အောက်တို (၉) သတင်းတိုပေါင်းချုပ်

၀ိုင်းမော်၊ ဗန်းမော်တွင် KIA ပူးပေါင်းတပ်များက စစ်တပ်ကာကင်းစခန်းများ သိမ်းပိုက်နိုင်ခဲ့ဟု KIO ပြောခွင့်ရှိသူ ပြော

အောက်တို ၉
The Kaladan Post

ကချင်ပြည်နယ် ၀ိုင်းမော်နှင့် ဗန်းမော်တိုက်ပွဲများတွင် KIA ပူးပေါင်းတပ်များက စစ်တပ်၏ ကာကင်းစခန်းများနှင့် တပ်စွဲရာနေရာများကို ပြန်လည် သိမ်းပိုက်နိုင်ခဲ့ကြောင်း KIO/KIA ပြောရေးဆိုခွင့်ရှိသူ ဗိုလ်မှူးကြီး နော်ဘူက ပြောသည်။ အောက်တိုဘာ ၆ ရက်နေ့မှစ၍ စစ်တပ်က ဝိုင်းမော်ခလရ ၅၈ တပ်ရင်းအနီးတွင် ထိုးစစ်ဆင်ခဲ့ရာမှ တိုက်ပွဲများ ပြင်းထန်လာပြီး အောက်တိုဘာ ၈ ရက်နေ့တွင် KIA တပ်များက တန်ပြန် ထိုးစစ်ဆင်ကာ စစ်တပ်ကာကင်းစခန်းအချို့ကို သိမ်းပိုက်နိုင်ခဲ့သည်။

ဗန်းမော်တွင်လည်း တိုက်ပွဲများ ဆက်လက်ဖြစ်ပွားနေပြီး KIA ပူးပေါင်းတပ်များက ခလရ ၄၇ အနီးရှိ စစ်တပ်စွဲနေရာ ၄ ခုခန့်ကို ပြန်လည် သိမ်းပိုက်နိုင်ခဲ့ကြောင်း ဗိုလ်မှူးကြီး နော်ဘူက ထပ်ဆင့်ဖော်ပြသည်။ ထိုတိုက်ပွဲများတွင် စစ်တပ်ဘက်မှ ဗိုလ်မှူးတစ်ဦးအပါအဝင် အရာရှိအချို့ သေဆုံးခဲ့ကြောင်းလည်း ဖော်ပြခဲ့သည်။ KIA သတင်းရင်းမြစ်များကလည်း စစ်တပ်အဖွဲ့များကို တန်ပြန်တိုက်ခိုက်ခြင်းနှင့် တပ်စွဲနေရာများကို ဆက်လက် သိမ်းယူနေကြောင်း အတည်ပြုခဲ့သည်။

ခင်ရီက ကြံ့ဖွတ်ပါတီအနေဖြင့် အမျိုးဘာသာသာသနာအတွက် ရပ်တည်မည်နှင့် NLD ပြန်လာခွင့်မရှိတော့ဟု ကြေညာ

အောက်တို ၉
The Kaladan Post

စစ်တပ်အထောက်အပံ့ရှိ ကြံ့ဖွတ်ပါတီဥက္ကဋ္ဌ ခင်ရီက မဘသနှင့် အမျိုးသားရေးအစွန်းရောက် အဖွဲ့များကို တွေ့ဆုံစဉ် NLD ပါတီသည် နိုင်ငံရေးလောကသို့ ပြန်လည်လာနိုင်ခြင်း မရှိတော့ကြောင်း ပြောဆိုခဲ့သည်။ ထို့အပြင် ကြံ့ဖွတ်ပါတီသည် အမျိုး၊ ဘာသာ၊ သာသနာ အတွက် ထာဝရရပ်တည်မည်ဟုလည်း ကတိပြုခဲ့ကြောင်း သိရှိရသည်။ ဤတွေ့ဆုံမှုသည် အောက်တိုဘာလ ၃ ရက်နေ့တွင် ရန်ကုန်မြို့ရှိ ပါတီရုံးချုပ်၌ ပြုလုပ်ခဲ့ခြင်းဖြစ်သည်။

မဘသနှင့် အမျိုးသားရေးအဖွဲ့များကလည်း ကြံ့ဖွတ်ပါတီအပေါ် ယုံကြည်ကူညီကြမည်ဟု ထောက်ခံပြောကြားခဲ့ကြပြီး အမျိုးဘာသာသာသနာအတွက် ပါတီက ဆက်လက်ရပ်တည် မည်ဟု ခင်ရီက ထပ်မံကတိပြုခဲ့သည်။ ထို့အပြင် NLD ပါတီအနေဖြင့် ယခင်ကဲ့သို့ နိုင်ငံရေးတွင် ပါဝင်လာရန် အခွင့်အလမ်း မရှိတော့ကြောင်းလည်း ဖော်ပြခဲ့သည်။ ၎င်းတွင် ရွေးကောက်ပွဲအောင်မြင်ရေးနှင့် ပါတီအောင်နိုင်ရေးအတွက် မဘသနှင့်အမျိုးသားရေး အစွန်းရောက်များကိုလည်း ကူညီရန် တိုက်တွန်းခဲ့ကြောင်း သတင်းရရှိသည်။

အလင်းဝင် စစ်မှုထမ်းအောင်ကိုကိုဟိန်းက စစ်တပ်တွင် သက်ကြီးရွယ်အိုများပါ အသုံးပြု၍ ပြည်သူပိုင်ပစ္စည်းများ လုယက်ခိုင်းကြောင်း ဝန်ခံ

အောက်တို ၉
The Kaladan Post

အကြမ်းဖက်စစ်တပ်အတွင်း လူငယ်များအပြင် အသက် ၇၀ အထိ သက်ကြီးရွယ်အိုများကိုပါ စစ်မှုထမ်းအဖြစ် အသုံးပြုနေကြောင်း၊ စစ်နိုင်သဖြင့် ဆုအဖြစ် ပြည်သူပိုင်ပစ္စည်းများကို ယူခွင့်ရှိသည်ဟုဆိုကာ လုယက်ခိုင်းကြောင်း အလင်းဝင် စစ်မှုထမ်းတပ်သား အောင်ကိုကိုဟိန်းက ဝန်ခံပြောဆိုခဲ့သည်။ ၎င်းသည် စက်တင်ဘာ ၂၉ ရက်နေ့တွင် ဒီးမော့ဆို မြို့နယ်ရှိ KNDF ထံသို့ အလင်းဝင်လာခဲ့သူ ဖြစ်ပြီး ပေါ်တာဆွဲဖမ်းဆီးခံရကာ စစ်ထဲသို့ ဝင်ရသူဖြစ်သည်။

သူက စစ်တပ်အတွင်းတွင် အသက်ကြီးသူများ၊ မူးယစ်ဆေးသုံးသူများနှင့် စိတ်ဝေဒနာရှင် များအထိ တပ်သွင်းအသုံးပြုနေကြောင်း၊ ထို့ပြင် စစ်မှုထမ်းများကို အဆင့်အဆင့် အနိုင်ကျင့်ခြင်းများ ရှိနေကြောင်း ထုတ်ဖော်ပြောခဲ့သည်။ ထိုအပြင် အာဟာရမပြည့်စုံသော စားနပ်ရိက္ခာနှင့် လစာဖြတ်စားမှုများကြောင့် အောက်ခြေတပ်သားများ အခက်အခဲများ ခံစားနေရကြောင်း၊ ပြည်သူများအပိုင်ပစ္စည်းများကိုလည်း “စစ်နိုင်သဖြင့် ယူခွင့်ရှိသည်” ဟုဆိုကာ လုယက်ခိုင်းကြောင်း ထပ်မံဖော်ပြခဲ့သည်။

ပေါက်၊ မြိုင်နှင့် မင်းတပ်တွင် စစ်တပ်လေကြောင်းတိုက်ခိုက်မှုများဖြစ်ပွား၍ ပြည်သူ ၉ ဦးသေဆုံး

အောက်တို ၉
The Kaladan Post

မကွေးတိုင်းဒေသကြီး ပေါက်နှင့် မြိုင်မြို့နယ်များတွင် အကြမ်းဖက်စစ်တပ်က Gyrocopter များဖြင့် လေကြောင်းမှ ဗုံးကြဲတိုက်ခိုက်မှုများ ပြုလုပ်သဖြင့် ပြည်သူအနည်းဆုံး ၅ ဦးသေဆုံးကာ ဒဏ်ရာရသူများစွာရှိကြောင်း ဒေသခံများထံမှ သိရသည်။ ဗုံးတစ်လုံးသည် နေအိမ်ပေါ်သို့ ကျရောက်ပေါက်ကွဲခြင်းကြောင့် လူနှစ်ဦးသေဆုံးပြီး ကလေးငယ်တစ်ဦး ထိခိုက်ဒဏ်ရာရခဲ့သည်ဟုဆိုသည်။ ထို့အပြင် ရေနံမြေ အလုပ်သမားသုံးဦးလည်း ပွဲချင်းသေဆုံးခဲ့ပြီး ဒဏ်ရာရသူ ငါးဦးပါရှိကြောင်း ဖော်ပြထားသည်။

အောက်တိုဘာလ ၇ ရက်နေ့တွင်လည်း ပေါက်မြို့နယ်အတွင်း စစ်တပ်အင်အား ၆၀ ခန့်ပါ စစ်ကြောင်းက ပြည်သူ ၁၁ ဦးကို ဖမ်းဆီးခဲ့ပြီး ထိုအနက် ၂ ဦးမှာ သေနတ်နှင့် ဓားဒဏ်ရာများ ခံရကြောင်း သတင်းရသည်။ ထို့အပြင် ချင်းပြည်နယ် မင်းတပ်မြို့နယ်ရှိ ကျေးရွာနှစ်ရွာကို လည်း ဂျက်ဖိုက်တာများက ဗုံးကြဲတိုက်ခိုက်ရာ စစ်ဘေးရှောင် ကလေး ၃ဦးနှင့် မသန်စွမ်း အမျိုးသမီး တစ်ဦး အသက်ဆုံးရှုံးခဲ့ရပြီး ၂၂ ဦး ထိခိုက်ဒဏ်ရာရရှိကြောင်း သိရသည်။ ဒေသခံများက လေကြောင်းတိုက်ခိုက်မှုများ ဆက်လက်ဖြစ်ပွားမည်ဆိုသော စိုးရိမ်မှုရှိနေ ကြောင်း ပြောဆိုခဲ့သည်။

ဂန့်ဂေါမြို့နယ် စိုင်ဒူးရွာတွင် စစ်တပ်စစ်ကြောင်းထိုး မီးရှို့မှုဖြစ်ပွား

အောက်တို ၉
The Kaladan Post

မကွေးတိုင်း ဂန့်ဂေါမြို့နယ် စိုင်ဒူးကျေးရွာတွင် အကြမ်းဖက်စစ်တပ်၏ စစ်ကြောင်းထိုး မီးရှို့မှုကြောင့် နေအိမ် ၄ လုံး ပြာကျသွားပြီး ကျေးရွာနေပြည်သူများသည် ရွာလုံးကျွတ် ထွက်ပြေးတိမ်းရှောင်နေရကြောင်း သိရသည်။ အောက်တိုဘာလ ၈ ရက်နေ့ မွန်းလွဲ ၂ နာရီခန့်တွင် ခလရ ၅၀ တပ်ရင်းမှ စစ်သား အင်အား ၁၀၀ ခန့်ပါ စစ်ကြောင်းသည် သေနတ်များ ပစ်ဖောက်ကာ ရွာသို့ ဝင်ရောက်စီးနင်းခဲ့ကြောင်း ဒေသခံများက ဖော်ပြသည်။

ထိုအခါ ပြည်သူများသည် အားလုံး ထွက်ပြေးတိမ်းရှောင်နေရပြီး မီးရှို့ခံရသောအိမ်များအပြင် ဆောက်လုပ်ရေးဝင်းတစ်ခုပါ ဖျက်ဆီးခံခဲ့ရသည်။ ထို့အပြင် စစ်သားများက ပြည်သူ့အိမ်များ ကို ဖောက်ထွင်း၍ စားနပ်ရိက္ခာများနှင့် တန်ဖိုးရှိပစ္စည်းများ ခိုးယူသွားကြောင်း သိရသည်။ စစ်ကြောင်းသည် ယနေ့ ညနေ ၄ နာရီခန့်တွင် ဂန့်ဂေါမြို့သို့ ပြန်ဆုတ်သွားပြီး ထိခိုက်ဒဏ်ရာရသူ မရှိခဲ့ကြောင်း ဒေသခံများက ဆိုသည်။

ကနီမြို့တွင် စစ်တပ်စစ်ကြောင်းကို PDF တပ်ဖွဲ့များ စောင့်ကြိုတိုက်ခိုက်

အောက်တို ၉
The Kaladan Post

စစ်ကိုင်းတိုင်းဒေသကြီး၊ ကနီမြို့တွင် စစ်တပ်နှင့် ရဲအဖွဲ့တို့၏ ကင်းလှည့်စစ်ကြောင်းကို ပြည်သူ့ကာကွယ်ရေးတပ်ဖွဲ့များက စောင့်ကြိုတိုက်ခိုက်ခဲ့ပြီး စစ်သားနှင့် ရဲ စုစုပေါင်း ၇ ဦး သေဆုံးကြောင်း သိရသည်။ အောက်တိုဘာ ၈ ရက်နေ့ မွန်းလွဲ ၁၂ နာရီ ၄၀ မိနစ်ခန့်တွင် ကနီမြို့၊ ရပ်ကွက် (၃) အနီးတွင် ဖြစ်ပွားခဲ့သော တိုက်ခိုက်မှုတွင် MA1 နှင့် MA11 သေနတ်များ ၂ လက်နှင့် ခဲယမ်းပစ္စည်းအချို့ကို PDF ဘက်မှ သိမ်းဆည်းရရှိခဲ့ကြောင်း KLG PDF တပ်ဖွဲ့ တာဝန်ရှိသူက ဖော်ပြသည်။

တိုက်ပွဲကြာချိန်သည် မိနစ် ၂၀ ခန့်သာရှိပြီး မြို့တွင်းရှိ တပ်ကူအဖွဲ့များ ရောက်လာသဖြင့် PDF တပ်ဖွဲ့က လက်နက်အပြည့်မသိမ်းနိုင်ဘဲ ပြန်ဆုတ်ခဲ့ကြောင်း သိရသည်။ ထိုတိုက်ခိုက်မှုကို ယင်းမာပင်ခရိုင် ၉+အဖွဲ့ဝင် ဗျူဟာ ၄၅ KLG PDF တပ်ဖွဲ့မှ တပ်စိတ်တစ်စိတ်ဖြင့် ဆောင်ရွက်ခဲ့ခြင်းဖြစ်ပြီး တော်လှန်ရေးအဖွဲ့ဝင်များအနေနဲ့ ထိခိုက်ဒဏ်ရာမရှိဘဲ ပြန်လည်ဆုတ်ခွာနိုင်ခဲ့ကြောင်း သတင်းရရိသည်။

ပွင့်ဖြူမြို့နယ်တွင် စစ်တပ်စစ်ဆေးရေးဂိတ်ကို PDF တပ်ဖွဲ့များ သိမ်းပိုက်

အောက်တို ၉
The Kaladan Post

မကွေးတိုင်းဒေသကြီး၊ ပွင့်ဖြူမြို့နယ် ပုသိမ်–မုံရွာလမ်းပေါ်ရှိ စစ်တပ်စစ်ဆေးရေးဂိတ်ကို ပြည်သူ့ကာကွယ်ရေးတပ်ဖွဲ့များ ပူးပေါင်းဝင်ရောက်တိုက်ခိုက်ပြီး စစ်သား ၄ ဦး သေဆုံးကာ လက်နက် ၆ လက်နှင့် ခဲယမ်းများ သိမ်းဆည်းရရှိခဲ့ကြောင်း မင်းဘူးခရိုင် အမှတ် (၇) တပ်ရင်းမှ တာဝန်ရှိသူက ဖော်ပြသည်။ တိုက်ပွဲသည် အောက်တိုဘာ ၄ ရက်နေ့ ညနေ ၅ နာရီခန့်တွင် မဲဇလီ–ဆည်တော်ကြိုးတံတားအနီးတွင် ဖြစ်ပွားခဲ့ပြီး တစ်နာရီခွဲကြာမြင့် ခဲ့ကြောင်း သိရသည်။

တိုက်ပွဲအပြီးတွင် ဂိတ်စခန်းကို သိမ်းပိုက်နိုင်ခဲ့ပြီး စစ်သားအလောင်း ၄ လောင်းနှင့် စစ်အသုံးအဆောင်ပစ္စည်းများပါ လက်ဝယ်ရရှိခဲ့ကြောင်း ဖော်ပြသည်။ ယင်းတိုက်ခိုက်မှုကို မင်းဘူးခရိုင် အမှတ် (၇) တပ်ရင်း၊ မင်းဘူးခရိုင် ပကဖနှင့် ပွင့်ဖြူမြို့နယ် ပကဖ တို့ ပူးပေါင်းဆောင်ရွက်ခဲ့ခြင်းဖြစ်ပြီး တပ်ဖွဲ့ဝင်များ ဘေးအန္တရာယ်မရှိကြောင်း သိရသည်။ ထို့အပြင် ပြည်သူများအား လမ်းပိုင်းဆိုင်ရာ စည်းကမ်းများကိုလိုက်နာပြီး စစ်တပ်စစ်ကြောင်း နှင့်တွေ့ပါက ဝေးဝေးမှ ရှောင်ရှားရန် တပ်ရင်းက သတိပေးထားသည်။

လေးကေ့ကော်မြို့သစ်တွင် တိုက်ပွဲများ ပြင်းထန်ပြီး စစ်တပ်ဘက် သေဆုံးသူ ၁၀၀ ကျော်ရှိဟုဆို

အောက်တို ၉
The Kaladan Post

ကရင်ပြည်နယ်၊ မြဝတီမြို့နယ် လေးကေ့ကော်မြို့သစ်အနီးတွင် စက်တင်ဘာလ ၂၁ ရက်မှစ၍ နေ့စဉ်တိုက်ပွဲများ ပြင်းထန်လှပါသည်။ အကြမ်းဖက် စစ်ကောင်စီတပ်များသည် လေကြောင်း၊ ဒုံးကျည်၊ Drone နှင့် လက်နက်ကြီးများဖြင့် ထိုးစစ်ဆင်နေပြီး တော်လှန်ရေး တပ်ဖွဲ့များက ပြင်းထန်စွာ တိုက်ခိုက် တုံ့ပြန်နေကြသည်။ ထိုတိုက်ပွဲများအတွင်း စစ်သား ၁၅၀ ကျော် သေဆုံးခဲ့ကြောင်း ကျားသစ်နက်နှင့် Justice Soldier တပ်ဖွဲ့များက ဖော်ပြသည်။

တော်လှန်ရေးဘက်မှတပ်ဖွဲ့တချို့သည် နေရာအချို့မှ နောက်ဆုတ်ခဲ့ရသော်လည်း စစ်တပ် ဘက်တွင် အလင်းဝင် စစ်သားများ တိုးလာနေသည်ဟု သိရသည်။ စစ်ကောင်စီတပ်များသည် မူးယစ်ဆေးဝါကျွေးကာ အတင်းအဓမ္မ စုဆောင်းသည့် စစ်မှုထမ်းများကို အသုံးပြု၍ တိုက်ပွဲထိုးနေခြင်းကြောင့် သေဆုံးသူအများစုမှာ စစ်မှုထမ်းတပ်သားများဖြစ်ကြောင်း သတင်းရသည်။ လက်ရှိတွင် KNU/KNLA၊ ကျားသစ်နက်၊ ကော်ဘရာ၊ ဗွီနွန်နှင့် Justice Soldier တပ်ဖွဲ့များ ပူးပေါင်းကာ စစ်တပ်ကို ဆက်လက်တိုက်ခိုက်နေကြသည်။

ကျောက်မဲနှင့် သရက်ချောင်းမြို့နယ်များတွင် စစ်တပ် လေကြောင်းဗုံးကြဲတိုက်ခိုက်မှုဖြစ်ပွား

အောက်တို ၉
The Kaladan Post

ရှမ်းပြည်နယ်မြောက်ပိုင်း ကျောက်မဲမြို့နယ် မိုင်းငေါ့မြို့ တာလုံရပ်ကွက်ကို စစ်တပ်က အောက်တိုဘာ ၈ ရက်နေ့ နံနက်ပိုင်းတွင် လေယာဉ်ဖြင့် ဗုံးကြဲချခဲ့ကြောင်း ဒေသခံများက သတင်းပေးလိုက်သည်။ ဗုံးကြဲမှုသည် နှစ်ကြိမ်ဆက်တိုက် ဖြစ်ပွားခဲ့ပြီး ရဲစခန်းနှင့် အထက်တာလုံရပ်ကွက်အနီးသို့ ဗုံးကျရောက်ခဲ့သည်ဟု သိရသည်။ ဒေသတွင် ထိခိုက်ဆုံးရှုံးမှု အသေးစိတ်မသိရသေးပေမဲ့ ပြည်သူများကြား မျှော်လင့်ချက်မရှိဘဲ ကြောက်ရွံ့နေကြသည်။

ထို့အပြင် တနင်္သာရီတိုင်း သရက်ချောင်းမြို့နယ် သဲချောင်းကြီးရွာတွင်လည်း အောက်တိုဘာ ၅ ရက်နေ့တွင် စစ်တပ်၏ လေယာဉ်ဗုံးကြဲတိုက်ခိုက်မှုဖြစ်ပွားခဲ့သည်။ ထိုအကြောင့် အသက် ၉၁ နှစ်အရွယ် အမျိုးသမီးအပါအဝင် ပြည်သူ ၄ ဦး ထိခိုက်ဒဏ်ရာရရှိပြီး နေအိမ် ၂ လုံး ပျက်စီးသွားခဲ့ကြောင်း KNU ထုတ်ပြန်ချက်အရ သိရသည်။ စစ်တပ်သည် သရက်ချောင်းမြို့နယ်အတွင်း၌လည်း လေကြောင်းနှင့် မြေပြင်စစ်ကြောင်းများဖြင့် ဆက်လက်ထိုးစစ်ဆင်နေဆဲဖြစ်သည်။

နမ္မတူနှင့် သီပေါမြို့များတွင် စစ်တပ် လေကြောင်းဗုံးကြဲတိုက်ခိုက်မှုများကြောင့် ပြည်သူများ စစ်ဘေးရှောင်

အောက်တို ၉
The Kaladan Post

ရှမ်းပြည်နယ်အတွင်း နမ္မတူနှင့် သီပေါမြို့များကို အကြမ်းဖက်စစ်တပ်က အောက်တိုဘာလ ၂ ရက်နေ့မှ စတင်၍ နေ့စဉ် ဆက်တိုက် လေကြောင်းဖြင့် ဗုံးကြဲတိုက်ခိုက်နေသောကြောင့် ပြည်သူအများစု မြို့များမှ စစ်ဘေးရှောင်နေကြသည်။ လေကြောင်းတိုက်ခိုက်မှုကြောင့် နေအိမ်များနှင့် ဘုန်းကြီးကျောင်းများ ပျက်စီးပြီး သေဆုံးမှုများ ဖြစ်ပွားလာကြောင်း သိရသည်။ သီပေါမြို့တွင်သာပင် ပြည်သူ၏ ၅၀ ရာခိုင်နှုန်းကျော်က ရှောင်ပြေးနေကြပြီး နမ္မတူမြို့တွင်လည်း မြို့တစ်မြို့လုံးလောက် အလျင်အမြန် နယ်နမ့်အပြင်သို့ ထွက်ပြေးနေကြသည်။

ထို့အပြင် စစ်တပ်သည် နမ္မတူမြို့ရှိ ဗုဗ္ဗာရုံဘုန်းကြီးကျောင်းကို တိုက်ပွဲမရှိသော်လည်း လေယာဉ်ဖြင့် ဗုံးကြဲချ၍ ပျက်စီးသွားခဲ့ပြီး ပြည်သူ ၄ ဦး သေဆုံးကာ ၅ ဦး ဒဏ်ရာရရှိခဲ့သည်။ အလားတူ မိုင်းလုံမြို့နယ်တွင်လည်း စစ်တပ်၏ လေကြောင်းဗုံးကြဲတိုက်ခိုက်မှုကြောင့် ပြည်သူ ၁၀ ဦးကျော် သေဆုံးခဲ့ကြောင်း သတင်းများအရ သိရှိရသည်။ စစ်တပ်၏ ဆက်တိုက် လေကြောင်းတိုက်ခိုက်မှုများကြောင့် ဒေသခံပြည်သူများ စိုးရိမ်မှုတိုးလာနေပြီး စစ်ဘေးရှောင်မှု တဖြည်းဖြည်း များလာနေသည်။