ဇွန်လ (၂၂) ရက် သတင်းတိုပေါင်းချုပ်

စစ်မှုထမ်းတပ်သား ၁၆ ဦး KNDO ထံ အလင်းဝင်

 

ဇွန် ၂၂

The Kaladan Post

ပဲခူးတိုင်း ကျောက်ကြီးမြို့နယ်ရှိ KNDO တပ်ရင်း(၃)ထံသို့ စစ်မှုထမ်းတပ်သား ၁၆ ဦး အလင်းဝင် ရောက်ခဲ့ကြောင်း ကရင်အမျိုးသားအစည်းအရုံး (KNU) က အသိပေးထားသည်။ ယင်းအနက် ဇွန်လ ၉ ရက်နေ့တွင် တနင်္သာရီတိုင်း ကော့သောင်းမြို့အခြေစိုက် ခလရ-၅၉၅ တပ်ရင်းမှ တပ်သား ၅ ဦးနှင့် ဇွန်လ ၁၅ ရက်နေ့တွင် ပဲခူးတိုင်း ပေါက်ခေါင်းမြို့နယ်အခြေစိုက် ခမရ-၅၃ တပ်ရင်းမှ တပ်သား ၁၁ ဦး တို့သည် KNDO တပ်ရင်း(၃)ထံ လက်နက်ချအလင်းဝင်ခဲ့ကြောင်း သိရသည်။

KNU က အဆိုပါ အလင်းဝင်လာသူများသည် ၎င်းတို့၏ ဆန္ဒမပါဘဲ အတင်းအဓမ္မ စစ်မှုထမ်းစေခိုင်းခံ ရပြီး ရှေ့တန်းစစ်မြေပြင်များသို့ စေလွှတ်ခံခဲ့ရသူများဖြစ်ကြောင်း ပြောကြားထားသည်။ ထို့ကြောင့် စစ်ကောင်စီတပ်အတွင်း အတင်းအဓမ္မ စစ်မှုထမ်းခိုင်းခံနေရသူများအနေဖြင့် နီးစပ်ရာ တော်လှန်ရေး အဖွဲ့အစည်းများထံသို့ အလင်းဝင်ရောက်လာကြရန်လည်း KNU က ထပ်မံတိုက်တွန်းထားသည်။

၂၀၂၆ ခုနှစ် ဇွန်လ ဒုတိယပတ်အတွင်း စစ်ကောင်စီတပ်ဖွဲ့ဝင်များအနက် စစ်သား၊ ရဲနှင့် ပြည်သူ့စစ် စုစုပေါင်း ၂၃ ဦးမှာ အလင်းဝင်ပူးပေါင်းခြင်း၊ လက်နက်ချခြင်းနှင့် စစ်သုံ့ပန်းအဖြစ် ဖမ်းဆီးခံရခြင်းများ ရှိခဲ့ကြောင်း ပြည်သူ့ပန်းတိုင်က ပြောဆိုသည်။

#KNU #KNDO #Defection #MilitaryConscription #MyanmarResistance #PeopleGoal #MyanmarNews

မြိုင်တောင်ပိုင်းတွင် စစ်ကြောင်းဆက်လက်တပ်စွဲနေပြီး စစ်ရှောင်ပြည်သူများ သတိပြုရန် နှိုးဆော်

 

ဇွန် ၂၂

The Kaladan Post

မကွေးတိုင်း မြိုင်မြို့နယ်တောင်ပိုင်း ကိုင်းတောမကျေးရွာအနီး ရောက်ရှိနေသည့် စစ်တပ်စစ်ကြောင်း မှာ ဇွန်လ ၂၂ ရက် နံနက် ၇ နာရီအထိ ထူးခြားသည့် ရွေ့လျားမှုမရှိသေးကြောင်း သတင်းရင်းမြစ်များ ထံမှ သိရသည်။ စစ်ကြောင်းအနီးတဝိုက်ရှိ ကျေးရွာများကို လေယာဉ်အမျိုးမျိုးဖြင့် လေကြောင်း တိုက်ခိုက်မှုများ ပြုလုပ်နိုင်သည့်အတွက် စစ်ဘေးရှောင်ပြည်သူများအနေဖြင့် လေကြောင်းအန္တရာယ် ကို အထူးဂရုစိုက်ကြရန် အညာမြေ အရပ်ဖက်လူမှုအဖွဲ့အစည်း-မြိုင်က အသိပေးနှိုးဆော်ထားသည်။

ထို့ပြင် ဇွန်လ ၂၁ ရက်နေ့တွင် စစ်ကြောင်းမှ လက်နက်ကြီးဖြင့် ပစ်ခတ်မှုကြောင့် ချောင်းနားတိုက် ကျေးရွာရှိ ပြည်သူပိုင်နေအိမ်တစ်လုံး မီးလောင်ပျက်စီးခဲ့ကြောင်း သိရသည်။ စစ်ရေးတင်းမာမှုများ ဆက်လက်ရှိနေသဖြင့် စစ်ရှောင်ပြည်သူများအနေဖြင့် လက်နက်ကြီး၊ ဒရုန်းနှင့် လေကြောင်းတိုက်ခိုက် မှုအန္တရာယ်များကို အထူးသတိထားပြီး ဘေးကင်းလုံခြုံရေးအစီအမံများကို ကြိုတင်ပြင်ဆင်ထား ကြရန် ဒေသခံအဖွဲ့အစည်းများက ထပ်မံသတိပေးထားသည်။

ထို့ပြင် စစ်ကိုင်းတိုင်း မြင်းမူမြို့နယ်အတွင်း အင်အား ၂၀၀ ခန့်ပါသော စစ်ကောင်စီစစ်ကြောင်းသည် ဇွန်လ ၁၉ ရက်နေ့မှစ၍ ကျေးရွာအများအပြားကို ဆက်တိုက်ဝင်ရောက်စီးနင်းခဲ့ပြီး ပြည်သူတစ်ဦး သတ်ဖြတ်ခံရကာ တောချောင်းဦးနှင့် လက်ပန်ကျေးရွာများမှ ပြည်သူပိုင်တန်ဖိုးကြီးပစ္စည်းများကို ကား ၁၂ စီးဖြင့် သယ်ယူလုယက်သွားကြောင်း သိရသည်။ စစ်ကြောင်း၏ လှုပ်ရှားမှုကြောင့် ကျေးရွာ ၁၀ ရွာမှ ဒေသခံထောင်နှင့်ချီ ဘေးလွတ်ရာသို့ ထွက်ပြေးတိမ်းရှောင်နေရပြီး လူမှုဘဝနှင့် စားဝတ်နေရေး အခြေအနေများ ပိုမိုခက်ခဲလာနေကြောင်း ဒေသခံများက ပြောဆိုထားသည်။

#မြိုင်မြို့နယ် #စစ်ရှောင်ပြည်သူ #လေကြောင်းတိုက်ခိုက်မှု #မကွေးတိုင်း #အညာမြေ#စစ်ဘေးရှောင်

 

ကျိုက်ထိုတွင် လေကြောင်းဗုံးကြဲမှုနှင့် လက်နက်ကြီးပစ်ခတ်မှုကြောင့် အရပ်သား ၂ ဦး သေဆုံး

 

ဇွန် ၂၂

The Kaladan Post

မွန်ပြည်နယ် ကျိုက်ထိုမြို့နယ်၌ တိုက်ပွဲဖြစ်ပွားခြင်းမရှိဘဲ စစ်ကောင်စီတပ်က လေကြောင်းဗုံးကြဲမှုနှင့် လက်နက်ကြီးပစ်ခတ်မှုများ ပြုလုပ်ခဲ့ရာ အရပ်သား ၂ ဦး သေဆုံးပြီး ၁ ဦး အပြင်းအထန်ဒဏ်ရာရရှိ ခဲ့ကြောင်း KNU ဗဟိုက ထုတ်ပြန်ထားသည်။ ပေါင် ၅၀၀ ဗုံးကျရောက်ပေါက်ကွဲမှုကြောင့် ကုန်စုံဆိုင် တစ်ဆိုင် မီးလောင်ပျက်စီးခဲ့ပြီး အခြားဖြစ်စဉ်တစ်ခုတွင် လက်နက်ကြီးကျည်ထိမှန်မှုကြောင့် ဒေသခံ တစ်ဦး သေဆုံးခဲ့ကြောင်း သိရသည်။

KNU ၏ ထုတ်ပြန်ချက်အရ စစ်ကောင်စီတပ်၏ အရပ်သားများကို ပစ်မှတ်ထားသည့် လေကြောင်း တိုက်ခိုက်မှုနှင့် လက်နက်ကြီးပစ်ခတ်မှုများကြောင့် ပြည်သူများအကြား သေဆုံးထိခိုက်မှုများ ဆက်လက်ဖြစ်ပွားနေပြီး ဒေသခံများမှာ ကြောက်ရွံ့ထိတ်လန့်စွာဖြင့် ဘေးလွတ်ရာသို့ ထွက်ပြေး တိမ်းရှောင်နေရကြောင်း သိရသည်။

တစ်ဖက်တွင် မကွေးတိုင်း စလင်းမြို့နယ်တွင် စစ်ကောင်စီစစ်ကြောင်းများက စမ်းကလေး၊ စည်ဆွဲ၊ မကျီးစင်နှင့် ကံဆွယ်ကျေးရွာများအတွင်းသို့ ဝင်ရောက်စီးနင်းကာ စစ်ရှောင်ပြည်သူများ၏ နေအိမ်များ မှ ရွှေ၊ ငွေ အပါအဝင် တန်ဖိုးကြီးပစ္စည်းများကို ယူဆောင်သွားခဲ့ကြောင်း ဒေသခံများက ပြောဆိုသည်။ စစ်ကြောင်းထိုးမှုများနှင့် ဒရုန်း၊ စက်သေနတ်ပစ်ခတ်မှုများကြောင့် ကျေးရွာလေးရွာမှ ပြည်သူ ၃,၀၀၀ ခန့် ဘေးလွတ်ရာသို့ ထွက်ပြေးတိမ်းရှောင်နေရပြီး ယခင်ကလည်း ဒေသခံ ၄၀ ဦးကို လူသားဒိုင်းအဖြစ် ဖမ်းဆီးခေါ်ဆောင်ခဲ့ကြောင်း သိရသည်။

#စလင်းမြို့နယ် #ကျိုက်ထိုမြို့နယ် #စစ်ဘေးရှောင်ပြည်သူ #လေကြောင်းတိုက်ခိုက်မှု #မွန်ပြည်နယ် #မကွေးတိုင်း

 

စစ်ရာဇဝတ်ကျူးလွန်သူများအား တရားစီရင်နိုင်ရေး ယန္တရားများကို SCEF ပြင်ဆင်

 

ဇွန် ၂၂

The Kaladan Post

ကုလသမဂ္ဂဆိုင်ရာ မြန်မာအမြဲတမ်းကိုယ်စားလှယ် သံအမတ်ကြီး ဦးကျော်မိုးထွန်းက ဇွန်လ ၁၉ ရက် နေ့တွင် နယူးယောက်မြို့၌ ကျင်းပသည့် ကုလသမဂ္ဂ လုံခြုံရေးကောင်စီ၏ အမျိုးသမီး၊ ငြိမ်းချမ်းရေး နှင့် လုံခြုံရေးဆိုင်ရာ အစည်းအဝေး၌ စစ်အုပ်စုကျူးလွန်ထားသည့် စစ်ရာဇဝတ်မှုများနှင့် ကျားမ အခြေပြုအကြမ်းဖက်မှုများအတွက် တာဝန်ရှိသူများကို တရားစီရင်နိုင်ရန် ဖက်ဒရယ်ဒီမိုကရေစီ ပြည်ထောင်စုပေါ်ထွန်းရေး ဦးဆောင်ကောင်စီ (SCEF) က အသွင်ကူးပြောင်းရေးဆိုင်ရာ တရား စီရင်ရေးယန္တရားများကို ပြင်ဆင်နေကြောင်း ပြောကြားခဲ့သည်။ ၎င်းက ၂၀၂၁ ခုနှစ် စစ်အာဏာသိမ်း မှုသည် မြန်မာနိုင်ငံအတွင်း ဖြစ်ပေါ်နေသော အကျပ်အတည်းများ၏ အဓိကအကြောင်းရင်းဖြစ်ပြီး စစ်အုပ်စုက စစ်ရာဇဝတ်မှုများနှင့် လူသားမျိုးနွယ်အပေါ် ကျူးလွန်သည့် ရာဇဝတ်မှုများကို ဆက်လက်ကျူးလွန်နေကြောင်း ထောက်ပြခဲ့သည်။

စစ်အုပ်စုသည် အမျိုးသမီးများအပေါ် အကြမ်းဖက်မှုများကို စနစ်တကျကျူးလွန်နေပြီး အာဏာသိမ်း ကာလအတွင်း အဓမ္မပြုကျင့်မှုဖြစ်စဉ် ၉၀၀ ကျော် ဖြစ်ပွားခဲ့ကြောင်း၊ ၂၀၂၆ ခုနှစ် ဖေဖော်ဝါရီလ တစ်လအတွင်း လေကြောင်းဗုံးကြဲမှုများနှင့် လက်နက်ကြီးပစ်ခတ်မှုများကြောင့် အမျိုးသမီး ၆၃ ဦး သေဆုံးခဲ့ကြောင်း ကုလသမဂ္ဂအစီရင်ခံစာများကို ကိုးကား၍ တင်ပြခဲ့သည်။ ထို့အပြင် အမျိုးသမီးများ သည် နစ်နာသူများသာမက တော်လှန်ရေး၊ နိုင်ငံရေးနှင့် အုပ်ချုပ်ရေးကဏ္ဍများတွင် ဦးဆောင်ပါဝင်နေ ကြောင်းလည်း ချီးကျူးပြောကြားခဲ့သည်။

ထို့ပြင် ကုလသမဂ္ဂနှင့် နိုင်ငံတကာအသိုက်အဝန်းအနေဖြင့် စစ်အုပ်စု၏ အတုအယောင်ရွေးကောက်ပွဲ များကို ကန့်ကွက်ရန်၊ NUG နှင့် SCEF တို့နှင့် တရားဝင်ထိတွေ့ဆက်ဆံရန်၊ အမျိုးသမီးဦးဆောင်သော အရပ်ဘက်အဖွဲ့အစည်းများကို တိုက်ရိုက်ပံ့ပိုးရန်နှင့် စစ်ရာဇဝတ်ကျူးလွန်သူများအပေါ် နိုင်ငံတကာ တရားစီရင်ရေး ယန္တရားများဖြင့် အရေးယူနိုင်ရေးကို ကူညီရန် သံအမတ်ကြီးက တိုက်တွန်းသည်။

#KyawMoeTun #SCEF #MyanmarCrisis #WarCrimes #FederalDemocracy #UnitedNations

ရခိုင်တွင် သတင်းသမားများ၏ လုံခြုံရေးနှင့် မီဒီယာဖွံ့ဖြိုးရေးအတွက် အာရက္ခမီဒီယာကောင်စီ (APC) ဖွဲ့စည်း

 

ဇွန် ၂၂

The Kaladan Post

ရခိုင်ပြည်တွင်းနှင့် ပြည်ပရှိ လွတ်လပ်သော သတင်းသမားများ စုပေါင်းကာ အာရက္ခမီဒီယာကောင်စီ (Arakha Press Council – APC) ကို ၂၀၂၆ ခုနှစ် ဇွန်လ ၁၄ ရက်နေ့တွင် ဖွဲ့စည်းတည်ထောင်ခဲ့ကြောင်း APC က ဇွန်လ ၂၂ ရက်နေ့တွင် ထုတ်ပြန်ခဲ့သည်။ APC သည် သတင်းစာပညာအရည်အသွေး မြှင့်တင် ရေး၊ သတင်းသမားများ၏ ဘေးကင်းလုံခြုံရေးနှင့် သတင်းလွတ်လပ်ခွင့်များ ကာကွယ်မြှင့်တင်ရေး အပြင် ဒီဂျစ်တယ်လုံခြုံရေးနှင့် မီဒီယာကျင့်ဝတ်ဆိုင်ရာ လုပ်ငန်းများကို ဆောင်ရွက်သွားရန် ရည်ရွယ် ထားကြောင်း ပြောရေးဆိုခွင့်ရှိသူ ကိုတေဇာအောင်က ပြောကြားသည်။

APC သည် ပြည်တွင်း၊ ပြည်ပရှိ သတင်းမီဒီယာအဖွဲ့အစည်းများ၊ ဒေသအာဏာပိုင်အဖွဲ့များနှင့် နိုင်ငံ တကာမီဒီယာအသိုင်းအဝိုင်းများနှင့် အပြုသဘောဆောင် ပူးပေါင်းဆောင်ရွက်သွားမည်ဖြစ်ပြီး လွတ်လပ်၍ ရေရှည်တည်တံ့ခိုင်မာသော အဖွဲ့အစည်းတစ်ရပ်အဖြစ် ရပ်တည်သွားရန် ဆုံးဖြတ်ထား ကြောင်း သိရသည်။ APC ပြောရေးဆိုခွင့်ရှိသူ မကေဇူးကလည်း ရခိုင်ပြည်အတွင်း သတင်းမီဒီယာ ဖွံ့ဖြိုးရေးနှင့် လွတ်လပ်စွာ သတင်းရယူဖော်ပြခွင့်များ တိုးတက်လာစေရန် အပြုသဘောဆောင်သော ချဉ်းကပ်မှုများဖြင့် ဖြေရှင်းဆောင်ရွက်သွားရန် မျှော်မှန်းထားကြောင်း ပြောဆိုသည်။

လက်ရှိ ရခိုင်ပြည်တွင် စစ်ရေးနှင့် လုံခြုံရေးဆိုင်ရာ စိန်ခေါ်မှုများကြား သတင်းသမားများနှင့် ဒေသ အာဏာပိုင်များအကြား အမြင်မတူမှုများ ဖြစ်ပေါ်နေသော်လည်း စနစ်တကျ စည်းမျဉ်းသတ်မှတ်ထား သော အဖွဲ့အစည်းတစ်ရပ်ရှိခြင်းဖြင့် အငြင်းပွားမှုများ လျော့နည်းလာနိုင်ကြောင်း APC က ယုံကြည် ထားသည်။ လက်ရှိတွင် ယာယီကော်မတီများဖြင့် လည်ပတ်နေပြီး ဖွဲ့စည်းပုံအခြေခံဥပဒေ (မူကြမ်း) နှင့် ရှေ့လုပ်ငန်းစဉ်များကို ရေးဆွဲနေကာ မကြာမီ ညီလာခံတစ်ရပ်ကျင်းပ၍ ပိုမိုကျစ်လစ်ခိုင်မာသော အဖွဲ့အစည်းအဖြစ် တိုးချဲ့ဆောင်ရွက်သွားမည်ဖြစ်ကြောင်း ထုတ်ပြန်ထားသည်။

#ArakhaPressCouncil#PressFreedom#MediaDevelopment#JournalistSafety

မြန်မာ့အရေးကို နိုင်ငံတကာမေ့လျော့ခြင်းမရှိဟု IPFD ပြော

 

ဇွန် ၂၂

The Kaladan Post

ဒေါက်တာဆာဆာနှင့် IPFD အဖွဲ့သည် မကြာသေးမီက ဗြိတိန်နိုင်ငံ Westminster လွှတ်တော်၌ လွှတ်တော်အမတ်များ၊ မူဝါဒချမှတ်သူများနှင့် လူ့အခွင့်အရေးဆိုင်ရာ မိတ်ဖက်အဖွဲ့အစည်းများနှင့် တွေ့ဆုံဆွေးနွေးခဲ့ပြီး မြန်မာနိုင်ငံအတွင်း လူသားချင်းစာနာမှုအကူအညီများကို ပဋိပက္ခဒဏ်ခံ ပြည်သူ များထံ တိုက်ရိုက်ရောက်ရှိစေရေး၊ နိုင်ငံရေးအကျဉ်းသားများနှင့် ဘာသာရေးလွတ်လပ်ခွင့်ဆိုင်ရာ ကိစ္စရပ်များကို အဓိကထား ဆွေးနွေးခဲ့ကြောင်း သိရသည်။ ထို့အပြင် စစ်တပ်အပေါ် ထိရောက်သော အရေးယူပိတ်ဆို့မှုများ ချမှတ်နိုင်ရေးနှင့် ဒေသတွင်းတည်ငြိမ်ရေးဆိုင်ရာ အရေးကိစ္စများကိုလည်း ဆွေးနွေးခဲ့သည်။

ဆွေးနွေးပွဲများအတွင်း ဖက်ဒရယ်ဒီမိုကရေစီအခြေပြု မြန်မာနိုင်ငံတော်သစ် တည်ဆောက်ရေးအတွက် နိုင်ငံတကာအသိုက်အဝန်း၏ ပံ့ပိုးကူညီနိုင်မည့် အခန်းကဏ္ဍများကိုလည်း ဆွေးနွေးခဲ့ကြောင်း သိရ သည်။ မြန်မာပြည်သူများအနေဖြင့် ကမ္ဘာကြီးက မြန်မာ့အရေးကို မေ့လျော့နေပြီဟု စိုးရိမ်မှုများ ရှိနေသော်လည်း ယခုဆွေးနွေးမှုများက နိုင်ငံတကာအသိုက်အဝန်းအနေဖြင့် မြန်မာပြည်သူများ၏ အသံကို ဆက်လက်နားထောင်နေဆဲဖြစ်ကြောင်း ပြသနေသည်ဟု IPFD က ဆိုသည်။

IPFD အနေဖြင့် မြန်မာ့အရေးကို နိုင်ငံတကာမျက်နှာစာတွင် ဆက်လက်ထိန်းသိမ်းမြှင့်တင်သွားမည် ဖြစ်ပြီး ပဋိပက္ခဒဏ်ခံစားနေရသော လူမှုအသိုက်အဝန်းများထံသို့ ပိုမိုလက်တွေ့ကျပြီး အကျိုးရှိသည့် အထောက်အပံ့များ ရောက်ရှိလာစေရေးအတွက် နိုင်ငံတကာနှင့် ပူးပေါင်းဆောင်ရွက်မှုများကို ဆက်လက်အားကောင်းစွာ လုပ်ဆောင်သွားမည်ဖြစ်ကြောင်း ထုတ်ပြန်ထားသည်။

#DrSasa #IPFD #MyanmarCrisis #Westminster #HumanRights #FederalDemocracy

ဒိုးဒိုကျေးရွာရှိ စစ်ကောင်စီတပ်စခန်းကို KNLA တိုက်ခိုက်၊ လက်နက် ၃ လက် သိမ်းဆည်းရမိ

 

ဇွန် ၂၂

The Kaladan Post

ကေအဲန်ယူ-ကရင်အမျိုးသားအစည်းအရုံး၏ ခလယ်လွီထူခရိုင်၊ မူးမြို့နယ်၊ ဒိုးဒိုကျေးရွာတွင် တပ်စွဲ ထားသည့် စစ်ကောင်စီ၏ ခမရ (၄၃၉) တပ်စခန်းကို ဇွန်လ ၂၀ ရက် ည ၁၀ နာရီ ၅၅ မိနစ်ခန့်တွင် ကရင်အမျိုးသားလွတ်မြောက်ရေးတပ်မတော် (KNLA) တပ်ရင်း (၈) က ဝင်ရောက်ပစ်ခတ်တိုက်ခိုက် ခဲ့ကြောင်း သိရသည်။ ယင်းစခန်းသည် ဒေသအတွင်း ဝင်ရောက်ကျူးကျော်တပ်ချထားသည့် စစ်ကောင်စီတပ်စခန်းတစ်ခုဖြစ်ကြောင်း KNU က အသိပေးထားသည်။

အဆိုပါတိုက်ခိုက်မှုအတွင်း စစ်ကောင်စီတပ်ထံမှ MA-1 အမျိုးအစား သေနတ် ၂ လက်နှင့် MA-3 အမျိုးအစား သေနတ် ၁ လက် စုစုပေါင်း လက်နက် ၃ လက်ကို KNLA ဘက်မှ သိမ်းဆည်းရမိခဲ့ ကြောင်း သိရသည်။

#KNU#KNLA#MuTownship#DoDoVillage#KarenState#MyanmarResistance

စဉ့်ကိုင် ပကဖမှ သစ္စာဖောက်တပ်ဖွဲ့ဝင်ဝဟောင်း ဇတိုးကို ပြန်လည်ဖမ်းဆီး

 

ဇွန် ၂၂

The Kaladan Post

မန္တလေးတိုင်း၊ ကျောက်ဆည်ခရိုင်၊ စဉ့်ကိုင်မြို့နယ် ပြည်သူ့ကာကွယ်ရေးအဖွဲ့ (ပကဖ) သည် အခြေခံ စစ်ပညာသင်တန်းတက်ရောက်ပြီးနောက် တပ်ဖွဲ့အပေါ် သစ္စာဖောက်ကာ စစ်တပ်ကို သတင်းပေးပြီး ထွက်ပြေးခိုလှုံသွားခဲ့သည့် တပ်ဖွဲ့ဝင်ဟောင်း ဇတိုးကို ဇွန်လ ၁၆ ရက်နေ့တွင် ကျောက်ဆည်မြို့နယ် သပြေသာကျေးရွာအနီး၌ ပြန်လည်ဖမ်းဆီးရမိခဲ့ကြောင်း ထုတ်ပြန်ထားသည်။ ဇတိုးသည် ၂၀၂၅ ခုနှစ် ဖေဖော်ဝါရီလအတွင်း စစ်ကောင်စီတပ်မှ ထွက်ပြေးလာပြီးနောက် စဉ့်ကိုင် ပကဖတွင် အခြေခံ စစ်ပညာသင်တန်း အပတ်စဉ် (၃) ကို တက်ရောက်ကာ ၁၀ လခန့် တာဝန်ထမ်းဆောင်ခဲ့သူဖြစ်ကြောင်း သိရသည်။

ဇတိုးသည် ယခုနှစ် ဖေဖော်ဝါရီလအတွင်း စစ်ကောင်စီနှင့် လျှို့ဝှက်ပြန်လည်ချိတ်ဆက်ပြီး ထွက်ပြေး သွားခဲ့ခြင်းဖြစ်ကာ ၎င်းကြောင့် ပကဖစခန်းတည်နေရာများ ပေါက်ကြားသွားခဲ့ပြီးနောက် စစ်ကောင်စီ ဘက်မှ ဒရုန်းဗုံးကြဲတိုက်ခိုက်မှုများနှင့် လက်နက်ကြီးပစ်ခတ်မှုများ ဆက်တိုက်ပြုလုပ်ခဲ့သည်ဟု ပကဖ က ပြောဆိုသည်။ ထိုတိုက်ခိုက်မှုများကြောင့် ထိန်းချုပ်နယ်မြေအချို့ကို စွန့်လွှတ်ဆုတ်ခွာခဲ့ရကြောင်း ဖော်ပြထားသည်။

စဉ့်ကိုင် ပကဖသည် ဇတိုး၏ လှုပ်ရှားမှုများကို ဆက်လက်စုံစမ်းစောင့်ကြည့်ခဲ့ပြီးနောက် ယခုအခါ ပြန်လည်ဖမ်းဆီးနိုင်ခဲ့ခြင်းဖြစ်ကြောင်း ထုတ်ပြန်ထားသည်။ လက်ရှိတွင် ဖမ်းဆီးရမိထားသည့် ဇတိုးကို စစ်ဆေးမေးမြန်းမှုများ ပြုလုပ်နေပြီး ဖြစ်စဉ်နှင့်ပတ်သက်၍ ထိရောက်ပြတ်သားစွာ အရေးယူ ဆောင်ရွက်သွားမည်ဖြစ်ကြောင်း စဉ့်ကိုင် ပကဖက အသိပေးထားသည်။

#SintKaingPDF#KyaukseDistrict#PeopleDefenceForce#MandalayRegion#MyanmarResistance#MyanmarConflict#MyanmarNews

မြင်းခြံခရိုင်အတွင်းရှိ PLA စခန်းများအား NUG တပ်က ဝိုင်းပိတ်စီးနင်းခဲ့ရကြောင်း PLA ပြောဆို

 

ဇွန် ၂၂

The Kaladan Post

ပြည်သူ့လွတ်မြောက်ရေးတပ်မတော် (PLA) တောင်သာမြို့နယ်တပ်ဖွဲ့က အမျိုးသားညီညွတ်ရေးအစိုးရ (NUG) လက်အောက်ရှိ မြင်းခြံခရိုင်ကွပ်ကဲရေးအဖွဲ့ဦးဆောင်သည့် တပ်ဖွဲ့များသည် ဇွန်လ ၂၁ ရက်မှ စတင်၍ အင်အားရာချီအသုံးပြုကာ PLA အထိုင်စခန်းများကို ဝိုင်းပိတ်ပိတ်ဆို့ခြင်း၊ ထောက်ပို့ရဲဘော် များကို ဖမ်းဆီးရန် ကြိုးပမ်းခြင်းများ ပြုလုပ်ခဲ့ကြောင်း PLA က အသိပေးလာသည်။ ဇွန်လ ၂၂ ရက် တွင်လည်း ယာဉ်သုံးစီးနှင့် အင်အား ၈၀ ခန့်ဖြင့် မြင်းခြံခရိုင်အတွင်းရှိ PLA စခန်းများကို ဝင်ရောက် စီးနင်းခဲ့ပြီး PLA ကို ကူညီပေးနေသည့် ဒေသခံများ၏ နေအိမ်များအား ရှာဖွေမှုများ ပြုလုပ်ခဲ့ကြောင်း ဖော်ပြထားသည်။

ဖမ်းဆီးထားသည့် သတင်းပေးများနှင့် သိမ်းဆည်းပစ္စည်းများအား လွှဲပြောင်းပေးရန်နှင့် မြင်းခြံခရိုင် အတွင်းရှိ PLA တပ်ဖွဲ့များအားလုံး ထွက်ခွာပေးရန် တောင်းဆိုခဲ့ကြောင်း PLA ပြောဆိုသည်။ PLA ဘက်ကမူ ယခင်က ရန်သူသတင်းပေးများကို ပြည်သူ့ကာကွယ်ရေးအဖွဲ့ထံ ၂၂ ကြိမ်အထိ လွှဲပြောင်း ပေးခဲ့ပြီးဖြစ်သော်လည်း ယခုအခါ ခြိမ်းခြောက်ဖိအားပေးမှုများကြောင့် ထပ်မံလွှဲပြောင်းပေးရေး လုပ်ငန်းစဉ်များ နှောင့်နှေးနေရကြောင်း ဆိုထားသည်။

NUG ယန္တရားများနှင့် အတတ်နိုင်ဆုံး ပူးပေါင်းဆောင်ရွက်နေသော်လည်း တပ်စခန်းများကို အင်အား သုံးဝင်ရောက်စီးနင်းခြင်းနှင့် တော်လှန်ရေးတပ်ဖွဲ့များကို ဒေသအတွင်းမှ ထွက်ခွာစေခြင်းမှာ လက်ခံ နိုင်ဖွယ်မရှိကြောင်း PLA တောင်သာမြို့နယ်တပ်ဖွဲ့က ပြောဆိုသည်။ ထို့ပြင် တော်လှန်ရေးအင်အားစု အချင်းချင်း ဆွေးနွေးညှိနှိုင်းမှုဖြင့်သာ ဖြေရှင်းလိုကြောင်းနှင့် PLA ဘက်မှ ပစ်ခတ်မှုစတင်မည်မဟုတ် ကြောင်း အသိပေးထားသည်။

#PLA#Taungtha#MyingyanDistrict#NUG#PeopleDefenseForce#MyanmarResistance

ဘိုးတော်ချောင်းဖျားဒေသရှိ စစ်တပ် ၁၈၈ စခန်းကုန်းကို AA  သိမ်းပိုက် တိုက်ပွဲဆက်လက် ပြင်းထန်  

 

ဇွန် ၂၂

The Kaladan Post

ဧရာဝတီတိုင်း ရေကြည်မြို့နယ် ဘိုးတော်ချောင်းဖျားဒေသတွင် အာရက္ခတပ်တော် (AA) နှင့် စစ်တပ်  အကြား တိုက်ပွဲများ ပြင်းထန်လျက်ရှိပြီး စစ်ကောင်စီဘက်မှ စခန်းကုန်းများ ဆက်တိုက် လက်လွှတ် နေရကြောင်း စစ်ရေးသတင်းရင်းမြစ်များထံမှ သိရသည်။ ဇွန်လ ၂၀ ရက်နေ့တွင် စစ်ကောင်စီ၏ ၁၈၈ တောင်ကုန်းစခန်းကို AA က အပြီးသတ်သိမ်းပိုက်နိုင်ခဲ့ပြီး စခန်းအတွင်းမှ Jammer စက်များ၊ Starlink အင်တာနက်စက်များနှင့် လက်နက်ခဲယမ်းအများအပြားကို သိမ်းဆည်းရမိခဲ့ကြောင်း သိရသည်။ AA ဘက်က နောက်ထပ်စခန်းများကို ဆက်လက်ထိုးစစ်ဆင်နေပြီး တိုက်ပွဲများ ဆက်လက်ပြင်းထန်နေ ကြောင်း သတင်းရင်းမြစ်များက ပြောသည်။

တိုက်ပွဲများအတွင်း စစ်တပ်ဘက်မှ အထိနာဆုံးရှုံးမှုများရှိနေပြီး ဒဏ်ရာပြင်းထန်သည့် တပ်ဖွဲ့ဝင် ခုနစ်ဦးကို ပုသိမ်ဘက်သို့ သယ်ဆောင်သွားခဲ့ကြောင်း သိရသည်။ တိုက်ပွဲမှ ဆုတ်ခွာထွက်ပြေးသည့် တပ်ဖွဲ့ဝင်များကို ပြန်လည်ရှေ့တန်းပို့ရန် အခက်ကြုံနေရသဖြင့် စစ်ဘက်အရာရှိများကိုယ်တိုင် ဆင်းလာကာ ခြိမ်းခြောက်မှုများ ပြုလုပ်နေကြောင်းလည်း စစ်ရေးသတင်းရင်းမြစ်များက ဆိုသည်။

လက်ရှိတွင် ဝါးတောကွင်းနှင့် ဘိုးတော်ကမ္ဘားကြီးဒေသအနီး၌ တိုက်ပွဲများ ပြင်းထန်နေဆဲဖြစ်ပြီး စစ်တပ်ဘက်က သာပေါင်းနယ်မြေအတွင်းသို့ လူအင်အားနှင့် လက်နက်ခဲယမ်းများ ထပ်မံဖြည့်တင်း နေကြောင်း သိရသည်။ သာပေါင်းမြို့နယ်ရှိ လက်နက်ကြီးစခန်းများမှလည်း ပစ်ကူပေးနေပြီး မိုးတွင်း ကာလအတွင်း ရေလမ်းကြောင်းထောက်ပို့ကို အဓိကအသုံးပြုကာ စက်ဒေါင့်ကြီးနှင့် ဘုရားကုန်းဒေသ များသို့ စက်လှေများဖြင့် ချိတ်ဆက်ထောက်ပံ့နေကြောင်း သိရသည်။

#AA#ရေကြည်မြို့နယ်#ဘိုးတော်ချောင်းဖျား#စစ်ရေးသတင်း#ဧရာဝတီတိုင်း#တောင်ကုန်းစခန်း

ဆက်ကြေးကောက်ရန် ထွက်လာသည့် ဂွေးပင်စခန်းမှူးအဖွဲ့ တိုက်ခိုက်ခံရပြီး စခန်းမှူးသေဆုံး

 

ဇွန် ၂၂

The Kaladan Post

မကွေးတိုင်း၊ ချောက်မြို့နယ်တွင် ချောက်မြို့နယ် ပြည်သူ့ကာကွယ်ရေးအဖွဲ့ (ချောက် ပကဖ) နှင့် မကွေးခရိုင် ပကဖ ဦးဆောင်သည့် မဟာမိတ်ပူးပေါင်းတပ်ဖွဲ့များက ဇွန်လ ၄ ရက် နံနက်ပိုင်းတွင် ချောက်-ဂွေးပင်လမ်းပိုင်းတစ်နေရာ၌ ကင်းပုန်းဝပ်စောင့်ကြို တိုက်ခိုက်မှုတစ်ရပ် ပြုလုပ်ခဲ့ကြောင်း သိရသည်။ ပြည်သူများကို မတရားဖမ်းဆီးခြင်း၊ ငွေညှစ်ခြင်းနှင့် ပေါ်တာဆွဲခြင်းများ ပြုလုပ်နေသည်ဟု ဆိုထားသည့် ဂွေးပင်စခန်းမှူး လှမိုးအောင်နှင့် နယ်ထိန်းတင်လင်းတို့ လိုက်ပါလာသည့် ယာဉ်အား ပစ်ခတ်တိုက်ခိုက်ခဲ့ရာ စခန်းမှူး လှမိုးအောင်မှာ နေရာတွင်ပင် သေဆုံးခဲ့ကြောင်း သိရသည်။

တိုက်ခိုက်မှုအတွင်း နယ်ထိန်းတင်လင်းမှာ ပြင်းထန်သော ဒဏ်ရာရရှိခဲ့ပြီး ကျောက်ပန်းတောင်းဆေးရုံ သို့ ပို့ဆောင်ကုသရာ လက်တစ်ဖက်ဖြတ်တောက်ခဲ့ရကာ ခြေထောက်တွင်လည်း အပြင်းအထန် ထိခိုက်ဒဏ်ရာများ ရရှိခဲ့ကြောင်း သိရသည်။ တိုက်ခိုက်မှုအပြီးတွင် စစ်ကောင်စီဘက်က ယာဉ်ဖြင့် အမြန်ထွက်ပြေးသွားကြောင်း သိရသည်။

အဆိုပါ စစ်ဆင်ရေးကို ချောက်ပကဖ၊ မကွေးခရိုင် ပကဖ တပ်ခွဲများ၊ ဧရာဒေါင်း ပြည်သူ့ကာကွယ်ရေး အဖွဲ့၊ ကျားသစ်နက် ပြည်သူ့ကာကွယ်ရေးအဖွဲ့နှင့် Tiger Fighter Force အပါအဝင် မဟာမိတ်တပ်ဖွဲ့ များ ပူးပေါင်းဆောင်ရွက်ခဲ့ခြင်းဖြစ်ပြီး တော်လှန်ရေးတပ်ဖွဲ့ဘက်မှ ထိခိုက်မှုမရှိဘဲ အောင်မြင်စွာ ပြန်လည်ဆုတ်ခွာနိုင်ခဲ့ကြောင်း သိရသည်။ ချောက်မြို့နယ်အတွင်း ပြည်သူလူထုကို ဒုက္ခပေးနေသည့် စစ်ကောင်စီလက်ပါးစေများနှင့် စစ်ကြောင်းများအား မဟာမိတ်တပ်ဖွဲ့များ ပူးပေါင်းကာ ဆက်လက် တိုက်ခိုက်သွားမည်ဟု တပ်ဖွဲ့က အသိပေးထားသည်။

#ချောက်ပကဖ#မကွေးခရိုင်ပကဖ#ဂွေးပင်စခန်းမှူး#တော်လှန်ရေးသတင်း#မကွေးတိုင်း#စစ်ကောင်စီ