ဇွန် ၁၁၊ ၂၀၂၆
The Kaladan Post
 
အမေရိကန်နဲ့ အီရန်နိုင်ငံတို့ကြားမှာ အပြန်အလှန် တိုက်ခိုက်မှုတွေ ပြန်လည်ပြင်းထန်လာပြီး သမ္မတ ဒေါ်နယ်ထရန့်ကလည်း ငြိမ်းချမ်းရေး သဘောတူညီချက်မရရင် နောက်ထပ် တိုက်ခိုက်မှုတွေ လုပ်သွားမယ်လို့ ခြိမ်းခြောက်ပြောဆိုလိုက်ပါတယ်။
 
ဇွန်လ ၁၀ ရက်နေ့ ညပိုင်းမှာ အမေရိကန်စစ်တပ်က အီရန်ပိုင်နက်ထဲက စစ်ရေးပစ်မှတ် အများအပြားကို လေကြောင်းကနေ တိုက်ခိုက်ခဲ့တာ ဖြစ်ပါတယ်။ ဒီတိုက်ခိုက်မှုဟာ တီဟီရန်မြို့ရဲ့ သန်းခေါင်ယံအချိန်မှာ စတင်ခဲ့တာဖြစ်ပြီး ၄ နာရီနီးပါး ကြာမြင့်ခဲ့တယ်လို့ သိရပါတယ်။ အီရန်နိုင်ငံတစ်ဝှမ်းမှာရှိတဲ့ စစ်ဘက်ဆိုင်ရာ ထောက်လှမ်းရေးစခန်းတွေ၊ ဆက်သွယ်ရေးစနစ်တွေနဲ့ လေကြောင်းကာကွယ်ရေး စခန်းတွေကို အဓိက ပစ်မှတ်ထားခဲ့တာ ဖြစ်တယ်လို့ အမေရိကန် ဗဟိုစစ်ဌာနချုပ် (Central Command) က ထုတ်ပြန်ထားပါတယ်။
 
“အီရန်ဘက်က အကြောင်းမဲ့ ဆက်တိုက် ရန်စနေတဲ့အတွက် အခုလို တုံ့ပြန်တိုက်ခိုက်ရတာ ဖြစ်ပါတယ်” လို့ အမေရိကန်ဗဟိုစစ်ဌာနချုပ်က ဆိုပါတယ်။ ပြီးခဲ့တဲ့ ဧပြီလအစောပိုင်းမှာ နှစ်ဖက်ကြား အပစ်အခတ် ရပ်စဲထားခဲ့ပေမဲ့ အခုအခါမှာတော့ စစ်မီးက ပြန်လည်တောက်လောင်လာပြီး အပြည့်အဝစစ်ပွဲကြီးတစ်ခု ဖြစ်လာနိုင်တဲ့ အနေအထားကို ရောက်ရှိနေပြီ ဖြစ်ပါတယ်။
 
အီရန်ဘက်ကတော့ အမေရိကန်ရဲ့ တိုက်ခိုက်မှုအတွင်း ရေပေးဝေရေး အဆောက်အအုံတွေပါ ထိမှန်ခဲ့တာကြောင့် ဒါဟာ နိုင်ငံတကာဥပဒေကို ချိုးဖောက်တာဖြစ်တယ်လို့ တုံ့ပြန်စွပ်စွဲထားပါတယ်။ အီရန်တော်လှန်ရေးအစောင့်တပ် (IRGC) ကလည်း ကူဝိတ်နဲ့ ဘာရိန်းမှာရှိတဲ့ အမေရိကန် စစ်အခြေစိုက်စခန်း ၁၈ ခုကို ဒုံးကျည်တွေနဲ့ တန်ပြန်တိုက်ခိုက်ခဲ့တယ်လို့ ပြောပါတယ်။ ဘာရိန်းနိုင်ငံအတွင်းမှာလည်း လေကြောင်းအန္တရာယ် သတိပေးဥဩသံတွေ မြည်ဟည်းနေခဲ့တယ်လို့ သိရပါတယ်။
 
ဒါ့အပြင် အီရန်စစ်တပ်က လပေါင်းများစွာ ပိတ်ထားတဲ့ ဟောမုဇ်ရေလက်ကြားကို ဖြတ်သန်းဖို့ ကြိုးစားတဲ့ ဘယ်သင်္ဘောကိုမဆို ပစ်ခတ်သွားမယ်လို့ သတိပေးထားပါတယ်။ အမေရိကန်သမ္မတ ထရန့်ကတော့ လျှို့ဝှက်စစ်ဆင်ရေးတစ်ခုကနေတစ်ဆင့် သင်္ဘောတွေကို ဟောမုဇ်ရေလက်ကြားကနေ ဖြတ်ကျော်ပေးနိုင်ခဲ့တယ်လို့ ပြောကြားထားပါတယ်။ လက်ရှိမှာတော့ သင်္ဘောနှစ်စင်း ပစ်ခတ်ခံခဲ့ရတယ်လို့ အီရန်မီဒီယာတွေက ဖော်ပြနေကြကြောင်း သိရှိရပါတယ်။
 
Source: Reuters (Bo Erickson and Enas Alashray)