ဇွန် ၁၈၊ ၂၀၂၆

The Kaladan Post

 

မြောက်ကိုရီးယားနိုင်ငံဟာ ဗြိတိန်နိုင်ငံမှာ တာဝန်ကျနေတဲ့ သူတို့ရဲ့ သံအမတ်ကြီးကို တာဝန်ယူပြီး တစ်လအကြာမှာတင် ပြန်လည်ခေါ်ယူလိုက်ပြီး နှစ်နိုင်ငံ သံတမန်ဆက်ဆံရေးအဆင့်ကို လျှော့ချလိုက်တယ်လို့ သိရပါတယ်။ ဒါဟာ မြောက်ကိုရီးယားက ကလေးစခန်းတစ်ခုအပေါ် ဗြိတိန်က ပိတ်ဆို့အရေးယူလိုက်တာကို တုံ့ပြန်တာဖြစ်တယ်လို့ မြောက်ကိုရီးယားအရေး အထူးပြုဖော်ပြတဲ့ NK News က ဆိုပါတယ်။

သံအမတ်ကြီး မွန်မြောင်ဆင် (Mun Myong Sin) ဟာ ဗြိတိန်မှာ တာဝန်စတင်ထမ်းဆောင်ပြီး သိပ်မကြာခင်မှာပဲ အခုလို ပြန်လည်ခေါ်ယူခံရတာ ဖြစ်ပါတယ်။ ဗြိတိန်ဘက်က ဆောင်ဒိုဝန် (Songdowon) နိုင်ငံတကာ ကလေးစခန်းအပေါ် ပိတ်ဆို့ထားမှုတွေကို မရုပ်သိမ်းမချင်း သံတမန်ဆက်ဆံရေးကို “သံရုံးယာယီတာဝန်ခံ” (charge d’affaires) အဆင့်မှာပဲ ထားရှိတော့မှာဖြစ်တယ်လို့ လန်ဒန်မှာရှိတဲ့ မြောက်ကိုရီးယားသံရုံးက ထုတ်ပြန်ထားပါတယ်။

ပြီးခဲ့တဲ့ မေလအတွင်းမှာ ဗြိတိန်အစိုးရက အဆိုပါကလေးစခန်းကို ပိတ်ဆို့အရေးယူမှုစာရင်းထဲ ထည့်သွင်းခဲ့တာ ဖြစ်ပါတယ်။ အကြောင်းရင်းကတော့ အဲဒီစခန်းဟာ ယူကရိန်းကလေးငယ်တွေကို အတင်းအဓမ္မ ပြည်နှင်ဒဏ်ပေးတာနဲ့ ဝါဒမှိုင်းတိုက်တာတွေမှာ ပါဝင်နေတဲ့ ရုရှားရဲ့ လူငယ်စီမံချက်တွေနဲ့ ဆက်နွှယ်နေတယ်လို့ လန်ဒန်ဘက်က ယူဆထားတာကြောင့်လို့ သိရပါတယ်။

မြောက်ကိုရီးယားသံရုံးကတော့ ဗြိတိန်ရဲ့ အခုလုပ်ရပ်ဟာ “စက်ဆုပ်ရွံရှာဖွယ်ကောင်းပြီး ကျင့်ဝတ်မဲ့တဲ့ နိုင်ငံရေးအရ ရည်ရွယ်ချက်ရှိရှိ လှုံ့ဆော်မှုတစ်ခုပဲ ဖြစ်ပါတယ်” လို့ ဝေဖန်ပြောကြားထားပါတယ်။ ဒါဟာ မြောက်ကိုရီးယားရဲ့ ပုံရိပ်ကို ထိခိုက်စေဖို့နဲ့ ရုရှားနဲ့ကြားက ဆက်ဆံရေးကို ပျက်ပြားအောင် လုပ်ဆောင်တာဖြစ်တယ်လို့လည်း စွပ်စွဲထားပါတယ်။

လက်ရှိမှာတော့ ဒီကိစ္စနဲ့ပတ်သက်ပြီး ဗြိတိန်မှာရှိတဲ့ မြောက်ကိုရီးယားသံရုံးဘက်က ရိုက်တာသတင်းဌာနရဲ့ မေးမြန်းမှုတွေကို တရားဝင် ပြန်လည်ဖြေကြားခြင်း မရှိသေးပါဘူး။ ပြုံယမ်း နိုင်ငံခြားရေးဝန်ကြီးဌာနကတော့ ဗြိတိန်အနေနဲ့ အခုလို မပြုသင့်တဲ့လုပ်ရပ်အတွက် ပြန်လည်ပေးဆပ်ရလိမ့်မယ်လို့ သတိပေးထားကြောင်း သိရှိရပါတယ်။

Source: NK News, Reuters