ဩဂုတ် (၃၀) သတင်းတိုပေါင်းချုပ်

နတ်မောက်တွင် စစ်တပ်လေကြောင်းဗုံးကြဲမှု ၁၄ နှစ်အရွယ်မိန်းကလေးသေဆုံး

ဩဂုတ် ၃၀
The Kaladan Post
မကွေးတိုင်း၊ နတ်မောက်မြို့နယ်၊ သနပ်ပေါက်တောတဲတိုက်ကို အကြမ်းဖက်စစ်တပ်က ဩဂုတ်လ ၃၀ ရက် နံနက် ၉ နာရီ ၁၅ မိနစ်တွင် စက်တပ်လေထီးဖြင့် ဗုံးကြဲတိုက်ခိုက်ခဲ့သည်။ ဤတိုက်ခိုက်မှုကြောင့် အသက် ၁၄ နှစ်အရွယ် မိန်းကလေးတစ်ဦးသေဆုံးပြီး အမျိုးသားတစ်ဦး ဒဏ်ရာပြင်းထန်ရရှိခဲ့ကြောင်း နတ်မောက်မြို့နယ် ပကဖတာဝန်ခံက ပြောကြားသည်။ ဗုံးကြဲမှုသည် တိုက်ပွဲဖြစ်ပွားခြင်းမရှိဘဲ ပြည်သူနေထိုင်ရာနေရာကို ပစ်မှတ်ထားလုပ်ဆောင်ခဲ့ခြင်းဖြစ်သည်။ လူနာအား ဆေးကုသမှုပေးထားပြီး အခြားနေရာများတွင် ထပ်မံဗုံးကြဲမှုမရှိကြောင်း သိရသည်။

အကြမ်းဖက်စစ်ကောင်စီသည် အပြစ်မဲ့ပြည်သူများ နေထိုင်ရာ ကျေးရွာများ၊ ဘာသာရေး အဆောက်အအုံများနှင့် စစ်ဘေးရှောင်စခန်းများကို လေကြောင်းဖြင့် ပစ်မှတ်ထားတိုက်ခိုက် လျက်ရှိသည်။ ထို့ကြောင့် ပြည်သူများအနေဖြင့် လေကြောင်းရန်ကာကွယ်ရေးနည်းလမ်း များကို လိုက်နာကျင့်သုံးရန်နှင့် ဗုံးခိုကျင်းများကို ခိုင်မာစွာ တည်ဆောက်ထားရန် တော်လှန်ရေးအင်အားစုများက တိုက်တွန်းထားသည်။

ကျောက်မဲတွင် စစ်တပ်၏ ဒရုန်းနှင့်လက်နက်ကြီးတိုက်ခိုက်မှု စစ်ဘေးရှောင်သေဆုံး

ဩဂုတ် ၃၀
The Kaladan Post
ရှမ်းပြည်နယ်မြောက်ပိုင်း၊ ကျောက်မဲမြို့နယ်တွင် စစ်တပ်က ဒရုန်းဖြင့်ဗုံးကြဲမှုနှင့် လက်နက်ကြီးဖြင့် ပစ်ခတ်မှုကြောင့် စစ်ဘေးရှောင် ဦးစိုးမောင် ကျည်ထိမှန်သေဆုံးခဲ့ကြောင်း ဒေသခံများနှင့် ပရဟိတအဖွဲ့ထံမှ သိရသည်။ ဩဂုတ်လ ၂၉ ရက် မွန်းလွဲ ၂ နာရီဝန်းကျင်တွင် ခိုက်တုန်ဟုန်းကျေးရွာသို့ လက်နက်ကြီးဖြင့် ပစ်ခတ်ခဲ့ရာ အသက် ၅၁ နှစ်အရွယ် ဦးစိုးမောင် လက်နက်ကြီးကျည်ထိမှန်ပြီး ပွဲချင်းပြီး သေဆုံးခဲ့သည်။ ၎င်းသည် အိမ်သို့ ဆန်နှင့်ဆီ ယူရန်ပြန်လာစဉ် ထိခိုက်ခဲ့ခြင်းဖြစ်သည်။ သေဆုံးသူအား ထိုနေ့တွင်ပင် သဂြိုလ်ခဲ့ကြောင်း ဒေသခံတစ်ဦးက ပြောသည်။

စစ်တပ်သည် ကျောက်မဲမြို့၊ နားအိုက်ခန်ကျေးရွာအုပ်စုနှင့် လွယ်ခေါ်ရွာအနီးရှိ နတ်စင်အနီးနှင့် ရွာအထွက်တို့တွင် ဒရုန်းဗုံးများနှင့် လက်နက်ကြီးကျည်များ ကျရောက်ပေါက်ကွဲခဲ့ကြောင်း သိရသည်။ လက်ရှိတွင် စစ်တပ်က နောင်ပိန်ကျေးရွာနှင့် ဂုတ်ထိပ်တံတားကို ပြန်လည်သိမ်းပိုက်ထားသည်။ ပြည်သူများအနေဖြင့် လေကြောင်းရန်နှင့် လက်နက်ကြီးအန္တရာယ်မှ ကာကွယ်ရန် ဗုံးခိုကျင်းများ ခိုင်မာစွာတည်ဆောက်ထားရန် တိုက်တွန်းထားသည်။

ချောက်မြို့နယ်တွင် စစ်မှုထမ်းဖမ်းဆီးမှု လူငယ်များ အကြမ်းဖက်ခံရ

ဩဂုတ် ၃၀
The Kaladan Post
မကွေးတိုင်း၊ ချောက်မြို့နယ်တွင် စစ်မှုထမ်းအပတ်စဉ် ၁၇ အတွက် အင်အားမလုံလောက်ဟုဆိုကာ စီမံအုပ်ချုပ်ရေးအဖွဲ့ဝင် ဗိုလ်မှူး တင်ထွန်းဦးက စစ်တပ်နှင့် ပျူစောထီးများအား လူငယ်များကို အကြမ်းဖက် ဖမ်းဆီးခိုင်းနေကြောင်း ဒေသခံများက ပြောသည်။ ဩဂုတ်လ ၂၀ ရက်မှစတင်ကာ နေ့ရောညပါ စျေးဆိုင်များနှင့် နေအိမ်များ အတွင်းထိ ဝင်ရောက်ဖမ်းဆီးမှုများ ပြုလုပ်နေသည်။ အချို့လူငယ်များမှာ အသက်မပြည့်သေး သူများဖြစ်ပြီး လက်ထိပ်ခတ်ကာ ဖမ်းဆီးခံရသည်။ ငွေပေးပြီး ရွေးယူနိုင်သူများရှိသော်လည်း များစွာသောလူငယ်များ မလွတ်မြောက်နိုင်ကြပေ။

ဤဖမ်းဆီးမှုကြောင့် ချောက်မြို့ပေါ်တွင် လူငယ်အမျိုးသားများ စျေးဆိုင်များတွင် မရှိတော့သလောက်ဖြစ်ပြီး အလုပ်သမားများလည်း အလုပ်မလာရဲကြတော့ချေ။ စစ်တပ်က မြို့ပေါ်တွင် ဂိတ်ပေါင်းများစွာချထားကာ လူငယ်များကို အကြောင်းမဲ့ ဖမ်းဆီးနေပြီး တစ်နေ့လျှင် ဆယ်ဂဏန်းချီဖမ်းဆီးခံရသည်။ မိဘများမှာလည်း စိုးရိမ်ထိတ်လန့်နေကြ ရသည်။ ဒေသတွင်း စစ်တပ်နှင့် တော်လှန်ရေးတပ်များအကြား တိုက်ပွဲများ မကြာခဏဖြစ်ပွား လျက်ရှိပြီး စစ်တပ်က ကျေးရွာများကို ဖျက်ဆီးရန် စစ်ကြောင်းထိုးနေသည်။

ရေဖြူမြို့နယ်တွင် စစ်တပ်မှ ထွက်ပြေးသူ ၄ ဦးကို တော်လှန်ရေးတပ်ဖမ်းဆီး

ဩဂုတ် ၃၀
The Kaladan Post
တနင်္သာရီတိုင်း၊ ရေဖြူမြို့နယ်တွင် စစ်ကြောင်းထိုးနေသည့် အကြမ်းဖက်စစ်တပ်မှ ထွက်ပြေးလာသော စစ်သား ၁ ဦးနှင့် စစ်မှုထမ်းတပ်သား ၃ ဦးကို တော်လှန်ရေးတပ်ဖွဲ့က အရှင်ဖမ်းဆီးရမိခဲ့ကြောင်း အထူးတိုင်းနည်းဗျူဟာ ၃၃ စစ်ဆင်ရေးမှုး ရဲဘော်စောဒါးကိုက ပြောသည်။ ဩဂုတ်လ ၂၅ နှင့် ၂၆ ရက်တွင် ကော့လှိုင်း၊ မရမ်းချောင်း၊ မိုင် ၆၀ နှင့် သာယာမွန် ကျေးရွာများတွင် ထွက်ပြေးလာသူများကို ရှေ့တန်းစစ်မြေပြင်တွင် ဖမ်းဆီးရမိခဲ့သည်။ ဖမ်းဆီးခံရသူများမှာ စစ်မှုထမ်းတပ်သား နန်းကိုကို၊ နိုင်လင်းအောင်၊ ရန်နိုင်မင်း (ခ) ချစ်စမ်းမောင်နှင့် ခမရ ၄၀၅ မှ စစ်သား ဇေယျာဝင်း (ခ) ကျော်ဝင်းတို့ဖြစ်သည်။

စစ်မှုထမ်းတပ်သားများသည် မတရားဖမ်းဆီးခံရပြီး သင်တန်း ၂ လခွဲသာ တက်ရောက်ခဲ့ပြီးနောက် စစ်မြေပြင်သို့ ပို့ဆောင်ခံရစဉ် ထွက်ပြေးလာခဲ့ခြင်းဖြစ်သည်။ ၎င်းတို့က စစ်တပ်အရာရှိများက မတရားခိုင်းစေမှု၊ ရှေ့တန်းတင်ပို့ခြင်း၊ ပြည်သူပိုင်ပစ္စည်းများ ခိုးယူခိုင်းခြင်းနှင့် အရပ်သားများကို နှိပ်စက်သတ်ဖြတ်ခိုင်းခြင်းများ ပြုလုပ်ခဲ့သည်ဟု ထွက်ဆိုသည်။ ဤစစ်ဆင်ရေးကို နည်းဗျူဟာ ၃၃ အထူးစစ်ဆင်ရေးအဖွဲ့အပါအဝင် YGF၊ KBDF၊ MSRF၊ KNLA စသည့်တပ်ဖွဲ့များက ပူးပေါင်းလုပ်ဆောင်ခဲ့ပြီး NUG ၏ စစ်သုံ့ပန်းဥပဒေဖြင့် အရေးယူထားသည်။

ရေးမြို့နယ်တွင် စစ်သားများကို ရေးဘီလူးအဖွဲ့ တိုက်ခိုက် ၅ ဦးသေဆုံး

ဩဂုတ် ၃၀
The Kaladan Post
မွန်ပြည်နယ်၊ ရေးမြို့နယ်ရှိ ခမရ ၅၉၁ တပ်ရင်းမှ ကင်းလှည့်ရန် ထွက်လာသော စစ်သားများကို ရေးဘီလူးတပ်ရင်းက တိုက်ခိုက်ခဲ့ရာ စစ်တပ်ဘက်မှ ၅ ဦးသေဆုံးခဲ့ကြောင်း ရေးဘီလူးအဖွဲ့မှ တာဝန်ရှိသူတစ်ဦးက ပြောသည်။ ဩဂုတ်လ ၂၈ ရက် မွန်းလွဲ ၁၂ နာရီခန့်တွင် ကျောင်းရွာလမ်းပိုင်းတွင် ကင်းလှည့်နေသော စစ်သားများကို ကြားဖြတ် တိုက်ခိုက်ခဲ့ခြင်းဖြစ်သည်။ တိုက်ပွဲတွင် စစ်တပ်က လက်နက်ကြီးများဖြင့် ပြန်လည်ပစ်ခတ်ခဲ့ သော်လည်း တော်လှန်ရေးတပ်ဖွဲ့များ အထိအခိုက်မရှိ ဆုတ်ခွာနိုင်ခဲ့သည်။

စစ်တပ်ဘက်မှ အင်အား ၁၅ ဦးခန့်သာရှိပြီး ရွာလုံခြုံရေးအတွက် သီးသန့်ထွက်လာသူများ ဖြစ်ကာ ကာဗာမရှိသဖြင့် ထိခိုက်မှု ပိုမိုများပြားခဲ့သည်ဟု ရေးဘီလူးအဖွဲ့က ဆိုသည်။ ဒေသခံများကမူ သေဆုံးသူ ၇ ဦးရှိသည်ဟု ပြောဆိုထားသည်။ တိုက်ပွဲသည် တပ်ရင်းအနောက်ပေါက်အနီးတွင် ဖြစ်ပွားခဲ့ပြီး စစ်သားများမှာ စစ်ဆေးရေးပြုလုပ်နေစဉ် ဖြတ်ပိတ်တိုက်ခိုက်ခံရခြင်းဖြစ်သည်။ စစ်တပ်က လက်နက်ကြီးများဖြင့် ရမ်းသမ်းပစ်ခတ်ခဲ့ သော်လည်း တော်လှန်ရေးတပ်ဖွဲ့များ ထိခိုက်မှုမရှိခဲ့ပေ။

သရက်ချောင်းတွင် စစ်တပ်က ကျေးရွာများမီးရှို့ဖျက်ဆီးရန် အမိန့်ပေးခဲ့ဟု အလင်းဝင် စစ်သားထွက်ဆို

ဩဂုတ် ၃၀
The Kaladan Post
တနင်္သာရီတိုင်း၊ သရက်ချောင်းမြို့နယ်တွင် စစ်တပ်က ပြည်သူများ၏ ကျေးရွာများကို မီးရှို့ဖျက်ဆီးရန် အမိန့်ပေးခဲ့ရာ နေအိမ် ၅၁ လုံးပြာကျခဲ့ကြောင်း ခမရ ၄၀၄ မှ အလင်းဝင်တပ်သား မောင်ဇင်ကိုကိုက ဝန်ခံထွက်ဆိုသည်။ ၎င်းသည် ဧရာဝတီတိုင်းမှ အသက် ၁၆ နှစ်အရွယ် ကျောင်းသား ဖမ်းဆီးခံရပြီး စစ်မှုထမ်းရန် ပို့ဆောင်ခံရသူဖြစ်သည်။ ဩဂုတ်လ ၂၅ ရက်တွင် လက်နက်ခဲယမ်းများနှင့်အတူ တော်လှန်ရေးတပ်ထံ အလင်းဝင်ခဲ့သည်။ ဩဂုတ်လ ၂၂ မှ ၂၅ ရက်အတွင်း ဥတ္တူ၊ စော်ဖျားနှင့် မိုးရွှေကုန်းရွာများကို စစ်တပ်က မီးရှို့ဖျက်ဆီးခဲ့သည်။

မောင်ဇင်ကိုကိုက စစ်အရာရှိများ၏ အမိန့်ဖြင့် ရွာများကို မီးရှို့ခဲ့ရပြီး ပြည်သူပိုင်ပစ္စည်း များကိုလည်း လုယက်ခဲ့ရကြောင်း ထွက်ဆိုသည်။ ၎င်းက စစ်တပ်အတွင်း အလင်းဝင် လိုသူများစွာရှိကြောင်း၊ ပြည်သူကျွေးသော ထမင်းစားပြီး ၎င်းတို့၏ အိမ်များကို ဖျက်ဆီးရ သည့် အခြေအနေကို မလိုလားကြောင်း ပြောသည်။ တော်လှန်ရေးတပ်များ၏ ခုခံမှုကြောင့် စစ်တပ်မှာ အထိနာနေပြီး ကျေးရွာများကို ဆက်လက်ဖျက်ဆီးနေသည်။

စစ်ကိုင်းမြို့တွင် ပျူစောထီးများကို တပ်မ ၃၃ က ဖွဲ့စည်းပြီး ခြိမ်းခြောက်ငွေကောက်ခံမှုများ ခွင့်ပြု

ဩဂုတ် ၃၀
The Kaladan Post
စစ်ကိုင်းမြို့ပေါ်တွင် တပ်မ ၃၃ က ပျူစောထီးအဖွဲ့များကို ဖွဲ့စည်းပေးထားပြီး ၎င်းတို့အား ဆက်ကြေးကောက်ခံခြင်း၊ အောင်ဘာလေထီရောင်းချခြင်းနှင့် စစ်မှုထမ်းဆိုင်ရာ ငွေကြေး ကောက်ခံမှုများကို တရားဝင်ခွင့်ပြုထားကြောင်း ကင်းထောက်အဖွဲ့များက ပြောသည်။ ပျူစောထီးများသည် စျေးဆိုင်များနှင့် စီးပွားရေးလုပ်ငန်းရှင်များထံမှ အောင်ဘာလေထီကို မတန်တဆစျေးဖြင့် အတင်းအဓမ္မရောင်းချနေပြီး တန်ဖိုးအနည်းဆုံး ၅ သောင်းမှ ၃ သိန်းအထိ ကောက်ခံနေသည်။ ဤလုပ်ဆောင်မှုများသည် ၎င်းတို့၏ ရန်ပုံငွေအဖြစ် အသုံးပြုနေခြင်း ဖြစ်သည်။

ထို့ပြင် ပျူစောထီးများသည် လူငယ်များကို ဖမ်းဆီးပြီး စစ်မှုထမ်းလူစားထိုးရောင်းချခြင်း၊ တစ်ဦးလျှင် ငွေသိန်း ၁၀၀ ခန့်ဖြင့် အရောင်းအဝယ်ပြုလုပ်နေသည်။ ရဲများနှင့်ပူးပေါင်း၍ လောင်းကစားဝိုင်းများ၊ ပြည့်တန်ဆာခန်းများနှင့် ထီရောင်းချသူများထံမှလည်း ဆက်ကြေးကောက်ခံလျက်ရှိသည်။ စစ်ကိုင်းမြို့ပေါ်တွင် လူငယ်များမှာ ဖမ်းဆီးခံရမည်ကို စိုးရိမ်ထိတ်လန့်ပြီး ရှောင်တိမ်းနေရသည်။ ဤလုပ်ရပ်များကို စစ်တပ်၊ ရဲနှင့် အုပ်ချုပ်ရေးအဖွဲ့များက သိရှိထောက်ခံထားသည်ဟု ဒေသခံများက ဆိုသည်။

မြန်မာစစ်တပ်က McKeon Group ကို လစဉ်ဒေါ်လာ ၆ သောင်းဖြင့် လော်ဘီအဖြစ်ထပ်မံငှားရမ်း

ဩဂုတ် ၃၀
The Kaladan Post
အမေရိကန်အစိုးရနှင့် ဆက်ဆံရေးပြေလည်စေရန် မြန်မာစစ်တပ်က ဒုတိယလော်ဘီ ကုမ္ပဏီအဖြစ် McKeon Group ကို လစဉ်အမေရိကန်ဒေါ်လာ ၆၀,၀၀၀ ဖြင့် ငှားရမ်းခဲ့ကြောင်း သိရသည်။ ဗာဂျီးနီးယားပြည်နယ်၊ Alexandria အခြေစိုက် McKeon Group သည် အမေရိကန်နိုင်ငံခြားရေးဝန်ကြီးဌာနနှင့် ကွန်ဂရက်တို့နှင့် ဆက်ဆံရေးကောင်းမွန်စေရန် ဆောင်ရွက်မည်ဖြစ်သည်။ စာချုပ်ကို ၆ လအတွက် ချုပ်ဆိုထားပြီး ဩဂုတ်လ ၁ ရက်မှ စတင်သည်။

McKeon Group ၏ ဥက္ကဋ္ဌ Howard McKeon က ဤလုပ်ငန်းကို ဦးဆောင်မည်ဖြစ်ပြီး၊ ၎င်းတို့၏ ရရှိမည့် လစဉ်အခကြေးငွေကို DCI Group နှင့် ပူးတွဲခွဲဝေယူမည်ဖြစ်သည်။ DCI Group ကိုလည်း မြန်မာစစ်တပ်က တစ်နှစ်လျှင် ဒေါ်လာ ၃ သန်းဖြင့် ငှားရမ်းထားသည်။ ဤလုပ်ဆောင်မှုများသည် မြန်မာစစ်တပ်၏ အမေရိကန်နှင့် ဆက်ဆံရေးပြန်လည် တည်ဆောက်ရန် ကြိုးပမ်းမှုတစ်စိတ်တစ်ပိုင်းဖြစ်သည်။

ဖားကန့်တွင် စစ်တပ်က လူငယ် ၁၅ ဦးကို ရုတ်တရက်ဖမ်းဆီး

ဩဂုတ် ၃၀
The Kaladan Post
ကချင်ပြည်နယ်၊ ဖားကန့်မြို့၊ မရှီကထောင်ရပ်ကွက်၊ ကျောက်စိမ်းတောင်တံတားထိပ်တွင် လူငယ် ၁၅ ဦးကို အကြမ်းဖက်စစ်ကောင်စီတပ်က ဩဂုတ်လ ၂၉ ရက် ညပိုင်းတွင် ရုတ်တရက်ဖမ်းဆီးသွားကြောင်း ဒေသခံများက ပြောသည်။ ဖမ်းဆီးမှုသည် ကားဖြင့် ရောက်လာပြီး လူငယ်များကို အကြောင်းမသိရဘဲ ဖမ်းဆီးသွားခြင်းဖြစ်ပြီး ၎င်းတို့ကို မည်သည့်နေရာသို့ ခေါ်ဆောင်သွားသည်ကို မသိရသေးပေ။ ထိုညတွင် ပစ်ခတ်သံ တစ်ချက်နှစ်ချက်ကြားခဲ့သော်လည်း တိုက်ပွဲကြီးမားမှုမရှိခဲ့ဟု ဒေသသတင်းရင်းမြစ်က ဆိုသည်။

ဖားကန့်မြို့ပေါ်တွင် စစ်တပ်က အင်အားအပြည့်ချထားပြီး မောင်းတံဂိတ်နှင့် ပန်းတင် တံတားတွင် စစ်ဆေးရေးဂိတ်များထားရှိကာ လူငယ်များကို ဖမ်းဆီးနေသည်။ စစ်ကောင်စီ သည် ရပ်ကွက် ၅ ခုကို အခြေပြု၍ ရွေးကောက်ပွဲပြုလုပ်ရန် စီစဉ်နေပြီး ပြည်သူများကို ဖမ်းဆီးသတ်ဖြတ်မှုများလည်း ပြုလုပ်နေသည်။ မေလမှစတင်ကာ စစ်ကြောင်းထိုးလာပြီး ပြည်သူ ၇၀ ကျော် သတ်ဖြတ်ခံခဲ့ရသည်။ တော်လှန်ရေးအဖွဲ့များက ပြည်သူများအား သတိထားသွားလာရန် တိုက်တွန်းထားသည်။

ကျောက်ဖြူတွင် AA က စစ်တပ်စခန်းများ ပြန်သိမ်းပြီး စစ်သင်္ဘောတစ်စီးကို ဖျက်ဆီး

ဩဂုတ် ၃၀
The Kaladan Post
ရခိုင်ပြည်နယ်၊ ကျောက်ဖြူမြို့တွင် အာရက္ခတပ်တော် (AA) က ဇူလိုင်လက လက်လွှတ်ခဲ့ရသော စစ်တပ်စခန်းများကို ပြန်လည်သိမ်းယူနေပြီး စစ်သင်္ဘောတစ်စီးကို ပစ်ခတ်ဖျက်ဆီးခဲ့ကြောင်း စစ်ရေးသတင်းရင်းမြစ်များက ပြောသည်။ ဩဂုတ်လနှောင်းပိုင်းတွင် လိပ်ခမော်ကျေးရွာရှိ စစ်တပ်စခန်းကို AA က သိမ်းယူခဲ့ပြီး ပျားတဲ၊ သပြုတောင်နှင့် မလကျွန်းတို့တွင် တိုက်ပွဲများ ပြင်းထန်နေသည်။ ဩဂုတ်လ ၂၉ ရက် ညနေပိုင်းတွင် စစ်သင်္ဘောတစ်စီးကို ဟောင်ဝစ်ဇာဖြင့် ပစ်ခတ်ဖျက်ဆီးခဲ့ရာ မီးလောင်ပျက်စီးသွားသည်ဟု AA ပြောရေးဆိုခွင့်ရှိသူ ခိုင်သုခက ဆိုသည်။

ဩဂုတ်လ ၂၀ ရက်ခန့်က လိပ်ခမော်ရွာတိုက်ပွဲတွင် စစ်ကောင်စီတပ်မှ ၁၀၀ ကျော် သေဆုံးခဲ့ပြီး စစ်ကြောင်းလိုက်ပြုတ်သည်အထိ ထိခိုက်ခဲ့သည်။ AA သည် ရခိုင်ပြည်နယ်ရှိ ၁၄ မြို့နယ်ကို သိမ်းပိုက်ပြီးနောက် ကျောက်ဖြူမြို့သိမ်းတိုက်ပွဲကို ဇန်နဝါရီလမှ စတင်ခဲ့သည်။ စစ်ကောင်စီက လေကြောင်းနှင့် လက်နက်ကြီးဖြင့် ပစ်ခတ်မှုများနှင့် စာသင်ကျောင်းများကို ဗုံးကြဲတိုက်ခိုက်ခဲ့ရာ အရပ်သား ၁၄ ဦး သေဆုံးပြီး ၂၀ ခန့် ဒဏ်ရာရခဲ့သည်။