မော်တော်ကားထုတ်လုပ်မှုဆိုင်ရာ သဘောထားကွဲလွဲမှုများကြားမှ အမေရိကန်နှင့် မက္ကဆီကိုတို့ စက်တင်ဘာတွင် ကုန်သွယ်ရေးဆွေးနွေးပွဲ ထပ်မံပြုလုပ်မည်

ဇူလိုင် ၂၄၊ ၂၀၂၆

The Kaladan Post

အမေရိကန်နှင့် မက္ကဆီကို အစိုးရတို့သည် မြောက်အမေရိက ကုန်သွယ်ရေး သဘောတူညီချက် (USMCA) ကို ပြန်လည်ပြင်ဆင်ရန်အတွက် စတုတ္ထအကြိမ်မြောက် ဆွေးနွေးပွဲကို လာမည့် စက်တင်ဘာလတွင် ဝါရှင်တန်မြို့၌ ကျင်းပသွားမည်ဖြစ်ကြောင်း ကြာသပတေးနေ့တွင် ပူးတွဲကြေညာလိုက်ပါသည်။ ယခုတစ်ပတ်အတွင်း မက္ကဆီကိုစီးတီး၌ ပြုလုပ်ခဲ့သည့် တတိယအကြိမ် ဆွေးနွေးပွဲတွင် မော်တော်ကား ထုတ်လုပ်မှုဆိုင်ရာ စည်းမျဉ်းများနှင့် ပတ်သက်၍ နှစ်ဖက်ကြား သဘောထားကွဲလွဲမှုများ ရှိခဲ့သော်လည်း အပြုသဘောဆောင်သည့် တိုးတက်မှုအချို့ ရရှိခဲ့သည်ဟု ဆိုပါသည်။

အမေရိကန် ကုန်သွယ်ရေး ကိုယ်စားလှယ် Jamieson Greer သည် မက္ကဆီကိုသမ္မတ ကလော်ဒီယာ ရှိန်းဘမ် (Claudia Sheinbaum) နှင့် စီးပွားရေးဝန်ကြီး မာဆယ်လို အီဘရတ် တို့နှင့် တွေ့ဆုံခဲ့ပြီး မော်တော်ကား၊ စီးပွားရေးလုံခြုံမှု၊ အလုပ်သမားရေးရာ၊ စိုက်ပျိုးရေးနှင့် သံမဏိ ထုတ်ကုန်များအကြောင်းကို ဆွေးနွေးခဲ့ကြပါသည်။ [အမေရိကန်နှင့် မက္ကဆီကို အစိုးရ] တို့၏ ပူးတွဲထုတ်ပြန်ချက်တွင် “သံအမတ်ကြီး Greer နှင့် သမ္မတ ရှိန်းဘမ် တို့သည် မြောက်အမေရိက၏ ကုန်ထုတ်လုပ်မှု ကဏ္ဍကို မြှင့်တင်ရန်၊ ဒေသတွင်း ထောက်ပံ့မှုကွင်းဆက်များကို ခိုင်မာစေရန်နှင့် တရုတ်ကဲ့သို့သော ပြင်ပနိုင်ငံများ၏ အခွင့်ကောင်းယူမှုများကို ကိုင်တွယ်ဖြေရှင်းရန် အရေးကြီးကြောင်း သဘောတူညီခဲ့ကြသည်” ဟု ဖော်ပြထားပါသည်။

သို့သော်လည်း အဓိက အငြင်းပွားစရာ အချက်မှာ အမေရိကန်ဘက်က မြောက်အမေရိကတွင် ထုတ်လုပ်သည့် ကားများ၌ အမေရိကန်လုပ် အစိတ်အပိုင်း ၅၀ ရာခိုင်နှုန်းအထိ ပါဝင်ရမည်ဟု တောင်းဆိုနေခြင်း ဖြစ်ပါသည်။ မက္ကဆီကို အစိုးရဘက်ကမူ ဤအချက်ကို “၁ ရာခိုင်နှုန်းတောင် လက်မခံနိုင်ကြောင်း” အပြတ်အသတ် ငြင်းဆိုထားပြီး ဤသို့ သတ်မှတ်လိုက်ခြင်းသည် နောင်တွင် အခွန်နှုန်းထားများ ထပ်မံတိုးမြှင့်လာရန် လမ်းစဖွင့်ပေးလိုက်သလို ဖြစ်မည်ကို စိုးရိမ်နေကြခြင်း ဖြစ်ပါသည်။ လက်ရှိတွင် မက္ကဆီကိုဘက်ကလည်း အမေရိကန်သမ္မတ ဒေါ်နယ်ထရန့်က ချမှတ်ထားသည့် မော်တော်ကားနှင့် သံမဏိများအပေါ် အခွန်တိုးမြှင့်မှုများကို အရင်ဆုံး လျှော့ချပေးရန် တောင်းဆိုထားပါသည်။

အဆိုပါ ဆွေးနွေးပွဲများတွင် ကနေဒါနိုင်ငံကို ချန်လှပ်ထားခြင်းကြောင့် ကနေဒါအတွက် မရေရာမှုများ ရှိနေသော်လည်း ဝန်ကြီး Greer ကမူ ယခုနှစ်ကုန်တွင် ကနေဒါ၊ မက္ကဆီကိုတို့နှင့် သီးခြားစီ ကြားဖြတ် သဘောတူညီချက်များ ရရှိရန် မျှော်လင့်ထားကြောင်း ပြောကြားခဲ့ပါသည်။ မက္ကဆီကို စီးပွားရေးဝန်ကြီး အီဘရတ် ကမူ “ဆွေးနွေးမှုတွေဟာ အပြုသဘောဆောင်ခဲ့သလို သံမဏိနဲ့ အလူမီနီယံ ကိစ္စတွေအပြင် အာရှကနေ တင်သွင်းမှုတွေအစား ပြည်တွင်းဖြစ်တွေနဲ့ အစားထိုးမယ့် ကိစ္စတွေမှာ တိုးတက်မှုတွေ ရှိခဲ့ပါတယ်” ဟု သီးခြား ထုတ်ပြန်ချက်တွင် ဖော်ပြခဲ့ပါသည်။ သမ္မတ ထရန့်၏ အစိုးရအဖွဲ့သည် USMCA သဘောတူညီချက်ကို အသစ်ပြန်လည် မွမ်းမံရန် ငြင်းဆိုထားပြီး ပြဿနာများကို မဖြေရှင်းနိုင်ပါက နောက်ထပ် ၁၀ နှစ်အတွင်း အဆိုပါ သဘောတူညီချက်သည် အလိုအလျောက် ပျက်ပြယ်သွားမည်ဖြစ်ကြောင်း သိရပါသည်။

သတင်းရင်းမြစ် – Reuters