ဇွန် ၁၅၊ ၂၀၂၆
The Kaladan Post
 
ယူကရိန်းသမ္မတ ဗိုလိုဒီမာ ဇလန်းစကီးဟာ အမေရိကန်သမ္မတ ဒေါ်နယ်ထရန့်နဲ့ ဖုန်းနဲ့ဆက်သွယ်ပြီး ၄ နှစ်ကျော် ကြာမြင့်နေပြီဖြစ်တဲ့ စစ်ပွဲကို အဆုံးသတ်နိုင်မယ့် နည်းလမ်းတွေကို ဆွေးနွေးခဲ့တယ်လို့ သိရပါတယ်။
 
ပြီးခဲ့တဲ့ တနင်္ဂနွေနေ့က ပြုလုပ်တဲ့ ဒီဖုန်းခေါ်ဆိုမှုအတွင်းမှာ သမ္မတ ဇလန်းစကီးက အသက် ၈၀ ပြည့်သွားပြီဖြစ်တဲ့ သမ္မတ ထရန့်ကို မွေးနေ့ဆုတောင်းစကား ဆိုခဲ့သလို၊ စစ်ပွဲတစ်လျှောက် အမေရိကန်ရဲ့ ကူညီပံ့ပိုးမှုတွေအတွက်လည်း ကျေးဇူးတင်စကား ပြောကြားခဲ့တယ်လို့ ဆိုပါတယ်။ ဒါဟာ ပြင်သစ်နိုင်ငံမှာ ကျင်းပမယ့် G7 ထိပ်သီးအစည်းအဝေးမတိုင်ခင်မှာ အခုလို ကြိုတင်ညှိနှိုင်း ဆွေးနွေးခဲ့ကြတာ ဖြစ်ပါတယ်။
 
ငြိမ်းချမ်းရေး အမြန်ဆုံး ရရှိဖို့အတွက် လက်ရှိ စစ်မြေပြင် အခြေအနေတွေနဲ့ ယူကရိန်းဘက်က အင်အား ပိုမိုတောင့်တင်းလာတဲ့ အခြေအနေတွေကိုလည်း ထရန့်ဆီ ရှင်းလင်း တင်ပြခဲ့တယ်လို့ သိရပါတယ်။ ဇလန်းစကီးက “ငြိမ်းချမ်းရေးကို ပိုပြီး နီးစပ်လာအောင် ကူညီပေးနိုင်မယ့် အကြံဉာဏ်ကောင်းတွေ ကျွန်တော်တို့ဆီမှာ ရှိနေပါတယ်” လို့ ၎င်းရဲ့ တယ်လီဂရမ် (Telegram) စာမျက်နှာမှာ ရေးသားထားပါတယ်။
 
ဒါ့အပြင် ပြင်သစ်နိုင်ငံ၊ အီဗီယန်-လက်စ်-ဘိန်းစ် (Evian-les-Bains) မြို့မှာ ကျင်းပမယ့် G7 အစည်းအဝေး ကာလအတွင်းမှာ သူတို့နှစ်ဦး လူကိုယ်တိုင် တွေ့ဆုံဖို့လည်း သဘောတူခဲ့ကြတယ်လို့ ဆိုပါတယ်။ အဲဒီ အစည်းအဝေးမှာ ယူကရိန်း-ရုရှား စစ်ပွဲကိစ္စကို အမေရိကန်နဲ့ ကမ္ဘာ့အချမ်းသာဆုံး နိုင်ငံတွေက ခေါင်းဆောင်တွေက အဓိကထား ဆွေးနွေးသွားကြဖို့ ရှိနေတယ်လို့ သိရပါတယ်။
 
သမ္မတ ဇလန်းစကီးကတော့ သမ္မတ ထရန့်အနေနဲ့ စစ်ပွဲကို အဆုံးသတ်ဖို့ ကြိုးပမ်းနေတဲ့နေရာမှာ အောင်မြင်မှုတွေ ရပါစေကြောင်း ဆုတောင်းပေးခဲ့တယ်လို့လည်း သတင်းထုတ်ပြန်ချက်အရ သိရှိရပါတယ်။
 
Source: Reuters