ဇွန် ၃၀၊ ၂၀၂၆

The Kaladan Post

 

အခြားအာရှနိုင်ငံသုံး ငွေကြေးတွေ တန်ဖိုးကျဆင်းနေတာနဲ့အတူ အိန္ဒိယရူပီးငွေကြေးတန်ဖိုးဟာလည်း အင်္ဂါနေ့ (ဇွန်လ ၃၀ ရက်) မှာ ဆက်လက်ကျဆင်းဖွယ်ရှိတယ်လို့ သိရပါတယ်။ ငွေကြေးကုန်သည်တွေရဲ့ အဆိုအရ နိုင်ငံခြားငွေဝင်ရောက်မှု (Inflows) နည်းပါးနေတာက ရူပီးအပေါ် ဖိအားပိုများစေပြီး ကာလတိုအတွင်း တန်ဖိုးပြန်တက်လာဖို့ အဟန့်အတား ဖြစ်စေတယ်လို့ ဆိုပါတယ်။

ပြီးခဲ့တဲ့ တနင်္လာနေ့က ရူပီးတန်ဖိုးဟာ ၀.၂ ရာခိုင်နှုန်း ကျဆင်းပြီး တစ်ဒေါ်လာကို ၉၄.၅၄ ရူပီးအထိ ရောက်ရှိခဲ့ပါတယ်။ အင်္ဂါနေ့ အရောင်းအဝယ်စတင်ချိန်မှာတော့ တစ်ဒေါ်လာကို ၉၄.၆၀ ကနေ ၉၄.၆၂ ရူပီးဝန်းကျင်မှာ ရှိနိုင်တယ်လို့ ကုန်သည်တွေက ခန့်မှန်းထားပါတယ်။ ရူပီးတန်ဖိုးဟာ ပြီးခဲ့တဲ့လလယ်ပိုင်းက တစ်ဒေါ်လာကို ၉၇ ရူပီးအထိ စံချိန်တင် အနိမ့်ဆုံးကျဆင်းခဲ့ပေမယ့်၊ ရေနံဈေးကျဆင်းလာမှုနဲ့ အိန္ဒိယဗဟိုဘဏ် (RBI) ရဲ့ ဝင်ရောက်ထိန်းကျောင်းမှုတွေကြောင့် ၉၄ ရူပီးဝန်းကျင်အထိ ပြန်လည်သက်သာလာခဲ့တာပါ။

ဒါပေမဲ့ မကြာသေးမီက အမေရိကန်ဒေါ်လာတန်ဖိုး ပြန်လည်အားကောင်းလာတာကြောင့် ရူပီးတန်ဖိုး ၉၄.၀၀ – ၉၄.၂၀ အထက်ကို ကျော်လွန်မြင့်တက်ဖို့ အကြိမ်ကြိမ် ကြိုးစားခဲ့ပေမယ့် မအောင်မြင်ခဲ့ပါဘူး။ ရူပီးတန်ဖိုး ပြန်တက်လာချိန်မှာ သွင်းကုန်လုပ်ငန်းရှင်တွေက ဒေါ်လာကို ကြိုတင်ဝယ်ယူထားတာ (Hedging) တွေနဲ့ စတော့ဈေးကွက်ထဲကို နိုင်ငံခြားငွေ ဝင်ရောက်မှု နည်းပါးနေတာတွေကလည်း ရူပီးတန်ဖိုး ဆက်မတက်နိုင်အောင် ဖိအားပေးနေတယ်လို့ ဘဏ်လုပ်ငန်းရှင်တွေက ထောက်ပြကြပါတယ်။

တနင်္လာနေ့က ရူပီးတန်ဖိုးဟာ တစ်ဒေါ်လာကို ၉၄.၂၅ အထိ အမြင့်ဆုံးရောက်ခဲ့ပေမယ့် နောက်ပိုင်းမှာ ပြန်လည်ကျဆင်းသွားခဲ့ပါတယ်။ ပုဂ္ဂလိကဘဏ်တစ်ခုက ငွေကြေးကုန်သည်တစ်ဦးက “လောလောဆယ် မဟာဗျူဟာကတော့ ဒေါ်လာကို ၉၄.၂၀-၉၄.၃၀ ဝန်းကျင်မှာ ဝယ်ယူပြီး၊ ဗဟိုဘဏ်က ဝင်ရောက်ထိန်းချုပ်လေ့ရှိတဲ့ ၉၄.၇၀-၉၄.၉၀ ဝန်းကျင် ရောက်ရင် ပြန်ရောင်းထုတ်ဖို့ပါပဲ။” လို့ သူတို့ရဲ့ ကုန်သွယ်မှု ဗျူဟာကို ရှင်းပြပါတယ်။

ကမ္ဘာ့ရေနံဈေးနှုန်းတွေကတော့ အီရန်စစ်ပွဲမတိုင်ခင် ဖေဖော်ဝါရီလနှောင်းပိုင်းက အခြေအနေအောက်ကို ပြန်လည်ကျဆင်းသွားတာကြောင့် ရူပီးအတွက် အထောက်အကူ ဖြစ်စေပါတယ်။ အင်္ဂါနေ့မှာ ဘရန့် (Brent) ရေနံစိမ်းဈေးဟာ တစ်စည်ကို ၇၂.၅၀ ဒေါ်လာဝန်းကျင်အထိ ကျဆင်းခဲ့ပါတယ်။ ရင်းနှီးမြှုပ်နှံသူတွေက ဒိုဟာ (Doha) မှာ ကျင်းပမယ့် အမေရိကန်-အီရန် ဆွေးနွေးပွဲအပေါ် အာရုံစိုက်နေကြပါတယ်။ သို့သော်လည်း ရေနံဈေးက စစ်မဖြစ်ခင် အခြေအနေ ပြန်ရောက်သွားပေမယ့်၊ ရူပီးတန်ဖိုးကတော့ စစ်မဖြစ်ခင်က ရှိခဲ့တဲ့ ၉၁ ရူပီးဝန်းကျင်ကို ပြန်မရောက်နိုင်သေးပါဘူး။

တစ်ချိန်တည်းမှာပဲ အမေရိကန်ဒေါ်လာအညွှန်းကိန်းဟာ ၁၀၁.၂၆ အထိ အနည်းငယ် မြင့်တက်လာပါတယ်။ အာရှငွေကြေးတွေထဲမှာတော့ အင်ဒိုနီးရှား ရူပီယာ (Rupiah) ငွေကြေးက အများဆုံး ကျဆင်းခဲ့ပြီး၊ ဂျပန်ယန်း (Yen) ငွေကတော့ ဒေါ်လာနဲ့ယှဉ်ရင် နှစ် ၄၀ အတွင်း အနိမ့်ဆုံးအဆင့်ကို ရောက်ရှိနေပါတယ်။ ယခုနှစ်ကုန်ပိုင်းမှာ အမေရိကန်ဗဟိုဘဏ် (Fed) က အတိုးနှုန်း ထပ်တင်မယ်ဆိုတဲ့ ခန့်မှန်းချက်တွေက ဒေါ်လာကို ဆက်လက်အားကောင်းစေတာ ဖြစ်ပါတယ်။

သတင်း Source: Reuters