိုဘာ ၂၀ ရက်တွင် ထုတ်ပြန်ခဲ့သည်။ တိုက်ခိုက်မှုများမှာ မန်တုံ (၁ ကြိမ်)၊ ကျောက်မဲ (၃ ကြိမ်)၊ သီပေါ (၅ ကြိမ်) မိုင်းငေါ့ (၁ ကြိမ်)၊ မိုင်းလုံ (၄ ကြိမ်)၊ နမ့်ဆန် (၅ ကြိမ်)၊ နမ့်တူ (၅ ကြိမ်)၊ မိုးမိတ် (၃ ကြိမ်) နှင့် မိုးကုတ် (၁ ကြိမ်) တို့တွင် ဖြစ်ပွားခဲ့သည်။ အထူးသဖြင့် အောက်တိုဘာ ၁၉ ရက်တွင် မိုးကုတ်မြို့အနောက်ပိုင်း ကျောက်ဖားကျေးရွာတွင် ဂျက်ဖိုက်တာဖြင့် ပေါင် ၂၅၀ ဗုံး ၁ လုံး ကြဲချခဲ့ရာ ကြက်မွေးမြူရေး ခြံထိမှန် ပေါက်ကွဲခဲ့သည်။ ထို့အတူ တစ်ရက်တည်းတွင် နမ့်ဆန်၊ မန်တုံနှင့် မိုင်းငေါ့မြို့နယ်များတွင် ဗုံးကျဲတိုက်ခိုက်မှုကြောင့် ပြည်သူ ၂ ဦး ဒဏ်ရာရရှိခဲ့သည်။ TNLA က ပြည်သူများအား စစ်ရေးသတိထားရန်နှင့် လေကြောင်းရန်ကာကွယ်ရေး နည်းလမ်းများကို လိုက်နာရန် အသိပေး တိုက်တွန်းထားသည်။ ဤတိုက်ခိုက်မှုများသည် အရပ်သားများ၏ ဘေးကင်းရေးကို ဆိုးရွားစွာ ထိခိုက်စေပြီး စစ်ရှောင်မှုများ ပိုမိုဖြစ်ပေါ်စေနေကြောင်း သိရသည်။

မြင်းခြံဆိပ်ကမ်းရှိ အကြမ်းဖက်စစ်သင်္ဘောများကို ဒရုန်းဖြင့် ဗုံးကြဲတိုက်ခိုက်မှု အောင်မြင်

အောက်တို ၂၀
The Kaladan Post
မန္တလေးတိုင်း၊ မြင်းခြံမြို့နယ်၊ ဆိတ်ညံရေတင်ရုံးဆိပ်ကမ်းရှိ အကြမ်းဖက်စစ်တပ်၏ ရေကြောင်းစစ်ဆေးရေးဂိတ်သို့ ရောက်ရှိနေသော စစ်သင်္ဘောများကို အောက်တိုဘာ ၁၂ ရက်ညပိုင်းတွင် ရေစကြိုတပ်ပေါင်းစုနှင့် Urban Underground Revolution Force-YSO ဒရုန်းတပ်ဖွဲ့တို့ ပူးပေါင်း၍ ဒရုန်းဖြင့် ဗုံးသီး ၄ လုံး ကြဲချတိုက်ခိုက်ခဲ့သည်။ တိုက်ခိုက်မှုအတွင်း စစ်ရေယာဥ်ထိမှန်ခဲ့ပြီး အကြမ်းဖက်စစ်သား ၄ ဦး ဒဏ်ရာရရှိကာ သင်္ဘောဦးခေါင်းမိုး ပျက်စီးခဲ့သည်။ အကြမ်းဖက်စစ်တပ်က လက်နက်ကြီး၊ လက်နက်ငယ်များဖြင့် ပြန်လည်ပစ်ခတ်ခဲ့သော်လည်း တော်လှန်ရေးရဲဘော်များ အထိအခိုက်မရှိခဲ့ဟု သိရသည်။

အရာတော်မြို့နယ်တွင် အကြမ်းဖက်စစ်ကြောင်းတိုက်ခိုက်ခံရပြီး စစ်ကြောင်းပြန်ဆုတ်

အောက်တို ၂၀
The Kaladan Post
စစ်ကိုင်းတိုင်း၊ အရာတော်မြို့နယ်၊ ငွေတွင်းပျူစောထီးရွာမှ မင်းရွာဘက်သို့ ထွက်လာသော အကြမ်းဖက်စစ်ကြောင်းကို စက်တင်ဘာ ၂၂ ရက်တွင် Generation Z Power – GZP (Mandalay) ကထုတ်ပြန်ထားပါသည်။ အဆိုပါတိုက်ခိုက်မှုကို Generation Z Power – GZP (Mandalay) ၊ ပြည်သူ့ကာကွယ်ရေးမြို့ပြပြောက်ကျားတပ်ဖွဲ့နှင့် နယ်မြေခံတော်လှန်ရေးအဖွဲ့များက စောင့်ကြိုတိုက်ခိုက်ခဲ့ရာ ထိတွေ့တိုက်ပွဲ ၄ ကြိမ်ထက်မနည်း ဖြစ်ပွားခဲ့ကြောင်းသိရသည်။ ၅ နာရီခန့်ကြာ တိုက်ပွဲအတွင်း အကြမ်းဖက်စစ်ကြောင်းမှာ ထိခိုက်သေဆုံးမှုများနှင့် ဖွဲ့စည်းပုံပျက်ယွင်းကာ ပြန်လည်ဆုတ်ခွာသွားရသည်။ တော်လှန်ရေးတပ်များက စစ်သုံ့ပန်းများဖမ်းမိပြီး လက်နက်များ သိမ်းဆည်းရမိခဲ့သည်။ GZP (Mandalay) တပ်ဖွဲ့သည် လက်ရှိတွင် သပိတ်ကျင်း၊ မတ္တရာနှင့် စစ်ကိုင်းမြို့ဝန်းကျင်ရှိ စစ်မျက်နှာများတွင်လည်း ပူးပေါင်းတိုက်ခိုက်နေသည်။

ခမောက်ကြီးမြို့နယ်တွင် အုပ်ချုပ်ရေးမှူးနှင့် ပျူစောထီး ၃ ဦး ဖမ်းဆီးခံရပြီး လက်နက်ခဲယမ်းများ သိမ်းဆည်းရမိ

အောက်တို ၂၀
The Kaladan Post
တနင်္သာရီတိုင်း၊ ခမောက်ကြီးမြို့နယ်၊ လုံးဖောကျေးရွာတွင် အောက်တိုဘာ ၁၄ ရက် နံနက် ၈ နာရီ ခန့်က တော်လှန်ရေးတပ်ဖွဲ့များက အုပ်ချုပ်ရေးမှူး ဝင်းမြင့်၊ ပျူစောထီးခေါင်းဆောင် အေးစိုးနှင့် နမ္မနွယ်ကျေးရွာမှ ပျူစောထီး သက်ဦးတို့ကိုဖမ်းဆီးခဲ့ကြောင်း ကော့သောင်းခရိုင် ပြည်သူ့ကာကွယ် ရေးအဖွဲ့က သတင်းထုတ်ပြန်သည်။ သို့သော် မွန်းလွဲ ၁၂ နာရီခန့်တွင် သက်ဦးက ပစ္စတိုဖြင့် ပစ်ခတ် ခုခံပြီး ၃ ဦးလုံး ထွက်ပြေးရာ တော်လှန်ရေးတပ်များက လိုက်လံပစ်ခတ်ဖမ်းဆီးစဉ် ၎င်းတို့ သေဆုံး ခဲ့သည်။ တိုက်ခိုက်မှုအတွင်း တော်လှန်ရေးရဲဘော်တစ်ဦး ပေါင်တွင် ကျည်ရှပ်ထိမှန်ဒဏ်ရာရရှိခဲ့ သည်။ ဖမ်းဆီးမှုမှ စကားပြောစက် ၄ လုံး၊ ဖုန်း ၄ လုံး၊ ကိုးလုံးကျည်ခေါက်ချိုးအရှည် ၁ လက်၊ မက်ဂနန်းပစ္စတို ၁ လက်နှင့် ကျည်များ၊ ပြည်သူ့စစ်ကဒ် ပြားများနှင့် Hilux Vigo ကားတစ်စီး သိမ်းဆည်းရမိခဲ့သည်။ ကော့သောင်းခရိုင် ပြည်သူ့ကာကွယ် ရေးအဖွဲ့က ပြည်သူ့ဘက်မရပ်သူများ ကို လုပ်ထုံးလုပ်နည်းအတိုင်း ဆက်လက်အရေးယူမည်ဟု သတင်းနှင့်ပြန်ကြားရေးတာဝန်ခံ ရဲဘော်ကျားကြီးက ပြောကြားခဲ့သည်။

မြင်းခြံခရိုင်တွင် ပကဖ အချုပ်သား ၃၂ ဦး ထောင်ဖောက်ထွက်ပြေး၊ ၁၄ ဦး ပြန်ဖမ်းမိ

အောက်တို ၂၀
The Kaladan Post
မန္တလေးတိုင်း၊ မြင်းခြံခရိုင်အတွင်း ပြည်သူ့ကာကွယ်ရေးအဖွဲ့ (ပကဖ) ဖမ်းဆီးထိန်းသိမ်းထားသော စစ်ကောင်စီ သတင်းပေး၊ စစ်သုံးပန်းနှင့် ပြစ်မှုရှိသူ ၃၂ ဦး အကြောင်းသိရှိချိန်တွင် အောက်တိုဘာ ၁၆ ရက်ညပိုင်း လက်နက်ယူဆောင်ပြီး ထောင်ဖောက်ထွက်ပြေးခဲ့သည်။ ထွက်ပြေးမှုအတွင်း အစောင့်တစ်ဦး ထိုးကြိတ်ခံရပြီး အချုပ်သားများနှင့်တွဲ ထွက်ပြေးခဲ့ဟု ဒေသခံသတင်းရင်းမြစ်က ပြောကြားသည်။ ခရိုင်ပကဖက အမျိုးသမီး ၅ ဦး ပြန်ဖမ်းရမိခဲ့ပြီး အောက်တိုဘာ ၁၇ ရက်တွင် မြင်းခြံခရိုင်အမှတ် (၇) တပ်ရင်း (ZERO ပြောက်ကျားတပ်ဖွဲ့) က အမျိုးသား ၇ ဦး နှင့် အမျိုးသမီး ၁ ဦး ဖမ်းဆီးရနိုင်ခဲ့သည်။ ဖမ်းဆီးခံရသူများထံမှ AK လက်နှင့် အတို၊ ကာဘိုင်နှင့် ဓားချောင်း သိမ်းဆည်းရရှိခဲ့ဟု ZERO ခေါင်းဆောင် ကိုသက်ကြီးက လူမှုကွန်ရက်တွင် ဖော်ပြထားသည်။ အောက်တိုဘာ ၁၈ ရက်တွင် တော်လှန်ရေးအဖွဲ့များ ရှာဖွေရာ စစ်သုံးပန်း အချုပ်သားတစ်ဦး လက်နက်ဖြင့် ခုခံတိုက်ခိုက်ခဲ့ရာ အသေလက်ရ ဖမ်းဆီးနိုင်ခဲ့သည်။ ယင်းဖြင့် စုစုပေါင်း ၁၄ ဦး ဖမ်းဆီးရရှိခဲ့သော်လည်း ကျန်အချုပ်သားများ စက်မနှင့် ခမရ ၁၅ တပ်သို့ ရောက်ရှိသွားဟု ကြားရသည်။ ခရိုင်ပကဖ တာဝန်ရှိသူက ဖြစ်ရပ်ကို အတည်ပြုပြီး ဆောင်ရွက်ဆဲ ဖြစ်ကာ အသေးစိတ်ကို နောက်ပိုင်း ထုတ်ပြန်မည်ဟု ဖြေကြားခဲ့သည်။ လက်ရှိ ခရိုင်တွင် နွားထိုးကြီး နှင့် မြင်းခြံ ကြား လမ်းပိုင်းနှင့် အရှေ့၊ တောင်ဘက်ခြမ်းများတွင် စစ်ကောင်စီ စစ်ကြောင်းများ ထိုးနေရာ နှစ်ဖက်စစ်ရေး တင်းမာနေဆဲ ဖြစ်သည်။