မတ်လ (၁၁) ရက် သတင်းတိုပေါင်းချုပ်

ရွှေပေါက်ကံမြို့သစ်တွင် ရဲတပ်ဖွဲ့ဝင် ၂ ဦးကို ရိုက်နှက်သတ်ဖြတ်သူ စသုံးလုံးအရာရှိ ဖမ်းဆီးခံရ

မတ် ၁၁
The Kaladan Post
ရန်ကုန်မြို့၊ မြောက်ဥက္ကလာပမြို့နယ်၊ ရွှေပေါက်ကံမြို့သစ် (၁၂) ရပ်ကွက်ခွဲ၊ ပုဂံလမ်းမကြီး (၁၂) စျေး ထိပ်တွင် မတ်လ ၉ ရက် ည ၁၀ နာရီဝန်းကျင်က ရန်ပွဲဖြစ်ပွားခဲ့ရာ လှည့်ကင်းလှည့်နေသော ရဲတပ်ဖွဲ့ ၄ ဦးကို ကားဖြင့် ဝင်တိုက်ပြီး သံတုတ်များဖြင့် ရိုက်နှက်ခဲ့ကြောင်း သတင်းရင်းမြစ်များက ဆိုသည်။ ရွှေပေါက်ကံမြို့သစ်မှ လူမိုက်အုပ်စု (အောင်လေးအဖွဲ့) နှင့် အထူးစုံစမ်းစစ်ဆေးရေးဦးစီးဌာန (စသုံးလုံး) ဒုတိယစုံစမ်းရေးမှူး ဦးအေးမင်း တို့ အချင်းချင်း စကားများရန်ဖြစ်ခဲ့ရာ ရဲများ ဝင်ရောက် ဖြေရှင်းခဲ့ခြင်းဖြစ်သည်။ ကနဦး အရက်မူးနေသော ယာဉ်မောင်းတစ်ဦး ပါဝင်ခဲ့ပြီး နောက်ပိုင်း စသုံးလုံး အရာရှိ ဦးအေးမင်း၊ ဖခင်ဖြစ်သူ ဦးကြင်ခရမ်း နှင့် ညီဖြစ်သူ မြတ်ကိုကို တို့ ရောက်ရှိလာကာ သံတုတ် များဖြင့် ရိုက်နှက်ခဲ့ကြောင်း သိရသည်။ ရဲတပ်ဖွဲ့ဝင် ၂ ဦး (ဒုတပ်ကြပ်တစ်ဦး၊ ရဲတပ်သားတစ်ဦး) မတ်လ ၁၀ ရက် မနက်ပိုင်းတွင် သေဆုံးခဲ့ပြီး ကျန် ၂ ဦး ဒဏ်ရာရရှိ၍ မြောက်ဥက္ကလာပဆေးရုံတွင် အရေးပေါ်ကုသမှု ခံယူနေရကြောင်း သိရသည်။ လူမိုက်ဘက်မှ သေဆုံးသူ မရှိဘဲ ဒဏ်ရာရရှိသူ အနည်းငယ်သာ ရှိကြောင်း ဒေသခံများက ပြောဆိုသည်။ ဤဖြစ်စဉ်နှင့် ပတ်သက်၍ စသုံးလုံး ဒုတိယစုံစမ်းရေးမှူး ဦးအေးမင်း၊ ဖခင် ဦးကြင်ခရမ်း နှင့် ညီဖြစ်သူ မြတ်ကိုကို တို့ကို မတ်လ ၁၀ ရက် နေ့လယ်ပိုင်းတွင် ရွှေပေါက်ကံနယ်မြေရဲစခန်းမှ ရဲတပ်ဖွဲ့က ဖမ်းဆီးခဲ့ပြီး လူသတ်မှု ပုဒ်မ ၃၀၂၊ အစိုးရဝန်ထမ်း တိုက်ခိုက်မှု ပုဒ်မ ၃၅၃ တို့ဖြင့် အမှုဖွင့်အရေးယူ ထားကြောင်း သိရှိရသည်။ ဒေသခံများက စသုံးလုံး အရာရှိနှင့် မိသားစုဝင်များသည် ရပ်ကွက်အတွင်း ငွေညစ်မှု၊ မတည့်သူများကို ဒလန်တပ်ပြီး သတ်ဖြတ်မှုများ ရှိခဲ့သည်ဟု ဆိုကြသည်။

NUG နှင့် တိုင်းရင်းသားတပ်များအကြား တပ်ပေါင်းစု အမြန်ဖွဲ့စည်းပြီး တော်လှန်ရေး အရှိန်မြှင့်ရန် အဖွဲ့ ၄၅ ဖွဲ့ တောင်းဆို

မတ် ၁၁
The Kaladan Post
အမျိုးသားညီညွတ်ရေးအစိုးရ (NUG) နှင့် တိုင်းရင်းသားလက်နက်ကိုင်တော်လှန်ရေးတပ်ဖွဲ့များအကြား တပ်ပေါင်းစု (united front) တစ်ရပ်ကို အလျင်အမြန် အကောင်အထည်ဖော်ရန် အရပ်ဘက်နှင့် စစ်အာဏာရှင်တိုက်ဖျက်ရေး အဖွဲ့အစည်း ၄၅ ဖွဲ့က ယမန်နေ့ မတ်လ ၁၀ ရက်နေ့က ပူးတွဲ တောင်းဆို သည်။ စစ်အာဏာရှင်စနစ်ကို ဘုံရန်သူအဖြစ် သတ်မှတ်ကာ တော်လှန်ရေးအင်အားစုများအချင်းချင်း ပဋိပက္ခများကို လက်နက်အားဖြင့် ဖြေရှင်းခြင်းမပြုဘဲ မဟာမိတ်နည်းလမ်းဖြင့်သာ ညှိနှိုင်းဖြေရှင်းရန် အလေးပေး သတိပေးထားသည်။ လက်ရှိ တော်လှန်ရေးအရှိန်မြင့်မားလာချိန်တွင် အချို့အဖွဲ့များက ကိုယ်ကျိုးစီးပွားကို ရှေ့တန်းတင်ကာ အချင်းချင်း ရန်သူသဖွယ် လက်နက်ဖြင့် ခြိမ်းခြောက်ခြင်း၊ ဖမ်းဆီးခြင်း၊ စစ်ရေးထိပ်တိုက်တွေ့ခြင်းနှင့် ပြည်သူလူထုအပေါ် လက်နက်အားကိုး အနိုင်ကျင့်ခြင်းများ ရှိနေကြောင်း ထောက်ပြပြီး ထိုလုပ်ရပ်များသည် ရန်သူကို အမြတ်ထုတ်ပေးရုံသာရောက်ကြောင်း ဖော်ပြထားသည်။ နိုင်ငံရေးအရ တန်းတူညီမျှမှုရှိသော ဘုံသဘောထားနှင့် မူများအပေါ် အခြေခံ၍ တပ်ပေါင်းစုတစ်ရပ်ကို ရည်ရွယ်ချက်ရှိရှိ တည်ဆောက်ရန်နှင့် ပသုံးလုံး (ပကဖ၊ ပဟဖ၊ ပစဖ) ယန္တရား များ၏ လူထုအပေါ် ထိခိုက်နစ်နာစေသော လုပ်ရပ်များကို အမြန်ဆုံး ဖြေရှင်းပေးရန် အဓိက တောင်းဆိုထားကြောင်း သိရသည်။ ဗမာနိုင်ငံလုံးဆိုင်ရာ ကျောင်းသားသမဂ္ဂများအဖွဲ့ချုပ် (ABFSU)၊ စစ်အာဏာရှင်စနစ်တိုက်ဖျက်ရေး အထွေထွေသပိတ်ကော်မတီ (GSC)၊ သွေးစွန်းငွေ (BMC)၊ ရခိုင်ကျောင်းသားများသမဂ္ဂ (ASU)၊ ကရင်နီပြည်လူငယ်များသမဂ္ဂ (UKSY) အပါအဝင် အဖွဲ့ပေါင်း ၄၅ ဖွဲ့က စုပေါင်းလက်မှတ်ရေးထိုးထုတ်ပြန်ခဲ့ခြင်း ဖြစ်သည်။ တော်လှန်ရေး၏ အရှိန်အဟုန်ကို ထိန်းသိမ်း ရန်နှင့် စစ်အာဏာရှင်စနစ်ကို အမြစ်ပြတ်ချေမှုးရေး ရည်မှန်းချက်ကို အောင်မြင်စေရန် ညီညွတ်မှုနှင့် မဟာမိတ်ဆက်ဆံရေးကို ရှေ့တန်းတင်ရန် အဖွဲ့များက အလေးအနက်တိုက်တွန်းထားသည်။

စစ်တပ်မှ စစ်မှုထမ်းသစ် ၃ ဦး လက်နက်ခဲယမ်းများနှင့် ပြည်သူ့ကြယ်တစ်ပွင့်တပ်ဖွဲ့ထံ အလင်းဝင်

မတ် ၁၁
The Kaladan Post
မန္တလေးတိုင်း မြင်းခြံမြို့နယ်နှင့် စစ်ကိုင်းတိုင်း မြောင်မြို့နယ်ရှိ စစ်တပ်၏ ခမရ ၁၅ တပ်ရင်းနှင့် ကျောက်ရစ်ရဲစခန်းမှ စစ်မှုထမ်း တပ်သားသစ် ၃ ဦး သေနတ် ၂ လက်အပါအဝင် လက်နက်ခဲယမ်း များယူဆောင်ကာ ပြည်သူ့ကြယ်တစ်ပွင့် တပ်ဖွဲ့ထံ အလင်းဝင်ရောက်ခဲ့ကြောင်း သိရသည်။ ယမန်နေ့ မတ်လ ၁၀ ရက်နေ့က မြင်းခြံမြို့နယ်ရှိ ခမရ ၁၅ တပ်ရင်းမှ စစ်မှုထမ်း တပ်သားသစ် ၁ ဦး သေနတ် မပါဘဲ အလင်းဝင်ရောက်ခဲ့ပြီး ဖေဖော်ဝါရီလ ၂၄ ရက်နေ့က မြောင်မြို့နယ် ကျောက်ရစ်ရဲစခန်းမှ ပေါ်တာဆွဲ ဖမ်းဆီးခံရသော စစ်မှုထမ်း တပ်သားသစ် ၂ ဦး သေနတ် ၂ လက်၊ ကျည် ၄၀၀ လုံး၊ အီနာကာ ၁ ခု၊ ကျည်ဘောက် ၅ ခု၊ လက်ပစ်ဗုံး ၂ လုံး ယူဆောင်လာကာ အလင်းဝင်ရောက်ခဲ့ကြောင်း ပြည်သူ့ကြယ်တစ်ပွင့် တပ်ဖွဲ့မှ ဗိုလ်မိုက်ခဲက ပြောဆိုသည်။ ပြည်သူ့ကြယ်တစ်ပွင့် တပ်ဖွဲ့အနေဖြင့် စစ်တပ်မှ ထွက်ပြေးလိုသူများကို ဆက်လက် ကြိုဆိုလက်ခံနေပြီး စစ်ကောင်စီ တပ်ဖွဲ့အတွင်း မကျေနပ်မှုများ မြင့်တက်လာနေကြောင်း ထင်ရှားစေသည့် ဖြစ်ရပ်များအဖြစ် မှတ်ယူနိုင်ကြောင်း သိရသည်။

စစ်တပ်၏ လေကြောင်း တိုက်ခိုက်မှုကြောင့် ရခိုင်တွင် စစ်သုံ့ပန်း အကျဉ်းသား ၁၁၆ ဦး သေဆုံး

မတ် ၁၁
The Kaladan Post
ရခိုင်ပြည်နယ်၊ အမ်းမြို့နယ်၊ ဒါးလက်ချောင်း ဒေသရှိ အာရက္ခတပ်တော် (AA) ထိန်းချုပ်ထားသော စစ်သုံ့ပန်း အကျဉ်းစခန်းကို စစ်ကောင်စီ တပ်မတော်က မတ်လ ၈ ရက်နေ့ နံနက် ၁၁ နာရီ ၂ မိနစ်မှ မွန်းလွဲ ၂ နာရီ ၂၈ မိနစ်အထိ ဂျက်ဖိုက်တာ ၄ စီး၊ Y-12 လေယာဉ် ၄ စီးဖြင့် ၃ နာရီကျော် ဆက်တိုက် ဗုံးကျဲ တိုက်ခိုက်ခဲ့ကြောင်း AA က ယနေ့ သတင်းထုတ်ပြန်သည်။ ထိုလူမဆန်သော လေကြောင်း တိုက်ခိုက်မှုကြောင့် စစ်သုံ့ပန်း ၁၁၆ ဦး သေဆုံးခဲ့ပြီး ၃၂ ဦး ထိခိုက်ဒဏ်ရာရရှိခဲ့ကြောင်း၊ ထိခိုက် ဒဏ်ရာ ပြင်းထန်သူများအပါအဝင် အရပ်သား သုံ့ပန်းအချို့လည်း သေဆုံးမှုနှင့် ဒဏ်ရာရရှိမှု စာရင်းတွင် ပါဝင်ကြောင်း သိရသည်။ ရခိုင်ဒေသအတွင်း စစ်တပ်၏ လေကြောင်း အကြမ်းဖက် တိုက်ခိုက်မှုများအနက် စစ်သုံ့ပန်း (စစ်ကောင်စီ တပ်ဖွဲ့ဝင်များ) အသေအပျောက် အများဆုံး ဖြစ်စဉ်ဖြစ်ပြီး စစ်ဘက်အရာရှိကြီးများစွာ ပွဲချင်းပြီး သေဆုံးခဲ့ကြောင်း AA က ဖော်ပြထားသည်။ စစ်သုံ့ပန်း အလောင်းအချို့ကို မည်သူမည်ဝါ စစ်ဆေးရန် ခက်ခဲခြင်း၊ ခန္ဓာကိုယ် အစိတ်အပိုင်းများ လုံးဝ မရရှိသော ပျောက်ဆုံး အလောင်းများလည်း ရှိနေသောကြောင့် အသေးစိတ် အချက်အလက် များကို ဆက်လက် စစ်ဆေးပြီး ထုတ်ပြန်သွားမည်ဖြစ်ကြောင်း AA က ဆိုထားသည်။

နတ်ရေကန်ဗျူဟာကုန်း သတ်သိမ်းပိုက်ရေး AA နှင့် ပူးပေါင်းတပ်များ အပြင်းအထန် ထိုးစစ်ဆင်

မတ် ၁၁
The Kaladan Post
မကွေးတိုင်း၊ ငဖဲမြို့နယ်၊ အမ်း-ပဒါန်းလမ်းပေါ်ရှိ စစ်တပ်၏ အရေးပါသော လေကြောင်းရန်ကာကွယ် ရေး ဗျူဟာကုန်း (နတ်ရေကန်ဗျူဟာကုန်း) ပင်မစခန်းကို အာရက္ခတပ်တော်နှင့် ပူးပေါင်းတပ်ဖွဲ့များက မတ်လ ၁၀ ရက်မှ စတင်ကာ အပြီးသတ်သိမ်းပိုက်နိုင်ရေး ထိုးစစ်ဆင် တိုက်ခိုက်လျက်ရှိကြောင်း သိရ သည်။ စစ်တပ်ဘက်က ဂျက်တိုက်လေယာဉ်၊ Y12 လေယာဉ်၊ ကာမီကာဇေဒရုန်း (အသေခံဒရုန်း) များနှင့် အတွဲလိုက်ဒုံးပစ်လက်နက်ကြီးများအပါအဝင် လက်နက်ကြီးပစ်ကူ အလွန်အကျွံ အသုံးပြုကာ ခံစစ်ဆင်နေသည်။ အမှတ် ၉၀၅ အမြောက်စစ်ဆင်ရေးကွပ်ကဲမှုဌာနချုပ်မှ ပစ်ကူပေးနေကြောင်း ဖော်ပြထားသည်။ ထို့အပြင် မတ်လ ၉ ရက်က စစ်ကူအဖြစ် အင်အား ၆၀၀ ဝန်းကျင်ပါ စစ်ယာဉ်တန်း ၂၈ စီး တက်လာရာ AA နှင့် ပူးပေါင်းတပ်များက တားဆီးတိုက်ခိုက်ခဲ့ပြီး ထိခိုက်သေဆုံးမှုများ ရှိခဲ့ကြောင်း သိရသည်။ ယနေ့ မတ်လ ၁၁ ရက် နံနက်ပိုင်းတွင် စစ်ကောင်စီက အသေခံဒရုန်း ၁၃ ကြိမ်၊ အတွဲလိုက်ဒုံး ၁၅ ကြိမ်၊ Y12 လေယာဉ်ဖြင့် ဗုံး ၁၁ လုံး၊ ဂျက်ဖိုက်တာဖြင့် ဗုံး ၂ လုံး အပါအဝင် လက်နက်ကြီး အများအပြား ပစ်ခတ်တိုက်ခိုက်ခဲ့ရာ အနီးဝန်းကျင် ပြည်သူ့နေအိမ်များ ပျက်စီးမှုရှိခဲ့ ကြောင်း ရှေ့တန်းစစ်ရေးသတင်းရင်းမြစ်များက ပြောသည်။ စစ်ပွဲဇုန်အတွင်း ဒေသခံများကို စစ်ဘေးရှောင်ခိုင်းထားသဖြင့် လူထိခိုက်မှု မရှိကြောင်း သိရသည်။ မကွေးတိုင်းနှင့် ရခိုင်ပြည်နယ်ကို ဆက်သွယ်ထားသော အရေးပါဆုံး ဗျူဟာကုန်းဖြစ်ပြီး ကျဆုံးပါက စစ်ကောင်စီ၏ စစ်ရေးအခြေအနေ ပိုမိုဆိုးရွားလာနိုင်ကြောင်း CDM ဗိုလ်ကြီး ဇင်ယော်က သုံးသပ် ပြောကြားထားသည်။

စလင်း-စေတုတ္တရာ လမ်းပိုင်း စစ်တပ် ကားတစ်စီး အနီးကပ်တိုက်ခိုက်ခံရပြီး စစ်သား ၄ ဦး သေဆုံး

မတ် ၁၁
The Kaladan Post
မကွေးတိုင်းဒေသကြီး၊ မင်းဘူးခရိုင်၊ စလင်းမြို့နယ်အတွင်း ကံပြား-စေတုတ္တရာ လမ်းပိုင်း (ဆိုဒ် 46Q FH 46538 68143) တွင် စေတုတ္တရာဘက်မှ ဆင်းလာသော စစ်ကောင်စီ ယာဉ်တန်းတစ်စီးကို တော်လှန်ရေးတပ်ဖွဲ့များက မတ်လ ၁၀ ရက်၊ နေ့လယ် ၁၂:၃၀ နာရီခန့်တွင် အနီးကပ် စောင့်ကြိုတိုက်ခိုက်ခဲ့ရာ စစ်ကောင်စီတပ်ဖွဲ့ဝင် စစ်သား ၄ ဦး နေရာတွင် သေဆုံးခဲ့ကြောင်း ဒေါင်းညီနောင်ပြောက်ကြားတပ်ဖွဲ့က ထုတ်ပြန်သည်။ ထို့အပြင် စစ်သား ၃ ဦး အပြင်းအထန် ဒဏ်ရာရရှိခဲ့ပြီး ကားတစ်စီး ပျက်စီးသွားခဲ့ကြောင်း စစ်ကောင်စီ အတွင်းသတင်းရင်းမြစ်များအရ သိရှိရသည်။ သေဆုံးဒဏ်ရာရရှိသူများမှာ ဆင်လူး ပသစ (ပျူစောထီး) အဖွဲ့ဝင်များဖြစ်ကာ မောင်လှ၊ ဆင်လူးတောင်ရွာ အောင်ကျော်မြင့်၊ အောင်ကိုဝင်း၊ လင်းလင်း နှင့် စခ (စစ်ကောင်စီ လက်အောက်ခံ ပျူစောထီး) များဖြစ်ကြောင်းသိရသည်။ ပျက်စီးခဲ့သော ကားမှာ ဆင်လူး တင်မိုးဝင်း ကားဖြစ်ကြောင်း ဖော်ပြထားသည်။ ဤလမ်းပိုင်းတွင် စစ်ကောင်စီနှင့် ပျူစောထီးများက ပြည်သူ့ကားများကို အသုံးပြု၍ သွားလာလေ့ရှိသဖြင့် အချိန်မရွေး တိုက်ပွဲများ ဖြစ်ပွားနိုင်ကြောင်း တပ်ဖွဲ့က သတိပေးထားသည်။ ထို့အပြင် ဒေသခံ ပြည်သူများအနေဖြင့် ကားများကို “မှန်ချ” (မှန်ကန်စွာ စစ်ဆေး၍ မောင်းနှင်ရန်) လိုက်နာဆောင်ရွက်ရန် လိုအပ်ပြီး မလိုက်နာပါက တိုက်ပွဲအန္တရာယ်များကြောင့် တာဝန်ယူမှု မရှိနိုင်ကြောင်း ဒေါင်းညီနောင်ပြောက်ကြားတပ်ဖွဲ့က တောင်းဆိုထားသည်။

ရေစကြို-ပခုက္ကူ လမ်းပိုင်းတွင် တပ်မ ၉၉ စစ်ကြောင်း အနီးကပ်မိုင်းဆွဲခံရပြီး စစ်သား ၃ ဦး သေဆုံး

မတ် ၁၁
The Kaladan Post
မကွေးတိုင်း၊ ရေစကြိုမြို့နယ်အတွင်း ရေစကြို-ပခုက္ကူ လမ်းပိုင်း ကျောက်လှေခါနှင့် ၁၂ မိုင်ကြားတွင် ၂၀၂၆ ခုနှစ် မတ်လ ၈ ရက် နံနက် ၅ နာရီ ၃၀ မိနစ်ခန့်က တပ်မ ၉၉ လက်အောက်ခံ စစ်သား ၁၅၀ ခန့် ပါဝင်သော စစ်ကြောင်းတစ်ခုကို ရေစကြိုမြို့နယ် ပြည်သူ့ကာကွယ်ရေးတပ်ဖွဲ့ (ပကဖ) မှ အနီးကပ် မိုင်းဆွဲတိုက်ခိုက်ပြီး လက်နက်ငယ်များဖြင့် ပစ်ခတ်တိုက်ခိုက်ခဲ့ကြောင်း အဆိုပါတပ်ဖွဲ့က ထုတ်ပြန် သည်။ တိုက်ခိုက်မှုအတွင်း စစ်တပ်ဘက်မှ ၃ ဦး သေဆုံးပြီး ၂ ဦး ဒဏ်ရာရရှိပြီး သေဆုံးသူများနှင့် ဒဏ်ရာရရှိသူများကို ပခုက္ကူမြို့နယ် ဆေးရုံသို့ အရေးပေါ် ခေါ်ဆောင်သွားခဲ့ကြောင်း သိရသည်။ လက်ရှိတွင် ထိုစစ်ကြောင်းသည် ရေစကြိုမြို့နယ်အတွင်း နွားထိမ်းကျေးရွာနှင့် စဉ့်ကိုင်ကျေးရွာဘက်သို့ ရောက်ရှိနေပြီဖြစ်ကြောင်း သိရှိရသည်။

ညောင်ဦးမြို့နယ်တွင် စစ်တပ် စစ်ကြောင်း ၂ ကြိမ် ကြားဖြတ်တိုက်ခိုက်ခံရပြီး စစ်သား ၃၀ ခန့်သေဆုံး

မတ် ၁၁
The Kaladan Post
မန္တလေးတိုင်း၊ ညောင်ဦးမြို့နယ်၊ ငါ့သရောက်နယ်မြေအတွင်း အကြမ်းဖက် စစ်တပ် ၏ စစ်ကြောင်း ၂ ကြိမ်ကို တော်လှန်ရေးတပ်ဖွဲ့များက ကြားဖြတ်တိုက်ခိုက်ခဲ့ရာ စစ်သား ၃၀ ခန့် သေဆုံးခဲ့ကြောင်း Bagan Ogre Force (ညောင်ဦးမြို့နယ် ပကဖ) က ထုတ်ပြန်သည်။ မတ်လ ၁ ရက်နေ့က နံနက်ပိုင်း တွင် ဖလန်ကန်ကျေးရွာဘက်မှ အင်အား ၃၀ ခန့်ဖြင့် ခွဲထွက်လာသော စစ်ကြောင်းကို တိုက်ခိုက်ခဲ့ရာ စစ်သား ၃၀ ဦး သေဆုံးကာ MA-3 သေနတ် ၁ လက်၊ MA-1 သေနတ် ၃ လက်၊ ကျည်ဘောက် ၈ ဘောက်၊ ကျည်အတောင့် ၁၀၀ နှင့် စစ်ပစ္စည်းအချို့ သိမ်းဆည်းရမိခဲ့သည်။ ယင်းနေ့ မွန်းလွဲပိုင်းတွင် ကူတောရွာဘက်မှ ထွက်လာသော စစ်ကြောင်းကိုလည်း ဒုတိယအကြိမ် ကြားဖြတ်တိုက်ခိုက်ခဲ့ပြီး အထိနာသွားသော စစ်ကောင်စီတပ်ဖွဲ့မှ ကူတောကျေးရွာရှိ ပြည်သူပိုင် နေအိမ် ၄၀ ခန့်နှင့် ဆိုင်ကယ် ၂၀ ခန့်ကို မီးရှို့ဖျက်ဆီးခဲ့ကာ ငွေကြေး၊ လက်ဝတ်ရတနာများကိုပါ လုယက်သွားခဲ့ကြောင်း သိရသည်။ အဆိုပါ တိုက်ခိုက်မှုများကို ညောင်ဦးမြို့နယ် ပကဖ ဒုတာဝန်ခံ (စစ်ဘက်ရေးရာ) ရဲဘော် ပန်ဒါ၊ ပုဂံပြည်ဘီလူးတပ်စစ်ကြောင်းမှူး ရဲဘော် မုန်တိုင်း/မော်စီ နှင့် ပူးပေါင်းတပ်ဖွဲ့ဝင်များက ဦးဆောင်ခဲ့ပြီး တော်လှန်ရေးရဲဘော်များ အထိခိုက်မရှိ ဆုတ်ခွာနိုင်ခဲ့ကြောင်း သိရသည်။ ထို့ပြင် အနီးနားရှိ ကျောက်ပန်းတောင်းမြို့နယ်တွင်လည်း မတ်လ ၄ ရက်နေ့က စိုင်ဂေါင်းရွာမှ အမျိုးသား ၃ ဦးကို ဖမ်းဆီးခဲ့ပြီး မတ်လ ၆ ရက်တွင် ခါးပက်ရွာအနီး အမျိုးသား ၂ ဦးနှင့် ကမ်းဖြူရွာမှ အဖွားအို ၃ ဦးကို မီးရှို့သတ်ဖြတ်ခဲ့ကာ နေအိမ် ၁၀၀ ကျော်ကိုပါ မီးရှို့ဖျက်ဆီးခဲ့ကြောင်း သိရှိရသည်။

ယင်းမာပင်ခရိုင်တွင် ရဲမေ တစ်ဦး အဓမ္မပြုကျင့်သူကို ဥပဒေနှင့်အညီ ထိရောက်စွာ အရေးယူမည်ဟု NUG ပြော

မတ် ၁၁
The Kaladan Post
စစ်ကိုင်းတိုင်း၊ ယင်းမာပင်ခရိုင်အတွင်း အခြေစိုက်သော ပြည်သူ့ကာကွယ်ရေးတပ်မတော် (PDF) ယင်းမာပင်ခရိုင် အမှတ် (၂၀) တပ်ရင်းတွင် တာဝန်ထမ်းဆောင်နေသည့် ရဲမေ တစ်ဦး လိင်ပိုင်းဆိုင်ရာ ကျူးလွန်ခံရမှု၊ လူ့အခွင့်အရေး ချိုးဖောက်ခံရမှုဖြစ်စဉ်နှင့် ပတ်သက်၍ အမျိုးသားညီညွတ်ရေးအစိုးရ (NUG) ကာကွယ်ရေးဝန်ကြီးဌာနက ထုတ်ပြန်ချက် ထုတ်ပြန်ခဲ့သည်။ အွန်လိုင်းပေါ်တွင် မပျံ့နှံ့ခင်ကပင် လိုအပ်သည့် စစ်ဆေးမေးမြန်းမှုများ ပြုလုပ်ခဲ့ပြီး ဖြစ်ကြောင်း လက်ရှိတွင် တပ်ရင်းမှူး၊ ဒုတပ်ရင်းမှူးနှင့် သံသယတရားခံဖြစ်သူများကို ဖမ်းဆီး ထိန်းသိမ်းထားရှိပြီး စစ်ဆေးနေကြောင်း၊ အခင်းဖြစ်ပွားရာ နယ်မြေကင်းစခန်းမှ သက်သေများကိုလည်း လွှဲပြောင်း စစ်ဆေးနိုင်ရန် စီစဉ်ထားကြောင်း ဖော်ပြထား သည်။ NUG ကာကွယ်ရေးဝန်ကြီးဌာန၊ ပြည်ထဲရေးနှင့် လူဝင်မှုကြီးကြပ်ရေးဝန်ကြီးဌာနတို့ ပူးပေါင်း၍ အမှုမှန် ပေါ်ပေါက်ရေး ကိုင်တွယ်ဆောင်ရွက်လျက်ရှိပြီး စစ်ဘက်ဆိုင်ရာ ဥပဒေနှင့် လုပ်ထုံးလုပ်နည်း များအတိုင်း ဆောင်ရွက်နေကြောင်း အသိပေးထားသည်။ နစ်နာသူနှင့် သက်သေများအနေဖြင့် ပူးပေါင်း ပါဝင်ရန် လိုအပ်ကြောင်း၊ နစ်နာသူ၏ လုံခြုံရေးနှင့် အဆင်ပြေချောမွေ့မှုကို အကောင်းဆုံး ဆောင်ရွက် ပေးမည်ဖြစ်ကြောင်း၊ ကျူးလွန်သူများကို ဥပဒေနှင့်အညီ ထိရောက်စွာ အရေးယူသွားမည်ဖြစ်ကြောင်း ထုတ်ပြန်ချက်တွင် ပါရှိသည်။