အမေရိကန် လူဝင်မှုကြီးကြပ်ရေး ထိန်းသိမ်းရေးစခန်း၌ ကျန်းမာရေးဖောက်ပြန်ခဲ့သည့် ရွှေ့ပြောင်းလုပ်သား သေဆုံး

ဩဂုတ် ၁၃၊ ၂၀၂၆

The Kaladan Post

အမေရိကန်ပြည်ထောင်စု နယူးဂျာစီပြည်နယ်ရှိ လူဝင်မှုနှင့် ကောက်ခံရေးအေဂျင်စီ (ICE) ထိန်းသိမ်းရေးစခန်းတွင် ဖမ်းဆီးထိန်းသိမ်းခံခဲ့ရသည့် ဂွာတီမာလာ ရွှေ့ပြောင်းနေထိုင်သူတစ်ဦးသည် ကျန်းမာရေး ဖောက်ပြန်မှုဖြစ်ပွားပြီး ဆေးရုံတက်ရောက်ခဲ့ရပြီးနောက် သေဆုံးသွားခဲ့ကြောင်း သမ္မတ ဒေါ်နယ်ထရမ့် အစိုးရက ဗုဒ္ဓဟူးနေ့ (ဩဂုတ်လ ၁၂ ရက်) တွင် သတင်းထုတ်ပြန်လိုက်ပါတယ်။

ဟိုဆေး ချာဂျွန်-ရက်ဆွန် (Jose Chajon-Raxon) သည် ဇူလိုင်လ ၁၈ ရက်တွင် နယူးဝပ် (Newark) မြို့ရှိ ဒဲလန်နီဟော (Delaney Hall) ထိန်းသိမ်းရေးစခန်း၌ ဖမ်းဆီးခံခဲ့ရပြီး နောက်တစ်နေ့တွင် ကျန်းမာရေး ဖောက်ပြန်ခဲ့ခြင်း ဖြစ်ပါတယ်။ အိမ်တွင်းလုံခြုံရေးဝန်ကြီးဌာန (DHS) က ၎င်းသည် တက်ရောဂါကဲ့သို့ “ဝေဒနာ ခံစားခဲ့ရသည်ကို သူနာပြုတစ်ဦးက တွေ့ရှိခဲ့သဖြင့်” ဆေးရုံသို့ ပို့ဆောင်ခဲ့ရပြီး ဇူလိုင်လ ၂၂ ရက်တွင် “ICE ၏ ထိန်းသိမ်းမှုမှ ကင်းလွတ်ခဲ့သည်” ဟု ထုတ်ပြန်ထားပါတယ်။

ထိန်းသိမ်းစခန်းမှ လွတ်မြောက်ပြီး သီတင်းပတ်အနည်းငယ်အကြာတွင် သေဆုံးခဲ့ခြင်းဖြစ်သဖြင့် ICE တွင် တာဝန်မရှိဟု DHS က ဆိုပါတယ်။ သို့သော် ဒီမိုကရက်တစ် လွှတ်တော်အမတ် ရော့ဘ် မီနန်ဒက်ဇ် (Rob Menendez) ကမူ ယခု ဖြစ်စဉ်နှင့် ပတ်သက်၍ ရှေ့နောက်မညီသည့် သတင်းအချက်အလက်များ ရရှိထားသည်ဟု ပြောကြားခဲ့ပါတယ်။

သမ္မတ ဒေါ်နယ်ထရမ့် ပြီးခဲ့သည့်နှစ် ဇန်နဝါရီလတွင် တာဝန်စတင်ယူချိန်မှစ၍ တစ်နိုင်ငံလုံးအတိုင်းအတာဖြင့် ICE ၏ ထိန်းသိမ်းမှုအောက်တွင် ပြည်သူ ၅၀ ကျော် သေဆုံးခဲ့ပြီး ဖြစ်ပါတယ်။ လူ့အခွင့်အရေး အဖွဲ့အစည်းများကလည်း ICE ထိန်းသိမ်းရေးစခန်းများ၏ ဆေးဝါးစောင့်ရှောက်မှုနှင့် နေထိုင်ရေး အခြေအနေများအပေါ် စိုးရိမ်မှုများ ဆက်တိုက် ထုတ်ဖော်နေကြပါတယ်။

Source – Reuters