ဇွန် ၂၉၊ ၂၀၂၆

The Kaladan Post

 

အမေရိကန်သမ္မတ ဒေါ်နယ်ထရမ့် ရဲ့ သမက်ဖြစ်သူ ဂျရတ် ကွတ်ရှ်နာ (Jared Kushner) ပါဝင်ပတ်သက်နေတဲ့ အယ်လ်ဘေးနီးယား (Albania) နိုင်ငံက ကမ်းရိုးတန်းဖွံ့ဖြိုးရေးစီမံကိန်းကြီးကို ဆန့်ကျင်ကန့်ကွက်နေတဲ့ “ဖလင်မင်ဂို တော်လှန်ရေး (Flamingo Revolution)” ဟာ ကမ္ဘာတစ်ဝန်းရဲ့ အာရုံစိုက်မှုကို ရရှိလာနေပြီ ဖြစ်ပါတယ်။

ဒီစီမံကိန်းဟာ လူသူကင်းမဲ့နေတဲ့ Sazan ကျွန်းပေါ်က ဇိမ်ခံအပန်းဖြေစခန်းတစ်ခုနဲ့ ဖလင်မင်ဂိုငှက်တွေ အပါအဝင် ရွှေ့ပြောင်းငှက်တွေ ကျက်စားရာ Narta ရေကန် တောရိုင်းတိရစ္ဆာန် ဘေးမဲ့တောအနီးက ကမ်းရိုးတန်းဖွံ့ဖြိုးရေးလုပ်ငန်းတွေ ပါဝင်ပါတယ်။ ဒီစီမံကိန်းကြောင့် ဖလင်မင်ဂိုငှက်တွေရဲ့ နေရင်းဒေသ ပျက်စီးသွားမှာကို စိုးရိမ်တဲ့အတွက် ထောင်နဲ့ချီတဲ့ ပြည်သူတွေဟာ မြို့တော် တီရာနာ (Tirana) မှာ ဖလင်မင်ဂိုငှက်ပုံစံ ကတ်ထူပြားတွေကိုင်ဆောင်ပြီး ညစဉ်ရက်ဆက် ဆန္ဒပြနေကြတာကြောင့် “ဖလင်မင်ဂို တော်လှန်ရေး” လို့ အမည်တွင်လာတာပါ။

ဒီဆန္ဒပြပွဲတွေမှာ ဖလင်မင်ဂို ကတ်ထူပြားတွေကို ဖန်တီးပေးနေသူကတော့ အသက် ၂၈ နှစ်အရွယ် အနုပညာရှင် ဖာ့တ်မာ ပါဂျာ (Fatma Paja) ဆိုတဲ့ အမျိုးသမီးပါ။ သူမက “ဒီစီမံကိန်းက ဥပဒေအထောက်အထားမရှိဘဲ သဘာဝပတ်ဝန်းကျင်ကို ထိခိုက်စေမယ့် လူနည်းစုအထက်တန်းလွှာ (Pro-elitist) တွေအတွက်ချည်း သီးသန့်ရည်ရွယ်ထားတာပါ။ အယ်လ်ဘေးနီးယားဟာ ရောင်းရန်မဟုတ်ပါဘူး၊ Narta ကို မထိပါနဲ့။” လို့ လူအုပ်ကြီးကို ဦးဆောင်ကြွေးကြော်ခဲ့ပါတယ်။ ဒီဆန္ဒပြပွဲဟာ နိုင်ငံရေးပါတီတွေနဲ့ မသက်ဆိုင်ဘဲ ပြည်သူတွေရဲ့ စည်းလုံးညီညွတ်မှုကို ပြသနေတယ်လို့လည်း သူမက ယုံကြည်နေပါတယ်။

ဆန္ဒပြပွဲကို ဦးဆောင်နေသူ နောက်တစ်ဦးကတော့ အယ်လ်ဘေးနီးယားမှာ ၁၀ နှစ်ကျော်ကြာ ဧည့်လမ်းညွှန်အဖြစ် လုပ်ကိုင်လာတဲ့ အသက် ၄၆ နှစ်အရွယ် အာဘင် ကိုလာ (Arben Kola) ဖြစ်ပါတယ်။ ခရီးသွားလုပ်ငန်း ဖွံ့ဖြိုးလာတာနဲ့အမျှ အယ်လ်ဘေးနီးယားရဲ့ သဘာဝအလှတရားတွေကို ထရမ့်ရဲ့ သမီးဖြစ်သူ အိုင်ဗန်ကာ (Ivanka Trump) နဲ့ သမက် ကွတ်ရှ်နာ တို့က သဘောကျပြီး အခုလို စီမံကိန်းလုပ်ဖို့ စီစဉ်ခဲ့ကြတာပါ။ ကိုလာ ကတော့ “အယ်လ်ဘေးနီးယားမှာ မြေယာတွေ၊ ကမ်းခြေတွေ၊ တောင်ကြားတွေနဲ့ မြစ်တွေကို ပုဂ္ဂလိကပိုင်ပြုလုပ်ပြီး အလကားပေးပစ်နေတဲ့ အကျင့်ပျက်ခြစားမှုတွေ အလွန်မြင့်မားနေပါတယ်။” လို့ ဝေဖန်ခဲ့ပါတယ်။

ဆန္ဒပြပွဲမှာ လူငယ်တွေသာမက အသက် ၇၀ အရွယ် အငြိမ်းစားအင်ဂျင်နီယာ ဘူဂျာရီ အစ်ရှ်မီ (Bujare Ishmi) လို သက်ကြီးရွယ်အိုတွေလည်း ပါဝင်လာကြပါတယ်။ လူငယ်တွေက သူမကို “Nona” (အဘွား) လို့ ချစ်စနိုးခေါ်ကြပါတယ်။ အစ်ရှ်မီ က နိုင်ငံခြားရင်းနှီးမြှုပ်နှံမှုတွေကို မဆန့်ကျင်ပေမယ့် ပွင့်လင်းမြင်သာမှု မရှိတာကိုတော့ စိုးရိမ်တယ်လို့ ဆိုပါတယ်။ “ရင်းနှီးမြှုပ်နှံမှုက တိုးတက်မှုကို ယူဆောင်လာပေးပါတယ်။ ဒါပေမဲ့ နေရာကို သေချာရွေးချယ်ပြီး သင့်လျော်တဲ့ စံနှုန်းတွေကိုတော့ ထိန်းသိမ်းထားရမှာပါ။” လို့ သူမက ပြောပါတယ်။

လက်ရှိမှာတော့ ဒီစီမံကိန်းနဲ့ ပတ်သက်ပြီး အယ်လ်ဘေးနီးယား အဂတိလိုက်စားမှု တိုက်ဖျက်ရေးအေဂျင်စီက စုံစမ်းစစ်ဆေးမှုတွေ စတင်နေပြီဖြစ်ပါတယ်။ ဝန်ကြီးချုပ် အီဒီ ရာမာ (Edi Rama) ကတော့ သဘာဝပတ်ဝန်းကျင် ထိခိုက်မယ်ဆိုတာ သတင်းအမှားတွေသာဖြစ်ပြီး အယ်လ်ဘေးနီးယားကို နိုင်ငံတကာ ရင်းနှီးမြှုပ်နှံသူတွေ စိတ်ဝင်စားလာအောင် လုပ်ဆောင်နေတာဖြစ်တယ်လို့ ကာကွယ်ပြောဆိုထားပါတယ်။ သို့သော်လည်း ဆန္ဒပြသူတွေကတော့ သဘာဝဘေးမဲ့တောထဲမှာ မြေတူးစက်တွေနဲ့ ရှင်းလင်းရေးတွေ စတင်လုပ်ဆောင်နေပြီဖြစ်လို့ ဝန်ကြီးချုပ် ရာမာ ကို ရာထူးကနေ နုတ်ထွက်ပေးဖို့အထိ တောင်းဆိုနေကြပါတယ်။

သတင်း Source: AP News